ഭാരത് മാതാ കീ ജയ്!

അംഗരാജ് ദൻവീർ കർണന്റെ ഈ നാട്ടിൽ നിന്നും, മഹർഷി മേഹിയുടെ താപസ്സസ്ഥലത്തു നിന്നും, ഭഗവാൻ വാസുപൂജ്യയുടെ നാട്ടിൽ നിന്നും, ലോകപ്രശസ്തമായ വിക്രമശില മഹാവിഹാരം സ്ഥിതി ചെയ്യുന്ന സ്ഥലത്തു നിന്നും, ബാബ ബുധനാഥിന്റെ പുണ്യഭൂമിയിൽ നിന്നും എല്ലാ സഹോദരീ സഹോദരന്മാർക്കും എന്റെ ആശംസകൾ!

വേദിയിൽ ബഹുമാനപ്പെട്ട ഗവർണർ ആരിഫ് മുഹമ്മദ് ഖാൻ ജിയും നമ്മുടെ പ്രിയപ്പെട്ട മുഖ്യമന്ത്രി നിതീഷ് കുമാർ ജിയും ഉണ്ട്, ബീഹാറിന്റെ വികസനത്തിനായുള്ള സമർപ്പണത്തിന് അദ്ദേഹം പരക്കെ പ്രശംസിക്കപ്പെടുന്നു. എന്റെ ബഹുമാനപ്പെട്ട കാബിനറ്റ് സഹപ്രവർത്തകരായ ശിവരാജ് സിംഗ് ചൗഹാൻ ജി, ജിതൻ റാം മഞ്ചി ജി, ലല്ലൻ സിംഗ് ജി, ഗിരിരാജ് സിംഗ് ജി, ചിരാഗ് പാസ്വാൻ ജി എന്നിവരും കേന്ദ്ര സഹമന്ത്രി ശ്രീ രാംനാഥ് താക്കൂർ ജി, ബീഹാർ ഉപമുഖ്യമന്ത്രി സാമ്രാട്ട് ചൗധരി ജി, വിജയ് സിൻഹ ജി, സംസ്ഥാന മന്ത്രിമാർ, പൊതുജന പ്രതിനിധികൾ, വിശിഷ്ട വ്യക്തികൾ, ബീഹാറിലെ എന്റെ പ്രിയപ്പെട്ട സഹോദരീ സഹോദരന്മാർ എന്നിവരും സന്നിഹിതരാണ്.

ഇന്ന്, രാജ്യത്തുടനീളമുള്ള നിരവധി മുഖ്യമന്ത്രിമാരും, മന്ത്രിമാരും, കോടിക്കണക്കിന് കർഷകരും ഈ പരിപാടിയിൽ ഞങ്ങളോടൊപ്പം ചേർന്നു. അവർക്കെല്ലാവർക്കും ഞാൻ എന്റെ ആദരപൂർവ്വമായ അഭിവാദ്യങ്ങൾ അർപ്പിക്കുന്നു.

സുഹൃത്തുക്കളേ,

മഹാ കുംഭമേളയുടെ സമയത്ത് മന്ദ്രാഞ്ചൽ എന്ന പുണ്യഭൂമി സന്ദർശിക്കാൻ കഴിയുന്നത് ഒരു വലിയ പദവിയാണ്. വിശ്വാസം, പൈതൃകം, വിക്ഷിത് ഭാരതത്തിന്റെ (വികസിത ഇന്ത്യ) വാഗ്ദാനങ്ങളുടെ സംഗമസ്ഥാനമാണിത്. ധീര രക്തസാക്ഷി തിലക മാഞ്ചിയുടെ നാടാണിത്, സിൽക്ക് സിറ്റി എന്നും ഇത് അറിയപ്പെടുന്നു. ബാബ അജ്ഗൈബിനാഥിന്റെ ഈ പുണ്യഭൂമിയിൽ മഹാശിവരാത്രിക്കുള്ള ഒരുക്കങ്ങൾ ഇപ്പോൾ സജീവമായി നടക്കുന്നു. അത്തരമൊരു ശുഭകരമായ സമയത്താണ് പ്രധാനമന്ത്രി കിസാൻ സമ്മാൻ നിധിയുടെ മറ്റൊരു ഗഡു രാജ്യത്തുടനീളമുള്ള കോടിക്കണക്കിന് കർഷകർക്ക് കൈമാറാൻ എനിക്ക് ബഹുമതി ലഭിച്ചത്. ഒരു ക്ലിക്കിലൂടെ ഏകദേശം 22,000 കോടി രൂപ രാജ്യത്തുടനീളമുള്ള കർഷകരുടെ അക്കൗണ്ടുകളിലേക്ക് നേരിട്ട് നിക്ഷേപിച്ചു. ഞാൻ ബട്ടൺ അമർത്തുമ്പോൾ, വിവിധ സംസ്ഥാനങ്ങളിൽ നിന്നുള്ള തത്സമയ ദൃശ്യങ്ങൾ എനിക്ക് കാണാൻ കഴിഞ്ഞു, ഇവിടെ പോലും, കൈമാറ്റം സ്ഥിരീകരിക്കാൻ ആളുകൾ ആകാംക്ഷയോടെ മൊബൈൽ ഫോണുകൾ പരിശോധിക്കുന്നത് എന്റെ കണ്ണുകളിൽ കാണാൻ കഴിഞ്ഞു . അവരുടെ കണ്ണുകളിലെ മിന്നൽ അവരുടെ ആശ്വാസത്തിന്റെയും സന്തോഷത്തിന്റെയും അളവുകോലുകൾ വെളിപ്പെടുത്തി.

സുഹൃത്തുക്കളേ,

കിസാൻ സമ്മാൻ നിധിയുടെ ഇന്നത്തെ ഗഡുവായി ബീഹാറിലെ 75 ലക്ഷത്തിലധികം കർഷക കുടുംബങ്ങളെ ഉൾപ്പെടുത്തിയിട്ടുണ്ട്. ഇന്ന് ഏകദേശം 1,600 കോടി രൂപ ബീഹാറിലെ കർഷകരുടെ അക്കൗണ്ടുകളിലേക്ക് നേരിട്ട് ക്രെഡിറ്റ് ചെയ്തു. ബീഹാറിലെയും മുഴുവൻ രാജ്യത്തിലെയും എല്ലാ കർഷക കുടുംബങ്ങൾക്കും എന്റെ ഹൃദയംഗമമായ അഭിനന്ദനങ്ങളും ആശംസകളും നേരുന്നു.

