56ତମ ଭାରତୀୟ ଅନ୍ତର୍ଜାତୀୟ ଚଳଚ୍ଚିତ୍ର ମହୋତ୍ସବ (ଆଇଏଫଏଫଆଇ) ଆସନ୍ତା 20ରୁ 28 ନଭେମ୍ବର ପର୍ଯ୍ୟନ୍ତ ଗୋଆର ପାଣାଜୀଠାରେ ଆୟୋଜନ କରାଯିବ। ଏଥିରେ ଅଂଶଗ୍ରହଣ କରି ଖବର ପ୍ରସାରଣ କରିବାକୁ ଚାହୁଁଥିବା ଗଣମାଧ୍ୟମ ପ୍ରତିନିଧିମାନେ ଆଇଏଫଏଫଆଇ ପୋର୍ଟାଲ https://accreditation.pib.gov.in/eventregistration/login.aspx ରେ ପଞ୍ଜୀକରଣ କରିପାରିବେ। ଗଣମାଧ୍ୟମ ପଞ୍ଜୀକରଣ ପୋର୍ଟାଲ 5 ନଭେମ୍ବର 2025 ପର୍ଯ୍ୟନ୍ତ ଖୋଲା ରହିବ ।

ସ୍ୱୀକୃତିପ୍ରାପ୍ତ ଗଣମାଧ୍ୟମ ପେସାଦାରମାନେ ବିଶ୍ୱ ପ୍ରସିଦ୍ଧ ଚଳଚ୍ଚିତ୍ର ନିର୍ମାତା ଏବଂ କଳାକାରମାନଙ୍କ ସହିତ ଚଳଚ୍ଚିତ୍ର ପ୍ରଦର୍ଶନ, ପ୍ୟାନେଲ୍ ଆଲୋଚନା, ମାଷ୍ଟରକ୍ଲାସ୍ ଏବଂ ନେଟୱାର୍କିଂ ଅଧିବେଶନ ପାଇଁ ସ୍ୱତନ୍ତ୍ର ପ୍ରବେଶ ପାଇବେ।

ଭାରତୀୟ ଚଳଚ୍ଚିତ୍ର ଏବଂ ଟେଲିଭିଜନ ସଂସ୍ଥାନ (ଏଫଟିଆଇଆଇ) 18 ନଭେମ୍ବର, 2025ରେ ସ୍ୱୀକୃତିପ୍ରାପ୍ତ ଗଣମାଧ୍ୟମ ପେସାଦାରଙ୍କ ପାଇଁ ଏକ ଚଳଚ୍ଚିତ୍ର ମୂଲ୍ୟାଙ୍କନ ପାଠ୍ୟକ୍ରମ ପରିଚାଳନା କରିବ। ପୂର୍ବ ସଂସ୍କରଣରେ ଏହି ପାଠ୍ୟକ୍ରମରେ ଯୋଗ ଦେଇପାରିନଥିବା ସାମ୍ବାଦିକମାନଙ୍କୁ ଚଳିତ ବର୍ଷ ପ୍ରାଥମିକତା ଦିଆଯିବ।

ଆବେଦନକାରୀମାନଙ୍କୁ ପୋର୍ଟାଲରେ ଥିବା ମାର୍ଗଦର୍ଶିକାକୁ ସତର୍କତାର ସହ ପାଳନ କରିବାକୁ ଏବଂ ବୈଧ ପରିଚୟ ଓ ବୃତ୍ତିଗତ ପ୍ରମାଣପତ୍ର ସମେତ ସମସ୍ତ ଆବଶ୍ୟକ ଦସ୍ତାବିଜ ଅପଲୋଡ୍ କରିବାକୁ ପରାମର୍ଶ ଦିଆଯାଉଛି। ବିସ୍ତୃତ ଯୋଗ୍ୟତା ମାନଦଣ୍ଡ ଏବଂ ଦସ୍ତାବିଜଗୁଡ଼ିକର ମାର୍ଗଦର୍ଶିକା ୱେବସାଇଟରେ ଉପଲବ୍ଧ।

