প্রধান মন্ত্রী শ্রী নরেন্দ্র মোদী অমসুং মোরিসসকী প্রধান মন্ত্রী ঐচ.ই. শ্রী প্রবিন্দ জগন্নাথনা অনৌবা এয়রস্ত্রিপ অমসুং সেন্ত. জেম্স জেত্তী ঙসি ভিদিও কনফরেন্সিংগী খুত্থাংদা মোরিসসকী অগলেগা ইথৎতা কম্ম্যুনিতী দিবেলপমেন্ত প্রোজেক্ত তরুক শঙ্গাখ্রে। প্রোজেক্তশিং অসি শঙ্গাবা অসি ভারত অমসুং মোরিসসকী মরক্তা চহী কয়াদগী লৈরক্লবা দিবেলপমেন্ত পার্তনরশিপকী খুদম অমনি অমসুং মসিনা মেনলেন্দ মোরিসস অমসুং আগলেগাগী মরক্তা হেন্না ফবা কনেক্তিবিতীগী ফংহল্লগনি, মেরিতাইম সেক্যুরিতী মপাঙ্গল কনখৎহল্লগনি অমসুং সোসিও-ইকোনোমিক দিবেলপমেন্ত ফগৎহল্লগনি। প্রোজেক্তশিং অসি হৌদোকপা অসি য়াম্না মরু ওই মরমদি লুচিংবা অনিনা ২০২৪গী ফেব্রুৱারী ১২দা মোরিসসতা য়ু.পি.আই. অমসুং রুপে কার্দ সর্ভিস হৌদোকখিবনি।

মোরিসসকী প্রধান মন্ত্রী, ঐচ.ই. শ্রী প্রবিন্দ জগন্নাথনা হায়খি মদুদি ভারত অমসুং মোরিসসনা অনৌবা এয়রস্ত্রিপ অমসুং সেন্ত জেম্স জেত্তীগা লোয়ননা মোরিসসকী অগলেগা ইথৎতা কম্ম্যুনিতী দিবেলপমেন্ত প্রোজেক্ত তরুক শঙ্গাবা অসিনা ঙসি পুৱারী অমা শেম্লে। থৌরম অসিবু লৈবাক অনিগী মরক্তা লৈরিবা খুদম ওইরবা পার্তনরশিপকী খুদম অমনি হায়না পল্লদুনা প্রধান মন্ত্রী জগনাথনা প্রধান মন্ত্রী মোদীবু মোরিসস-ভারত মরীদা অনৌবা দিমেন্সন অমা পীরকপগীদমক থাগৎপা ফোংদোকখি অমসুং ঙসি মফম অসিদা লাকপগীদমক থাগৎপা ফোংদোকখি। "অগলেগাদা অনৌবা এয়রস্ত্রিপ অমসুং জেতি ফেসিলিতী শেমগৎপা অসি মোরিসসকী অতোপ্পা মঙলান অমা মপুং ফাহন্নবনি।" হায়না প্রধান মন্ত্রী জগনাথনা হায়খি অমসুং প্রোজেক্ত অসি মপুং ফানা শেল থাদবগী ভারতকী থৌদাংবু থাগৎপা ফোংদোকখি। মহাক্না ভারত্তা ওফিস পায়বা হৌরকপদগী হৌনা ইথৎ লৈবাক অসিদা অখন্নবা মীৎয়েং থম্লিবা অসিগীদমক মোরিসসকী সরকার অমসুং মীয়ামগী মায়কৈদগী প্রধান মন্ত্রী মোদীদা থাগৎপা ফোংদোকখি। মালেম শীনবা থুংনা প্রধান মন্ত্রী মোদীগী মপাঙ্গল কনবা লুচিংবা অমসুং স্তেতস্মান্সপু মহাক্না থাগৎখি অমসুং হায়খি মদুদি ভারতকী মপান্দা লৈরিবা মীওইশিংনা মশাবু ভেল্যুশিং, লৌশিং অমসুং মাইপাকপগী মালেমগী পাৱরহাউস অমা ওইনা মশাবু মশক তাক্লি। মহাক্না হায়খি মদুদি মোরিসসনা "জন ঔশধী স্কিম" চৎনহনখিবা অহানবা লৈবাক ওইরে। মসিনা ভারতকী ফার্মাসিয়ুতিকলস অমসুং মেদিকেল দিভাইসস ব্যুরোদগী অৱাংবা থাক্কী হিদাক-লাংথক ২৫০ রোম পুথোকপা ঙমহল্লি। মসিনা মোরিসসকী মীয়ামদা কান্নবা ফংহল্লি অমসুং লৈবাক অনিগী মরক্তা পার্তনরশিপ হেন্না চেৎশিলহল্লি। প্রধান মন্ত্রী জগনাথনা মহাক্কী ৱারোল লোইশিনবদা, চাউখৎ-থৌরাংগী পান্দমশিং ফংহন্দুনা মেরিসিয়সকী মেরিন সর্ভিলেন্স অমসুং সেক্যুরিতীদা মপাঙ্গল হেনগৎহনগদবা অসিগুম্লবা অচৌবা ত্রান্সফোর্মেস্নেল প্রোজেক্তশিং ফংহনবদা মতেং পাংবীবগীদমক প্রধান মন্ত্রী মোদীবু থাগৎপা ফোংদোকখি।

