ਪ੍ਰਧਾਨ ਮੰਤਰੀ – ਅੱਜ ਦਾ ਦਿਨ ਬਹੁਤ ਵੱਡਾ ਹੈ, ਦੇਵ ਦੀਵਾਲੀ ਵੀ ਹੈ ਅਤੇ ਗੁਰਪੁਰਬ ਵੀ ਹੈ, ਤਾਂ ਬਹੁਤ ਮਹੱਤਵਪੂਰਨ ਦਿਹਾੜਾ ਹੈ।

ਖਿਡਾਰਨ– ਹੈਪੀ ਗੁਰਪੁਰਬ ਸਰ।

ਪ੍ਰਧਾਨ ਮੰਤਰੀ – ਤੁਹਾਨੂੰ ਸਭ ਨੂੰ ਬਹੁਤ-ਬਹੁਤ ਸ਼ੁਭਕਾਮਨਾਵਾਂ!

ਕੋਚ – ਮਾਣਯੋਗ ਪ੍ਰਧਾਨ ਮੰਤਰੀ ਬਹੁਤ-ਬਹੁਤ ਧੰਨਵਾਦ। ਸਾਨੂੰ ਇੱਥੇ ਆ ਕੇ ਬਹੁਤ ਮਾਣ ਮਹਿਸੂਸ ਹੋ ਰਿਹਾ ਹੈ। ਸਿਰਫ਼ ਇੱਕ ਕੈਂਪੇਨ ਬਾਰੇ ਦੱਸਣਾ ਚਾਹਾਂਗਾ, ਜੋ ਇਨ੍ਹਾਂ ਕੁੜੀਆਂ ਨੇ ਕਮਾਲ ਕਰ ਦਿੱਤਾ ਹੈ। ਦੇਸ਼ ਦੀਆਂ ਬੇਟੀਆਂ ਨੇ ਕਮਾਲ ਕਰ ਦਿੱਤਾ ਹੈ। ਪਿਛਲੇ ਦੋ ਸਾਲਾਂ ਤੋਂ ਇਹ ਲੱਗੀਆਂ ਹੋਈਆਂ ਸਨ ਸਰ, ਇਨ੍ਹਾਂ ਨੇ ਬੇਹੱਦ ਮਿਹਨਤ ਕੀਤੀ ਹੈ। ਹਰ ਪ੍ਰੈਕਟਿਸ ਸੈਸ਼ਨ ਓਨੀ ਹੀ ਤੀਬਰਤਾ ਨਾਲ ਖੇਡਿਆ, ਹਰ ਵਾਰ ਗਰਾਊਂਡ ਵਿੱਚ ਓਨੀ ਹੀ ਊਰਜਾ ਨਾਲ ਉੱਤਰੀਆਂ ਅਤੇ ਮੈਂ ਕਹਾਂਗਾ ਕਿ ਇਨ੍ਹਾਂ ਦੀ ਮਿਹਨਤ ਰੰਗ ਲਿਆਈ।

ਹਰਮਨਪ੍ਰੀਤ ਕੌਰ – ਸਰ, ਮੈਨੂੰ ਅਜੇ ਵੀ ਯਾਦ ਹੈ ਜਦੋਂ ਅਸੀਂ 2017 ਵਿੱਚ ਤੁਹਾਨੂੰ ਮਿਲੇ ਸੀ, ਉਸ ਵੇਲੇ ਅਸੀਂ ਟਰਾਫ਼ੀ ਨਾਲ ਨਹੀਂ ਆਏ ਸੀ ਪਰ ਇਹ ਸਾਡੇ ਲਈ ਬਹੁਤ ਮਾਣ ਦੀ ਗੱਲ ਹੈ ਕਿ ਇਸ ਵਾਰ ਅਸੀਂ ਉਹ ਟਰਾਫ਼ੀ, ਜਿਸ ਲਈ ਅਸੀਂ ਇੰਨੇ ਸਾਲਾਂ ਤੋਂ ਮਿਹਨਤ ਕਰ ਰਹੇ ਸੀ, ਲੈ ਕੇ ਆ ਸਕੇ ਹਾਂ ਅਤੇ ਤੁਸੀਂ ਅੱਜ ਸਾਡੀ ਖ਼ੁਸ਼ੀ ਨੂੰ ਦੁੱਗਣਾ ਕਰ ਦਿੱਤਾ ਹੈ। ਇਹ ਸਾਡੇ ਲਈ ਬਹੁਤ ਮਾਣ ਦੀ ਗੱਲ ਹੈ ਅਤੇ ਅਸੀਂ ਚਾਹੁੰਦੇ ਹਾਂ ਕਿ ਅਗਲੇ ਸਮੇਂ ਵੀ ਅਸੀਂ ਤੁਹਾਨੂੰ ਵਾਰ-ਵਾਰ ਮਿਲਦੇ ਰਹੀਏ ਅਤੇ ਵਾਰ-ਵਾਰ ਟੀਮ ਨਾਲ ਤੁਹਾਡੇ ਨਾਲ ਫ਼ੋਟੋ ਖਿਚਵਾਉਂਦੇ ਰਹੀਏ।

ਪ੍ਰਧਾਨ ਮੰਤਰੀ – ਨਹੀਂ, ਸੱਚਮੁੱਚ ਤੁਸੀਂ ਸਾਰਿਆਂ ਨੇ ਬਹੁਤ ਵੱਡਾ ਕੰਮ ਕੀਤਾ ਹੈ। ਭਾਰਤ ਵਿੱਚ ਕ੍ਰਿਕਟ ਕੋਈ ਖੇਡ ਨਹੀਂ ਹੈ, ਇੱਕ ਤਰ੍ਹਾਂ ਨਾਲ ਇਹ ਲੋਕਾਂ ਦੀ ਜ਼ਿੰਦਗੀ ਦਾ ਹਿੱਸਾ ਬਣ ਗਿਆ ਹੈ। ਜਦੋਂ ਕ੍ਰਿਕਟ ਵਿੱਚ ਚੰਗਾ ਹੁੰਦਾ ਹੈ, ਤਾਂ ਸਾਰਾ ਭਾਰਤ ਚੰਗਾ ਮਹਿਸੂਸ ਕਰਦਾ ਹੈ, ਅਤੇ ਜਦੋਂ ਥੋੜ੍ਹਾ ਕੁਝ ਵੀ ਉਲਟ ਹੋ ਜਾਂਦਾ ਹੈ, ਤਾਂ ਸਾਰਾ ਦੇਸ਼ ਹਿੱਲ ਜਾਂਦਾ ਹੈ। ਜਦੋਂ ਤੁਸੀਂ ਤਿੰਨ ਮੈਚ ਲਗਾਤਾਰ ਹਾਰੇ ਸੀ, ਤਾਂ ਜੋ "ਟ੍ਰੋਲਿੰਗ ਸੈਨਾ" ਹੈ, ਉਹ ਵੀ ਤੁਹਾਡੇ ਪਿੱਛੇ ਪੈ ਗਈ ਸੀ।

ਹਰਮਨਪ੍ਰੀਤ ਕੌਰ – ਜਦੋਂ ਅਸੀਂ ਪਹਿਲੀ ਵਾਰ 2017 ਵਿੱਚ ਮਿਲੇ ਸੀ, ਤਦ ਅਸੀਂ ਫਾਈਨਲ ਹਾਰ ਕੇ ਆਏ ਸੀ, ਪਰ ਉਸ ਸਮੇਂ ਸਰ ਨੇ ਸਾਨੂੰ ਬਹੁਤ ਉਤਸ਼ਾਹਿਤ ਕੀਤਾ ਸੀ ਕਿ ਅਗਲੀ ਵਾਰ ਜਦੋਂ ਮੌਕਾ ਮਿਲੇ, ਤਾਂ ਕਿਵੇਂ ਖੇਡਣਾ ਹੈ ਅਤੇ ਆਪਣਾ ਸਰਬੋਤਮ ਦੇਣਾ ਹੈ। ਅਤੇ ਅੱਜ ਜਦੋਂ ਅਸੀਂ ਟਰਾਫ਼ੀ ਜਿੱਤ ਕੇ ਆਏ ਹਾਂ, ਤਾਂ ਉਨ੍ਹਾਂ ਨਾਲ ਗੱਲ ਕਰਕੇ ਬਹੁਤ ਚੰਗਾ ਲੱਗ ਰਿਹਾ ਹੈ।

ਪ੍ਰਧਾਨ ਮੰਤਰੀ – ਹਾਂ, ਦੱਸੋ ਸਮ੍ਰਿਤੀ ਜੀ।

ਸਮ੍ਰਿਤੀ ਮੰਧਾਨਾ – ਜਦੋਂ ਅਸੀਂ 2017 ਵਿੱਚ ਆਏ ਸੀ, ਅਸੀਂ ਟਰਾਫ਼ੀ ਨਹੀਂ ਲਿਆ ਸਕੇ ਸੀ, ਪਰ ਮੈਨੂੰ ਯਾਦ ਹੈ ਤੁਸੀਂ ਸਾਨੂੰ ਇੱਕ ਪ੍ਰਸ਼ਨ ਪੁੱਛਿਆ ਸੀ — "ਉਮੀਦਾਂ" ਬਾਰੇ — ਅਤੇ ਤੁਹਾਡਾ ਜਵਾਬ ਅਜੇ ਤੱਕ ਯਾਦ ਹੈ। ਉਹ ਗੱਲ ਸਾਡੇ ਲਈ ਬਹੁਤ ਮਦਦਗਾਰ ਰਹੀ। ਅਗਲੇ 6–7 ਸਾਲਾਂ ਵਿੱਚ ਅਸੀਂ ਬਹੁਤ ਕੋਸ਼ਿਸ਼ ਕੀਤੀ, ਪਰ ਕਈ ਵਾਰ "ਹਾਰਟਬ੍ਰੇਕ" ਹੋਏ, ਪਰ ਇਹ ਵਰਲਡ ਕੱਪ ਫਾਈਨਲੀ ਮੇਰੇ ਖ਼ਿਆਲ ਵਿੱਚ ਡੈਸਟਿਨੀ ਸੀ ਕਿ ਭਾਰਤ ਵਿੱਚ ਹੀ ਪਹਿਲਾ ਵਿਸ਼ਵ ਕੱਪ ਮਹਿਲਾਵਾਂ ਦਾ। ਪਰ ਮੇਰਾ ਭਾਵ ਤੁਸੀਂ ਹਮੇਸ਼ਾ ਤੋਂ ਸਾਡੇ ਲਈ ਪ੍ਰੇਰਨਾ ਰਹੇ ਹੋ। ਖ਼ਾਸ ਕਰਕੇ ਅੱਜ-ਕੱਲ੍ਹ ਹਰ ਖੇਤਰ ਵਿੱਚ ਕੁੜੀਆਂ ਹੀ ਅੱਗੇ ਦਿਖਾਈ ਦੇ ਰਹੀਆਂ ਹਨ — ਭਾਵੇਂ ਇਸਰੋ ਦਾ ਲਾਂਚ ਹੋਵੇ ਜਾਂ ਹੋਰ ਕੋਈ ਖੇਤਰ — ਇਹ ਸਭ ਕੁਝ ਸਾਨੂੰ ਪ੍ਰੇਰਿਤ ਕਰਦਾ ਹੈ ਅਤੇ ਮੋਟੀਵੇਟ ਕਰਦਾ ਹੈ ਕਿ ਅਸੀਂ ਹੋਰ ਚੰਗਾ ਕੰਮ ਕਰੀਏ ਅਤੇ ਹੋਰ ਕੁੜੀਆਂ ਨੂੰ ਪ੍ਰੇਰਿਤ ਕਰੀਏ।

ਪ੍ਰਧਾਨ ਮੰਤਰੀ – ਇਹ ਸਾਰਾ ਦੇਸ਼ ਦੇਖ ਰਿਹਾ ਹੈ ਅਤੇ ਮਾਣ ਕਰ ਰਿਹਾ ਹੈ। ਮੈਂ ਤਾਂ ਤੁਹਾਨੂੰ ਸੁਣਨਾ ਚਾਹੁੰਦਾ ਹਾਂ — ਤੁਹਾਡੇ ਤਜਰਬੇ।

ਸਮ੍ਰਿਤੀ ਮੰਧਾਨਾ – ਸਰ, ਮੇਰੇ ਖ਼ਿਆਲ ਵਿੱਚ ਇਸ ਕੈਂਪੇਨ ਦੀ ਸਭ ਤੋਂ ਵਧੀਆ ਗੱਲ ਇਹ ਸੀ ਕਿ ਹਰ ਖਿਡਾਰੀ ਆਪਣੀ ਕਹਾਣੀ ਘਰ ਜਾ ਕੇ ਦੱਸੇਗਾ ਕਿ ਕਿਸੇ ਦਾ ਵੀ ਯੋਗਦਾਨ ਘੱਟ ਨਹੀਂ ਸੀ।

ਸਮ੍ਰਿਤੀ ਮੰਧਾਨਾ – ਪਿਛਲੀ ਵਾਰ ਤੁਸੀਂ ਦੱਸਿਆ ਸੀ ਕਿ "ਉਮੀਦਾਂ" ਨਾਲ ਕਿਵੇਂ ਨਜਿੱਠਣਾ ਹੈ — ਉਹ ਜਵਾਬ ਮੇਰੇ ਮਨ ਵਿੱਚ ਹਮੇਸ਼ਾ ਰਿਹਾ ਅਤੇ ਜਿਵੇਂ ਤੁਸੀਂ ਹਮੇਸ਼ਾ ਸਹਿਜ ਅਤੇ ਸ਼ਾਂਤ ਰਹਿੰਦੇ ਹੋ, ਉਹ ਵੀ ਸਾਡੇ ਲਈ ਬਹੁਤ ਪ੍ਰੇਰਨਾਦਾਇਕ ਗੱਲ ਹੈ।

