ಗೌರವಾನ್ವಿತ ಅಧ್ಯಕ್ಷ ಇರ್ಫಾನ್ ಅಲಿ,

ಪ್ರಧಾನಿ ಮಾರ್ಕ್ ಫಿಲಿಪ್ಸ್,

ಉಪ ರಾಷ್ಟ್ರಪತಿ ಭರತ್ ಜಗದೇವ್,

ಮಾಜಿ ಅಧ್ಯಕ್ಷ ಡೊನಾಲ್ಡ್ ರಾಮೋತಾರ್,

ಗಯಾನಾದ ಸಚಿವ ಸಂಪುಟದ ಸದಸ್ಯರೇ,

ಭಾರತ-ಗಯಾನಾ ಸಮುದಾಯದ ಸದಸ್ಯರೇ,

ಮಹಿಳೆಯರೇ ಮತ್ತು ಮಹನೀಯರೇ,

ನಮಸ್ಕಾರ!

ಸೀತಾರಾಮ್!

ಇಂದು ನಿಮ್ಮೆಲ್ಲರೊಂದಿಗೆ ಇರಲು ನನಗೆ ಸಂತೋಷವಾಗಿದೆ. ಮೊದಲನೆಯದಾಗಿ, ನಮ್ಮೊಂದಿಗೆ ಭಾಗಿಯಾಗಿದ್ದಕ್ಕೆ ಅಧ್ಯಕ್ಷ ಇರ್ಫಾನ್ ಅಲಿಗೆ ನಾನು ಧನ್ಯವಾದ ಹೇಳಲು ಬಯಸುತ್ತೇನೆ. ನಾನು ಬಂದ ನಂತರ ನನಗೆ ನೀಡಿದ ಪ್ರೀತಿ ಮತ್ತು ವಾತ್ಸಲ್ಯದಿಂದ ತುಂಬಾ ಪ್ರಭಾವಿತನಾಗಿದ್ದೇನೆ. ನನಗೆ ಅವರ ಮನೆಯ ಬಾಗಿಲುಗಳನ್ನು ತೆರೆದಿದ್ದಕ್ಕಾಗಿ ಅಧ್ಯಕ್ಷ ಅಲಿಗೆ ನಾನು ಧನ್ಯವಾದ ಹೇಳುತ್ತೇನೆ. ಅವರ ಕುಟುಂಬದ ಉಷ್ಣತೆ ಮತ್ತು ದಯೆಗಾಗಿ ನಾನು ಧನ್ಯವಾದ ಹೇಳುತ್ತೇನೆ. ಆತಿಥ್ಯದ ಮನೋಭಾವವು ನಮ್ಮ ಸಂಸ್ಕೃತಿಯ ಹೃದಯಭಾಗದಲ್ಲಿದೆ. ಕಳೆದ ಎರಡು ದಿನಗಳಲ್ಲಿ ನಾನು ಅದನ್ನು ಅನುಭವಿಸಬಲ್ಲೆ. ಅಧ್ಯಕ್ಷ ಅಲಿ ಮತ್ತು ಅವರ ಅಜ್ಜಿಯೊಂದಿಗೆ, ನಾವು ಸಹ ಒಂದು ಮರವನ್ನು ನೆಟ್ಟಿದ್ದೇವೆ. ಇದು ನಮ್ಮ ಉಪಕ್ರಮ "ಏಕ್ ಪೇಡ್ ಮಾ ಕೆ ನಾಮ್", ಅಂದರೆ "ತಾಯಿಗಾಗಿ ಒಂದು ಮರ" ಎಂಬುದು ನಮ್ಮ ಯೋಜನೆಯಾಗಿದೆ. ಇದೊಂದು ಯಾವಾಗಲೂ ನೆನಪಿಸಿಕೊಳ್ಳುವ ಭಾವನಾತ್ಮಕ ಕ್ಷಣವಾಗಿತ್ತು.

ಸ್ನೇಹಿತರೇ,

ಗಯಾನಾದ ಅತ್ಯುನ್ನತ ರಾಷ್ಟ್ರೀಯ ಪ್ರಶಸ್ತಿಯಾದ 'ಆರ್ಡರ್ ಆಫ್ ಎಕ್ಸಲೆನ್ಸ್' ಅನ್ನು ಸ್ವೀಕರಿಸಲು ನನಗೆ ತುಂಬಾ ಗೌರವ ಎನಿಸಿದೆ. ನಾನು ಗಯಾನಾದ ಜನರಿಗೆ ಧನ್ಯವಾದ ಹೇಳುತ್ತೇನೆ. ಇದು 1.4 ಬಿಲಿಯನ್ ಭಾರತೀಯರ ಗೌರವ. ಇದು 3 ಲಕ್ಷ ಬಲಿಷ್ಠ ಇಂಡೋ-ಗಯಾನೀಸ್ ಸಮುದಾಯದ ಗುರುತಿಸುವಿಕೆ ಮತ್ತು ಗಯಾನಾದ ಅಭಿವೃದ್ಧಿಗೆ ಕೊಡುಗೆಯಾಗಿದೆ.