থৌরম অদুদা ৱা ঙাংলদুনা প্রধান মন্ত্রীনা হায়খি মদুদি মসি মহাক্না মোরিসসকী প্রধান মন্ত্রী ঐচ.ই. শ্রী প্রবিন্দ জগনাথনা হৌখিবা থা তরুক অসিদা উন্নদুনা ভারত অমসুং মোরিসসকী মরক্তা অচেৎপা অমসুং অখন্নবা পার্তনরশিপ অমা লৈবগী খুদম ওইখি। মহাক্না হায়খি মদুদি মোরিসস অসি ভারতকী "নেবরহুদ ফার্স্ত পোলিসী"গী মরুওইবা পার্তনর অমনি অমসুং ভিজন সাগরগী মখাদা অখন্নবা পার্তনর অমনি। প্রধান মন্ত্রীনা হায়খি, গ্লোবেল সাউথকী মেম্বরশিং ওইনা, ঐখোয়গী অপুনবা প্রাইওরিতীশিং লৈরি অমসুং হৌখিবা চহি ১০ অসিদা লৈবাক অনিগী মরক্তা লৈনরিবা মরীদা মমাংদা অমুক্তা ওইখিদ্রিবা মওংদা খুমাং চাওশিল্লক্লি অমসুং ম্যুচেল কোওপরেসনগী অনৌবা অৱাংবা থাক অমা ফংলে। অরিবা লোল অমসুং কলচরেল লিঙ্কশিংগী মতাংদা পল্লদুনা, প্রধান মন্ত্রীনা য়ু.পি.আই. অমসুং রুপে কার্দনা মরী অসিদা মোদর্ন দিজিতেল কনেক্তিবিতী ফংহল্লে হায়না নিংশিংখি।

প্রধান মন্ত্রীনা হায়খি মদুদি চাউখৎ-থৌরাংগী পার্তনরশিপশিং অসি লৈবাক অনিগী মরক্তা লৈনরিবা রাজনিতীগী পার্তনরশিপকী য়ুম্ফম ওইরি অমসুং ভারতনা চাউখৎ-থৌরাংগীদমক পীরিবা তেংবাং অসি মোরিসসকী মরুওইবশিংদা য়ুম্ফম ওইরি। ভারতনা মতম পুম্নমক্তা মোরিসসকী মথৌ তাবশিংবু ইকাই খুম্নবা উৎখি অমসুং ইহান হানবা রেস্পোন্দর অমা ওইনা থবক তৌখি।" কোবিদ পেন্দেমিক ওইরো নত্রগা ওইল স্পিল ওইরো, ইথৎ অসিদা ভারতনা মতম শাংনা মতেং পাংলি হায়না প্রধান মন্ত্রীনা ফোংদোকখি। মহাক্না হায়খি মদুদি ভারতকী মরুওইবা পান্দমদি মোরিসসকী মীয়ামগীদমক অফবা অহোংবা পুরকপনি। হৌখিবা চহি ১০দা, ভারতনা মোরিসসকী মীয়ামদা য়ু.এস. দোল্লর মিলিয়ন ১গী ক্রেদিৎ লাইন অমসুং য়ু.এস. দোল্লর মিলিয়ন ৪০০গী এসিস্তেন্স পীখ্রে হায়না প্রধান মন্ত্রীনা ফোংদোকখি। মহাক্না হায়খি মদুদি ভারতনা মোরিসসতা মেত্রো রেল লাইনশিং, কম্ম্যুনিতী দিবেলপমেন্ত প্রোজেক্তশিং, সোসিএল হাউজিং, ই.এন.তি. হোস্পিতাল, সিবিল সর্বিস কোলেজ অমসুং স্পোর্তস কমপ্লেক্স ইনফ্রাস্ত্রকচর শেমগৎপদা শরুক য়াবা ঙম্বা অসি লাইবক ফবনি।

