গুজরাত অমসুং মহারাস্ত্রগী রাজ্যপাল দেবব্রতজী, দিল্লীগী মুখ্যমন্ত্রী রেখা গুপ্তজী, গ্যান জোতীগী থৌরম অসিবু শিনবিরিবা মসিতীগী চেয়রমেন সুরেন্দ্র কুমার আর্য়জী, দি.এ.ভি. কোলেজ মেনেজিং কমিতীগী পর্সিদেন্ত পূনম সুরীজী, সেনিয় আর্য়া লম্বোইবা, স্বামী দেবব্রত সরস্বতীজী, তোহান-তোঙানবা আর্য়গী মীহুৎশিনবিরিবা মীফম অসিগী প্রসিদেন্ত অমসুং ভাইস পারসিদেন্ত, লৈবাক অমদি মালেম অসিগী মফম কয়াদগী লেংবিরক্লিবা আর্য়া সমাজগী ব্রতী, চিং থোইদোক্লবা নুপী অমদি নুপাশিং।

খ্বাইদগী অহানবদা ঙসি ঐহাক্না লাকপদা থেংদোকখিবা অসিগীদমক্তা ময়াম্না ঙাকপিগনি। ঙসি সরদার সাহেবকী মপোক কুমওন ওইখি, 150 শুবা মপোক কুমওন্নি। স্তেচু ওফ য়ুনিতী, অপুনবা শক্তমগী লম অসিদা মহাক্কী থৌরম পাংথোকখি অমসুং মরম অসিনা ঐহাক্না লাকপদা থেংদোকখ্রে, অদুগা মরম অসিনা ঐহাক্না মতম চানা লাকপা ঙমজখিদবনি, মসিগীদমক্তা অদোম পুম্নমক্না ঐহাকপু ঙাকপীগনি।  মফম অসিদা ঐহাক্না লাকখিবদা ইহান হানবদা শোনবিখিবা লাইশোন অদুনা হৌজিকসু পাঙ্গল অসি কনবদৌনা তৌরি। ঐহাক্না অদোমগী মরক্তা লাকচবা খুদিং, ঐহাক্না লাকপা খুদিংদা লাইগীগুম ফাওহল্লি, অঙকপা মওং ওইনা ফাওহল্লি। অদুগা মসি স্বামী দয়ানন্দজীগী থৌজালননি, মহাক্কী ফীদম্নিংঙাই ওইবা মতৌনা ঐখোয় পুম্বনা খুরুমজরি, অদোম ৱাখল-লৌশিং লৈরবশিংনা চহী কয়া-কয়াদগী ঐহাক্কী থম্মোয়নুংদা অদোম ময়ামগী মরক্তা লাক্নবগী তাজ্ঞা অদু লৈহল্লিবনি হায়না ফাওজৈ। অদুগা অদোমগা উন্নজবা খুদিং তোপ-তোপ্পা থৌনা অমা লৈহনবদৌনা, তোঙানবা ইনোৎ অমা হাপ্পীবদৌনা তৌই। অদুগা হৌজিক ঐঙোন্দা তাকপিখিবদা মফম অসিদা অসিগুম্বা অচৌবা শঙলেন 9 শারে হায়বিরি। মফমশিং ঐখোয়গী আর্য় সমাজগী ভিদিওদা থৌরম অসিবু য়েংবিরি। ঐহাক মখোয়গা উন্নজবদি ফংজদ্রে অদুবু ঐহাক্না মখোয়বু মফম অসিদগী খুরুমজরিয

মরুপশিং,

হাক্কুম গুজরাত্তা দয়ানন্দ সরস্বতীজীগী পোক্নফমদা থোইদোকপা থৌরম পাংথোকখি। মদুদা ঐহাক্না ঐহাক্না ভিদিওগী পাওজেল পীবগী থোংদগী য়াওজখি। মসিগী মমাংদা দিল্লীদা ঐহাক মহাঋষী দয়ানন্দ সরস্বতীজীগী 200 শুবা মপোক কুমওনগী থৌরম হৌদোকপগী লাইবক ফবগী তাজ্ঞা অদু ফংজখি। বেদমন্ত্রীগী উচ্চারনগী থৌনা-পাঙ্গল, য়গ্যগী মৈ হৌবা, পুম্নমক অদু ঙরাংদা তৌখিবগুম ফাওই।

