প্রধান মন্ত্রী শ্রী নরেন্দ্র মোদীনা ঙসি সাউথ ব্লোক্তা কেন্দ্র অমসুং রাজ্য সরকারশিংগী থবকশিং অপনবা লৈতনা পুনশিন্দুনা, প্রো-এক্তিব গবর্নান্স থৌগৎনবা অমসুং মতম চানা ইমপ্লিমেন্ত তৌবা হেনগৎহন্নবা পান্দম থম্লিবা ICT-ইনেবল, মল্তি-মোদেল প্লেৎফোর্ম, প্রগতিগী 48শুবা মীফমদা ময়াই তাংবল লৌখ্রে।

মীফম অদুগী মনুংদা, প্রধান মন্ত্রীনা মাইন্স, রেলৱেজ অমসুং ৱাতর রিসোর্স সেক্তরগী মরুওইবা ইনফ্রাস্ত্রকচর প্রোজেক্ত খরগী মতাংদা খন্নখি। ইকোনোমিক গ্রোথ অমসুং পব্লিক ৱেলফেয়রগীদমক মরুওইবা প্রোজেক্তশিং অসি তাইমলাইনশিংগী মতুং ইন্না, ইন্তর-এজেন্সী কোওর্দিনেসন অমসুং ইসুগী সোলুসনদা মীৎয়েং থমদুনা য়েংশিনখি।

প্রধান মন্ত্রীনা হায়খি মদুদি প্রোজেক্তশিং পায়খৎপদা থেংথবনা শেল চংবা হেনগৎলকপা অমসুং নাগরিকশিংদা তঙাই ফদবা সর্ভিসশিং অমসুং ইনফ্রাস্ত্রকচর মতম চানা ফংহন্দবগী খুদোংচাদবা অনি থোকহল্লি। মহাক্না কেন্দ্র অমসুং রাজ্য অনিমক্কী ওফিসিএলশিংদা খুদোংচাবশিং অসি পুন্সি ফগৎহনবদা ওন্থোক্নবা ফলদা য়ুম্ফম ওইবা এপ্রোচ অমা পায়খৎনবা তকশিনখি।

প্রধান মন্ত্রী-আয়ুশ্মান ভারত হেল্থ ইনফ্রাস্ত্রকচর মিসন (PM-ABHIM) গী য়েংশিনবা মতমদা, প্রধান মন্ত্রীনা রাজ্য খুদিংমক্তা এস্পিরেস্নেল দিস্ত্রিক্তশিং, মনুং হঞ্জিনবা, ত্রাইবেল অমসুং বোর্দর এরিয়াশিংদা অখন্নবা মীৎয়েং থমদুনা হেল্থ ইনফ্রাস্ত্রকচর দিবেলপমেন্তগী খোঙজেল য়াংশিন্নবা হায়খি। মহাক্না অকনবা ৱাফম থমখি মদুদি লায়রবশিং, শোত্থরবশিং অমসুং খুদোংচাবা ফংদ্রবশিংগীদমক ক্বালিতী হেল্থকেয়র ফংহনবদা চপ মান্নবা খুদোংচাবা ফংহনগদবনি। মহাক্না হায়রিবা মফমশিং অসিদা লৈরিবা মরুওইবা হেল্থ সর্বিসশিংগী মরক্তা লৈরিবা অৱাৎপা অদু কোকহন্নবা অথুবা মতমদা অমসুং লেপ্পা লৈতনা হোৎনগদবনি হায়খি।

PM-ABHIMনা রাজ্যশিংদা ব্লোক, দিস্ত্রিক্ত অমসুং রাজ্যগী থাক্তা মখোয়গী প্রাইমরী, তর্সিয়রী অমসুং অখন্নবা হেল্থ ইনফ্রাস্ত্রকচর মপাঙ্গল কনখৎহন্নবা অমসুং ক্বালিতী হেল্থ কেয়র অমসুং সর্বিসশিং ফংহন্নবা অচৌবা খুদোংচাবা পীরি হায়না প্রধান মন্ত্রীনা অকনবা ৱাফম থমখি।

প্রধান মন্ত্রীনা তোঙান তোঙানবা মন্ত্রালয়শিং, দিপার্তমেন্তশিং, অমসুং রাজ্যশিং/য়ু.তি.শিংনা লৌখৎলিবা দিফেন্স সেক্তরদা আত্মনির্ভরতা পুক্নিং থৌগৎপগী খুদম ওইরবা থৌওংশিং য়েংশিনখি। মহাক্না মসিগী থৌরাংশিং অসি মখোয়গী স্ত্রেতেজিক ওইবা মরুওইবা অমসুং দিফেন্স ইকোসিস্তেম পুম্বদা ইন্নোবেসন পুক্নিং থৌগৎপা ঙম্বা অদুগীদমক থাগৎপা ফোংদোকখি। পাক চাউরবা কান্নবা অদু পল্লদুনা, প্রধান মন্ত্রীনা দিফেন্স সেক্তরদা ভারতনা মশা-মরোমদোম লেপচবা হেনগৎলকপগী মপাঙ্গল লৈবা খুদম অমা ওইনা, লমদমসিগী ওইবা কেপাসিতীশিংগা লোয়ননা পাংথোকখিবা ওপরেসন সিন্দুরগী মাইপাকপা অদু পনখি।

প্রধান মন্ত্রীনা রাজ্যশিংনা ইকোসিস্তেম অসি মপাঙ্গল কনখৎহন্নবা অমসুং দিফেন্স সেক্তরদা আত্মনির্ভরতা ওইনবা হোৎনবদা শরুক তমদুনা করম্না খুদোংচাবা কয়া অমা লৌবা য়াবগে হায়বগী মতাংদসু পনখি।

****