ಸ್ನೇಹಿತರೇ,

ಎರಡು ದಶಕಗಳ ಹಿಂದೆ ನಿಮ್ಮ ಅದ್ಭುತ ದೇಶಕ್ಕೆ ಭೇಟಿ ನೀಡಿದ ಮಧುರ ನೆನಪುಗಳು ಇನ್ನೂ ಹಸಿರಾಗಿದೆ. ಆ ಸಮಯದಲ್ಲಿ, ನಾನು ಯಾವುದೇ ಅಧಿಕೃತ ಹುದ್ದೆಯನ್ನು ಹೊಂದಿರಲಿಲ್ಲ. ನಾನು ಗಯಾನಾಗೆ ಪ್ರಯಾಣಿಕನಾಗಿ ಬಂದಿದ್ದೇನೆ, ಕುತೂಹಲವನ್ನು ಹೊಂದಿದ್ದೇನೆ. ಈಗ, ನಾನು ಭಾರತದ ಪ್ರಧಾನ ಮಂತ್ರಿಯಾಗಿ ಅನೇಕ ನದಿಗಳ ತಾಣವಾಗಿರುವ ಈ ಭೂಮಿಗೆ ಬಂದಿದ್ದೇನೆ. ಆಗ ಮತ್ತು ಇಂದಿನ ನಡುವೆ ಬಹಳಷ್ಟು ವಿಷಯಗಳು ಬದಲಾಗಿವೆ. ಆದರೆ ನನ್ನ ಗಯಾನ ಸಹೋದರ ಸಹೋದರಿಯರ ಪ್ರೀತಿ ಮತ್ತು ವಾತ್ಸಲ್ಯ ಹಾಗೆಯೇ ಉಳಿದಿದೆ! ನನ್ನ ಅನುಭವವೇ ಇದನ್ನು ಹೇಳಿದೆ - ನೀವು ಭಾರತೀಯನನ್ನು ಭಾರತದಿಂದ ಹೊರಗೆ ಕರೆದೊಯ್ಯಬಹುದು, ಆದರೆ ನೀವು ಭಾರತೀಯನಿಂದ ಭಾರತವನ್ನು ತೆಗೆದುಕೊಳ್ಳಲು ಸಾಧ್ಯವಿಲ್ಲ.

ಸ್ನೇಹಿತರೇ,

ಇಂದು, ನಾನು ವಿಶೇಷ ಸ್ಮಾರಕಕ್ಕೆ ಭೇಟಿ ನೀಡಿದ್ದೇನೆ. ಇದು ಸುಮಾರು ಎರಡು ಶತಮಾನಗಳ ಹಿಂದಿನ ನಿಮ್ಮ ಪೂರ್ವಜರ ದೀರ್ಘ ಮತ್ತು ಕಷ್ಟಕರ ಪ್ರಯಾಣವನ್ನು ಜೀವಂತಗೊಳಿಸುತ್ತದೆ. ಅವರು ಭಾರತದ ವಿವಿಧ ಭಾಗಗಳಿಂದ ಬಂದವರು. ಅವರು ತಮ್ಮೊಂದಿಗೆ ವಿಭಿನ್ನ ಸಂಸ್ಕೃತಿಗಳು, ಭಾಷೆಗಳು ಮತ್ತು ಸಂಪ್ರದಾಯಗಳನ್ನು ತಂದರು. ಕಾಲಾನಂತರದಲ್ಲಿ, ಅವರು ಈ ಹೊಸ ಭೂಮಿಯನ್ನು ತಮ್ಮ ಮನೆಯನ್ನಾಗಿ ಮಾಡಿಕೊಂಡರು. ಇಂದು, ಈ ಭಾಷೆಗಳು, ಕಥೆಗಳು ಮತ್ತು ಸಂಪ್ರದಾಯಗಳು ಗಯಾನಾದ ಶ್ರೀಮಂತ ಸಂಸ್ಕೃತಿಯ ಭಾಗವಾಗಿದೆ. ಇಂಡೋ-ಗಯಾನೀಸ್ ಸಮುದಾಯದ ಚೈತನ್ಯವನ್ನು ನಾನು ವಂದಿಸುತ್ತೇನೆ. ನೀವು ಸ್ವಾತಂತ್ರ್ಯ ಮತ್ತು ಪ್ರಜಾಪ್ರಭುತ್ವಕ್ಕಾಗಿ ಹೋರಾಡಿದ್ದೀರಿ. ಗಯಾನಾವನ್ನು ವೇಗವಾಗಿ ಬೆಳೆಯುತ್ತಿರುವ ಆರ್ಥಿಕತೆಗಳಲ್ಲಿ ಒಂದನ್ನಾಗಿ ಮಾಡಲು ನೀವು ಕೆಲಸ ಮಾಡಿದ್ದೀರಿ. ವಿನಮ್ರ ಆರಂಭದಿಂದ ನೀವು ಮೇಲಕ್ಕೆ ಏರಿದ್ದೀರಿ. ಶ್ರೀ ಜಗನ್ ಹೇಳುತ್ತಿದ್ದರು: "ಒಬ್ಬ ವ್ಯಕ್ತಿ ಏನಾಗುತ್ತಾನೆ ಎಂಬುದು ಮುಖ್ಯವಲ್ಲ, ಆದರೆ ಅವರು ಯಾರಾಗಬೇಕೆಂದು ಆಯ್ಕೆ ಮಾಡುತ್ತಾರೆ ಎಂಬುದು ಮುಖ್ಯ." ಅವರು ಈ ಮಾತುಗಳಂತೆ ಬದುಕಿದರು. ಕಾರ್ಮಿಕರ ಕುಟುಂಬದ ಮಗ, ಅವರು ಜಾಗತಿಕ ಮಟ್ಟದ ನಾಯಕರಾದರು. ಅಧ್ಯಕ್ಷ ಇರ್ಫಾನ್ ಅಲಿ, ಉಪಾಧ್ಯಕ್ಷ ಭರತ್ ಜಗದೇವ್, ಮಾಜಿ ಅಧ್ಯಕ್ಷ ಡೊನಾಲ್ಡ್ ರಾಮೋತಾರ್, ಅವರೆಲ್ಲರೂ ಇಂಡೋ-ಗಯಾನೀಸ್ ಸಮುದಾಯದ ರಾಯಭಾರಿಗಳು. ಜೋಸೆಫ್ ರುಹೋಮನ್, ಆರಂಭಿಕ ಇಂಡೋ-ಗಯಾನೀಸ್ ಬುದ್ಧಿಜೀವಿಗಳಲ್ಲಿ ಒಬ್ಬರಾದ ರಾಮಚರಿತರ್ ಲಲ್ಲಾ, ಪ್ರಸಿದ್ಧ ಮಹಿಳಾ ಕವಿ ಶಾನಾ ಯಾರ್ದನ್, ಅಂತಹ ಅನೇಕ ಇಂಡೋ-ಗಯಾನೀಸ್ ಜನರು ಶೈಕ್ಷಣಿಕ ಮತ್ತು ಕಲೆಗಳು, ಸಂಗೀತ ಮತ್ತು ವೈದ್ಯಕೀಯದ ಮೇಲೆ ಪ್ರಭಾವ ಬೀರಿದ್ದಾರೆ.