സുഹൃത്തുക്കളേ,

വികസിത  ഭാരതം നാല് ശക്തമായ തൂണുകളിൽ നിലകൊള്ളുന്നുവെന്ന് ചെങ്കോട്ടയുടെ കൊത്തളത്തിൽ നിന്ന് ഞാൻ പ്രസ്താവിച്ചു - ദരിദ്രർ, നമ്മുടെ കർഷകർ, നമ്മുടെ യുവാക്കൾ, നമ്മുടെ രാജ്യത്തെ സ്ത്രീകൾ. കേന്ദ്രത്തിലെ എൻ‌ഡി‌എ സർക്കാരായാലും ബീഹാറിലെ നിതീഷ് ജിയുടെ നേതൃത്വത്തിലുള്ള സർക്കാരായാലും, കർഷക ക്ഷേമം ഞങ്ങളുടെ ഏറ്റവും മുൻ‌ഗണനയായി തുടരുന്നു. കഴിഞ്ഞ ദശകത്തിൽ, നമ്മുടെ കർഷകർ നേരിടുന്ന എല്ലാ വെല്ലുവിളികളും പരിഹരിക്കുന്നതിന് ഞങ്ങൾ അക്ഷീണം പ്രവർത്തിച്ചിട്ടുണ്ട്. ഉയർന്ന നിലവാരമുള്ള വിത്തുകൾ, താങ്ങാനാവുന്നതും മതിയായതുമായ വളങ്ങൾ, ശരിയായ ജലസേചന സൗകര്യങ്ങൾ, രോഗങ്ങളിൽ നിന്ന് അവരുടെ കന്നുകാലികളെ സംരക്ഷിക്കൽ, പ്രകൃതിദുരന്തങ്ങൾ മൂലമുള്ള നഷ്ടങ്ങളിൽ നിന്നുള്ള സംരക്ഷണം എന്നിവയാണ് അവർക്ക് വേണ്ടത്.മുമ്പ്, ഈ മേഖലകളിലെല്ലാം കർഷകർ പ്രതിസന്ധിയിലായിരുന്നു. മൃഗങ്ങൾക്കുള്ള കാലിത്തീറ്റ കഴിക്കുന്നവർക്ക് ഒരിക്കലും മാറ്റം കൊണ്ടുവരാൻ കഴിയില്ല. എന്നാൽ , എൻ‌ഡി‌എ സർക്കാർ ഈ സ്ഥിതിവിശേഷം മാറ്റിമറിച്ചു. സമീപ വർഷങ്ങളിൽ, കർഷകർക്കായി നൂറുകണക്കിന് ആധുനിക വിത്ത് ഇനങ്ങൾ ഞങ്ങൾ അവതരിപ്പിച്ചു. യൂറിയ ക്ഷാമം കാരണം കർഷകർക്ക് ലാത്തിച്ചാർജ് നേരിടേണ്ടി വന്ന ഒരു കാലമുണ്ടായിരുന്നു, യൂറിയയുടെ കരിഞ്ചന്ത വ്യാപകമായിരുന്നു. ഇന്ന് സ്ഥിതി മാറി - കർഷകർക്ക് ആവശ്യത്തിന് വളങ്ങൾ ലഭ്യമാണ്. കോവിഡ് -19 പ്രതിസന്ധിയിലും, നമ്മുടെ കർഷകർക്ക് വളക്ഷാമം ഉണ്ടാകില്ലെന്ന് ഞങ്ങൾ ഉറപ്പാക്കി. എൻ‌ഡി‌എ സർക്കാർ ഇല്ലായിരുന്നെങ്കിൽ സാഹചര്യം  എങ്ങനെയിരിക്കും എന്നൊന്ന് സങ്കൽപ്പിക്കുക.

സുഹൃത്തുക്കളെ,

എൻ‌ഡി‌എ സർക്കാർ ഇല്ലായിരുന്നെങ്കിൽ, നമ്മുടെ കർഷകർ ഇപ്പോഴും വളത്തിന് പോലീസിന്റെ ലാത്തി ചാർജിന് വിധേയരാകുമായിരുന്നു. ബറൗണി വള ഫാക്ടറി ഇപ്പോഴും പ്രവർത്തിക്കില്ലായിരുന്നു. പല രാജ്യങ്ങളിലും ഒരു ചാക്ക് വളത്തിന് 3,000 രൂപ വിലവരും, എന്നാൽ നമ്മൾ അത് കർഷകർക്ക് 300 രൂപയിൽ താഴെ വിലയ്ക്ക് നൽകുന്നു. എൻ‌ഡി‌എ സർക്കാർ ഇല്ലായിരുന്നെങ്കിൽ, കർഷകർ ഒരു ചാക്ക് യൂറിയയ്ക്ക് 3,000 രൂപ നൽകാൻ നിർബന്ധിതരാകുമായിരുന്നു.നമ്മുടെ സർക്കാർ കർഷകർക്ക് മുൻഗണന നൽകുകയും അവരുടെ ക്ഷേമത്തിനായി പ്രവർത്തിക്കുകയും ചെയ്യുന്നു, അതുകൊണ്ടാണ് യൂറിയയുടെയും ഡിഎപിയുടെയും സാമ്പത്തിക ഭാരം കേന്ദ്ര സർക്കാർ ഏറ്റെടുത്തിരിക്കുന്നത്. കഴിഞ്ഞ ദശകത്തിൽ, ഏകദേശം 12 ലക്ഷം കോടി രൂപ ഇതിനായി കേന്ദ്ര ബജറ്റ് വഴി നൽകിയിട്ടുണ്ട്. അല്ലാത്തപക്ഷം ഈ തുക  കർഷകരുടെ പോക്കറ്റിൽ നിന്ന് വളങ്ങൾക്കായി ചെലവഴിക്കേണ്ടി വരുമായിരുന്നു. ഇതിനർത്ഥം രാജ്യത്തുടനീളമുള്ള കോടിക്കണക്കിന് കർഷകരുടെ കൈകളിൽ 12 ലക്ഷം കോടി രൂപയുടെ നേരിട്ടുള്ള  ലാഭം എത്തി എന്നാണ്.

