പ്രധാനമന്ത്രി: ഇന്ന് വളരെ പ്രധാനപ്പെട്ട ഒരു ദിവസമാണ്. ദേവ് ദീപാവലിയും ഗുർപൂരബും കൂടിയാണ്. അതിനാൽ, ഇത് വളരെ പ്രധാനപ്പെട്ട ഒരു അവസരമാണ്.

കളിക്കാർ: ഗുർപൂരബ് ആശംസകൾ, സർ!

പ്രധാനമന്ത്രി: നിങ്ങൾക്കെല്ലാവർക്കും വളരെയേറെ അഭിനന്ദനങ്ങൾ!

കോച്ച്: ബഹുമാനപ്പെട്ട പ്രധാനമന്ത്രി, വളരെ നന്ദി. ഇവിടെ വരാൻ കഴിഞ്ഞത് ബഹുമതിയായും സവിശേഷ ഭാ​ഗ്യമായും കരുതുന്നു. ഒരു കാമ്പെയ്‌നിനെക്കുറിച്ച് ഞാൻ നിങ്ങളോട് പറയാൻ ആഗ്രഹിക്കുന്നു. ഈ പെൺകുട്ടികൾ അത്ഭുതങ്ങൾ ചെയ്തിട്ടുണ്ട്, ശരിക്കും അത്ഭുതകരമാണ്. കഴിഞ്ഞ രണ്ട് വർഷമായി, അവർ വളരെയധികം കഠിനാധ്വാനം ചെയ്തു, വളരെയധികം പരിശ്രമിച്ചു. ഓരോ പരിശീലന സെഷനിലും, അവർ പൂർണ്ണ തീവ്രതയോടും ഊർജ്ജസ്വലതയോടും കൂടി കളിച്ചു. അവരുടെ കഠിനാധ്വാനത്തിന് ശരിക്കും ഫലം ലഭിച്ചു എന്ന് ഞാൻ പറയും.

ഹർമൻപ്രീത് കൗർ: സർ, 2017 ൽ ഞങ്ങൾ നിങ്ങളെ കണ്ടുമുട്ടിയത് എനിക്ക് ഇപ്പോഴും ഓർമ്മയുണ്ട്. ആ സമയത്ത്, ഞങ്ങൾ ഒരു ട്രോഫിയുമായി വന്നില്ല, പക്ഷേ ഇന്ന് ഞങ്ങൾ ഇത്രയും വർഷങ്ങളായി കഠിനാധ്വാനം ചെയ്ത ട്രോഫി കൊണ്ടുവരാൻ കഴിഞ്ഞത് ഞങ്ങൾക്ക് വലിയ ബഹുമാനമാണ്. ഇന്ന് താങ്കൾ ഞങ്ങളുടെ സന്തോഷം ഇരട്ടിയാക്കി, അത് ഞങ്ങൾക്ക് വലിയൊരു ബഹുമതിയാണ്. ഭാവിയിൽ ഓരോ തവണയും ഒരു ട്രോഫിയുമായി നിങ്ങളെ വീണ്ടും വീണ്ടും കാണുകയും നിങ്ങളോടൊപ്പം ടീം ഫോട്ടോകൾ എടുക്കുകയും ചെയ്യുക എന്നതാണ് ഇപ്പോൾ ഞങ്ങളുടെ ലക്ഷ്യം.

പ്രധാനമന്ത്രി: തീർച്ചയായും, നിങ്ങളെല്ലാവരും ശ്രദ്ധേയമായ എന്തെങ്കിലും ചെയ്തിട്ടുണ്ട്. ഭാരതത്തിൽ ക്രിക്കറ്റ് വെറുമൊരു കായിക വിനോദമല്ല. ഒരു തരത്തിൽ, അത് ജനങ്ങളുടെ ജീവിതത്തിന്റെ ഭാഗമായി മാറിയിരിക്കുന്നു. ക്രിക്കറ്റ് നന്നായി നടക്കുമ്പോൾ, ഭാരതത്തിന് സന്തോഷമുണ്ട്; അത് അൽപ്പമെങ്കിലും പരാജയപ്പെട്ടാൽ, മുഴുവൻ രാജ്യവും നിരാശരാകും. തുടർച്ചയായി മൂന്ന് മത്സരങ്ങൾ തോറ്റപ്പോൾ, ട്രോളിംഗ് സൈന്യം നിങ്ങളുടെ പിന്നാലെയായിരുന്നു.

ഹർമൻപ്രീത് കൗർ: 2017 ൽ ഞങ്ങൾ താങ്കളെ കണ്ട സമയത്ത്, ഫൈനലിൽ പരാജയപ്പെട്ടതിന് ശേഷമാണ് ഞങ്ങൾ തിരിച്ചുവന്നതായിരുന്നു, പക്ഷേ താങ്കൾ ഞങ്ങളെ വളരെയധികം പ്രചോദിപ്പിച്ചു. അടുത്ത അവസരം വരുമ്പോൾ എങ്ങനെ കളിക്കണമെന്നും ഞങ്ങളുടെ പരമാവധി നൽകണമെന്നും താങ്കൾ ഞങ്ങളോട് പറഞ്ഞു. ഇന്ന്, ഒടുവിൽ ഞങ്ങൾ ട്രോഫിയുമായി തിരിച്ചെത്തി, താങ്കളോട് വീണ്ടും സംസാരിക്കാൻ കഴിഞ്ഞതിൽ വളരെ സന്തോഷമുണ്ട്.

പ്രധാനമന്ത്രി: അതെ, സ്മൃതി ജി, ദയവായി ഞങ്ങളോട് പറയൂ.

സ്മൃതി മന്ദാന: 2017 ൽ ഞങ്ങൾ വന്നപ്പോൾ, ഞങ്ങൾക്ക് ട്രോഫി കൊണ്ടുവരാൻ കഴിഞ്ഞില്ല, പക്ഷേ പ്രതീക്ഷകളെക്കുറിച്ച് താങ്കൾ ഞങ്ങളോട് ഒരു ചോദ്യം ചോദിച്ചത് ഞാൻ ഓർക്കുന്നു, നിങ്ങളുടെ ഉത്തരം അന്നുമുതൽ എന്നിൽ നിലനിൽക്കുന്നു. അത് ഞങ്ങളെ ശരിക്കും സഹായിച്ചു. അടുത്ത 6-7 വർഷങ്ങളിൽ, ഞങ്ങൾ നിരവധി ശ്രമങ്ങൾ നടത്തി, പക്ഷേ ലോകകപ്പുകളിൽ ഞങ്ങൾക്ക് നിരവധി ഹൃദയം തകരുന്ന അനുഭവങ്ങൾ  നേരിടേണ്ടിവന്നു, പക്ഷേ ആദ്യത്തെ വനിതാ ലോകകപ്പ് ഭാരതത്തിലേക്ക് വരുന്നത് നിയോ​ഗമായാണ് ഞാൻ കരുതുന്നത്. സർ, നിങ്ങൾ എല്ലായ്പ്പോഴും ഞങ്ങൾക്കെല്ലാവർക്കും ഒരു പ്രചോദനമാണ്. പ്രത്യേകിച്ച് ഇപ്പോൾ, എല്ലാ മേഖലകളിലും സ്ത്രീകൾ തിളങ്ങുന്നത് കാണുന്നത്, അത് ISRO യുടെ റോക്കറ്റ് വിക്ഷേപണമായാലും മറ്റെന്തായാലും. ഇതെല്ലാം വളരെ പ്രചോദനകരമാണ്. നമ്മൾ അത് കാണുമ്പോഴെല്ലാം, രാജ്യത്തുടനീളമുള്ള മറ്റ് പെൺകുട്ടികളെ കൂടുതൽ മികച്ചതാക്കാനും പ്രചോദിപ്പിക്കാനും അത് ഞങ്ങളെ കൂടുതൽ പ്രേരിപ്പിക്കുന്നു.

പ്രധാനമന്ത്രി: മുഴുവൻ രാജ്യവും ഇത് കാണുകയും അഭിമാനിക്കുകയും ചെയ്യുന്നു. നിങ്ങളിൽ നിന്നും നിങ്ങളുടെ അനുഭവങ്ങളിൽ നിന്നും കേൾക്കാൻ ഞാൻ ആഗ്രഹിക്കുന്നു.

സ്മൃതി മന്ദാന: സർ, ഈ കാമ്പെയ്‌നിലെ ഏറ്റവും മികച്ച കാര്യം ഓരോ കളിക്കാരനും പറയാൻ ഒരു കഥയുണ്ട്, ആരുടെയും സംഭാവന മറ്റുള്ളവരേക്കാൾ കുറവല്ല എന്നതാണ്.

സ്മൃതി മന്ദാന: കഴിഞ്ഞ തവണ, പ്രതീക്ഷകളെ എങ്ങനെ നേരിടണമെന്ന് നിങ്ങൾ സംസാരിച്ചു. ആ ഉത്തരം എപ്പോഴും എന്റെ മനസ്സിൽ തങ്ങിനിൽക്കുന്നു. നിങ്ങൾ ശാന്തമായും സംയമനത്തോടെയും ഇരിക്കുന്ന രീതി, അതും ഞങ്ങൾക്ക് വളരെയധികം പ്രചോദനം നൽകുന്നു.

