খুরুমজরি!

মীয়াম পুম্নমক চোকথরম্লগনি, অরনাবকী অহৌবা খোঞ্জেল তাবদা অদোমগী নাকোংশিং ৱারম্লগনি, অরনাব ফম্বীরো, হৌজিক মীখল মতম য়ৌদ্রি। অহানবদা, অনৌবা চাংয়েং অসিগীদমক ঐনা রিপব্লিক তি.ভি থাগৎচরি। অসিগুম্বা অচৌবা চাংদম্নবা অমা শীন্দুনা অদোম্না নহারোলশিং শরুক য়াহল্লে। লৈবাক অসিগী নহারোলশিং লৈবাক্কী খন্ন-নৈনবা শরুক য়াবা মতমদা, মসিনা অনৌবা থৌনানা পীক থনহল্লে অমসুং মসিগী থৌনা অসি ঐখোয়না মফম অসিদা ফংলে। অমরোমদা, নহারোলশিং শরুক য়াবা মতমদা, ফংবা ঙম্লোইদবা পান্দম অমতা লৈতে। য়ৌবা ঙম্লোইদবা পন্থুং অমতা লৈতে। সম্মিৎ অসিদা অনৌবা ৱাখল্লোন অমদা রিপব্লিক তি.ভিনা থবক পায়খৎলে। সম্মিৎ অসি মাইপাক্নবা ঐনা মীয়াম পুম্নমক্ত য়াইফ পাউজেল পীজরি, ঐনা অদোম তরাম্না ওকচরি। হৌখিবা নুমিৎ খরনি অসিদা ঐনা খনখি মদুদি ঐনা লৈবাক অসিগী নহারোল লাখ ১ রাজনিতি য়াওহনগনি অমসুং অসিগুম্বা নহারোল লাখ ১ অসি মখোয়গী ইমুংশিংগী অহানবা রাজনিতি য়াওবা মীওইশিং ওইগদবনি। অসিগুম্বা থৌরম অসি ঐগী পান্দম অসিগী শেম-শাবনি।  অনিশুবদা, ঐগী লনাই কান্নবনি, লনাই কান্নবা অদুদি ২০২৯ দা ভোৎ থাদগদৌরিবা মীওইশিং অদুনা ২০১৪ গী মমাঙদা পাউ-চেশিংগী হেদলাইনশিং করি ওইরম্বগে হায়বা খঙদে, মতম অদুদা লুপা করোর লাখ কয়াগী স্কামশিং লৈখি, মখোয়না মদু খঙদে অমসুং ২০২৯ দা মখোয় ভোৎ থাদবা থোক্লক্কনি, মখোয়গী মমাঙদা চাংদম্ননবা করিগুম্বা অমতা লৈতে অমসুং মরম অদুনা, মদুগী থবক অদু ঙসিগী থৌরম অসিনা শেমগৎকনি হায়না ঐনা মপুংফানা থাজবা থম্লি।

মরুপশিং,

ঙসি মালেম শীনবা থুংবনা, হৌজিক অসি ভারতকী চহিচানি হায়রিবা অসি অদোম তারম্লোই। ভারতকী মাইপাকপশিংনা মালেম শীনবা থুংনা অনৌবা থাজবা অমা পীরে। ভারত মশা মথন্থতা লুপচখ্রগনি অমসুং লৈবাক অসিনা ঐখোয় লুপহনগনি হায়না ঙাংনখি, অদুবু ঙসিদি ভারতনা মালেমগী চাউখৎপা লমজিংলে। ভারতকী তুংগী ফিবম করিনো হায়বা, ঙসিগী ঐখোয়গী থবক অমসুং মাইপাকপশিংদগী ঐখোয় খঙলে। নিংতম্লবা মতুং চহি ৬৫ গী মতুংদা ফাওবা, ভারত মালেমদা  ১১শুবা খ্বাইদগী চাউবা ইকোনোমি ওইখি। হৌখিবা চহি ১০ দা, ঐখোয় মালেমদা ৫ শুবা খ্বাইদগী চাউবা ইকোনোমি ওইরে অমসুং হৌজিক মালেমদা ৩শুবা খ্বাইদগী চাউবা ইকোনোমি ওইরগনি।