സുഹൃത്തുക്കളേ,

എൻ‌ഡി‌എ സർക്കാർ ഇല്ലായിരുന്നെങ്കിൽ പ്രധാനമന്ത്രി കിസാൻ സമ്മാൻ നിധി പദ്ധതി നിലനിൽക്കില്ലായിരുന്നു. ഈ പദ്ധതി ഏകദേശം ആറ് വർഷമായി പ്രവർത്തിക്കുന്നുണ്ട്, ഇതുവരെ ഏകദേശം 3.7 ലക്ഷം കോടി രൂപ നേരിട്ട് കർഷകരുടെ ബാങ്ക് അക്കൗണ്ടുകളിലേക്ക് മാറ്റിയിട്ടുണ്ട്. ഇടനിലക്കാരില്ല, കമ്മീഷൻ കുറവില്ല - ഡൽഹിയിൽ നിന്ന് അയയ്ക്കുന്ന ഓരോ രൂപയും പൂർണ്ണമായും കർഷകരിലേക്ക് എത്തുന്നു. ഇടനിലക്കാർ തങ്ങളുടെ വിഹിതം തട്ടിയെടുക്കുന്നതിനാൽ മുമ്പ് സർക്കാർ പദ്ധതികളുടെ ആനുകൂല്യങ്ങൾ നഷ്ടപ്പെട്ട ചെറുകിട കർഷകർക്ക് ഇപ്പോൾ നേരിട്ട് അവരുടെ കുടിശ്ശിക ലഭിക്കുന്നു. എന്നാൽ ഇത് മോദിയുടെ സർക്കാരാണ്, ഇത് നിതീഷ് ജിയുടെ സർക്കാരാണ് - കർഷകരുടെ അവകാശങ്ങൾ കവർന്നെടുക്കാൻ ഞങ്ങൾ ആരെയും അനുവദിക്കില്ല.കോൺഗ്രസും കാടൻ ഭരണകൂടവും അധികാരത്തിലിരുന്നപ്പോൾ, ഞങ്ങൾ നേരിട്ട് കർഷകരുടെ അക്കൗണ്ടുകളിലേക്ക് കൈമാറ്റം  ചെയ്തതിന്റെ ഒരു ചെറിയ ഭാഗം മാത്രമേ അവർ അനുവദിച്ചിരുന്നുള്ളൂ. ഒരു അഴിമതി നിറഞ്ഞ സർക്കാരിന് ഒരിക്കലും ഇത് നേടാൻ കഴിയില്ല. കർഷകരുടെ ക്ഷേമത്തിനായി ആത്മാർത്ഥമായി സമർപ്പിതരായ ഒരു സർക്കാരിന് മാത്രമേ ഇത്തരമൊരു നേട്ടം കൈവരിക്കാൻ കഴിയൂ.

സുഹൃത്തുക്കളേ,

കോൺഗ്രസ് ഭരണകൂടമായാലും ജംഗിൾ രാജ് ഭരണകൂടമായാലും കർഷകരുടെ ബുദ്ധിമുട്ടുകൾ അവർക്ക് ഒരിക്കലും ഒരു ആശങ്കയായിട്ടില്ല. മുൻകാലങ്ങളിൽ, വെള്ളപ്പൊക്കമോ വരൾച്ചയോ ആലിപ്പഴ വർഷമോ ഉണ്ടായപ്പോഴെല്ലാം അവർ കർഷകരെ അവരുടെ വിധിയിലേക്ക് തള്ളിവിട്ടു. എന്നാൽ 2014 ൽ നിങ്ങൾ എൻ‌ഡി‌എയിൽ വിശ്വാസം അർപ്പിച്ചപ്പോൾ, ഞാൻ വ്യക്തമാക്കി - ഈ അവഗണന തുടരില്ല. എൻ‌ഡി‌എ സർക്കാർ പ്രധാനമന്ത്രി ഫസൽ ബീമ യോജന അവതരിപ്പിച്ചു, ഇതിന്റെ കീഴിൽ പ്രകൃതിദുരന്തങ്ങൾ മൂലമുണ്ടായ നഷ്ടങ്ങൾക്ക് നഷ്ടപരിഹാരമായി ഏകദേശം 2 ലക്ഷം കോടി രൂപ കർഷകർക്ക് നൽകി.

സുഹൃത്തുക്കളേ,

ഭൂരഹിതരും ചെറുകിടക്കാരുമായ  കർഷകരുടെ വരുമാനം വർദ്ധിപ്പിക്കുന്നതിനായി എൻ‌ഡി‌എ സർക്കാർ മൃഗസംരക്ഷണത്തെ സജീവമായി പ്രോത്സാഹിപ്പിക്കുന്നു. ഗ്രാമങ്ങളിലെ നമ്മുടെ സഹോദരിമാരെ 'ലഖ്പതി ദീദി' (ലക്ഷാധിപതി സഹോദരിമാരായി)കളാക്കി മാറ്റുന്നതിൽ ഈ മേഖലയും നിർണായക പങ്ക് വഹിക്കുന്നു. ഇതുവരെ, രാജ്യത്തുടനീളമുള്ള ഏകദേശം 1.25 കോടി സ്ത്രീകൾ ഈ സുപ്രധാന നില  കൈവരിച്ചിട്ടുണ്ട്, അതിൽ ബീഹാറിൽ നിന്നുള്ള ആയിരക്കണക്കിന് ജീവിക ദീദികളും ഉൾപ്പെടുന്നു. കഴിഞ്ഞ ദശകത്തിൽ, ഭാരതത്തിന്റെ പാൽ ഉൽപാദനം ശ്രദ്ധേയമായ വളർച്ച കൈവരിച്ചു - 14 കോടി ടണ്ണിൽ നിന്ന് 24 കോടി ടണ്ണായി. വെറും പത്ത് വർഷത്തിനുള്ളിൽ, പാൽ ഉൽപാദനം കുതിച്ചുയർന്നു, ലോകത്തിലെ ഏറ്റവും വലിയ പാൽ ഉൽപ്പാദക രാജ്യമെന്ന ഇന്ത്യയുടെ സ്ഥാനം ശക്തിപ്പെടുത്തി.ഈ നേട്ടത്തിന് ബീഹാർ ഗണ്യമായ സംഭാവന നൽകിയിട്ടുണ്ട്. ഇന്ന്, ബീഹാറിലെ സഹകരണ പാൽ യൂണിയനുകൾ പ്രതിദിനം 30 ലക്ഷം ലിറ്റർ പാൽ സംഭരിക്കുന്നു. തൽഫലമായി, ബീഹാറിലെ കന്നുകാലി കർഷകരുടെ, പ്രത്യേകിച്ച് നമ്മുടെ അമ്മമാരുടെയും സഹോദരിമാരുടെയും അക്കൗണ്ടുകളിലേക്ക് എല്ലാ വർഷവും 3,000 കോടിയിലധികം രൂപ നേരിട്ട് കൈമാറുന്നു.