মরুপশিং,

মদুগী থৌরম পাংথোকপা অদুদা ঐখোয় পুম্বনা 200 শুবা মপোক কুমওনগী থৌরমদা  ৱাখল্লোনগী য়গ্য ওইবা মওংদা চহী অনী পাংথোক্নবা ৱারেপ্নখি। মদুগী অঙকপনা থল্লবা ৱাখল্লোনগী য়গ্য অদু লেপ্তনা চহী অনি চত্থরকখিবা অসি ঐহাক য়াম্না নুংঙাই। মতম-মতমগী ওইনা ঐহাক্না অদোমগী হোৎনরিবশিং অমসুং থৌরমশিংগী ই-পাওসু ফংদুনা লাক্লি। অদুগা ঙসিঐহাক্না অমুক্কা হন্না  আর্য়সমাজগী 150 শুবা মপোক কুমওন পাংথোকপা অসিদা ঐহাক্কী নুংগী ওইবা ৱাফম থম্নবগী তাজ্ঞা ফংজরে। ঐহাক্না স্বামী দয়ানন্দ সরস্বতীজীগী খুয়াখাদা খুরুমজরি, মহাকপু ইকাইখুম্নবগা লোয়ননা হৈকৎ-লৈকৎ তমজরি। ঐহাক্না অদোম খুদিংমক্তা মসিগী ইন্তর্নেস্নেল সবমীৎ অসিগীদমক্তা নুংঙাইবা ফোংদোকচরি। হৌজিক ঐখোয়না নিংশিংনিংঙাই ওইরগদবা শেলয়েক অসি চৎনহন্নবগী তাজ্ঞা অদু ফংজরে।

মরুপশিং,

আর্য় সমাজ হৌদোকখিবগী 150 শুবা কুমওন অসিদা শুপ্নতগী খুন্নাইগী শরুক নত্রগা কাংলুপকাখক্তমক্কা মরি লৈনবা নত্তে। তাজ্ঞা অসি ভারত পুম্বগী বৈদগী ওইবা শক্তমগা মরি লৈনৈ। তাজ্ঞা অসি গঙ্গা ঈচেলগুম মশানা মশাবু শেংদোকচনবগী, self-purification গী পাঙ্গল-থৌনাগুম ভারতকী ওইবা ৱাখল্লোনগা মরি লৈনহল্লি। তাজ্ঞা অসি খুন্নাই অসিবু লেপ্তনা ফগৎহন্নবগী চৎনবী অদুবু মখা তানা লৈহল্লিবা অদুগুম্বা অথোইবা চৎনবী অদুগা মরি লৈনৈ! নিংতম লাল শোক্নখিবা লান্মী কয়াগী ৱাখলদা থৌনা পীবিখি। লালা লাজপতরায়, হুতাত্মা রামপ্রসাদ বিস্মিলগুম্বা নিংতম-লান্মী কয়ানা আর্য়সমাজদগী ইথীল পুদুনা নিংতম লালদা অয়ৌবি থানা কত্থোকখি। লাইবক থীবনা রাজনীতীগী মরম্না নিংতম লালদা, আর্য় সমাজগী লৌরিবা থৌদাং অসিগী ফংফম থোকপা হক অদু আর্য় সমাজনা ফংদ্রি।

মরুপশিং,

আর্য় সমাজনা লিংখৎখিবগী মতাংদা ঙসি ফাওবা অকনবা মরৈবাক নিংবশিংগী লুপ ওইনা লৈরি।  আর্য় সমাজনা অকিবা লৈতনা ভারতকী প্রজা ওইবগী মওং ওইবা লুপ্নি। ভারতকী মায়োক্তা লৈবগী খল্লিবা, মীরৈবাক্কী ৱাখল্লোনশিং হাপচিলহল্লক্লিবা মীওইশিং ওইরো, তোখায়নবগী ৱাখল চেনবা ওইরো, নাৎ-চৎনবীদা মোৎশিলহল্লক্লিবা ফত্তবা থৌরাং য়াৎপা ওইরো আর্য় সমাজনা মতম পুম্বদা শিংনদুনা লাক্লি। আর্য়সমাজ অমসুং মহাক লিংখৎখিবা অসি চহী চামগা য়াঙ্খৈ শুরকপা অসিদা ঐহাক নুংঙাই, সমাজ অমসুং লৈবাক, দয়ানন্দ সরস্বতীজীগী অথোইবা ৱাখল্লোনশিং অসিবু অথোইবা শক্তম অসিবু খুরুমজরি।  

মরুপশিং,

স্বামী শ্রদ্ধানন্দজীগুম্লবা লাইনিং-লীচৎ চাউখরহন্দুনা পুৱারীগী খোংজেল অসিবু অনৌবা মায়য়োন ফংহল্লিবা আর্য় সমাজগী শিংলবা মীওই কয়া ঙসি পুৱারীগী ওইরবা মীৎকুপ অসিদা মখোয় পুম্নমক্কী থৌনা-পাঙ্গল অমসুং য়াইফ-থৌজালসু য়াওরি। ঐহাক্না ফম্পাক অসিদা ইকাইখুম্ননিংঙাই ওইরবা ইমাশিংগী মফমদা হন্না-হন্না খুরুমজরি, মখোয়গী নিংশিং-খুভমদা খুরুমজরি।