ജെമീമ റോഡ്രിഗസ്: സർ, ആ മൂന്ന് മത്സരങ്ങൾ ഞങ്ങൾ തോറ്റപ്പോൾ ... ഒരു ടീമിനെ നിർവചിക്കുന്നത് നിങ്ങൾ എത്ര തവണ വിജയിക്കുന്നു എന്നതിനെ അടിസ്ഥാനമാക്കിയല്ല, മറിച്ച് ഒരു വീഴ്ചയ്ക്ക് ശേഷം നിങ്ങൾ എങ്ങനെ ഉണർന്നു പ്രവർത്തിക്കുന്നു എന്നതിനെ അടിസ്ഥാനമാക്കിയാണ് എന്ന് ഞാൻ കരുതുന്നു. ഈ ടീം അത് ചെയ്തുവെന്നും അതുകൊണ്ടാണ് ഇത് ഒരു ചാമ്പ്യൻ ടീമാണെന്നും എനിക്ക് തോന്നുന്നത്. ഈ ടീമിനെക്കുറിച്ച് ഞാൻ പറയുന്ന മറ്റൊരു കാര്യം ടീമിലെ ഐക്യമാണ്. ഞാൻ കണ്ടിട്ടുള്ളതിൽ വച്ച് ഏറ്റവും മികച്ചത് ഇതാണ്. ആരെങ്കിലും നന്നായി ചെയ്യുമ്പോൾ, എല്ലാവരും ആത്മാർത്ഥമായി സന്തോഷിക്കുകയും, കയ്യടിക്കുകയും, അവർ തന്നെ ആ റൺസ് നേടിയതോ വിക്കറ്റുകൾ എടുത്തതോ പോലെ ആഘോഷിക്കുകയും ചെയ്തു. ആരെങ്കിലും നിരാശയിലാകുമ്പോഴെല്ലാം, അവരുടെ തോളിൽ കൈവെച്ച്, "കുഴപ്പമില്ല, അടുത്ത മത്സരത്തിൽ നിങ്ങൾ അത് ചെയ്യും" എന്ന് പറയാൻ എപ്പോഴും ആരെങ്കിലും ഉണ്ടായിരുന്നു. അതാണ് ഈ ടീമിനെ നിർവചിക്കുന്നതെന്ന് ഞാൻ കരുതുന്നു.

സ്നേഹ റാണ: ജെമ്മിയുടെ അഭിപ്രായത്തോട് ഞാൻ യോജിക്കുന്നു. വിജയത്തിൽ എല്ലാവരും ഒരുമിച്ചാണെന്ന് ഞങ്ങൾ തീരുമാനിച്ചു, പക്ഷേ ഒരു തകർച്ചയിൽ പരസ്പരം നിൽക്കുക എന്നതാണ് യഥാർത്ഥ പരീക്ഷണം. ഒരു ടീം എന്ന നിലയിൽ, ഒരു യൂണിറ്റ് എന്ന നിലയിൽ, എന്ത് സംഭവിച്ചാലും, ആരെയും പിന്നിലാക്കില്ലെന്നും ഞങ്ങൾ എപ്പോഴും പരസ്പരം ഉയർത്തുമെന്നും ഞങ്ങൾ തീരുമാനിച്ചു. ഞങ്ങളുടെ ടീമിന്റെ ഏറ്റവും മികച്ച ഭാഗമായിരുന്നു അതെന്ന് ഞാൻ കരുതുന്നു.

ക്രാന്തി ഗൗഡ്: ഹർമൻ ഡി എപ്പോഴും പറയും: "പുഞ്ചിരി തുടരുക!" അതിനാൽ, ആരെങ്കിലും പരിഭ്രാന്തരോ നിശബ്ദരോ ആയിരുന്നെങ്കിൽ, എല്ലാവരും പുഞ്ചിരിക്കുന്നുണ്ടെന്ന് ഞങ്ങൾ ഉറപ്പാക്കും. പരസ്പരം ചിരിക്കുന്നത് കാണുമ്പോൾ ഞങ്ങൾ എല്ലാവരും ഭാരം കുറഞ്ഞവരും കൂടുതൽ പോസിറ്റീവും ആയി.

പ്രധാനമന്ത്രി: പക്ഷേ നിങ്ങളുടെ ടീമിൽ എല്ലാവരെയും ചിരിപ്പിക്കുന്ന ഒരാൾ ഉണ്ടായിരിക്കണം, അല്ലേ?

കളിക്കാരി: ജെമ്മി ഡി!

ജെമീമ റോഡ്രിഗസ്: സർ, വാസ്തവത്തിൽ ഹാർലീനുമുണ്ട്! ടീമിനെ ഒരുമിച്ച് നിർത്തുന്നതിൽ അവൾ ശരിക്കും വിലമതിക്കുന്നു.

ഹർലീൻ കൗർ ഡിയോൾ: സർ, എല്ലാ ടീമുകളിലും സമ്മർദ്ദം കുറയ്ക്കാൻ കുറഞ്ഞത് ഒരു വ്യക്തിയെങ്കിലും ഉണ്ടാകണമെന്ന് ഞാൻ കരുതുന്നു. ആരെങ്കിലും ഒറ്റയ്ക്കോ നിശബ്ദമായോ ഇരിക്കുന്നത് കാണുമ്പോഴോ അല്ലെങ്കിൽ എനിക്ക് അൽപ്പം അലസത അനുഭവപ്പെടുമ്പോഴോ, ഞാൻ തമാശയോ നിസ്സാരമായോ എന്തെങ്കിലും ചെയ്യാറുണ്ട്. എന്റെ ചുറ്റുമുള്ള ആളുകൾ സന്തോഷിക്കുമ്പോൾ എനിക്ക് സന്തോഷം തോന്നുന്നു.

പ്രധാനമന്ത്രി: നിങ്ങൾ ഇവിടെയും എന്തെങ്കിലും ചെയ്തിട്ടുണ്ടാകും, അല്ലേ?

ഹർലീൻ കൗർ ഡിയോൾ: സർ, അവർ ഞങ്ങളെ ശകാരിച്ചു. അവർ ഞങ്ങളോട് മിണ്ടാതിരിക്കാൻ പറഞ്ഞു! ഞങ്ങൾ അൽപ്പം ശബ്ദമുണ്ടാക്കിയാൽ പോലും ഞങ്ങളെ ശകാരിച്ചു.

ഹർലീൻ കൗർ ഡിയോൾ: സർ, നിങ്ങളുടെ ചർമ്മസംരക്ഷണ ദിനചര്യയെക്കുറിച്ച് ഞാൻ നിങ്ങളോട് ചോദിക്കാൻ ആഗ്രഹിക്കുന്നു! നിങ്ങൾ ശരിക്കും തിളങ്ങുന്നു സർ!

പ്രധാനമന്ത്രി: ഞാൻ ഒരിക്കലും ആ വിഷയത്തിൽ അധികം ശ്രദ്ധ ചെലുത്തിയിട്ടില്ല.

കളിക്കാർ: സർ, ദശലക്ഷക്കണക്കിന് ഇന്ത്യക്കാരുടെ സ്നേഹമാണ് നിങ്ങളെ തിളക്കമുള്ളതാക്കുന്നത്!

പ്രധാനമന്ത്രി: അത് ശരിയാണ്, അത് അങ്ങനെയാണ്. അത് വളരെ ശക്തമായ ഒരു കാര്യമാണ് ... ആളുകളുടെ സ്നേഹവും അനുഗ്രഹവും. നോക്കൂ, ഞാൻ ഗവൺമെന്റിന്റെ തലവനായിട്ട് ഇപ്പോൾ 25 വർഷമായി. അതൊരു നീണ്ട കാലമാണ്. ഇത്രയും കാലത്തിനു ശേഷവും, ആളുകൾ ഇപ്പോഴും അത്തരം സ്നേഹം ചൊരിയുമ്പോൾ, അത് യഥാർത്ഥത്തിൽ ആഴത്തിലുള്ള സ്വാധീനം ചെലുത്തുന്നു.

കോച്ച്: സർ, ചോദ്യങ്ങൾ വരുന്നത് നിങ്ങൾ കണ്ടോ. അവരെല്ലാം വ്യത്യസ്ത കഥാപാത്രങ്ങളാണ്! ഞാൻ അവരുടെ ഹെഡ് കോച്ചായിട്ട് രണ്ട് വർഷമായി, എന്റെ മുടി ഇതിനകം നരച്ചിരിക്കുന്നു! ഒരു ​​കഥ പറയാം. ജൂണിൽ ഞങ്ങൾ ഇംഗ്ലണ്ടിലായിരുന്നു, അവിടെ വെച്ച് ഞങ്ങൾ ചാൾസ് രാജാവിനെ കണ്ടുമുട്ടി. പക്ഷേ പ്രോട്ടോക്കോൾ പ്രകാരം 20 പേരെ മാത്രമേ അനുവദിച്ചിരുന്നുള്ളൂ. അതിനാൽ, സപ്പോർട്ട് സ്റ്റാഫിന് പോകാൻ കഴിഞ്ഞില്ല. കളിക്കാരും മൂന്ന് വിദഗ്ദ്ധ പരിശീലകരും മാത്രമേ അനുവദിച്ചിരുന്നുള്ളൂ. ഞാൻ സപ്പോർട്ട് സ്റ്റാഫിനോട് പറഞ്ഞു, "എനിക്ക് വളരെ ഖേദമുണ്ട്, പക്ഷേ പരിധി 20 പേർ മാത്രമാണ്." അവർ പറഞ്ഞത് എന്നെ ശരിക്കും അത്ഭുതപ്പെടുത്തി. അവർ പറഞ്ഞു, "അത് കുഴപ്പമില്ല, ഞങ്ങൾക്ക് ഈ ഫോട്ടോ വേണ്ട. നവംബർ 4 അല്ലെങ്കിൽ 5 തീയതികളിൽ മോദി ജിയോടൊപ്പം ഒരു ഫോട്ടോ എടുക്കണം." ഇന്ന്, ആ ദിവസം യാഥാർത്ഥ്യമായി!

