• ବିହନ ସମ୍ବନ୍ଧୀୟ ପ୍ରସଙ୍ଗରେ ସରକାରଙ୍କ ସହ ମିଳିତ ଭାବେ କାର୍ଯ୍ୟ କରିବାକୁ ଘରୋଇ କ୍ଷେତ୍ରକୁ ଶ୍ରୀ ଚୌହାନଙ୍କ ଅନୁରୋଧ 
• ବିହନ ମୂଲ୍ୟ ବୃଦ୍ଧିକୁ ନିୟନ୍ତ୍ରଣ କରିବା ଏବଂ ଗୁଣବତ୍ତା ସମ୍ବନ୍ଧୀୟ ଅଭିଯୋଗଗୁଡ଼ିକର ସମାଧାନ କରିବା ସହିତ ଯେଉଁମାନେ ଦୋଷୀ ସାବ୍ୟସ୍ତ ହେବେ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ: ଶ୍ରୀ ଶିବରାଜ ସିଂହ ଚୌହାନ
• ଆଗାମୀ ବଜେଟ୍ ଅଧିବେଶନରେ ସରକାର ବିହନ ଏବଂ କୀଟନାଶକ ସମ୍ବନ୍ଧୀୟ ଏକ ନୂଆ ଆଇନ ଆଣିବାକୁ ବିଚାର
• ସରକାରଙ୍କ ସାଥୀ ପୋର୍ଟାଲରେ ଲଗ୍ ଇନ୍ କରିବାକୁ ଏବଂ ଏହାର ସୁବିଧାଗୁଡ଼ିକର ଉପଯୋଗ କରିବାକୁ କେନ୍ଦ୍ରମନ୍ତ୍ରୀଙ୍କ ନିବେଦନ
• “ଏସୀୟ ବିହନ କଂଗ୍ରେସ ୨୦୨୫”ର ଲୋଗୋ ଉନ୍ମୋଚନ

କେନ୍ଦ୍ର କୃଷି ଏବଂ କୃଷକ କଲ୍ୟାଣ ତଥା ଗ୍ରାମୀଣ ବିକାଶ ମନ୍ତ୍ରୀ ଶିବରାଜ ସିଂ ଚୌହାନ ଆଜି ମୁମ୍ବାଇରେ ଏସୀୟ ବିହନ କଂଗ୍ରେସ ୨୦୨୫କୁ ଉଦଘାଟନ କରିଛନ୍ତି। ଉଦଘାଟନୀ ସମାରୋହରେ ଏସୀୟ ବିହନ କଂଗ୍ରେସ ୨୦୨୫ର ଲୋଗୋ ମଧ୍ୟ ଉନ୍ମୋଚନ କରାଯାଇଥିଲା, ଏବଂ ଚଳିତ ବର୍ଷର କଂଗ୍ରେସର ବିଷୟବସ୍ତୁ ହେଉଛି "ଗୁଣାତ୍ମକ ବିହନ ମାଧ୍ୟମରେ ସମୃଦ୍ଧିର ବୀଜ ବୁଣିବା" ।  

ଉଦଘାଟନୀ ଅଭିଭାଷଣରେ ଶ୍ରୀ ଚୌହାନ କହିଥିଲେ ଯେ, ସରକାରଙ୍କ ମୁଖ୍ୟ ଉଦ୍ଦେଶ୍ୟ ହେଉଛି ଦେଶର ଖାଦ୍ୟ ସୁରକ୍ଷା ସୁନିଶ୍ଚିତ କରିବା, ଲୋକଙ୍କୁ ପୁଷ୍ଟିକର ଖାଦ୍ୟ ଯୋଗାଇବା ଏବଂ କୃଷକମାନଙ୍କ ପାଇଁ କୃଷି ଏକ ଲାଭଜନକ ବ୍ୟବସାୟ ହୋଇ ରହିବା ସୁନିଶ୍ଚିତ କରିବା।  ସରକାର ହେକ୍ଟର ପିଛା ଉତ୍ପାଦକତା ବୃଦ୍ଧି, କୃଷକମାନଙ୍କୁ ଭଲ ବିହନ ଯୋଗାଇବା ଏବଂ ଉତ୍ପାଦନ ଖର୍ଚ୍ଚ ହ୍ରାସ କରିବା ଉପରେ ଧ୍ୟାନ ଦେଇଛନ୍ତି। କୃଷକମାନଙ୍କ ଉତ୍ପାଦ ପାଇଁ ଉଚିତ ମୂଲ୍ୟ ସୁନିଶ୍ଚିତ କରିବା, ଆବଶ୍ୟକ ସମୟରେ ସେମାନଙ୍କୁ କ୍ଷତିପୂରଣ ଦେବା ଏବଂ କୃଷି ପଦ୍ଧତିର ବିବିଧତା ଉପରେ ଧ୍ୟାନ ଦେବା ଉପରେ ସରକାର ଅଧିକ ପ୍ରାଥମିକତା ଦେଇଛନ୍ତି।