প্রধান মন্ত্রীনা মহাক্না ২০১৫দা অগলেগাগী মীয়ামদা পীখিবা মহাক্কী ৱাশক অদু মপুং ফাহনবদা নুংঙাইবা ফোংদোকখি। ঙসিদি, মসি ভারত্তা মোদী কী গেরেন্তী কৌরি। ঙসি পুন্না শঙ্গাবা হৌদোকখিবা হায়রিবা ফেসিলিতীশিং অসিনা ইজ ওফ লিভিং হেনগৎহনগনি।" মসিনা মোরিসসকী অৱাংথংবা অমসুং খাথংবা শরুকশিংগী মরক্তা কনেক্তিবিতী ফগৎহল্লগনি অমসুং মেনলেন্দগা লোইননা এদমিনিস্ত্রেতিব কনেক্তিবিতী ফগৎহল্লগনি। মহাক্না হায়খি, মেদিকেল ইভেক্যুএসন অমসুং স্কুলগী অঙাংশিংগী ত্রান্সপোর্তেসন ফগৎলগনি।

ইন্দিয়ন ওসিন রিজনদা লৈরিবা ত্রেদিস্নেল অমসুং নন-ত্রেদিস্নেল ওইবা শিংনবশিং অসিনা ইকোনোমী অনিমক শোকহল্লিবা অসিগী মতাংদা পল্লদুনা প্রধান মন্ত্রীনা হায়খি মদুদি ভারত অমসুং মোরিসস অসি অসিগুম্বা শিংনবশিং অসি থেংননবা মেরিতাইম সেক্যুরিতীদা মহৌশাগী ওইবা পার্তনরশিংনি। ঐখোয়না ভারত মহাসাগর লমদমদা সেক্যুরিতী, প্রোসপরিতী অমসুং স্তেবিলিতী লৈহন্নবা থবক পায়খৎলি। এক্সক্লুসিব ইকোনোমিক জোন, জোইন্ত পেত্রোলিং, হায়দ্রোগ্রাফী, অমসুং হ্যুমেনিতরিয়ন এসিস্তেন্স অমসুং দিজাস্তর রিলিফগুম্বা হিরম পুম্নমক্তা ঐখোয়না মতেং পাংলি।" মহাক্না অকনবা ৱাফম থমখি মদুদি ঙসি অগলেগাদা এয়রস্ত্রিপ অমসুং জেত্তী শঙ্গাবনা লৈবাক অনিগী মরক্তা মতেং পীনবা হেনগৎহল্লগনি অমসুং মোরিসসকী ব্লু ইকোনোমীসু মপাঙ্গল কনখৎহল্লগনি।

মোরিসসতা জন ঔশধী কেন্দ্রশিং লিংখৎনবা প্রধান মন্ত্রী জগনাথনা লৌখিবা ৱারেপ অদু থাগৎলদুনা প্রধান মন্ত্রীনা হায়খি মদুদি মসিগী খুত্থাংদা মোরিসস অসি ভারতকী জন ঔশধী খোংথাংদা শরুক য়াখিবা অহানবা লৈবাক ওইরে। মসিনা মোরিসসকী মীয়ামদা অফবা মগুন লৈবা মেদ-ইন-ইন্দিয়া জেনেরিক হিদাকশিং ফংহন্দুনা কান্নবা ফংহল্লগনি।

প্রধান মন্ত্রীনা মহাক্কী ৱারোল লোইশিল্লদুনা মহাক্কী মোরিসসকী মকোক থোংবা মীৎয়েং অমসুং থৌনা ফরবা লুচিংবগীদমক থাগৎপা ফোংদোকখি। মহাক্না থাজবা থমখি মদুদি ভারত অমসুং মোরিসসকী মরীনা লাক্কদৌরিবা মতমশিংদা অনৌবা অৱাংবা থাক্তা য়ৌরগনি।

***