ഹർമൻപ്രീത് കൗർ: ചിലപ്പോൾ ഇത് എന്തുകൊണ്ടാണ് ഞങ്ങൾക്ക് എപ്പോഴും സംഭവിക്കുന്നത് എന്ന് തോന്നിയിട്ടുണ്ടോ? മാനസികമായും ശാരീരികമായും ശക്തരാകാൻ വേണ്ടിയായിരിക്കാം അത് അങ്ങനെ എഴുതിയത്.

പ്രധാനമന്ത്രി: നിങ്ങൾ അങ്ങനെ പറയുമ്പോൾ, ഹർമൻ, നിങ്ങളുടെ മനസ്സിലൂടെ എന്താണ് കടന്നുപോയത്? കാരണം നിങ്ങൾ പറഞ്ഞത് ആളുകളെ ശരിക്കും പ്രചോദിപ്പിക്കും.

ഹർമൻപ്രീത് കൗർ: ആഴത്തിൽ എവിടെയോ, ഞങ്ങളും ആ ട്രോഫി ഉയർത്തുന്ന ഒരു ദിവസം വരുമെന്ന് ഞങ്ങൾ എപ്പോഴും വിശ്വസിച്ചിരുന്നു. ഈ ടീമിനൊപ്പം, ആദ്യ ദിവസം മുതൽ ഞങ്ങൾക്ക് അത് മനസ്സിലാക്കാൻ കഴിയുന്ന ഒരു പ്രത്യേക വികാരം ഉണ്ടായിരുന്നു.

പ്രധാനമന്ത്രി: പക്ഷേ, "എന്തുകൊണ്ടാണ് ഞങ്ങൾക്ക് ഇത് സംഭവിക്കുന്നത്?" എന്ന ചിന്ത നിങ്ങളുടെ മനസ്സിൽ വന്നപ്പോൾ, എന്നിരുന്നാലും, മുന്നോട്ട് പോകാനും മറ്റുള്ളവർക്ക് ആത്മവിശ്വാസം നൽകാനുമുള്ള ധൈര്യം നിങ്ങൾ സംഭരിച്ചു, അതിന് പിന്നിൽ ശക്തമായ ഒരു കാരണമുണ്ടായിരുന്നിരിക്കണം.

ഹർമൻപ്രീത് കൗർ: അതെ, സർ.ഇതിന്റെ ബഹുമതി ഞങ്ങളുടെ എല്ലാ ടീം അംഗങ്ങൾക്കും നൽകുന്നു, കാരണം എല്ലാവർക്കും ആത്മവിശ്വാസം ഉണ്ടായിരുന്നു.  എല്ലാ ടൂർണമെന്റിലും ഞങ്ങൾ മെച്ചപ്പെട്ടു. സർ (പരിശീലകൻ) പറഞ്ഞതുപോലെ, അദ്ദേഹം രണ്ട് വർഷമായി ഞങ്ങളോടൊപ്പമുണ്ട്, ഈ സമയത്ത് ഞങ്ങൾ ഞങ്ങളുടെ മാനസിക കരുത്തിൽ വളരെയധികം പ്രവർത്തിച്ചിട്ടുണ്ട്, കാരണം സംഭവിച്ചത് കഴിഞ്ഞ കാലത്താണ്, ഞങ്ങൾക്ക് അത് മാറ്റാൻ കഴിഞ്ഞില്ല.

പ്രധാനമന്ത്രി: അപ്പോൾ നിങ്ങൾ വർത്തമാനകാലത്ത് ജീവിക്കാൻ പഠിച്ചു.

ഹർമൻപ്രീത് കൗർ: അതെ, കൃത്യമായി. അതുകൊണ്ടാണ് വർത്തമാനകാലത്ത് ജീവിക്കുക എന്ന ആശയത്തിൽ കൂടുതൽ ശക്തമായി വിശ്വസിക്കാൻ നമ്മുടെ ടീം അംഗങ്ങൾക്ക് സന്ദേശം നൽകാൻ താങ്കൾ എന്ത് അധിക കാര്യങ്ങൾ ചെയ്യുന്നു എന്ന ചോദ്യം താങ്കളോട് ഞാൻ ചോദിച്ചത്. കാരണം അത് ഞങ്ങളെ ശരിക്കും സഹായിച്ചിട്ടുണ്ട്, അത് നിങ്ങളിൽ നിന്നാണ് വരുന്നതെങ്കിൽ, ഞങ്ങളും ഞങ്ങളുടെ പരിശീലകരും ശരിയായ പാതയിലാണെന്ന് അത് ഉറപ്പിക്കും.

പ്രധാനമന്ത്രി: അപ്പോൾ, ഡിഎസ്പി (ഡെപ്യൂട്ടി പോലീസ് സൂപ്രണ്ട്), ഇന്ന് നിങ്ങൾ എന്താണ് ചെയ്തത്? നിങ്ങൾ എല്ലാവർക്കും നിർദ്ദേശങ്ങൾ നൽകുകയും എല്ലാവരെയും നിയന്ത്രിക്കുകയും ചെയ്തിരിക്കണം, അല്ലേ?

ദീപ്തി ശർമ്മ: ഇല്ല സർ, ഞാൻ നിങ്ങളെ കാണാൻ കാത്തിരിക്കുകയായിരുന്നു! ഞാൻ ഈ ദിവസത്തിനായി കാത്തിരിക്കുകയായിരുന്നു, നിമിഷം ആസ്വദിക്കുകയും നിങ്ങളെ കാണാൻ കാത്തിരിക്കുകയും ചെയ്തു. പക്ഷേ, 2017 ൽ, ഒരു യഥാർത്ഥ കളിക്കാരൻ ഒരു വീഴ്ചയ്ക്ക് ശേഷം വീണ്ടും എഴുന്നേൽക്കാൻ പഠിക്കുന്നവനും പരാജയത്തിൽ നിന്ന് ഉയരുന്നവനുമാണ് എന്ന് നിങ്ങൾ എന്നോട് പറഞ്ഞത് എനിക്ക് ഇപ്പോഴും ഓർമ്മയുണ്ട്. നിങ്ങൾ എന്നോട് പറഞ്ഞു, "കഠിനാധ്വാനം ചെയ്യുക, ഒരിക്കലും പരിശ്രമം നിർത്തരുത്." ആ വാക്കുകൾ എപ്പോഴും എന്നെ പ്രചോദിപ്പിച്ചിട്ടുണ്ട്. സമയം കിട്ടുമ്പോഴെല്ലാം ഞാൻ നിങ്ങളുടെ പ്രസംഗങ്ങൾ കേൾക്കുന്നു, സർ. ആളുകൾ പലതരം കാര്യങ്ങൾ പറയുമ്പോഴും താങ്കൾ എപ്പോഴും വളരെ ശാന്തനും അക്ഷോഭ്യനുമാണ്. എല്ലാം വളരെ ശാന്തമായി  കൈകാര്യം ചെയ്യുന്ന താങ്കളുടെ രീതി എന്റെ കളിയിൽ എന്നെ വളരെയധികം സഹായിക്കുന്നു.

പ്രധാനമന്ത്രി: ഹനുമാൻ ജിയുടെ ടാറ്റൂ ധരിച്ചാണ് നിങ്ങൾ നടക്കുന്നത്. അപ്പോൾ പറയൂ, മത്സരങ്ങളിൽ ഹനുമാൻ ജി നിങ്ങളെ സഹായിക്കുന്നുണ്ടോ?

ദീപ്തി ശർമ്മ: സർ, വാസ്തവത്തിൽ, എനിക്ക് എന്നേക്കാൾ കൂടുതൽ വിശ്വാസമുള്ളത് അദ്ദേഹത്തിലാണ് (ഭഗവാൻ ഹനുമാൻ). എനിക്ക് ബുദ്ധിമുട്ടുള്ള സാഹചര്യങ്ങൾ നേരിടുമ്പോഴെല്ലാം, ഞാൻ അദ്ദേഹത്തിന്റെ പേര് മാത്രമേ ഉപയോഗിക്കുന്നുള്ളൂ, ആ ബുദ്ധിമുട്ടുകളിൽ നിന്ന് എനിക്ക് പുറത്തുവരാൻ കഴിയുമെന്ന് എനിക്ക് തോന്നുന്നു. അത്രമാത്രം ശക്തമാണ് അദ്ദേഹത്തിലുള്ള എന്റെ വിശ്വാസം.

പ്രധാനമന്ത്രി: നിങ്ങളുടെ ഇൻസ്റ്റാഗ്രാം അക്കൗണ്ടിൽ "ജയ് ശ്രീ റാം" എന്ന് പോലും എഴുതിയിട്ടുണ്ട്, അല്ലേ?

ദീപ്തി ശർമ്മ: അതെ സർ, അവിടെയും അത് എഴുതിയിട്ടുണ്ട്. അതെ, തീർച്ചയായും.

