مرکزی وزیر داخلہ اور کوآپریٹیو  کے وزیر جناب امت شاہ نے آج چھتیس گڑھ  کے جگدل پور میں منعقدہ بستر دسہرہ فیسٹیول سے خطاب کیا۔ اس سے پہلے جناب امت شاہ نے مشہور دنتیشوری مندر کا دورہ کیا اور پوجا کی۔ بستر دسہرہ فیسٹیول میں چھتیس گڑھ کے وزیر اعلی جناب  وشنو دیو سائی اور نائب وزیر اعلیٰ ڈاکٹر وجے شرما سمیت کئی معززین موجود تھے۔

اپنے خطاب میں مرکزی وزیر داخلہ جناب امت شاہ نے کہا کہ دنیا کا سب سے بڑا اور منفرد بستر دسہرہ تہوار، جو 75 دنوں تک جاری رہتا ہے، نہ صرف قبائلی برادری، بستر، چھتیس گڑھ یا ہندوستان، بلکہ پوری دنیا کا سب سے بڑا ثقافتی تہوار ہے۔ جناب شاہ نے کہا کہ آج ماں دنتیشوری کے درشن اور پوجا کے دوران، انہوں نے ہماری سیکورٹی فورسز کی طاقت کے لیے دعا کی تاکہ وہ 31 مارچ 2026 تک بستر خطے کو نکسلی تشدد  سے آزاد کر سکیں۔ جناب شاہ نے کہا کہ برسوں سے کچھ لوگ یہ غلط فہمی  پھیلا رہے ہیں کہ نکسل ازم ترقی کی لڑائی ہے، لیکن پورا بستر ترقی سے محروم ہے، اور نکسل ازم ہی اس کی جڑ ہے۔ انہوں نے کہا کہ آج ملک کے ہر گاؤں میں بجلی، پینے کا پانی، سڑکیں، ہر گھر میں بیت الخلاء، 5 لاکھ روپے تک کا ہیلتھ انشورنس، پانچ کلو گرام مفت اناج، اور 3100 روپے فی کوئنٹل کے حساب سے چاول کی خریداری ہے۔ تاہم، بستر ترقی کی اس دوڑ میں پیچھے رہ گیا ہے۔

وزیر داخلہ نے کہا کہ وہ وزیر اعظم جناب نریندر مودی کی طرف سے یہ یقین دلانا چاہتے ہیں کہ 31 مارچ 2026 کے بعد نکسلائیٹس بستر کی ترقی یا اس کے لوگوں کے حقوق میں رکاوٹ نہیں ڈال سکیں گے۔ جناب شاہ نے کہا کہ بستر خطہ کے بچے جو بھٹک کر نکسلزم میں شامل ہو گئے ہیں وہ مقامی دیہات سے ہیں۔ جناب شاہ نے بستر کے لوگوں سے اپیل کی کہ وہ ان گمراہ بچوں کو اپنے ہتھیار چھوڑنے اور قومی دھارے میں شامل ہونے کے لیے راضی کریں، تاکہ وہ بستر کی ترقی میں حصہ لے سکیں۔

مرکزی وزیر داخلہ نے کہا کہ چھتیس گڑھ حکومت نے ملک میں سب سے بہترین ہتھیار ڈالنے کی پالیسی تیار کی ہے۔ صرف گزشتہ ایک ماہ میں 500 سے زائد افراد ہتھیار ڈال چکے ہیں۔ انہوں نے نکسلیوں سے ہتھیار ڈالنے کی اپیل کی۔ جناب  شاہ نے کہا کہ کسی بھی گاؤں میں جہاں نکسل ازم کا مکمل خاتمہ ہو گیا ہے، چھتیس گڑھ حکومت گاؤں کی ترقی کے لیے 1 کروڑ روپے فراہم کرے گی۔ جناب  شاہ نے کہا کہ نکسل ازم سے کسی کو فائدہ نہیں ہوا ہے اور یہ مسئلہ اب کافی حد تک کم ہو گیا ہے۔