സുഹൃത്തുക്കളേ,

ക്ഷീരമേഖലയെ ശക്തിപ്പെടുത്തുന്നതിനുള്ള ശ്രമങ്ങൾക്ക് രാജീവ് രഞ്ജൻ ജി (ലല്ലൻ സിംഗ് ജി) കാര്യക്ഷമമായി നേതൃത്വം നൽകുന്നതിൽ എനിക്ക് സന്തോഷമുണ്ട്. അദ്ദേഹത്തിന്റെ സമർപ്പണത്തിന് നന്ദി, ബീഹാറിൽ രണ്ട് പ്രധാന പദ്ധതികൾ വേഗത്തിൽ പൂർത്തീകരണത്തിലേക്ക് അടുക്കുന്നു. ആദ്യത്തേത് മോത്തിഹാരിയിലെ സെന്റർ ഓഫ് എക്സലൻസാണ്, ഇത് മികച്ച തദ്ദേശീയ പശു ഇനങ്ങളുടെ വികസനത്തെ പിന്തുണയ്ക്കും. രണ്ടാമത്തേത് ബറൗണിയിലെ പാൽ സംസ്കരണ പ്ലാന്റാണ്, ഇത് മേഖലയിലെ മൂന്ന് ലക്ഷം കർഷകർക്ക് പ്രയോജനം ചെയ്യുകയും യുവാക്കൾക്ക് തൊഴിലവസരങ്ങൾ സൃഷ്ടിക്കുകയും ചെയ്യും.

സുഹൃത്തുക്കളേ,

മുൻ സർക്കാരുകൾ നമ്മുടെ ബോട്ടുടമകളേയും  മത്സ്യത്തൊഴിലാളികളെയും വളരെക്കാലമായി അവഗണിച്ചിരുന്നു, യാതൊരു പിന്തുണയോ ആനുകൂല്യങ്ങളോ അവർക്ക്  ലഭിച്ചിരുന്നില്ല. ആദ്യമായി, ഞങ്ങൾ കിസാൻ ക്രെഡിറ്റ് കാർഡ് സൗകര്യം മത്സ്യ കർഷകർക്ക് വ്യാപിപ്പിച്ചു. അത്തരം സംരംഭങ്ങളുടെ ഫലമായി, ബീഹാർ മത്സ്യ ഉൽപാദനത്തിൽ ശ്രദ്ധേയമായ പുരോഗതി കൈവരിച്ചു. മുഖ്യമന്ത്രി ശരിയായി ചൂണ്ടിക്കാണിച്ചതുപോലെ, ബീഹാർ ഒരുകാലത്ത് മത്സ്യ ഇറക്കുമതിയെ ആശ്രയിച്ചിരുന്നു, എന്നാൽ ഇന്ന് അത് സ്വയംപര്യാപ്തമായി. 2013 ലെ തിരഞ്ഞെടുപ്പ് പ്രചാരണ വേളയിൽ ഞാൻ നടത്തിയ സന്ദർശനം ഞാൻ വ്യക്തമായി ഓർക്കുന്നു - ഇത്രയും സമൃദ്ധമായ ജലസ്രോതസ്സുകളുള്ള ഒരു സംസ്ഥാനത്തിന് എങ്ങനെ മത്സ്യ ഇറക്കുമതിയെ ആശ്രയിക്കാൻ കഴിയും?
ഇന്ന്, ബീഹാറിന്റെ മത്സ്യ ആവശ്യം സംസ്ഥാനത്തിനുള്ളിൽ നിന്ന് തന്നെ നിറവേറ്റുന്നത് കാണുന്നതിൽ എനിക്ക് അഭിമാനമുണ്ട്. ഒരു ദശാബ്ദം മുമ്പ്, ഇന്ത്യയിലെ ഏറ്റവും മികച്ച പത്ത് മത്സ്യ ഉൽപ്പാദന സംസ്ഥാനങ്ങളിൽ ബീഹാർ ഇടം നേടിയിരുന്നു. ഇന്ന്, അത് ആദ്യ അഞ്ച് സ്ഥാനങ്ങളിൽ ഇടം നേടിയിട്ടുണ്ട്. മത്സ്യബന്ധന മേഖലയോടുള്ള ഞങ്ങളുടെ ശ്രദ്ധാപൂർവ്വമായ സമീപനം ചെറുകിട കർഷകർക്കും മത്സ്യത്തൊഴിലാളികൾക്കും ഗണ്യമായി ഗുണം ചെയ്തു. ഗംഗയിലെ ഡോൾഫിനുകൾക്ക് പേരുകേട്ട ഭഗൽപൂരും നമാമി ഗംഗെ സംരംഭത്തിന് കീഴിൽ മികച്ച വിജയം നേടിയിട്ടുണ്ട്.

