ସମବାୟ ସମିତିଗୁଡ଼ିକୁ ସଶକ୍ତ କରି ସେମାନଙ୍କୁ ଆର୍ଥିକ ସହାୟତା ପ୍ରଦାନ କରିବା ଲାଗି ଏନସିଡିସି ଏକ ଶକ୍ତିଶାଳୀ ମାଧ୍ୟମ : ଶ୍ରୀ ଶାହ

ସମବାୟ ମନ୍ତ୍ରୀ ଶ୍ରୀ ଶାହ ଚିନି କାରଖାନା ଏବଂ ଦୁଗ୍ଧ କ୍ଷେତ୍ରରେ ଗତିଶୀଳ ଅର୍ଥବ୍ୟବସ୍ଥାକୁ ପ୍ରୋତ୍ସାହନ ଦେବା ଉପରେ ଗୁରୁତ୍ୱାରୋପ କରିଥିଲେ, ଯାହା ସିଧାସଳଖ କୃଷକମାନଙ୍କୁ ଲାଭାନ୍ୱିତ କରିବ

ଶ୍ରୀ ଶାହ କହିଛନ୍ତି ଦେଶର ପ୍ରଥମ ସମବାୟ ଟ୍ୟାକ୍ସି ସେବା ଆରମ୍ଭ କରିବାରେ ଏନସିଡିସି ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି; ଏହା ଡ୍ରାଇଭରମାନଙ୍କୁ ବହୁତ ଉପକୃତ କରିବ

ବିଗତ କିଛି ବର୍ଷ ମଧ୍ୟରେ, ସମବାୟ ସଂସ୍ଥାଗୁଡ଼ିକୁ ଏନସିଡିସି ଦ୍ୱାରା ପ୍ରଦାନ କରାଯାଉଥିବା ଆର୍ଥିକ ସହାୟତା ପାଖାପାଖି ଚାରି ଗୁଣ ବୃଦ୍ଧି ପାଇ ୯୫,୨୦୦ କୋଟି ଟଙ୍କାରେ ପହଞ୍ଚିଛି

ଏନସିଡିସିର ସହାୟତାରେ ୧୦୭୦ଟି ଏଫ. ଏଫ. ପି. ଓ. କୁ ସୁଦୃଢ଼ କରିବା; ଆହୁରି ୨୩୪୮ଟି ଉପରେ କାର୍ଯ୍ୟ ଜାରି ରହିଛି

ଶ୍ରୀ ଶାହ ଦୁଗ୍ଧ, ପଶୁପାଳନ, ମତ୍ସ୍ୟଚାଷ ଏବଂ ମହିଳା ସମବାୟ ସମିତି ଉପରେ ବିଶେଷ ଧ୍ୟାନ ଦେବାକୁ ନିର୍ଦ୍ଦେଶ ଦେଇଛନ୍ତି: ଏନସିଡିସି ୨୦,୦୦୦ କୋଟି ଟଙ୍କା ଆବଣ୍ଟନ କରିବ

ନୀଳ ଅର୍ଥବ୍ୟବସ୍ଥାକୁ ପ୍ରୋତ୍ସାହନ ଦେଉଥିବା ଏନସିଡିସି: ଗଭୀର ସମୁଦ୍ରରେ ମାଛ ଧରିବା ପାଇଁ ପ୍ରଦାନ କରାଯାଇଥିବା ଟ୍ରଲର ମହିଳାମାନଙ୍କୁ ଆର୍ଥିକ ଦୃଷ୍ଟିରୁ ସଶକ୍ତ କରିଛି

ଜାମ୍ମୁ-କାଶ୍ମୀର, ଲଦାଖ ଏବଂ ଉତ୍ତର-ପୂର୍ବରେ ନୂତନ କାର୍ଯ୍ୟାଳୟ ଖୋଲି ଏନସିଡିସି ଏହାର ନେଟୱାର୍କକୁ ବିସ୍ତାର କରିଛି