جناب  امت شاہ نے کہا کہ مرکزی حکومت اور چھتیس گڑھ حکومت بستر سمیت تمام نکسل متاثرہ علاقوں کی ترقی کے لیے پوری طرح پابند عہد ہے اور اس مقصد کے لیے پرکشش پالیسیاں بنائی گئی ہیں۔ وزیر اعظم مودی نے گزشتہ 10 سالوں میں چھتیس گڑھ کی ترقی کے لیے تقریباً 440,000 کروڑ روپے فراہم کیے ہیں۔ چھتیس گڑھ کی ترقی تیز رفتاری سے جاری ہے۔ انہوں نے کہا کہ صنعتیں لگ رہی ہیں، تعلیمی ادارے بن رہے ہیں، صحت کے ادارے تیار ہو رہے ہیں۔ اس کے علاوہ ہماری چھوٹی صنعتوں کو بھی فروغ دیا جا رہا ہے۔

مرکزی وزیر داخلہ نے کہا کہ ہم نے ایک بہت پرکشش ہتھیار ڈالنے کی پالیسی بنائی ہے۔ انہوں نے نکسلیوں سے ہتھیار ڈالنے کی اپیل کی۔ جناب  شاہ نے یہ بھی انتباہ دیا کہ اگر ہتھیاروں کے ذریعہ بستر کے امن کو خراب کرنے کی کوئی کوشش کی گئی تو ہماری مسلح افواج، سی آر پی ایف اور چھتیس گڑھ پولیس مشترکہ طور پر جواب دیں گے۔ انہوں نے کہا کہ 31 مارچ 2026 ملک سے نکسل ازم کے مکمل خاتمے کی تاریخ مقرر ہے۔

جناب  امت شاہ نے کہا کہ اس سال بستر اولمپکس میں ملک بھر کے قبائلی حصہ لیں گے۔ انہوں نے کہا کہ بستر کا پنڈم میلہ، کھانا، لباس، فن اور موسیقی کے آلات نہ صرف بستر بلکہ پوری دنیا میں توجہ کا مرکز بن گئے ہیں۔ وزیر اعظم مودی کا عزم اس بات کو یقینی بنانا ہے کہ ہماری ثقافت، زبان، خوراک، لباس، اور موسیقی کے آلات صدیوں تک محفوظ رہیں، نہ صرف ہندوستان بلکہ پوری دنیا میں۔ چھتیس گڑھ حکومت اور حکومت ہند اس عزم کو پورا کرنے کے لیے پرعزم ہیں۔

مرکزی وزیر داخلہ نے کہا کہ 1874 سے لے کر آج تک بستر میں مریہ دربار کی فعال شرکت، عدالتی نظام، قبائلی ثقافت کے تحفظ پر توجہ اور عوامی مکالمے کی تاریخی روایت عالمی وراثت سے کم نہیں۔ انہوں نے کہا کہ مریہ دربار پورے ملک کے لیے تحریک اور علم کا ذریعہ ہے۔

سودیشی جاگرن منچ کے زیر اہتمام سودیشی میلے کا ذکر کرتے ہوئے جناب امت شاہ نے کہا کہ وزیر اعظم جناب نریندر مودی نے طویل عرصے سے سودیشی پر زور دیا ہے۔ سودیشی جاگرن منچ کئی سالوں سے سودیشی کو ایک عوامی تحریک کے طور پر فروغ دے رہا ہے۔ اب مودی نے سب سے یہ عہد کرنے کی اپیل کی ہے کہ ہر گھر میں صرف ملک میں بنی مصنوعات ہی استعمال کی جائیں گی۔ انہوں نے کہا کہ ہر تاجر کو یہ عہد کرنا چاہیے کہ ان کی دکانوں یا شاپنگ مالز میں غیر ملکی اشیاء دستیاب نہیں ہوں گی۔ جناب شاہ نے کہا کہ اگر 1.4 بلین آبادی اس سودیشی عہد کو اپنا لیتی ہے تو ہندوستان کو دنیا کی سرکردہ اقتصادی طاقت بننے سے کوئی نہیں روک سکتا۔

