ভারত মাতা কী জয়!

অঙ্গরাজ দানবীর কর্নাগী লমদম, মহর্ষি মেহীগী তপস্যা তৌফম, ভগবান ভাসুপুজ্যাগী লমদম, মালেমদা মমিং চৎলবা বিক্রমশিলা মহাভিহারাগী লৈফম অমসুং বাবা বুদ্ধনাথকী শেংলবা লমদম অসিদগী ঐহাক্কী ইচিল-ইনাও পুম্নমক্তা খুরুমজরি!

স্তেজতা অসিদা লেংশিনবীরিবা বিহারগী চাউখৎ-থৌরাংগীদমক্তা থাজবা থম্লিবা ঐখোয়গী নুংশিজরবা মুখ্য মন্ত্রী নিতিশ কুমারজীগা লোয়ননা ইকাই খুম্নরবা গবর্নর, আরিফ মোহমদ খানজীনা লেংশিনবীরি। ঐহাক্কী কেবিনেৎকী ইকায় খুম্নরবা মরুপশিং, শিবরাজ সিংহ চৌহান জী, জিতেন রাম মঞ্জি জী, লাল্লান সিংহ জী, গিরিরাজ সিংহ জী, চিরাগ পাসৱান জী, রাজ্যগী মন্ত্রী শ্রী রামনাথ থাকুরজী, বিহারগী উপ মুখ্য মন্ত্রী সমরত চৌধরীজী, বিজয় সিনহাজী, রাজ্যগী অতোপ্পা মন্ত্রীশিং, মীয়ামগী মীহুৎশিং, শক্নাইরবা মীওইশিং অমসুং বিহারগী ঐহাক্কী নুংশিরবা ইচিল-ইনাওশিংসু শরুক য়াখ্রে।

মরুপশিং,

ঙসিদি, লৈবাক শিনবা থুংবদগী মুখ্য মন্ত্রী, মন্ত্রী কয়া অমসুং লৌমী করোর কয়ানা থৌরম অসিদা ঐখোয়গা লোয়ননা শরুক য়ারি। ঐহাক্না মখোয় পুম্নমকপুসু ইকায় খুম্নবা উৎচরি।

মরুপশিং,

অশেংবা মহা কুম্ভগী মতমদা মন্দ্রাঞ্চলগী অশেংবা লমদম অসিদা লাকপা অসি য়াম্না চাউরবা খুদোংচাবা অমনি। লমদম অসিনা থাজবা, হেরিতেজ অমসুং বিক্সিত ভারত (চাউখৎলবা ভারত) অমগী অচেৎপা থাজবা থম্বা মফম অমনি। মসি থৌনা ফরবা শহিদ তিলকা মাঞ্জীগী লমনি অমসুং মসিবু সিল্ক সিতী হায়নসু খঙনৈ। ঙসিদি, বাবা অজগাইবিনাথকী মফম অসিদা মহাশিৱরাত্রীগী শেম-শাবা মপুং ফানা চৎথরি। অসিগুম্লবা য়াইফরবা মতম অসিদা লৈবাক অসিগী লৌমী করোর কয়াদা পি.এম. কিসান সম্মান নিধিগী অতোপ্পা ইন্সতোলমেন্ত অমা ত্রান্সফর তৌবগী ইকায়খুম্নবা ঐহাক্না ফংজখি। ক্লিক অমখক্তনা চাউরাক্না লুপা করোর ২২,০০০ অসি লৈবাক শিনবা থুংনা লৈরিবা লৌমীশিংগী একাউন্তশিংদা হকথেংননা দিপোজিৎ তৌখ্রে। ঐনা বতন অদু নমবদা, ঐনা তোঙান তোঙানবা রাজ্যশিংদগী লাইব ভিজুএলশিং উবা ফংখি, অমসুং মফম অসিদসু, ঐগী মীৎনা ত্রান্সফর অদু কনফর্ম তৌনবা মখোয়গী মোবাইল ফোনশিং চেক তৌরিবা মীওইশিং অদু উবা ফংখি। মখোয়গী মমিৎতা উখিবা মঙাল অদুদা মখোয়গী নুংঙাইবা অমসুং হরাওবগী মমি তাখি।

মরুপশিং,

কিসান সম্মান নিধিগী ঙসিগী ইন্সতোলমেন্ত অসিদা বিহারগী লৌমী ইমুং লাখ ৭৫ হেন্না য়াওহনখ্রে। ঙসি বিহারগী লৌমীশিংগী একাউন্তশিংদা লুপা করোর ১,৬০০ রোম হকথেংননা ক্রেদিৎ তৌখ্রে। বিহারগী অমসুং লৈবাক অসিগী লৌমীশিংগী ইমুং-মনুং পুম্নমক্তা ঐহাক্না নুংঙাইবা ফোংদোকচরি অমসুং য়াইফ-পাউজেল পীজরি।