പ്രധാനമന്ത്രി: വിശ്വാസം ജീവിതത്തിൽ വളരെയധികം സഹായിക്കുന്നു. ഏറ്റവും വലിയ നേട്ടം അത് നിങ്ങൾക്ക് സമാധാനം നൽകുന്നു എന്നതാണ്. നിങ്ങളുടെ ആശങ്കകൾ ദൈവത്തിന് കൈമാറാനും അവൻ കാര്യങ്ങൾ നോക്കുമെന്ന് അറിഞ്ഞുകൊണ്ട് സമാധാനത്തോടെ ഉറങ്ങാനും കഴിയും. എന്നാൽ മൈതാനത്ത്, ആളുകൾ പറയുന്നത് നിങ്ങൾ കുറച്ച് 'ദാദാഗിരി' (ആധിപത്യം) ഉപയോഗിച്ച് കളി ഭരിക്കുമെന്നാണ്. അത് എത്രത്തോളം ശരിയാണ്?

ദീപ്തി ശർമ്മ: ഇല്ല സർ, അങ്ങനെയൊന്നുമില്ല! പക്ഷേ അതെ, ആളുകൾ അൽപ്പം ഭയപ്പെടുന്ന ഒരു കാര്യമുണ്ട്, അത് എന്റെ ത്രോ ആണ്! ചിലപ്പോൾ എന്റെ സഹതാരങ്ങൾ പോലും തമാശയായി പറയും, "ശാന്തമാകൂ, അത് നമ്മളാണ്. അത്ര കഠിനമായി എറിയരുത്!"

ദീപ്തി ശർമ്മ: എന്റെ കൈയിലെ ഹനുമാൻ ജി ടാറ്റൂവിനെക്കുറിച്ച് സർ എന്നോട് വ്യക്തിപരമായി ചോദിച്ചു. അതിന്റെ പിന്നിലെ രഹസ്യം എന്താണ്, ഞാൻ അദ്ദേഹത്തെ എത്രത്തോളം ആഴത്തിൽ വിശ്വസിക്കുന്നു. എന്നെ ശരിക്കും സ്പർശിച്ചത് സാറിന് എന്റെ ഇൻസ്റ്റാഗ്രാം ടാഗ്‌ലൈൻ പോലും അറിയാമായിരുന്നു എന്നതാണ്!

പ്രധാനമന്ത്രി: അപ്പോൾ ഹർമൻ, വിജയത്തിനുശേഷം, നിങ്ങൾ പന്ത് പോക്കറ്റിൽ വെച്ചപ്പോൾ... അതിന് പിന്നിലെ കാരണം എന്തായിരുന്നു? നിങ്ങൾ പ്ലാൻ ചെയ്തിരുന്നതാണോ അതോ ആരെങ്കിലും നിങ്ങളോട് അത് ചെയ്യാൻ പറഞ്ഞതാണോ?

ഹർമൻപ്രീത് കൗർ: ഇല്ല സർ, അതും ദൈവത്തിന്റെ പദ്ധതിയായിരുന്നുവെന്ന് ഞാൻ പറയും. അവസാന പന്ത്, അവസാന ക്യാച്ച്, എനിക്ക് ലഭിക്കുമെന്ന് ഞാൻ ഒരിക്കലും കരുതിയിരുന്നില്ല, പക്ഷേ അത് സംഭവിച്ചു. ഇത്രയും വർഷത്തെ കഠിനാധ്വാനത്തിനും കാത്തിരിപ്പിനും ശേഷം, അത് ഒടുവിൽ എന്റെ കൈകളിൽ എത്തിയപ്പോൾ, അത് എന്റെ പക്കലുണ്ടാകണമെന്ന് എനിക്ക് തോന്നി. ആ പന്ത് ഇപ്പോഴും എന്റെ ബാഗിലുണ്ട്.

പ്രധാനമന്ത്രി: ഷഫാലി, നിങ്ങൾ റോഹ്തക്കിൽ നിന്നുള്ളയാളാണ്. എല്ലാ ഗുസ്തിക്കാരും വരുന്ന സ്ഥലമാണിത്! നിങ്ങൾ എങ്ങനെയാണ് ഈ ലോകത്ത് (ക്രിക്കറ്റിന്റെ) എത്തിയത്?

ഷഫാലി വർമ്മ: അതെ സർ, ഗുസ്തിയും കബഡിയും അവിടെ ശരിക്കും ജനപ്രിയമാണ്. പക്ഷേ എന്റെ പിതാവിന് ഏറ്റവും വലിയ സ്വാധീനമുണ്ടെന്ന് ഞാൻ കരുതുന്നു, കാരണം...

പ്രധാനമന്ത്രി: ഒരു നിമിഷം, നിങ്ങൾ സ്വയം ഗുസ്തി പരീക്ഷിച്ചിട്ടില്ലേ?

ഷഫാലി വർമ്മ: ഇല്ല സർ, ഒരിക്കലും.

പ്രധാനമന്ത്രി: ഒരിക്കലുമില്ലേ?

ഷഫാലി വർമ്മ: ഇല്ല സർ, ഒരിക്കലുമില്ല.

പ്രധാനമന്ത്രി: ഓ, എനിക്ക് മനസ്സിലായി.

ഷഫാലി വർമ്മ: എന്റെ അച്ഛൻ ഒരു ക്രിക്കറ്റ് കളിക്കാരനാകാൻ ആഗ്രഹിച്ചു, പക്ഷേ അദ്ദേഹത്തിന് കഴിഞ്ഞില്ല. അങ്ങനെ അദ്ദേഹം ആ സ്വപ്നം തന്റെ കുട്ടികൾക്ക് കൈമാറി. ഞാനും എന്റെ സഹോദരനും ഒരുമിച്ച് കളിക്കാറുണ്ടായിരുന്നു, ഞങ്ങൾ തുടർച്ചയായി മത്സരങ്ങൾ കാണുമായിരുന്നു, അങ്ങനെയാണ് ഞാൻ ക്രിക്കറ്റിൽ ആഴത്തിലുള്ള താൽപ്പര്യം വളർത്തിയെടുത്ത് ഒരു ക്രിക്കറ്റ് കളിക്കാരിയായി മാറിയത്.

പ്രധാനമന്ത്രി: ഷഫാലി, നിങ്ങളുടെ ആ ക്യാച്ച് കണ്ടപ്പോൾ എന്റെ മനസ്സിൽ ഒരു ചോദ്യം ഉണ്ടായിരുന്നു. പന്ത് പിടിച്ചതിന് ശേഷം ഒരാൾ പുഞ്ചിരിക്കുന്നത് എനിക്ക് മനസ്സിലാകും, പക്ഷേ അത് പിടിക്കുന്നതിന് മുമ്പ് നിങ്ങൾ പുഞ്ചിരിച്ചിരുന്നു! കാരണം എന്തായിരുന്നു?

ഷഫാലി വർമ്മ: സർ, ഞാൻ എന്നോട് തന്നെ പറഞ്ഞു, "എന്റെ അടുത്തേക്ക് വരൂ, പിടിക്കൂ - എന്റെ കൈകളിലേക്ക് വരൂ!" എന്നിട്ട് അത് യഥാർത്ഥത്തിൽ എന്റെ കൈകളിലേക്ക് വന്നപ്പോൾ, എനിക്ക് ചിരിക്കാതിരിക്കാൻ കഴിഞ്ഞില്ല!

പ്രധാനമന്ത്രി: പന്ത് മറ്റെവിടെയും എത്താൻ സാധ്യതയില്ലെന്ന് നിങ്ങൾക്ക് വളരെ ആത്മവിശ്വാസമുണ്ടെന്ന് എനിക്ക് തോന്നി. അതായിരുന്നോ?

ഷഫാലി വർമ്മ: സർ, അത് മറ്റെവിടെയെങ്കിലും പോയിരുന്നെങ്കിൽ പോലും, ഞാനും അവിടെ ചാടുമായിരുന്നു!

പ്രധാനമന്ത്രി: ആ നിമിഷത്തിന്റെ വികാരങ്ങൾ നിങ്ങൾക്ക് വിവരിക്കാമോ?

ജെമീമ റോഡ്രിഗസ്: യഥാർത്ഥത്തിൽ, സർ, അത് സെമി ഫൈനൽ ആയിരുന്നു, ഞങ്ങൾ എല്ലായ്പ്പോഴും ഓസ്ട്രേലിയയോട് വളരെ അടുത്ത് തോറ്റിട്ടുണ്ട്. അതിനാൽ, ഞാൻ ബാറ്റ് ചെയ്യാൻ പോയപ്പോൾ, ടീമിനായി ഇത് ജയിക്കണം എന്നതായിരുന്നു എന്റെ ഒരേയൊരു ചിന്ത. എന്തായാലും, അവസാനം വരെ ഞാൻ നിൽക്കണം. ഞങ്ങൾ ആ അവസ്ഥയിലായിരുന്നപ്പോൾ, ഞങ്ങൾ പരസ്പരം പറഞ്ഞുകൊണ്ടിരുന്നു: ഒരു നീണ്ട , ഒരു  കൂട്ടുകെട്ട്, ഉറച്ച പങ്കാളിത്തം മാത്രം മതി, അവർ പരാജയപ്പെടും. അതാണ് ഞങ്ങൾ ചെയ്യാൻ ശ്രമിച്ചത്. ആ നിമിഷം ഒരു കൂട്ടായ ടീം പരിശ്രമമായിരുന്നുവെന്ന് ഞാൻ പറയും, സർ! അതെ, ഒരുപക്ഷേ ഞാൻ ഒരു സെഞ്ച്വറി നേടിയിരിക്കാം, പക്ഷേ ഹാരി ഡിയും (ഹർമൻപ്രീത് കൗർ) തമ്മിലുള്ള പങ്കാളിത്തം സംഭവിച്ചില്ലായിരുന്നെങ്കിൽ അല്ലെങ്കിൽ ദീപ്തിയും ആ സ്വാധീനമുള്ള ഇന്നിംഗ്സ് കളിച്ചില്ലായിരുന്നെങ്കിൽ, റിച്ചയും അമനും 15 റൺസിനായി ആ 8 പന്തുകൾ  കളിച്ചില്ലായിരുന്നെങ്കിൽ, ഒരുപക്ഷേ ഞങ്ങൾ സെമി ഫൈനൽ ജയിക്കുമായിരുന്നില്ല. പക്ഷേ എല്ലാവർക്കും കൂട്ടായി ഒരു വിശ്വാസം ഉണ്ടായിരുന്നു, "അതെ, ഞങ്ങളുടെ ടീമിന് ഇത് ചെയ്യാൻ കഴിയും, ഞങ്ങൾ ചെയ്യും!"