মরুপশিং,

ঐখোয়গী ভারত অসি হীরম কয়াদা অথোইবা ওইরি। মসিগী লৈবাক, মসিগী সভ্যতা, মসিগী বৈদগী ওইবা চৎনবী মসি য়ুগ-য়ুগ খুদিং অমর ওইরে। মরমদি করিগুম্বা লুরবা তানফম অমদা অনৌবা শিংনবশিং হেক লাকপদা মতম্না অনৌবা ৱাহং হংলকপদা অথোইবা মীওই অমা হেক্তানা মদুগী পাউখুম পুদুনা হেক্তমক থোরকই। কনাগুম্বা ঋষি, মহর্ষি অমসুং অশিংবা মীনা ঐখোয়গী খুন্নাই অসিদা অনৌবা মায়য়োন পীরি। দয়ানন্দ সরস্বতীজীসু হায়রিবা অথোইবা চৎনবীসিগী মহার্ষি ওইরম্মী। চহী কয়া লৈবাক অসি মীনাই নাইথাংনা খুন্নাই পুম্বা লোইনমক নিংবা কায়খি।  ৱাখল-লৌশিং অমসুং নৈনবগী মহুত্তা পাংদবা অমসুং ফত্তবা থৌশীলনা মহুৎ শিনখিরম্মী। অংগ্রেজনা ঐখোয়গী, ঐখোয়গী নাৎ-চৎনবীশিং অমসুং চৎনবীশিংবু হন্থনা য়েংলম্মী। ঐখোয়বু হন্থনা য়েংলগা মখোয়না ভারতকী মীনাই-নাইথাংবু অচুম্বা শক্নরমখি। অসিগুম্বা ফীভমশিংসিদা অনৌবা নুংগী ওইবা ৱাখল্লোনশিংবু ফোংদোক্নবগী থৌনা অদুসু খুন্নাইসিদগী মাংখিরম্মী। অদুগা অসিগুম্বা লুরবা তানফম অসিদা নহা ওইরিবা লম্বোইবা অমা থোরকখি। মহাক অদু হিমালয়গী মী তানদবা অমসুং অরুবা মফমশিংদা লাই নিংবা, মশানা কত্থোকচবগী লীপুন্না পুন্দুনা থম্মি।  অদুগা হল্লক্লগা মহাক অদুনা ফত্তবা ৱাখল্লোনগী লাংদা থুরবা ভারতকী খুন্নাই অদুবু নিক-নিক লাওহল্লমখি। অংগ্রেজীনা পুংশুপ-শুপখ্রবা লৈঙাক. ভারতকী শক্তম অসিবু হন্থনা য়েংলমখি, খুন্নাই অসিগী লৈখা তারবা ফীদমশিং অমসুং লীচিংশিংগী ৱেস্তর্নাইজ তৌবদা, মোদর্নাইজেসনগী মওংদা থোরকহনখিবা মতমদা মশানা মশাবু থাজহনবতনা থল্লবা ঋষিনা খুন্নাইদা খংহল্লি-বেদশিং অমুক হন্না হল্লকখো! বেদশিং অমুক হন্না হল্লকখো! অসিগুম্বা অঙকপনা থল্লবা মীওই অমা ওইরম্মী- স্বামী দয়ানন্দজী! মহাক্না মীনাই-নাইথাংগী অমম্বা মতম অদুদা নমথবিরবা লৈবাক অসিগী ৱাখলগী ইনোৎ অদু অমুক্কা হন্না হৌগৎহল্লে।

মরুপশিং,

ভারত অসি চাউখৎলবদি ঐখোয়গী ভারত অসি শুপ্নতগী মীনাই-নাইথাংগী থৌরীনা পুনশিল্লিবা অসি নান্থোকহনবদা নত্তনা য়োৎলীনা পুনশিনবদগী চপশিল্লক্লবা ঐখোয়গী ভারতকী য়োৎলী অসিবুসু  নান্থোকহনবগী মথৌ তাই হায়বসি স্বামী দয়ানন্দ সরস্বতীজীনা খংলম্মী। মরম অসিনা স্বামী দয়ানন্দ সরস্বতীজীনা অনেম-অৱাং, শোক্নবা য়াবা-য়াদবা অমসুং খেন্নবগী ৱাখল্লোনশিং তাদোকখি। মহাক্না শোক্নবা য়াবা-য়াদবা অসিবু মরু ফংনা ফুক্তৎখিনবা খংহনখি। মহাক্না লাইরিক তমদবগী মায়োক্তা কেম্পেন তৌখি। মহাক্না ঐখোয়গী বেদশিং অমসুং শাস্ত্রশিংগী লান্না শন্দোকপা অমসুং য়ানশিন্নবশিংবু শিংনখি। মখোয়না মীরৈবাক্কী নেরেতিবশিং অসিবু লান্থেংনখি। অদুগা শাস্ত্রগী ৱাহন্থোক্কী অরিবা চৎনবীদগী অচুম্বগী খুদম পীখি।   