মরুপশিং,

ঐহাক্না লাল কিলাগী লানবনদগী ফোংদোকখি মদুদি বিক্সিত ভারত অসি শিংথানীংঙাই ওইবা য়ুম্বী মরিদা য়ুম্ফম ওইগনি। মখোয় অদুদি লায়রবশিং, ঐখোয়গী লৌমীশিং, ঐখোয়গী নহাশিং অমসুং ঐখোয়গী লৈবাক্কী নুপীশিংনি। সেন্তরদা এন.দি.এ. সরকার ওইগেরা নৎত্রগা বিহারদা নিতিশজীনা লুচিংবা সরকার ওইগেরা, লৌমীশিংগী য়াইফ-থৌরাং অসি ঐখোয়গী খ্বাইদগী মরুওইবনি। হৌখিবা চহি তরা অসিদা, ঐখোয়গী লৌমীশিংনা থেংনরিবা অৱাবা খুদিংমক কোকহন্নবা ঐখোয়না লেপ্পা লৈতনা হোৎনখি। মখোয়না অৱাংবা ক্বালিতীগী সিদ, শেল চংদবা অমসুং মতীক চাবা ফর্তিলাইজর, মতীক চাবা ইরিগেসন ফেসিলিতীশিং, মখোয়গী শা-ষনশিংবু লায়নাশিংদগী ঙাকথোকপা, অমসুং মহৌশাগী অৱা-অনাশিংনা মরম ওইদুনা মাংখিবা অদুদগী ঙাকথোক্নবা চেকশিন থৌরাংশিং মথৌ তাই।. মমাংদা, লৌমীশিংনা হায়রিবা হিরম খুদিংমক্তা অৱাবা কয়া মায়োক্নরম্মি। শা-ঙাগী চিঞ্জাক চারিবা মীওইশিংনা অহোংবা পুরকপা ঙম্লোই। অদুম ওইনমক, এন.দি.এ. সরকারনা ফিভম অসি ওন্থোকখ্রে। হৌখিবা চহিশিংদা, ঐখোয়না লৌমীশিংগীদমক অনৌবা সিদ মখল চাম্মরোম পুথোকখ্রে। মতম অমদা য়ুরিয়াগী অৱাৎপা লৈবনা মরম ওইদুনা লৌমীশিংনা লেথী চার্জ মায়োক্নবা তাখি, অমসুং য়ুরিয়াগী ব্লেক মার্কেতিং য়াম্না পাক শন্না তৌখি। ঙসিদি, ফীভম অসি হোংখ্রে। লৌমীশিংনা মতিক চাবা ফর্তিলাইজরশিং ফংলি। কোভিদ-১৯গী অৱাবা মতমদা ফাওবা, ঐখোয়না ঐখোয়গী লৌমীশিংগীদমক ফর্তিলাইজরগী অৱাৎপা লৈহন্দনবা হোৎনখি। এন.দি.এ. লৈঙাক লৈত্রবদি করি ওইরমগনি হায়বসি খল্লু।

মরুপশিং,

এন.দি.এ. সরকার লৈরমদ্রবদি, ঐখোয়গী লৌমীশিং অসি হৌজিকসু ফর্তিলাইজরগীদমক পোলিসকী লেথী-চার্জ মায়োক্নবা তারমগনি। বরৌনি ফর্তিলাইজর ফেক্তরী অসি হৌজিক ফাওবা মথৌ তৌদ্রি। লৈবাক কয়াদা, ফর্তিলাইজরগী বেগ অমগী মমল লুপা ৩,০০০ ওইরি, অদুগা ঐখোয়না ঐখোয়গী লৌমীশিংদা লুপা ৩০০দগী হন্থনা ফংহল্লি। এন.দি.এ. সরকার লৈত্রবদি লৌমীশিংনা য়ুরিয়াগী বেগ অমদা লুপা ৩,০০০ পীবা মথৌ তাগনি। ঐখোয়গী সরকারনা লৌমীশিংবু মরুওইনা লৌরি অমসুং মখোয়গী য়াইফনবা থবক তৌরি। মরম অসিনা য়ুরিয়া অমসুং দি.এ.পি.গী শেলগী চৈরাক অসি কেন্দ্র সরকারনা লৌরি। হৌখিবা চহী তরা অসিদা, য়ুনিয়ন বজেৎকী থোংদা চাউরাক্না লুপা করোর লাখ ১২গী শেনফম ফংহনখ্রে। মসিনা তাকপদি লৈবাক অসিগী লৌমী করোর কয়াগী খুৎতা লুপা করোর ১২গী শেনফম হকথেংননা কনবা ঙম্লে হায়বনি।Top of Form