ଶ୍ରୀ ଚୌହାନ କହିଥିଲେ ଯେ, ଭାରତୀୟ କୃଷି ଗବେଷଣା ପରିଷଦ (ଆଇସିଏଆର୍) ଏବଂ ବିଭିନ୍ନ ରାଜ୍ୟ ଅନୁଷ୍ଠାନ ଜୈବ-ପୁଷ୍ଟିକର ଫସଲ କିସମ ତଥା ଜଳବାୟୁ ପରିବର୍ତ୍ତନ ପ୍ରତି ସହନଶୀଳ କିସମ ବିକଶିତ କରିବା ଲାଗି ପ୍ରୟାସ କରୁଛନ୍ତି, ଯାହାଦ୍ୱାରା କୁପୋଷଣର ଗମ୍ଭୀର ସମସ୍ୟାକୁ ଦୂର କରାଯାଇପାରିବ। ଉଚ୍ଚମାନର ବିହନ ବିକଶିତ କରିବା ଲାଗି ରାଷ୍ଟ୍ରାୟତ୍ତ କ୍ଷେତ୍ରର ସଂସ୍ଥାନଗୁଡ଼ିକ ସହିତ ଘରୋଇ କ୍ଷେତ୍ରର ଯୋଗଦାନ ମଧ୍ୟ ଆବଶ୍ୟକ। ସେ କହିଥିଲେ ଯେ, ଭାରତୀୟ କୃଷି କ୍ଷେତ୍ର ପାଇଁ ଘରୋଇ କ୍ଷେତ୍ରରୁ ଆସୁଥିବା ବିହନ ବ୍ୟୟବହୁଳ ଏବଂ ଆମର ଅଧିକାଂଶ କୃଷକ ଦୁର୍ବଳ ବର୍ଗର ହୋଇଥିବାରୁ ସେମାନେ ଏହି ବିହନ କିଣିପାରିବେ ନାହିଁ। ତେଣୁ, ସେ ଘରୋଇ କ୍ଷେତ୍ରକୁ ଅନୁରୋଧ କରିଥିଲେ ଯେ ସେମାନେ ବିହନ ମୂଲ୍ୟକୁ ଅଧିକ ସୁଲଭ କରନ୍ତୁ।

କେନ୍ଦ୍ରମନ୍ତ୍ରୀ କହିଥିଲେ, ପ୍ରତିବର୍ଷ ବଦଳାଇବାର ଆବଶ୍ୟକତା ନଥିବା ବିହନ ଯଦି କୃଷକମାନଙ୍କୁ ଉପଲବ୍ଧ କରାଯାଏ, ତେବେ ଆମ କୃଷକ ସମ୍ପ୍ରଦାୟର ଏକ ପ୍ରମୁଖ ଚିନ୍ତା ଦୂର ହେବ। କମ୍ କିମ୍ବା ଅତି କମ୍ ଅଙ୍କୁରୋଦୟ କ୍ଷମତା ଥିବା ନିମ୍ନମାନର ବିହନ ସମସ୍ୟାର ସମାଧାନ କରିବା ଏବଂ ଏଥିପାଇଁ ଦାୟୀ ବ୍ୟକ୍ତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ଲାଗି ସେ କମ୍ପାନୀଗୁଡ଼ିକୁ ନିର୍ଦ୍ଦେଶ ଦେଇଥିଲେ।

