Ka India ka la shah pynkup burom da ka khusnam Outstanding Achievement in Social Security Award 2025 ha ka International Social Security Association (ISSA), kaba la ithuh ïa ki sienjam jong ka ri ha kaba pyniar ïa ka jingïada ïa ka imlang sahlang bad ban pynthikna ka bha ka miat kaba kynthup lang ïa ki nongshong shnong jong ka. Ia kane la pynpaw da u Myntri Sorkar Pdeng ba dei peit ia ka Tnad Labour & Employment bad ka kam ialehkai, u Dr. Mansukh Mandaviya, ha ka jingiakren bad ki lad pathai khubor mynta ka sngi. Ia ka khusnam ISSA, kaba la sam ha Kuala Lumpur, Malaysia ha ka taiew ba ladep, la pdiang da u Dr. Mansukh Mandaviya na ka liang ka Sorkar India.

Kane ka khusnam, la ong u Myntri Sorkar Pdeng, ka long ka jingpynshisha ïa ki jingpynkylla ba la wanrah da ka Sorkar Modi ha kine ki shiphew snem ba la dep ha ka liang ka jingïada ïa ka imlang sahlang. U la ban jur ruh halor ka jingkiew ka bhah thep vote jong ka India ha ka ISSA General Assembly sha 30 tylli, kaba dei kaba heh tam kaba lah ban shah na ka bynta kano kano ka ri kaba long dkhot. “Kane ka mawjam ka pyni ia ka jingkiew ka bor bad jinglong nongialam jong ka India ha kaba pynwandur ia ka jingiakren bad jingiatreilang ha ka pyrthei halor ka jingiada ia ka imlang sahlang,” la ong u Dr. Mandaviya.

Ka khusnam ISSA ka dei ka jingithuh ha ka pyrthei, kaba la ai shisien man ka lai snem ha ka World Social Security Forum. Kiba la ioh ia kane ka khusnam mynshwa ki kynthup ia ka Brazil (2013), China (2016), Rwanda (2019) bad ka Iceland (2022). La seng ia ka ha u snem 1927, ka International Social Security Association (ISSA) ka kynthup ia palat 330 tylli ki seng long dkhot na 158 tylli ki ri.

Hapoh ka jingïalam jong u Myntri Rangbahduh ka Ri Narendra Modi, ka India ka la ïoh ïa ka jingpyniar kaba kongsan ha ka jingïada ïa ka imlang sahlang — na ka 19% ha u snem 2015 sha ka 64.3% ha u snem 2025, kumba la pynpaw da ka International Labour Organisation (ILO) — da kaba wanrah ïa palat 94 klur (940 million) ki nongshong shnong hapoh ka bynta jong ka jingshngain ha ka imlang sahlang. Ka jingpynkylla kaba kongsan kaba pynlong ia kane ka jingjop ka dei ka rynsan e-Shram, kaba la sdang saw snem mynshwa, kaba la pyniasoh ia palat 31 klur (310 million) ki nongtrei bym pat pynskhem sha ka jingiada ha ka imlang sahlang bad kiwei kiwei ki jingshakri ba iadei bad ka bha ka miat.

Ka khusnam ISSA 2025 ka pynpaw ïa ka jingangnud jong ka India ban tei ïa ka rukom ïada ha ka imlang sahlang kaba kynthup lang ia baroh, kaba ïaryngkat, bad kaba la pynïaid da ka teknoloji, ban pynthikna ba uwei pa uwei u nongtrei — uba la pynskhem ne bym pat ioh jingpynskhem — u ïoh ïa ka jingshngain hapoh ka jingïada ia ka imlang sahlang.

*****