মরুপশিং,

এন.দি.এ. সরকার য়াওদ্রবদি পি.এম. কিসান সম্মান নিধি স্কিম লৈরম্লোই। স্কিম অসি চহি তরুক্কী মমাংদগী চৎনরক্লি অমসুং হৌজিক ফাওবদা চাউরাক্না লুপা করোর লাখ ৩.৭না লৌমীশিংগী বেঙ্ক একাউন্তশিংদা হকথেংননা ত্রান্সফর তৌখ্রে। দলালি লৈতে, কম্মিসন কক্তে, দিল্লীদগী থারকপা লুপা খুদিংমক লৌমীশিংদা মপুং ফানা য়ৌহল্লি। মমাংদা দলালিশিংনা মখোয়গী শরুক লৌথোকপদগী সরকারগী স্কিমশিংগী কান্নবশিং ফংদনা লৈরম্বা অপীকপা লৌমীশিংনা হৌজিক মখোয়গী শেনফমশিং হকথেংননা ফংলি। অদুবু মসি মোদীগী সরকারনি, মসি নিতিশ জীগী সরকারনি। ঐখোয়না কনাগুম্বা অমত্তবু লৌমীশিংগী হকশিং লৌথোকহল্লোই। কংগ্রেস অমসুং জঙ্গল রাজ সরকারনা লৈঙাক পায়রিঙৈদা, ঐখোয়না লৌমীশিংগী একাউন্তশিংদা হকথেংননা ত্রান্সফর তৌখিবা অদুগী শরুক খরা খক্তমক মখোয়না পীখি। ফত্তবা লৈঙাক্না মসি তৌবা ঙম্লোই। লৌমীশিংগী য়াইফ-থৌরাংগীদমক্তা তশেংনা কৎথোক্লবা সরকার খক্তনা অসিগুম্বা থৌনা ফবা থবক অসি পাংথোকপা ঙম্মী।

মরুপশিং,

কংগ্রেস ওইগেরা নৎত্রগা জঙ্গল রাজ ওইগেরা, লৌমীশিংগী অৱা-অনাগী মতাংদা মখোয়না করিগুম্বা অমত্তা খল্লমদে। মমাংঙৈদা, ঈশিং ঈচাও, ঈকং থোকপা নত্ত্রগা লেনগা লোয়ননা নোংলৈ নুশিৎ তৌবা মতমদা, মখোয়না লৌমীশিংবু মরনাই থাদোকলমখি। অদুম ওইনমক, অদোম্না ২০১৪দা এন.দি.এ.দা থাজবা থমখিবা মতমদা, ঐহাক্না মসি ময়েক শেংনা হায়জখি মদুদি অসিগুম্বা মীৎয়েং চংদবা অসি মখা চত্থরোই। এন.দি.এ. সরকারনা পি.এম. ফাসল বিমা য়োজনা হৌদোকখি। মসিগী মখাদা মহৌশাগী অৱা-অনাশিংনা মরম ওইদুনা লৌমীশিংদা মাংখিবা অদুগীদমক্তা চাউরাক্না লুপা করোর লাখ ২ পীখ্রে।

মরুপশিং,

‌এন.দি.এ. সরকারনা লম লৈতবা অমসুং অপীকপা লৌমীশিংগী শেন্থোক হেনগৎহন্নবা শা-ষন য়োকপদা থবক পায়খৎলি। হায়রিবা সেক্তর অসিনা খুঙ্গংশিংদা লৈরিবা ঐখোয়গী ইচিল-ইনাওশিংবু 'লাখপতি দিদিস' ওইহনবদা মরু ওইবা থৌদাং অমা লৌরি। হৌজিক ফাওবদা, লৈবাক শীনবা থুংনা লৈরিবা নুপী করোর ১.২৫ রোম্না মাইলস্তোন অসি ফংখ্রে। বিহারগী জীভিকা দিদি লিশিং কয়া য়াওনা। হৌখিবা চহি তরা অসিদা, ভারতকী মহৈ-মরোং পুথোকপা অসি তন করোর ১৪দগী তন করোর ২৪দা য়াম্না চাউনা হেনগৎলে। চহি ১০ খক্তদা, শঙ্গোম পুথোকপা হেনগৎলকখি, মসিনা ভারতপু মালেমগী খ্বাইদগী চাউবা শঙ্গোম পুথোকপা লৈবাক অমা ওইনা মপাঙ্গল কনখৎহনখি। মসিগী মাইপাকপসিদা বিহারনা অচৌবা থৌদাং লৌরি। ঙসিদি বিহারগী কোওপরেতিব মিল্ক য়ুনিয়নশিংনা নোংমদা মিল্ক লিতর লাখ ৩০ ফংহল্লে। মসিনা মরম ওইদুনা, চহি খুদিংগী লুপা করোর ৩,০০০ হেন্না বিহারগী শা-ষন য়োক্লিবশিং, মরুওইনা ঐখোয়গী ইমাশিং অমসুং ইচে-ইচলশিংগী একাউন্তশিংদা হকথেংননা ত্রান্সফর তৌরি।