କେନ୍ଦ୍ର ଗୃହ ଏବଂ ସମବାୟ ମନ୍ତ୍ରୀ ଶ୍ରୀ ଅମିତ ଶାହ ଆଜି ନୂଆଦିଲ୍ଲୀରେ ଜାତୀୟ ସମବାୟ ବିକାଶ ନିଗମ (ଏନସିଡିସି)ର ୯୨ତମ ସାଧାରଣ ପରିଷଦ ବୈଠକକୁ ସମ୍ବୋଧିତ କରିଛନ୍ତି। ସେ କହିଥିଲେ ଯେ, ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ସମବାୟ ମନ୍ତ୍ରଣାଳୟ ପ୍ରତିଷ୍ଠା ହେବା ପରେ ସମବାୟ କ୍ଷେତ୍ରରେ ଅଭୂତପୂର୍ବ ପ୍ରଗତି ଘଟିଛି ଏବଂ ଏନସିଡିସି ଏହି ପରିବର୍ତ୍ତନର ପ୍ରମୁଖ ମୂଳଦୁଆ ଭାବେ ଉଭା ହୋଇଛି। ସମବାୟ ଆନ୍ଦୋଳନ ଜରିଆରେ କୃଷକ, ଗ୍ରାମୀଣ ପରିବାର, ମତ୍ସ୍ୟଜୀବୀ, କ୍ଷୁଦ୍ର ଉତ୍ପାଦକ ଏବଂ ଉଦ୍ୟୋଗୀମାନଙ୍କ ଜୀବନରେ ସକାରାତ୍ମକ ପରିବର୍ତ୍ତନ ଆଣିବା ଲାଗି ସରକାର ପ୍ରତିଶ୍ରୁତିବଦ୍ଧ ଏବଂ ଆତ୍ମନିର୍ଭରଶୀଳତା ଦିଗରେ ରାଷ୍ଟ୍ରର ପ୍ରୟାସରେ ସହଯୋଗ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛି।

ଶ୍ରୀ ଅମିତ ଶାହ ତାଙ୍କ ଅଭିଭାଷଣରେ କହିଥିଲେ ଯେ, ସମବାୟ ସମିତିଗୁଡ଼ିକୁ ସଶକ୍ତ କରିବା ଏବଂ ସେମାନଙ୍କ ପାଇଁ ଆର୍ଥିକ ସହାୟତା ଉପଲବ୍ଧ କରାଇବା ଉଦ୍ଦେଶ୍ୟରେ ସ୍ଥାପିତ ଏନସିଡିସି ଚଳିତ ଆର୍ଥିକ ବର୍ଷରେ ୨୪,୭୦୦ କୋଟି ଟଙ୍କାରୁ ୯୫,୨୦୦ କୋଟି ଟଙ୍କାକୁ ବୃଦ୍ଧି କରିଛି। ବିଗତ ଚାରି ବର୍ଷ ମଧ୍ୟରେ, ଏନ. ସି. ଡି. ସି. ସମବାୟ କ୍ଷେତ୍ରକୁ ସୁଦୃଢ଼ କରିବା ପାଇଁ ପ୍ରମୁଖ ପଦକ୍ଷେପ ଗ୍ରହଣ କରିଛି ଏବଂ ଆର୍ଥିକ ଅନ୍ତର୍ଭୂକ୍ତିକରଣ, ନବସୃଜନ ଏବଂ ସମ୍ପ୍ରସାରଣ କ୍ଷେତ୍ରରେ ନୂତନ କିର୍ତ୍ତୀମାନ ସ୍ଥାପନ କରିଛି।