মরুপশিং,

স্বামী দয়ানন্দজী মীৎয়েং শানবা অথোইবা মীওইনি। মী অমা শেম্বা ওইরো নত্রগা খুন্নাই শেম্বা ওইরো মসিবু লমজিংবদা নুপীগী মথৌ য়াম্না তাই হায়বসি মহাক্না মরম অসিনা মহাক্না নুপীশিংবু য়ুমগী মাঙ্গোলদগী হেন্দোকপা য়াদবগী ৱাখল্লোন অসিবু শিংনখি। আর্য় সমাজগী মহৈলোয়শংশিংদা নুপীশিংবু মহৈ তমহন্নবা কেম্পেন তৌবা হৌখি। মতম অদুদা জালন্ধরদা নুপীগী মহৈলোয়শং হৌদোকখিবা অদু উনা-উনা “নুপীগী কোলেজ” ওইখ্রে। আর্য় সমাজগী অসিগুম্বা কোলেজশিং অসিদা তম্লিবা ইচানুপী লাখ কয়া-কয়া ঙসি লৈবাক অসিগী য়ুম্বী অসিবু হেন্না পাঙ্গল কনখৎহল্লি।  

মরুপশিং,

মফমসিদা দিল্লীগী মুখ্যমন্ত্রী রেখা গুপ্তজী ফম্পাক্তা লেংসিনবিরী। হন্দক নুমীৎ নিনীগী মমাংদা ঐখোয়গী প্রসিদেন্ত দ্রৌপদী মুর্মুজীনা রাফল ফাইতর প্লেন পাইখ্রে। অদুগা মসিদা মহাক্কা লোয়ননা চৎমিন্নখিবা অসি স্কবৈদ্রন লীদর শিৱাঙ্গী সিংহনি। ঙসি ঐখোয়গী ইচানুপী অসিনা ফাইত্তর জেত পাইরি অমসুং ইচে দ্রোন ওইদুনা অনৌবা মতমগী লৌউ-শিংউ অসিবসু ফগৎহল্লি। ঙসি ঐখোয়না চাউথোক্না হায়বা য়ারে মদুদি ভারত মালেমদা খ্বাইদগী চাওবা ফীমেল স্তেম গ্রেজুএত্সকী লৈবাক্নি হায়না। ঙসি এক্তিব অমসুং তেক্নোলোজীগী লমদসু নুপীশিংনা লীদরশিপ রোলশিং লৌরক্লি। ঙসি লৈবাক অসিগী তোপ সাইন্তিফিক ইন্সতিত্যুসনশিংদা ৱীমেন সাইন্তিস্ত মঙ্গলয়ান, চন্দ্রয়ান অমসুং গগনয়ানগুম্লবা স্পেস মিশনশিংদা অথোইবা থৌদাং লৌরি। মসিগী অওনবা অসিনা হায়রি মদুদি লৈবাক অসি ঙসি অচুম্বা লম্বিদা খুমাং চাওশিল্লী। লৈবাক অসিনা স্বামী দয়ানন্দজীগী মংলানশিং মপুং ফারক্লি।

মরুপশিং,

স্বামী দয়ানন্দজীগী ৱাখল্লোন অমা ঐহাক্না তত্তনা খল্লি। মদু ঐহাক্না হন্না মীশিংদসু হায়। স্বামীজীনা হায়বিরম্মী- “খ্বায়দগী তানা ফংবা মী অদুনা খ্বায়দগী হেন্না থৌদাং লৌই, মসি মপুং ফাবা মীগী মতৌনি। মসিগী অকক্নবা ৱাহৈশিং অসিদা ইচম-চমদবা ৱাখল্লোন্নি মদুদি মদুদি মসিগী মতাংদা লাইরিক কয়া ইবা য়াই। অদুবু করিগুম্বা ৱাখল্লোন খরদি মদুগী নুংগী ওইবা ৱাহন্থোক্তগী হেন্না লেপ্পা য়াই মদুদি মসিগী মতম কয়াম কুইনা চৎনগদগে হায়বসি। মদুগী ৱাখল্লোন অসিনা পুন্সি কয়া অওনবা পুরকপা ঙম্মি। অদুগা ঐখোয়না মসিগী মতাং অসি মহর্ষি দয়ানন্দজীগী ৱাখল্লোনগা পুনশিন্নরি, ঐখোয়না আর্য় সমাজগী কত্থোক্লবা মীওইশিংবু উজবা মতমদা মখোয়গী ৱাখল্লোনশিং অদু মতম-মতমগী মতুংইন্না হেন্না মঙাল লৈরকপা ঐখোয়না খল্লি।

