U Myntri Rangbah Duh, Narendra Modi u la iakren bad ki nonghikai kiba la ioh ia ki khusnam National Teachers Awards ha ka iing sah jong u ha 7, Lok Kalyan Marg mynta ka sngi.

Ki nongjop ki la batai ia ki jingshem jong ki ha ki kam hikai ia u Myntri Rangbah Duh bad ruh ki rukom treikam ba saindur thymmai ba ki pyndonkam ban kham pynsngewtynnad ia ka jingioh jinghikai. Ki la pyni ia ki nuksa jong ki kam jong ki ha ka imlang sahlang ha ryngkat ka kam hikai jong ki. Ha ka jingiakren bad ki, u Myntri Rangbah Duh u la iaroh ia ka jingtrei shitom jong ki ha kane ka kam ai jinghikai bad ka jingshitrhem jong ki ha kine ki snem ba la dep, ia kaba la ai jingithuh lyngba kine ki khusnam ba ki la ioh.

U Myntri Rangbah Duh u la kren shaphang ka jingktah jong ka NEP bad ruh ka jingdonkam ban ioh ia ka jinghikai ha ka ktien lajong. U la ai jingmut ia ki nonghikai ba kin hikai shaphang ki khana tynrai ha ki ktien lajong ban iarap ia ki ba kin iohsngew ia ki ktien bapher bapher bad khnang ba ki khynnah kin nang ia ki ktien bapher bapher bad sngewthuh ia ka jingiar ka deiriti jong ka India.

U Myntri Rangbah Duh u la ong ba ki nonghikai ki lah ban ialam ia ki shah hikai ha ki jingleit ban ioh jingnang jingstad bad ban leit peit ia ka jingiar jong ka India. U la ong ba kane kan kyntiew ruh ia ka kam jngoh kai bad iarap ia ka ioh ka kot ha ki jaka ba ki leit.

U Myntri Rangbah Duh u la ong ba ki nonghikai ba jop khusnam ki dei ban iatrei lang lyngba ka social media bad iasam ia ki rukom treikam ba seisoh tam jong ki khnang ba baroh ki lah ban ioh jingnang jingstad bad ioh jingmyntoi na kine ki rukom treikam.

U Myntri Rangbah Duh u la ong ba ki nonghikai ki ai ka jingshakri kaba kongsan ia ka ri bad ba ka jingbahkhlieh ban pynkhreh ia ki samla mynta na ka bynta ka Viksit Bharat ka don ha ka kti jong ki nonghikai.

Ka Nongrim

Ka thong jong ka jingai khusnam National Teachers Awards ka dei ban rakhe bad burom ia ka jingnoh synniang jong ki nonghikai ba tbit tam ha ka ri kiba trei shitom ha ka rukom kaba la kyntiew ia ka kam pule puthi bad wanrah jingmyntoi ha ka jingim jong ki shah hikai jong ki. 82 ngut ki nonghikai na kylleng ka ri ki la shah jied ban ioh ia kine ki khusnam mynta u snem kiba kynthup 50 ngut ki nonghikai kiba la shah jied da ka Tnad School Education & Literacy, 16 ngut ki nonghikai da ka Tnad Higher Education bad 16 ngut ki nonghikai da ka Tnad Skill Development and Entrepreneurship.

***