প্রধানমন্ত্রীগী লোইশঙ
প্রধান মন্ত্রীনা তেলাঙ্গানাগী ৱারাঙ্গলদা লুপা করোর ৬,১০০ রোমগী তোঙান-তোঙানবা চাউখৎ-থৌরাংগী প্রোজেকশিং উরেপ-উয়ুং তমখ্রে
লুপা করোর ৫,৫৫০ রোমগী কিমি ১৭৬গী নেসনেল হায়ৱেজ প্রোজেকশিং উরেপ-উয়ুং তমগনি
কাজিপেত্তা লুপা করোর ৫০০ চঙনা রেলৱে মেনুফেকচরিং য়ুনিত শানবা উরেপ-উয়ুং তমখি
ভাদ্রকালি লাইশঙদা পুজা পাংথোকখি
“তেলুগু মীয়ামগী হৈথোই-শিংথোইবনা ভারতকী থবক তৌবা ঙম্বা হেনগৎহল্লে”
“ঙসিগী ভারতকী নহারোলশিং শক্তিগা লোয়ন্না শরুক য়ারি”
“ইনফ্রাস্ত্রকচর নিংথিনা লৈতনা ভারতনা য়াংনা চাউখৎপা ঙম্লোই”
“শেন-থুমগী মফমশিংগা তেলাঙ্গানাগা শম্নরি অমসুং শেন-থুম তানবগী মফম অমা ওইরে”
“মেনুফেকচরিং সেক্তর অসি নহারোলশিং থবক পীনবা অচৌবা মফম অমা ওইরক্লে”
Posted On:
08 JUL 2023 12:46PM by PIB Imphal
ঙসি প্রধান মন্ত্রী শ্রী নরেন্দ্র মোদীনা তেলাঙ্গানাগী ৱারাঙ্গলদা লুপা করোর ৬,১০০ রোমগী তোঙান-তোঙানবা চাউখৎ-থৌরাংগী প্রোজেকশিং উরেপ-উয়ুং তমখ্রে। চাউখৎ-থৌরাংগী থবকশিংগী মনুংদা লুপা করোর ৫,৫৫০ রোমগী কিমি ১৭৬গী নেসনেল হায়ৱেজ প্রোজেকশিং অমসুং কাজিপেত্তা লুপা করোর ৫০০ চঙনা রেলৱে মেনুফেকচরিং য়ুনিত শাবা য়াওরি। প্রধান মন্ত্রীনা ভাদ্রকালি লাইশঙদা পুজা পাংথোকখি।
থৌরম অদুদা তিনখিবা মীয়ামদা ৱা ঙাংবদা প্রধান মন্ত্রীনা হায়খি তেলাঙ্গানা অসি অনৌবা রাজ্য অমা ওইরবসু রাজ্য অসি চহি ৯ মপুংফারে। ভারতকী পুৱারিদা তেলাঙ্গানা অমসুং মসিগী মীয়াম্না পাংথোকখিবা থবকশিং শিংথানিঙাইনি। তেলুগু মীয়ামগী হৈথোই-শিংথোইবনা ভারতকী থবক তৌবা ঙম্বা হেনগৎহল্লে। মালেমদা খ্বাইদগী চাউবা ৫শুবা ইকোনোমি ওইহনবদা তেলাঙ্গানা মীয়ামগী থৌদাং শিংথানিঙাইনি অমসুং মালেম্না ভারত অসি শেন থাদফম অমা ওইনা লৌনরবা মরম্না খুদোংচাবা কয়া হেনগৎলক্নবগী থাজবা লৈরে। চাউখৎলবা ভারতকী মরমদা ৱারি শান্নবা কয়া লৈরে।
প্রধান মন্ত্রীনা হায়খি ঙসিগী ভারতকী নহারোলশিং শক্তিগা লোয়ন্না শরুক য়ারি। ২১শুবা চহিচাগী অহুমসুবা দিকেত্তা সনাগী যুগ অমা হৌরকখি অমসুং মীওই খুদিংমক্না মতম অসি মপুংফানা শীজিন্নগদবনি। চাউখৎ-থৌরাংগী লমদা ভারতকী মফম অমতা হুন্দোকলম্লোইদবনি। হৌখিবা চহি ৯ অসিদা তেলাঙ্গানাগী ইনফ্রাস্ত্রচরশিং শিংথাবা য়ানা চাউখৎলে। ঙসিগী লুপা করোর ৬০০০ হেনবগী প্রোজেকশিং অসিগীদমক মহাক্না তেলাঙ্গানাগী মীয়ামদা নুংঙাইবা ফোঙদোকখি।