ইচিল-ইনাও, ইচে-ইচলশিং,

স্বামী দয়ানন্দ সরস্বতীজীনা মহাক্কী পুন্সিগী থোইদোক-হেন্দোক্না কান্নবা পীরিবা মীফম অসি হৌদোকখিবনি। স্বামীনা হুনবিরম্বা মরু অদু ঙসিদি চাউরবা উপালগুম্না মশা-মরেং ফন্দোরক্লে।  গুরুকুল কাঙ্গরী, গুরুকুল কুরুক্ষেত্র, দি.এ.ভি. ইন্সতিত্যুত, অমদি অতোপ্পা মহৈ তম্ফমশিং মসি মাগী-মাগী মফমদা লিংকত্তুনা থবক তৌরি। ঐখোয়গী লৈবাক অসিগী লুরবা তানফমশিংদা আর্য় সমাজগী মীওইশিংনা মহাক্কী লৈজবা পুম্বা মরৈবাক্কীদমক্তা কত্থোকই। ভারত অসি খায়দোকখিবদা মশাগী লৈজবা পুম্বা লোইনা মাংখ্রবশিংনা  চংজফম লৌদুনা ভারত্তা লাকখিবশিংগী মতেং পাংবা, রিহেবিলিতেসন তৌবা অমসুং মহৈ-মশিংদা আর্য় সমাজনা চাউনা থৌদাং লৌই হায়বসি পুৱারীদা হক্তুনা লৈখ্রে। ঙসিসু মহৌশানা থোকহনবা অমাং-অতাগী মতমদা অৱাবা নংলবশিংগী মতেং পাংবদা মতম পুম্বদা আর্য় সমাজনা মাংজিল থারি।

ইচিল-ইনাও, ইচে-ইচলশিং,

আর্য় সমাজনা তৌবশিংগী লমন অসি লৈবাক পুম্বনা তোল্লে, মসিগীশিংসিদা অথোইবা থৌদাং অসি লৈবাক অসিগী গুরুকুলগী চৎনরকপশিংনা লেংদনা হিংহন্দুনসু থম্লি। মতম অমদা গুরুকুলগী পাঙ্গল-থৌনাদগী ভারত অসি গ্যান বিগ্যানগী মতোন্দা লৈরে। মীনাই-নাইথাংগী মতমদা থওইনা এতেক্ত তৌরকখি। মসিনা ঐখোয়গী গ্যান মাংখি, ঐখোয়গী হৌন-লোনচৎ মাংখি, অনৌবা মীরোল মপাঙ্গল শোন্থরকখিবা অসিদা আর্য়সমাজনা মাংদা থোরক্তুনা মাংলুরবা গুরুকুলগী চৎনরকপা অদুবু কনখি।  মসিদা নত্তনা মতগী খোংলৈগী মতুং ইন্না আর্য় সমাজগী গুরুকুলশিংনা মশানা অদুম্মক মশক থোকচহল্লক্লি। মসিদা অনৌবা এজুকেসনসু হাপচিল্লক্লি। ঙসি নেস্নেল এজুকেসন পোলিসীদগী অমুক্কা হন্না এজুকেসনগী ভেল্যুশিং অমসুং লমচৎ-শাজৎ শেমগৎপগা শমজিন্নহল্লিবা অসিদা ঐহাক্না ভারতকী শেংলবা গ্যানগী চৎনবী অসি ঙাক্তুনা থম্বগীদমক্তা আর্য়সমাজগী মফমদা তৌবিমল খংবা উৎচরি।  