କେନ୍ଦ୍ର କୃଷି ଏବଂ କୃଷକ କଲ୍ୟାଣ ମନ୍ତ୍ରଣାଳୟ ଦ୍ୱାରା ଆରମ୍ଭ କରାଯାଇଥିବା ସାଥୀ ପୋର୍ଟାଲରେ ଲଗ୍ ଇନ୍ କରିବାକୁ ଏବଂ ଏହି ପୋର୍ଟାଲରେ ଉପଲବ୍ଧ ସୁବିଧାଗୁଡ଼ିକର ଉପଯୋଗ କରିବାକୁ ଶ୍ରୀ ଶିବରାଜ ସିଂ ଚୌହାନ କୃଷି କ୍ଷେତ୍ରର ପ୍ରତ୍ୟେକ ଅଂଶୀଦାରଙ୍କୁ ନିବେଦନ କରିଛନ୍ତି। ଜଳବାୟୁ-ସହନଶୀଳ କିସମର ବିକାଶ ହେଉଛି ସମୟର ଆବଶ୍ୟକତା। ଆମ ଦେଶରେ ୧୫ଟି କୃଷି-ଜଳବାୟୁ କ୍ଷେତ୍ର ରହିଛି, ଏବଂ ସେଥିପାଇଁ, ଆମକୁ ଏପରି କିସମର ବିକାଶ କରିବାର ଆବଶ୍ୟକତା ରହିଛି ଯାହା ମରୁଡ଼ି, ଉତ୍ତାପ ଏବଂ କୀଟନାଶକକୁ ପ୍ରତିରୋଧ କରିପାରିବ। ସେ ସୂଚନା ଦେଇଛନ୍ତି ଯେ ଜିନୋମ ଏଡିଟିଙ୍ଗର ଉନ୍ନତ କୌଶଳ ବ୍ୟବହାର କରି ଦୁଇ ପ୍ରକାରର ଧାନ ବିକଶିତ କରାଯାଇଛି, ଯାହା କମ୍ ଜଳ ବ୍ୟବହାର ସହିତ ଉତ୍ପାଦକତା ୧୯ ରୁ ୪୦ ପ୍ରତିଶତ ବୃଦ୍ଧି କରିବ ଏବଂ ଅଙ୍ଗାରକାମ୍ଳ ନିର୍ଗମନ ମଧ୍ୟ ହ୍ରାସ କରିବ।

ବିହନ ଉତ୍ପାଦନକାରୀଙ୍କ ସହ କଥାବାର୍ତ୍ତା ବେଳେ ସେ ମୋଟା ଶସ୍ୟ କ୍ଷେତ୍ରରେ ଅଧିକ ଗବେଷଣା ଏବଂ ବିକାଶର ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲେ। ସେ ଘରୋଇ କମ୍ପାନୀମାନଙ୍କୁ ସେମାନଙ୍କ ସମସ୍ୟା ସରକାରଙ୍କ ସମ୍ମୁଖରେ ଉପସ୍ଥାପନ କରିବାକୁ ନିବେଦନ କରିଥିଲେ। ସେ କମ୍ପାନୀଗୁଡ଼ିକୁ ବଜାରକୁ ନୂଆ ବିହନ ଆଣିବା ପାଇଁ ଲାଗୁଥିବା ସମୟକୁ କିପରି ହ୍ରାସ କରାଯାଇପାରିବ ସେ ବିଷୟରେ ବିଚାର କରିବାକୁ କହିଥିଲେ ଏବଂ ଏହି ବିହନଗୁଡ଼ିକର ପରୀକ୍ଷଣ ପାଇଁ ଲାଗୁଥିବା ସମୟକୁ ହ୍ରାସ କରିବା ଲାଗି ପ୍ରୟାସ କରିବାକୁ ସେ ରାଜି ହୋଇଥିଲେ। ପରୀକ୍ଷଣର ମୂଲ୍ୟ ଅତ୍ୟଧିକ, ଏବଂ ସରକାର ଏ ଦିଗରେ ଘରୋଇ କ୍ଷେତ୍ର ସହିତ ମିଳିତ ଭାବେ କାର୍ଯ୍ୟ କରିବାକୁ ପ୍ରସ୍ତୁତ ଅଛନ୍ତି। ଯେଉଁମାନେ ବିହନ ସମ୍ବନ୍ଧରେ ଭୁଲ ପଦକ୍ଷେପ ନେବେ ଏବଂ ବେଆଇନ ବ୍ୟବସାୟରେ ସମ୍ପୃକ୍ତ ସେମାନଙ୍କୁ କଦାପି କ୍ଷମା କରାଯିବ ନାହିଁ ବୋଲି ଦୃଢ଼ ଚେତାବନୀ ଦେଇ ସେ ଏଭଳି ଲୋକଙ୍କୁ ରୋକିବା ପାଇଁ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସରକାର ଏବଂ ଘରୋଇ କ୍ଷେତ୍ରକୁ ଅନୁରୋଧ କରିଥିଲେ।