মরুপশিং,

রাজীব রঞ্জন জী (ললান সিংহ জী) না দাইরী সেক্তরবু মপাঙ্গল কনখৎহন্নবা হোৎনরিবা অসিদা ঐহাক নুংঙাইবা ফাওই। মহাক্কী থৌনাগীদমক থাগৎপা ফোংদোকচরি। বিহারদা মরুওইবা প্রোজেক্ত অনি য়াম্না থুনা লোইশিল্লগনি। অহানবা অসি মোতিহারীদা সেন্তর ওফ এক্সিলেন্সনি, মসিনা খ্বাইদগী ফবা ইন্দিজিনস কাও ব্রিদশিং পুথোকপদা মতেং পাংগনি। অনিশুবদা, বরৌনিদা মিল্ক প্রোসেসিং প্লান্ত অমা শেমগৎলি। মসিনা লমদম অসিগী লৌমী লাখ অহুমদা কান্নবা ফংহল্লগনি অমসুং নহাশিংদা থবক ফংহল্লগনি।

মরুপশিং,

ঐখোয়গী বোতমেনশিং অমসুং ঙামীশিং অসি মমাংগী সরকারশিংনা মতম শাংনা য়েংশিনখিদে, মতেং অমত্তা ফংখিদে অমসুং কান্নবা অমত্তা ফংখিদে। অহানবা ওইনা, ঐখোয়না কিসান ক্রেদিৎ কার্দকী খুদোংচাবা ঙা ফার্মরশিংদা ফংহল্লে। অসিগুম্বা থৌরাংশিং অসিগী মহৈ ওইনা, বিহারনা ঙা পুথোকপদা চাউনা খুমাং চাউশিল্লে। মুখ্য মন্ত্রীনা চুম্না পনখিবগুম্না, বিহার অসি মতম অমদা ঙা পুশিল্লক্তুনা মীপাল তাংলম্মি, অদুবু ঙসিদি মশা-মরোমদোম লেপচবা ঙম্লে। ঐহাক্না ২০১৩গী মীখলগী কেম্পেন মনুংদা ঐহাক্না মফম অসিদা লাকখিবা অদু নীংশিংলি। মতম অদুদা ঐহাক্না হায়খি মদুদি ঐহাক্না য়াম্না অঙকপা অমা ফোংদোকখি মদুদি মতৌ করম্না ঈশিংগী রিসোর্স মরাং কায়না লৈবা স্তেৎ অমনা ঙা পুশিল্লকপগী মপাল তাংলিবনো? ঙসি, বিহারগী ঙাগী দিমান্দ অসি রাজ্য অসিগী মনুংদগী মপুং ফানা ফংহল্লিবা অসি উবদা ঐহাক চাউথোকচৈ । চহী তরাগী মমাংদা, বিহার অসি ভারতকী খ্বাইদগী ঙা পুথোকপা রাজ্য তরাগী মনুংদা লৈরম্মি। ঙসিদি, মসিনা খ্বাইদগী ফবা মঙাগী মনুংদা অমা ওইরে। ফিসরিজ সেক্তরদা ঐখোয়না মীৎয়েং চঙনা থবক পায়খৎলিবা অসিনা অপীকপা লৌমীশিং অমসুং ঙা ফাবশিংদা কান্নবা কয়া ফংহল্লে। গঙ্গাগী দোলফিনশিংগীদমক খঙনরিবা ভাগলপুরদসু নমামি গঙ্গে ইনিসিয়েতিবকী মখাদা অচৌবা মাই পাকপা অমা উবা ফংলে।