ಸ್ನೇಹಿತರೇ,

ನಮ್ಮ ಸಾಮಾನ್ಯತೆಗಳು ನಮ್ಮ ಸ್ನೇಹಕ್ಕೆ ಬಲವಾದ ಅಡಿಪಾಯವನ್ನು ಒದಗಿಸುತ್ತವೆ. ನಿರ್ದಿಷ್ಟವಾಗಿ ಮೂರು ವಿಷಯಗಳು ಭಾರತ ಮತ್ತು ಗಯಾನವನ್ನು ಆಳವಾಗಿ ಸಂಪರ್ಕಿಸುತ್ತವೆ. ಸಂಸ್ಕೃತಿ, ಪಾಕಪದ್ಧತಿ ಮತ್ತು ಕ್ರಿಕೆಟ್! ಕೇವಲ ಎರಡು ವಾರಗಳ ಹಿಂದೆ, ನೀವೆಲ್ಲರೂ ದೀಪಾವಳಿಯನ್ನು ಆಚರಿಸಿದ್ದೀರಿ ಎಂದು ನನಗೆ ಖಚಿತವಾಗಿದೆ. ಮತ್ತು ಕೆಲವು ತಿಂಗಳುಗಳಲ್ಲಿ, ಭಾರತ ಹೋಳಿಯನ್ನು ಆಚರಿಸಿದಾಗ, ಗಯಾನ ಫಾಗ್ವಾವನ್ನು ಆಚರಿಸುತ್ತದೆ. ಈ ವರ್ಷ, ರಾಮ್ ಲಲ್ಲಾ 500 ವರ್ಷಗಳ ನಂತರ ಅಯೋಧ್ಯೆಗೆ ಮರಳಿದ್ದರಿಂದ ದೀಪಾವಳಿ ವಿಶೇಷವಾಗಿತ್ತು. ಅಯೋಧ್ಯೆಯಲ್ಲಿ ರಾಮ ಮಂದಿರವನ್ನು ನಿರ್ಮಿಸಲು ಗಯಾನದಿಂದ ಪವಿತ್ರ ನೀರು ಮತ್ತು ಶಿಲಾಗಳನ್ನು ಸಹ ಕಳುಹಿಸಲಾಗಿದೆ ಎಂದು ಭಾರತದ ಜನರು ನೆನಪಿಸಿಕೊಳ್ಳುತ್ತಾರೆ. ಸಾಗರಗಳು ದೂರವಿದ್ದರೂ, ಭಾರತ ಮಾತೆಯೊಂದಿಗಿನ ನಿಮ್ಮ ಸಾಂಸ್ಕೃತಿಕ ಸಂಪರ್ಕವು ಪ್ರಬಲವಾಗಿದೆ. ನಾನು ಇಂದು ಮುಂಜಾನೆ ಆರ್ಯ ಸಮಾಜ ಸ್ಮಾರಕ ಮತ್ತು ಸರಸ್ವತಿ ವಿದ್ಯಾ ನಿಕೇತನ ಶಾಲೆಗೆ ಭೇಟಿ ನೀಡಿದಾಗ ನನಗೆ ಇದು ಅನಿಸಿತು. ಭಾರತ ಮತ್ತು ಗಯಾನ ಎರಡೂ ನಮ್ಮ ಶ್ರೀಮಂತ ಮತ್ತು ವೈವಿಧ್ಯಮಯ ಸಂಸ್ಕೃತಿಯ ಬಗ್ಗೆ ಹೆಮ್ಮೆಪಡುತ್ತವೆ. ವೈವಿಧ್ಯತೆಯನ್ನು ನಾವು ಆಚರಿಸಬೇಕಾದ ವಿಷಯವಾಗಿ ನೋಡುತ್ತೇವೆ, ಕೇವಲ ಅವಕಾಶ ಕಲ್ಪಿಸುವ ವಿಷಯವಲ್ಲ. ನಮ್ಮ ದೇಶಗಳು ಸಾಂಸ್ಕೃತಿಕ ವೈವಿಧ್ಯತೆಯು ನಮ್ಮ ಶಕ್ತಿ ಎಂದು ತೋರಿಸುತ್ತಿವೆ.