സുഹൃത്തുക്കളേ,

സമീപ വർഷങ്ങളിൽ, ഗവൺമെന്റിന്റെ ശ്രമങ്ങൾ ഭാരതത്തിന്റെ കാർഷിക കയറ്റുമതിയിൽ ഗണ്യമായ വർദ്ധനവിന് കാരണമായി. ഇത് കർഷകരുടെ ഉൽപ്പന്നങ്ങൾക്ക് മികച്ച വില ഉറപ്പാക്കി. നിരവധി കാർഷിക ഉൽപ്പന്നങ്ങൾ ഇപ്പോൾ ആദ്യമായി കയറ്റുമതി ചെയ്യുന്നു, അവയിൽ ബീഹാറിലെ മഖാനയും ഉൾപ്പെടുന്നു. രാജ്യത്തുടനീളമുള്ള നഗരങ്ങളിൽ  വീടുകളിലെ പ്രഭാതഭക്ഷണത്തിന്റെ ഒരു പ്രധാന ഭാഗമായി മഖാന മാറിയിരിക്കുന്നു. വ്യക്തിപരമായി, ഞാൻ വർഷത്തിൽ കുറഞ്ഞത് 300 ദിവസമെങ്കിലും മഖാന കഴിക്കുന്നു. ആഗോള വിപണികളിൽ ഇപ്പോൾ അവതരിപ്പിക്കേണ്ട ഒരു സൂപ്പർഫുഡാണിത്. മഖാന കർഷകരെ പിന്തുണയ്ക്കുന്നതിന്, ഈ വർഷത്തെ ബജറ്റിൽ ഒരു മഖാന ബോർഡ് സ്ഥാപിക്കുന്നതും ഉൾപ്പെടുന്നു. ലോക വേദിയിൽ മഖാന അതിന്റെ പൂർണ്ണ ശേഷിയിൽ എത്തുന്നുവെന്ന് ഉറപ്പാക്കാൻ ഉൽപ്പാദനം, സംസ്കരണം, മൂല്യവർദ്ധനവ്, വിപണനം എന്നിങ്ങനെ എല്ലാ മേഖലകളിലും ഈ ബോർഡ് ബീഹാറിലെ കർഷകരെ സഹായിക്കും.

സുഹൃത്തുക്കളേ,

ബീഹാറിലെ കർഷകർക്കും യുവാക്കൾക്കും വേണ്ടി ബജറ്റ് മറ്റൊരു പ്രധാന പ്രഖ്യാപനം കൊണ്ടുവന്നിരിക്കുന്നു. കിഴക്കൻ ഇന്ത്യയിലെ ഭക്ഷ്യ സംസ്കരണ വ്യവസായത്തിന്റെ ഒരു പ്രധാന കേന്ദ്രമായി ബീഹാർ മാറാൻ പോകുന്നു. സംസ്ഥാനത്ത് ഒരു നാഷണൽ ഇൻസ്റ്റിറ്റ്യൂട്ട് ഓഫ് ഫുഡ് ടെക്നോളജി ആൻഡ് എന്റർപ്രണർഷിപ്പ് സ്ഥാപിക്കും. കൂടാതെ, ബീഹാറിലുടനീളം മൂന്ന് പുതിയ കാർഷിക മികവിന്റെ കേന്ദ്രങ്ങൾ സ്ഥാപിക്കും. ഈ കേന്ദ്രങ്ങളിലൊന്ന് ഭഗൽപൂരിൽ സ്ഥിതിചെയ്യും, ഇത് പ്രശസ്തമായ ജർദാലു ഇനം മാമ്പഴത്തിൽ ശ്രദ്ധ കേന്ദ്രീകരിക്കും. തക്കാളി, ഉള്ളി, ഉരുളക്കിഴങ്ങ് കർഷകരെ പിന്തുണയ്ക്കുന്നതിനായി മറ്റ് രണ്ട് കേന്ദ്രങ്ങൾ മുൻഗറിലും ബക്സറിലും സ്ഥാപിക്കും. കർഷകരുടെ മികച്ച താൽപ്പര്യങ്ങൾ നിറവേറ്റുന്ന തീരുമാനങ്ങൾ എടുക്കുന്നതിനുള്ള ഞങ്ങളുടെ അചഞ്ചലമായ പ്രതിബദ്ധത ഇത് പ്രകടമാക്കുന്നു.

സുഹൃത്തുക്കളേ,

ഭാരതം തുണിത്തരങ്ങളുടെ ഒരു പ്രധാന കയറ്റുമതി രാജ്യമായി  അതിവേഗം വളർന്നുവരികയാണ്. രാജ്യവ്യാപകമായി തുണി വ്യവസായത്തെ ശക്തിപ്പെടുത്തുന്നതിന് നിരവധി സംരംഭങ്ങൾ ഏറ്റെടുത്തിട്ടുണ്ട്. ഭഗൽപൂരിൽ ഒരു ചൊല്ലുണ്ട്, ഇവിടുത്തെ മരങ്ങൾ പോലും സ്വർണ്ണം തുപ്പുന്നു - പട്ടുൽപാദനത്തിൽ ഈ പ്രദേശത്തിന്റെ സമ്പന്നമായ പാരമ്പര്യത്തിന്റെ തെളിവാണിത്. ഭഗൽപുരി പട്ടും തുസ്സാർ പട്ടും ഭാരതത്തിലുടനീളം പ്രശസ്തമാണ്, കൂടാതെ ആഗോള വിപണികളിൽ അവയുടെ ആവശ്യം ക്രമാനുഗതമായി വർദ്ധിച്ചുകൊണ്ടിരിക്കുകയാണ്. പട്ടു വ്യവസായത്തെ കൂടുതൽ പ്രോത്സാഹിപ്പിക്കുന്നതിനായി, കേന്ദ്ര സർക്കാർ തുണിത്തരങ്ങളുടെയും നൂലിന്റെയും ഡൈയിംഗ് യൂണിറ്റുകൾ, തുണി അച്ചടി യൂണിറ്റുകൾ, തുണി സംസ്കരണ സൗകര്യങ്ങൾ എന്നിവ വികസിപ്പിക്കുന്നതിൽ ശ്രദ്ധ കേന്ദ്രീകരിക്കുന്നു. ഈ സംരംഭങ്ങൾ ഭഗൽപൂരിലെ നെയ്ത്തുകാർക്ക് ആധുനിക അടിസ്ഥാന സൗകര്യങ്ങൾ നൽകും, അവരുടെ ഉൽപ്പന്നങ്ങൾ ലോകത്തിന്റെ എല്ലാ കോണുകളിലും എത്തിച്ചേരുന്നുവെന്ന് ഉറപ്പാക്കും.