ജെമീമ റോഡ്രിഗസ്: ഞങ്ങളെ എന്തിനേക്കാളും പ്രചോദിപ്പിക്കാൻ അദ്ദേഹം (പ്രധാനമന്ത്രി) ആഗ്രഹിച്ചു. ഞങ്ങളുടെ അനുഭവം, ലോകകപ്പ് നേടിയതിന്റെ അനുഭവം, മൂന്ന് മത്സരങ്ങൾ തോറ്റതിന് ശേഷമുള്ള അനുഭവം, ഞങ്ങൾ എങ്ങനെ തിരിച്ചുവന്നു എന്നൊക്കെ അറിയാൻ അദ്ദേഹം ആഗ്രഹിച്ചു.

ക്രാന്തി ഗൗഡ്: ഒരു ലോകകപ്പ് മത്സരത്തിൽ ഞാൻ പ്ലെയർ ഓഫ് ദി മാച്ച് ആയപ്പോൾ, എനിക്ക് വളരെയധികം അഭിമാനം തോന്നി, എന്റെ ഗ്രാമത്തിനും അഭിമാനം തോന്നുമെന്ന് എനിക്കറിയാമായിരുന്നു.

ക്രാന്തി ഗൗഡ്: ഞാൻ പന്തെറിയുമ്പോൾ, ഹർമൻ ഡി എപ്പോഴും എന്നോട് പറയും, "നീ വിക്കറ്റ് എടുത്താൽ മതി. ആദ്യ വിക്കറ്റ് എടുക്കേണ്ടത് നീയാണ്." അതുകൊണ്ട് ആദ്യ വിക്കറ്റ് എടുക്കാൻ ഞാൻ ശ്രദ്ധ കേന്ദ്രീകരിക്കുന്നത് അതാണ്. "എനിക്ക് ആ ആദ്യ വിക്കറ്റ് കിട്ടും" എന്ന് കരുതി ഞാൻ പന്തെറിയും. എനിക്ക് ഒരു മൂത്ത സഹോദരനുണ്ട്, അവനും ക്രിക്കറ്റ് ഇഷ്ടപ്പെടുന്നു. അവൻ താങ്കളെ വളരെയധികം ആരാധിക്കുന്നു, സർ. അവൻ ക്രിക്കറ്റ് കളിക്കാൻ ഇഷ്ടപ്പെട്ടിരുന്നു, പക്ഷേ എന്റെ അച്ഛന് ജോലി നഷ്ടപ്പെട്ടപ്പോൾ, അദ്ദേഹത്തിന് ഒരു അക്കാദമിയിൽ ചേരാൻ കഴിഞ്ഞില്ല. അതിനാൽ അവൻ വെറുതെ കളിച്ചു. കുട്ടിക്കാലം മുതൽ, അവൻ കളിക്കുന്നത് കാണാൻ ഞാൻ ഇഷ്ടപ്പെട്ടിരുന്നു, ആൺകുട്ടികളുടെ ടെന്നീസ്-ബോൾ ക്രിക്കറ്റ് കളിക്കുമായിരുന്നു. പിന്നീട്, ഞങ്ങളുടെ ഗ്രാമത്തിൽ MLA ട്രോഫി എന്ന പേരിൽ ഒരു ലെതർ-ബോൾ ടൂർണമെന്റ് സംഘടിപ്പിച്ചു, ഞാൻ അതിൽ പങ്കെടുത്തു. രണ്ട് ടീമുകൾ വന്നിരുന്നു. ഒരു ടീമിലെ ഒരു പെൺകുട്ടിക്ക് പെട്ടെന്ന് അസുഖം വന്നു, എനിക്ക് നീണ്ട മുടി ഉണ്ടായിരുന്നു, അതിനാൽ കോച്ച് എന്റെ അടുത്ത് വന്ന് ചോദിച്ചു, "നീ കളിക്കുമോ?" ഞാൻ അതെ എന്ന് പറഞ്ഞു. അദ്ദേഹം എന്നെ ടീമിനായി കളിക്കാൻ അനുവദിച്ചു. അതായിരുന്നു എന്റെ ആദ്യത്തെ ലെതർ-ബോൾ മത്സരമായിരുന്നു. ഞാൻ പ്ലെയർ ഓഫ് ദി മാച്ചായി. ഞാൻ രണ്ട് വിക്കറ്റ് വീഴ്ത്തി 25 റൺസ് നേടി. അങ്ങനെയാണ് എന്റെ ക്രിക്കറ്റ് യാത്ര ആരംഭിച്ചത്.

പ്രധാനമന്ത്രി: ഷഫാലിക്കും കഴിഞ്ഞ രണ്ട് മത്സരങ്ങളിൽ കളിക്കാൻ അവസരം ലഭിച്ചു, അല്ലേ?

ഷഫാലി വർമ്മ: അതെ സർ. അതിനുമുമ്പ്, ഞാൻ ആഭ്യന്തര മത്സരങ്ങൾ കളിക്കുകയായിരുന്നു. പക്ഷേ എനിക്ക് കോൾ-അപ്പ് ലഭിച്ചപ്പോൾ ... തീർച്ചയായും, പ്രതീകയ്ക്ക് സംഭവിച്ചത് ഒരു കളിക്കാരനും ആരും ആഗ്രഹിക്കാത്ത ഒന്നായിരുന്നു, പക്ഷേ എന്നെ വിളിച്ചപ്പോൾ, ഞാൻ എന്നിൽ ആത്മവിശ്വാസം പ്രകടിപ്പിച്ചു, ടീം എന്നിലും ആത്മവിശ്വാസം പ്രകടിപ്പിച്ചു. എങ്ങനെയായാലും ടീമിനെ വിജയിപ്പിക്കണമെന്ന് ഞാൻ ചിന്തിച്ചു.

പ്രതീക റാവൽ: ഈ വീഡിയോയിൽ നിന്ന്, സർ, എനിക്ക് പരിക്കേറ്റപ്പോൾ ടീമിലെ പലരും പറഞ്ഞു, "പ്രതികയ്ക്ക് വേണ്ടി ഈ ലോകകപ്പ് നേടാൻ ഞങ്ങൾ ആഗ്രഹിക്കുന്നു." ആ സമയത്ത്, ടീമിന് പുറത്തുള്ള ഒരാൾ പിന്നീട് എന്നോട് പറഞ്ഞതായി എനിക്കറിയില്ലായിരുന്നു. ഞാൻ പുറത്തിരുന്നപ്പോൾ ഞങ്ങൾ ലോകകപ്പ് നേടിയപ്പോൾ, സാങ്കേതികമായി ഞാൻ അന്തിമ ടീമിൽ ഉണ്ടായിരുന്നില്ല. ഞാൻ 16-ാമത്തെ കളിക്കാരിയായിരുന്നു. പക്ഷേ, സർ, ഞാൻ വീൽചെയറിലായിരുന്നിട്ടും, അവർ എന്നെ വേദിയിൽ നിർത്തി അതേ ബഹുമാനവും ആദരവും നൽകി. ഈ ടീം യഥാർത്ഥത്തിൽ ഒരു കുടുംബം പോലെയാണ് സർ. നിങ്ങൾ എല്ലാ കളിക്കാരെയും തുല്യമായി ബഹുമാനിക്കുകയും എല്ലാവരെയും ഉൾപ്പെടുത്തുന്നുവെന്ന് തോന്നിപ്പിക്കുകയും ചെയ്യുമ്പോൾ, ടീം ഒരു യഥാർത്ഥ കുടുംബമായി മാറുന്നു. അത്തരമൊരു കുടുംബം ഒരുമിച്ച് കളിക്കുമ്പോൾ സർ, ആ ടീമിനെ തോൽപ്പിക്കാൻ വളരെ പ്രയാസമാകും. അതുകൊണ്ടാണ് ഈ ടീം ഫൈനൽ ജയിക്കാൻ അർഹമായത്.