ಸ್ನೇಹಿತರೇ,

ಭಾರತದ ಜನರು ಎಲ್ಲಿಗೆ ಹೋದರೂ, ಅವರು ತಮ್ಮೊಂದಿಗೆ ಒಂದು ಪ್ರಮುಖ ವಿಷಯವನ್ನು ತೆಗೆದುಕೊಂಡು ಹೋಗುತ್ತಾರೆ. ಆಹಾರ! ಇಂಡೋ-ಗಯಾನೀಸ್ ಸಮುದಾಯವು ಭಾರತೀಯ ಮತ್ತು ಗಯಾನೀಸ್ ಎರಡೂ ಅಂಶಗಳನ್ನು ಒಳಗೊಂಡಿರುವ ವಿಶಿಷ್ಟ ಆಹಾರ ಸಂಪ್ರದಾಯವನ್ನು ಹೊಂದಿದೆ. ಧಾಲ್ ಪುರಿ ಇಲ್ಲಿ ಜನಪ್ರಿಯವಾಗಿದೆ ಎಂದು ನನಗೆ ತಿಳಿದಿದೆ! ಅಧ್ಯಕ್ಷ ಅಲಿ ಅವರ ಮನೆಯಲ್ಲಿ ನಾನು ಸೇವಿಸಿದ ಏಳು ಕರ್ರಿ ಊಟ ರುಚಿಕರವಾಗಿತ್ತು. ಅದು ನನಗೆ ಬಹುದಿನಗಳ ಕಾಲ ನೆನಪಾಗಿ ಉಳಿಯುತ್ತದೆ.

ಸ್ನೇಹಿತರೇ,

ಕ್ರಿಕೆಟ್ ಮೇಲಿನ ಪ್ರೀತಿ ನಮ್ಮ ರಾಷ್ಟ್ರಗಳನ್ನು ಬಲವಾಗಿ ಬಂಧಿಸುತ್ತದೆ. ಇದು ಕೇವಲ ಕ್ರೀಡೆಯಲ್ಲ. ಇದು ನಮ್ಮ ರಾಷ್ಟ್ರೀಯ ಗುರುತಿನಲ್ಲಿ ಆಳವಾಗಿ ಹುದುಗಿರುವ ಜೀವನ ವಿಧಾನವಾಗಿದೆ. ಗಯಾನದಲ್ಲಿರುವ ಪ್ರಾವಿಡೆನ್ಸ್ ರಾಷ್ಟ್ರೀಯ ಕ್ರಿಕೆಟ್ ಕ್ರೀಡಾಂಗಣವು ನಮ್ಮ ಸ್ನೇಹದ ಸಂಕೇತವಾಗಿ ನಿಂತಿದೆ. ರೋಹನ್‌ ಕನ್ಹಾಯ್‌ , ಕಾಲಿಚರಣ್, ಚಂದ್ರಪಾಲ್ ಎಲ್ಲರೂ ಭಾರತದಲ್ಲಿ ಪ್ರಸಿದ್ಧ ಹೆಸರುಗಳು. ಕ್ಲೈವ್ ಲಾಯ್ಡ್ ಮತ್ತು ಅವರ ತಂಡವು ಅನೇಕ ತಲೆಮಾರುಗಳವರಿಗೆ ನೆಚ್ಚಿನ ತಂಡವಾಗಿದೆ. ಈ ಪ್ರದೇಶದ ಯುವ ಆಟಗಾರರು ಭಾರತದಲ್ಲಿ ಅಪಾರ ಅಭಿಮಾನಿಗಳನ್ನು ಹೊಂದಿದ್ದಾರೆ. ಈ ಶ್ರೇಷ್ಠ ಕ್ರಿಕೆಟಿಗರಲ್ಲಿ ಕೆಲವರು ಇಂದು ನಮ್ಮೊಂದಿಗಿದ್ದಾರೆ. ನಮ್ಮ ಅನೇಕ ಕ್ರಿಕೆಟ್ ಅಭಿಮಾನಿಗಳು ಈ ವರ್ಷ ನೀವು ಆಯೋಜಿಸಿದ್ದ ಟಿ-20 ವಿಶ್ವಕಪ್ ಅನ್ನು ಆನಂದಿಸಿದರು. ಗಯಾನಾದಲ್ಲಿ ನಡೆದ ಪಂದ್ಯದಲ್ಲಿ 'ಟೀಮ್ ಇನ್ ಬ್ಲೂ' ತಂಡಕ್ಕೆ ನೀವು ನೀಡಿದ ಜಯಘೋಷಗಳು ಭಾರತದಲ್ಲಿಯೂ ಕೇಳಿಬರುತ್ತಿದ್ದವು!

ಸ್ನೇಹಿತರೇ,

ಇಂದು ಬೆಳಿಗ್ಗೆ, ಗಯಾನ ಸಂಸತ್ತನ್ನು ಉದ್ದೇಶಿಸಿ ಮಾತನಾಡುವ ಗೌರವ ನನಗೆ ಸಿಕ್ಕಿತು.

