য়োর এক্সেলেন্সী অমসুং ঐগী নুংশিরবা মরুপ, প্রেসিদেন্ত মেক্রোন, লৈবাক অনিমক্তগী দেলিগেতশিং, মীদিয়াগী মরুপশিং, খুরুমজরি!

পেরিসকী ফজরবা সহর অসিদা তরাম্না ওকপীবগীদমক্তা ঐহাক্না প্রেসিদেন্ত মেক্রোনবু থাগৎপা ফোংদোক্লি। ঐহাক্না ফ্রান্সকী মীয়ামদা মখোয়গী নেস্নেল দেদা থমোইনুংদগী য়াইফ-পাউজেলসু পীজরি। নুমিৎ অসিবু মালেম অসিদা লিবর্তী, ইক্বালিতী অমসুং ফ্রেতর্নিতীগুম্বা ভেল্যুশিং অসিগী খুদম অমা ওইনা খন্নৈ। মসিগী ভেল্যুশিং অসিবু ঐখোয়গী গনতন্ত্র চৎপা লৈবাক অনি অসিগী মরিগী ফাউন্দেশনশুনি। ঙসি মসিগী নুংঙাইরবা থৌরম অসিদা ঐহাকপু অথোইবা মীথুংলেন ওইনা ইকাইখুম্নবিবা অসিদা য়াম্না নুংঙাইবা ফাওই। মসিগী থৌরম অসিবু হেন্না ফজহন্নবা অমসুং মতিক-মগুন লৈহন্নবা ভারতকী আর্মদ ফোর্সশিংগী সর্বিস অউমদগী কন্তিঞ্জেন্তশিংনা মসিদা শরুক য়াবা অসিদা ঐহাক্না য়াম্না নুংঙাইবা ফাওই। ঐখোয়না ভারতকী রাফেল এয়রক্রাফকী ফ্লাইপাস্ত উবা ফংখি অমসুং ঐখোয়গী নেভীগী জহাজনা ফ্রান্সকী হিথাংফমদশু লৈখি। সমুদ্র, লৈকং অমসুং নোংথক্তা পুন্না খুৎশম্নবা হেনগৎলকপা অসি য়াম্না নিংথিজনিংঙাই ওইবা শক্তম অমনি। ঙরাং, প্রেসিদেন্ত মেক্রোন্না ফ্রান্সকী খ্বাইদগী চাউবা নেস্নেল এৱার্দকা লোইননা ঐহাকপু ইকাইখুম্নবীখি। অসিগুম্না ইকাইখুম্নবীবা অসি ভারতমচা বিলিয়ন ১.৪গী ইকাইখুম্নবনি।

মরুপশিং,

ঐখোয়না ঐখোয়গী স্ত্রেতেজিক পার্তনরশিপকী ২৫শুবা কুমওনগী নুংঙাইবা ফোংদোক্লি। হৌখিবা চহি ২৫গী লিংলবা ফাউন্দেশনদা শাগত্তুনা, ঐখোয়না মধংগী চহি ২৫গীদমক্তা রোদমেপ অমা শেম্লি। মসিগী মতাংদা য়াম্না থৌনা লৈনা অমসুং য়াম্না চাউরনা তার্গেতশিং থম্লি। ভারতকী মীয়াম্না এখোয়গী লৈবাক অসিবু মতম অসিগী মনুংদা চাউখৎপা লৈবাক অমা ওইহন্নবা ৱাশকখি। ঐখোয়না ফ্রান্সপু মসিগী খোংচৎ অসিদা মহৌশাদগী লৈরক্লবা পার্তনর অমা ওইনা লৌই। হৌখিবা নুমিৎ নিনিদা, ঐখোয়না নাকল  অনিমক্কী কান্নগদবা হিরম খুদিংমক্তা তেংবাং পীনবগী মতাংদা য়াম্না কুপ্না খন্নবগী খুদোংচাবা ফংখি। এখোয়গী শেন্মিৎলোনগী ওইবা মরিদা হেন্না মপাঙ্গল কনখৎহনবা হায়বসি ঐখোয় অনিমক্কী ওইনা খ্বাইদগী হেন্না মরু ওইবা অমনি।