মরুপশিং,

হৌখিবা চহিশিংদা, সরকারগী হোৎনবনা ভারতকী লৌউ-শিংউগী এক্সপোর্ত্তা মশক থোক্না হেনগৎহনখ্রে। মসিনা লৌমীশিংগী মহৈ-মরোংশিংগী মমল হেনগৎহনখি। লৌউ-শিংউগী পোত্থোক কয়া অমা অহানবা ওইনা এক্সপোর্ত তৌরি। মখোয়শিংগী মনুংদা বিহারগী মখানা য়াওরি। মখানা অসি লৈবাক অসিগী সহরগী য়ুমথোংশিংদা অয়ুক্কী চিঞ্জাক্কী তঙাইফদবা শরুক অমা ওইরক্লি। ঐহাক্না চহিদা য়ামদ্রবদা নুমিৎ ৩০০দি মখানা চাইই। মসি হৌজিক মালেমগী কৈথেলশিংদা পুথোক্কদৌরিবা সুপরফুদ অমনি। মখানা লৌমীশিংবু মতেং পাংনবা, চহি অসিগী বজেৎ অসিদা মখানা বোর্দ অমা লিংখৎনবা য়াওরি। বোর্দ অসিনা বিহারগী লৌমীশিংবু পোত্থোক পুথোকপা, প্রোসেসিং তৌবা, ভেল্যু এদিসন অমসুং মার্কেতিং তৌবদা মতেং পাংগনি। মসিনা মখানা অসি মালেমগী থাক্তা মপুং ফানা পোতেন্সিয়েল ফংহনগনি।

মরুপশিং,

বজেৎ অসিনা বিহারগী লৌমীশিং অমসুং নহারোলশিংগীদমক অতোপ্পা অচৌবা এনাউন্সমেন্ত অমা পুরক্লি। বিহার অসি নোংপোক থংবা ভারতকী ফুদ প্রোসেসিং ইন্দস্ত্রীগী মরুওইবা মফম অমা ওইগদৌরি। রাজ্য অসিদা নেস্নেল ইন্সতিত্যুৎ ওফ ফুদ তেক্নোলোজী অমসুং ওন্তপ্রিন্যুওরশিপ অমা লিংখৎকনি। মসিগী মথক্তা, বিহার শিনবা থুংনা এগ্রিকলচরদা এক্সলেন্সকী অনৌবা সেন্তর অহুম লিংখৎকনি। অসিগুম্বা সেন্তরশিংগী মনুংদা অমা শরগলপুরদা লৈগনি অমসুং মসিদা মমিং লৈরবা জর্দালু মখলগী হৈনৌদা মীৎয়েং থমগনি। অতোপ্পা সেন্তর অনি অসি মুঙ্গর অমসুং বক্সরদা খামেন অশিনবা, তিলহৌ অমসুং অলুগী লৌমীশিংদা মতেং পাংনবা লিংখৎকনি। মসিনা লৌমীশিংগী খ্বাইদগী ফবা কান্নবা ফংহন্নবা ৱারেপশিং লৌবদা ঐখোয়না ফিরেপ চেৎনা লেপ্লিবা অদু উৎলি।

মরুপশিং,

ভারত অসি তেক্সতাইলগী মরুওইবা এক্সপোর্তর অমা ওইনা খোঙজেল য়াংনা থোরক্লি। লৈবাক শিনবা থুংনা তেক্সতাইল ইন্দস্ত্রী মপাঙ্গল কনখৎহন্নবা খোঙথাং কয়া অমা পায়খৎলি। ভগলপুরদা হায়নৈ মদুদি মফমসিদা লৈরিবা উমংশিংনা ফাওবা সনা পুথোকই – মসিনা সিল্ক পুথোকপগী লমদমসিগী ইনাক খুল্লবা চৎনবী অসিগী খুদম অমনি। ভগলপুরী সিল্ক অমসুং তুসার সিল্ক অসি ভারত শিনবা থুংনা মমিং চৎলি অমসুং মালেমগী কৈথেলশিংদা মখোয়গী দিমান্দ লেপ্তনা হেনগৎলক্লি। সিল্ক ইন্দস্ত্রী মখা তানা পুক্নিং থৌগৎনবা, সেন্ত্রেল গবর্নমেন্তনা ফেব্রিক অমসুং য়র্ন দাইয়িং য়ুনিৎশিং, ফেব্রিক প্রিন্তিং য়ুনিৎশিং অমসুং ফেব্রিক প্রোসেসিং ফেসিলিতীশিং শেমগৎপদা মীৎয়েং থম্লি। খোঙথাংশিং অসিনা ভগলপুরগী ফী শাবীশিংগীদমক মোদর্ন ইনফ্রাস্ত্রকচর ফংহল্লগনি। মসিনা মখোয়গী পোৎথোকশিং মালেমগী মফম খুদিংমক্তা য়ৌহল্লগনি।