ಪ್ರಜಾಪ್ರಭುತ್ವದ ತಾಯಿಯಿಂದ, ಕೆರಿಬಿಯನ್ ಪ್ರದೇಶದ ಅತ್ಯಂತ ರೋಮಾಂಚಕ ಪ್ರಜಾಪ್ರಭುತ್ವಗಳಲ್ಲಿ ಒಂದಾದ ಆಧ್ಯಾತ್ಮಿಕ ಸಂಪರ್ಕವನ್ನು ನಾನು ಅನುಭವಿಸಿದೆ. ನಮ್ಮನ್ನು ಒಟ್ಟಿಗೆ ಬಂಧಿಸುವ ಹಂಚಿಕೆಯ ಇತಿಹಾಸ ನಮಗಿದೆ. ವಸಾಹತುಶಾಹಿ ಆಳ್ವಿಕೆಯ ವಿರುದ್ಧ ಸಾಮಾನ್ಯ ಹೋರಾಟ, ಪ್ರಜಾಪ್ರಭುತ್ವ ಮೌಲ್ಯಗಳ ಮೇಲಿನ ಪ್ರೀತಿ ಮತ್ತು ವೈವಿಧ್ಯತೆಯ ಗೌರವ. ನಾವು ರಚಿಸಲು ಬಯಸುವ ಹಂಚಿಕೆಯ ಭವಿಷ್ಯ ನಮಗಿದೆ. ಬೆಳವಣಿಗೆ ಮತ್ತು ಅಭಿವೃದ್ಧಿಯ ಆಕಾಂಕ್ಷೆಗಳು, ಆರ್ಥಿಕತೆ ಮತ್ತು ಪರಿಸರ ವಿಜ್ಞಾನದ ಕಡೆಗೆ ಬದ್ಧತೆ, ಮತ್ತು ನ್ಯಾಯಯುತ ಮತ್ತು ಎಲ್ಲರನ್ನೂ ಒಳಗೊಂಡ ಕ್ರಮದಲ್ಲಿ ನಂಬಿಕೆ ನಮಗಿದೆ.

ಸ್ನೇಹಿತರೇ,

ಗಯಾನದ ಜನರು ಭಾರತದ ಹಿತೈಷಿಗಳು ಎಂದು ನನಗೆ ತಿಳಿದಿದೆ. ಭಾರತದಲ್ಲಿ ಆಗುತ್ತಿರುವ ಪ್ರಗತಿಯನ್ನು ನೀವು ಸೂಕ್ಷ್ಮವಾಗಿ ಗಮನಿಸುತ್ತಿರಬಹುದು. ಕಳೆದ ದಶಕದಲ್ಲಿ ಭಾರತದ ಪ್ರಯಾಣದ ಪ್ರಮಾಣ, ವೇಗ ಮತ್ತು ಸುಸ್ಥಿರತೆಯಿಂದ ಕೂಡಿದೆ. ಕೇವಲ 10 ವರ್ಷಗಳಲ್ಲಿ, ಭಾರತವು ಹತ್ತನೇ ಅತಿದೊಡ್ಡ ಆರ್ಥಿಕತೆಯಿಂದ ಐದನೇ ಅತಿದೊಡ್ಡ ಆರ್ಥಿಕತೆಗೆ ಬೆಳೆದಿದೆ. ಮತ್ತು, ಶೀಘ್ರದಲ್ಲೇ, ನಾವು ಮೂರನೇ ಅತಿದೊಡ್ಡ ರಾಷ್ಟ್ರವಾಗುತ್ತೇವೆ. ನಮ್ಮ ಯುವಕರು ನಮ್ಮನ್ನು ವಿಶ್ವದ ಮೂರನೇ ಅತಿದೊಡ್ಡ ಸ್ಟಾರ್ಟ್-ಅಪ್ ಪರಿಸರ ವ್ಯವಸ್ಥೆಯನ್ನಾಗಿ ಮಾಡಿದ್ದಾರೆ. ಭಾರತವು ಇ-ಕಾಮರ್ಸ್, ಕೃತಕ ಬುದ್ಧಿಮತ್ತೆ (AI), ಫಿನ್‌ಟೆಕ್, ಕೃಷಿ, ತಂತ್ರಜ್ಞಾನ ಮತ್ತು ಹೆಚ್ಚಿನವುಗಳಿಗೆ ಜಾಗತಿಕ ಕೇಂದ್ರವಾಗಿದೆ. ನಾವು ಮಂಗಳ ಮತ್ತು ಚಂದ್ರನನ್ನು ತಲುಪಿದ್ದೇವೆ. ಹೆದ್ದಾರಿಗಳಿಂದ ಐ-ವೇಗಳವರೆಗೆ (ಇಂಟರ್‌ನೆಟ್‌ ಕೆನೆಕ್ಟಿವಿಟಿ), ವಾಯುಮಾರ್ಗಗಳವರೆಗೆ, ರೈಲ್ವೆಗಳವರೆಗೆ, ನಾವು ಅತ್ಯಾಧುನಿಕ ಮೂಲಸೌಕರ್ಯವನ್ನು ನಿರ್ಮಿಸುತ್ತಿದ್ದೇವೆ. ನಮ್ಮಲ್ಲಿ ಬಲವಾದ ಸೇವಾ ವಲಯವಿದೆ. ಈಗ, ನಾವು ಉತ್ಪಾದನೆಯಲ್ಲಿಯೂ ಬಲಶಾಲಿಯಾಗುತ್ತಿದ್ದೇವೆ. ಭಾರತವು ವಿಶ್ವದ ಎರಡನೇ ಅತಿದೊಡ್ಡ ಮೊಬೈಲ್ ತಯಾರಕ ರಾಷ್ಟ್ರವಾಗಿದೆ.

