নমাহ পার্বতি পাতায়ে, হর-হর মহাদেব!

ফম্বাক্ত লৈরিবা উত্তর প্রদেসকী রাজ্যপাল অনন্দিবেন পতেল; চীফ মিনিষ্টর শ্রী য়োগী অদিত্যনাথ; দিপুতি চীফ মিনিষ্টর কেযব প্রসাদ মৌর্য়া অমসুং ব্রাজেস পাথক; ইকায়খুম্নরবা মিনিষ্টরশিং; অতোপ্পা মীয়ামগী মীহুৎশিং; বনাস দাইরিগী চিয়ার্মেন, সঙ্করভাই চৌধুরি; অমসুং মফম অসিদা তিল্লিবা ঐগী নুংশিরবা ইমুং-মনুংগী মীওইশিং-

ঐখোয়গী কাসিগী মীয়ামদা ঐনা য়াইফ পাউজেল পীজরি। থৌরম অসিদা ঐনা অদোমগী থৌজাল নিজরি। অদোমগী থৌজালগীদমক ঐনা শিংবা ঙমদ্রবা লমন তোশিঞ্জরে। কাসি ঐগীনি অমসুং ঐগা কাসিগা মরী লৈনৈ।

মরুপশিং,

হয়েং শেংলবা হনুমান জনমোৎসব থোক্লে, অমসুং সঙ্কত মোচান মহারাজগীমক মমিং চৎলিবা শেংলবা কাসিদা ঙসি ঐনা অদোমগা উনবগী খুদোংচাবা ফংলে। হনুমান জনমোৎসব লাকপদা, চাউখৎপগী ৱাখল্লোন হরাওবা ফোঙদোক্নবা কাসিগী মীয়াম মফম অসিদা তিল্লে।

মরুপশিং,

হৌখিবা চহি ১০ দা, বারানসকী চাউখৎপা য়াংনা চঙশিনবা উরে। সহর অসিগী হেরিতেচ ঙাক-শেনবগা লোয়ননা কাসিনা মতমগী অনৌবশিং চৎনরে, মসিনা অফবা তুংলমচৎ অমগী থাজবা লৈহল্লে। ঙসি, কাসি অরিবা খুদম ওইবা খক নত্তনা চাউখৎপগী মৈরা অমসু ওইরে। সহর অসি পুর্বাঞ্চলগী শেন-থুমগী মেপ্তা মরুওইবা মফম অমা কল্লি। মতম অমদা ভগবন মহাদেব মশামক্না লমজিংখিবা কাসি- ঙসিদি হায়রিবা কাসি অদু চাউখৎপগী গারি থৌদুনা চৎলি।

মরুপশিং,

ঙসি কাসি অমসুং পুর্বাঞ্চলগী মফম কয়াগী প্রোজেক কয়া উরেপ-উয়ুং তমখ্রে নত্ত্রগা শঙ্গাখ্রে। প্রোজেকশিং অসিনা লম্বী-থোঙ ফগৎহন্নবা, খুঙ্গং অমসুং য়ুমথোং খুদিংদা অফবা থক্নবা ঈশিং পীনবা, লাইরিক-লাইশু, হকশেল অমসুং শান্নবগী খুদোংচাবশিং হেন্না ফংহন্নবা অমসুং লমদম খুদিং, ইমুং খুদিং অমসুং নহারোল খুদিংগী ফিবম ফগৎনবা পান্দম থম্লি। স্কিমশিং অসিনা পুর্বাঞ্চল চাউখৎলবা লমদম অমা ওইহন্নবা খোঙচত্ত মরুওইবা খুমাঙচাউশিনবা ওইনা থবক তৌগনি। কাসিগী মীওই খুদিংমক থবকশিং অসিগী কান্নবশিং ফংগনি। প্রোজেকশিং অসিগীদমক কাসি অমসুং পুর্বাঞ্চলগী মীয়ামদা ঐনা হরাওবা ফোঙদোকচরি।

মরুপশিং,

ঙসি অসি মহাত্ম জয়তিবা ফুলেগী মপোক কুমওনসু থোক্লে। নুপীশিংগী ফিবম ফগৎনবা অমসুং খুন্নাই চাউখৎনবা মহাত্ম জয়তিবা ফুলে অমসুং সাবিত্রিবাই ফুলে মখোয়গী পুন্সিশিং কৎথোকখি। ঙসিদি, মখোয়গী মঙলানশিং মঙফাওনবা ঙম্নবা অমসুং নুপীশিংগী ফিবম ফগৎনবা মখোয়গী খোঙজং অমুক হিঙ্গৎহন্নবা মখোয়না পাংথোক্লম্বা থবকশিং ঐখোয়না মখা চৎথরি।