പ്രധാനമന്ത്രി: നിങ്ങൾ പറഞ്ഞത് തികച്ചും ശരിയാണ്. അവസാനം, സ്പോർട്സിൽ ടീം സ്പിരിറ്റാണ് ഏറ്റവും പ്രധാനം. കളിക്കളത്തിൽ ടീം സ്പിരിറ്റിനെക്കുറിച്ച് മാത്രമല്ല. നിങ്ങൾ 24 മണിക്കൂറും ഒരുമിച്ച് ചെലവഴിക്കുമ്പോൾ, ഒരുതരം ബന്ധം രൂപപ്പെടുന്നു. പരസ്പരം ബലഹീനതകൾ മനസ്സിലാക്കാനും അവയെ മറയ്ക്കാനും ശ്രമിക്കാനും, പരസ്പരം ശക്തികൾ തിരിച്ചറിയാനും അവയെ പിന്തുണയ്ക്കാനും ഉയർത്തിക്കാട്ടാനും ശ്രമിക്കാനും നിങ്ങൾക്ക് കഴിയും. അപ്പോൾ മാത്രമേ യഥാർത്ഥ ടീം വർക്ക് സംഭവിക്കൂ.

പ്രധാനമന്ത്രി: നിങ്ങളുടെ ആ ക്യാച്ച് ഏറ്റവും പ്രശസ്തമായ ഒന്നായി മാറി, അല്ലേ?

അമൻജോത് കൗർ: അതെ, സർ! ഞാൻ മുമ്പ് നിരവധി ബ്ലൈൻഡറുകൾ എടുത്തിട്ടുണ്ട്, പക്ഷേ അതൊന്നും അത്ര പ്രശസ്തമായില്ല. ആദ്യമായി, ക്യാച്ച് പൂർത്തിയാക്കുന്നതിന് മുമ്പ് അൽപ്പം തപ്പിത്തടഞ്ഞത് നല്ലതായി തോന്നി!

പ്രധാനമന്ത്രി: നിങ്ങൾ ആ ക്യാച്ച് എടുത്തപ്പോൾ, അത് ഒരുതരം വഴിത്തിരിവായി, അല്ലേ?

അമൻജോത് കൗർ: അതെ, സർ.

പ്രധാനമന്ത്രി: നിങ്ങൾ യഥാർത്ഥത്തിൽ ക്യാച്ച് എടുക്കുന്നതുവരെ, നിങ്ങൾ പന്ത് മാത്രമേ കണ്ടിട്ടുള്ളൂ. പക്ഷേ അതിനുശേഷം, നിങ്ങൾക്ക് ഇതിനകം ട്രോഫി കാണാൻ കഴിഞ്ഞുവെന്ന് എനിക്ക് ഉറപ്പുണ്ട്!

അമൻജോത് കൗർ: സർ, ആ ക്യാച്ചിൽ എനിക്ക് ട്രോഫി അക്ഷരാർത്ഥത്തിൽ കാണാൻ കഴിഞ്ഞു! അതിനുശേഷം, നിരവധി സഹപ്രവർത്തകർ എന്റെ മേൽ ചാടിവീണു, എനിക്ക് ശ്വാസം എടുക്കാൻ പോലും കഴിഞ്ഞില്ല. എത്ര പേർ എന്റെ മുകളിൽ ഉണ്ടായിരുന്നുവെന്ന് എനിക്കറിയില്ല!

പ്രധാനമന്ത്രി: നിങ്ങൾക്കറിയാമോ, അല്ലേ? കഴിഞ്ഞ തവണ സൂര്യകുമാർ യാദവും സമാനമായ ഒരു ക്യാച്ച് എടുത്തു.

അമൻജോത് കൗർ: അതെ, സർ.

പ്രധാനമന്ത്രി: നിങ്ങളിൽ ഒരാൾ മുമ്പ് ഒരു ക്യാച്ച് എടുത്തിട്ടുണ്ടെന്ന് ഞാൻ കരുതുന്നു, അത് ഞാൻ റീട്വീറ്റ് ചെയ്തിരുന്നു. എനിക്കത് ഓർമ്മയുണ്ട്. അത് വളരെ ശ്രദ്ധേയമായ ഒരു നിമിഷമായിരുന്നു.

ഹർലീൻ കൗർ ഡിയോൾ: അതെ, സർ! ഞങ്ങൾ ഇംഗ്ലണ്ടിലായിരുന്ന സമയത്താണ് ഞാൻ ആ ക്യാച്ച് എടുത്തത്.  സമയത്ത്  ഞങ്ങൾ വളരെക്കാലമായി അത്തരം ക്യാച്ചുകൾ പരിശീലിച്ചുകൊണ്ടിരുന്നു. ഞാൻ ഫീൽഡ് ചെയ്യുകയായിരുന്നുവെന്ന് എനിക്കറിയാം, ഒരു ക്യാച്ച് മുന്നോട്ട് വന്നു. ഞാൻ ഓടി, പക്ഷേ എനിക്ക് അത് ചെറുതായി നഷ്ടമായി. ഹാരി ഡി എന്നെ ശകാരിച്ചു, "നിങ്ങൾക്ക് അങ്ങനെ ക്യാച്ചുകൾ എടുക്കാൻ കഴിയുന്നില്ലെങ്കിൽ ഒരു നല്ല ഫീൽഡറാണ് എന്നു പറയുന്നതിന്റെ അർത്ഥമെന്താണ്?" അപ്പോൾ എന്റെ പിന്നിൽ നിന്നിരുന്ന ജെമ്മി പറഞ്ഞു, "അത് കുഴപ്പമില്ല." ഞാൻ അവളോട് ചോദിച്ചു, "എനിക്ക് അത് പിടിക്കാൻ കഴിയുമായിരുന്നു എന്ന് നിങ്ങൾ കരുതുന്നുണ്ടോ?" അവൾ പറഞ്ഞു, "അതെ, നിനക്കത് കഴിയുമായിരുന്നു." അപ്പോൾ ഞാൻ അവളോട് പറഞ്ഞു, "രണ്ട് ഓവറുകൾ ബാക്കിയുണ്ട്, ഒരു നല്ല ക്യാച്ച് എടുത്ത് ഞാൻ നിങ്ങൾക്ക് കാണിച്ചുതരാം." സർ, അതിന് തൊട്ടുപിന്നാലെ ആ പന്ത് വന്നു, ഞാൻ അത് പിടിച്ചു!

പ്രധാനമന്ത്രി: ഓ, അപ്പോൾ നിങ്ങൾ ഒരു വ്യക്തിഗത വെല്ലുവിളിയിൽ പ്രവർത്തിച്ചു, എനിക്ക് മനസ്സിലായി! റിച്ച, നീ എവിടെ കളിച്ചാലും മത്സരങ്ങൾ ജയിക്കും, അല്ലേ? എപ്പോഴും സ്വാധീനം ചെലുത്താൻ ഒരു വഴി കണ്ടെത്തും!

റിച്ച ഘോഷ്: എനിക്കറിയില്ല സർ, പക്ഷേ അത് അണ്ടർ 19 ആയാലും, സീനിയർ ടീമായാലും, WPL ആയാലും, ഞങ്ങൾ ട്രോഫികൾ നേടിയിട്ടുണ്ട്, ഞാൻ വളരെ നീണ്ട സിക്സറുകൾ അടിച്ചിട്ടുണ്ട്!

പ്രധാനമന്ത്രി: ശരി, കൂടുതൽ പറയൂ.

റിച്ച ഘോഷ്: ഞാൻ ബാറ്റ് ചെയ്യുമ്പോൾ ... ആ സിക്സറുകൾ അടിക്കുമ്പോൾ ... ഹാരി ഡി, സ്മൃതി ദീദി, മറ്റെല്ലാവരും എന്നെ വിശ്വസിച്ചിരുന്നു. സാഹചര്യം എന്തുതന്നെയായാലും, കുറച്ച് പന്തുകളും കൂടുതൽ റൺസും ആവശ്യമുണ്ടെങ്കിൽ പോലും എനിക്ക് അത് കൈകാര്യം ചെയ്യാൻ കഴിയുമെന്ന് മുഴുവൻ ടീമിനും വിശ്വാസമുണ്ടായിരുന്നു. ആ വിശ്വാസം എനിക്ക് ആത്മവിശ്വാസം നൽകി, അതെ, എനിക്ക് അത് ചെയ്യാൻ കഴിയും. അതുകൊണ്ടാണ് എന്റെ ശരീരഭാഷ എല്ലാ മത്സരങ്ങളിലും ആ ആത്മവിശ്വാസം കാണിക്കുന്നതെന്ന് ഞാൻ കരുതുന്നു.

രാധ യാദവ്: ഞങ്ങൾ മൂന്ന് മത്സരങ്ങൾ തോറ്റു സർ. പക്ഷേ ഏറ്റവും നല്ല കാര്യം, തോൽവിയിലും ഞങ്ങൾ പരസ്പരം പിന്തുണച്ചു, പരസ്പരം സംസാരിച്ചു എന്നതാണ്. അത് യഥാർത്ഥവും നിർമ്മലവുമായിരുന്നു. അതുകൊണ്ടായിരിക്കാം ദൈവം ഈ ട്രോഫി ഞങ്ങൾക്ക് നൽകിയത്.

പ്രധാനമന്ത്രി: ഇല്ല, ഇല്ല, ദൈവം മാത്രമല്ല, നിങ്ങളുടെ കഠിനാധ്വാനമാണ് ഈ വിജയം നേടിത്തന്നത്. ഈ രംഗത്ത് നിങ്ങളെല്ലാവരും എങ്ങനെയാണ് തയ്യാറായതെന്ന് എന്നോട് പറയൂ?