এখোয়না রিন্যুৱেবল ইনর্জী, গ্রীন হাইদ্রোজেন, আর্তিফিসিয়েল ইন্তেলিজন্স, সেমিকন্দক্তর্স, সাইবর সেক্যুরিতী অমসুং দিজিতেল তেক্নোলোজীগুম্বা লমশিং অসিদা কোওপরেশন হেনগৎনবা অনৌবা থৌরাংশিং খঙদোক্লি। ফ্রান্সতা ভারতকী য়ুনিফাইদ পেমেন্তস ইন্তরফেস (য়ু.পি.আই.) হৌদোক্নবা য়ানবা অমা পুরকখ্রে। ঐখোয়না লৈবাক অনিমক্কী স্তার্ত-অপ অমসুং ইনোভেশন ইকোসীস্তেম কনেক্ত তৌবগী মতাংদা অখন্নবা মিৎয়েং থম্লি। ৱাখল মান্নবা লৈবাকশিং পুন্দুনা, ঐখোয়না তেক্নোলোজী সপ্লাই চেনশিংগী দেমোক্রেতাইজেশন তৌবনবগীদমক্তা কন্না হোৎনরি। ক্লাইমেত চেঞ্জ অমসুং এনভাইরনমেন্তেল সেক্যুরিতীনা ঐখোয়গী খ্বাইদগী হেন্না মরু ওইবা অমা ওইরি। মসিগী মাইকৈদা, ঐখোয়না ইন্তর্নেস্নেল সোলার এলাইন্স থমখ্রে, মসি হৌজিক্তি মীয়ামগী ওইবা ঈহৌ অমা ওইরক্লি। এখোয়না সিঙ্গল-য়ুজ প্লাস্তিক্কী মায়োক্তা অপুনবগী ওইবা অনৌবা থৌরাং অমা পুন্না খুমাং চাউশিনমিন্নরগনি। ঐহাক্না ইন্দিয়ন ওইল অমসুং ফ্রঞ্চ কমপনী, তোতেলগী মরক্তা এল.এন.জি. এক্সপোর্তশিংগীদমক্তা তুং কোইনগী ওইবা এগ্রীমেন্ত অদুবু তরাম্না ওক্লি। মসিনা এখোয়গী ক্লীন ইনর্জীদা ওন্থোক্নবগী পান্দম অদুবু হেন্না মপাঙ্গল কনখৎহল্লগনি। অথুবা মতমদা, ঐখোয়না ইন্দিয়া-ফ্রান্স সি.ই.ও.শিংগী ফোরমদশু শরুক য়ারগনি। ইকোনোমিক কোওপরেশন হেনগৎহন্নবা লৈবাক অনিমক্তগী বিজনেসকী মীহুৎশিংগা লোইননা য়াম্না কুপথনা খন্নরগনি।