মরুপশিং,

ঐখোয়গী বেদশিংগী ৱাহৈ পরেং- “কৃনৱন্তো বিশ্বমার্য়ম্”, হায়বদি ঐখোয়না মালেমপুম্ববু অথোইবা ওইহনসি, মসিগী অথোইবা ৱাখল্লোনশিং অসি পুদুনা চৎসি। স্বামী দয়ানন্দজীনা মসিগী বেদগী ৱাহৈ পরেং অসিবু আর্য় সমাজগী মোতো ওইহল্লে।  ঙসি বেদগী ৱাহৈ পরেং অসিবু ভারতকী চাউখৎপগী খোংচৎকী মরুওইবা লাইশোনসু ওইরি। ভারতকী চাউখৎপনা মালেম অসিগী য়াইফনবা, ভারতকী খুজ্ঞাও-লৈচাওবনা মীওইবা খুন্নাইগী থৌগল তৌনবা, লৈবাক অসি মসিগী ভিজন অসিদা খুমাং চাওশিলহন্নি। ঙসি ভারত অসি সস্তেনেবল দিভেলপমেন্তগী মায়কৈরোমদা অথোইবা গ্লোবেল ভোইস ওইখ্রে। স্বামীজীনা বেদশিংগী মায়কৈরোমদা অমুক হল্লক্নবা খংহনখিবা অসিগুম্না ঙসি ভারত অসি বেদগী পুন্সিরোল  অমসুং ফীদমগী মায়কৈরোমদা হল্লক্নবগী ৱাফম অসি গ্লোবেল স্তেজদা থম্নরি। মসিগীদমক্তা ঐখোয়না মিশন লাইফ লোঞ্চ তৌখ্রে। মালেম পুম্বনা মসিদগী সপোর্ত ফংলি। ৱান সন, ৱান ৱর্ল্দ, ৱান গ্রীদকী ভিজন্দা ঐখোয়না ক্লীন ইনর্জীবুসু গ্লোবেল মুভমেন্তা ওন্থোরক্লি। ঐখোয়গী য়োগাসু ঙসি ইন্তর্নেস্নেল য়োগা দে ওইনা মালেম অসিগী লৈবাক 190 দগী হেনবদা য়ৌখ্রে। পুন্সিদা য়োগা হায়বসিসু শরুক অমা ওইহন্নবা য়োগাগী ওইবা পুন্সি ওইনা হিংনবগী খোংথাং, এনভাইরোন্মেন্তকা মরি শম্নবা লাইফ কুম্বা মিশন, মসিগী মালেমগী ওইবা কেম্পেন অসিনা মালেম পুম্বনা ঙসি খোয়দানরক্লি, আর্য় সমাজগী মীশিংগীদমক্তা মসি মখোয়গী পুন্সি অমসুং দিসিপ্লিনগী শরুক্নি।  অচম্বা পুন্সি অমসুং তেংবাংবগী ৱাখল্লোন, ভারতকী ফীজেৎ-চাকচেৎ অমসুং কস্তমশিং হেন্না মরুওইবা, এনভাইরোন্মেতকী ৱাবা, ভারতকী ওইবা ৱাফমশিং শন্দোকপা, আর্য় সমাজগী মীশিংনা পুন্সি চুপ্পা মসিদা লুপ্তুনা লৈরি।

মরম অসিনা ইচিল-ইনাও, ইচে-ইচলশিং

ঙসি ভারত অসিনা “সর্বে ভবন্তু সুখিন” গী পাওজেল অসি পুদুনা মালেমগী য়াইফনবগী কেম্পেনশিং অসি হেন্না-হেন্না তৌনরক্লি, ঙসি ভারত অসি মালেমগী মরুপ ওইনা মথৌদাং অসি হেন্না তৌরক্লিবা অসিদা আর্য় সমাজগী মীহুৎ খুদিংনা মসি অরায়বা  পাওজেল ওইনা থবক পাংথোক্লি। ঐহাক্না অদোম্বু মসিগীদমক্তা থাগৎপা ফোংদোকচরি। মরুপশিং,

স্বামী দয়ানন্দ সরস্বতীজীনা চুখৎপীরম্বা মৈরা অসি হৌখিবা চহী চামগা য়াঙ্খৈদগী আর্য় সমাজগী মওংদা খুন্নাইগী লম্বী তাকপা ওইরি। ঐহাক্না খল্লি মদুদি স্বামীজী অসি ঐখোয় খুদিংমকপু মথংখনবগী থৌদাং লৌবা ঙম্বগী ৱাখল খলহনবা ঙমহন্দুনা চৎখ্রে। মসিগী মথংখনবগী থৌদাং অসিদি- অনৌবা ৱাখল্লোনশিং অসি হেন্না ফগৎহন্নবগীদমক্তনি! মসিগী থৌদাং অসিদি – ওইরে, চৎলে, অসিগুম্বা হৈনবী অসি মরু ফংনা ফুক্তত্তুনা শেমদোক্নবনি! অদোম পুম্নমক্নাঐহাকপু অসুক য়াম্না মীনুংশি পীবিরী, মরম অসিনা ঐহাক্না ঙসি অদোমগী মফমদগী করিগুম্বা খরা নিজগে, করিগুম্বা খরসু হায়জগে।নিজবা য়াইকো? হায়বা য়াইকো? ঐহাক্না অদোম্না য়াবিগনি হায়বা থাজৈ। লৈবাক শেম্বগী মন্ত্রদা অদোম্না হান্নসু কয়া অমা তৌবিখ্রে, ঐহাক্না লৈবাক অসিগী হৌজিক হৌজিক মরুওইবা খরা অমুক্কা হন্না হায়জগে। খুদম ওইনা ইরৈবাক্কী ইহৌ, আর্য় সমাজনা মসিদগী পুৱারীগী মওংদা মরি লৈনরি।  ঙসি লৈবাক অসিনা অমুক্কা হন্না ইরমদমগী ওইবগী থৌদাং অসি লৌরি, লৈবাক অসি ভোকেল ফোর লোকেল ওইবা তারবদি অদোম- অদোমগী থৌদাং অদু হেন্না মরুওইগদৌরিবনি।