মরুপশিং,

চহি ১৮ গী মমাঙদা করি ওইরম্বগে হায়বা ঐ হায়জগে। চহি ১৮ গী মমাঙ হায়বগী মরমদি চহি ১৮ মপুংফাদুনা অহানবা ওইনা ভোৎ থাদগদৌরিবা নহারোলশিংনা, চহি ১৮ গী মমাংগী মরমদা করি অমতা খঙলরোই, মরম অদুনা ঐনা মশিং অসি লৌখৎলিবনি। চহি ১৮ গী মমাঙদা হায়বদি ২০০৭ দা ভারতকী জি.দি.পি দোল্লার ত্রিল্লিয়ন ১ ওইখি। হায়বদি মতম অদুদা ভারতকী শেন-থুমগী থবক অসি চহি অমদা দোল্লার ত্রিল্লিয়ন অমনি হায়বনি।

হৌজিক করি ওইরবগে হায়বা য়েংউ? হৌজিক থা অহুম খক্তদা দোল্লার ত্রিল্লিয়ন অমগী শেন-থুমগী থবক পাংথোক্লে। মসিনা করি তাক্লি? চহি ১৮ গী মমাঙদা চহি অমদা ভারত্ত লৈখিবা শেন-থুমগী থবকশিং অসি হৌজিক থা অহুমদা পাংথোক্লে। ঙসিগী ভারত কয়া য়াম্না য়াংনা চাউখৎলবগে হায়বা মসিনা তাক্লে। হৌখিবা চহি ১০ দা কয়া য়াম্বা অহোংবশিং লাক্লবগে হায়বা অমসুং কমদৌনা ফলশিং ফংবগে হায়বগী মতাংদা ঐনা খুদম খর পীগনি। হৌখিবা চহি ১০ দা ঐখোয়না মীওই করোর ২৫ লায়রবা কোকহনখ্রে। মশিং অসি লৈবাক কয়াগী অপুনবা মীশিংদগী হেল্লবনি। করিগুম্বা লুপা ১ থাদবা মতমদা, লায়রবশিংদা শুপ্নগী পৈশা ১৫ খক য়ৌই হায়না প্রধান মন্ত্রী মশামক্না ফোঙদোকখিবা, মতম অদুগী সরকারনা য়াজখিবা অদু অদোম নিংশিংলমগনি। কনানা পৈশা ৮৫ অদু চাথোকখিবগে। হৌখিবা চহি ১০ দা, দি.বি.তিগী খুৎথাংদা লায়রবগী একাউন্তশিংদা লুপা করোর লাখ ৪২ ফংহনখ্রে। করিগুম্বা অদোম্না লুপা অমদগী পৈশা ১৫ কক্লবদি, মতম অদুদা লুপা করোর লাখ ৪২ গী লুপা কয়া ফংগনি? ঙসিদি, দিল্লিদগী লুপা ১ থাদখিবগা পৈশা ১০০ ফংলে।

মরুপশিং,

হৌখিবা চহি ১০ গী মমাংদা, সোলার ইনর্জিগী লমদা মালেমগী ওইনা ভারত তোঙানবা ফিবম অমদা লৈরমখি। অদুবু ঙসিদি, মালেমদা সোলার ইনর্জি পুথোকপা ঙম্বা মকোক থোংবা লৈবাক ৫ গী মনুংদা ভারত য়াওরে। ঐখোয়না সোলার ইনর্জি পুথোকপা ঙম্বা শরুক ৩০ হেনগৎলে। সোলার মোদুল শাবসু শরুক ৩০ হেনগৎলে। হৌখিবা চহি ১০ গী মমাঙদা, ঐখোয়না মপান লৈবাকশিংগী য়াওশঙগী পেচকারি অমসুং অঙাংশিংগী শান্নপোৎশিং ফাওবা পুশিল্লকখি। ঙসিদি ঐখোয়না মপান্দা শান্নপোৎশিং থাদোকপা শরুক অহুম হেনগৎলে। হৌখিবা চহি ১০ গী মমাঙদা, ঐখোয়গী লান্মীশিংগী রাইফলশিং ঐখোয়না মপান লৈবাকশিংদগী পুশিল্লকখি অমসুং হৌখিবা চহি ১০ দা, ঐখোয়গী দিফেন্স এক্সপোর্তশিং শরুক ২০ হেনগৎলে।

মরুপশিং,

হৌখিবা চহি ১০ দা, ঐখোয় মালেমদা ষ্টিল খ্বাইদগী য়াম্না পুথোকপা অনিশুবা লৈবাক, মোবাইল ফোন খ্বাইদগী য়াম্না শাবা অনিশুবা লৈবাক অমসুং ষ্টার্দঅপ য়াম্না লৈবা অহুমশুবা লৈবাক ওইরে। হৌখিবা চহি ১০ দা, ঐখোয়না ঐখোয়গী ইনফ্রাষ্ট্রকচরদা থাদবা শেনফম শরুক ৫ হেনগৎলে। লৈবাক অসিগী এয়রপোর্ত মশিং শরুক অনি হেনগৎলে। হৌখিবা চহি ১০ দা, লৈবাক অসিগী থবক তৌরবা এ.আই.আই.এম.এস মশিং শরুক অহুম হেনগৎলে। হৌখিবা চহি ১০ দা, মেদিকেল কোলেজ অমসুং মেদিকেল সিত মশিং শরুক অনি হেনগৎলে।

মরুপশিং,

ঙসিগী ভারতকী ৱাখল্লোন তোঙাল্লে। ঙসি ভারতনা ৱাখল চাউনা খল্লে, অচৌবা পান্দমশিং থম্লে অমসুং ঙসিগী ভারতনা অচৌবা ফলশিং উবা ফংলে। লৈবাক্কী ৱাখল্লোন হোংবদগী মসি ওইথোকপনি, অচৌবা অনিংবশিংগা লোয়ননা ভারত মাঙলোমদা চঙশিল্লি। মমাঙদদি ঐখোয়গী ৱাখল্লোন, মসি য়ারে, মসি থোক্লে, মসি ওইনিংবা ওইজসনু হায়না লৈথোক্লমখি। মমাঙগী ৱাখল্লোন অসুক্কী মতিক পীকখি, ঐনা মসিগী খুদম অমা পীগে।

মতম অমদা, করিগুম্বা মফম অমদা ইকং থোকপদা, কংগ্রেসনা সরকার পায়বা মতমদা মীয়াম্না মেমোরেন্দম পীশিনগনি, চাক তাংবা থোকপা মতমদা, মতেং পাংবগী থবক হৌগনি, ঐখোয়না কোমশিং তৌগনি, লৈবাক লৌথোক্কনি, মদুনা অতোপ্পা কোমশিং ফুঞ্জিনগনি, মীয়াম্না করিগুম্বা খর হায়জবদা, মসি মহাক্না পাম্লিবা অদুনি হায়গনি। হায়রিবা থবকশিং অসি ২০১৪ গী মমাঙদা থোকখিবনি, মসি য়াম্না কুইদ্রিবনি। কংগ্রেসনা লৈবাক অসিগী মীয়ামগী অনিংবশিং নমহৎখি। মরম অদুনা লৈবাক অসিগী মীয়াম থাজবা মাঙখিবনি, মখোয়গীদমক করিসু পাংথোক্লোই হায়না মখোয়না য়াজখি। ঙসিদি, ফিবম অসি কয়া য়াম্না হোংলবগে হায়বা অদোম উরে অমসুং ৱাখল্লোন হোংলে। কনানা থবক তৌবা ঙম্মী, কনানা অফবা ফলশিং পুরকই হায়বা হৌজিক মীয়াম খঙলে। 

মরুপশিং,

ঙসিদি ঐখোয়গী অনিংবশিং মখোয়গী ৱাহৈশিংদা মমি তারে। ৱা ঙাংবগী মওং হোংলে। হৌজিক মীয়াম্না করি পাম্লিবগে? মমাংদা মীয়াম্না ত্রেনশিং খাম্নবা হায়খি, হৌজিক মখোয়না লাক্লগা মখোয়গী লমদমদা বন্দে ভারত অমা চেন্নবা হায়রে। মতম খরগী মমাঙদা ঐনা কুৱেত্ত চৎলুবদা, ঐনা মফম অদুগী শিন্মীশিংগী লৈফম অমদা চৎখি, ঐনা মফম অদুদা থবক শুরিবা ইরৈচাশিংগা উনখি। ঐনা কুৱেত্ত থবক তৌরিবা ইনাওশিং অমসুং ইচলশিংগা ৱারি শানখি। মখোয় খরনা চহি ১০ থবক তৌরকখি অমসুং খরনা চহি ১৫ থবক তৌরকখি। কুৱেত্ত চহি ৯ থবক তৌরক্লবা বিহারগী খু্ঙ্গং অমদগী শিন্মী অমা লৈরমখি। ঐনা মহাক্কা ৱারি শানবদা, মহাক্না হায়খি, সার, ঐ ৱাহং অমতা হংজগে। ঐনা হায়খি, হংবীয়ু। মহাক্না হায়খি, সার, ঐগী খুঙ্গং ময়াদা দিষ্ট্রিক হেদক্বাতর ময়াদা চানবীদুনা ইন্তরনেসনেল এয়রপোর্ত অমা শাবীয়ু। কুৱেত্ত চহি ৯ থবক তৌরক্লবা ঐগী লৈবাক্কী বিহারগী খু্ঙ্গং অমদগী শিন্মী অমনা মহাক্কী জিলাদা ইন্তরনেসনেল এয়রপোর্ত অমা শানবা ৱাখল খনবদা ঐ হরাওই। মসি ঙসিগী ভারতকী মীচম মীয়ামগী অনিংবনি। মসিনা লৈবাক শীনবা থুংনা বিকসিত ভারতগী পান্দমগী মাইকৈদা পুদুনা চৎলি।

মরুপশিং,

লৈবাক অদুগী মীয়ামদগী অথিংবশিং লৌথোক্লবা মতমদা খুন্নাই অমা নত্ত্রগা লৈবাক অমগী মপাঙ্গল হেনগৎলকই। মতম অদু খক্তদা লৈবাক অদুগী মীয়ামগী মপাঙ্গল হেনগৎলকই, মখোয়গী ওইনা অতিয়াগী অৱাংবা ফাওবা নেমশিল্লকই। মরম অদুনা, হৌখিবা সরকারশিংনা মীয়ামগী মমাঙদা থম্লম্বা অথিংবশিং ঐখোয়না লেপ্তনা লৌথোক্লি। হৌজিক ঐনা স্পেস সেক্তরগী খুদম অমা পীগে। মমাঙদা স্পেস সেক্তরগী থবক খুদিংমক ইসরোগী থৌদাং ওইরমখি। ইসরোনা অচৌবা থবক অমা পাংথোকখি। অদুবু স্পেস সাইন্স অমসুং ওন্ত্রেপ্রেন্যুরশিপগী মতাংদা  লৈবাক অসিদা লৈরিবা খুদোংচাবা শীজিন্নদনা লৈখি, থবক খুদিংমক ইসরো খক্তদা পাংথোকখি। নহা ওইরিবা ইন্নোবেতরশিংগীদমক ঐনা স্পেস সেক্তর হাংদোক্লে। ঐনা ৱারেপ লৌবা মতমদা, মসি পাউ-চে অমতনা হেদলাইন ওইখিদে, মরমদি মখোয়না মসি খঙখিদে। ঙসিদি লৈবাক অসিদা স্পেস ষ্টার্দঅপ ২৫০ হেন্না লৈরে হায়বা খঙবদা রিপব্লিক তি.ভি য়েংলিবশিং হরাওগনি, মসি ঐগী লৈবাক্কী নহারোলশিংগী অঙকপনি। ষ্টার্দঅপশিং অসিনা ঙসি বিক্রম-এস অমসুং অগ্নিবানগুম্বা রোক্কেতশিং শারে। মমাঙদা মেপিং সেক্তরদা অথিংবা কয়া লৈরমখি, অদোম্না এতলাস অমা পুথোকপা ঙমখিদে, হৌজিক তেক্নোলোজি হোংলে। মমাঙদা, করিগুম্বা অদোম্না ভারত্ত মেপ অমা য়েকপা পাম্লবদি, অদোম চহি কয়া সরকারগী ওফিসশিংদা কোইচেন চেনবা দরকার ওইখি। ঐখোয়না মসিগী অথিংবা অসি লৌথোক্লে। ঙসিদি, জিও-স্পাসিএল মেপিংগা মরী লৈনবা দেতানা অনৌবা ষ্টার্দঅপশিংগী লম্বী শেম্লে।

মরুপশিং,

মমাঙদা, ন্যুক্লিয়ার ইনর্জিগা মরী লৈনবা সেক্তর সরকারগী মখাদা থমখি। হৌজিক চহি অসিগী বজেত্ত, সরকারনা সেক্তর অসি প্রাইভেদ সেক্তরগী হাংদোক্লে হায়না লাউথোক্লে। মসিনা ২০৪৭ ফাওবদা ন্যুক্লিয়ার ইনর্জ পুথোকপা গিগৱাত ১০০ হেনগৎহল্লগনি।

মরুপশিং,

ঐখোয়গী খুঙ্গংশিংদা লুপা করোর লাখ ১০০ গী খুদোংচাবা শীজিন্নদনা লৈরি হায়বা খঙবদা অদোম অঙকপা ফাওগনি। লুপা করোর লাখ ১০০ হায়বসি অপীকপা মশিং অমা নত্তে, মসিগী শেন-থুমগী খুদোংচাবা অসি খুঙ্গংশিংদা য়ুমশিংগী মওংদা লৈরি। মসি অরাইবা মওংদা ঐ শন্দোক্না তাক্কে। দিল্লিগুম্বা সহরদা করিগুম্বা অদোমগী লুপা লাখ ৫০ গী মমল ওইগদবা য়ুম অমা লৈরবদি, করোর ১, করোর ২, অদোমগী লম অদুগী মমলগা চুনবা বেঙ্ক লোন অমা অদোম ফংগনি।

করিগুম্বা অদোমগী য়ুম অমা দিল্লিদা লৈরবদি, অদোম্না বেঙ্কতগী লুপা করোর কয়া লোন লৌবা য়াগনি। দিল্লিগী য়ুমশিং খক নত্তনা, হৌজিক খুঙ্গংশিংগী য়ুমশিংসু লোন লৌবা য়ারে। খুঙ্গংশিংগী য়ুমশিংগী আইনগী ওইবা চে-চাংশিং, মেপশিং লৈতদবগী ভারত্ত খুঙ্গংশিংগী য়ুমশিং লোন লৌবা য়াদবনি। মরম অদুনা, লৈবাক অসিনা অমসুং মসিগী মীয়াম্না খুঙ্গংশিংগী কান্নবা লৌবা ঙমদবনি। ভারতকী খুদোংচাদবা খক নত্তনা, মালেমগী অচৌবা লৈবাকশিংগী মীয়াম লমগী মপু ওইবা ফংদ্রি। মালেমগী অচৌবা লুপশিংনা হায়খি মদুদি মীয়ামদা লমগী মপু ওইবগী হকশিং পীবা লৈবাকশিংদা, লৈবাক অদুগী জি.দি.পি হেনগৎলকই।

মরুপশিং,

ভারতকী খুঙ্গংশিংদা য়ুমশিংদা লমগী হকশিং ফংহন্নবা ঐখোয়না শ্বামিতভা স্কিম হৌদোক্লে। মসিগীদমক ঐখোয়না খুঙ্গং খুদিংমক্ত দ্রোন সর্ভেশিং পাংথোক্লে অমসুং য়ুমশিং মেপ লৌরে। ঙসিদি লৈবাক শীনবা থুংনা খুঙ্গংগী য়ুমশিংদা লমগী কার্দশিং ফংহল্লে। সরকারনা লমগী কার্দ করোর ২ হেন্না য়েন্থোকখ্র অমসুং থবক অসি মখা চৎথরি। মমাঙদা, লমগী কার্দশিং লৈতবদগী, খুঙ্গংশিংদা খৎন-চৈনবা কয়া থোকখি, মীয়াম কোর্তত চৎনখি, মসি হৌজিক লৈত্রে। হৌজিক খুঙ্গংশিং লমগী কার্দশিং পায়বদগী বেঙ্কশিংদগী লোনশিং ফংলে। মখোয় মশাগী ললোন-ইতিক পায়খৎপা হৌরে। ঐনা ভিদিও কনফরেন্সকী খুৎথাংদা শ্বামিতভা য়োজনাগী বেনিফিসরিশিংগা ৱারি শানখ্রে, ঐনা রাজস্থানদগী ইচল অমা উনখ্রে। মহাক্না হায়খি মদুদি ঐগী লমগী কার্দ ফংবদগী, ঐনা লুপা লাখ ৯ গী লোন অমা লৌরে অমসুং ঐনা ললোন-ইতিক অমা হৌরে অমসুং লোনগী তঙ্খায় অমা শিংলে অমসুং হৌজিক লোন লোইনা শিংবদা মতম য়াম্না চঙলরোই।