ଶ୍ରୀ ଅମିତ ଶାହ କହିଥିଲେ, ଭାରତକୁ ଏକ ବିକଶିତ ଅର୍ଥବ୍ୟବସ୍ଥାରେ ପରିଣତ କରିବା ପାଇଁ ସମବାୟ ଏକ ଉତ୍କୃଷ୍ଟ ମଡେଲ କାରଣ ଏହା ଗ୍ରାମାଞ୍ଚଳରେ ଅଂଶଗ୍ରହଣ ଏବଂ ଜୀବିକା ସୁଯୋଗ ସୁନିଶ୍ଚିତ କରିଥାଏ। ଗତ ଚାରି ବର୍ଷ ମଧ୍ୟରେ, ଏନସିଡିସି ୪୦ ପ୍ରତିଶତରୁ ଅଧିକ ଚକ୍ରବୃଦ୍ଧି ବାର୍ଷିକ ଅଭିବୃଦ୍ଧି ହାର ପଞ୍ଜିକୃତ କରିଛି, ଶୂନ୍ୟ ନିଟ୍ ଏନପିଏ ବଜାୟ ରଖିଛି, ଏବଂ ଏହାର ସର୍ବୋଚ୍ଚ ନିଟ୍ ଲାଭ ୮୦୭ କୋଟି ଟଙ୍କା ହାସଲ କରିଛି, ଯାହା ଅନୁଷ୍ଠାନର ବିଶ୍ୱସନୀୟତା ଏବଂ ପ୍ରତିଷ୍ଠାକୁ ମଜବୁତ କରିଛି। ଡି. ସି. ସି. ବି., ରାଜ୍ୟ ସମବାୟ ବ୍ୟାଙ୍କ ଏବଂ ରାଜ୍ୟ ବିପଣନ ସଂଘ ମାଧ୍ୟମରେ ଦୁଗ୍ଧ, ଖାଦ୍ୟ ପ୍ରକ୍ରିୟାକରଣ, ବୟନ ଶିଳ୍ପ ଏବଂ ବିପଣନ କ୍ଷେତ୍ରରେ ଏନ. ସି. ଡି. ସି. ପ୍ରଭାବୀ ଢଙ୍ଗରେ କାର୍ଯ୍ୟ କରିଛି।

ପାକସ୍‍ ଗୁଡ଼ିକୁ କୃଷକ ଉତ୍ପାଦକ ସଙ୍ଗଠନ ଭାବେ ବିକଶିତ କରିବା ଲାଗି ନିଆଯାଉଥିବା ପ୍ରୟାସ ଦ୍ୱାରା କୃଷକମାନେ ନିଜ ଉତ୍ପାଦ ପାଇଁ ଉଚିତ ମୂଲ୍ୟ ପାଇବେ ଏବଂ ବ୍ୟକ୍ତିଗତ ଲାଭ ଅପେକ୍ଷା ଗୋଷ୍ଠୀଗତ ଲାଭକୁ ପ୍ରୋତ୍ସାହିତ କରିବେ।

ସବୁଜ ବିପ୍ଳବ ପରେ ଜୈବିକ କୃଷି, ଜୈବିକ ଉତ୍ପାଦନ ଏବଂ ରପ୍ତାନୀକୁ ପ୍ରୋତ୍ସାହନ ଦେବା ପାଇଁ ଜାତୀୟ ସମବାୟ ରପ୍ତାନି ଲିମିଟେଡ (ଏନସିଇଏଲ), ଭାରତୀୟ ବିହନ ସମବାୟ ସମିତି ଲିମିଟେଡ (ବିବିଏସଏସଏଲ), ଏବଂ ଜାତୀୟ ସମବାୟ ଜୈବିକ ଲିମିଟେଡ (ଏନସିଓଏଲ) ଭଳି ବହୁ-ରାଜ୍ୟ ସମବାୟ ସଂସ୍ଥା ଏହି ପଦକ୍ଷେପଗୁଡ଼ିକୁ ଆଗେଇ ନେବା ପାଇଁ ପ୍ରତିଶ୍ରୁତିବଦ୍ଧ।

