প্ৰধানমন্ত্ৰী শ্ৰী নৰেন্দ্ৰ মোদীয়ে আজি পুৱা ৭ নং লোক কল্যাণ মাৰ্গত থকা তেওঁৰ বাসভৱনত ৰাষ্ট্ৰীয় শিক্ষক বঁটা প্ৰাপক শিক্ষকসকলৰ সৈতে বাৰ্তালাপ কৰে।

বঁটাপ্ৰাপক শিক্ষাৰ্থীসকলে প্ৰধানমন্ত্ৰীৰ সৈতে তেওঁলোকৰ শিক্ষাদানৰ অভিজ্ঞতা শ্বেয়াৰ কৰে। তেওঁলোকে শিক্ষণক অধিক আকৰ্ষণীয় কৰি তোলাৰ বাবে ব্যৱহাৰ কৰা আকৰ্ষণীয় কৌশলসমূহৰ বিষয়েও কৈছিল। তেওঁলোকে তেওঁলোকৰ নিয়মীয়া শিক্ষাদান কাৰ্যৰ লগতে সামাজিক কাম-কাজৰো উদাহৰণ দাঙি ধৰে। তেওঁলোকৰ সৈতে বাৰ্তালাপ কৰি প্ৰধানমন্ত্ৰীয়ে শিক্ষাদানৰ ক্ষেত্ৰত তেওঁলোকৰ নিষ্ঠা আৰু বছৰ বছৰ ধৰি প্ৰদৰ্শন কৰা অসাধাৰণ উদ্যমৰ শলাগ লয়।

প্ৰধানমন্ত্ৰীয়ে ৰাষ্ট্ৰীয় শিক্ষা নীতিৰ প্ৰভাৱ সম্পৰ্কে আলোচনা কৰে আৰু নিজৰ মাতৃভাষাত শিক্ষাৰ গুৰুত্বৰ বিষয়ে কয়। তেওঁ শিক্ষকসকলক বিভিন্ন ভাষাত স্থানীয় লোককথা শিকাবলৈ পৰামৰ্শ দিয়ে, যাতে ছাত্ৰ-ছাত্ৰীসকলে একাধিক ভাষা শিকিব পাৰে আৰু ভাৰতৰ জীৱন্ত সংস্কৃতিৰ সৈতেও পৰিচিত হ'ব পাৰে।

প্ৰধানমন্ত্ৰীয়ে কয় যে শিক্ষকসকলে তেওঁলোকৰ ছাত্ৰ-ছাত্ৰীসকলক ভাৰতৰ বৈচিত্ৰ্যতা অন্বেষণৰ বাবে শৈক্ষিক ভ্ৰমণলৈ নিব পাৰে, যি তেওঁলোকৰ শিক্ষাত সহায়ক হ'ব আৰু তেওঁলোকক সামগ্ৰিকভাৱে তেওঁলোকৰ দেশৰ বিষয়ে জানিবলৈও সহায় কৰিব। তেওঁ লগতে কয় যে ইয়াৰ ফলত পৰ্যটনৰো বিকাশ হ'ব আৰু স্থানীয় অৰ্থনীতিও শক্তিশালী হ'ব।

প্ৰধানমন্ত্ৰীয়ে বঁটাপ্ৰাপক শিক্ষকসকলক সামাজিক মাধ্যমৰ জৰিয়তে পৰস্পৰে পৰস্পৰৰ সৈতে সংযোগ স্থাপন কৰিবলৈ আৰু তেওঁলোকৰ উত্তম অনুশীলনসমূহ ভাগ-বতৰা কৰিবলৈ পৰামৰ্শ দিয়ে যাতে সকলোৱে এনে অনুশীলনৰ পৰা শিকিব, গ্ৰহণ কৰিব আৰু উপকৃত হ'ব পাৰে।

প্ৰধানমন্ত্ৰীয়ে কয় যে শিক্ষকসকলে ৰাষ্ট্ৰৰ বাবে অতি গুৰুত্বপূৰ্ণ সেৱা আগবঢ়াই আছে আৰু বৰ্তমানৰ যুৱ প্ৰজন্মক বিকাশ ভাৰতৰ বাবে প্ৰস্তুত কৰাৰ দায়িত্ব তেওঁলোকৰ ওপৰত ন্যস্ত।

পটভূমি

ৰাষ্ট্ৰীয় শিক্ষক বঁটাৰ উদ্দেশ্য হৈছে দেশৰ কেইগৰাকীমান শ্ৰেষ্ঠ শিক্ষকৰ অনন্য অৱদানক উদযাপন কৰা আৰু সন্মানিত কৰা, যিসকলে তেওঁলোকৰ প্ৰতিশ্ৰুতি আৰু কঠোৰ পৰিশ্ৰমৰ জৰিয়তে কেৱল শিক্ষা খণ্ডৰ মানদণ্ড উন্নত কৰাই নহয়, তেওঁলোকৰ ছাত্ৰ-ছাত্ৰীৰ জীৱনকো সমৃদ্ধ কৰিছে। এই বৰ্ষৰ বঁটাৰ বাবে সমগ্ৰ দেশৰ পৰা ৮২ গৰাকী শিক্ষকক নিৰ্বাচিত কৰা হৈছে য'ত বিদ্যালয় শিক্ষা আৰু সাক্ষৰতা বিভাগে ৫০ গৰাকী, উচ্চ শিক্ষা বিভাগে ১৬ গৰাকী আৰু দক্ষতা বিকাশ আৰু উদ্যমিতা মন্ত্ৰালয়ে ১৬ গৰাকী শিক্ষকক নিৰ্বাচিত কৰিছে।

MJPS/ST