মরুপশিং,

দিফেন্স কোওপরেশন অসিনা ঐখোয়গী মরি অসিগী য়াম্না লিংবা য়ুম্বি অমা ওইদুনা লাকখি। মসিনা লৈবাক অনি অসিগী মরক্তা য়াম্না চাউনা থাজবগী খুদম অমা ওইরি। ফ্রান্স অসি মেক ইন ইন্দিয়া অমসুং ‘আত্মানির্ভর ভারত’তা য়াম্না মরু ওইবা পার্তনর অমনি। ঙসিদি, ঐখোয়না দিফেন্সকী লমদা ভারত্তা অনৌবা তেক্নোলোজীশিংগী কো-প্রোদক্সন অমসুং কো-দেবেলপমেন্তকী মতাংদা ৱারি শারগনি। সবমেরিনশিং নত্রগা নেভীগী জহাজশিংবু ওইরো, এখোয়না এখোয়গী ইশাগী তঙাইফদবশিং অদুবু নিংবা থুংহনবা ঙম্নবা পুন্না থবক তৌমিন্নবা খক্তা নত্তনা, অতোপ্পা নক্নবা লৈবাকশিংগীশু মতেং পাংনবা থবক তৌবা পাম্লি। এখোয়গী দিফেন্স স্পেস এজেন্সীশিংগী মরক্তা কোওপরেশন হেনগৎহন্নবগী ওইথোকপা লৈ। ঐখোয়না ভারত্তা ফ্রেঞ্চ কমপনীশিংনা এম.আর.ও. ফেসিলিতীশিং, স্পেয়র পার্তশিং, অমসুং হেলিকোপ্তরশিংগীদমক্তা ইঞ্জিনশিং পুথোক্নবগী মতাংদা হেন্না খুমাং চাউশিল্লক্লি। ঐখোয়না মসিগী মতাংদা ঐখোয়গী কোলাবোরেশন হেন্না কনখৎহল্লগনি। ঐখোয়না সিভিল ন্যুক্লিয়র কোওপরেশনগী লমদা অপিকপা অমসুং এদভান্স ওইরবা মোদ্যুলর রেয়েক্তরশিংগী মতাংদা কোওপরেশন পীননবগী মতাংদা খন্নরগনি। ঙসিদি, লেবাক পুম্বনা ভারত্তা চন্দ্রয়ানগী মাইপাক্না লোঞ্চ তৌখিবগী মতাংদা য়াম্না নুংঙাইবা ফোংদোক্লি। মসি ঐখোয়গী সাইন্তিস্তশিংগী য়াম্না চাউবা মাইপাকপা অমনি। ভারত অমসুং ফ্রান্সনা স্পেসকী লমদা মতম কুইরবা অমসুং য়াম্না চাউবা কোলাবোরেশন লৈরকখি। ঐখোয়না হন্দক্তা সেতেলাইত লোঞ্চ সর্বিসশিংগা লোইন-লোইননা সমুদ্র অমসুং লমগী অইং-অশা অমসুং মহৌশাগী ওইবা অকোইবদা লৈরিবা ফিভমবু য়েংশিন্নবগীদমক্তা ত্রিস্না সাতলাইতকী দেবেলপমেন্ত য়াওনা ঐখোয়গী স্পেস এজেন্সীশীংগী মরক্তা অনৌবা এগ্রীমেন্ত অমা তৌখ্রে। ঐখোয়না স্পেস-বেজদ মেরিতাইম দোমেন এৱেয়রনেসগুম্বা লমশিং অসিদশু ঐখোয়গী কোওপরেশন অসি চাউথোরক্লি।

মরুপশিং,

ভারত অমসুং ফ্রান্সনা মীশিংগী মরক্তা য়াম্না অচেৎপা অমসুং মতম কুইনদগী মরি লৈরক্লি।  ঙসি ঐখোয়গী খন্ন-নৈনবা অসিনা মসিগী মরিশিং অসিবু মখাতানা মপাঙ্গল কনখৎহল্লগনি। ঐখোয়না সাউদর্ন ফ্রান্সতা মার্সেলগী সহরদা ভারতকী অনৌবা কন্সুলেত অমা হাংদোক্লগনি। ঐখোয়না ফ্রান্সতা লাইরিক তম্লিবা ভারত মচাশিংগী মীশিংদা লোং-তর্ম ভিজাশিং পীনবা ফিরেপ অদুবু তরাম্না ওকখি। ঐখোয়না ফ্রেঞ্চ য়ুনিভর্সিতীশিংবু ভারত্তা মখোয়গী কেম্পসশিং লিংখৎনবা চেবাউ পীরি। ফ্রান্সনা নই দিল্লীদা শারিবা অনৌবা নেস্নেল ম্যুজিয়ম অমা লিংখৎপদা পার্তনর ওইনা শরুক য়ারি। ভারতকী এথলেতশিংনা মথংগী চহিদা পেরিসতা পাংথোক্কদবা ওলীমপিক্সকীদমক্তা খৌরাংনা ঙাইরি। ঐহাক্না প্রেসিদেন্ত মেক্রোন অমসুং মহাক্কী তীম পুম্নমক্তা থৌরম অসিবু মাইপাক্না শিন্নবগীদমক্তা য়াইফ-পাউজেল পীজরি।

