ସେପ୍ଟେମ୍ବର 2023 ରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର  ମୋଦୀ ଏବଂ ସାଉଦି ଯୁବରାଜଙ୍କ ଦ୍ୱାରା ନିଆଯାଇଥିବା ନିଷ୍ପତ୍ତି ଅନୁସାରେ ଉଚ୍ଚ ସ୍ତରୀୟ ଟାସ୍କ ଫୋର୍ସ ଗଠନ କରାଯାଇଥିଲା

ପ୍ରଧାନମନ୍ତ୍ରୀଙ୍କ ପ୍ରମୁଖ ସଚିବ ସାଉଦି ଆରବର 100 ବିଲିୟନ ଆମେରିକୀୟ ଡଲାର ନିବେଶକୁ ସକ୍ରିୟ ସହାୟତା ପ୍ରଦାନ କରିବା ଲାଗି ଭାରତ ସରକାରଙ୍କ ଦୃଢ଼ ଉଦ୍ଦେଶ୍ୟକୁ ଦୋହରାଇଛନ୍ତି

ପେଟ୍ରୋଲିୟମ, ଅକ୍ଷୟ ଶକ୍ତି, ଟେଲିକମ୍ ଏବଂ ନବସୃଜନ ଭଳି କ୍ଷେତ୍ରରେ ସରକାରୀ ଏବଂ ଘରୋଇ କ୍ଷେତ୍ରରେ ନିବେଶର ବିଭିନ୍ନ ସୁଯୋଗ ଉପରେ ଗଠନମୂଳକ ଆଲୋଚନା ହୋଇଥିଲା

ନିବେଶ ଉପରେ ଭାରତ-ସାଉଦି ଆରବ ଉଚ୍ଚସ୍ତରୀୟ ଟାସ୍କ ଫୋର୍ସର ପ୍ରଥମ ବୈଠକ ଆଜି ଭର୍ଚୁଆଲ ମୋଡରେ ଅନୁଷ୍ଠିତ ହୋଇଥିଲା, ଯାହାର ସହ-ଅଧ୍ୟକ୍ଷତା କରିଥିଲେ ପ୍ରଧାନମନ୍ତ୍ରୀଙ୍କ ପ୍ରମୁଖ ସଚିବ ମହାମହିମ ଡକ୍ଟର ପି. କେ. ମିଶ୍ର ଏବଂ ସାଉଦି ଶକ୍ତି ମନ୍ତ୍ରୀ ମହାମହିମ ପ୍ରିନ୍ସ ଅବଦୁଲାଅଜିଜ ବିନ ସଲମାନ ବିନ ଅବଦୁଲାଅଜିଜ ଅଲ ସାଉଦ।

ଉଭୟ ପକ୍ଷ ଟାସ୍କ ଫୋର୍ସର ବୈଷୟିକ ଦଳ ମଧ୍ୟରେ ହୋଇଥିବା ଆଲୋଚନାର ସମୀକ୍ଷା କରିଥିଲେ।

ବିଶୋଧନ ଏବଂ ପେଟ୍ରୋକେମିକାଲ ପ୍ଲାଣ୍ଟ, ନୂତନ ଏବଂ ଅକ୍ଷୟ ଶକ୍ତି, ଶକ୍ତି, ଟେଲିକମ୍, ନବସୃଜନ ସମେତ ବିଭିନ୍ନ କ୍ଷେତ୍ରରେ ଦ୍ୱିପାକ୍ଷିକ ନିବେଶ ପାଇଁ ବିଭିନ୍ନ ସୁଯୋଗ ଉପରେ ଗଠନମୂଳକ ଆଲୋଚନା କରାଯାଇଥିଲା। ପାରସ୍ପରିକ ଲାଭପ୍ରଦ ଶୈଳୀରେ ଦ୍ୱିମୁଖୀ ନିବେଶକୁ ପ୍ରୋତ୍ସାହନ ଦେବା ଉଦ୍ଦେଶ୍ୟରେ ନିଆଯାଇଥିବା ପଦକ୍ଷେପଗୁଡ଼ିକର ଉଭୟ ପକ୍ଷ ବିସ୍ତୃତ ସମୀକ୍ଷା କରିଥିଲେ।