ଭାରତୀୟ ଜାତୀୟ ବିହନ ସଙ୍ଗଠନ (ଏନଏସଏଆଇ)ର ଅଧ୍ୟକ୍ଷ ଶ୍ରୀ ଏନ୍ ପ୍ରଭାକର ରାଓ କହିଥିଲେ ଯେ, ଏସୀୟ ବିହନ କଂଗ୍ରେସ ୨୦୨୫ ହେଉଛି ବିହନ କ୍ଷେତ୍ରରେ ଆଧୁନିକ ପରିବର୍ତ୍ତନ ଏବଂ ସମସ୍ୟାର ସମାଧାନ ଦିଗରେ ଏକ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ପଦକ୍ଷେପ। ଫେଡେରେସନ୍ ଅଫ୍ ସିଡ୍ ଇଣ୍ଡଷ୍ଟ୍ରି ଅଫ୍ ଇଣ୍ଡିଆ (ଏଫ୍ଏସ୍ଆଇଆଇ) ର ଅଧ୍ୟକ୍ଷ ଶ୍ରୀ ଅଜୟ ରାଣା ଏବଂ ଏସିଆ ଆଣ୍ଡ ପାସିଫିକ୍ ସିଡ୍ ଆସୋସିଏସନ୍ (ଏପିଏସ୍ଏ) ର ସଭାପତି ଶ୍ରୀ ଟେକ୍ ୱାହକୋହ୍ ମିଳିତ ଭାବେ କଂଗ୍ରେସର ସହ-ଅଧ୍ୟକ୍ଷତା କରୁଛନ୍ତି।

ଏହି ଅବସରରେ ଜୈବପ୍ରଯୁକ୍ତି ତଥା ଜେନେଟିକ୍ ବିଶେଷଜ୍ଞ ଶ୍ରୀ ତ୍ରିଲୋଚନ ମହାପାତ୍ରାଙ୍କୁ ସାର୍ବଜନୀନ କ୍ଷେତ୍ରରେ ବିହନ କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ସମ୍ମାନିତ କରାଯାଇଥିଲା।

୧୭ ରୁ ୨୧ ନଭେମ୍ବର ୨୦୨୫ ପର୍ଯ୍ୟନ୍ତ ଧାର୍ଯ୍ୟ ହୋଇଥିବା ଏସୀୟ ବିହନ କଂଗ୍ରେସ ୨୦୨୫ରେ ଅନେକ ସୂଚନାମୂଳକ ଅଧିବେଶନ ଆୟୋଜନ କରାଯିବ। ଆଜି କଂଗ୍ରେସର ପ୍ରଥମ ଦିନରେ ଏକ କର୍ମଶାଳାର ଆୟୋଜନ କରାଯାଇଥିଲା, ଏହା ସହିତ ବାର୍ଷିକ ସାଧାରଣ ସଭା (ଏଜିଏମ) ୨୦ ନଭେମ୍ବର ୨୦୨୫ରେ ଅନୁଷ୍ଠିତ ହେବ।

HS