মরুপশিং,

মহাত্ম ফুলেগুম্বা শক্নাইরবা মীওইশিংনা ইথিল পীদুনা, মীয়ামগী থবক তৌনবা ঐখোয়গী ফিদম অসি সবকা সাথ, সবকা বিকাসনা ওইরে। মসিগী ৱাখল্লোন অসিগা লোয়ননা ঐখোয়না লৈবাক্কী থবক তৌরি। মসিগী ওন্ন-তৈনবদা, শক্তি পায়নবা খক্তগী রাজনিতি তৌরিবা মীওইশিংগী তোঙানবা লাইৱা অমা লৈরি- পরিবার কা সাথ, পরিবার কা বিকাস। সবকা সাথ, সবকা বিকাসগী অশেংবা মশক পুখৎলকপগীদমক ঙসি ঐনা পুর্বাঞ্চলগী শা-ষন লোইরিবা থবক শুবা কনবী ঐখোয়গী ইচলশিং থাগৎপা ফোঙদোকচরি। নুপীশিং অসি হৌজিক পুর্বাঞ্চল শীনবা থুংবগী অফবা খুদম অমা ওইরে। উত্তর প্রদেসতা বনার দাইরি প্লান্তগা লোয়ননা থবক তৌরিবা শা-ষন লোইরিবশিংদা ঙাইহাক্কী মমাঙদা বোনস য়েন্থোকখ্রে। বারানস অমসুং বোনস- মসি অচম্বা খুদোল অমা নত্তে; মসি অদোমগী কৎথোকপগী ফংফম থোকপনি। লুপা করোর ১০০ হেনবগী বোনস অসি অদোমগী থবক শুবা কনবদা ইকায়খুম্নবা উৎপা অমনি।

মরুপশিং,

কাসিদা বনাস দাইরিনা ইমুং লিশিং কয়াগী শেন-থুমগী ফিবম ফগৎহল্লে। মসিগী দাইরি অসিনা অদোম্না থবক কন্না শুবা অদু ফংফম থোকপা মনাশিং ওন্থোক্লে অমসুং অদোমগী অনিংবশিং মনিংতমহল্লে। পায়খৎলিবা থবকশিং অসিনা হৌজিক পুর্বাঞ্চলদা নুপী কয়া লাখপতি দিদিশিং ওইহল্লে। মতম অমদা হিংবা খক্তগী ৱাখল ৱারম্বা অদু, ঙসি নুংঙাইবগী মাইকৈদা তপ্না তপ্না চঙশিল্লক্লে। মসিগী চাউখৎপা অসি বারানস অমসুং উত্তর প্রদেস খক্ত নত্তনা লৈবাক শীনবা থুংনা উবা ফংলে। ঙসি ভারত মালেমদা শঙ্গোম খ্বাইদগী য়াম্না পুথোকপা লৈবাক ওইরে। হৌখিবা চহি ১০ দা শঙ্গোম পুথোকপা চাদা ৬৫ হেনগৎলে। মসিগী মাইপাকপা অসি শান-ষন লোইবগী থবক তৌরিবা ঐগী ইনাওশিং অমসুং ইচলশিংনা ওইহনবনি। অসিগুম্বা মাইপাকপা অসি অহিং অমদা ঙম্বা নত্তে। হৌখিবা চহি ১০ দা, মিসনগী ম ওংদা পায়খৎপা থবক অমদা ঐখোয়গী লৈবাক্কী দাইরি সেক্তর চাউখৎলকপনি।

ঐখোয়না শা-ষন লোইরিবশিংদা কিষান ক্রেদিদ কার্দকী খুদোংচাবা ফংহল্লে। অদুবু খ্বাইদগী মরুওইবা থবক অমদি ঐখোয়গী শা-ষনশিংগীদমক পায়খৎলিবা থবক অমনি। শা-ষনশিং ফুত অমসুং মাউস দিজজদগী ঙাকথোক্নবা লেম্না তিকা থাবগী থৌরম অমা হৌদোক্লে। মীওই খুদিংমক লেম্না কোবিদ তিকা থাখিবা অদু নিংশিংলমগনি, মদু সরকারগী সবকা সাথ, সবকা বিকাসগী মখাদা পাংথোকখিবনি অমসুং ঐখোয়গী শা-ষনশিং ফাওবা লেম্না তিকা থারে।