സുഹൃത്തുക്കളേ,

ബിഹാറിന്റെ ദീർഘകാല വെല്ലുവിളികളിലൊന്നായ നിരവധി നദികൾക്ക് കുറുകെയുള്ള പാലങ്ങളുടെ കുറവ് എൻ‌ഡി‌എ സർക്കാർ പരിഹരിക്കുന്നു. മതിയായ പാലങ്ങളുടെ അഭാവം ഗതാഗതത്തിനും കണക്റ്റിവിറ്റിക്കും വളരെക്കാലമായി ബുദ്ധിമുട്ടുകൾ സൃഷ്ടിച്ചിരുന്നു. ഇത് പരിഹരിക്കുന്നതിനായി, ബീഹാറിലുടനീളം ഒന്നിലധികം പാലങ്ങൾ ഞങ്ങൾ വേഗത്തിൽ നിർമ്മിക്കുന്നു. അത്തരത്തിലുള്ള ഒരു പ്രധാന പദ്ധതിയാണ് ഗംഗയ്ക്ക് കുറുകെ നാലുവരി പാലത്തിന്റെ നിർമ്മാണം, ഇത് 1,100 കോടിയിലധികം രൂപ മുതൽമുടക്കിൽ ത്വരിതഗതിയിൽ പുരോഗമിക്കുന്നു.

സുഹൃത്തുക്കളേ,

വെള്ളപ്പൊക്കം ബീഹാറിൽ എപ്പോഴും കടുത്ത വെല്ലുവിളി ഉയർത്തുകയും,വർഷം തോറും വ്യാപകമായ നാശനഷ്ടങ്ങൾ വരുത്തിവയ്ക്കുകയും  ചെയ്യുന്നു. ഇത് ലഘൂകരിക്കുന്നതിനായി, ആയിരക്കണക്കിന് കോടി രൂപയുടെ പദ്ധതികൾക്ക് നമ്മുടെ സർക്കാർ അംഗീകാരം നൽകിയിട്ടുണ്ട്. ഈ വർഷത്തെ ബജറ്റിൽ വെസ്റ്റേൺ കോസി കനാൽ ഇആർഎം പദ്ധതിക്ക് പ്രത്യേക സഹായം ഉൾപ്പെടുന്നു. ഈ പദ്ധതി പൂർത്തിയാകുമ്പോൾ, മിഥില മേഖലയിലെ 50,000 ഹെക്ടർ ഭൂമി ജലസേചനത്തിന് കീഴിൽ കൊണ്ടുവരും, ഇത് ലക്ഷക്കണക്കിന് കർഷക കുടുംബങ്ങൾക്ക് പ്രയോജനം ചെയ്യും, കൂടാതെ കാർഷിക ഉൽപ്പാദനക്ഷമത ഗണ്യമായി മെച്ചപ്പെടുത്തും.

സുഹൃത്തുക്കളേ,

കർഷകരുടെ വരുമാനം വർദ്ധിപ്പിക്കുന്നതിനായി എൻ‌ഡി‌എ സർക്കാർ ഒന്നിലധികം മേഖലകളിൽ പ്രവർത്തിക്കുന്നു. കാർഷിക ഉൽ‌പാദനം വർദ്ധിപ്പിക്കുന്നതിനും, പയർവർഗ്ഗങ്ങളിലും എണ്ണക്കുരുക്കളിലും സ്വയംപര്യാപ്തത കൈവരിക്കുന്നതിനും, ഭക്ഷ്യ സംസ്കരണ വ്യവസായങ്ങൾ വികസിപ്പിക്കുന്നതിനും, ഇന്ത്യൻ കർഷകരുടെ ഉൽ‌പ്പന്നങ്ങൾ ആഗോള വിപണികളിൽ എത്തുന്നുണ്ടെന്ന് ഉറപ്പാക്കുന്നതിനും തുടർച്ചയായ സംരംഭങ്ങൾ നടപ്പിലാക്കുന്നു. ലോകത്തിലെ എല്ലാ അടുക്കളയിലും ഇന്ത്യൻ കർഷകർ കൃഷി ചെയ്യുന്ന ഒരു ഉൽപ്പന്നമെങ്കിലും ഉണ്ടായിരിക്കുക എന്നതാണ് എന്റെ ദർശനം. ഈ വർഷത്തെ ബജറ്റ് ഈ ദർശനത്തോടെയാണ്  മുന്നോട്ട് കൊണ്ടുപോകുന്നത് ,അതും പ്രധാനമന്ത്രി ധൻ ധന്യ യോജനയുടെ പ്രഖ്യാപനത്തോടെ.ഈ പദ്ധതി പ്രകാരം, രാജ്യത്തുടനീളമുള്ള ഏറ്റവും കുറഞ്ഞ വിള ഉൽപാദനമുള്ള 100 ജില്ലകളെ കണ്ടെത്തുകയും, ഈ പ്രദേശങ്ങളിലെ കൃഷി പ്രോത്സാഹിപ്പിക്കുന്നതിനായി ഒരു പ്രത്യേക കാമ്പെയ്‌ൻ ആരംഭിക്കുകയും ചെയ്യും. കൂടാതെ, പയർവർഗ്ഗങ്ങളിൽ സ്വയംപര്യാപ്തത കൈവരിക്കുന്നതിന് ലക്ഷ്യമിട്ടുള്ള ശ്രമങ്ങൾ നടത്തി , കർഷകരെ കൂടുതൽ കൃഷി ചെയ്യാൻ പ്രോത്സാഹിപ്പിക്കുകയും പയർവർഗ്ഗങ്ങളുടെ എംഎസ്‌പി സംഭരണം മെച്ചപ്പെടുത്തുകയും ചെയ്യും.