মরুপশিং,

ঙসি, ঐখোয়না মরু ওইবা রিজনেল অমসুং গ্লোবল ইশুশিংগী মতাংদশু খন্নরগনি। ইন্দো-পেসিফিক্কী রেসিদেন্ত পাৱরশিং অমা ওইনা, ভারত অমসুং ফ্রান্সনা রিজন অসিদা সান্তি লৈবা অমসুং তংদু-লৈতাবা পুরক্নবগীদমক্তা অখন্নবা থৌদাং অমা লৈ। ঐখোয়না ঐখোয়গী কোলাবোরেশনদা চাউখৎ-থৌরাংগী ওইবা শক্তম অমা পীনবা ইন্দো-পেসিফিক কোওপরেশন রোদমেপ অমদা থবক তৌরি। নাকল অনিমক্না ইন্দো-পেসিফিক ত্রায়েঙ্গুলর দেবেলপমেন্ত কোওপরেশন ফন্দগীদমক্তা প্রোপোজলগী মতাংদশু খন্নরগনি। মসিনা রিজন অসিদা স্তার্ত-অপশিং অমসুং ইনোভেশন প্রোমোত তৌনবা অনৌবা খুদোংচাবশিং লৈহল্লগনি। ঐখোয়না ভারতকী ইন্দো-পেসিফিক ওসীন ইনিসিয়েতিবতা মেরিতাইম রিসোর্স পিলর অদুবু লুচিংনবা ফ্রান্সকী ফিরেপ অদুবু তরাম্না ওকখি।

মরুপশিং,

কোবিদ-১৯ লাইচৎ অমসুং য়ুক্রেনদা থোক্লিবা তংদু-লৈতাদবা থৌদোক অসিগী শাফু অসি মালেম শিনবা থুংনা ফাওরি, মরু ওইনা গ্লোবল সাউথতা লৈরিবা লৈবাকশিংদা মসিনা য়াম্না হেন্না অকাইবা থোকহল্লি। মসি য়াম্না ৱানিংঙাই ওইবা ৱাফম অমনি। মসিগী প্রোব্লেমশিং অসিগী সোল্যুশনশিং থিনবা লৈবাক পুম্নমক্না অমত্তা ওইনা চুংশিন্নদুনা অমসুং পুন্না হোৎনমিন্নবগীদমক্তা তঙাইফদবা লৈ। চয়েৎনবা খুদিংমক দাইলোগ অমসুং দিপ্লোমেসীগী খুত্থাংদা ৱারোইশিন পুরক্কদবনি হায়বসি ঐখোয়গী থাজৈ। ভারতনা তুংকোইনা শান্তি হঞ্জিলহনবদা শরুক য়াগনি। ভারত অমসুং ফ্রান্সনা মতম পুম্বদা তেরোরিজমগী মায়োক্তা লান্থেংনবদা অমত্তা ওইনা লেপমিন্নখি। ঐখোয়না ক্রোস-বোর্দর তেরোরিজম মুত্থৎপদা মতিকচাবা থবক থৌরমশিং তঙাইফদে হায়না থাজৈ। লৈবাক অনিমক্না মসিগী মাইকৈদা কোওপরেশন হেনগৎহন্নবা য়ানখি।

প্রেসিদেন্ত মেক্রোন,

ঐহাক অমসুং ভারতমচাশিংনা হন্দক্কী চহি অসিগী জি-২০ সম্মিতকী মনুংদা ভারত্তা নখোয়বু তরাম্না ওক্নবা খৌরাংনা ঙাইরি। অমুক্কশু হন্না ঐঙোন্দা উৎলিবা নখোয়গী মরুপ ওইবগী মরি অমসুং হোসপিতালিতী অদুগীদমক্তা য়াম্না থাগৎচরি।

***