ਜੇਮਿਮਾ ਰੌਡਰਿਗਜ਼  – ਮੇਰੇ ਖ਼ਿਆਲ ਵਿੱਚ ਜਦੋਂ ਅਸੀਂ ਉਹ ਤਿੰਨ ਮੈਚ ਹਾਰੇ, ਉਸ ਸਮੇਂ ਪਤਾ ਲੱਗਿਆ ਕਿ ਇੱਕ ਟੀਮ ਦੀ ਪਰਖ ਇਸ ਗੱਲ ਨਾਲ ਨਹੀਂ ਹੁੰਦੀ ਕਿ ਉਹ ਕਿੰਨੀ ਵਾਰ ਜਿੱਤੀ, ਪਰ ਇਸ ਨਾਲ ਹੁੰਦੀ ਹੈ ਕਿ ਉਹ ਡਿੱਗਣ ਤੋਂ ਬਾਅਦ ਆਪਣੇ ਆਪ ਨੂੰ ਕਿਵੇਂ ਚੁੱਕਦੀ ਹੈ। ਮੈਨੂੰ ਲੱਗਦਾ ਹੈ ਇਸ ਟੀਮ ਨੇ ਇਹ ਸਭ ਤੋਂ ਵਧੀਆ ਢੰਗ ਨਾਲ ਕੀਤਾ ਹੈ — ਇਸ ਲਈ ਇਹ ਟੀਮ ਇੱਕ ਚੈਂਪੀਅਨ ਟੀਮ ਹੈ ਅਤੇ ਦੂਜੀ ਗੱਲ ਜੋ ਮੈਂ ਕਹਿਣਾ ਚਾਹਾਂਗੀ, ਸਰ — ਇਹ ਟੀਮ ਵਿੱਚ ਜੋ ਏਕਤਾ ਸੀ, ਉਹ ਬੇਮਿਸਾਲ ਸੀ। ਜਦੋਂ ਵੀ ਕੋਈ ਵਧੀਆ ਖੇਡਦਾ ਸੀ, ਸਭ ਖ਼ੁਸ਼ ਹੋ ਜਾਂਦੇ ਸਨ, ਸਭ ਤਾੜੀਆਂ ਮਾਰਦੇ ਸਨ — ਜਿਵੇਂ ਉਨ੍ਹਾਂ ਨੇ ਆਪ ਸਕੋਰ ਕੀਤਾ ਹੋਵੇ ਜਾਂ ਵਿਕਟ ਲਈ ਹੋਵੇ।

ਅਤੇ ਜਦੋਂ ਕੋਈ ਨਿਰਾਸ਼ ਹੁੰਦਾ ਸੀ, ਤਾਂ ਹਮੇਸ਼ਾ ਕੋਈ ਨਾ ਕੋਈ ਜਾ ਕੇ ਉਸ ਦੇ ਮੋਢੇ ‘ਤੇ ਹੱਥ-ਰੱਖ ਕੇ ਕਹਿੰਦਾ ਸੀ — "ਕੋਈ ਗੱਲ ਨਹੀਂ, ਤੂੰ ਅਗਲੇ ਮੈਚ ਵਿੱਚ ਕਰੇਂਗੀ।" ਅਤੇ ਮੇਰੇ ਖ਼ਿਆਲ ਵਿੱਚ — ਇਹੀ ਚੀਜ਼ ਇਸ ਟੀਮ ਦੀ ਅਸਲੀ ਪਛਾਣ ਹੈ।

ਸਨੇਹ ਰਾਣਾ- ਮੈਂ ਜੇਮਿਮਾ ਨਾਲ ਸਹਿਮਤ ਹਾਂ ਕਿ ਅਸੀਂ ਸਭ ਨੇ ਇਹੀ ਤੈਅ ਕੀਤਾ ਸੀ ਕਿ ਸਭ ਦੀ ਸਫਲਤਾ ਵਿੱਚ ਤਾਂ ਸਾਰੇ ਨਾਲ ਹੁੰਦੇ ਹਨ, ਪਰ ਜਦੋਂ ਕਿਸੇ ਦਾ ਡਾਊਨਫਾਲ ਚੱਲਦਾ ਹੈ ਤਾਂ ਉਸ ਵੇਲੇ ਹੋਰ ਵੀ ਜ਼ਿਆਦਾ ਸਾਥ ਦੇਣਾ ਜ਼ਰੂਰੀ ਹੁੰਦਾ ਹੈ। ਤਾਂ ਅਸੀਂ ਟੀਮ ਵਜੋਂ, ਇੱਕ ਯੂਨਿਟ ਵਜੋਂ ਇਹੀ ਤੈਅ ਕੀਤਾ ਸੀ ਕਿ ਕੁਝ ਵੀ ਹੋ ਜਾਵੇ ਅਸੀਂ ਇੱਕ ਦੂਜੇ ਦਾ ਸਾਥ ਨਹੀਂ ਛੱਡਾਂਗੇ ਅਤੇ ਹਮੇਸ਼ਾ ਇੱਕ ਦੂਜੇ ਨੂੰ ਉੱਪਰ ਹੀ ਰੱਖਾਂਗੇ। ਤਾਂ ਮੈਨੂੰ ਲੱਗਦਾ ਹੈ ਇਹ ਸਾਡੀ ਟੀਮ ਦੀ ਸਭ ਤੋਂ ਵਧੀਆ ਗੱਲ ਸੀ।

ਕ੍ਰਾਂਤੀ ਗੌੜ- ਹਰਮਨ ਦੀ ਹਮੇਸ਼ਾ ਕਹਿੰਦੀ ਹੈ ਕਿ ਸਭ ਹੱਸਦੇ ਰਹੋ, ਤਾਂ ਸਾਡਾ ਇਹ ਸੀ ਕਿ ਜੇ ਕੋਈ ਥੋੜ੍ਹਾ ਜਿਹਾ ਵੀ ਨਰਵਸ ਬੈਠਾ ਹੋਵੇ ਤਾਂ ਸਾਡਾ ਇਹ ਹੁੰਦਾ ਸੀ ਕਿ ਸਭ ਹੱਸਦੇ ਰਹੋ, ਤਾਂ ਇੱਕ ਦੂਜੇ ਨੂੰ ਹੱਸਦੇ ਵੇਖ ਕੇ ਸਾਨੂੰ ਲੱਗਦਾ ਸੀ ਕਿ ਅਸੀਂ ਸਭ ਹੱਸਦੇ ਰਹੇ।

ਪ੍ਰਧਾਨ ਮੰਤਰੀ - ਨਹੀਂ, ਕੋਈ ਹਸਾਉਣ ਵਾਲਾ ਵੀ ਤਾਂ ਹੋਵੇਗਾ ਤੁਹਾਡੀ ਟੀਮ ਵਿੱਚ?

ਖਿਡਾਰੀ - ਜੈਮੀ ਦੀ ਹੈ ਨਾ।

ਜੇਮਿਮਾ ਰੌਡਰਿਗਜ਼ - ਸਰ, ਅਸਲ ਵਿੱਚ ਹਰਲੀਨ ਵੀ, ਕਿਉਂਕਿ ਉਹ ਵੀ ਟੀਮ ਨੂੰ ਇੱਕਜੁੱਟ ਕਰਨ ਨੂੰ ਬਹੁਤ ਮਹੱਤਵ ਦਿੰਦੀ ਹੈ।

ਹਰਲੀਨ ਕੌਰ ਦਿਓਲ - ਨਹੀਂ ਸਰ, ਅਸਲ ਵਿੱਚ ਟੀਮ ਵਿੱਚ ਮੈਨੂੰ ਲੱਗਦਾ ਹੈ ਕਿ ਅਜਿਹਾ ਹੋਣਾ ਚਾਹੀਦਾ ਹੈ ਕਿ ਇੱਕ ਅੱਧਾ ਇਨਸਾਨ ਹੋਵੇ ਜੋ ਮਾਹੌਲ ਹਲਕਾ-ਫੁਲਕਾ ਰੱਖੇ ਅਤੇ ਜਦੋਂ ਮੈਨੂੰ ਕਦੇ ਲੱਗਦਾ ਹੈ ਕਿ ਕੋਈ ਅਜਿਹਾ ਬੈਠਾ ਹੈ ਖ਼ਾਲੀ ਜਾਂ ਫਿਰ ਮਤਲਬ ਮੈਨੂੰ ਲੱਗਦਾ ਹੈ ਕਿ ਮੈਂ ਜ਼ਿਆਦਾ ਹੀ ਵਿਹਲੀ ਹਾਂ, ਤਾਂ ਮੈਂ ਸਭ ਦੇ ਕੋਲ ਕੁਝ ਨਾ ਕੁਝ, ਕੁਝ ਨਾ ਕੁਝ ਕਰਕੇ ਅਜਿਹਾ ਕਰਦੀ ਰਹਿੰਦੀ ਹਾਂ, ਤਾਂ ਮਤਲਬ ਮੈਨੂੰ ਚੰਗਾ ਲੱਗਦਾ ਹੈ ਸਰ ਜਦੋਂ ਮੇਰੇ ਆਸਪਾਸ ਲੋਕ ਖ਼ੁਸ਼ ਰਹਿੰਦੇ ਹਨ।

ਪ੍ਰਧਾਨ ਮੰਤਰੀ - ਇੱਥੇ ਆ ਕੇ ਵੀ ਕੁਝ ਕੀਤਾ ਹੋਵੇਗਾ ਨਾ।

ਹਰਲੀਨ ਕੌਰ ਦਿਓਲ - ਸਰ, ਇਨ੍ਹਾਂ ਲੋਕਾਂ ਨੇ ਸਾਨੂੰ ਡਾਂਟ ਦਿੱਤਾ ਸੀ, ਬੋਲੇ ਸ਼ਾਂਤ ਰਹੋ ਥੋੜ੍ਹਾ। ਥੋੜ੍ਹੀ ਜ਼ਿਆਦਾ ਆਵਾਜ਼ ਹੋਈ ਤਾਂ ਡਾਂਟ ਦਿੱਤਾ।

ਹਰਲੀਨ ਕੌਰ ਦਿਓਲ - ਸਰ, ਮੈਂ ਤੁਹਾਡੀ ਸਕਿਨ ਕੇਅਰ ਰੁਟੀਨ ਪੁੱਛਣੀ ਸੀ। ਤੁਸੀਂ ਬਹੁਤ ਗਲੋਅ ਕਰਦੇ ਹੋ ਸਰ।

ਪ੍ਰਧਾਨ ਮੰਤਰੀ - ਮੈਂ ਇਸ ਵਿਸ਼ੇ 'ਤੇ ਜ਼ਿਆਦਾ ਧਿਆਨ ਨਹੀਂ ਦਿੱਤਾ ਸੀ।

ਖਿਡਾਰਨ - ਸਰ, ਇਹ ਕਰੋੜਾਂ ਦੇਸ਼ਵਾਸੀਆਂ ਦਾ ਪਿਆਰ ਹੈ ਤੁਹਾਡੇ ਲਈ।

ਪ੍ਰਧਾਨ ਮੰਤਰੀ - ਇਹ ਤਾਂ ਹੈ ਹੀ ਜੀ। ਇਹ ਬਹੁਤ ਵੱਡੀ ਤਾਕਤ ਹੁੰਦੀ ਹੈ ਜਦੋਂ ਸਮਾਜ ਤੋਂ ਇੰਨਾ ਅਸ਼ੀਰਵਾਦ ਮਿਲਦਾ ਹੈ, ਕਿਉਂਕਿ ਹੁਣ ਮੈਨੂੰ ਸਰਕਾਰ ਵਿੱਚ ਵੀ 25 ਸਾਲ ਹੋ ਗਏ ਹਨ, ਹੈੱਡ ਆਫ਼ ਦ ਗਵਰਨਮੈਂਟ ਵਜੋਂ। ਤਾਂ ਇਹ ਲੰਮਾ ਸਮਾਂ ਹੁੰਦਾ ਹੈ, ਉਸ ਤੋਂ ਬਾਅਦ ਵੀ ਜਦੋਂ ਇੰਨੇ ਅਸ਼ੀਰਵਾਦ ਮਿਲਦੇ ਹਨ ਤਾਂ ਉਸ ਦਾ ਇੱਕ ਅਸਰ ਰਹਿੰਦਾ ਹੈ।

ਕੋਚ - ਸਰ, ਤੁਸੀਂ ਵੇਖਿਆ ਸਵਾਲ ਕਿਵੇਂ ਆਉਂਦੇ ਹਨ। ਅਲੱਗ-ਅਲੱਗ ਕਿਰਦਾਰ ਹਨ। ਦੋ ਸਾਲ ਹੋ ਗਏ ਹਨ ਮੈਨੂੰ ਇਨ੍ਹਾਂ ਦਾ ਹੈੱਡ ਕੋਚ ਬਣੇ, ਵਾਲ ਸਫ਼ੈਦ ਹੋ ਗਏ ਮੇਰੇ। ਸਰ, ਇੱਕ ਕਹਾਣੀ ਦੱਸਣਾ ਚਾਹਾਂਗਾ। ਇੱਕ ਕਿੱਸਾ, ਅਸੀਂ ਜੂਨ ਵਿੱਚ ਇੰਗਲੈਂਡ ਵਿੱਚ ਸੀ ਤਾਂ ਉੱਥੇ ਅਸੀਂ ਕਿੰਗ ਚਾਰਲਸ ਨਾਲ ਮਿਲੇ, ਪਰ ਉੱਥੇ ਪ੍ਰੋਟੋਕਾਲ ਸੀ 20 ਜਣਿਆਂ ਦਾ ਹੀ। ਤਾਂ ਜੋ ਸਪੋਰਟ ਸਟਾਫ਼ ਹੈ ਉਹ ਆ ਨਹੀਂ ਸਕੇ। ਸਾਰੇ ਖਿਡਾਰੀ ਸਨ ਅਤੇ ਤਿੰਨ ਸਕਿਲਡ ਕੋਚ ਲੈ ਕੇ ਗਏ, ਤਾਂ ਮੈਂ ਆਪਣੇ ਸਪੋਰਟ ਸਟਾਫ਼ ਨੂੰ ਕਿਹਾ ਕਿ ਆਈ ਐੱਮ ਐਕਸਟਰੀਮਲੀ ਸੌਰੀ ਬਟ ਪ੍ਰੋਟੋਕਾਲ 20 ਲੋਕਾਂ ਦਾ ਹੀ ਹੈ। ਤਾਂ ਉਨ੍ਹਾਂ ਨੇ ਜਿਵੇਂ ਥੋੜ੍ਹਾ ਮੈਨਿਫੈਸਟ ਕੀਤਾ, ਉਨ੍ਹਾਂ ਨੇ ਕਿਹਾ ਠੀਕ ਹੈ ਇਹ ਫੋਟੋਗ੍ਰਾਫ਼ ਨਹੀਂ ਚਾਹੀਦੀ ਸਾਨੂੰ। ਸਾਨੂੰ 4 ਨਵੰਬਰ ਜਾਂ 5 ਨਵੰਬਰ ਨੂੰ ਮੋਦੀ ਜੀ ਨਾਲ ਫੋਟੋਗ੍ਰਾਫ਼ ਚਾਹੀਦੀ ਹੈ। ਅੱਜ ਉਹ ਦਿਨ ਹੈ।