শঙ্গোম খোমজিনবগী থবক ফগৎহন্নবা লৈবাক শীনবা থুংবগী কোওপরেতিপ সোসাইতি ২০,০০০ হেন্না অমুক হিঙ্গৎহল্লে। সোসাইতিশিং অসিদা মেম্বর লাখ কয়া হাপচিল্লে। লৈবাক অসিগী ষনবীশিং মখোয়গী মগুন হেনগৎহল্লে। সাইন্তিফিক ওইবা মচা লৌবগী থবকশিং পুক্নিং থৌগৎলে। হায়রিবা থবকশিং অসি মতেং পাংনবা হৌজিক রাষ্ট্রিয়া গোকুল মিসন পায়খৎলি। থবকশিং অসিনা কৈথেলশিং অমসুং খুদোংচাবশিং ফংহন্দুনা শা-ষন লোইরিবা ঐখোয়গী ইনাওশিং অমসুং ইচলশিং চাউখৎপগী অনৌবা লম্বী অমদা চৎলে। ঙসিদি, বনাস দাইরিগী কাসি কমপ্লেক্সনা পুর্বাঞ্চল শীনবা থুংনা মঙলান অসিগী লুচিংবা ওইরে। বনাস দাইরিনা লমদম অসিদা গির ষনবীশিং য়েন্থোক্লে, অমসুং মখোয়গী মশিং হেনগৎলক্লে হায়বা ঐ খঙলে। বনাস দাইরিনা বারানসতা শজিক্কী থবক অমা পায়খৎলে। হৌজিক, দাইরি অসিনা পুর্বাঞ্চলদা লৌমীশিং লাখ ১ রোমদগী শঙ্গোম খোমগৎলি।

মরুপশিং,

ঙাইহাক্কী মমাংদা, ঐনা অহলশিংদা অয়ুস্মান বয়া বন্দন কার্দশিং য়েন্থোকখ্রে। ঐনা মখোয়গী মাইথোংদা অপেনবগী মমি তাখিবা অদু স্কিম অসিগী মাইপাকপনি। ঐখোয়গী অহলশিং লায়য়েংবগী মতাংদা খুদোংচাদবা কয়া মায়োক্নৈ হায়বা ঐখোয় খঙলে। চহি ১০ গী মমাংদা হকশেলগী হিরমদা পুর্বাঞ্চল লমদম শীনবা থুংনা থেংনখিবা খুদোংচাদবশিংগী মরমদা ঐখোয় ফজনা খঙখি। ঙসিদি ফিবম অদু মপুংফানা হোংলে। ঐগী কাসি হকশেলগী কোনুং অমা য়াংনা ওইরক্লি। দিল্লি অমসুং মুম্বাই খক্ত লৈরম্বা অচৌবা হোস্পিতালশিং হৌজিক অদোমগী য়ুমশিংগী ময়াদা লৈরে। মসি অশেংবা চাউখৎপা কমদৌবগে হায়বগী অশেংবা শক্তম অদুনি-তঙাইফদবা থবকশিং অমসুং খুদোংচাবশিং মীয়ামদা য়ৌহল্লে।

মরুপশিং,

হৌখিবা চহি ১০ দা হোস্পিতালশিংগী মশিং হেনগৎহনবা খক নত্তনা, ঐখোয়না অনাবশিংগী ইকায়খুম্নবসু হেনগৎহল্লে। অয়ুস্মান ভারত য়োজনা অসি ঐগী লায়রবা ইনাওশিং অমসুং ইচলশিংগী বর অমা ওইরে। স্কিম অসিনা লায়য়েংবগী খুদোংচাবা পীবগী মথক্ত মসিনা চেকশিন্নবা শেন্নবগী থাজবা অমসু লৈহল্লে। উত্তর প্রদেসকী মীওই লাখ কয়া অমসুং বারানসী খক্তগী মীওই লিশিং কয়া মসিগী কান্নবা ফংলে। অয়ুস্মান ভারত য়োজননা উত্তর প্রদেস খক্তদা ইমুং লাখ কয়াগী লুপা করোর কয়া কনবা ঙম্লে- মরমদি অদোমগী অনা-লায়য়েংগী থবক অসি ঐখোয়গী থৌদাংনি হায়না সরকারনা লাউথোক্লে।