 സുഹൃത്തുക്കളേ,

മറ്റൊരു കാരണത്താലും ഇന്ന് ഒരു സുപ്രധാന ദിവസമാണ്. രാജ്യത്തുടനീളം 10,000 കർഷക ഉൽ‌പാദക സംഘടനകൾ (FPO-കൾ) സ്ഥാപിക്കുക എന്ന മഹത്തായ ലക്ഷ്യം നമ്മുടെ സർക്കാർ നിശ്ചയിച്ചിരുന്നു. ഈ ലക്ഷ്യം വിജയകരമായി നേടിയെന്ന് പ്രഖ്യാപിക്കുന്നതിൽ എനിക്ക് സന്തോഷമുണ്ട്. ചോളം, വാഴ, നെൽകൃഷി എന്നിവയിൽ ശ്രദ്ധ കേന്ദ്രീകരിക്കുന്ന ഖഗരിയ ജില്ലയിൽ രജിസ്റ്റർ ചെയ്ത 10,000-ാമത് FPO ആതിഥേയത്വം വഹിക്കാനുള്ള ബഹുമതി ബീഹാറിനുണ്ട്. ഒരു FPO വെറുമൊരു സംഘടനയല്ല; വലിയ വിപണികളിലേക്ക് നേരിട്ട് പ്രവേശനം നൽകുന്നതിലൂടെ കർഷകരുടെ വരുമാനം വർദ്ധിപ്പിക്കുന്ന ഒരു പരിവർത്തന ശക്തിയാണിത്.എഫ്‌പി‌ഒകൾ വഴി, നമ്മുടെ കർഷക സഹോദരീ സഹോദരന്മാർക്ക് മുമ്പ് ലഭിക്കാതിരുന്ന അവസരങ്ങൾ ഇപ്പോൾ ലഭിക്കുന്നു. നിലവിൽ, രാജ്യത്തെ ഏകദേശം 30 ലക്ഷം കർഷകർ എഫ്‌പി‌ഒകളുമായി ബന്ധപ്പെട്ടിരിക്കുന്നു, അവരിൽ 40% സ്ത്രീകളാണ്. ഈ സംഘടനകൾ ഇപ്പോൾ ആയിരക്കണക്കിന് കോടി രൂപയുടെ കാർഷിക ബിസിനസ്സ് നടത്തുന്നു. 10,000 എഫ്‌പി‌ഒകളിലെ എല്ലാ അംഗങ്ങൾക്കും എന്റെ ഹൃദയംഗമമായ അഭിനന്ദനങ്ങൾ.

സുഹൃത്തുക്കളേ,

ബിഹാറിന്റെ വ്യാവസായിക വികസനത്തിന് എൻ‌ഡി‌എ സർക്കാർ തുല്യമായി പ്രതിജ്ഞാബദ്ധമാണ്. ഭഗൽപൂരിൽ ബീഹാർ സർക്കാർ ഒരു വലിയ വൈദ്യുത നിലയം സ്ഥാപിക്കുന്നു, അവിടെ തടസ്സമില്ലാത്ത കൽക്കരി വിതരണം ലഭിക്കും. ഇത് സുഗമമാക്കുന്നതിന്, കേന്ദ്ര സർക്കാർ കൽക്കരി ബന്ധം അംഗീകരിച്ചു. ഇവിടെ ഉൽ‌പാദിപ്പിക്കുന്ന വൈദ്യുതി ബീഹാറിന്റെ വളർച്ചയെ നയിക്കുമെന്നും ഇവിടത്തെ യുവാക്കൾക്ക് പുതിയ തൊഴിലവസരങ്ങൾ സൃഷ്ടിക്കുമെന്നും എനിക്ക് ഉറപ്പുണ്ട്.

സുഹൃത്തുക്കളേ,

പൂർവ്വോദയയിലൂടെ(പൂർവ്വപ്രദേശം-കിഴക്കൻ പ്രദേശം,ഉദയം- ഉയർച്ച)ഒരു വികസിത ഇന്ത്യ ഉയർന്നുവരും, കിഴക്കൻ ഇന്ത്യയുടെ ഏറ്റവും പ്രധാനപ്പെട്ട സ്തംഭമായി ബീഹാർ നിലകൊള്ളുന്നു. ബീഹാർ വെറുമൊരു സംസ്ഥാനമല്ല; അത് ഭാരതത്തിന്റെ സമ്പന്നമായ സാംസ്കാരിക പൈതൃകത്തിന്റെ പ്രതീകമാണ്. എന്നിരുന്നാലും, കോൺഗ്രസ്-ആർജെഡിയുടെ ദീർഘകാല ദുർഭരണം ബീഹാറിനെ തകർച്ചയിലാഴ്ത്തി, അതിന്റെ പ്രശസ്തിക്ക് കളങ്കം വരുത്തി. എന്നാൽ ഇപ്പോൾ, പുരാതനവും  സമ്പന്നവുമായ ഭാരതത്തിൽ പാടലീപുത്രം പ്രാധാന്യം നേടിയിരുന്നതുപോലെ, വികസിത ഇന്ത്യയിൽ ബീഹാർ അതിന്റെ ശരിയായ സ്ഥാനം വീണ്ടെടുക്കുകയാണ്. ഈ ദർശനം കൈവരിക്കുന്നതിന് നാമെല്ലാവരും ഒരുമിച്ച് അക്ഷീണം പ്രവർത്തിക്കുന്നു.

ബീഹാറിലെ കണക്റ്റിവിറ്റി ആധുനികവൽക്കരിക്കുന്നതിനും, റോഡ് ശൃംഖല വികസിപ്പിക്കുന്നതിനും, പൊതുജനക്ഷേമ പദ്ധതികൾ നടപ്പിലാക്കുന്നതിനും എൻ‌ഡി‌എ സർക്കാർ പൂർണ്ണമായും പ്രതിജ്ഞാബദ്ധമാണ്. മുൻഗേറിൽ നിന്ന് ഭഗൽപൂർ വഴി മിർസ ചൗക്കിയിലേക്ക് 5,000 കോടി രൂപയുടെ പുതിയ ഹൈവേ നിർമ്മിക്കുന്നു. കൂടാതെ, ഭഗൽപൂരിൽ നിന്ന് അൻഷ്ദിഹയിലേക്കുള്ള നാലുവരി പാതയുടെ വീതി കൂട്ടൽ ഉടൻ ആരംഭിക്കും. വിക്രംശിലയിൽ നിന്ന് കടാരിയയിലേക്ക് ഒരു പുതിയ റെയിൽവേ ലൈനിന്റെയും റെയിൽ പാലത്തിന്റെയും നിർമ്മാണത്തിനും ഇന്ത്യാ ഗവൺമെന്റ് അനുമതി നൽകിയിട്ടുണ്ട്.