মরুপশিং,

ঐনা পীখিবা খুদমশিংগী কান্নবা খ্বাইদগী য়াম্না ফংলিবসি লৈবাক অসিগী নহারোলশিংনি। নহারোলশিং বিকসিত ভারতকী খ্বাইদগী চাউবা মরী লৈনবশিংনি। নহারোলশিং ঙসিগী ভারতকী এক্স-ফেক্তরনি। এক্স হায়বদি এক্সপেরিমেন্তেসন, এক্সলেন্স অমসুং এক্সপান্সন হায়বনি। ঐখোয়গী নহারোলশিং অরিবা লম্বী থাদোক্তুনা অনৌবা লম্বীশিংদা চৎলে। এক্সলেন্স হায়বদি নহারোলশিং মালেমগী থাকশিং য়ৌরে হায়বনি। এক্সপান্সন হায়বনা মীয়াম করোর ১৪০ গীদমক ঐখোয়গী নহারোলশিংনা অনৌবা পাংথোক্লে হায়বনি। ঐখোয়গী নহারোলশিংনা লৈবাক্কী অচৌবা খুদোংচাদবশিং কোকহন্নবা পাম্বৈশিং পুথোক্কনি। হেক্কাথোনশিংগী খুৎথাংদা ঐখোয়গী নহারোলশিংনা লৈবাক্কী অচৌবা খুদোংচাদবশিং কোকহন্নবা পাম্বৈশিং পুথোক্কনি হায়বা মমাঙগী সরকারশিংনা খনবা ফাওবা খনখিদে। ঙসিদি ঐখোয়না চহি খুদিংগী স্মার্দ ইন্দিয়া হেক্কাথোন শীল্লে। হৌজিক ফাওবদা মসিদা নহারোল লাখ ১০ শরুক য়াখ্রে। লৈবাক ঙাকপগা মরী লৈনবা খুদোংচাদবা কয়া মিনিষ্ট্রি অমসুং দিপার্তমেন্তশিংনা মখোয়দা পাম্বৈশিং পুথোক্নবা পুখৎলে। হেক্কাথোন্দা, ঐখোয়গী নহারোলশিংনা পাম্বৈ লিশিং ২.৫ রোম পুথোক্লে অমসুং লৈবাক অসিদা শীন্নরে।

মরুপশিং,

অদোম্না মীয়াম মরক্ত চৎপা মতমদা, অহানবা ওইনা সরকারগী স্কিমগী কান্নবা মখোয়না ফংলে হায়না মীয়াম্না য়াম্না তোইনা হায়খি। হায়রিবা সরকারগী স্কিমশিং অদু মমাঙদা লৈরমদবা নত্তে। মমাঙদসু স্কিমশিং লৈরমখি, অদুবু অহানবা ওইনা খ্বাইদগী লায়রবা অমসুং মনুং-হুঞ্জিনবা মফমশিংদা ফংহনবনি। অদোম্না প্রধান মন্ত্রী অৱাস য়োজনাগী বেনিফিসরিশিংগী ইন্তরভিয়ুশিং লৌখ্রে। মমাঙদা, চে খক্তদা লায়রবগী য়ুম শানবা সেঙ্কসন তৌখি। ঙসি ঐখোয়না লায়রবশিংগী য়ুম শাবীরে। মমাঙদা, য়ুম অমা শাবগী থবক খুদিংমক সরকারনা পাংথোকখি। শাগদবা য়ুম মখল, শীজিন্নগদবা মচাকশিং সরকারনা লেপখি। মসি ঐখোয়না মপুদা পাংথোকহল্লে। সরকারনা বেনিফিসরিগী একাউন্তশিংদা শেন হাপচিল্লে অমসুং করম্বা মখলগী য়ুম শাগদগে হায়বা বেনিফিসরি মশানা লেপহল্লে। ঐখোয়না লৈবাক শীনবা থুংনা য়ুমগী দিজাইনশিংগী চাংদম্না অমা পাংথোক্লে, য়ুমশিংগী নমুনাশিং উৎলে, দিজাইন তৌরিবা মীওইশিং মশক তাক্লে অমসুং মীয়াম শরুক য়াদুনা থবকশিংগী ৱারেপ লৌরে। মসিনা মরম ওইদুনা, অফবা য়ুমশিং শাবা হেনগৎলে অমসুং য়ুমশিং শাবা য়াংনা লোইশিল্লে। হায়রিবা য়ুমশিং অসিদা তোতি ঈশিং, উজৱালাগী মখাদা গ্যাস কন্নেক্সন অমসুং সৌভগ্যা স্কিমগী মখাদা মৈ ফংহল্লে।

 মরুপশিং,

লৈবাক অমা চাউখৎপদা লৈবাক অদুগী সেকুরিতি য়াম্না মরুওই। হৌখিবা চহি ১০ দা, ঐখোয়না সেকুরিতিগী লমদা থবক কয়া পাংথোকখ্রে। মমাংঙৈদা, বোম্ব মথং মথং পোকখায়বগী অনৌবা পাউশিং তি.ভিদা উৎপা অদোম নিংশিংলমগনি। ঙসিদি মসি তি.ভি অমসুং ভারতকী লৈমায়দগী মুৎখ্রে। মমাংঙৈদা, ত্রেন তোংবা নত্ত্রগা এয়রপোর্ততা চৎপদা, করিগুম্বা মপু য়াওদবা বেগশিং লৈরবদি, মদু শোক্কনু হায়খি, ঙসিদি চহি ১৮-২০ গী অঙাংশিংনা পাউ অসি তাখিদরে। ঙসিদি লৈবাক অসিদা জিলা ১২ খক্তদা নেক্সালিজমগী ইরাং লৈরে। মসি লৈবাক্কী থবক্না অহানবা হায়বা ৱাখল্লোনগা লোয়ননা থবক পায়খৎপদগী ওইথোকপনি। হায়রিবা মফমশিং অসিদা ঐখোয়না মীয়ামগী থাক্ত লৈঙাক-সাসন লৈহল্লে। হায়রিবা জিলাশিং অসিদা কিমি লিশিং কয়াগী লম্বীশিং শেমগৎলে, স্কুলশিং অমসুং হোস্পিতালশিং শারে, ৪-জি মোবাইল নেতৱার্ক ফংলে অমসুং লৈবাক অসিনা ঙসিদি ফলশিং উবা ফংলে।

মরুপশিং,

ঙসি, সরকারনা অকনবা থবকশিং পায়খৎপদগী উমংগী নেক্সালিজম মুৎথৎপা ঙম্বনি। অদুবু মসিগী মরা সহরশিংদা শন্দোরক্লে। অর্বান নেক্সালশিংনা মখোয়গী নেতৱার্কশিং য়াম্না য়াংনা শন্দোরক্লে, মদুদি রাজনিতি দলশিং ফাওবদা হৌজিক অর্বান নেক্সালশিংগী নেতৱার্ক য়ৌরক্লে। ঙসিদি, অর্বান নেক্সালশিং অমসুং মখোয়গী খোঞ্জেল মফম অসিদা তারে। মসিদগী ঐখোয়না খঙলে মদুদি মখোয়গী মরা কয়া য়াম্না লুনা তারবগে হায়বা। ভারতকী চাউখৎপা অমসুং ঐখোয়গী চৎনবী অনিমক্ত অর্বান নেক্সালশিং অকনবা য়েক্নবনি হায়বা ঐখোয় নিংশিংগদবনি। অমরোমদা, অর্বান নেক্সালশিং কনানো হায়বা খঙহনবগী থৌদাং অরনাবনসু লৌরে। বিকসিত ভারত অমগী অমসুং চৎনবী য়োকখৎনবা চাউখৎপা অসি দরকার ওই। মরম অদুনা ঐখোয়না অর্বান নেক্সালশিংদগী চেকশিনগদবনি।

মরুপশিং,

ঙসিদি ভারত খুদোংচাদবা খুদিংমক থেংনবগা লোয়ননা অনৌবা থাকশিং য়ৌবা ঙম্লে। লৈবাক্কী থবক্না অহানবা হায়বা ৱাখল্লোনগা লোয়ননা জর্নেলিজমগী অনৌবা মশক অমা রিপব্লিক তি.ভিনা তাক্কনি হায়না ঐনা থাজৈ। মসিগী থাজবা অসিগা লোয়ননা অদোমগী জর্নেলিজমগী খুৎথাংদা বিকসিত ভারত অমগী অনিংবা ফংনবা অদোম্না মখা তানা হোৎনগদবনি। ঐনা অদোম থাগৎচরি অমসুং য়াইফ পাউজেল পীজরি। অদোম থাগৎচরি!

দিসক্লেমর: মসি প্রধান মন্ত্রীগী ৱারোলদগী চাউরাক্না হন্দোকপনি। অশেংবা ৱারোল হিন্দীদা পীখি।

***