രാധ യാദവ്: സർ (പരിശീലകൻ) പറഞ്ഞതുപോലെ, ഞങ്ങൾ കുറച്ചു കാലമായി വളരെ നല്ല ക്രിക്കറ്റ് കളിക്കുന്നുണ്ട്. ഫിറ്റ്നസ്, ഫീൽഡിംഗ്, കഴിവുകൾ എന്നിവയുടെ കാര്യത്തിൽ എല്ലാത്തരം സാഹചര്യങ്ങൾക്കും ഞങ്ങൾ തയ്യാറെടുക്കുകയായിരുന്നു. ഞങ്ങൾ വളരെക്കാലമായി കഠിനാധ്വാനം ചെയ്തുവരികയായിരുന്നു. ഞാൻ പറഞ്ഞതുപോലെ, എല്ലാവരും ഒരുമിച്ച് നിൽക്കുമ്പോൾ കാര്യങ്ങൾ എളുപ്പമാകും. പക്ഷേ ആരെങ്കിലും ഒറ്റയ്ക്കാണെങ്കിൽ, ആ രീതിയിൽ പ്രവർത്തിക്കുന്നത് വളരെ ബുദ്ധിമുട്ടായിരിക്കും.

പ്രധാനമന്ത്രി: പക്ഷേ നിങ്ങൾക്ക് ആദ്യമായി ഒരു സമ്മാനം ലഭിച്ചപ്പോൾ, അത് നിങ്ങളുടെ പിതാവിനെ സഹായിക്കാൻ ചെലവഴിച്ചതായി ഞാൻ കേട്ടു.

രാധ യാദവ്: അതെ, സർ.

പ്രധാനമന്ത്രി: നിങ്ങളുടെ അച്ഛൻ എപ്പോഴും നിങ്ങളെ പൂർണ്ണമായി പ്രോത്സാഹിപ്പിച്ചിരുന്നോ?

രാധ യാദവ്: അതെ, സർ, എല്ലായ്‌പ്പോഴും. അന്ന് ഞങ്ങളുടെ കുടുംബത്തിന് അത് എളുപ്പമായിരുന്നില്ല, പക്ഷേ എന്റെ അച്ഛൻ ഒരിക്കലും എന്നെ അങ്ങനെ തോന്നിപ്പിച്ചില്ല, എന്റെ അമ്മയും അങ്ങനെ ചെയ്തില്ല.

സ്നേഹ റാണ: സർ, ഇതെല്ലാം വർഷങ്ങളുടെ കഠിനാധ്വാനത്തിന്റെ ഫലമാണ്. എന്റെ ബൗളിംഗ് പരിശീലകനായ ആവിഷ്‌കർ സാറുമായും ഞാൻ നിരന്തരം ബന്ധപ്പെട്ടിട്ടുണ്ട്. നിർദ്ദിഷ്ട ബാറ്റർമാരെ എങ്ങനെ നേരിടണമെന്ന് ഞങ്ങൾ ചർച്ച ചെയ്യുന്നു. ആ തന്ത്രങ്ങളെല്ലാം ക്യാപ്റ്റൻ, വൈസ് ക്യാപ്റ്റൻ, ഹെഡ് കോച്ച് എന്നിവരുമായി ചേർന്ന് തയ്യാറാക്കുന്നു, കൂടാതെ ഫീൽഡിൽ അവ ആവർത്തിക്കാൻ ഞങ്ങൾ ശ്രമിക്കുന്നു. ഭാഗ്യവശാൽ, മിക്കപ്പോഴും, അവ ഫലവത്തായി. തീർച്ചയായും, കാര്യങ്ങൾ ആസൂത്രണം ചെയ്തതുപോലെ നടക്കാത്ത മത്സരങ്ങളുണ്ട്, പക്ഷേ അടുത്ത തവണ കൂടുതൽ മികച്ചത് ചെയ്യാൻ ഞങ്ങൾ എപ്പോഴും സ്വയം പ്രചോദിപ്പിക്കുന്നു.

ഉമ ചെട്രി: സർ, നിങ്ങളുടെ മുന്നിൽ നിന്ന് എന്താണ് പറയേണ്ടതെന്ന് എനിക്ക് സത്യമായും അറിയില്ല.

പ്രധാനമന്ത്രി: മനസ്സിൽ തോന്നുന്നത് പറയൂ.

ഉമ ചെട്രി: സർ, അത് എന്റെ അരങ്ങേറ്റ മത്സരമായിരുന്നു. ഞാൻ അരങ്ങേറ്റം കുറിക്കുമ്പോഴെല്ലാം, എങ്ങനെയോ മഴ പെയ്യുന്നു! ആ ദിവസവും അത് സംഭവിച്ചു. മഴ പെയ്തു, അതിനാൽ എനിക്ക് വിക്കറ്റ് കീപ്പിംഗ് മാത്രമേ ചെയ്യാൻ കഴിയൂ. എന്നിട്ടും, ഇന്ത്യയ്ക്കായി അരങ്ങേറ്റം കുറിക്കുന്നത് എനിക്ക് വളരെ വലിയ കാര്യമായിരുന്നു, കാരണം ഞാൻ ശരിക്കും സന്തോഷിച്ചു, അതും ഒരു ലോകകപ്പിൽ ഇന്ത്യയ്ക്കായി അരങ്ങേറ്റം കുറിക്കുന്നത് എനിക്ക് ഒരു വലിയ കാര്യമായിരുന്നു. ആ മത്സരത്തെക്കുറിച്ച് ഞാൻ വളരെ ആവേശത്തിലായിരുന്നു, രാജ്യത്തിനായി എന്റെ പരമാവധി നൽകാൻ ദൃഢനിശ്ചയം ചെയ്തു. എന്റെ ശ്രമങ്ങൾ ഇന്ത്യയെ വിജയിപ്പിക്കാൻ സഹായിച്ചുവെന്ന് ഉറപ്പാക്കാൻ ഞാൻ ആഗ്രഹിച്ചു. ഏറ്റവും നല്ല കാര്യം, മുഴുവൻ ടീമും എന്നെ വിശ്വസിച്ചു, എല്ലാവരും എന്നോട് സംസാരിക്കാൻ, എന്നെ നയിക്കാൻ, എന്നെ പിന്തുണയ്ക്കാൻ വന്നു, അത് ഒരുപാട് അർത്ഥവത്താണ്.

കോച്ച്: വടക്കുകിഴക്കൻ മേഖലയിൽ നിന്ന് ഇന്ത്യയ്ക്കു വേണ്ടി കളിക്കുന്ന ആദ്യ പെൺകുട്ടിയാണ് അവർ.

പ്രധാനമന്ത്രി: അസമിൽ നിന്ന്, അല്ലേ?

രേണുക സിംഗ് താക്കൂർ: അതെ, സർ. ഡ്രസ്സിംഗ് റൂമിലെ അന്തരീക്ഷം പ്രകാശവും പോസിറ്റീവും ആയി നിലനിർത്താൻ, ഞങ്ങൾ സൃഷ്ടിപരമായി എന്തെങ്കിലും ചെയ്യണമെന്ന് ചിന്തിച്ചു. അപ്പോൾ ഞാൻ ഒരു മയിലിനെ വരച്ചു, അത് പോസിറ്റീവിറ്റിയുടെ അടയാളമാണ്. പിന്നെ ഞങ്ങൾ ചിന്തിച്ചു, മറ്റെന്താണ് നമുക്ക് അതിനെ കൂടുതൽ രസകരമാക്കാൻ കഴിയുക? സ്മൃതി അർദ്ധശതകം നേടിയപ്പോൾ പോലെ, ഞങ്ങൾ പറഞ്ഞു, "ശരി, അടുത്തതായി നമ്മൾ നൂറടിക്കും!"

പ്രധാനമന്ത്രി: അപ്പോൾ, നിങ്ങൾ ഇവിടെ വന്നപ്പോൾ, നിങ്ങൾ എല്ലായിടത്തും മയിലുകളെ കണ്ടിട്ടുണ്ടാകും!

രേണുക സിംഗ് താക്കൂർ: അതെ, സർ! ഞാൻ പറഞ്ഞു: ഞാൻ ഇവിടെ മറ്റൊന്നിനെ കണ്ടു. യഥാർത്ഥത്തിൽ, ഒരു മയിൽ വരയ്ക്കുക എന്നതാണ് എനിക്ക് എങ്ങനെ ചെയ്യണമെന്ന് അറിയാവുന്ന ഒരേയൊരു കാര്യം, അതിനാൽ ഞാൻ അത് വരച്ചു. എനിക്ക് മറ്റൊന്നും വരയ്ക്കാൻ അറിയില്ല!

(മറ്റൊരു കളിക്കാരി): അടുത്തതായി, അവൾ ഒരു പക്ഷിയെ വരയ്ക്കാൻ ശ്രമിച്ചു, പക്ഷേ ഞങ്ങൾ അവളോട് അങ്ങനെ ചെയ്യരുതെന്ന് പറഞ്ഞു!

പ്രധാനമന്ത്രി: എന്നിരുന്നാലും, ഞാൻ പ്രത്യേകിച്ച് നിങ്ങളുടെ അമ്മയെ വണങ്ങുന്നു. എല്ലാ കഷ്ടപ്പാടുകൾക്കിടയിലും, നിങ്ങളുടെ വിജയത്തിൽ അവർ വലിയ പങ്കുവഹിച്ചു. ഒരു സിംഗിൾ പാരന്റ് ആയിരുന്നിട്ടും, നിങ്ങളുടെ ജീവിതം രൂപപ്പെടുത്താൻ അവർ അക്ഷീണം പ്രവർത്തിച്ചു, അത് ശരിക്കും ശ്രദ്ധേയമാണ്. ദയവായി അവർക്ക് എന്റെ ആദരപൂർവ്വമായ ആശംസകൾ അറിയിക്കുക.