ಸ್ನೇಹಿತರೇ,

ಭಾರತದ ಬೆಳವಣಿಗೆಯು ಸ್ಪೂರ್ತಿದಾಯಕವಾಗಿದೆ ಮಾತ್ರವಲ್ಲದೆ ಎಲ್ಲರನ್ನೂ ಒಳಗೊಳ್ಳುವಂತಿದೆ. ನಮ್ಮ ಡಿಜಿಟಲ್ ಸಾರ್ವಜನಿಕ ಮೂಲಸೌಕರ್ಯವು ಬಡವರನ್ನು ಸಬಲೀಕರಣಗೊಳಿಸುತ್ತಿದೆ. ನಾವು ಜನರಿಗಾಗಿ 500 ಮಿಲಿಯನ್‌ಗಿಂತಲೂ ಹೆಚ್ಚು ಬ್ಯಾಂಕ್ ಖಾತೆಗಳನ್ನು ತೆರೆದಿದ್ದೇವೆ. ನಾವು ಈ ಬ್ಯಾಂಕ್ ಖಾತೆಗಳನ್ನು ಡಿಜಿಟಲ್ ಗುರುತು ಮತ್ತು ಮೊಬೈಲ್‌ಗಳೊಂದಿಗೆ ಸಂಪರ್ಕಿಸಿದ್ದೇವೆ. ಇದರಿಂದಾಗಿ, ಜನರು ನೇರವಾಗಿ ತಮ್ಮ ಬ್ಯಾಂಕ್ ಖಾತೆಗಳಲ್ಲಿ ಸಹಾಯವನ್ನು ಪಡೆಯುತ್ತಾರೆ. ಆಯುಷ್ಮಾನ್ ಭಾರತ್ ವಿಶ್ವದ ಅತಿದೊಡ್ಡ ಉಚಿತ ಆರೋಗ್ಯ ವಿಮಾ ಯೋಜನೆಯಾಗಿದೆ. ಇದು 500 ಮಿಲಿಯನ್‌ಗಿಂತಲೂ ಹೆಚ್ಚು ಜನರಿಗೆ ಪ್ರಯೋಜನವನ್ನು ನೀಡುತ್ತಿದೆ. ಅಗತ್ಯವಿರುವವರಿಗೆ ನಾವು 30 ಮಿಲಿಯನ್‌ಗಿಂತಲೂ ಹೆಚ್ಚು ಮನೆಗಳನ್ನು ನಿರ್ಮಿಸಿದ್ದೇವೆ. ಕೇವಲ ಒಂದು ದಶಕದಲ್ಲಿ, ನಾವು 250 ಮಿಲಿಯನ್ ಜನರನ್ನು ಬಡತನದಿಂದ ಹೊರತಂದಿದ್ದೇವೆ. ನಮ್ಮ ಉಪಕ್ರಮಗಳು ಮಹಿಳೆಯರಿಗೆ ಹೆಚ್ಚಿನ ಪ್ರಯೋಜನವನ್ನು ನೀಡಿವೆ. ಲಕ್ಷಾಂತರ ಮಹಿಳೆಯರು ತಳಮಟ್ಟದ ಉದ್ಯಮಿಗಳಾಗುತ್ತಿದ್ದಾರೆ, ಉದ್ಯೋಗಗಳು ಮತ್ತು ಅವಕಾಶಗಳನ್ನು ಸೃಷ್ಟಿಸುತ್ತಿದ್ದಾರೆ.

ಸ್ನೇಹಿತರೇ,

ಈ ಎಲ್ಲಾ ಬೃಹತ್ ಬೆಳವಣಿಗೆ ನಡೆಯುತ್ತಿರುವಾಗ, ನಾವು ಸುಸ್ಥಿರತೆಯ ಮೇಲೆಯೂ ಗಮನ ಹರಿಸಿದ್ದೇವೆ. ಕೇವಲ ಒಂದು ದಶಕದಲ್ಲಿ, ನಮ್ಮ ಸೌರಶಕ್ತಿ ಸಾಮರ್ಥ್ಯವು 30 ಪಟ್ಟು ಹೆಚ್ಚಾಗಿದೆ! ನೀವು ಊಹಿಸಬಲ್ಲಿರಾ? ಪೆಟ್ರೋಲ್‌ನಲ್ಲಿ 20 ಪ್ರತಿಶತ ಎಥೆನಾಲ್ ಮಿಶ್ರಣದೊಂದಿಗೆ ನಾವು ಹಸಿರು ಚಲನಶೀಲತೆಯತ್ತ ಸಾಗಿದ್ದೇವೆ. ಅಂತರರಾಷ್ಟ್ರೀಯ ಮಟ್ಟದಲ್ಲಿಯೂ ಸಹ, ಹವಾಮಾನ ಬದಲಾವಣೆಯನ್ನು ಎದುರಿಸಲು ನಾವು ಅನೇಕ ಉಪಕ್ರಮಗಳಲ್ಲಿ ಕೇಂದ್ರ ಪಾತ್ರ ವಹಿಸಿದ್ದೇವೆ. ಅಂತರರಾಷ್ಟ್ರೀಯ ಸೌರ ಒಕ್ಕೂಟ, ಜಾಗತಿಕ ಜೈವಿಕ ಇಂಧನಗಳ ಒಕ್ಕೂಟ, ವಿಪತ್ತು ಸ್ಥಿತಿಸ್ಥಾಪಕ ಮೂಲಸೌಕರ್ಯಕ್ಕಾಗಿ ಒಕ್ಕೂಟ, ಈ ಉಪಕ್ರಮಗಳಲ್ಲಿ ಹಲವು ಜಾಗತಿಕ ದಕ್ಷಿಣವನ್ನು ಸಬಲೀಕರಣಗೊಳಿಸುವತ್ತ ವಿಶೇಷ ಗಮನ ಹರಿಸಿವೆ. ನಾವು ಅಂತರರಾಷ್ಟ್ರೀಯ ಬಿಗ್ ಕ್ಯಾಟ್ ಒಕ್ಕೂಟವನ್ನು ಸಹ ಬೆಂಬಲಿಸಿದ್ದೇವೆ. ಗಯಾನಾ, ಅದರ ಭವ್ಯವಾದ ಜಾಗ್ವಾರ್‌ಗಳೊಂದಿಗೆ, ಸಹ ಇದರಿಂದ ಪ್ರಯೋಜನ ಪಡೆಯಲಿದೆ.

