মহামহিম আৰু মোৰ প্ৰিয় বন্ধু ৰাষ্ট্ৰপতি মেক্ৰন, দুয়োখন দেশৰ প্ৰতিনিধিসকল, সংবাদ মাধ্যমৰ বন্ধুসকল, নমস্কাৰ!

মই ৰাষ্ট্ৰপতি মেক্ৰ'ক পেৰিছ মহানগৰীত উষ্ম আদৰণি জনোৱাৰ বাবে কৃতজ্ঞতা জনাইছো। মই ফ্ৰান্সৰ জনসাধাৰণক তেওঁলোকৰ ৰাষ্ট্ৰীয় দিৱস উপলক্ষে আন্তৰিক শুভেচ্ছা জনাইছো। এই দিনটোক বিশ্বত স্বাধীনতা, সমতা আৰু ভাতৃত্ববোধৰ প্ৰতীক হিচাপে গণ্য কৰা হয়। এই মূল্যবোধেই আমাৰ দুয়োখন গণতান্ত্ৰিক ৰাষ্ট্ৰৰ মাজৰ সম্পর্কৰ ভেটি। আজি এই অনুষ্ঠানত মুখ্য অতিথি হিচাপে উপস্থিত থকাৰ বাবে মই সন্মানিত অনুভৱ কৰিছো। মই সুখী যে ভাৰতীয় সশস্ত্ৰ বাহিনীৰ তিনিওটা বিভাগৰ কৰ্মীসকলে এই অনুষ্ঠানত অংশগ্ৰহণ কৰি গৌৰৱ আৰু মৰ্যাদা প্ৰদান কৰিলে। আমি ভাৰতীয় ৰাফেল বিমানৰ উৰণ প্ৰত্যক্ষ কৰিছো আৰু আমাৰ নৌ-জাহাজো ফ্ৰান্সৰ বন্দৰত উপস্থিত আছিল। সমুদ্ৰ, স্থল আৰু বায়ু ক্ষেত্ৰসমূহত আমাৰ সহযোগিতা বৃদ্ধি হোৱাটো এক গৌৰৱজনক দৃশ্য আছিল। কালি ৰাষ্ট্ৰপতি মেক্ৰ'নে মোক ফ্ৰান্সৰ সৰ্বোচ্চ ৰাষ্ট্ৰীয় বঁটাৰে সন্মানিত কৰে। এই সন্মান ১৪০ কোটি ভাৰতীয়ৰ সন্মান।

বন্ধুসকল,

আমি আমাৰ কৌশলগত অংশীদাৰিত্বৰ ২৫সংখ্যক বৰ্ষপূৰ্তি উদযাপন কৰিছো। বিগত ২৫ বছৰৰ শক্তিশালী ভেটিৰ ওপৰত নিৰ্ভৰ কৰি আমি পৰৱৰ্তী ২৫ বছৰৰ বাবে এটা ৰোডমেপ প্ৰস্তুত কৰিছো। এই ক্ষেত্ৰত সাহসী আৰু উচ্চাভিলাষী লক্ষ্য নিৰ্ধাৰণ কৰা হৈছে। ভাৰতৰ জনসাধাৰণেও এই সময়ছোৱাত আমাৰ দেশক এখন উন্নত ৰাষ্ট্ৰ হিচাপে গঢ়ি তোলাৰ প্ৰতিশ্ৰুতি দিছে। আমি এই যাত্ৰাত ফ্ৰান্সক স্বাভাৱিক অংশীদাৰ হিচাপে গণ্য কৰো। আগন্তুক দুদিনত, আমি পাৰস্পৰিক স্বাৰ্থৰ সকলো ক্ষেত্ৰতে সহযোগিতাৰ বিষয়ে বিস্তৃতভাৱে আলোচনা কৰাৰ সুযোগ লাভ কৰিম। আমাৰ অৰ্থনৈতিক সম্পৰ্ক শক্তিশালী কৰাটোৱেই হৈছে আমাৰ প্ৰাথমিকতা।