ଯେକୌଣସି ସହାୟତା କିମ୍ବା ପ୍ରଶ୍ନ ପାଇଁ, ସାମ୍ବାଦିକମାନେ ipfi.mediadesk@pib.gov.in ରେ ପିଆଇବି ଆଇଏଫଏଫଆଇ ଗଣମାଧ୍ୟମ ସହାୟତା କେନ୍ଦ୍ର ସହିତ ଯୋଗାଯୋଗ କରିପାରିବେ।

ପତ୍ର ସୂଚନା କାର୍ଯ୍ୟାଳୟ (ପିଆଇବି)ର ପ୍ରମୁଖ ମହାନିର୍ଦ୍ଦେଶକ ଶ୍ରୀ ଧୀରେନ୍ଦ୍ର ଓଝା କହିଛନ୍ତି, ‘‘ଆଇଏଫଏଫଆଇ ଏକ ଗୁରୁତ୍ୱପୂର୍ଣ୍ଣ କାର୍ଯ୍ୟକ୍ରମ ଯାହା ବିଶ୍ୱର ବିଭିନ୍ନ ସିନେମା ବ୍ୟକ୍ତିତ୍ୱଙ୍କୁ ଏକତ୍ରିତ କରେ। ପିଆଇବି ଏକ ସୁଗମ ମାନ୍ୟତା ପ୍ରକ୍ରିୟା ସୁନିଶ୍ଚିତ କରିବା ଏବଂ ଏହି ପ୍ରସିଦ୍ଧ ମହୋତ୍ସବକୁ ବ୍ୟାପକ ଭାବରେ ପ୍ରଚାରପ୍ରସାର କରିବାରେ ସାମ୍ବାଦିକମାନଙ୍କୁ ସହାୟତା କରିବା ପାଇଁ ପ୍ରତିଶ୍ରୁତିବଦ୍ଧ ରହିଛି ।’’

ଗୋଆର ପାଣାଜୀର ମନୋରମ ପୃଷ୍ଠଭୂମିରେ ଆୟୋଜିତ, ଆଇଏଫଏଫଆଇ ଭାରତର ସିନେମା ଐତିହ୍ୟ ପ୍ରଦର୍ଶନ କରିବା ସହିତ ବିଶ୍ୱସ୍ତରୀୟ ସହଯୋଗ ଏବଂ ସୃଜନଶୀଳତାକୁ ପ୍ରୋତ୍ସାହିତ କରିଥାଏ। ପ୍ରତିବର୍ଷ, 45,000 ରୁ ଅଧିକ ଚଳଚ୍ଚିତ୍ର ପ୍ରେମୀ ଏବଂ ପେସାଦାର ଏହି ନଅ ଦିନିଆ ସିନେମା ଉତ୍ସବ ପାଇଁ ଏକାଠି ହୁଅନ୍ତି । ବିଶ୍ୱବ୍ୟାପୀ ଦର୍ଶକଙ୍କୁ ପ୍ରେରଣା, ଆହ୍ୱାନ ଦେଉଥିବା ଏବଂ ଯୋଡ଼ୁଥିବା କାହାଣୀରେ ନିଜକୁ ବୁଡ଼ାଇ ଦିଅନ୍ତି।

ଏସିଆର ସର୍ବବୃହତ ଚଳଚ୍ଚିତ୍ର ମହୋତ୍ସବର ଏକ ଅଂଶ ହେବାର ସୁଯୋଗ ହାତଛଡ଼ା କରନ୍ତୁ ନାହିଁ। ଆଜି ହିଁ ଆବେଦନ କରନ୍ତୁ ଏବଂ ସିନେମାର ସବୁଠାରୁ ମହାନ ପର୍ଯ୍ୟାୟ, ଆଇଏଫଏଫଆଇ 2025 ରେ ଆପଣଙ୍କର ସ୍ଥାନ ସୁରକ୍ଷିତ କରନ୍ତୁ!

******

PS/Swadhin