ମତ୍ସ୍ୟଚାଷ କ୍ଷେତ୍ରରେ, ଏନସିଡିସି ୧୦୭୦ଟି ଏଫଏଫପିଓ ଗଠନ ଏବଂ ସୁଦୃଢ଼ୀକରଣ ଲକ୍ଷ୍ୟ ହାସଲ କରିଛି ଏବଂ ପ୍ରଧାନମନ୍ତ୍ରୀ ମତ୍ସ୍ୟ କିଷାନ ସମୃଦ୍ଧି ସାହ-ଯୋଜନା ଅଧୀନରେ ୨୩୪୮ଟି ଏଫଏଫପିଓକୁ ସୁଦୃଢ଼ କରିବା ପାଇଁ କାର୍ଯ୍ୟ ଜାରି ରହିଛି। ମହାରାଷ୍ଟ୍ର ଏବଂ ଗୁଜରାଟରେ ଗଭୀର ସମୁଦ୍ରରେ ମାଛ ଧରିବାକୁ ଟ୍ରଲର କିଣିବା ପାଇଁ ପ୍ରଦାନ କରାଯାଇଥିବା ଆର୍ଥିକ ସହାୟତା ନୀଳ ଅର୍ଥବ୍ୟବସ୍ଥାକୁ ବୃଦ୍ଧି କରିଛି ଏବଂ ମତ୍ସ୍ୟଜୀବୀ ସମ୍ପ୍ରଦାୟ, ବିଶେଷ କରି ମହିଳାମାନଙ୍କୁ ଆର୍ଥିକ ଦୃଷ୍ଟିରୁ ସଶକ୍ତ କରିଛି।

ଶ୍ରୀ ଶାହ କହିଥିଲେ ଯେ, ଚିନି ଏବଂ ଦୁଗ୍ଧ କ୍ଷେତ୍ରରେ ଗତିଶୀଳ ଅର୍ଥବ୍ୟବସ୍ଥାକୁ ପ୍ରୋତ୍ସାହିତ କରାଯିବା ଉଚିତ, ଯାହାଦ୍ୱାରା ଲାଭପ୍ରଦତା ବୃଦ୍ଧି ହୋଇପାରିବ। ସମବାୟ ଚିନି କାରଖାନାଗୁଡ଼ିକର ଆଧୁନିକୀକରଣ ପାଇଁ ପ୍ରଦାନ କରାଯାଇଥିବା ୧୦୦୦ କୋଟି ଟଙ୍କାର ସରକାରୀ ଅନୁଦାନ ଆଧାରରେ, ଏନସିଡିସି ଇଥାନଲ ପ୍ଲାଣ୍ଟ, କୋ-ଜେନ ଏବଂ କାର୍ଯ୍ୟକାରୀ ପୁଞ୍ଜି ପାଇଁ ୫୬ଟି ଚିନି କାରଖାନାଗୁଡ଼ିକୁ ୧୦,୦୦୫ କୋଟି ଟଙ୍କା ପ୍ରଦାନ କରିଛି, ଯାହାଦ୍ୱାରା କାରଖାନାଗୁଡ଼ିକ ବିକଳ୍ପ ଆୟ ଧାରା ଏବଂ ସ୍ୱଳ୍ପ ସୁଧରେ ଋଣ ପାଇପାରିବେ।

ଶ୍ରୀ ଅମିତ ଶାହ କହିଥିଲେ ଯେ, ସମବାୟ ଭିତ୍ତିକ "ଭାରତ ଟ୍ୟାକ୍ସି" ରାଇଡ୍-ହେଲିଂ ସେବା ପ୍ରତିଷ୍ଠା କରିବାରେ ଏନସିଡିସି ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛି। ନୂତନ ବହୁ-ରାଜ୍ୟ ସମବାୟ ସମିତି ପଞ୍ଜିକୃତ ହୋଇଛି, ଏବଂ ବୈଷୟିକ ବିକାଶ ସହିତ ଡ୍ରାଇଭର ପଞ୍ଜୀକରଣ ଚାଲିଛି।

ଏନସିଡିସି ବିଜୟୱାଡାରେ ଏକ ନୂତନ ଆଞ୍ଚଳିକ କାର୍ଯ୍ୟାଳୟ ଏବଂ ଜାମ୍ମୁ କାଶ୍ମୀର, ଲଦାଖ, ସିକିମ, ମଣିପୁର, ମିଜୋରାମ, ତ୍ରିପୁରା, ଅରୁଣାଚଳ ପ୍ରଦେଶ, ମେଘାଳୟ ଏବଂ ନାଗାଲାଣ୍ଡରେ ଉପ-କାର୍ଯ୍ୟାଳୟ ପ୍ରତିଷ୍ଠା କରି ସହଯୋଗର ପରିସରକୁ ବିସ୍ତାର କରିଛି।