സുഹൃത്തുക്കളേ,

ഭഗൽപൂരിന് ചരിത്രപരവും സാംസ്കാരികവുമായ വലിയ പ്രാധാന്യമുണ്ട്. വിക്രംശില സർവകലാശാലയുടെ കാലഘട്ടത്തിൽ, അത് ഒരു ആഗോള പഠന കേന്ദ്രമായിരുന്നു. നളന്ദ സർവകലാശാലയുടെ പുരാതന മഹത്വം പുനരുജ്ജീവിപ്പിക്കാനും ആധുനിക ഭാരതവുമായി അതിനെ സമന്വയിപ്പിക്കാനുമുള്ള ഒരു ദൗത്യം ഞങ്ങൾ ഇതിനകം ആരംഭിച്ചിട്ടുണ്ട്. ഇപ്പോൾ, നളന്ദയുടെ കാൽച്ചുവടുകൾ പിന്തുടർന്ന്, വിക്രംശിലയിൽ ഒരു കേന്ദ്ര സർവകലാശാലയും സ്ഥാപിക്കപ്പെടുന്നു. ഈ അഭിലാഷ പദ്ധതിക്കായി കേന്ദ്ര സർക്കാർ ഉടൻ തന്നെ പ്രവർത്തനങ്ങൾ ആരംഭിക്കും. ഈ ദർശനം നിറവേറ്റുന്നതിൽ സമർപ്പിതമായി പ്രവർത്തിച്ചതിന് നിതീഷ് ജി, വിജയ് ജി, സാമ്രാട്ട് ജി,എന്നിവരെ കൂടാതെ  മുഴുവൻ ബീഹാർ സർക്കാർ സംഘത്തിനും എന്റെ ഹൃദയംഗമമായ അഭിനന്ദനങ്ങൾ.

സുഹൃത്തുക്കളെ,

ഭാരതത്തിന്റെ മഹത്തായ പൈതൃകം സംരക്ഷിക്കുന്നതിനൊപ്പം ശോഭനമായ ഒരു ഭാവി കെട്ടിപ്പടുക്കുന്നതിനും എൻ‌ഡി‌എ സർക്കാർ പ്രതിജ്ഞാബദ്ധമാണ്. എന്നിരുന്നാലും, കാടൻ ഭരണകൂട  വിഭാഗത്തിന് നമ്മുടെ പൈതൃകത്തോടും വിശ്വാസത്തോടും കടുത്ത നീരസമുണ്ട്. ഈ നിമിഷം, ഭാരതത്തിന്റെ വിശ്വാസത്തിന്റെയും ഐക്യത്തിന്റെയും ഐക്യത്തിന്റെയും ഏറ്റവും വലിയ ആഘോഷമായ ഏകതാ കാ മഹാ കുംഭം പ്രയാഗ്‌രാജിൽ നടക്കുന്നു. യൂറോപ്പിലെ മുഴുവൻ ജനസംഖ്യയേക്കാൾ കൂടുതൽ ആളുകൾ ഇതിനകം പുണ്യസ്നാനം ചെയ്തുകൊണ്ട് ഈ മഹത്തായ പരിപാടിയിൽ പങ്കെടുത്തു. ബീഹാറിലെ എല്ലാ ഗ്രാമങ്ങളിൽ നിന്നുമുള്ള ഭക്തരും ഈ പുണ്യവേളയ്ക്കായി എത്തിച്ചേരുന്നു. 

എന്നിട്ടും, കാടൻ ഭരണകൂട  നേതാക്കൾ മഹാ കുംഭമേളയോട്  ലജ്ജയില്ലാതെ അനാദരവ് കാണിക്കുകയും ഈ ആദരണീയമായ ഉത്സവത്തെ അപമാനിക്കുകയും ചെയ്യുന്നു. രാമക്ഷേത്ര നിർമ്മാണത്തിൽ രോഷാകുലരായ അതേ ആളുകളാണ് ഇവർ, ഇപ്പോൾ മഹാ കുംഭമേളയെ അപകീർത്തിപ്പെടുത്താൻ അവർ ഒരു കല്ലും പാഴാക്കുന്നില്ല. എന്നാൽ ഈ പവിത്രമായ പാരമ്പര്യത്തെ അപമാനിക്കുന്നവരോട് ബീഹാർ ഒരിക്കലും ക്ഷമിക്കില്ലെന്ന് എനിക്ക് ഉറപ്പുണ്ട്.

സുഹൃത്തുക്കളേ,

ബീഹാറിനെ സമൃദ്ധിയുടെ ഒരു പുതിയ യുഗത്തിലേക്ക് നയിക്കാനുള്ള നമ്മുടെ  പ്രതിബദ്ധതയിൽ ഞങ്ങൾ ഉറച്ചുനിൽക്കുന്നു. ഒരിക്കൽ കൂടി, രാജ്യത്തെ കർഷകർക്കും ബീഹാറിലെ ജനങ്ങൾക്കും എന്റെ അഭിനന്ദനങ്ങൾ അറിയിക്കുന്നു.

ഇപ്പോൾ, എന്നോടൊപ്പം പറയൂ—

ഭാരത് മാതാ കീ ജയ്!

ഭാരത് മാതാ കീ ജയ്!

വളരെ നന്ദി!

നിരാകരണവ്യവസ്ഥ: പ്രധാനമന്ത്രിയുടെ പ്രസംഗത്തിന്റെ ഏകദേശ വിവർത്തനമാണിത്. യഥാർത്ഥ പ്രസംഗം ഹിന്ദിയിലാണ് നടത്തിയത്.

****