ಸ್ನೇಹಿತರೇ,

ಕಳೆದ ವರ್ಷ, ನಾವು ಅಧ್ಯಕ್ಷ ಇರ್ಫಾನ್ ಅಲಿ ಅವರನ್ನು ಪ್ರವಾಸಿ ಭಾರತೀಯ ದಿವಸ್‌ನ ಮುಖ್ಯ ಅತಿಥಿಯಾಗಿ ಆಹ್ವಾನಿಸಿದ್ದೆವು. ನಾವು ಭಾರತದಲ್ಲಿ ಪ್ರಧಾನಿ ಮಾರ್ಕ್ ಫಿಲಿಪ್ಸ್ ಮತ್ತು ಉಪಾಧ್ಯಕ್ಷ ಭರತ್ ಜಗದೇವ್ ಅವರಿಗೆ ಆತಿಥ್ಯ ನೀಡಿದ್ದೇವೆ. ಒಟ್ಟಾಗಿ, ನಾವು ಅನೇಕ ಕ್ಷೇತ್ರಗಳಲ್ಲಿ ದ್ವಿಪಕ್ಷೀಯ ಸಹಕಾರವನ್ನು ಬಲಪಡಿಸಲು ಕೆಲಸ ಮಾಡಿದ್ದೇವೆ. ಇಂದು, ನಮ್ಮ ಸಹಯೋಗದ ವ್ಯಾಪ್ತಿಯನ್ನು ವಿಸ್ತರಿಸಲು ನಾವು ಮುಂದಾಗಿದ್ದೇವೆ- ಶಕ್ತಿಯಿಂದ ಉದ್ಯಮಕ್ಕೆ, ಆಯುರ್ವೇದದಿಂದ ಕೃಷಿಗೆ, ಮೂಲಸೌಕರ್ಯದಿಂದ ನಾವೀನ್ಯತೆಗೆ, ಆರೋಗ್ಯ ರಕ್ಷಣೆಯಿಂದ ಮಾನವ ಸಂಪನ್ಮೂಲಗಳಿಗೆ ಮತ್ತು ದತ್ತಾಂಶದಿಂದ ಅಭಿವೃದ್ಧಿಯವರೆಗೆ. ನಮ್ಮ ಪಾಲುದಾರಿಕೆಯು ವಿಶಾಲ ಪ್ರದೇಶಕ್ಕೆ ಗಮನಾರ್ಹ ಮೌಲ್ಯವನ್ನು ಹೊಂದಿದೆ. ನಿನ್ನೆ ನಡೆದ ಎರಡನೇ ಭಾರತ-CARICOM ಶೃಂಗಸಭೆಯು ಅದಕ್ಕೆ ಸಾಕ್ಷಿಯಾಗಿದೆ. ವಿಶ್ವಸಂಸ್ಥೆಯ ಸದಸ್ಯರಾಗಿ, ನಾವಿಬ್ಬರೂ ಸುಧಾರಿತ ಬಹುಪಕ್ಷೀಯತೆಯನ್ನು ನಂಬುತ್ತೇವೆ. ಅಭಿವೃದ್ಧಿಶೀಲ ರಾಷ್ಟ್ರಗಳಾಗಿ, ನಾವು ಜಾಗತಿಕ ದಕ್ಷಿಣದ ಶಕ್ತಿಯನ್ನು ಅರ್ಥಮಾಡಿಕೊಂಡಿದ್ದೇವೆ. ನಾವು ಕಾರ್ಯತಂತ್ರದ ಸ್ವಾಯತ್ತತೆಯನ್ನು ಬಯಸುತ್ತೇವೆ ಮತ್ತು ಸಮಗ್ರ ಅಭಿವೃದ್ಧಿಯನ್ನು ಬೆಂಬಲಿಸುತ್ತೇವೆ. ನಾವು ಸುಸ್ಥಿರ ಅಭಿವೃದ್ಧಿ ಮತ್ತು ಹವಾಮಾನ ನ್ಯಾಯಕ್ಕೆ ಆದ್ಯತೆ ನೀಡುತ್ತೇವೆ. ಮತ್ತು, ಜಾಗತಿಕ ಬಿಕ್ಕಟ್ಟುಗಳನ್ನು ಪರಿಹರಿಸಲು ಸಂವಾದ ಮತ್ತು ರಾಜತಾಂತ್ರಿಕತೆಗೆ ನಾವು ಕರೆ ನೀಡುತ್ತಲೇ ಇದ್ದೇವೆ.