രേണുക സിംഗ് താക്കൂർ: അതെ, സർ, ഞാൻ ചെയ്യും.

അരുന്ധതി റെഡ്ഡി: സർ, ഒന്നാമതായി, എന്റെ അമ്മ ഞാൻ വഴി താങ്കളോട് ഒരു സന്ദേശം കൈമാറണമെന്ന് ആഗ്രഹിച്ചു. എനിക്ക് നിങ്ങളോട് സംസാരിക്കാൻ അവസരം ലഭിക്കുമെന്ന് ഞാൻ കരുതിയില്ല, പക്ഷേ നിങ്ങൾ അവരുടെ ഹീറോയാണെന്ന് താങ്കളോട് പറയാൻ അവർ എന്നോട് പറഞ്ഞു. അവർ ഇതിനകം നാലോ അഞ്ചോ തവണ എന്നെ വിളിച്ചിട്ടുണ്ട്, "എന്റെ നായകനെ എപ്പോഴാണ് നിങ്ങൾ കാണുന്നത്? എന്റെ നായകനെ എപ്പോഴാണ് നിങ്ങൾ കാണുന്നത്?"

പ്രധാനമന്ത്രി: കായിക രംഗത്ത് നിങ്ങൾ വിജയം നേടിയതിൽ നിങ്ങൾക്കെല്ലാവർക്കും ഇപ്പോൾ എന്താണ് തോന്നുന്നത്, രാജ്യം നിങ്ങളിൽ നിന്ന് അടുത്തതായി എന്താണ് പ്രതീക്ഷിക്കുന്നത്? നിങ്ങൾക്ക് കൂടുതൽ എന്ത് സംഭാവന നൽകാൻ കഴിയും?

സ്മൃതി മന്ദാന: സർ, നമ്മൾ ഏതെങ്കിലും ലോകകപ്പിന് പോകുമ്പോഴെല്ലാം, നമ്മൾ എല്ലാവരും ആദ്യം സംസാരിക്കുന്നത് ആ ലോകകപ്പ് നേടുന്നത് വനിതാ ക്രിക്കറ്റിൽ മാത്രമല്ല, വനിതാ കായികരംഗത്ത് മൊത്തത്തിൽ എന്ത് സ്വാധീനം ചെലുത്തുമെന്നതിനെക്കുറിച്ചാണ്. അത് വളരെ വലുതായിരിക്കും, ഇന്ത്യയിൽ ഒരു യഥാർത്ഥ വിപ്ലവത്തിന് തുടക്കമിടാൻ ഇതിന് കഴിയും. മുന്നോട്ട് പോകുമ്പോൾ, വനിതാ ക്രിക്കറ്റിനെ ഉയർത്തുക മാത്രമല്ല, ഇന്ത്യയിലെ വനിതാ കായിക ഇനങ്ങളിൽ വിപ്ലവം സൃഷ്ടിക്കുക എന്നതായിരിക്കും ഞങ്ങളുടെ ശ്രമം. ഈ ടീമിന് അതിനുള്ള കഴിവുണ്ടെന്ന് ഞാൻ ശരിക്കും വിശ്വസിക്കുന്നു.

പ്രധാനമന്ത്രി: വിജയം നിങ്ങൾക്ക് വലിയ ശക്തി നൽകുന്നതിനാൽ, നിങ്ങൾക്കെല്ലാവർക്കും മറ്റുള്ളവർക്ക് പ്രചോദനത്തിന്റെ ഒരു വലിയ ഉറവിടമായി മാറാൻ കഴിയുമെന്ന് ഞാൻ കരുതുന്നു. ഉദാഹരണത്തിന്, നിങ്ങൾ വീട്ടിലേക്ക് പോകുമ്പോൾ, സ്വാഭാവികമായും ആഘോഷങ്ങളും ആവേശവും ഉണ്ടാകും. എന്നാൽ കുറച്ച് ദിവസങ്ങൾക്ക് ശേഷം, നിങ്ങൾ പഠിച്ച സ്കൂൾ സന്ദർശിക്കുക. അവിടെ ഒരു ദിവസം  ചെലവഴിക്കുക. കുട്ടികളുമായി സംസാരിക്കുക; അവർ നിങ്ങളോട് എല്ലാത്തരം ചോദ്യങ്ങളും ചോദിക്കും. അവരുമായി സ്വതന്ത്രമായി ഇടപഴകുക. സ്കൂൾ എപ്പോഴും നിങ്ങളെ ഓർക്കുമെന്ന് എനിക്ക് ഉറപ്പുണ്ട്, ആ കുട്ടികൾ ആ ദിവസം ഒരിക്കലും മറക്കില്ല. നിങ്ങൾ പഠിച്ച അതേ സ്കൂൾ. നിങ്ങൾ അനുഭവം ആസ്വദിക്കുകയാണെങ്കിൽ, മൂന്ന് സ്കൂളുകൾ തിരഞ്ഞെടുക്കുക, ഒരു വർഷത്തിൽ, സാധ്യമാകുമ്പോഴെല്ലാം, ഓരോന്നിലും ഒരു ദിവസം ചെലവഴിക്കുക. അത് അവരെ പ്രചോദിപ്പിക്കുക മാത്രമല്ല, നിങ്ങളെ പ്രചോദിപ്പിക്കുകയും ചെയ്യുമെന്ന് നിങ്ങൾ കാണും. രണ്ടാമതായി, ഫിറ്റ് ഇന്ത്യ എന്ന പ്രസ്ഥാനമുണ്ട്. നിങ്ങൾക്കറിയാവുന്നതുപോലെ, നമ്മുടെ രാജ്യത്ത് അമിതവണ്ണം ഒരു പ്രധാന പ്രശ്നമായി മാറുകയാണ്. ഫിറ്റ്‌നസ് ആണ് അതിനെ ചെറുക്കാനുള്ള ഏറ്റവും നല്ല മാർഗം. ഞാൻ എപ്പോഴും പറയാറുള്ളതുപോലെ, പാചക എണ്ണയുടെ ഉപയോഗം 10% കുറയ്ക്കുന്നത് പോലുള്ള ചെറിയ കാര്യങ്ങൾ പോലും പ്രധാനമാണെന്ന് നിങ്ങൾ കരുതണം. നിങ്ങൾ അത് വാങ്ങുമ്പോൾ ആ തീരുമാനം എടുക്കുക. നിങ്ങളിൽ നിന്ന് ഈ ചെറിയ, പ്രായോഗിക നിർദ്ദേശങ്ങൾ കേൾക്കുമ്പോൾ, ആളുകൾ അത് ഗൗരവമായി എടുക്കുന്നു. നിങ്ങൾ പെൺകുട്ടികളെ ഫിറ്റ് ഇന്ത്യ കാമ്പെയ്‌നിൽ ചേരാൻ പ്രോത്സാഹിപ്പിച്ചാൽ, അത് വലിയ മാറ്റമുണ്ടാക്കും. അതിനാൽ, നിങ്ങളുമായുള്ള ഈ സാധാരണവും ഹൃദയംഗമവുമായ സംഭാഷണം ഞാൻ ശരിക്കും ആസ്വദിച്ചു. നിങ്ങളിൽ ചിലരെ ഞാൻ മുമ്പ് കണ്ടിട്ടുണ്ട്, ചിലരെ ആദ്യമായിട്ടാണ്. പക്ഷേ നിങ്ങളെയെല്ലാം കാണാൻ ഞാൻ എപ്പോഴും ആഗ്രഹിക്കുന്നു. നിങ്ങൾക്ക് (പ്രതിക), വേഗത്തിൽ സുഖം പ്രാപിക്കട്ടെ എന്ന് ഞാൻ ആഗ്രഹിക്കുന്നു.

സ്മൃതി മന്ദാന: സർ, താങ്കൾ പറഞ്ഞത് ഞങ്ങൾ തീർച്ചയായും ഓർക്കും. ആളുകളോട് സംസാരിക്കാൻ ഞങ്ങൾക്ക് അവസരം ലഭിക്കുമ്പോഴെല്ലാം, ഈ സന്ദേശം ഞങ്ങൾ കൈമാറുമെന്ന് ഉറപ്പാക്കും. ഞങ്ങളുടെ മുഴുവൻ ടീമിൽ നിന്നും, സർ, ഈ സന്ദേശം എവിടെയെങ്കിലും പ്രചരിപ്പിക്കേണ്ടതുണ്ടെങ്കിൽ, ഞങ്ങളെ വിളിക്കൂ, എപ്പോൾ വേണമെങ്കിലും ഞങ്ങൾ അവിടെ ഉണ്ടാകും, കാരണം തീർച്ചയായും, ഇത് ഒരു പ്രധാന കാര്യമാണ്.

പ്രധാനമന്ത്രി: നമ്മൾ എല്ലാവരും ഒരുമിച്ച് രാജ്യത്തെ മുന്നോട്ട് കൊണ്ടുപോകണം.

സ്മൃതി മന്ദാന: തീർച്ചയായും, സർ.

പ്രധാനമന്ത്രി: ശരി. നിങ്ങൾക്കെല്ലാവർക്കും ഒരായിരം  ആശംസകൾ.

***

NK