প্রধান মন্ত্রীনা হায়খি পান্দমশিং ফংনবা অনৌবা লম্বীশিং থিবা দরকার ওই অমসুং ইনফ্রাস্ত্রচর য়াওদনা ভারতনা য়াংনা চাউখৎপা ওইথোক্লোই। লম্বী-থোং ফত্তবা অমসুং পুথোক-পুশিন্দা শেন য়াম্না চঙহনবা অসিনা ললোন-ইতিক চাউখৎপদা থিন্থহল্লি। সরকারনা চাউখৎ-থৌরাংগী থবকশিং য়াংনা অমসুং পাক-চাউনা পায়খৎলে। হায়ৱেশিং, এক্সপ্রেৱেশিং, ইকোনোমিক কোরিদোরশিং অমসুং ইন্দস্ত্রিএল কোরিদোরশিংগী নেতৱার্ক অমা শেম্লে অমসুং লেন-২ অমসুং লেন-৪গী হায়ৱেশিং লেন-৪ অমসুং লেন-৬গী হায়ৱেশিং ওইনা ওনখৎলে।
প্রধান মন্ত্রীনা হায়খি তেলাঙ্গানাগী হায়ৱে নেতৱার্ক শরুক অনি হেনগত্তুনা কিমি ২৫০০দগী কিমি ৫০০০দা হেনগৎলে। কিমি ২৫০০গী নেসনেল হায়ৱেশিং শেমগৎপগী থবক চৎথরি। তেলাঙ্গানা ফাওদুনা ভারতমালা প্রোজেক্কী মখাদা কোরিদোর কয়া শেমগৎলি অমসুং মসিগী মনুংদা হায়দ্রবাদ-ইন্দোর ইকোনোমিক কোরিদোর, চেন্নাই-সুরত ইকোনোমিক কোরিদোর, হায়দ্রবাদ-পানজি ইকোনোমিক কোরিদোর অমসুং হায়দ্রবাদ-ভিশাখাপত্নম ইন্তর কোরিদোর য়াওরি। শেন-থুমগী মফমশিংগা তেলাঙ্গানাগা শম্নরি অমসুং শেন-থুম তানবগী মফম অমা ওইরে।
ঙসি উরেপ-উয়ুং তমখিবা নাগপুর-বিজায়াৱাদা কোরিদোরগী মাঞ্চেরিয়েল-ৱারাঙ্গল সেক্সনগী মতাংদা প্রধান মন্ত্রীনা হায়খি মসিনা তেলাঙ্গানাগা মহারাস্ত্রা অমসুং অন্ধ্র প্রদেসকা শম্নবা হেনগৎহনগনি অমসুং মাঞ্চেরিয়েল অমসুং ৱারাঙ্গলগী মরক্তা লৈরিবা অরাপ্পা হন্থহল্লগনি। লমদম অসি ত্রাইবেল ফুরুপ কয়াগী লৈফম্নি অমসুং মতম কয়া মীরাইদুনা লাকখি। মসিগী কোরিদোর অসিনা রাজ্য অসিদা চৎথোক-চৎশিনগী থবক ফগৎহল্লগনি অমসুং কারিমনগর-ৱারাঙ্গল সেক্সন লেন-৪দা ওনখৎপা অসিনা হায়দ্রবাদ-ৱারাঙ্গল ইন্দস্ত্রিএল কোরিদোর, কাকাতিয়া মেগা তেক্সতাইল পার্ক অমসুং ৱারাঙ্গল এস.ই.জেৎ শম্নবা হেনগৎহল্লগনি।
প্রধান মন্ত্রীনা মখা তানা হায়খি তেলাঙ্গানাগী লম্বী-থোং ফগৎহনবা অসিনা রাজ্য অসিগী হেরিতেচ সেন্তরশিং অমসুং লাইনিংগী মফমশিংদা চৎপদা হেন্না খুদোংচাহন্দুনা মসিনা তেলাঙ্গানাগী তুরিজম অমসুং ইন্দস্ত্রিদা হকথেংননা কান্নবা পীরগনি। করিমনগরগী লৌউ-শিংউগী উদোগ অমসুং গ্রেনাইত ইন্দস্ত্রি সরকারনা পায়খৎলিবা থবকশিংনা কান্নবা পীরে। লৌমীশিং নত্ত্রগা শিন্মীশিং, মহৈরোয়শিং নত্ত্রগা শীনফম অমগী মীওইশিং, মীওই খুদিংমক কান্নবা ফংলে। নহারোলশিং মখোয়গী য়ুম ময়াদা অনৌবা থবক অমসুং মশানা মশাবু থবক পীজনবা খুদোংচাবশিং ফংলে।
কমদৌনা মেনুফেকচরিং সেক্তর অসি নহারোলশিং থবক পীনবা অচৌবা মফম অমা ওইরকপগে হায়বগী মতাংদা প্রধান মন্ত্রীনা হায়খি পি.এল.আই স্কিম্না লৈবাক অসিদা মেনুফেকচরিং পুক্নিং থৌগৎলে। মেনুফেকচরিংদা লৈরিবা মীওইশিং খুদোংচাবা হেন্না ফংলে। স্কিম অসিগী মখাদা তেলাঙ্গানাদা অচৌবা প্রোজেক ৫০ হেন্না পায়খৎলে। চহি অসিদা ভারতনা ঙাক-শেনগী খুৎলায়শিং মপান্দা থাদোকপগী অনৌবা রেকোর্দ থম্লে। হৌখিবা চহি ৯দা ভারতনা ঙাক-শেনগী খুৎলায়শিং মপান্দা থাদোকপা লুপা করোর ১৬,০০০ য়ৌখি। ভারত দাইনামিক্স লিমিতেদ হায়দ্রবাদনা মসিগী কান্নবশিং ফংলে।
