تجارت و صنعت کے وزیر مملکت جناب جتن پرساد نے آج بخارسٹ میں رومانیہ کی وزیر خارجہ عزت مآب محترمہ اوانا سلویا تویو کے ساتھ دو طرفہ میٹنگ کی۔ بات چیت میں تجارت کو بڑھانے، سرمایہ کاری کو راغب کرنے اور وسیع تر ہند-یوروپی یونین اقتصادی فریم ورک کی لچیلی سپلائی چین کو مضبوط کرنے پر توجہ مرکوز کی گئی ۔

دونوں فریقوں نے جاری مذاکرات کے لیے طے شدہ سیاسی سمت کے مطابق ایک منصفانہ ، متوازن اور دونوں کے لیے فائدہ مند ہند-یوروپی یونین آزاد تجارتی معاہدے (ایف ٹی اے) کے نتیجے کی طرف رواں سال کے اندر کام کرنے پر اتفاق کیا ۔

وزرا نے دونوں ممالک کے درمیان تجارت اور سرمایہ کاری سے متعلق مستحکم تعلقات کا جائزہ لیا ۔ مالی سال 2024-25 میں رومانیہ کو ہندوستان کی برآمدات 1.03 ارب امریکی ڈالر سے تجاوز کر گئیں ، جبکہ مالی سال 2023-24 میں مجموعی طور پر دو طرفہ تجارت تقریبا 2.98 ارب امریکی ڈالر تک پہنچ گئی۔ دونوں فریقوں نے ترجیحی شعبوں جیسے پیٹرولیم مصنوعات، انجینئرنگ کے سامان، دواسازی اور سیرامکس میں سپلائی چین کے روابط کو گہرا کرنے اور دونوں طرف سے مارکیٹ تک رسائی کو بڑھانے کے لیے معیارات، جانچ اور سرمایہ کاری کی شراکت داری میں تعاون کو آسان بنانے پر اتفاق کیا۔ انہوں نے پیداوار کو متنوع بنانے اور قابل اعتماد شراکت دار کے طور پر مضبوط، زیادہ لچیلی سپلائی چین بنانے کے لیے مل کر کام کرنے پر بھی اتفاق کیا، جس سے دونوں ممالک میں کاروبار کے لیے استحکام اور اعتماد کو یقینی بنایا جا سکے۔

ہندوستان اور رومانیہ کی قیادت کے درمیان حالیہ اعلیٰ سطحی مصروفیات کی بنیاد پر، دونوں فریقوں نے تبادلوں کے باقاعدہ سلسلے کے ذریعے اس رفتار کو برقرار رکھنے پر اتفاق کیا۔ انہوں نے تجارت کو ہموار کرنے، موبلٹی ٹول کٹ تیار کرنے اور مواقع کو ٹھوس نتائج میں تبدیل کرنے کے لیے سرمایہ کاروں کی رسائی کو مضبوط کرنے کے لیے فالو اپ اقدامات کو مربوط کرنے کا بھی فیصلہ کیا۔

یہ دورہ ایک مضبوط ہند-رومانیہ اقتصادی شراکت داری کے لیے دونوں ممالک کے مشترکہ عزم کی نشاندہی کرتا ہے-جو تجارت کو بڑھاتا ہے، سرمایہ کاری کے بہاؤ کو وسیع کرتا ہے اور دونوں معیشتوں کے باہمی فائدے کے لیے مہارت پر مبنی نقل و حرکت کے لیے راستے پیدا کرتا ہے۔

*****

ش ح۔ ک ح ۔ت ع

U. No-728