ಸ್ನೇಹಿತರೇ,

ನಾನು ಯಾವಾಗಲೂ ನಮ್ಮ ವಲಸೆಗಾರರನ್ನು ರಾಷ್ಟ್ರದೂತರು ಎಂದು ಕರೆಯುತ್ತೇನೆ. ರಾಯಭಾರಿ ಎಂದರೆ ರಾಜದೂತ, ಆದರೆ ನನಗೆ ನೀವೆಲ್ಲರೂ ರಾಷ್ಟ್ರದೂತರು. ಭಾರತೀಯ ಸಂಸ್ಕೃತಿ ಮತ್ತು ಮೌಲ್ಯಗಳ ರಾಯಭಾರಿಗಳು. ಯಾವುದೇ ಲೌಕಿಕ ಆನಂದವು ತಾಯಿಯ ಮಡಿಲಿನ ಸೌಕರ್ಯಕ್ಕೆ ಹೋಲಿಸಲಾಗುವುದಿಲ್ಲ ಎಂದು ಹೇಳಲಾಗುತ್ತದೆ. ನೀವು, ಇಂಡೋ-ಗಯಾನೀಸ್ ಸಮುದಾಯ, ದುಪ್ಪಟ್ಟು ಆಶೀರ್ವಾದ ಪಡೆದಿದ್ದೀರಿ. ನೀವು ಗಯಾನವನ್ನು ನಿಮ್ಮ ತಾಯಿನಾಡು ಮತ್ತು ಭಾರತ ಮಾತೆಯನ್ನು ನಿಮ್ಮ ಪೂರ್ವಜರ ಭೂಮಿಯಾಗಿ ಹೊಂದಿದ್ದೀರಿ. ಇಂದು, ಭಾರತವು ಅವಕಾಶಗಳ ಭೂಮಿಯಾಗಿರುವಾಗ, ನಿಮ್ಮಲ್ಲಿ ಪ್ರತಿಯೊಬ್ಬರೂ ನಮ್ಮ ಎರಡು ದೇಶಗಳನ್ನು ಸಂಪರ್ಕಿಸುವಲ್ಲಿ ದೊಡ್ಡ ಪಾತ್ರವನ್ನು ವಹಿಸಬಹುದು.

ಸ್ನೇಹಿತರೇ,

ಭಾರತ್ ಕೋ ಜಾನಿಯೇ ರಸಪ್ರಶ್ನೆಯನ್ನು ಪ್ರಾರಂಭಿಸಲಾಗಿದೆ. ಇದರಲ್ಲಿ ಭಾಗವಹಿಸಲು ನಾನು ನಿಮ್ಮನ್ನು ಆಹ್ವಾನಿಸುತ್ತೇನೆ. ಗಯಾನದ ನಿಮ್ಮ ಸ್ನೇಹಿತರನ್ನು ಸಹ ಪ್ರೋತ್ಸಾಹಿಸಿ. ಭಾರತ, ಅದರ ಮೌಲ್ಯಗಳು, ಸಂಸ್ಕೃತಿ ಮತ್ತು ವೈವಿಧ್ಯತೆಯನ್ನು ಅರ್ಥಮಾಡಿಕೊಳ್ಳಲು ಇದು ಒಂದು ಉತ್ತಮ ಅವಕಾಶವಾಗಿರುತ್ತದೆ.

ಸ್ನೇಹಿತರೇ,

ಮುಂದಿನ ವರ್ಷ, ಜನವರಿ 13 ರಿಂದ ಫೆಬ್ರವರಿ 26 ರವರೆಗೆ, ಪ್ರಯಾಗರಾಜ್‌ನಲ್ಲಿ ಮಹಾ ಕುಂಭ ಮೇಳ ನಡೆಯಲಿದೆ. ಕುಟುಂಬಗಳು ಮತ್ತು ಸ್ನೇಹಿತರೊಂದಿಗೆ ಈ ಕೂಟದಲ್ಲಿ ಭಾಗವಹಿಸಲು ನಾನು ನಿಮ್ಮನ್ನು ಆಹ್ವಾನಿಸುತ್ತೇನೆ. ನೀವು ಅನೇಕರು ನಿಮ್ಮ ಬಸ್ತಿ ಅಥವಾ ಗೊಂಡಾಗೆ ಪ್ರಯಾಣಿಸಬಹುದು. ನೀವು ಅಯೋಧ್ಯೆಯ ರಾಮ ದೇವಾಲಯಕ್ಕೂ ಭೇಟಿ ನೀಡಬಹುದು. ಇನ್ನೊಂದು ಆಹ್ವಾನವಿದೆ. ಜನವರಿಯಲ್ಲಿ ಭುವನೇಶ್ವರದಲ್ಲಿ ನಡೆಯಲಿರುವ ಪ್ರವಾಸಿ ಭಾರತೀಯ ದಿವಸ್‌ದಲ್ಲಿ ಭಾಗವಹಿಸಬೇಕು.. ನೀವು ಬಂದರೆ, ಪುರಿಯಲ್ಲಿ ಮಹಾಪ್ರಭು ಜಗನ್ನಾಥನ ಆಶೀರ್ವಾದವನ್ನು ಸಹ ಪಡೆಯಬಹುದು. ನಿಮ್ಮಲ್ಲಿ ಅನೇಕರನ್ನು ಶೀಘ್ರದಲ್ಲೇ ಭಾರತದಲ್ಲಿ ನೋಡಬೇಕೆಂದು ನಾನು ಭಾವಿಸುತ್ತೇನೆ. ಮತ್ತೊಮ್ಮೆ, ನೀವು ನನಗೆ ತೋರಿಸಿದ ಪ್ರೀತಿ ಮತ್ತು ವಾತ್ಸಲ್ಯಕ್ಕಾಗಿ ನಿಮ್ಮೆಲ್ಲರಿಗೂ ಧನ್ಯವಾದಗಳು.

ಧನ್ಯವಾದಗಳು.

ತುಂಬಾ ಧನ್ಯವಾದಗಳು.

ಮತ್ತು ನನ್ನ ಸ್ನೇಹಿತ ಅಲಿಗೆ ವಿಶೇಷ ಧನ್ಯವಾದಗಳು. ಧನ್ಯವಾದಗಳು

****