আমি নৱীকৰণযোগ্য শক্তি, সেউজ হাইড্ৰ'জেন, কৃত্ৰিম বুদ্ধিমত্তা, ছেমিকণ্ডাক্টৰ, চাইবাৰ সুৰক্ষা আৰু ডিজিটেল প্ৰযুক্তিৰ দৰে ক্ষেত্ৰত সহযোগিতা বৃদ্ধিৰ বাবে নতুন পদক্ষেপ গ্ৰহণ কৰিছো। ফ্ৰান্সত ভাৰতৰ ইউনিফাইড পেমেণ্টছ ইণ্টাৰফেচ (ইউপিআই) মুকলি কৰাৰ বাবে এক চুক্তি সম্পাদন কৰা হৈছে। আমি দুয়োখন দেশৰ ষ্টাৰ্ট-আপ আৰু উদ্ভাৱন প্ৰণালীৰ মাজত সংযোগ স্থাপনত গুৰুত্ব আৰোপ কৰিছো। একেধৰনৰ চিন্তাধাৰাৰ দেশসমূহৰ সৈতে আমি প্ৰযুক্তিৰ যোগান শৃংখলাৰ গণতান্ত্ৰিকীকৰণৰ অৰ্থে প্ৰয়াস কৰা উচিত। জলবায়ু পৰিৱৰ্তন আৰু পৰিৱেশ সুৰক্ষা আমাৰ সামূহিক আৰু প্ৰধান অগ্ৰাধিকাৰ হৈ থাকিব। এই দিশত আমি ইতিমধ্যে আন্তঃৰাষ্ট্ৰীয় সৌৰ মৈত্ৰীৰ প্ৰতিষ্ঠা কৰিছো, যি এতিয়া এক আন্দোলনলৈ ৰূপান্তৰিত হৈছে। আমি এতিয়া নীলা অৰ্থনীতি আৰু মহাসাগৰ প্ৰশাসনৰ ৰোডমেপৰ ওপৰত দ্ৰুতগতিত কাম কৰাৰ লক্ষ্য লৈছো। আমি একেলগে এবাৰ ব্যৱহাৰযোগ্য প্লাষ্টিকৰ বিৰুদ্ধে যুটীয়া উদ্যোগত অগ্ৰগতি লাভ কৰিম। ইণ্ডিয়ান অইল আৰু ফ্ৰান্সৰ কোম্পানী টোটেলৰ মাজত এলএনজি ৰপ্তানিৰ বাবে দীৰ্ঘম্যাদী চুক্তি স্বাক্ষৰিত হোৱাটো মই আদৰণি জনাইছো। ইয়ে আমাৰ স্বচ্ছ শক্তিৰ ৰূপান্তৰৰ লক্ষ্যসমূহক শক্তিশালী কৰিব। অচিৰেই আমি ভাৰত-ফ্ৰান্স চিইঅ' ফ'ৰামত অংশগ্ৰহণ কৰিম। দুয়োখন দেশৰ ব্যৱসায়িক প্ৰতিনিধিসকলৰ সৈতে অৰ্থনৈতিক সহযোগিতা বৃদ্ধিৰ বাবে গভীৰ আলোচনা কৰা হ'ব।

বন্ধুসকল,

ক'ভিড-১৯ মহামাৰী আৰু ইউক্ৰেইনৰ সংঘৰ্ষৰ প্ৰভাৱ সমগ্ৰ বিশ্বতে অনুভৱ কৰা হৈছে, বিশেষকৈ বিশ্বব্যাপী দক্ষিণৰ দেশসমূহত ইয়াৰ নেতিবাচক প্ৰভাৱ পৰিছে। এয়া চিন্তাৰ বিষয়। এই সমস্যাসমূহৰ সমাধানৰ বাবে সকলো ৰাষ্ট্ৰই একত্ৰিত হৈ প্ৰচেষ্টা চলাব লাগিব। আমি বিশ্বাস কৰো যে সকলো বিবাদ আলোচনাৰ জৰিয়তে আৰু কূটনীতিৰ জৰিয়তে সমাধান কৰা উচিত। ভাৰতে স্থায়ী শান্তি পুনৰুদ্ধাৰৰ বাবে অৱদান আগবঢ়াবলৈ সাজু আছে। সন্ত্ৰাসবাদৰ বিৰুদ্ধে যুঁজত ভাৰত আৰু ফ্ৰান্সে সদায় একেলগে থিয় দিছে। আমি বিশ্বাস কৰো যে আন্তঃসীমান্ত সন্ত্ৰাসবাদ নিৰ্মূল কৰিবলৈ সুনিৰ্দিষ্ট পদক্ষেপ ল'ব লাগিব। দুয়োখন দেশে এই দিশত সহযোগিতা বৃদ্ধিত সহমত পোষণ কৰিছে।

ৰাষ্ট্ৰপতি মেক্ৰন,

মই আৰু সকলো ভাৰতীয়ই আপোনাক এই বছৰৰ জি-২০ সন্মিলনত ভাৰতলৈ স্বাগতম জনোৱাৰ বাবে আগ্ৰহেৰে বাট চাই আছো। পুনৰবাৰ আপোনালোকৰ বন্ধুত্ব আৰু আতিথ্যৰ বাবে অশেষ ধন্যবাদ।