ঙসি ত্রিয়ানন কনভেন্সন সেন্তরদা পাংথোকপা অখন্নবা থৌরম অমদা, প্রধান মন্ত্রী শ্রী নরেন্দ্র মোদী অমসুং মাউরিসসকী প্রধান মন্ত্রী নবিনচন্দ্র রামগুলামনা ভারতমচাশিং অমসুং ভারতকী মরুপশিংগী অপুনবা অমদা ৱা ঙাংখ্রে। থৌরম অদুদা লৈবাক অদুদা লৈরিবা ভারতমচাশিং, মহৈরোয়শিং, শীনফম কয়াগী মীওইশিং, মীয়ামগী অমসুং নাৎকী লুপশিং অমসুং ললোন-ইতিক্কী লুচিংবশিং শরুক য়াখি। থৌরম অদুদা মাউরিসসকী মিনিষ্টরশিং, এম.পিশিং অমসুং অতোপ্পা শক্নাইরবা মীওই কয়া শরুক য়াখি।

থৌরম অদুদা প্রধান মন্ত্রী নরেন্দ্র মোদী তরাম্না ওক্লদুনা, মাউরিসসনা লৈবাক অসিগী খ্বাইদগী ৱাংবা সিবিল এৱার্দ ‘ গ্রান্দ কমান্দর ওফ দ ওর্দর ওফ দ ষ্টার এন্দ কি ও দ ইন্দিয়ান ওসিন’ নেসনেল দে মনুংদা ভারতকী প্রধান মন্ত্রীদা পীরগনি হায়না প্রধান মন্ত্রী শ্রী রামগুলামনা লাউথোকখ্রে। অখন্নবা ইকায়খুম্নবা অসি মঙোন্দা পীবদা প্রধান মন্ত্রীনা মহাক্কী তৌবীমল খঙবা ফোঙদোকখি।

মহাক্কী ৱারোলদা, ভারত অমসুং মাউরিসসকী মরক্ত লৈনরিবা পুৱারি ওইরবা অমসুং অখন্নবা মরীশিং ফগৎহন্নবা মহাক্না পাংথোকখিবা থবকশিংগীদমক প্রধান মন্ত্রী মোদীনা প্রধান মন্ত্রী নবিনচন্দ্র থাগৎপা ফোঙদোকখি। অখন্নবা অমা ওইনা, প্রধান মন্ত্রী মোদীনা প্রধান মন্ত্রী নবিনচন্দ্র অমসুং মহাক্কী লোয়নবী, বিনা জিদা ও.সি.আই কার্দশিং খুৎশীন্নখি। মখোয়গী নেসনেল দে থৌরমদা মাউরিসসকী মীয়ামদা য়াইফ পাউজে পীরদুনা, প্রধান মন্ত্রীনা লৈবাক অনিগী পুৱারি ওইরবা খোঙচৎ অদু অমুক হন্না নিংশিংখি। মাউরিসসকী নিংতম্বা ফংনবা লান্থেংনখিবা সার সিৱুসাগুর রামগুলাম,সার অনিরুদ জুগনৌথ, মনিলাল দোক্তর অমসুং অতোপ্পশিংদা প্রধান মন্ত্রীনা ইকায়খুম্নবা উৎখি অমসুং চীফ গেষ্ট ওইনা মাউরিসসকী নেসনেল দে থৌরমশিং শরুক য়াবা ফংবা অসি লাইবক ফবনি হায়না ফোঙদোকখি।

প্রধান মন্ত্রীনা হায়খি হেরিতেচ শরুক য়ামিন্নবা অমসুং ইমুং-মনুংগী ওইবা মরীশিং অসিনা লৈবাক অনিগী মরক্ত মীগা-মীগা অচেৎপা মরীশিং লৈনবগী য়ুম্ফম ওইরি। মাউরিসসতা লৈরিবা ভারতমচাশিংনা মখোয়গী হৌরকফমশিং য়োকখৎপা অমসুং ঙাক-শেন্দুনা থম্বা অসিগীদমক প্রধান মন্ত্রীনা থাগৎপা ফোঙদোকখি। মরীশিং অসি মখা তানা ফগৎনবা, মাউরিসসতা লৈরিবা ভারতমচাশিংগী তরেৎশুবা মীরোলদা ও.সি.আই কার্দ পীনবা ৱারেপ লৌরে। গিরমিতিয়াগী পুৱারি য়োকখৎনবা থবকশিং ভারতনা শৌগৎকনি হায়না প্রধান মন্ত্রীনা ফোঙদোকখি।

প্রধান মন্ত্রীনা হায়খি ভারত অমসুং মাউরিসস পুৱারিগী মরী লৈবা খক নত্তনা মখোয়গী খুদোংচাবশিং শরুক য়ামিন্নরি। ভারতনা য়াংনা চাউখৎলকপদা, লৈবাক অসিনা মাউরিসসকী চাউখৎপদা থৱায় য়াওনা মতেং পাংলি। ভারতকী ভিজন সাগর অমসুং গ্লোবেল সাউথতা মসি থবক পায়খৎপদা ভারত-মাউরিসসকী অখন্নবা মরীশিংনা মরুওইবা থৌদাং অমা লৌরে। মালেমগী অইং-অশাগী খল হোংলকপগী খুদোংচাদবশিং থেংননবা, মাউরিসসনা ইন্তরনেসনেল সোলার এল্লাইন্স অমসুং গ্লোবেল বাইওফুএল এল্লাইন্সকী মরুওইবা মেম্বর ওইবদা থাগৎলি। এক পের মা কে নাম কেম্পেনগী মখাদা ঙসি মহাক্না পুৱারি ওইরবা সার সিৱুসাগুর রামগুলাম বোতানিক গার্দেন্দা উ চারা অমা থাখ্রে। প্রধান মন্ত্রীগী মপুংফাবা ৱারোল মফম অসিদা ফংগনি।

থৌরম অদুদা ইন্দিরা গান্ধী সেন্তর ফোর ইন্দিয়ান কলচর (আই জি সি আই সি), মহাত্মা গান্ধী ইন্সতিতুৎ (এম জি আই) অমসুং অন্না মেদিকেল কোলেজগী কলাকারশিংগী ফজরবা নাৎকী থৌরমশিং উৎখি।

***