মরুপশিং,

এন.দি.এ. সরকারনা বিহারগী মতম কুইনদগী লৈরক্লবা শিংনবশিংগী মরক্তগী অমা ওইরিবা মশিং য়াম্লবা তুরেলশিংগী মথক্তা লৈরিবা থোংশিংগী অৱাৎপা অসিসু কোকহন্নবা হোৎনরি। মতীক চাবা থোংশিং লৈতবনা মতম শাংনা ত্রান্সপোর্ত অমসুং কন্নেক্তিবিতীদা অৱাবা কয়া থোকহল্লি। মসিগী ৱারোইশিন পুরক্নবা, ঐখোয়না বিহার শিনবা থুংনা থোং কয়া অমা খোঙজেল য়াংনা শেমগৎলি। অসিগুম্বা মরুওইবা প্রোজেক্তশিংগী মরক্তগী অমাদি গঙ্গাগী মথক্তা লম্বী মরিগী থোং অমা শাবনি। মসি লুপা করোর ১,১০০ হেনবগী শেনফমগা লোয়ননা খোঙজেল য়াংনা চংশিল্লি।

মরুপশিং,

চহি খুদিংগী ঈশিং-ঈচাউনা বিহারদা য়াম্না চাউনা মাং-তাকহনদুনা মতম পুম্নমক্তা অৱাবা অমা ওইদুনা লাক্লি। মসিবু কোকহন্নবা, ঐখোয়গী সরকারনা লুপা করোর লিশিং কয়াগী প্রোজেক্তশিং অয়াবা পীখ্রে। চহি অসিগী বজেৎ অসিদা ৱেস্তর্ন কোসি কেনেল ই.আর.এম. প্রোজেক্তকীদমক্তা অখন্নবা মতেং য়াওরি। প্রোজেক্ত অসি লোইরবা মতুংদা, মিথিলা লমদমদা লম হেক্তর ৫০,০০০দা ঈশিং য়োক্তুনা, লৌমী ইমুং লাখ কয়াদা কান্নবা ফংহল্লগনি অমসুং লৌউ-শিংউগী পোত্থোক হেনগৎহল্লগনি।

মরুপশিং,

এন.দি.এ. সরকারনা লৌমীশিংগী শেন্থোক হেনগৎহন্নবগীদমক তোঙান তোঙানবা থাক্তা থবক পায়খৎলি। মসিনা লৌউ-শিংউগী পোত্থোক হেনগৎহন্নবা, মনা-মশিং অমসুং থাউগী মহৈ-মরোংদা মশা-মরোমদোম লেপচবা ঙমহন্নবা, ফুদ প্রোসেসিং ইন্দস্ত্রীশিং পাকথোক চাউথোকহন্নবা অমসুং ভারতকী লৌমীশিংগী পোত্থোকশিং মালেমগী কৈথেলশিংদা য়ৌহন্নবা থৌরাং কয়া পায়খৎলি। ঐহাক্কী মীৎয়েংদি মালেমগী চাকশঙ খুদিংমক্তা ভারতকী লৌমীশিংনা পুথোকপা য়ামদ্রবদা প্রদক্ত অমা শরুক তমহনবা হায়বসিনি। চহি অসিগী বজেৎ অসিনা পি.এম. ধন ধন্যা য়োজনাগী অচৌবা এনাউন্সমেন্তগা লোয়ননা মসিগী ভিজন অসি মাংলোমদা পুখৎলি। স্কিম অসিগী মখাদা, লৈবাক শিনবা থুংনা খ্বাইদগী হন্থনা মহৈ-মরোং পুথোকপা জিলা ১০০ মশক খঙদোক্লগনি অমসুং হায়রিবা মফমশিং অসিদা লৌউ-শিংউবু পুক্নিং থৌগৎনবা অখন্নবা কেম্পেন অমা হৌদোক্লগনি। মসিগী মথক্তা, হৱায়দা মশা-মরোমদোম লেপচবা ঙমহন্নবা পান্দম থমদুনা হোৎনগনি। মসিনা লৌমীশিংবু হৱাইগী এম.এস.পি. প্রোক্যুরমেন্ত হেনগৎহনগনি।