ପ୍ରଧାନମନ୍ତ୍ରୀଙ୍କ ପ୍ରମୁଖ ସଚିବ ସାଉଦି ଆରବର ଯୁବରାଜ ଏବଂ ପ୍ରଧାନମନ୍ତ୍ରୀଙ୍କ ଗସ୍ତ ସମୟରେ ପ୍ରତିଶ୍ରୁତିବଦ୍ଧ ହୋଇଥିବା 100 ବିଲିୟନ ଆମେରିକୀୟ ଡଲାରର ସାଉଦି ନିବେଶକୁ ସକ୍ରିୟ ସମର୍ଥନ ପ୍ରଦାନ କରିବା ପାଇଁ ଭାରତ ସରକାରଙ୍କ ଦୃଢ଼ ଉଦ୍ଦେଶ୍ୟକୁ ଦୋହରାଇଥିଲେ। ଉଭୟ ପକ୍ଷ ଆଲୋଚନାକୁ ଆଗକୁ ନେବା ଏବଂ ନିର୍ଦ୍ଦିଷ୍ଟ ନିବେଶ ଉପରେ ଏକ ରାଜିନାମାରେ ପହଞ୍ଚିବା ପାଇଁ ଉଭୟ ପକ୍ଷର ବୈଷୟିକ ଦଳ ମଧ୍ୟରେ ନିୟମିତ ପରାମର୍ଶ ପାଇଁ ସହମତି ପ୍ରକାଶ କରିଥିଲେ। ତୈଳ ଏବଂ ଗ୍ୟାସ କ୍ଷେତ୍ରରେ ପାରସ୍ପରିକ ଲାଭପ୍ରଦ ନିବେଶ ଉପରେ ପରବର୍ତ୍ତୀ ଆଲୋଚନା ପାଇଁ ପେଟ୍ରୋଲିୟମ ସଚିବଙ୍କ ନେତୃତ୍ୱରେ ଏକ କ୍ଷମତାପ୍ରାପ୍ତ ପ୍ରତିନିଧି ଦଳ ସାଉଦି ଆରବ ଗସ୍ତ କରିବେ। ଭାରତରେ ସାର୍ବଭୌମ ସମ୍ପଦ ପାଣ୍ଠି ପି. ଆଇ. ଏଫ୍. ର ଏକ କାର୍ଯ୍ୟାଳୟ ପ୍ରତିଷ୍ଠା କରିବା ପାଇଁ ସାଉଦି ପକ୍ଷକୁ ମଧ୍ୟ ନିମନ୍ତ୍ରଣ କରାଯାଇଥିଲା।

ଉଚ୍ଚସ୍ତରୀୟ ଟାସ୍କ ଫୋର୍ସର ପରବର୍ତ୍ତୀ ପର୍ଯ୍ୟାୟ ବୈଠକ ପାଇଁ ପ୍ରମୁଖ ସଚିବ ସାଉଦି ଆରବର ଶକ୍ତି ମନ୍ତ୍ରୀଙ୍କୁ ଭାରତ ଆସିବାକୁ ନିମନ୍ତ୍ରଣ କରିଥିଲେ।  ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଏବଂ ଯୁବରାଜ ତଥା ପ୍ରଧାନମନ୍ତ୍ରୀ ମହାମହୀମ ଯୁବରାଜ ମହମ୍ମଦ ବିନ ସଲମାନ ବିନ ଅବଦୁଲାଅଜିଜ ଅଲ ସାଉଦଙ୍କ ସେପ୍ଟେମ୍ବର 2023 ଭାରତ ଗସ୍ତ ସମୟରେ ନିଆଯାଇଥିବା ନିଷ୍ପତ୍ତି ପରେ ଦ୍ୱିପାକ୍ଷିକ ନିବେଶକୁ ସୁଗମ କରିବା ପାଇଁ ଉଚ୍ଚସ୍ତରୀୟ ଟାସ୍କ ଫୋର୍ସ ଏକ ସ୍ୱତନ୍ତ୍ର ସଂସ୍ଥା। ଏଥିରେ ନୀତି ଆୟୋଗର ସିଇଓ, ଭାରତର ଅର୍ଥନୈତିକ ବ୍ୟାପାର, ବାଣିଜ୍ୟ, ବିଦେଶ ମନ୍ତ୍ରଣାଳୟ, ଡିପିଆଇଆଇଟି, ପେଟ୍ରୋଲିୟମ ଏବଂ ପ୍ରାକୃତିକ ଗ୍ୟାସ, ଶକ୍ତି ସଚିବଙ୍କ ସମେତ ଉଭୟ ପକ୍ଷର ବରିଷ୍ଠ ଅଧିକାରୀମାନେ ସାମିଲ ଅଛନ୍ତି।

****

NS/SLP