মরুপশিং,

অদোম্না ঐখোয়দা অহুমসুবা তার্ম অমগী থৌজাল পীবা মতমদা, অদোমগী মীনাই অমা ওইনা ঐখোয়না ঐখোয়গী থৌদাং পাংথোক্লে অমসুং করিগুম্বা খর পাংথোক্নবা থবক খুদিংমক পায়খৎলে। অহল খুদিংমক লেম্না লায়য়েংবা হায়বসি ঐনা পীবা থাজবনি। পীখিবা থাজবা অদুগী ফল ওইনা অয়ুস্মান বয়া বন্দনা য়োজনা পায়খৎলে। স্কিম অসিনা অহলশিং লায়য়েংবা খক নত্তনা, মসিনা মখোয়গী ইকায়খুম্নবা অমুক ফংহল্লে। হৌজিক চহি ৭০ হেল্লবা মীওই খুদিংমক, শেন্থোক য়াম্বা য়ামদবা থিদনা লেম্না লায়য়েংবগী খুদোংচাবা পীরে। বারানসী খক্তদা অহলশিংদা বয়া বন্দনা কার্দ ৫০,০০০ রোম য়েন্থোকখ্রে। মসি মশিং খক নত্তে, মসি মীনাই অমনা মীয়ামগী থবক তৌবগী পুকচেল শেংবা থবক অমনি। হৌজিক লায়য়েংনবা লম য়োনবগী দরকার ওইদ্রে। মখা তানা লায়য়েংনবা লোন লৌবা দরকার ওইদ্রে। অসিগুম্বা লায়য়েংগীদমক উপায় লৈতনা থোঙজিন অমদগী থোঙজিন অমদা চৎত্রে। অয়ুস্মান কার্দকী খুৎথাংদা হৌজিক সরকারনা অদোমগী লায়য়েংবগী শেনফম পুথোক্লগনি।

মরুপশিং,

ঙসিদি, কাসি ফাওদুনা চৎপা কনাগুম্বা অমনা মসিগী ইনফ্রাষ্ট্রকচর অমসুং খুদোংচাবশিংগী মতাংদা ৱারীনরে। নুমিৎ খুদিংগী মীওই লাখ কয়া বরানসতা লাক্লি। মখোয় বাবা বিশ্বনাথকী থৌজাল ফংনবা অমসুং ইমা গঙ্গাগী শেংলবা ঈশিংদা ঈরুপ্নবা লাকপনি। বারানস কয়া য়াম্না হোংলবগে হায়বা মীওই খুদিংমক্না ফোঙদোক্লে।  চহি ১০ গী মমাংদা লৈরম্বা কাসিগী লম্বীশিং, রেলৱেজ অমসুং এয়রপোর্তগী ফিবম খন্দুনা য়েংউ, সহর অসি ঙসিদি করম্বা ফিবমদা লৈরবগে? মমাংঙৈদা, অপীকপা কুহ্মৈশিং পাংথোকপদা লম্বী য়াম্না চিনখি। কনাগুম্বা অমনা চুনারদগী সিবপুর ফাওবা চৎপদা বরানস কোইনা চৎখি অমসুং লোইবা নাইদ্রবা ত্রাফিক জামশিং মায়োক্নখি। ঙসিদি ফুলৱারিয়া লৈকং থোঙ শারে। হৌজিক লম্বীশিং তেনশিল্লে, মতম চঙহন্দ্রে অমসুং মীয়াম হেন্না নুংঙাইরে। হৌজিক রিং রোদশিং লৈবদগী বরানসকী অকোয়বদা লৈবা খুঙ্গংশিংগী মীয়াম্না সহর অসি ফাউদুনা চৎপদা থেংনবা অৱাবশিং কোক্লে। মীয়াম্না নাকল অমদগী নাকল অমদা মিনিত খরগী মনুংদা চৎপা য়ারে।

মরুপশিং,

হৌখিবা চহি ১০ দা বরানসী অমসুং মসিগী অকোয়বা মফমশিংগী লম্বী-থোঙ ফগৎনবা লুপা করোর ৪৫,০০০ রোম থাদখ্রে। শেনফম অসি ইচম চম্না কনক্রিত্ত চাদিং তৌখিবা খক নত্তনা, মসিনা থাজবদা ওন্থোক্লে। ঙসিদি, কাসি অমসুং মসিগী য়ুম্লোন্নরিবা জিলাশিং থাদখিবা শেনফম অসিগী কান্নবা ফংলে।

মরুপশিং,

ঙসি ফাওবা কাসিগী ইনফ্রাষ্ট্রকচরগী শেন থাদবা লেপত্রি। লুপা করোর লিশিং কয়াগী প্রোজেকশিং উরেপ-উয়ুং তম্লে। ঐখোয়গী লাল বহাদুর শাস্ত্রি এয়রপোর্ত পাকথোক-চাউথোকপগী থবক পায়খৎলি। হৌজিক এয়রপোর্ত ময়াদা লেন তরুক্কী লৈনুংগী তেন্নেল অমা শেমগৎলি। ভাদোজি, গজিপুর অমসুং জাউনপুরগা মরী লৈনবা লম্বীগী প্রোজেকশিংসু থবক হৌরে। ভিখারিপুর অমসুং মন্দুৱাদিদা ফ্লাইওভরশিং শানবা মতম কয়াগী মমাঙদগী তকশিন্দুনা লাকপনি। তকশিন্দুনা লাকপা অসি হৌজিক থবক পায়খৎপা হৌরে হায়না লাউথোকপদা ঐখোয় অপেনবা ফাওই। অনৌবা থোঙ অমনা হৌজিক বরানস অমসুং সরনাথ শম্নরগনি। মসিনা এয়রপোর্ত নত্ত্রগা অতোপ্পা মফমশিংদগী সরনাথ য়ৌনবা কাসি ফাওদুনা চৎপা দরকার ওইররোই।

মরুপশিং,

লাক্লিবা থা খরদা, প্রোজেকশিং অসি লোইশিনবদগী, বরানসতা চৎথোক-চৎশিন তৌবা নুংঙাইরগনি। চৎপদা চঙবা মতম হন্থরগনি অমসুং ললোন-ইতিক্কী থবক হেনগৎলগনি। মসিগী মথক্ত, শেন তান্নবা নত্ত্রগা লায়য়েংনবা বারানসতা লাকপদা হেন্না নুংঙাইরগনি। কাসিদা সিতি রোপৱে চাংয়েং তৌবা হৌরে। অসিগুম্বা খুদোংচাবা অমা লৈবা মালেমগী খনগৎলবা সহর খরগী মনুংদা বারানস য়াওরগনি।

মরুপশিং,

বারানসীদা পায়খৎলিবা ইনফ্রাষ্ট্রকচর প্রোজেকশিংগী কান্নবা পুর্বাঞ্চলগী নহারোল খুদিংমক্না ফংগনি। কাসিগী নহারোলশিং শান্নবদা মাংজিল থানবা ঐখোয়গী সরকারনা অকনবা মীৎয়েং চঙলে। ভারতনা ২০৩৬ দা ওলেম্পিক্স য়ুম্বু ওইনবা পান্দমগী মাইকৈদা ঐখোয় হৌজিক থবক পায়খৎলি। ওলেম্পিক্স মেদলশিং ফংনবা কাসিগী নহারোলশিং হৌজিক শেম-শাবা হৌগদবনি। মরম অদুনা বরানসতা অনৌবা ষ্টদিয়মশিং শাগৎলিবনি অমসুং ঐখোয়গী হৈথোই-শিংথোইবা নহারোলশিংদা মালেম থাক্কী খুদোংচাবশিং ফংহল্লে। অনৌবা স্পোর্তস কমপ্লেক্স অমা শঙ্গারে অমসুং হৌজিক বারানসীগী শান্নরোয় লিশিং কয়া ত্রেনিং ফংলে। সংসদ খেলকুদ প্রতিয়োগীতা শরুক য়াবা অসিনা মখোয়গী হৈথোই-শিংথোইবা উৎনবা খুদোংচাবা ফংলে।

মরুপশিং,

ঙসিদি, ভারত চাউখৎপা অমসুং হেরিতেচ অনিমক খুৎশম্নদুনা চৎমিন্নরে। মসিগী খুদম কাসিনা ওইরে। মফম অসিদা, শেংলবা গঙ্গা চেল্লি অমসুং মসিগা লোয়ননা ভারতকী ৱাখল তাবগী ইচেল চেন্থরি। লৈবাক অসিগী খেন্নবশিংদা ভারতকী থৱায় লৈরি অমসুং মসিগী ৱাখল্লোন কাসিদা ময়েক শেংনা তারে। কাসিগী লৈকায় খুদিং অঙকপা চৎনবী অমা তাক্লি অমসুং লম্বী খুদিংনা ভারতকী তোঙান তোঙানবা মচু উৎলি। অপুনবগী মরীশিং কাসি তামিল শঙ্গমমগুম্বা থবকশিংনা হেনগৎহনবদা ঐ অপেনবা ফাওই। হৌজিক মফম অসিদা এক্ত মোল শেমগৎনবা থৌরাং তৌরে। ভারতকী তোঙান তোঙানবা জিলাশিংগী পোৎথোকশিং মফম অমদা উত্তুনা এক্ত মোলনা ভারতকী খেন্নবা উৎকনি।

মরুপশিং,

চহি খর অসিদা, উত্তর প্রদেসনা মসিগী শেন-থুমগী থবক অমসুং ৱাখল্লোন অহোংবা পুরক্লে। উত্তর প্রদেস হৌজিক খুদোংচাবা খক্তগী মফম অমা ওইদ্রে; হৌজিক ৱাশক, থৌনা অমসুং মাইপাকপগী লম অমা ওইরে। ঙসিদি, মেদ ইন ইন্দিয়া হায়বা ৱাহৈনা মালেম শীনবা থুংনা খোন্থাং য়ৈরে। ভারত্ত শাবা পোৎথোকশিং হৌজিক মালেমগী ব্রান্দশিং ওইরক্লে। লমদম অমগী পোৎথোক কয়া জিওগ্রাফিকেল ইন্দিকেসন (জি আই) তেগ ফংলে। মসি লমদম অমগী অঙকপা শক্তমগী শক্তাকচেনি। মসিনা অকক্নবা পোৎথোক অমা অকক্নবা মফম অমগীনি হায়বা তাক্লি। জি.আই তেগনা চৎখিবা মফম খুদিংমক্ত, মসিনা মালেমগী কৈথেলশিংদা থোঙ্গাল অমা হাংদোক্লে।

মরুপশিং,

হৌজিক লৈবাক অসিদা জি.আই তেগ লৌবদা উত্তর প্রদেসনা মাঙজিল থারে। হৌজিক বারানসী অমসুং মসিগী অকোয়বগী জিলাশিংগী পোৎথোক ৩০ হেন্না জি.আই তেগ ফংলে। বারানসীগী তব্লা অমসুং সেহনাই, ফক্লাংগী অয়েকপা লাইশিং, থন্দাই, মোরোক অঙাংবা, রেদ পেদা অমসু মচু অহুমগী বরফি জি.আই তেগকী খুৎথাংদা অনৌবা মশক অমা তাক্লে। রাজ্য অসিগী পোৎথোক কয়া- জাউনপুরগী ইমারতি, মথুরাগী সঞ্জি কলা, বুন্দেলখন্দগী কাথিয়া গেহু, পিলিভিতকী বাসি, প্রায়াগ্রজগী মুঞ্জ ক্রাফ, বেরেলিগী জারদোজি, চিত্রকুতকী ৱুদক্রাফ অমসুং লখিম্পুর খেরিগী থারু জরদোজি জি.আই তেগ ফংলে।

মরুপশিং,

কাসি ঙাক-শেল্লিবশিংনা ভারতকী মরুওইবা খুদিংমক ঙাক-শেল্লি। ঐখোয়না মখা তানা কাসি ফগৎহনগদবনি। ঐখোয়না কাসি ফজহনগদবনি। ঐখোয়না কাসিগী অরিবা অমসুং হৌজিক্কী অনৌবা মওং অমতা ওইনা পুনশিনগদবনি। মসিগী ৱারেপ অসিগা লোয়ননা, অদোমগী খুৎশিং ঐগা লোয়ননা থাংগৎমিন্নসি, অমুক হন্না হায়মিন্নসি:

নমাহ পার্বতি পাতায়ে, হর-হর মহাদেব!

অদোম থাগৎপা ফোঙদোকচরি।

দিসক্লেমর: মসি প্রধান মন্ত্রীগী ৱারোলদগী চাউরাক্না হন্দোকপনি। অশেংবা ৱারোল হিন্দীদা পীখি।

***