প্রধান মন্ত্রীনা হায়খি মেনুফেকচরিংগী লমদা ভারত রেলৱেজনা অনৌবা রেকোর্দশিং থম্লে অমসুং অনৌবা থবক কয়া মাইপাক্না পায়খৎলে। মেক ইন ইন্দিয়াগী মখাদা বন্দে ভারত এক্সপ্রেস ত্রেনশিং শারে অমসুং চহি খর অসিদা ভারত রেলৱেজনা অনৌবা কোচশিং অমসুং লোকোমোতিপ লিশিং কয়া শাখ্রে। কাজিপেত্তা রেলৱে মেনুফেকচরিং য়ুনিত শানবা ঙসি উরেপ-উয়ুং তম্লিবা অসিনা ভারত ৱেলৱে হেন্না ফগৎহল্লগনি অমসুং কাজিপেত মেক ইন ইন্দিয়াগী অনৌবা শক্তিগী অনৌবা মফম অমা ওইরগনি। প্রোজেক অসিনা মফম অসিদা অনৌবা থবক ফংনবা খুদোংচাবা কয়া ফংলগনি অমসুং মওং অমা নত্ত্রগা মওং অমদা ইমুং খুদিংমক কান্নবা ফংলগনি। মসি সবকা সাথ, সবকা বিকাস হায়বা অদুনি অমসুং মসিগী চাউখৎপগী লাইৱা অসিগা লোয়ননা তেলাঙ্গানা মাঙলোমদা চঙশিনগনি।
থৌরম অদুদা তেলাঙ্গানাগী রাজ্যপাল দোক্তর তামিলিসাই সাউন্দরারাজন, রোদ, ত্রান্সপোর্ত অমসুং হায়ৱেজগী য়ুনিয়ন মিনিস্তর শ্রী নিতিন গাদকরি, তুরিজমগী য়ুনিয়ন মিনিস্তর শ্রী জি কিসন রেদ্দি অমসুং এম.পি শ্রী সঞ্জয় বান্দি শরুক য়াখি।
নুঙগীৱারোল
প্রধান মন্ত্রীনা উরেপ-উয়ুং তমখিবা মরুওইবা প্রোজেকশিংগী মনুংদা লুপা করোর ৫,৫০০ হেনবগী কিলোমিতর ১৭৫ শাংবা নেসনেল হায়ৱেজ প্রোজেকশিং য়াওরি। প্রোজেকশিংগী মনুংদা নাগপুর-বিজায়াৱাদা কোরিদোরগী কিলোমিতর ১০৮ শাংবা মাঞ্চেরিয়েল-ৱারাঙ্গাল সেক্সন য়াওরি। সেক্সন অসিনা মাঞ্চেরিয়েল অমসুং ৱারাঙ্গালগী কিলোমিতর ৩৪ তেনশিনহনগনি অমসুং এন.ঐচ-৪৪ অমসুং এন.ঐচ-৬৫ দা লম্বী চিনবা হন্থহনগনি। মহাক্না এন.ঐচ-৫৬৩গী কিলোমিতর ৬৮ শাংবা কারিমনাগর-ৱারাঙ্গাল সেক্সন ফগৎহন্নবা উরেপ-উয়ুং তমগনি। মসিনা হায়দ্রবাদ-ৱারাঙ্গাল ইন্দস্ত্রিএল কোরিদোর, কাকাতিয়া মেগা তেক্সতাইল পার্ক অমসুং এস.ই.জেৎ ৱারাঙ্গালদা চৎথোক-চৎশিনগী ফিবম ফগৎহনগনি।
প্রধান মন্ত্রীনা রেলৱে মেনুফেকচরিং য়ুনিত, কাজিপেত শানবা উরেপ-উয়ুং তমখ্রে। ৱাগোন শানবা য়ুনিত অসি লুপা করোর ৫০০ চঙনা পায়খৎকদবনি। মসিদা খ্বাইদগী নৌবা তেক্নোলোজি অমসুং ৱাগোনশিং রোবোতনা রং থাবগী থবকশিং য়াওগনি অমসুং অনৌবা মেছিনশিং অমসুং অনৌবা পোৎ-চৈ থমফমশিং য়াওগনি। মসিনা মফম অদুদা থবক ফংনবগী খুদোংচাবা পীগনি।
****
(Release ID: 1938244)
Visitor Counter : 98
Read this release in:
Bengali
,
English
,
Urdu
,
Marathi
,
Hindi
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam