ಭಾರತ ಸರ್ಕಾರದ ಯುವ ವ್ಯವಹಾರಗಳು ಮತ್ತು ಕ್ರೀಡಾ ಸಚಿವಾಲಯ (ಎಂವೈಎಎಸ್) ವಿದೇಶಾಂಗ ವ್ಯವಹಾರಗಳ ಸಚಿವಾಲಯದ (ಎಂಇಎ) ಸಹಯೋಗದೊಂದಿಗೆ, ಸೇವಾ ಪಖ್ವಾಡಾ (ಸೆಪ್ಟೆಂಬರ್ 17 -  ಅಕ್ಟೋಬರ್ 2) ಭಾಗವಾಗಿ 91 ದೇಶಗಳಲ್ಲಿ 150ಕ್ಕೂ ಹೆಚ್ಚು ಸ್ಥಳಗಳಲ್ಲಿ ವಿಕಸಿತ ಭಾರತ್ ರನ್ 2025 ಅನ್ನು ಆಯೋಜಿಸುತ್ತಿದೆ. ರಾಷ್ಟ್ರ ನಿರ್ಮಾಣಕ್ಕಾಗಿ ಸಾಮೂಹಿಕ ಕ್ರಮವನ್ನು ಪ್ರೇರೇಪಿಸಲು ಈ ವಿಶಿಷ್ಟ ಜಾಗತಿಕ ಉಪಕ್ರಮವನ್ನು ಮೊದಲ ಬಾರಿಗೆ ಕೈಗೊಳ್ಳಲಾಗುತ್ತಿದೆ.

ವಿಕಸಿತ ಭಾರತ್ ರನ್, "ರಾಷ್ಟ್ರಕ್ಕೆ ಸೇವೆ ಸಲ್ಲಿಸುವ ಓಟ" ಎಂಬ ಘೋಷವಾಕ್ಯದೊಂದಿಗೆ, ವಿಶ್ವಾದ್ಯಂತ ಅಪ್ರತಿಮ ಮತ್ತು ಸುಲಭವಾಗಿ ಪ್ರವೇಶಿಸಬಹುದಾದ ಸ್ಥಳಗಳಲ್ಲಿ 3-5 ಕಿ.ಮೀ ಸಮುದಾಯ ಓಟವಾಗಿ ಆಯೋಜಿಸಲಾಗಿದೆ. ಹೆಚ್ಚಿನ ಓಟಗಳು 2025ರ ಸೆಪ್ಟೆಂಬರ್ 28ರಂದು ನಡೆಯಲಿವೆ.

ಈ ಓಟವು ಮೆಕ್ಸಿಕೊ ನಗರದ ಏಂಜಲ್ ಆಫ್ ಇಂಡಿಪೆಂಡೆನ್ಸ್, ಸುರಿನಾಮ್ನ ಪರಮಾರಿಬೊದಲ್ಲಿರುವ ಯುನೆಸ್ಕೋ ವಿಶ್ವ ಪರಂಪರೆಯ ತಾಣ, ಸ್ಯಾನ್ ಫ್ರಾನ್ಸಿಸ್ಕೋದ ಗೋಲ್ಡನ್ ಗೇಟ್ ಸೇತುವೆ ಮತ್ತು ಪ್ರಪಂಚದಾದ್ಯಂತದ ಇನ್ನೂ ಅನೇಕ ಅಪ್ರತಿಮ ಸ್ಥಳಗಳಂತಹ ಪ್ರಸಿದ್ಧ ಸ್ಮಾರಕಗಳನ್ನು ಒಳಗೊಂಡಿದೆ.

2047ರ ವೇಳೆಗೆ ವಿಕಸಿತ ಭಾರತದ ದೃಷ್ಟಿಕೋನದ ಕಡೆಗೆ ತಮ್ಮ ಬದ್ಧತೆಯನ್ನು ಪುನರುಚ್ಚರಿಸಲು ಸ್ಥಳೀಯ ಸಮುದಾಯಗಳು, ವಿದ್ಯಾರ್ಥಿಗಳು, ವೃತ್ತಿಪರರು ಮತ್ತು ಭಾರತದ ಸ್ನೇಹಿತರೊಂದಿಗೆ ವಿದೇಶದಲ್ಲಿ ವಾಸಿಸುವ ಭಾರತೀಯರನ್ನು ಒಟ್ಟುಗೂಡಿಸುವುದು ಇದರ ಉದ್ದೇಶವಾಗಿದೆ.

ಕಾರ್ಯಕ್ರಮದ ಭಾಗವಾಗಿ, ಸ್ಪರ್ಧಿಗಳು ಈ ಕೆಳಗಿನವುಗಳನ್ನು ಮಾಡುತ್ತಾರೆ:

• ಭಾರತದ ಅಭಿವೃದ್ಧಿ ಪಯಣಕ್ಕೆ ಒಗ್ಗಟ್ಟನ್ನು ವ್ಯಕ್ತಪಡಿಸುವ ವಿಕಸಿತ ಭಾರತ ಪ್ರತಿಜ್ಞೆ ಮತ್ತು ಆತ್ಮನಿರ್ಭರ ಭಾರತ ಪ್ರತಿಜ್ಞೆಯನ್ನು ತೆಗೆದುಕೊಳ್ಳಲು ಉತ್ತೇಜಿಸುವುದು
• ವೈಯಕ್ತಿಕ ಜವಾಬ್ದಾರಿಯನ್ನು ಪರಿಸರ ಸುಸ್ಥಿರತೆಯೊಂದಿಗೆ ಜೋಡಿಸುವ "ಏಕ್ ಪೆಡ್ ಮಾ ಕೆ ನಾಮ್" ನೆಡುತೋಪು ಅಭಿಯಾನಕ್ಕೆ ಸೇರಿಕೊಳ್ಳುವುದು
• ಸ್ವಯಂಸೇವಕ, ಪ್ರಾಯೋಗಿಕ ಕಲಿಕೆಯ ಕಾರ್ಯಕ್ರಮಗಳು ಮತ್ತು ಯುವ ಕೇಂದ್ರಿತ ಉಪಕ್ರಮಗಳಲ್ಲಿ ಅವಕಾಶಗಳನ್ನು ಒದಗಿಸುವ ಮೈ ಭಾರತ್ ಪೋರ್ಟಲ್ ನೊಂದಿಗೆ ಸಂಪರ್ಕ ಸಾಧಿಸುವುದು
• ಸಮುದಾಯ ಗುಂಪುಗಳು, ಸಾಂಸ್ಕೃತಿಕ ಸಂಸ್ಥೆಗಳು ಮತ್ತು ಸ್ಥಳೀಯ ಸಂಸ್ಥೆಗಳೊಂದಿಗೆ ಸಹಕರಿಸುವ ಭಾರತೀಯ ಮಿಷನ್ ಗಳೊಂದಿಗೆ ಯುವಕರನ್ನು ಸಜ್ಜುಗೊಳಿಸಲು ವೇದಿಕೆಯಾಗಿ ಕಾರ್ಯನಿರ್ವಹಿಸುವ ಭಾರತೀಯ ವಲಸಿಗರು, ಭಾರತೀಯ ಮೂಲದ ವ್ಯಕ್ತಿಗಳು ಮತ್ತು ಸ್ಥಳೀಯರೊಂದಿಗೆ ತೊಡಗಿಸಿಕೊಳ್ಳಲು ಮತ್ತು ನೆಟ್ ವರ್ಕ್ ಮಾಡಲು ಅವಕಾಶವನ್ನು ಪಡೆಯುವುದು.
• ಭಾರತದ ಬೆಳವಣಿಗೆಯ ಕಥೆ ಮತ್ತು ಅಭಿವೃದ್ಧಿಯ ಸಾಧನೆಗಳನ್ನು ಬಿಂಬಿಸುವ ಕಾರ್ಯಕ್ರಮಗಳನ್ನು ಉದ್ಘಾಟಿಸಲು ಮತ್ತು ಭಾಗವಹಿಸಲು ಮುಖ್ಯ ಅತಿಥಿಗಳಾಗಿ ಆಹ್ವಾನಿಸಲಾಗುವ ಸ್ಥಳೀಯ ನಾಯಕರು ಮತ್ತು ಗಣ್ಯರನ್ನು ಭೇಟಿ ಮಾಡುವುದು.
• ಓಟದ ನಂತರ, ಮಿಷನ್ಸ್ ಮೈ ಭಾರತ್ ಪೋರ್ಟಲ್ ನಲ್ಲಿ ಚಟುವಟಿಕೆಗಳ ಫೋಟೋಗಳು ಮತ್ತು ವಿಡಿಯೊಗಳನ್ನು ಅಪ್ಲೋಡ್ ಮಾಡಲಾಗುತ್ತದೆ.  ಆ ಮೂಲಕ ಈ ಜಾಗತಿಕ ಅಭಿಯಾನದ ಹಂಚಿಕೆಯ ದಾಖಲೆಯನ್ನು ಸೃಷ್ಟಿಸಲಾಗುತ್ತದೆ.

ವಿಕಸಿತ ಭಾರತ್ ರನ್ 2025 ಭಾರತದ ಅತಿದೊಡ್ಡ ಜಾಗತಿಕ ಜನಸಂಪರ್ಕ ಉಪಕ್ರಮಗಳಲ್ಲಿ ಒಂದಾಗಿ ಹೊರಹೊಮ್ಮಲು ಸಜ್ಜಾಗಿದೆ. ಇದು ಫಿಟ್ನೆಸ್ ಮತ್ತು ಸಮುದಾಯ ಚಟುವಟಿಕೆ ಮಾತ್ರವಲ್ಲದೆ ಭಾರತದ ಸೇವಾ ಭಾವ, ಸುಸ್ಥಿರತೆ ಮತ್ತು ಒಳಗೊಳ್ಳುವಿಕೆಯ ಮೌಲ್ಯಗಳ ಜಾಗತಿಕ ಆಚರಣೆಯಾಗಿದೆ. ಇದು ಭಾರತ ಮತ್ತು ಅದರ ಅನಿವಾಸಿ ಭಾರತೀಯರ ನಡುವಿನ ಬಾಂಧವ್ಯವನ್ನು ಬಲಪಡಿಸಲು, ಸೇವೆ-ಆಧಾರಿತ ಉಪಕ್ರಮಗಳತ್ತ ಯುವಕರನ್ನು ಸಜ್ಜುಗೊಳಿಸುವ ಮತ್ತು ಭಾರತದ ಬೆಳವಣಿಗೆಯ ಕಥೆಯನ್ನು ಜಗತ್ತಿಗೆ ಬಿಂಬಿಸುವ ಗುರಿಯನ್ನು ಹೊಂದಿದೆ.

*****