ਹਰਮਨਪ੍ਰੀਤ ਕੌਰ - ਕਦੇ ਕਦੇ ਤਾਂ ਅਜਿਹਾ ਲੱਗਦਾ ਸੀ ਯਾਰ ਸਾਡੇ ਨਾਲ ਹੀ ਕਿਉਂ ਹੋ ਰਿਹਾ ਹੈ? ਸਟਰੱਗਲ ਲਿਖੀ ਸੀ ਤਾਂ ਜੋ ਅਸੀਂ ਹੋਰ ਮਾਨਸਿਕ ਤੌਰ 'ਤੇ ਮਜ਼ਬੂਤ ਹੋ ਸਕੀਏ ਅਤੇ ਸਰੀਰਕ ਤੌਰ 'ਤੇ ਮਜ਼ਬੂਤ ਹੋ ਸਕੀਏ।

ਪ੍ਰਧਾਨ ਮੰਤਰੀ - ਇਹ ਜਦੋਂ ਤੁਸੀਂ ਦੱਸ ਰਹੇ ਸੀ ਹਰਮਨ, ਤਦ ਤੁਹਾਡੇ ਮਨ ਵਿੱਚ ਭਾਵ ਕੀ ਸੀ? ਕਿ ਇਕਦਮ ਤੋਂ ਲੋਕਾਂ ਨੂੰ ਪ੍ਰੇਰਿਤ ਕਰਨ ਵਾਲਾ ਮਾਮਲਾ ਸੀ।

ਹਰਮਨਪ੍ਰੀਤ ਕੌਰ - ਕਿਤੇ ਨਾ ਕਿਤੇ ਇਹ ਸੀ ਕਿ ਇੱਕ ਦਿਨ ਆਵੇਗਾ, ਜਿਸ ਦਿਨ ਅਸੀਂ ਵੀ ਟਰਾਫ਼ੀ ਚੁੱਕਾਂਗੇ ਅਤੇ ਇਸ ਟੀਮ ਵਿੱਚ ਇਹ ਇੱਕ ਖ਼ਾਸ ਚੀਜ਼ ਸੀ ਅਤੇ ਉਹ ਪਹਿਲੇ ਦਿਨ ਤੋਂ ਹੀ ਮਹਿਸੂਸ ਹੋ ਰਹੀ ਸੀ।

ਪ੍ਰਧਾਨ ਮੰਤਰੀ - ਪਰ ਤੁਹਾਡੇ ਮਨ ਵਿੱਚ ਇਹ ਜੋ ਭਾਵਨਾ ਆਈ ਕਿ ਕਿਉਂ ਸਾਡੇ ਨਾਲ ਹੀ ਅਜਿਹਾ ਹੋ ਰਿਹਾ ਹੈ, ਵਾਰ ਵਾਰ ਹੋ ਰਿਹਾ ਹੈ, ਤਾਂ ਇੱਕ ਢੰਗ ਨਾਲ ਉਸਦੇ ਬਾਵਜੂਦ ਵੀ ਇੰਨੀ ਹਿੰਮਤ ਕਰਨੀ ਅਤੇ ਸਭ ਨੂੰ ਭਰੋਸਾ ਦੇਣਾ, ਕੁਝ ਤਾਂ ਕਾਰਨ ਹੋਵੇਗਾ।

ਹਰਮਨਪ੍ਰੀਤ ਕੌਰ - ਜੀ ਹਾਂ, ਇਸ ਸਭ ਦਾ ਸਿਹਰਾ ਜਾਂਦਾ ਹੈ ਸਾਡੇ ਸਾਰੇ ਟੀਮ ਮੈਂਬਰਾਂ ਨੂੰ, ਕਿਉਂਕਿ ਸਭ ਵਿੱਚ ਇੱਕ ਆਤਮ-ਵਿਸ਼ਵਾਸ ਸੀ ਕਿ ਹਰ ਟੂਰਨਾਮੈਂਟ ਵਿੱਚ ਅਸੀਂ ਸੁਧਾਰ ਕਰ ਰਹੇ ਸੀ। ਜਿਵੇਂ ਸਰ ਨੇ ਕਿਹਾ ਕਿ ਪਿਛਲੇ ਦੋ ਸਾਲਾਂ ਤੋਂ ਉਹ ਸਾਡੇ ਨਾਲ ਕੰਮ ਕਰ ਰਹੇ ਹਨ ਅਤੇ ਇਨ੍ਹਾਂ ਦੋ ਸਾਲਾਂ ਵਿੱਚ ਅਸੀਂ ਆਪਣੀ ਮਾਨਸਿਕ ਤਾਕਤ 'ਤੇ ਬਹੁਤ ਕੰਮ ਕੀਤਾ ਹੈ ਕਿਉਂਕਿ ਜੋ ਹੋ ਗਿਆ ਸੀ ਉਹ ਭੂਤਕਾਲ ਸੀ, ਹੁਣ ਉਸ ਨੂੰ ਅਸੀਂ ਬਦਲ ਨਹੀਂ ਸਕਦੇ ਸੀ।

ਪ੍ਰਧਾਨ ਮੰਤਰੀ - ਮਤਲਬ ਤੁਹਾਨੂੰ ਵੀ ਵਰਤਮਾਨ ਵਿੱਚ ਜੀਣਾ ਸਿਖਾ ਦਿੱਤਾ ਸੀ।

ਹਰਮਨਪ੍ਰੀਤ ਕੌਰ - ਜੀ, ਇਸ ਲਈ ਮੇਰਾ ਪ੍ਰਸ਼ਨ ਵੀ ਤੁਹਾਨੂੰ ਉਹੀ ਸੀ ਕਿ ਤੁਸੀਂ ਐਕਸਟਰਾ ਅਜਿਹਾ ਕੀ ਕਰਦੇ ਹੋ ਕਿ ਤਾਂ ਜੋ ਟੀਮ ਮੈਂਬਰਾਂ ਨੂੰ ਇੱਕ ਚੰਗਾ ਸੁਨੇਹਾ ਮਿਲ ਸਕੇ, ਕਿ ਅਸੀਂ ਉਸ ਚੀਜ਼ ਵਿੱਚ ਹੋਰ ਵਿਸ਼ਵਾਸ ਲਿਆ ਸਕੀਏ, ਕਿ ਇਹ ਜੋ ਸਾਡੀ ਸੋਚ ਹੈ ਕਿ ਵਰਤਮਾਨ ਵਿੱਚ ਰਹਿਣਾ ਹੈ ਅਤੇ ਉਹ ਸਾਡੇ ਲਈ ਸੱਚਮੁੱਚ ਮਦਦਗਾਰ ਰਹੀ ਹੈ, ਅਤੇ ਜੇ ਉਹ ਚੀਜ਼ ਤੁਹਾਡੇ ਵੱਲੋਂ ਵੀ ਆਵੇ ਤਾਂ ਸਾਨੂੰ ਲੱਗਦਾ ਹੈ ਕਿ ਜੋ ਸਰ ਨੇ ਅਤੇ ਸਾਡੇ ਕੋਚਜ਼ ਨੇ ਸਾਨੂੰ ਗਾਈਡ ਕੀਤਾ ਹੈ, ਅਸੀਂ ਸਹੀ ਲਾਈਨ ਵਿੱਚ ਜਾ ਰਹੇ ਹਾਂ।

ਪ੍ਰਧਾਨ ਮੰਤਰੀ - ਤਾਂ ਡੀਐੱਸਪੀ, ਅੱਜ ਤੁਸੀਂ ਲੋਕਾਂ ਨੇ ਕੀ ਕੀਤਾ? ਤੁਸੀਂ ਸਭ ਨੂੰ ਸੂਚਨਾਵਾਂ ਦਿੰਦੇ ਰਹੇ ਹੋਵੋਗੇ। ਹਾਂ, ਕੰਟਰੋਲ ਕੰਟਰੋਲ ਕਰਦੀ ਹੈ ਸਭ ਨੂੰ।

ਦੀਪਤੀ ਸ਼ਰਮਾ - ਨਹੀਂ ਸਰ, ਮਤਲਬ ਇੰਤਜ਼ਾਰ ਸੀ ਤੁਹਾਨੂੰ ਮਿਲਣ ਦਾ ਅਤੇ ਬਸ ਅਨੰਦ ਮਾਣਿਆ ਅਤੇ ਇਸ ਚੀਜ਼ ਦਾ ਹੀ ਇੰਤਜ਼ਾਰ ਸੀ ਕਿ ਤੁਹਾਨੂੰ ਮਿਲਾਂਗੇ। ਪਰ ਮੈਨੂੰ ਯਾਦ ਹੈ ਤੁਸੀਂ 2017 ਵਿੱਚ ਮੈਨੂੰ ਕਿਹਾ ਸੀ ਕਿ ਉਹੀ ਖਿਡਾਰੀ ਹੈ, ਜੋ ਉੱਠ ਕੇ ਚੱਲਣਾ ਸਿੱਖੇ ਜਾਂ ਉੱਠ ਕੇ ਆਪਣੇ ਫੇਲਿਅਰ ਤੋਂ ਬਾਹਰ ਨਿਕਲੇ। ਬਸ ਲੱਗੇ ਰਹੋ, ਮਿਹਨਤ ਕਰਦੇ ਰਹੋ, ਮਿਹਨਤ ਕਰਨੀ ਨਾ ਛੱਡੋ। ਤਾਂ ਤੁਹਾਡਾ ਉਹ ਇੱਕ ਸ਼ਬਦ ਮੈਨੂੰ ਹਮੇਸ਼ਾ ਪ੍ਰੇਰਿਤ ਕਰਦਾ ਹੈ ਅਤੇ ਮੈਂ ਤੁਹਾਡੇ ਭਾਸ਼ਣਾਂ ਨੂੰ ਸੁਣਦੀ ਰਹਿੰਦੀ ਹਾਂ। ਮਤਲਬ ਜਦੋਂ ਵੀ ਐਸਾ ਸਮਾਂ ਮਿਲਦਾ ਹੈ, ਤਾਂ ਤੁਸੀਂ ਬਹੁਤ ਕੂਲ ਅਤੇ ਸ਼ਾਂਤ ਰਹਿੰਦੇ ਹੋ ਆਪਣੇ ਅੰਦਰ, ਕਿਉਂਕਿ ਕਾਫ਼ੀ ਲੋਕ ਬਹੁਤ ਕੁਝ ਕਹਿੰਦੇ ਹਨ, ਪਰ ਉਸ ਵਿੱਚ ਵੀ ਤੁਸੀਂ ਇੰਨੀ ਸ਼ਾਂਤੀ ਨਾਲ ਚੀਜ਼ਾਂ ਹੈਂਡਲ ਕਰਦੇ ਹੋ, ਤਾਂ ਉਹ ਮੈਨੂੰ ਨਿੱਜੀ ਤੌਰ ਤੇ ਆਪਣੇ ਖੇਡ ਵਿੱਚ ਮਦਦ ਕਰਦਾ ਹੈ।

ਪ੍ਰਧਾਨ ਮੰਤਰੀ - ਤੁਸੀਂ ਇਹ ਟੈਟੂ ਲਗਾ ਕੇ ਘੁੰਮਦੇ ਰਹਿੰਦੇ ਹੋ ਤਾਂ ਹਨੂਮਾਨ ਜੀ ਤੁਹਾਨੂੰ ਕੀ ਮਦਦ ਕਰਦੇ ਹਨ?

ਦੀਪਤੀ ਸ਼ਰਮਾ - ਸਰ, ਉਹ ਵੀ ਮਤਲਬ ਉਨ੍ਹਾਂ 'ਤੇ ਆਪਣੇ ਆਪ ਤੋਂ ਵੀ ਜ਼ਿਆਦਾ ਵਿਸ਼ਵਾਸ ਰਹਿੰਦਾ ਹੈ ਮੈਨੂੰ, ਕਿ ਜਦੋਂ ਵੀ ਅਜਿਹਾ ਮੋੜ ਆਉਂਦਾ ਹੈ ਕਿ ਮੁਸ਼ਕਲਾਂ ਆਉਂਦੀਆਂ ਹਨ, ਤਾਂ ਮਤਲਬ ਉਨ੍ਹਾਂ ਦਾ ਨਾਮ ਲੈਂਦੀ ਹਾਂ, ਤਾਂ ਮੈਨੂੰ ਲੱਗਦਾ ਹੈ ਕਿ ਮੈਂ ਉਨ੍ਹਾਂ ਮੁਸ਼ਕਲਾਂ ਤੋਂ ਬਾਹਰ ਆ ਜਾਂਦੀ ਹਾਂ। ਇੰਨਾ ਵਿਸ਼ਵਾਸ ਹੈ ਉਨ੍ਹਾਂ 'ਤੇ।

ਪ੍ਰਧਾਨ ਮੰਤਰੀ - ਅਤੇ ਤੁਸੀਂ ਤਾਂ ਆਪਣੇ ਇੰਸਟਾਗ੍ਰਾਮ ਅਕਾਊਂਟ 'ਤੇ ਵੀ ਜੈ ਸ਼੍ਰੀ ਰਾਮ ਲਿਖਦੇ ਹੋ?

ਦੀਪਤੀ ਸ਼ਰਮਾ - ਜੀ, ਉਸ 'ਤੇ ਵੀ ਲਿਖਿਆ ਹੋਇਆ ਹੈ, ਹਾਂ ਜੀ, ਜੀ।

ਪ੍ਰਧਾਨ ਮੰਤਰੀ - ਸ਼ਰਧਾ ਜੀਵਨ ਵਿੱਚ ਬਹੁਤ ਕੰਮ ਕਰਦੀ ਹੈ ਜੀ। ਉਸ ਨਾਲ ਇੱਕ ਫ਼ਾਇਦਾ ਹੁੰਦਾ ਹੈ ਕਿ ਭਾਈ ਅਸੀਂ ਕਿਸੇ ਨੂੰ ਸਪੁਰਦ ਕਰ ਦਿੱਤਾ, ਹੁਣ ਸੋ ਜਾਓ, ਉਹ ਕਰੇਗਾ। ਪਰ ਇਹ ਮੈਦਾਨ ਵਿੱਚ ਤੁਹਾਡੀ ਦਾਦਾਗਿਰੀ ਬਹੁਤ ਚੱਲਦੀ ਹੈ, ਐਸਾ ਜੋ ਕਹਿੰਦੇ ਹਨ ਉਸ ਵਿੱਚ ਕਿੰਨਾ ਦਮ ਹੈ?

ਦੀਪਤੀ ਸ਼ਰਮਾ - ਨਹੀਂ ਸਰ, ਅਜਿਹਾ ਕੁਝ ਨਹੀਂ ਹੈ। ਇੱਕ ਚੀਜ਼ ਦਾ ਥੋੜ੍ਹਾ ਖ਼ੌਫ਼ ਰਹਿੰਦਾ ਹੈ, ਉਹ ਮੈਂ ਕਹਿ ਸਕਦੀ ਹਾਂ। ਉਹ ਥ੍ਰੋਅ ਦਾ ਰਹਿੰਦਾ ਹੈ ਅਤੇ ਐਸਾ ਸੁਣਨ ਨੂੰ ਮਿਲਦਾ ਹੈ ਕਿ ਆਪਣੇ ਹੀ ਟੀਮ ਮੇਟਸ ਹਨ, ਅਰਾਮ ਨਾਲ ਮਾਰੋ।

ਦੀਪਤੀ ਸ਼ਰਮਾ - ਸਰ ਨੇ ਮਤਲਬ ਨਿੱਜੀ ਤੌਰ 'ਤੇ ਮੈਨੂੰ ਪੁੱਛਿਆ ਕਿ ਤੁਹਾਡੇ ਹੱਥ ਵਿੱਚ ਹਨੂਮਾਨ ਜੀ ਦਾ ਟੈਟੂ ਹੈ। ਉਸਦੇ ਪਿੱਛੇ ਦਾ ਕੀ ਰਾਜ਼ ਹੈ? ਤੁਸੀਂ ਕਿੰਨਾ ਨੇੜੇ ਤੌਰ ਤੇ ਉਨ੍ਹਾਂ ਨੂੰ ਮੰਨਦੇ ਹੋ? ਅਤੇ ਸਭ ਤੋਂ ਚੰਗੀ ਚੀਜ਼ ਮੈਨੂੰ ਇਹ ਲੱਗੀ ਕਿ ਸਰ ਨੂੰ ਮੇਰੇ ਇੰਸਟਾ ਦਾ ਟੈਗ-ਲਾਈਨ ਵੀ ਪਤਾ ਹੈ।

ਪ੍ਰਧਾਨ ਮੰਤਰੀ - ਅੱਛਾ ਹਰਮਨ, ਤੁਸੀਂ ਇਹ ਜੋ ਜਿੱਤਣ ਤੋਂ ਬਾਅਦ ਗੇਂਦ ਜੇਬ ਵਿੱਚ ਰੱਖੀ, ਤਾਂ ਕੀ ਕਾਰਨ ਸੀ? ਕੁਝ ਸੋਚ ਕੇ ਜਾਂ ਕਿਸੇ ਨੇ ਕਿਹਾ ਸੀ ਜਾਂ ਗਾਈਡ ਕੀਤਾ ਸੀ, ਕੀ ਹੋਇਆ ਸੀ?

ਹਰਮਨਪ੍ਰੀਤ ਕੌਰ - ਨਹੀਂ ਸਰ, ਇਹ ਵੀ ਪਰਮਾਤਮਾ ਦਾ ਹੀ ਪਲਾਨ ਸੀ, ਕਿਉਂਕਿ ਅਜਿਹਾ ਤਾਂ ਸੀ ਨਹੀਂ ਕਿ ਆਖ਼ਰੀ ਗੇਂਦ, ਆਖ਼ਰੀ ਕੈਚ ਮੇਰੇ ਕੋਲ ਆਏਗਾ, ਪਰ ਉਹ ਗੇਂਦ ਮੇਰੇ ਕੋਲ ਆਈ ਅਤੇ ਬਸ ਇੰਨੇ ਸਾਲਾਂ ਦੀ ਮਿਹਨਤ, ਇੰਨੇ ਸਾਲਾਂ ਦੀ ਉਡੀਕ ਇਹ ਸੀ ਕਿ ਹੁਣ ਇਹ ਮੇਰੇ ਕੋਲ ਆਈ ਹੈ, ਤਾਂ ਇਹ ਮੇਰੇ ਕੋਲ ਹੀ ਰਹੇਗੀ। ਅਜੇ ਵੀ ਮੇਰੇ ਬੈਗ ਵਿੱਚ ਹੀ ਹੈ।

ਪ੍ਰਧਾਨ ਮੰਤਰੀ - ਸ਼ੈਫਾਲੀ, ਤੁਸੀਂ ਰੋਹਤਕ ਤੋਂ ਹੋ। ਉੱਥੇ ਤਾਂ ਸਭ ਪਹਿਲਵਾਨ ਪੈਦਾ ਹੁੰਦੇ ਹਨ, ਤਾਂ ਤੁਸੀਂ ਇਸ ਦੁਨੀਆ ਵਿੱਚ ਕਿੱਥੇ ਚਲੇ ਗਏ?

ਸ਼ੈਫਾਲੀ ਵਰਮਾ - ਹਾਂ ਜੀ ਸਰ, ਉੱਥੋਂ ਤਾਂ ਪਹਿਲਵਾਨੀ ਅਤੇ ਕਬੱਡੀ ਬਹੁਤ ਜ਼ਿਆਦਾ ਨਿਕਲਦੀ ਹੈ। ਪਰ ਮੈਨੂੰ ਲੱਗਦਾ ਹੈ ਮੇਰੇ ਪਾਪਾ ਦਾ ਬਹੁਤ ਵੱਡਾ ਹੱਥ ਰਿਹਾ ਕਿਉਂਕਿ ਉਨ੍ਹਾਂ ਨੂੰ...

ਪ੍ਰਧਾਨ ਮੰਤਰੀ - ਨਹੀਂ, ਪਹਿਲਾਂ ਕਦੇ ਅਖਾੜੇ ਵਾਲੀ ਖੇਡ ਨਹੀਂ ਖੇਡੀ?

ਸ਼ੈਫਾਲੀ ਵਰਮਾ - ਨਹੀਂ ਸਰ।

ਪ੍ਰਧਾਨ ਮੰਤਰੀ - ਕਦੇ ਨਹੀਂ ਖੇਡੀ।

ਸ਼ੈਫਾਲੀ ਵਰਮਾ - ਨਹੀਂ ਖੇਡੀ ਸਰ।

ਪ੍ਰਧਾਨ ਮੰਤਰੀ - ਅੱਛਾ।

ਸ਼ੈਫਾਲੀ ਵਰਮਾ - ਪਾਪਾ ਨੇ ਕ੍ਰਿਕਟਰ ਬਣਨਾ ਸੀ, ਪਰ ਪਾਪਾ ਨਹੀਂ ਬਣ ਸਕੇ ਤਾਂ ਪਾਪਾ ਨੇ ਆਪਣਾ ਅਕਸ ਆਪਣੇ ਬੱਚਿਆਂ ਵਿੱਚ ਦੇਖਿਆ। ਮੇਰਾ ਭਰਾ ਅਤੇ ਮੈਂ ਖੇਡਦੇ ਸੀ, ਤਾਂ ਮੈਨੂੰ ਲੱਗਦਾ ਹੈ ਅਸੀਂ ਮੈਚ ਦੇਖਦੇ ਰਹਿੰਦੇ ਸੀ, ਤਾਂ ਬਹੁਤ ਜ਼ਿਆਦਾ ਰੁਚੀ ਬਣ ਗਈ ਕ੍ਰਿਕਟ ਦੀ, ਇਸ ਲਈ ਮੈਂ ਕ੍ਰਿਕਟਰ ਬਣ ਗਈ।

ਪ੍ਰਧਾਨ ਮੰਤਰੀ- ਸ਼ੈਫਾਲੀ, ਜਦੋਂ ਮੈਂ ਇਹ ਦੇਖਿਆ ਸੀ, ਤਾਂ ਮੇਰੇ ਮਨ ਵਿੱਚ ਇੱਕ ਸਵਾਲ ਆਇਆ ਸੀ—ਕੋਈ ਕੈਚ ਕਰਨ ਤੋਂ ਬਾਅਦ ਹੱਸੇ, ਇਹ ਤਾਂ ਮੈਂ ਸਮਝ ਸਕਦਾ ਹਾਂ, ਪਰ ਤੁਸੀਂ ਤਾਂ ਕੈਚ ਹੋਣ ਤੋਂ ਪਹਿਲਾਂ ਹੀ ਹੱਸ ਰਹੇ ਸੀ। ਕੀ ਕਾਰਨ ਸੀ?

ਸ਼ੈਫਾਲੀ ਵਰਮਾ - ਸਰ, ਮੈਂ ਮਨ ਹੀ ਮਨ ਬੋਲ ਰਹੀ ਸੀ “ਆ ਜਾ ਕੈਚ ਆ ਜਾ, ਮੇਰੇ ਕੋਲ ਆ ਜਾ।” ਤਾਂ ਉਸ ਵਿੱਚ ਬਸ ਮੈਨੂੰ ਹਾਸਾ ਆ ਗਿਆ ਕਿ ਆ ਗਿਆ ਹੱਥ ਵਿੱਚ ਮੇਰੇ।

ਪ੍ਰਧਾਨ ਮੰਤਰੀ - ਨਹੀਂ, ਮੈਨੂੰ ਤਾਂ ਲੱਗਾ ਕਿ ਤੁਹਾਨੂੰ ਇੰਨਾ ਵਿਸ਼ਵਾਸ ਸੀ ਕਿ ਇਹ ਕਿਤੇ ਜਾ ਹੀ ਨਹੀਂ ਸਕਦਾ। ਐਸਾ ਸੀ?

ਸ਼ੈਫਾਲੀ ਵਰਮਾ - ਕਿਤੇ ਹੋਰ ਜਾਂਦਾ ਸਰ, ਮੈਂ ਉੱਥੇ ਵੀ ਛਾਲ ਮਾਰ ਦਿੰਦੀ।

ਪ੍ਰਧਾਨ ਮੰਤਰੀ - ਇਸ ਸਮੇਂ ਦੇ ਹਾਵ-ਭਾਵ ਦਾ ਕੁਝ ਵਰਣਨ ਕਰ ਸਕਦੇ ਹੋ ਤੁਸੀਂ?

ਜੇਮਿਮਾ ਰੌਡਰਿਗਜ਼ - ਅਸਲ ਵਿੱਚ ਸਰ, ਸੈਮੀਫਾਈਨਲ ਸੀ ਅਤੇ ਹਮੇਸ਼ਾ ਅਸੀਂ ਆਸਟ੍ਰੇਲੀਆ ਨਾਲ ਬਹੁਤ ਨਜ਼ਦੀਕ ਆ ਕੇ ਹਾਰ ਰਹੇ ਸੀ। ਤਾਂ ਜਦੋਂ ਮੈਂ ਅੰਦਰ ਗਈ ਸੀ, ਤਾਂ ਸਿਰਫ਼ ਇਹੀ ਸੀ ਕਿ ਟੀਮ ਨੂੰ ਜਿਤਾਉਣਾ ਹੈ। ਕਿਵੇਂ ਵੀ ਕਰਕੇ ਅੰਤ ਤੱਕ ਖੇਡਣਾ ਹੈ, ਟੀਮ ਨੂੰ ਜਿਤਾਉਣਾ ਹੈ ਅਤੇ ਜਦੋਂ ਹਾਰੇ ਸੀ ਅਤੇ ਅਸੀਂ ਆਏ ਸੀ ਇਕੱਠੇ, ਤਾਂ ਅਸੀਂ ਸਿਰਫ਼ ਇਹੀ ਬੋਲ ਰਹੇ ਸੀ ਕਿ ਇੱਕ ਪਾਰਟਨਰਸ਼ਿਪ, ਲੰਬੀ ਇੱਕ ਪਾਰਟਨਰਸ਼ਿਪ ਹੋ ਜਾਏ ਤਾਂ ਉਹ ਲੋਕ ਡਾਊਨ ਹੋ ਜਾਣਗੇ। ਇਹੀ ਅਸੀਂ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਸੀ। ਮੈਂ ਕਹਾਂਗੀ ਕਿ ਉਸ ਸਮੇਂ ਉਹ ਇੱਕ ਕਲੇਕਟਿਵ ਟੀਮ ਐਫਰਟ ਸੀ ਸਰ! ਹਾਂ, ਸ਼ਾਇਦ ਮੇਰੀ ਸੈਂਚਰੀ ਹੋਈ, ਪਰ ਮੈਂ ਮਹਿਸੂਸ ਕਰਦੀ ਹਾਂ ਕਿ ਜੇ ਹੈਰੀ ਦੀ ਨਾਲ ਮੇਰੀ ਪਾਰਟਨਰਸ਼ਿਪ ਨਾ ਹੁੰਦੀ, ਜਾਂ ਦੀਪਤੀ ਅੰਦਰ ਆ ਕੇ ਉਹ ਇੰਪੈਕਟ ਇਨਿੰਗਜ਼ ਨਾ ਖੇਡਦੀ, ਰਿਚਾ ਅਤੇ ਫਿਰ ਅਮਨ ਉਹ 8 ਗੇਂਦਾਂ 'ਤੇ 15 ਰਨ ਨਾ ਖੇਡਦੀ, ਤਾਂ ਸ਼ਾਇਦ ਅਸੀਂ ਸੈਮੀਫਾਈਨਲ ਨਾ ਜਿੱਤਦੇ। ਪਰ ਮੈਨੂੰ ਲੱਗਦਾ ਹੈ ਕਿ ਹਰ ਕਿਸੇ ਵਿੱਚ ਉਹ ਵਿਸ਼ਵਾਸ ਸੀ ਕਿ “ਨਹੀਂ, ਅਸੀਂ ਇਹ ਕਰ ਸਕਦੇ ਹਾਂ ਅਤੇ ਕਰ ਕੇ ਦਿਖਾਵਾਂਗੇ।”

ਜੇਮਿਮਾ ਰੌਡਰਿਗਜ਼ - ਉਹ ਸਾਨੂੰ ਉਤਸ਼ਾਹਿਤ ਕਰਨਾ ਚਾਹੁੰਦੇ ਸੀ, ਉਹ ਜ਼ਿਆਦਾ ਜਾਣਨਾ ਚਾਹੁੰਦੇ ਸੀ ਸਾਡਾ ਤਜਰਬਾ —ਕਿਵੇਂ ਸੀ ਵਰਲਡ ਕੱਪ ਜਿੱਤਣਾ? ਜਦੋਂ ਤਿੰਨ ਮੈਚ ਹਾਰੇ, ਤਾਂ ਕਿਵੇਂ ਲੱਗ ਰਿਹਾ ਸੀ? ਤੁਸੀਂ ਲੋਕਾਂ ਨੇ ਬਾਉਂਸ ਬੈਕ ਕਿਵੇਂ ਕੀਤਾ?

ਕ੍ਰਾਂਤੀ ਗੌੜ - ਜਦੋਂ ਮੈਂ ਮੈਨ ਆਫ਼ ਦ ਮੈਚ ਹੋਈ ਵਰਲਡ ਕੱਪ ਦੇ ਮੈਚ ਵਿੱਚ, ਤਾਂ ਪਹਿਲਾਂ ਤਾਂ ਮੈਨੂੰ ਬਹੁਤ ਮਾਣ ਮਹਿਸੂਸ ਹੋਇਆ, ਮੇਰੇ ਪਿੰਡ ਦੇ ਲੋਕਾਂ ਨੂੰ ਵੀ ਬਹੁਤ ਮਾਣ ਹੋਇਆ ਹੋਵੇਗਾ।

ਕ੍ਰਾਂਤੀ ਗੌੜ - ਜਦੋਂ ਮੈਂ ਗੇਂਦ ਸੁੱਟਦੀ ਸੀ, ਤਾਂ ਹਰਮਨ ਦੀ ਸਿਰਫ਼ ਇਹੀ ਕਹਿੰਦੀ ਸੀ ਕਿ “ਤੂੰ ਵਿਕਟ ਕੱਢਣੀ ਹੈ, ਤੂੰ ਹੀ ਹੈ ਜੋ ਪਹਿਲੀ ਵਿਕਟ ਲੈ ਕੇ ਦੇਵੇਂਗੀ।” ਤਾਂ ਮੈਨੂੰ ਵੀ ਲੱਗਦਾ ਸੀ ਕਿ ਪਹਿਲੀ ਵਿਕਟ ਮੈਂ ਹੀ ਲੈਣੀ ਹੈ। ਫਿਰ ਮੈਂ ਉਸੇ ਵਿਚਾਰ ਨਾਲ ਗੇਂਦ ਸੁੱਟਦੀ ਸੀ ਕਿ ਪਹਿਲੀ ਵਿਕਟ ਤਾਂ ਮੈਂ ਹੀ ਕੱਢਣੀ ਹੈ। ਮੇਰੇ ਵੱਡੇ ਭਰਾ ਹਨ, ਉਨ੍ਹਾਂ ਨੂੰ ਬਹੁਤ ਪਸੰਦ ਹੈ ਕ੍ਰਿਕਟ। ਉਹ ਤੁਹਾਨੂੰ ਵੀ ਬਹੁਤ ਮੰਨਦੇ ਹਨ। ਉਨ੍ਹਾਂ ਨੂੰ ਬਹੁਤ ਪਸੰਦ ਸੀ ਕ੍ਰਿਕਟ ਖੇਡਣਾ, ਪਰ ਉਸ ਸਮੇਂ ਪਾਪਾ ਦੀ ਨੌਕਰੀ ਚਲੀ ਗਈ ਸੀ, ਤਾਂ ਉਹ ਅਕੈਡਮੀ ਵਗ਼ੈਰਾ ਨਹੀਂ ਜੁੜੇ, ਪਰ ਆਮ ਤੌਰ 'ਤੇ ਖੇਡਦੇ ਰਹਿੰਦੇ ਸਨ। ਮੈਂ ਛੋਟੇ ਹੁੰਦਿਆਂ ਤੋਂ ਹੀ ਖੇਡਣ ਦੀ ਸ਼ੌਕੀਨ ਸੀ, ਤਾਂ ਲੜਕਿਆਂ ਨਾਲ ਖੇਡਦੀ ਸੀ, ਦੇਖਦੇ-ਦੇਖਦੇ ਹੀ ਸਿੱਖਿਆ। ਫਿਰ ਜਦੋਂ ਲੇਦਰ ਟੂਰਨਾਮੈਂਟ ਹੋਇਆ, ਤਾਂ ਸਾਡੇ ਪਿੰਡ ਵਿੱਚ ਵਿਧਾਇਕ ਟ੍ਰੌਫੀ ਹੋਈ ਸੀ। ਦੋ ਟੀਮਾਂ ਆਈਆਂ ਸਨ। ਇੱਕ ਦੀਦੀ ਦੀ ਤਬੀਅਤ ਅਚਾਨਕ ਖ਼ਰਾਬ ਹੋ ਗਈ, ਤਾਂ ਸਰ ਆ ਕੇ ਮੇਰੇ ਨਾਲ ਬੋਲੇ “ਤੂੰ ਖੇਡੇਂਗੀ?” ਮੈਂ ਕਿਹਾ “ਹਾਂ ਸਿਰ।” ਤਾਂ ਉਨ੍ਹਾਂ ਨੇ ਮੈਨੂੰ ਆਪਣੀ ਟੀਮ ਵਿੱਚ ਖਿਡਾਇਆ। ਉਹ ਮੇਰਾ ਪਹਿਲਾ ਮੈਚ ਸੀ ਲੇਦਰ ਬਾਲ ਨਾਲ ਅਤੇ ਮੈਂ ਉਸ ਵਿੱਚ ਪਲੇਅਰ ਆਫ਼ ਦ ਮੈਚ ਸੀ। ਮੈਂ ਦੋ ਵਿਕਟਾਂ ਲਈਆਂ ਤੇ 25 ਰਨ ਬਣਾਏ ਸਨ। ਉੱਥੋਂ ਮੇਰਾ ਕ੍ਰਿਕਟ ਸ਼ੁਰੂ ਹੋਇਆ।

ਪ੍ਰਧਾਨ ਮੰਤਰੀ - ਸ਼ੈਫਾਲੀ ਨੂੰ ਵੀ ਸ਼ਾਇਦ ਆਖ਼ਰੀ ਦੋ ਮੈਚਾਂ ਵਿੱਚ ਖੇਡਣ ਦਾ ਮੌਕਾ ਮਿਲਿਆ? ਹਾਂ?

ਸ਼ੈਫਾਲੀ ਵਰਮਾ - ਹਾਂ ਜੀ ਸਰ। ਸਰ, ਮੈਂ ਉਸ ਤੋਂ ਪਹਿਲਾਂ ਡੋਮੈਸਟਿਕ ਖੇਡ ਰਹੀ ਸੀ। ਪਰ ਜਦੋਂ ਮੈਨੂੰ ਕਾਲ-ਅੱਪ ਆਇਆ, ਬਿਲਕੁਲ ਜੋ ਪ੍ਰਤੀਕਾ ਨਾਲ ਹੋਇਆ, ਉਹ ਕੋਈ ਖਿਡਾਰੀ ਨਹੀਂ ਚਾਹੁੰਦਾ ਕਿ ਕਿਸੇ ਨਾਲ ਹੋਵੇ। ਪਰ ਜਦੋਂ ਕਾਲ-ਅੱਪ ਆਇਆ, ਤਾਂ ਮੈਂ ਆਪਣੇ ਆਪ 'ਤੇ ਵਿਸ਼ਵਾਸ ਦਿਖਾਇਆ ਅਤੇ ਪੂਰੀ ਟੀਮ ਨੇ ਮੇਰੇ 'ਤੇ ਵਿਸ਼ਵਾਸ ਦਿਖਾਇਆ। ਮੈਨੂੰ ਬੁਲਾਇਆ ਗਿਆ ਅਤੇ ਫਿਰ ਮੇਰੇ ਅੰਦਰ ਸਿਰਫ਼ ਇਹੀ ਸੀ ਕਿ ਮੈਨੂੰ ਜਿਤਾਉਣਾ ਹੈ—ਚਾਹੇ ਕਿਸੇ ਵੀ ਤਰੀਕੇ ਨਾਲ ਜਿਤਾਉਣਾ ਹੈ।

ਪ੍ਰਤੀਕਾ ਰਾਵਲ - ਮੈਂ ਇਸ ਵੀਡੀਓ ਨਾਲ ਸਿਰਫ਼ ਇਹ ਦੱਸਣਾ ਚਾਹਾਂਗੀ ਕਿ ਜਦੋਂ ਮੈਨੂੰ ਸੱਟ ਲੱਗੀ ਸੀ, ਤਾਂ ਟੀਮ ਵਿੱਚ ਬਹੁਤ ਸਾਰੇ ਲੋਕਾਂ ਨੇ ਕਿਹਾ ਕਿ ਇਹ ਵਰਲਡ ਕੱਪ ਅਸੀਂ ਪ੍ਰਤੀਕਾ ਲਈ ਜਿੱਤਣਾ ਚਾਹੁੰਦੇ ਹਾਂ। ਮੈਨੂੰ ਉਨ੍ਹਾਂ ਨੇ ਨਹੀਂ ਦੱਸਿਆ ਸੀ, ਪਰ ਮੈਨੂੰ ਬਾਹਰ ਦੇ ਕਿਸੇ ਨੇ ਦੱਸਿਆ ਕਿ ਟੀਮ ਵਿੱਚ ਤੁਹਾਡੇ ਲਈ ਇਹ ਕਿਹਾ ਜਾ ਰਿਹਾ ਹੈ। ਤਾਂ ਜਦੋਂ ਮੈਂ ਬਾਹਰ ਬੈਠੀ ਸੀ ਅਤੇ ਅਸੀਂ ਵਰਲਡ ਕੱਪ ਜਿੱਤੇ, ਤਾਂ ਹਾਲਾਂਕਿ ਮੈਂ ਟੈਕਨੀਕਲੀ ਸਕਵਾਡ ਵਿੱਚ ਨਹੀਂ ਸੀ—ਮੈਂ 16ਵੀਂ ਖਿਡਾਰਨ ਸੀ—ਪਰ ਸਰ, ਮੈਨੂੰ ਜਿਵੇਂ ਵ੍ਹੀਲਚੇਅਰ 'ਤੇ ਹੀ ਸਟੇਜ 'ਤੇ ਖੜ੍ਹਾ ਕੀਤਾ ਗਿਆ, ਪੂਰਾ ਸਨਮਾਨ ਦਿੱਤਾ ਗਿਆ। ਇਹ ਟੀਮ ਸੱਚਮੁੱਚ ਇੱਕ ਪਰਿਵਾਰ ਵਾਂਗ ਹੈ। ਜਦੋਂ ਤੁਸੀਂ ਸਾਰੇ ਖਿਡਾਰੀਆਂ ਦਾ ਸਤਿਕਾਰ ਕਰਦੇ ਹੋ ਅਤੇ ਉਨ੍ਹਾਂ ਨੂੰ ਇੱਕੋ ਜਿਹਾ ਮਹਿਸੂਸ ਕਰਾਉਂਦੇ ਹੋ, ਤਾਂ ਉਹ ਟੀਮ ਜਦੋਂ ਇਕੱਠੇ ਹੋ ਕੇ ਖੇਡਦੀ ਹੈ, ਤਾਂ ਉਸ ਟੀਮ ਨੂੰ ਹਰਾਉਣਾ ਬਹੁਤ ਮੁਸ਼ਕਲ ਹੋ ਜਾਂਦਾ ਹੈ। ਇਸ ਲਈ ਇਹ ਟੀਮ ਫਾਈਨਲ ਜਿੱਤਣ ਦੀ ਪੂਰੀ ਹੱਕਦਾਰ ਸੀ।

ਪ੍ਰਧਾਨ ਮੰਤਰੀ - ਨਹੀਂ, ਤੁਹਾਡੀ ਗੱਲ ਸਹੀ ਹੈ ਕਿ ਆਖ਼ਰਕਾਰ ਖੇਡ ਵਿੱਚ ਟੀਮ ਸਪਿਰਿਟ ਬਹੁਤ ਮਹੱਤਵ ਰੱਖਦੀ ਹੈ। ਅਤੇ ਟੀਮ ਸਪਿਰਿਟ ਸਿਰਫ਼ ਮੈਦਾਨ ਵਿੱਚ ਨਹੀਂ ਹੁੰਦੀ। ਜਦੋਂ ਚੌਵੀ ਘੰਟੇ ਇਕੱਠੇ ਰਹਿੰਦੇ ਹੋ, ਤਾਂ ਇੱਕ ਤਰ੍ਹਾਂ ਦਾ ਜੋੜ ਬਣ ਜਾਣਾ ਚਾਹੀਦਾ ਹੈ। ਹਰ ਇੱਕ ਦੀ ਕਮਜ਼ੋਰੀ ਦਾ ਪਤਾ ਲੱਗਦਾ ਹੈ ਤਾਂ ਉਸਨੂੰ ਕਵਰ ਕਰਨ ਦੀ ਕੋਸ਼ਿਸ਼ ਕੀਤੀ ਜਾਂਦੀ ਹੈ, ਅਤੇ ਜਿਸਦੀ ਤਾਕਤ ਹੈ ਉਸਨੂੰ ਸਹਿਯੋਗ ਦੇ ਕੇ ਉਜਾਗਰ ਕੀਤਾ ਜਾਂਦਾ ਹੈ। ਤਦ ਹੀ ਟੀਮ ਬਣਦੀ ਹੈ।

ਪ੍ਰਧਾਨ ਮੰਤਰੀ - ਦੱਸੋ, ਤੁਹਾਡਾ ਇਹ ਕੈਚ ਤਾਂ ਸਭ ਤੋਂ ਜ਼ਿਆਦਾ ਮਸ਼ਹੂਰ ਹੋ ਗਿਆ ਹੈ।

ਅਮਨਜੋਤ ਕੌਰ - ਸਰ, ਮੈਂ ਕਾਫ਼ੀ ਬਲਾਈਂਡਰ ਵੀ ਫੜੇ ਹਨ, ਪਰ ਇੰਨਾ ਮਸ਼ਹੂਰ ਕੋਈ ਕੈਚ ਨਹੀਂ ਹੋਇਆ। ਅਤੇ ਪਹਿਲੀ ਵਾਰ ਐਸਾ ਫੰਬਲ ਕਰ ਕੇ ਵੀ ਚੰਗਾ ਲੱਗ ਰਿਹਾ ਸੀ।

ਪ੍ਰਧਾਨ ਮੰਤਰੀ - ਤੁਸੀਂ ਜਦੋਂ ਇਹ ਕੈਚ ਲਿਆ, ਉਦੋਂ ਇੱਕ ਤਰ੍ਹਾਂ ਨਾਲ ਉਹ ਟਰੇਨਿੰਗ ਪੌਇੰਟ ਬਣ ਗਿਆ।

ਅਮਨਜੋਤ ਕੌਰ - ਜੀ ਸਰ।

ਪ੍ਰਧਾਨ ਮੰਤਰੀ - ਉਸ ਤੋਂ ਬਾਅਦ, ਯਾਨੀ ਜਦ ਤੱਕ ਤੁਸੀਂ ਕੈਚ ਕਰ ਰਹੇ ਸੀ ਤਦ ਤੱਕ ਤਾਂ ਠੀਕ ਹੈ, ਇੱਕ ਗੇਂਦ ਦਿਖਾਈ ਦਿੰਦੀ ਹੋਵੇਗੀ। ਉਸ ਤੋਂ ਬਾਅਦ ਤਾਂ ਤੁਹਾਨੂੰ ਟਰਾਫ਼ੀ ਦਿਖਾਈ ਦੇਣ ਲੱਗੀ ਹੋਵੇਗੀ।

ਅਮਨਜੋਤ ਕੌਰ - ਸਰ, ਮੈਨੂੰ ਤਾਂ ਉਸ ਕੈਚ ਵਿੱਚ ਹੀ ਟਰਾਫ਼ੀ ਦਿੱਖ ਰਹੀ ਸੀ। ਉਸ ਤੋਂ ਬਾਅਦ ਮੇਰੇ 'ਤੇ ਇੰਨੇ ਜਣੇ ਸਨ ਕਿ ਮੈਨੂੰ ਸਾਹ ਨਹੀਂ ਆ ਰਿਹਾ ਸੀ। ਮੈਨੂੰ ਪਤਾ ਵੀ ਨਹੀਂ ਸੀ ਕਿ ਮੇਰੇ 'ਤੇ ਕਿੰਨੇ ਜਣੇ ਸਨ।

ਪ੍ਰਧਾਨ ਮੰਤਰੀ - ਤੁਹਾਨੂੰ ਪਤਾ ਹੈ ਨਾ, ਪਿਛਲੀ ਵਾਰ ਸੂਰਿਆ ਯਾਦਵ ਨੇ ਵੀ ਐਸਾ ਹੀ ਕੈਚ ਕੀਤਾ ਸੀ।

ਅਮਨਜੋਤ ਕੌਰ - ਜੀ ਸਰ।

ਪ੍ਰਧਾਨ ਮੰਤਰੀ - ਤੁਹਾਡੇ ਵਿੱਚੋਂ ਸ਼ਾਇਦ ਕਿਸੇ ਦਾ ਇੱਕ ਕੈਚ ਸੀ, ਕਿਸੇ ਪਿਛਲੀ ਵਾਰ, ਜਿਸਨੂੰ ਮੈਂ ਰੀਟਵੀਟ ਕੀਤਾ ਸੀ। ਹਾਂ, ਮੈਨੂੰ ਉਸ ਸਮੇਂ ਉਹ ਦ੍ਰਿਸ਼ ਬਹੁਤ ਚੰਗਾ ਲੱਗਿਆ ਸੀ।

ਹਰਲੀਨ ਕੌਰ ਦਿਓਲ - ਹਾਂ ਜੀ ਸਰ। ਸਰ, ਮਤਲਬ ਜਦੋਂ ਅਸੀਂ ਇੰਗਲੈਂਡ ਵਿੱਚ ਸੀ, ਜਦੋਂ ਇਹ ਕੈਚ ਫੜਿਆ ਸੀ, ਤਾਂ ਅਸੀਂ ਬਹੁਤ ਸਮੇਂ ਤੋਂ ਐਸੇ ਕੈਚ ਦੀ ਪ੍ਰੈਕਟਿਸ ਕਰ ਰਹੇ ਸੀ। ਮੈਨੂੰ ਯਾਦ ਹੈ ਮੈਂ ਫੀਲਡਿੰਗ ਕਰ ਰਹੀ ਸੀ, ਇੱਕ ਅੱਗੇ ਕੈਚ ਆਇਆ ਸੀ, ਮੈਂ ਦੌੜੀ ਪਰ ਮੈਨੂੰ ਲੱਗਾ ਕਿ ਮੈਂ ਨਹੀਂ ਪਹੁੰਚੀ। ਹੈਰੀ ਦੀ ਨੇ ਡਾਂਟਿਆ ਕਿ ਕੀ ਫ਼ਾਇਦਾ ਤੁਸੀਂ ਲੋਕਾਂ ਦੇ ਚੰਗੇ ਫੀਲਡਰ ਹੋਣ ਦਾ ਜੇ ਅਜਿਹੇ ਕੈਚ ਨਹੀਂ ਫੜਦੇ। ਤਾਂ ਜੇਮੀ ਮੇਰੇ ਪਿੱਛੇ ਖੜੀ ਸੀ, ਤਾਂ ਜੇਮੀ ਨੇ ਮੈਨੂੰ ਕਿਹਾ ਕੋਈ ਗੱਲ ਨਹੀਂ। ਮੈਂ ਉਸ ਤੋਂ ਪੁੱਛਿਆ ਕਿ ਹੋ ਸਕਦਾ ਸੀ? ਉਸਨੇ ਕਿਹਾ ਹਾਂ, ਤੇਰੇ ਲਈ ਹੋ ਸਕਦਾ ਸੀ। ਤਾਂ ਮੈਂ ਉਸਨੂੰ ਕਿਹਾ ਕਿ ਅਜੇ ਦੋ ਓਵਰ ਪਏ ਹਨ, ਤੈਨੂੰ ਮੈਂ ਇੱਕ ਚੰਗਾ ਕੈਚ ਫੜ ਕੇ ਦਿਖਾਵਾਂਗੀ। ਤਾਂ ਸਰ, ਉਸ ਤੋਂ ਬਾਅਦ ਜਸਟ ਉਹ ਬਾਲ ਆਇਆ ਅਤੇ...

ਪ੍ਰਧਾਨ ਮੰਤਰੀ - ਅੱਛਾ, ਚੈਲੈਂਜ 'ਤੇ ਕੰਮ ਕੀਤਾ ਸੀ। ਰਿਚਾ, ਤੂੰ ਜਿੱਥੇ ਵੀ ਖੇਡਣ ਜਾਂਦੀ ਹੈਂ, ਜਿੱਤ ਕੇ ਆਉਂਦੀ ਹੈਂ ਨਾ, ਮੌਕਾ ਹਰ ਜਗ੍ਹਾ 'ਤੇ ਮਿਲ ਜਾਂਦਾ ਹੈ ਤੈਨੂੰ, ਹੈ ਨਾ?

ਰਿਚਾ ਘੋਸ਼ - ਪਤਾ ਨਹੀਂ ਸਰ, ਪਰ ਹਾਂ, ਜਿਵੇਂ ਅੰਡਰ-19, ਸੀਨੀਅਰ ਅਤੇ ਡਬਲਿਊਪੀਐੱਲ ਵਿੱਚ ਵੀ ਟਰਾਫ਼ੀ ਜਿੱਤੀ ਸੀ, ਬਹੁਤ ਦੂਰ-ਦੂਰ ਛੱਕੇ ਮਾਰੇ।

ਪ੍ਰਧਾਨ ਮੰਤਰੀ - ਅੱਛਾ ਦੱਸੋ।

ਰਿਚਾ ਘੋਸ਼ - ਜਦੋਂ ਬੈਟਿੰਗ ਕੀਤੀ ਸੀ, ਜਿਵੇਂ ਛੱਕੇ ਅਤੇ ਮੈਨੂੰ ਲੱਗਦਾ ਹੈ ਹੈਰੀ ਦੀ, ਸਮ੍ਰਿਤੀ ਦੀਦੀ ਅਤੇ ਸਾਰੇ ਲੋਕਾਂ ਨੇ ਭਰੋਸਾ ਕੀਤਾ, ਕਿ ਜੇਹੀ ਵੀ ਸਥਿਤੀ ਆ ਜਾਵੇ, ਜਿੱਥੇ ਗੇਂਦਾਂ ਘੱਟ ਹੋਣ ਪਰ ਰਨ ਜ਼ਿਆਦਾ ਚਾਹੀਦੇ ਹੋਣ, ਤਾਂ ਉਨ੍ਹਾਂ ਨੇ ਵਿਸ਼ਵਾਸ ਦਿਖਾਇਆ। ਮੈਨੂੰ ਵੀ ਉਸ ਨਾਲ ਵਿਸ਼ਵਾਸ ਮਿਲਿਆ ਕਿ ਹਾਂ, ਤੂੰ ਕਰ ਸਕਦੀ ਹੈਂ। ਤਾਂ ਸ਼ਾਇਦ ਇਸੇ ਲਈ ਹਰ ਮੈਚ ਵਿੱਚ ਮੇਰੀ ਬਾਡੀ ਲੈਂਗਵੇਜ ਅਜਿਹੀ ਦਿਖਦੀ ਹੈ।

ਰਾਧਾ ਯਾਦਵ - ਅਸੀਂ ਤਿੰਨ ਮੈਚ ਹਾਰੇ ਸੀ, ਪਰ ਸਭ ਤੋਂ ਵਧੀਆ ਗੱਲ ਇਹ ਸੀ ਕਿ ਅਸੀਂ ਹਾਰ ਵਿੱਚ ਵੀ ਇਕੱਠੇ ਸੀ, ਸਾਰੇ ਇੱਕ-ਦੂਜੇ ਨੂੰ ਸਹਾਰਾ ਦੇ ਰਹੇ ਸੀ, ਇੱਕ-ਦੂਜੇ ਨਾਲ ਗੱਲ ਕਰ ਰਹੇ ਸੀ। ਤਾਂ ਉਹ ਸੱਚਮੁੱਚ ਦਿਲੋਂ ਆ ਰਿਹਾ ਸੀ, ਪਿਉਰ ਤਰੀਕੇ ਨਾਲ। ਸ਼ਾਇਦ ਇਸੇ ਲਈ ਭਗਵਾਨ ਨੇ ਸਾਨੂੰ ਇਹ ਟਰਾਫ਼ੀ ਦਿੱਤੀ ਹੈ।

ਪ੍ਰਧਾਨ ਮੰਤਰੀ - ਨਹੀਂ ਨਹੀਂ, ਤੁਹਾਡੀ ਮਿਹਨਤ ਨਾਲ ਮਿਲੀ ਹੈ ਜੀ। ਇਸ ਖੇਤਰ ਵਿੱਚ ਇਸ ਤਰ੍ਹਾਂ ਆਪਣੇ ਆਪ ਨੂੰ ਕਿਵੇਂ ਤਿਆਰ ਕੀਤਾ?

ਰਾਧਾ ਯਾਦਵ - ਸਰ, ਜਿਵੇਂ ਤੁਸੀਂ ਕਿਹਾ ਕਿ ਕਾਫ਼ੀ ਸਮੇਂ ਤੋਂ ਅਸੀਂ ਬਹੁਤ ਵਧੀਆ ਕ੍ਰਿਕਟ ਖੇਡ ਰਹੇ ਹਾਂ ਅਤੇ ਹਰ ਸਥਿਤੀ ਲਈ ਤਿਆਰ ਹੋ ਰਹੇ ਸੀ। ਫਿਟਨੈੱਸ ਵਾਇਜ਼, ਫੀਲਡਿੰਗ ਵਾਇਜ਼ ਜਾਂ ਸਕਿੱਲ ਵਾਇਜ਼—ਅਸੀਂ ਕਾਫ਼ੀ ਸਮੇਂ ਤੋਂ ਮਿਹਨਤ ਕਰ ਰਹੇ ਸੀ ਉਸ ਚੀਜ਼ ਦੀ। ਅਤੇ ਜਿਵੇਂ ਮੈਂ ਕਿਹਾ, ਜਦੋਂ ਸਾਰੇ ਇਕੱਠੇ ਰਹਿੰਦੇ ਹਨ, ਤਾਂ ਆਸਾਨ ਹੋ ਜਾਂਦਾ ਹੈ। ਜੇ ਕੋਈ ਇਕੱਲਾ ਪੈ ਜਾਵੇ, ਤਾਂ ਉਸ ਲਈ ਇਕੱਲੇ ਕੰਮ ਕਰਨਾ ਬਹੁਤ ਮੁਸ਼ਕਲ ਹੁੰਦਾ ਹੈ।

ਪ੍ਰਧਾਨ ਮੰਤਰੀ - ਪਰ ਮੈਂ ਸੁਣਿਆ ਹੈ ਕਿ ਤੁਹਾਨੂੰ ਸ਼ੁਰੂ ਵਿੱਚ ਜੋ ਇਨਾਮ ਮਿਲਿਆ ਸੀ, ਉਹ ਤੁਸੀਂ ਪਿਤਾ ਜੀ ਦੀ ਮਦਦ ਲਈ ਖ਼ਰਚ ਕਰ ਦਿੱਤਾ।

ਰਾਧਾ ਯਾਦਵ - ਜੀ ਸਰ।

ਪ੍ਰਧਾਨ ਮੰਤਰੀ - ਅਤੇ ਪਿਤਾ ਜੀ ਪੂਰੀ ਤਰ੍ਹਾਂ ਹੱਲਾਸ਼ੇਰੀ ਦਿੰਦੇ ਰਹੇ।

ਰਾਧਾ ਯਾਦਵ - ਹਾਂ, ਪੂਰਾ ਸਮਾਂ। ਮਤਲਬ ਇੰਨਾ ਸੌਖਾ ਨਹੀਂ ਸੀ ਸਾਡੇ ਪਰਿਵਾਰ ਲਈ ਉਸ ਸਮੇਂ, ਪਰ ਪਾਪਾ ਨੇ ਕਦੇ ਹੌਸਲਾ ਨਹੀਂ ਟੁੱਟਣ ਦਿੱਤਾ, ਮੰਮੀ ਨੇ ਵੀ ਨਹੀਂ।

ਸਨੇਹ ਰਾਣਾ - ਸਰ, ਬਸ ਮਿਹਨਤ ਹੈ ਬਹੁਤ ਸਾਲਾਂ ਦੀ। ਅਤੇ ਆਪਣੇ ਜੋ ਬੌਲਿੰਗ ਕੋਚ ਹਨ ਆਵਿਸ਼ਕਾਰ ਸਰ, ਉਨ੍ਹਾਂ ਨਾਲ ਕਾਫ਼ੀ ਗੱਲਬਾਤ ਚੱਲ ਰਹੀ ਸੀ ਕਿ ਕਿਹੜੇ ਬੈਟਰ ਨੂੰ ਕਿਵੇਂ ਟੈਕਲ ਕਰਨਾ ਹੈ। ਤਾਂ ਉਹ ਸਾਰੀਆਂ ਰਣਨੀਤੀਆਂ ਜੋ ਕੈਪਟਨ, ਵਾਈਸ ਕੈਪਟਨ ਅਤੇ ਹੈਡ ਕੋਚ ਨਾਲ ਬਣਾਈਆਂ ਜਾਂਦੀਆਂ ਹਨ, ਉਹੀ ਗਰਾਊਂਡ 'ਤੇ ਲਾਗੂ ਕਰਨ ਦੀ ਕੋਸ਼ਿਸ਼ ਕਰਦੇ ਹਾਂ। ਅਤੇ ਸ਼ੁਕਰ ਹੈ ਕਿ ਉਹ ਹੋ ਜਾਂਦੀਆਂ ਹਨ। ਕਈ ਮੈਚ ਹੁੰਦੇ ਹਨ ਜਿੱਥੇ ਨਹੀਂ ਹੋ ਪਾਉਂਦੀਆਂ, ਪਰ ਫਿਰ ਵੀ ਆਪਣੇ ਆਪ ਨੂੰ ਪ੍ਰੇਰਿਤ ਕਰਦੇ ਹਾਂ ਕਿ ਅਗਲੀ ਵਾਰ ਹੋਰ ਵਧੀਆ ਕਰਾਂਗੇ।

ਉਮਾ ਸ਼ੇਤਰੀ - ਸਰ, ਅਜੇ ਸਮਝ ਨਹੀਂ ਆ ਰਿਹਾ ਤੁਹਾਡੇ ਸਾਹਮਣੇ ਮੈਂ ਕੀ ਬੋਲਾਂ। ਪਰ...

ਪ੍ਰਧਾਨ ਮੰਤਰੀ - ਜੋ ਸਮਝ ਵਿੱਚ ਆਏ ਉਹ ਬੋਲੋ।

ਉਮਾ ਸ਼ੇਤਰੀ- ਸਰ, ਉਹ ਮੇਰਾ ਡੈਬਿਊ ਸੀ, ਪਰ ਮੇਰੇ ਨਾਲ ਹਰ ਵਾਰ ਅਜਿਹਾ ਹੀ ਹੁੰਦਾ ਹੈ ਸਰ। ਜਦ ਵੀ ਡੈਬਿਊ ਹੁੰਦਾ ਹੈ, ਮੀਂਹ ਪੈ ਜਾਂਦਾ ਹੈ, ਤਾਂ ਉਸ ਦਿਨ ਵੀ ਐਸਾ ਹੀ ਹੋਇਆ ਸਰ, ਮੀਂਹ ਹੋਇਆ ਅਤੇ ਮੈਂ ਸਿਰਫ਼ ਕੀਪਿੰਗ ਹੀ ਕੀਤੀ ਪਰ ਇੰਨਾ ਸੀ ਕਿ ਮੈਂ ਖ਼ੁਦ ਬਹੁਤ ਖ਼ੁਸ਼ ਸੀ ਉਸ ਦਿਨ, ਕਿਉਂਕਿ ਡੈਬਿਊ ਹੋਣਾ ਬਹੁਤ ਵੱਡੀ ਗੱਲ ਹੁੰਦੀ ਹੈ, ਭਾਰਤ ਲਈ ਖੇਡਣਾ ਅਤੇ ਉਹ ਵੀ ਵਰਲਡ ਕੱਪ ਵਿੱਚ ਹੋਇਆ ਮੇਰਾ, ਤਾਂ ਮੈਂ ਬਹੁਤ ਐਕਸਾਈਟਿਡ ਸੀ ਉਸ ਦਿਨ ਉਸ ਮੈਚ ਨੂੰ ਲੈਕੇ ਕਿ ਖੇਡਾਂਗੀ ਦੇਸ਼ ਲਈ ਅਤੇ ਮੇਰਾ ਅਜਿਹਾ ਸੀ ਕਿ ਮੈਂ ਉਸ ਦਿਨ ਮੈਚ ਜਿਤਾ ਕੇ ਦਿਆਂ ਭਾਰਤ ਨੂੰ, ਜੋ ਵੀ ਮੇਰੇ ਤੋਂ ਚੰਗਾ ਬਣੇ ਅਤੇ ਜਿੰਨਾ ਵੀ ਮੈਂ ਐਫਰਟ ਲਗਾਵਾਂ। ਅਤੇ ਇੱਕ ਗੱਲ ਸਰ ਸਭ ਤੋਂ ਵਧੀਆ ਸੀ, ਕਿਉਂਕਿ ਸਾਰੀ ਟੀਮ ਮੇਰੇ 'ਤੇ ਭਰੋਸਾ ਕਰ ਰਹੀ ਸੀ ਅਤੇ ਸਾਰੇ ਲੋਕ ਆ ਕੇ ਮੈਨੂੰ ਹਰ ਗੱਲ ਦੱਸ ਰਹੇ ਸਨ, ਹਰ ਗੱਲ ਕਰ ਰਹੇ ਸਨ।

ਕੋਚ - ਨੌਰਥ ਈਸਟ ਤੋਂ ਭਾਰਤ ਲਈ ਖੇਡਣ ਵਾਲੀ ਪਹਿਲੀ ਲੜਕੀ।

ਪ੍ਰਧਾਨ ਮੰਤਰੀ - ਅਸਮ ਤੋਂ ਹੈ।

ਰੇਣੁਕਾ ਸਿੰਘ ਠਾਕੁਰ - ਡ੍ਰੈਸਿੰਗ ਰੂਮ ਦਾ ਮਾਹੌਲ ਚਿੱਲ ਰੱਖਣਾ ਸੀ, ਤਾਂ ਅਸੀਂ ਸੋਚਿਆ ਕਿ ਅਜਿਹਾ ਕੀ ਕਰੀਏ ਕਿ ਮਾਹੌਲ ਬਣੇ, ਜਿਵੇਂ ਮੈਂ ਮੋਰ ਬਣਾਇਆ ਤਾਂ ਇੱਕ ਪੌਜ਼ਿਟਿਵਿਟੀ ਦਾ ਸਾਈਨ ਹੁੰਦਾ ਹੈ, ਤਾਂ ਫਿਰ ਉਸ ਤੋਂ ਬਾਅਦ ਅਸੀਂ ਸੋਚਿਆ ਕਿ ਹੋਰ ਕੀ ਇੰਟਰੈਸਟਿੰਗ ਬਣਾ ਸਕਦੇ ਹਾਂ ਇਸ ਵਿੱਚ, ਤਾਂ ਜਿਵੇਂ ਸਮ੍ਰਿਤੀ ਦੀ 50 ਹੋਈ ਤਾਂ ਸਾਨੂੰ ਲੱਗਿਆ ਯਾਰ ਠੀਕ ਹੈ, ਹੁਣ ਅਸੀਂ 100 ਵੱਲ...

ਪ੍ਰਧਾਨ ਮੰਤਰੀ - ਤਾਂ ਇੱਥੇ ਆਉਂਦੇ ਹੀ ਮੋਰ ਵੇਖੇ ਹੋਣਗੇ।

ਰੇਣੁਕਾ ਸਿੰਘ ਠਾਕੁਰ - ਹਾਂ ਸਰ, ਮੈਂ ਉਹੀ ਕਿਹਾ ਇੱਕ ਹੋਰ ਮੋਰ ਦਿਸ ਗਿਆ। ਮੈਨੂੰ ਸਿਰਫ਼ ਇੱਕ ਮੋਰ ਹੀ ਬਣਾਉਣਾ ਆਉਂਦਾ ਸੀ ਡਰਾਇੰਗ ਵਿੱਚ। ਇਸ ਲਈ ਮੈਂ ਉਹੀ ਬਣਾ ਦਿੱਤਾ। ਬਣਾ ਕੇ ਰੱਖ ਦਿੱਤਾ। ਸਰ, ਅਗਲਾ ਕੁਝ ਨਹੀਂ ਆਉਂਦਾ ਬਣਾਉਣਾ।

ਖਿਡਾਰਨ - ਅਗਲਾ ਉਹ ਚਿੜੀ ਬਣਾਉਣ ਲੱਗੀ ਸੀ। ਅਸੀਂ ਮਨਾ ਕਰ ਦਿੱਤਾ।

ਪ੍ਰਧਾਨ ਮੰਤਰੀ - ਨਹੀਂ, ਪਰ ਤੁਹਾਡੀ ਮਾਤਾ ਜੀ ਨੂੰ ਤਾਂ ਮੈਂ ਵਿਸ਼ੇਸ਼ ਤੌਰ 'ਤੇ ਪ੍ਰਣਾਮ ਕਰਾਂਗਾ। ਕਿੰਨੀ ਮੁਸ਼ਕਲ ਜ਼ਿੰਦਗੀ ਵਿੱਚੋਂ ਉਨ੍ਹਾਂ ਨੇ ਤੁਹਾਡੀ ਏਨੀ ਪ੍ਰਗਤੀ ਲਈ ਬਹੁਤ ਵੱਡਾ ਯੋਗਦਾਨ ਦਿੱਤਾ। ਅਤੇ ਇੱਕ ਸਿੰਗਲ ਪੇਰੈਂਟ ਹੋਣ ਦੇ ਬਾਵਜੂਦ ਵੀ ਤੁਹਾਡੀ ਜ਼ਿੰਦਗੀ ਨੂੰ ਬਣਾਉਣ ਲਈ ਜਿੰਨੀ ਮਿਹਨਤ ਕੀਤੀ, ਅਤੇ ਧੀ ਲਈ ਕੀਤੀ — ਇਹ ਆਪਣੇ ਆਪ ਵਿੱਚ ਵੱਡੀ ਗੱਲ ਹੈ ਜੀ। ਮੇਰੀ ਤਰਫ਼ੋਂ ਜ਼ਰੂਰ ਉਨ੍ਹਾਂ ਨੂੰ ਪ੍ਰਣਾਮ ਕਹਿਣਾ ਤੁਸੀਂ।

ਰੇਣੁਕਾ ਸਿੰਘ ਠਾਕੁਰ - ਹਾਂ ਜੀ ਸਰ।

ਅਰੁੰਧਤੀ ਰੈੱਡੀ - ਸਭ ਤੋਂ ਪਹਿਲਾਂ ਮੈਂ ਮੇਰੀ ਮੰਮੀ ਦਾ ਮੈਸੇਜ ਦੇਣਾ ਸੀ ਤੁਹਾਨੂੰ। ਮੈਨੂੰ ਲੱਗਿਆ ਨਹੀਂ ਕਿ ਤੁਹਾਡੇ ਨਾਲ ਗੱਲ ਹੋ ਜਾਵੇਗੀ। ਪਰ ਉਨ੍ਹਾਂ ਨੇ ਕਿਹਾ ਕਿ ਤੁਸੀਂ ਉਨ੍ਹਾਂ ਦੇ ਹੀਰੋ ਹੋ। ਅਜੇ ਤੱਕ ਚਾਰ–ਪੰਜ ਵਾਰ ਉਨ੍ਹਾਂ ਦੀ ਕਾਲ ਆ ਗਈ ਹੈ ਕਿ ਮੈਂ ਮੇਰੇ ਹੀਰੋ ਨੂੰ ਕਦ ਮਿਲ ਰਹੀ ਹਾਂ? ਮੇਰੇ ਹੀਰੋ ਨੂੰ ਕਦ ਮਿਲ ਰਹੀ ਹਾਂ।

ਪ੍ਰਧਾਨ ਮੰਤਰੀ - ਤੁਹਾਨੂੰ ਕੀ ਲੱਗਦਾ ਹੈ ਕਿ ਤੁਸੀਂ ਖੇਡ ਦੇ ਮੈਦਾਨ ਵਿੱਚ ਸਫਲਤਾ ਹਾਸਲ ਕੀਤੀ ਹੈ, ਹੁਣ ਅੱਗੇ ਦੇਸ਼ ਤੁਹਾਡੇ ਤੋਂ ਕੀ ਉਮੀਦ ਰੱਖਦਾ ਹੋਵੇਗਾ? ਕੀ ਕਰ ਸਕਦੇ ਹੋ ਤੁਸੀਂ ਲੋਕ?

ਸਮ੍ਰਿਤੀ ਮੰਧਾਨਾ - ਮੇਰਾ ਮਤਲਬ ਹੈ ਜਦੋਂ ਅਸੀਂ ਵਰਲਡ ਕੱਪ ਲਈ ਜਾਂਦੇ ਹਾਂ ਤਾਂ ਹਮੇਸ਼ਾ ਸਭ ਤੋਂ ਪਹਿਲੀ ਗੱਲ ਅਸੀਂ ਇਹੀ ਆਖਦੇ ਹਾਂ ਕਿ ਜੇ ਅਸੀਂ ਅੱਜ ਵਰਲਡ ਕੱਪ ਜਿੱਤਾਂਗੇ ਤਾਂ ਜੋ ਇੰਪੈਕਟ ਇਹ ਔਰਤਾਂ ਦੀਆਂ ਖੇਡਾਂ ਵਿੱਚ ਲਿਆਵੇਗਾ, ਨਾ ਸਿਰਫ਼ ਕ੍ਰਿਕਟ ਲਈ ਪਰ ਜੋ ਔਰਤਾਂ ਦੀਆਂ ਖੇਡਾਂ ਵਿੱਚ ਲਿਆਵੇਗਾ, ਉਹ ਬਹੁਤ ਵੱਡਾ ਹੋਵੇਗਾ ਅਤੇ ਉਹ ਇੱਕ ਇਨਕਲਾਬ ਸ਼ੁਰੂ ਕਰੇਗਾ ਭਾਰਤ ਵਿੱਚ। ਤਾਂ ਅੱਗੇ ਵੀ ਸਾਡੀ ਇਹੀ ਕੋਸ਼ਿਸ਼ ਰਹੇਗੀ ਕਿ ਨਾ ਸਿਰਫ਼ ਔਰਤਾਂ ਦਾ ਕ੍ਰਿਕਟ ਪਰ ਔਰਤਾਂ ਦੇ ਖੇਡਾਂ ਨੂੰ ਅਸੀਂ ਇਨਕਲਾਬੀ ਬਣਾ ਸਕੀਏ ਭਾਰਤ ਵਿੱਚ ਅਤੇ ਮੈਨੂੰ ਲੱਗਦਾ ਹੈ ਇਹ ਟੀਮ ਦੇ ਕੋਲ ਉਹ ਸਮਰੱਥਾ ਹੈ।

ਪ੍ਰਧਾਨ ਮੰਤਰੀ - ਮੈਨੂੰ ਲੱਗਦਾ ਹੈ ਕਿ ਤੁਸੀਂ ਲੋਕ ਬਹੁਤ ਪ੍ਰੇਰਨਾਦਾਇਕ ਕੰਮ ਕਰ ਸਕਦੇ ਹੋ, ਕਿਉਂਕਿ ਤੁਹਾਡੇ ਕੋਲ ਸਫਲਤਾ ਦੀ ਇੱਕ ਵੱਡੀ ਤਾਕਤ ਹੈ। ਜਿਵੇਂ ਇੱਕ ਛੋਟਾ ਕੰਮ — ਤੁਸੀਂ ਆਪਣੇ ਘਰ ਜਾਓਗੇ, ਤਾਂ ਕੁਦਰਤੀ ਤੌਰ 'ਤੇ ਉਥੇ ਇੱਕ ਉਤਸ਼ਾਹ ਹੋਵੇਗਾ, ਖ਼ੁਸ਼ੀ ਹੋਵੇਗੀ, ਸਭ ਹੋਵੇਗਾ। ਪਰ ਕੁਝ ਦਿਨਾਂ ਬਾਅਦ ਆਪਣੇ ਸਕੂਲ ਜਾਓ। ਜਿਸ ਸਕੂਲ ਵਿੱਚੋਂ ਤੁਸੀਂ ਪੜ੍ਹ ਕੇ ਨਿਕਲੇ, ਅਤੇ ਇੱਕ ਦਿਨ ਉਥੇ ਬਿਤਾਓ। ਬੱਚਿਆਂ ਨਾਲ ਗੱਲ ਕਰੋ, ਉਹ ਤੁਹਾਨੂੰ ਬਹੁਤ ਸਾਰੇ ਸਵਾਲ ਪੁੱਛਣਗੇ, ਅਤੇ ਤੁਸੀਂ ਜੋ ਵੀ ਸਹਿਜ ਲੱਗੇ ਉਨ੍ਹਾਂ ਨਾਲ ਗੱਲ ਕਰੋ। ਮੈਂ ਸਮਝਦਾ ਹਾਂ ਕਿ ਉਹ ਸਕੂਲ ਵੀ ਤੁਹਾਨੂੰ ਯਾਦ ਰੱਖੇਗਾ ਅਤੇ ਉਹ ਬੱਚੇ ਜ਼ਿੰਦਗੀ ਭਰ ਤੁਹਾਨੂੰ ਯਾਦ ਰੱਖਣਗੇ। ਜਿੱਥੇ ਤੁਸੀਂ ਪੜ੍ਹੇ ਹੋ ਉਹੀ ਸਕੂਲ। ਮੈਂ ਇਹ ਨਹੀਂ ਕਹਿ ਰਿਹਾ ਕਿ ਜੇ ਤੁਹਾਡਾ ਤਜਰਬਾ ਚੰਗਾ ਰਹੇ ਤਾਂ ਤਿੰਨ ਸਕੂਲ ਚੁਣੋ। ਸਾਲ ਵਿੱਚ ਜਦੋਂ ਵੀ ਮੌਕਾ ਮਿਲੇ — ਇੱਕ ਦਿਨ, ਇੱਕ ਸਕੂਲ, ਤਿੰਨ ਸਕੂਲ ਜਾਓ ਸਾਲ ਵਿੱਚ। ਤੁਸੀਂ ਵੇਖੋਗੇ ਕਿ ਉਹ ਤੁਹਾਨੂੰ ਹੀ ਇੱਕ ਤਰੀਕੇ ਨਾਲ ਪ੍ਰੇਰਿਤ ਕਰਦਾ ਹੈ। ਤੁਸੀਂ ਉਨ੍ਹਾਂ ਨੂੰ ਪ੍ਰੇਰਿਤ ਕਰਦੇ ਹੋ, ਉਹ ਵੀ ਤੁਹਾਨੂੰ ਕਰਦੇ ਹਨ।

ਦੂਜਾ — ਇਹ ਜੋ ਫਿਟ ਇੰਡੀਆ ਮੁਹਿੰਮ ਹੈ, ਹੁਣ ਜਿਵੇਂ ਸਾਡੇ ਦੇਸ਼ ਵਿੱਚ ਮੋਟਾਪਾ ਇੱਕ ਵੱਡੀ ਸਮੱਸਿਆ ਬਣਦਾ ਜਾ ਰਿਹਾ ਹੈ, ਤਾਂ ਫਿਟ ਇੰਡੀਆ ਹੀ ਉਸ ਦਾ ਇਲਾਜ ਹੈ। ਜਿਵੇਂ ਮੈਂ ਹਮੇਸ਼ਾ ਕਹਿੰਦਾ ਹਾਂ ਭਾਈ ਤੁਸੀਂ ਜੋ ਖਾਣ ਦਾ ਤੇਲ ਹੈ ਉਹ 10% ਘਟਾਓ। ਖ਼ਰੀਦਦੇ ਸਮੇਂ ਹੀ ਘਟਾ ਦਿਓ। ਤਾਂ ਇਹ ਚੀਜ਼ਾਂ ਜਦ ਤੁਹਾਡੇ ਮੂੰਹੋਂ ਲੋਕ ਸੁਣਦੇ ਹਨ, ਮੈਂ ਸਮਝਦਾ ਹਾਂ ਕਿ ਬਹੁਤ ਫ਼ਾਇਦਾ ਹੁੰਦਾ ਹੈ ਅਤੇ ਬੇਟੀਆਂ ਲਈ ਫਿਟ ਇੰਡੀਆ ਦੀ ਤੁਸੀਂ ਅਪੀਲ ਕਰੋ, ਮੈਂ ਸਮਝਦਾ ਹਾਂ ਕਿ ਇੱਕ ਵੱਡਾ ਲਾਭ ਹੋਵੇਗਾ ਅਤੇ ਜੇ ਤੁਸੀਂ ਕੁਝ ਯੋਗਦਾਨ ਦੇ ਸਕਦੇ ਹੋ ਤਾਂ ਦੇਣਾ ਚਾਹੀਦਾ ਹੈ।

ਤਾਂ ਮੈਨੂੰ ਚੰਗਾ ਲੱਗਿਆ ਤੁਹਾਡੇ ਨਾਲ ਗੱਲਾਂ ਕਰਨ ਦਾ ਮੌਕਾ ਮਿਲਿਆ। ਇਸ ਵਿੱਚੋਂ ਕਈ ਲੋਕ ਹਨ ਜਿਨ੍ਹਾਂ ਨੂੰ ਕਈ ਵਾਰ ਮਿਲਿਆ ਹਾਂ। ਬਹੁਤਿਆਂ ਨੂੰ ਪਹਿਲੀ ਵਾਰ ਮਿਲ ਰਿਹਾ ਹਾਂ। ਪਰ ਮੇਰੀ ਕੋਸ਼ਿਸ਼ ਹੁੰਦੀ ਹੈ ਕਿ ਤੁਹਾਡੇ ਨਾਲ ਮਿਲਣ ਦਾ ਮੌਕਾ ਮਿਲੇ। ਤਾਂ ਤੁਸੀਂ ਜਲਦੀ ਤੋਂ ਜਲਦੀ ਸਿਹਤਮੰਦ ਹੋ ਜਾਓ।

ਸਮ੍ਰਿਤੀ ਮੰਧਾਨਾ - ਤੁਸੀਂ ਜੋ ਕਿਹਾ ਅਸੀਂ ਯਾਦ ਰੱਖਾਂਗੇ, ਪੱਕਾ। ਜਦ ਵੀ ਸਾਨੂੰ ਮੌਕਾ ਮਿਲੇਗਾ ਕਿ ਲੋਕਾਂ ਨਾਲ ਗੱਲ ਕਰ ਸਕੀਏ ਤਾਂ ਅਸੀਂ ਇਹ ਸੁਨੇਹਾ ਜ਼ਰੂਰ ਵੰਡਾਂਗੀਆਂ ਅਤੇ ਸਾਡੀ ਟੀਮ ਵੱਲੋਂ ਜਦ ਵੀ ਤੁਹਾਨੂੰ ਲੱਗੇ ਕਿ ਸਾਨੂੰ ਇਹ ਸੁਨੇਹਾ ਦੇਣਾ ਹੈ, ਜਦ ਵੀ ਸਾਨੂੰ ਬੁਲਾਉਣਾ ਹੈ, ਅਸੀਂ ਸਾਰੇ ਜਣੇ ਕਦੇ ਵੀ ਪਹੁੰਚ ਜਾਵਾਂਗੇ, ਕਿਉਂਕਿ ਬਿਲਕੁਲ ਇਹ ਸੁਨੇਹਾ...

ਪ੍ਰਧਾਨ ਮੰਤਰੀ - ਅਸੀਂ ਸਾਰਿਆਂ ਨੇ ਮਿਲ ਕੇ ਦੇਸ਼ ਨੂੰ ਅੱਗੇ ਲਿਜਾਣਾ ਹੈ।

ਸਮ੍ਰਿਤੀ ਮੰਧਾਨਾ - ਜੀ ਸਰ।

ਪ੍ਰਧਾਨ ਮੰਤਰੀ - ਚਲੋ, ਬਹੁਤ-ਬਹੁਤ ਸ਼ੁਭਕਾਮਨਾਵਾਂ।

**** 

ਐੱਮਜੇਪੀਐੱਸ/ਵੀਜੇ/ਵੀਕੇ/ਏਕੇ