୨୦୨୫ ମସିହା ଜୁଲାଇ ୩୧ ତାରିଖରେ ମଞ୍ଜୁର ହୋଇଥିବା ୨,୦୦୦ କୋଟି ଟଙ୍କାର ସରକାରୀ ଅନୁଦାନ ଆଧାରରେ, ଦୁଗ୍ଧ, ପଶୁପାଳନ, ମତ୍ସ୍ୟଚାଷ, ଚିନି, ବୟନଶିଳ୍ପ, ଖାଦ୍ୟ ପ୍ରକ୍ରିୟାକରଣ, ଭଣ୍ଡାର, ଶୀତଳ ଭଣ୍ଡାର, କୃଷି ଏବଂ ମହିଳା ସମବାୟ ସମିତିଗୁଡ଼ିକୁ ରିହାତି ହାରରେ ଦୀର୍ଘକାଳୀନ ଏବଂ କାର୍ଯ୍ୟକାରୀ-ପୁଞ୍ଜି ଋଣ ପ୍ରଦାନ କରିବା ପାଇଁ ଏନସିଡିସି ୨୦,୦୦୦ କୋଟି ଟଙ୍କା ସଂଗ୍ରହ କରୁଛି। ଏହା ସହିତ, ଏନସିଡିସି ସହରାଞ୍ଚଳ ସମବାୟ ବ୍ୟାଙ୍କ ଏବଂ ସହକାର ସାରଥୀର ପ୍ରମୁଖ ସଂଗଠନକୁ ଯଥେଷ୍ଟ ସହାୟତା ପ୍ରଦାନ କରିଛି, ଯାହା ମାଧ୍ୟମରେ ସହରାଞ୍ଚଳ ଏବଂ ଗ୍ରାମୀଣ ସମବାୟ ବ୍ୟାଙ୍କଗୁଡ଼ିକୁ ଜ୍ଞାନେକୌଶଳ ସେବା ପ୍ରଦାନ କରାଯିବ।

ଯୁବ ଭାଗିଦାରୀ ବୃଦ୍ଧି କରିବା ପାଇଁ, ଏନସିଡିସିର "ସମବାୟ ଇଣ୍ଟର୍ଣ୍ଣ" କାର୍ଯ୍ୟକ୍ରମ ପ୍ରଭାବୀ ଢଙ୍ଗରେ କାର୍ଯ୍ୟକାରୀ କରାଯାଉଛି, ଯାହା ଅଧୀନରେ ମନୋନୀତ ଇଣ୍ଟର୍ଣ୍ଣମାନେ ସମବାୟ ସଂସ୍ଥାଗୁଡ଼ିକୁ ବୈଷୟିକ ଏବଂ ପରିଚାଳନା ସହାୟତା ପ୍ରଦାନ କରୁଛନ୍ତି।

ଏନସିଡିସିର ସାଧାରଣ ପରିଷଦରେ ୫୧ ଜଣ ସଦସ୍ୟ ଥିଲେ, ଯେଉଁଥିରେ ବିଭିନ୍ନ ମନ୍ତ୍ରଣାଳୟ, ରାଜ୍ୟ ସରକାର, ଶୀର୍ଷ ସମବାୟ ସଂଗଠନ ଏବଂ ନୀତି ଆୟୋଗର ବରିଷ୍ଠ ଅଧିକାରୀମାନେ ସାମିଲ ଥିଲେ। ଏହି ପରିଷଦ ହେଉଛି ସମବାୟ ବିକାଶ, କୃଷି, ଗ୍ରାମୀଣ ଭିତ୍ତିଭୂମି ଏବଂ ଆନୁସଙ୍ଗିକ କ୍ଷେତ୍ର ପାଇଁ ଆର୍ଥିକ ସହାୟତା ପାଇଁ ନୀତି ଏବଂ ନିର୍ଦ୍ଦେଶାବଳୀ ପ୍ରସ୍ତୁତ କରିବା ପାଇଁ ଦାୟୀ ସର୍ବୋଚ୍ଚ ସଂସ୍ଥା ।

HS