মরুপশিং,

অদোম্না খংবিরমগনি, হন্দক মতম খরগী মমাংদা লৈবাক অসিনা গ্যান ভারতম্ মিশনসু হৌখ্রে হায়বা।  মসিগী পাওজেলদি- ভারত অরিবা মমাংঙৈগী মেনুস্ক্রীপ্তশিং অসি দিজিতাইজ তৌবা অমদি প্রিজর্ব তৌবনি! হায়বদি গ্যান অসি ঐখোয়গী লন অসি ঐখোয়গী অনৌবা মীরোল অসিনা মসিগা শম্নরবা মতমদা, মসিগী মরুওইবা অসি খংলবা মতমদা মসিবু ঙাকপা ঙমগনি! মরম অসিনা ঐহাক্না আর্য় সমাজদা খংহনজগে মদুদি, অদোম্না চহী চামগা য়াঙ্খৈদগী ভারতকী শেংলবা অরিবা মতমগী গ্রন্থশিং অসি থিদুনা অমদি ঙাক্তুনা থম্বিরক্লি। ঐখোয়গী গ্রন্থশিং অসিগী নুংদা ওইনা কন্ননবা তৌবগী থবক অসি চহী কয়াদগী আর্য় সমাজগী মীশিংনা তৌবিদুনা লাক্লি।  গ্যান ভারত মিশন অসি হৌজিক নেস্নেলগী থাক্না পুখৎনবা হোৎনগনি। অদোম্না মসি অদোম ইসামক্কী কেম্পেন ওইনা লৌরগা মসিদা মতেং পাংবিয়ু অমদি অদোমগী গুরুকুলশিংদগী, অদোমগী ইন্সতিত্যুতকী থোংদগী নহারোলশিংদা মেনুস্ক্রীপশিং নৈননবৈ অমসুং রিসর্সকসু মরি লৈনবিয়ু।

মরুপশিং,

দয়ানন্দজীগী 200 শুবা মপোক কুমওন্দা ঐহাক্না য়ৈগ্যদা শিজিন্নবা মরু-মরাংশিংগী মতাংদা হায়জখি।  ঐখোয় পুম্বনা খংই অদুদি শ্রী অন্নগী মতিক ময়াই অসি কয়া য়াম্না লৈবগে হায়বা। য়ৈগ্যদা শিজিন্নবা মরু-মরাংশিং অসি থোইদোক্না অশেংবনি হায়না লৌনৈ। মসিগী চেং মরুশিংসিগা লোয়ননা অপৌবা চেং-হৱায় মরুশিং হায়বদি শ্রীঅন্নগী ভারতকী ওইনা চৎনবী অসিসু ঐখোয়না মখা তানা লৈহনগদবনি। য়ৈগ্যদা শিজিন্নবা মরুশিং অসিগী থোইদোকপা মতিক-ময়াই অমসু লৈ মদুদি মসি মহৌশাগী ওিবা মওংদা লোকপা ওইগদবনি। মহৌশাগী ওইবা লৌউ-শিংউবা, নেচরেল ফার্মিং, হৌজিক আচার্যজীনা শন্দোক্না হায়বিখিবা নেচরেল ফার্মিং অসি ভারতকী শেন্মীৎলোন্দা য়াম্না চাউবা সোর্স অমনি। ঙসি অমুক্কা হন্না মালেম অসিনা মহাক্কী মতিক-ময়াই অসি খংনরক্লে। ঐহাক্না হায়জরি, আর্য় সমাজনা নেচরেল ফার্মিংগী শেলগী ওইবা অমসুং স্পিরিচুএল ওইবা এঙ্গল অসিদগীসু মীশিংবু হৌদোক্লসি।