مرکزی وزیر داخلہ نے کہا کہ مودی جی نے حال ہی میں چھتیس گڑھ سمیت ملک بھر کی ماؤں اور بہنوں کو 395 اشیاء پر جی ایس ٹی میں خاطر خواہ چھوٹ دے کر اہم راحت فراہم کی ہے۔ کھانے پینے کی تقریباً تمام اشیاء کو ٹیکس سے مستثنیٰ قرار دیا گیا ہے اور روزمرہ کی اشیاء پر صرف پانچ فیصد ٹیکس لگایا گیا ہے۔ انہوں نے کہا کہ ملک نے ٹیکس میں اتنی نمایاں کمی کبھی نہیں دیکھی جتنی مودی جی نے کی ہے۔ مزید برآں، اگر ہم سودیشی کی اقدار کو اپناتے ہیں، تو ہمارے ملک کی معیشت کو بے مثال رفتار ملے گی۔ مسٹر شاہ نے بتایا کہ بستر دسہرہ فیسٹیول میں 300 سے زیادہ مقامی کمپنیاں حصہ لے رہی ہیں۔ انہوں نے کہا کہ سودیشی واک کاتھون سودیشی جذبے کو ایک نئی شناخت دینے کا ایک موثر ذریعہ بن گیا ہے۔ آج ملک بھر میں منعقد ہونے والے سودیشی میلوں کے ذریعے سودیشی تحریک مزید زور پکڑ رہی ہے۔

جناب امت شاہ نے کہا کہ بستر کا 75 روزہ دسہرہ، جو شراون اماوسیہ سے اشون شکلا تریوداشی تک چلتا ہے، ہم سب کے لیے فخر، شناخت اور اعزاز کی بات ہے۔ انہوں نے مزید کہا کہ 14ویں صدی میں شروع ہونے والی رتھ یاترا نے پورے خطے میں ثقافتی بیداری کا آغاز کیا۔ جناب شاہ نے کہا کہ 66 قبائلی اور بہت سے غیر قبائلی گروہ ماں دنتیشوری کی رتھ یاترا میں حصہ لیتے ہیں۔ جناب شاہ نے کہا کہ بستر دسہرہ اور موریہ دربار قبائلیوں کو متحد کرتے ہیں اور پورے بستر کو ایک ساتھ باندھتے ہیں۔

مرکزی وزیر داخلہ نے کہا کہ مودی حکومت نے قبائلیوں کے اعزاز میں متعدد اسکیمیں شروع کی ہیں۔ وزیر اعظم مودی نے قبائلی برادری کی بیٹی محترمہ  دروپدی مرمو کو پہلی بار ملک کے اعلیٰ ترین عہدے پر تعینات کر کے ایک قابل فخر کام کیا ہے۔ انہوں نے کہا کہ جب محترمہ دروپدی مرمو دنیا بھر کے سربراہان مملکت سے ملتی ہیں تو نہ صرف قبائلی برادری بلکہ ہم سب کا دل فخر سے بھر جاتا ہے۔ یہ ہم سب کے لیے فخر کی بات ہے کہ اڈیشہ کے ایک غریب گھرانے کی بیٹی کو جمہوریت میں اعلیٰ مقام پر فائز کیا گیا ہے۔ جناب شاہ نے کہا کہ مودی جی نے لارڈ برسا منڈا کے 150ویں یوم پیدائش کو قبائلی فخر سال کے طور پر منانے کا فیصلہ کیا۔ ان کی یوم پیدائش کو قبائلی فخر کے دن کے طور پر قائم کیا گیا۔ وزیر اعظم مودی جی نے بستر ڈویژن کے ساتوں اضلاع میں نکسلزم کے سامنے ہتھیار ڈالنے والوں اور نکسل تشدد میں ہلاک ہونے والوں کے اہل خانہ کے لیے 15,000 سے زیادہ پی ایم شہری آواس کو بھی منظوری دی ہے۔

جناب امت شاہ نے کہا کہ نارائن پور ضلع کے پانڈی رام مانڈاوی اور ہیم چند مانجھی اور کانکیر کے اجے کمار مانڈاوی کو پدم ایوارڈ سے نوازا گیا ہے۔ انہوں نے کہا کہ بستر دسہرہ کے تہوار کے موقع پر 'مہاتاری وندن یوجنا' کی 20ویں قسط کے طور پر 70 لاکھ چھتیس گڑھی ماؤں میں 607 کروڑ روپے تقسیم کیے گئے۔ چیف منسٹر رورل بس اسکیم کا آغاز کیا گیا ہے۔ اس اسکیم کو بستر اور سرگوجا ڈویژن میں لاگو کیا گیا ہے اور اس کے تحت 250 گاؤں کا احاطہ کیا گیا ہے۔

٭٭٭٭٭٭٭

ش ح۔ ف خ ۔ ت ع

U.No: 7071