মরুপশিং,

ঙসিগী নুমিৎ অসি অতোপ্পা মরম অমনা মরু ওই। ঐখোয়গী সরকারনা লৈবাক শীনবা থুংনা ফার্মর প্রদ্যুসর ওর্গনাইজেসন (এফ.পি.ও.) ১০,০০০ লিংখৎনবা পান্দম থম্লি। ঐখোয়না পান্দম অসি মায় পাক্না ফংলে হায়না ঐহাক্না নুংঙাইবা ফোংদোকচরি। বিহারনা খাগরিয়া দিস্ত্রিক্ততা রেজিস্তর তৌরবা ১০,০০০শুবা এফ.পি.ও. হোস্ত তৌবগী ইকাই খুম্নখি। মসিদা মরুওইনা চুজাক, লফোই অমসুং ফৌ থাবদা মীৎয়েং থমগনি। এফ.পি.ও. অসি ওর্গনাইজেসন অমখক্তমক নত্তে, মসি লৌমীশিংদা অচৌবা কৈথেলশিংদা হকথেংননা চংহন্দুনা মখোয়গী শেন্থোক হেনগৎহল্লিবা অহোংবা পুরকপা ঙম্বা ফোর্স অমনি। এফ.পি.ও.শিংগী খুত্থাংদা, ঐখোয়গী লৌমী ইচিল-ইনাওশিংনা মমাংদা ফংলমদবা খুদোংচাবশিং ফংহল্লে। হৌজিক্কী ওইনা, লৈবাক অসিদা চাউরাক্না লৌমী লাখ ৩০ এফ.পি.ও.শিংগা মরী লৈনরি, মসিগী মনুংদা চাদা ৪০দি নুপীশিংনি। হায়রিবা ওর্গনাইজেসনশিং অসিনা হৌজিক্তি লুপা করোর লিশিং কয়াগী এগ্রিকলচর বিজিনেস পায়খৎলি। ঐহাক্না এফ.পি.ও. ১০,০০০গী মেম্বর পুম্নমকপু থম্মোয় শেংনা নুংঙাইবা ফোংদোকচরি।

মরুপশিং,

এন.দি.এ. সরকারনা বিহারগী ইন্দস্ত্রীএল দিবেলপমেন্তদা চপ মান্ননা অচেৎপা ৱাফম থম্লি। বিহার সরকারনা ভগলপুরদা অচৌবা পাৱর প্লান্ত অমা লিংখৎলি, অমসুং মসিনা অপনবা লৈতনা কোল সপ্লাই ফংহল্লগনি। মসিগী খুদোংচাবা ফংহন্নবা, কেন্দ্র সরকারনা কোল লিঙ্কেজকী অয়াবা পীখ্রে। মফম অসিদা পুথোক্লিবা ইলেক্ত্রিসিতী অসিনা বিহারগী চাউখৎপা হেনগৎহল্লগনি অমসুং মাগী নহারোলশিংগীদমক অনৌবা থবক ফংবগী খুদোংচাবা লৈহল্লগনি হায়না ঐহাক্না থাজবা থম্লি।

মরুপশিং,

পুর্বোদয়াগী খুত্থাংদা চাউখৎলবা ভারত অমা থোরক্কনি অমসুং বিহার অসি নোংপোক থংবা ভারতকী খ্বাইদগী মরু ওইবা য়ুম্বীনি। বিহার অসি রাজ্য অমা খক্তা নত্তে, মসি ভারতকী ইনাক খুল্লবা কলচরেল হেরিতেজকী খুদম অমনি। অদুম ওইনমক, কংগ্রেস-আর.জে.দি.গী মতম শাংনা লান্না লৈঙাকলমখিবা অসিনা বিহারবু মাঙ-তাকহনখি অমসুং বিহারগী মীংচৎ থিহনখি। অদুবু হৌজিক্তি, বিহারনা চাউখৎলবা ভারত অমগী মরক্তা মাগী মতিক চাবা মফম অদু অমুক হন্না ফংবা হৌরে। মসিগা মান্ননা অরিবা মতমগী চাউখৎলবা ভারতকী মনুংদা পাতালিপুত্রানা মরুওইবা মফম অমা লৌরম্মি। ঐখোয় পুম্নমক্না পান্দম অসি ফংবা ঙম্নবা হোৎনমিন্নরি।

এন.দি.এ. সরকারনা বিহারদা কনেক্তিবিতী মোদর্নাইজ তৌনবা, মাগী রোদ নেৎৱার্ক পাকথোক চাউথোকহন্নবা অমসুং মীয়ামগী য়াইফনবা স্কিমশিং পায়খৎনবা মপুং ফানা থৌরাং তৌরি। মুঙ্গরদগী ভগলপুরগী খুত্থাংদা মির্জা চৌকি ফাওবগী অনৌবা হাইৱে অমা চাউরাক্না লুপা করোর ৫০০০গী শেনফমগা লোয়ননা শেমগৎলি। মসিগী মথক্তা, ভগলপুরদগী অন্সদিহা ফাওবগী লেন মরিগী লম্বী পাকথোকহনবগী থবক অথুবা মতমদা হৌরগনি। ভারত সরকারনা বিক্রমশিলাদগী কতারিয়া ফাওবদা অনৌবা রেলৱে লাইন অমসুং রেলগী থোং অমা শাবদা অয়াবা পীখ্রে।