মরুপশিং,

অতোপ্পা হীরম অমনা ঈশিং য়োকশিনবসুনি। ঙসি লৈবাক অসিগী খুঙ্গং-খুঙ্গংদা অশেংবা-অরুবা ঈশিং ফংহন্নবগীদমক্তা জল জীবন মিশন্দা থবক তৌরি। জল জীবন মিশন অসি অদোমগী ওইনা খ্বাইদগী অফবা কেম্পেন্নি। অদুবু ঐখোয়না চেকশিনগদবদি ঈশিং ফংনবগী রিসোর্সশিং অসি লাক্কদৌরিবা মীরোলশিংগীদমক্তা ঈশিং মরাং কায়না কোন্ননবা লৈরবতদা মথৌ তৌগনি। মসিগীদমক্তা ঐখোয়না দ্রিপ ইরিগেসন্না লৌ উবা হেনগৎহনগদবনি। লৈবাক অসিদা য়সেংলবা পাৎ 60 দগী হেনবা তৌনবসু তৌরে। ঐখোয়না পাম্মি মদুদি সরকারনা হোৎনরিবশিং অসিগা লোয়ন-লোয়ননা খুন্নাই অদু ফনবসু মশানা মাং থানা থোকচরকপদুনি। ঐখোয়গী খুঙ্গং-খুঙ্গংদা পুখ্রী, পাৎ, গুহা অমসুং থাক-থাক নাইবা গুহা লৈনরম্মী। মতমগী খোংলৈগী মতুং ইন্না মখোয়শিং অদুগী মশিং হন্থরক্তুনা মশানা অদুম্মক কংনখ্রে। ঐখোয়গী ঐখোয়গী মহশাগী লনশিং অসিবু কন্ননবা লেপ্পা লৈতনা হোৎননিংবগী ৱাখল অসি লৈহনগদবনি। কেত্চ দি রেন হায়বা সরকারগী কেম্পেন, রিচার্জিং ৱেল শেম্নবা কেম্পেন, নোংগী ঈশিং শিজিন্ননবা রিচার্জিং তৌবা মতম অসিদা মথৌ তারে।

মরুপশিং,

হৌখিবা মতম কয়াদা লৈবাক অসিদা ‘এক পের মা কে নাম’ কেম্পেনসু মায় পাক্না তৌখ্রে।  কেম্পেন অসি শুপ্নতগী নুমীৎ খরখক্তগী নত্রগা চহী খরখক্তগী নত্তে। উ থাবা  অসি লেপ্পা লৈতনা চত্থগদবা কেম্পেন্নি। আর্য় সমাজগী মীশিংনা কেম্পেন অসিদা মী কয়া-কয়া শমজিন্নবা তৌবিয়ু।

ঐখোয়গী বেদনা ঐখোয়না তম্বিরি- "সঙ্গচ্ছধ্বম সম্বদধ্বম সং ৱো মনান্সি জানতাম্”। হায়বদি ঐখোয় পুন্না চৎমিন্নসি, পুন্না হায়মিন্নসি অমদি অমনা-অমগী থম্মোয় মসক খংনসি। হায়বদি অমনা মগী ৱাখল্লোনবু ইকাই খুম্নসি হায়বনি।  বেদশিংদা মসি তাকপিরম্বশিং অসিনা ঐখোয়না লৈবাক অসিদা খংহনবগী মওংদসু লৌবা য়াই।  ঐখোয়না লৈবাক অসিগী ৱাশকপু ঐখোয় ইশাগী ৱাশক ওইনা লৌগদবনি। ঐখোয়না মীয়ামগা থৌদাং লৌমিন্নবগী ৱাখল্লোন্দা পুন্না হোৎনবা অসি হেনগৎহনগদবনি। চহী চামগা য়াঙ্খৈ অসিদা আর্য়সমাজনা ৱাখল্লোন অসিদা থবক তৌখি। মসিগী ৱাখল্লোন অসি লেপ্পা লৈতনা ফগৎহনগদবনি।  ঐহাক্না থাজৈ মহর্ষি দয়ানন্দ সরস্বতীজীগী ৱাখল্লোন অসি মতৌ অসিগুম্না মীওইবশিংগী য়াইফনবগী লম্বিদা হেন্না ফগৎলক্কনি। মসিগী ৱাখল্লোন অসিগা লোয়ননা অমুক হন্না অদোম পুম্নমকপু আর্য় সমাচহী জগী 150 শুবা অসিগীদমক্তা য়াইফ-থৌজাল পীজরি। ময়াম পুম্নমকপু অমুক্কা হন্না থাগৎচরি। খুরুমজরি।  

***