মরুপশিং,

ভগলপুর অসি পুৱারী অমসুং নাৎকী ওইবা য়াম্না মরু ওইবা মফম অমনি। বিক্রমশিলা য়ুনিভর্সিতীগী মতমদদি, মসি মালেমগী ওইবা সেন্তর ওফ লর্নিং ওইরম্মি। ঐখোয়না নালন্দা য়ুনিভর্সিতীগী অরিবা মতমগী মীংচৎশিংবু নৌহৌনা হিংগৎহন্নবা মিসন অমা হৌদোক্লে। হৌজিত্তি, নালন্দাগী খোঙজং মখা চত্থদুনা, বিক্রমশিলাদা সেন্ত্রেল য়ুনিভর্সিতী অমসু লিংখৎলি। কেন্দ্র সরকারনা অথুবা মতমদা মসিগী এম্বিসিয়স প্রোজেক্ত অসিগী থবক হৌরগনি। ঐহাক্না নিতিশ জী, বিজয় জী, সমরত জী অমসুং বিহার সরকারগী তীম পুম্নমকপু মখোয়গী ৱাখল্লোন অসি মপুং ফাহন্নবগীদমক থম্মোয় শেংনা থাগৎপা ফোংদোকচরি।

মরুপশিং,

এন.দি.এ. সরকারনা ভারতকী শিংথানীংঙাই ওইরবা হেরিতেজ অসি ঙাক-শেন্দুনা থমদুনা হেন্না অফবা তুংলমচৎ অমা শেমগৎপদা অচেৎপা ৱাফম থম্লি। অদুম ওইনমক, জঙ্গল রাজ ফ্রেক্সন অসিনা ঐখোয়গী হেরিতেজ অমসুং থাজবগী মায়োক্তা য়ানিংদবা পোক্লি। হৌজিক্কী মতমসিদা, ভারতকী থাজবা, অমত্তা ওইবা অমসুং অপুনবগী খ্বাইদগী চাউবা থৌরম ওইরিবা একতা কা মহা কুম্ভ প্রয়াগরাজদা পাংথোক্লি। য়ুরোপকী অপুনবা মীশিংদগী হেনবা মীওইশিংনা স্নান তৌদুনা মসিগী অচৌবা থৌরম অসিদা শরুক য়াখ্রে। বিহারগী খুঙ্গং খুদিংমক্তগী ভক্তশিংসু মসিগী অশেংবা থৌরম অসিদা লাক্লি।

অদুম ওইনমক, জঙ্গল রাজকী লুচিংবশিংনা মহা কুম্ভবু ইকাইবা খংদনা ইকাই খুম্নদবা উৎলি, মসিগী ইকাই খুম্নরবা কুম্মৈ অসিদা ইকাই খুম্নদবা উৎলি। মখোয় অসি রাম মন্দির শাবদা নুংঙাইতবা পোকখিবা মীওইশিংনি, অমসুং হৌজিক্তি মখোয়না মহা কুম্ভবু লান্না উহন্নবগীদমক তৌবা য়াবা অদু তৌরি। অদুবু ঐহাক্না থাজবা থম্লি মদুদি বিহারনা অশেংবা চৎনবী অসিবু ইকাই খুম্নদবা মীওইশিংবু কৈদৌঙৈদসু ঙাকপীরোইদবনি।

মরুপশিং,

ঐখোয়না বিহারবু চাউখৎপগী অনৌবা য়ুগ অমগী মায়কৈদা পুখৎনবা ঐখোয়গী অচেৎপা ফিরেপ অদুদা ফিরেপ চেৎনা লেপ্পৌ। ঐহাক্না অমুক্কা হন্না লৈবাক অসিগী লৌমীশিং অমসুং বিহারগী মীয়ামদা নুংঙাইবা ফোংদোকচরি।

হৌজিক, ঐগা লোয়ননা হায়বিয়ু –

ভারত মাতা কী জয়!

ভারত মাতা কী জয়!

হন্না-হন্না থাগৎচরি!

খঙহঞ্জবা: মসি পি.এম.গী ৱারোলগী চাউরাকপা ৱাহন্থোক্নি। তশেংবা ৱারোলদি হিন্দীদা পীখি।

***