ইকায়খুম্নরবা,

ভুতানগী প্রধান মন্ত্রী, ঐগী মরুপ দাসো সেরিং তোবগে জি, সোল বোর্দগী চিয়ার্মেন সুধির মেহতা, ভাইস চিয়ার্মেন হন্সমুখ অধিয়া, উদ্যোগকী লুচিংবশিং অমসুং তুংলমচৎনা ঙাইদুনা লৈরবা ঐগী নহা ওইরিবা মরুপশিং।

মরুপশিং,

ঐগী থম্মোয়না পামজবা থৌরমশিংগী মনুংদা ঙসিগী থৌরম অসি অদুগুম্বা থৌরম অমনি। লৈবাক শেমগৎনবগীদমক, হেন্না ফবা মীয়াম শেমগৎপা অসি তঙাইফদে। লনাই মীওইশিং ফগৎলকপদগী লৈবাক শেমগৎপা হৌরকই। কনাগুম্বা মীওই অমনা অচৌবা মাইপাকপা পাম্লবদি, মদ মীয়ামদগী খক্ত হৌরকই। অফবা লুচিংবশিং শেমগৎপা হায়বসি য়াম্না মরুওই অমসুং মতম অসিগী দরকার ওইবনি। মরম অদুনা, স্কুল ওফ অলতিমেত লিদরশিপ( সোল) লিংখৎপা অসি য়াম্না মরুওই অমসুং মসি বিকসিত ভারত অমগী মাইকৈদা থাংজিনবা অচৌবা খোঙথাং অমনি। মহৈলোয়শঙ অসিগী মমিং ‘সোল’ খক থোনবা নত্তনা, মসি ভারতকী খুন্নাইগী পুন্সিগী থৱায় ওইরগনি। মিসন অসি পায়খৎলিবশিং অমসুং মসিগা লোয়নরিবা শক্নাইরবা মীওইশিং ঐনা থাগৎচরি। গিফ সিতি ময়াদা স্কুল ওফ অলতিমেত লিদরশিপকী অচৌবা কেম্পস অমা লৈরগনি। ঙসি চিয়ার্মেন্না ঐঙোন্দা কেম্পস অসিগী নমুনা অমা উৎলে, মসি আর্কিতেকচরগী মীৎয়েংদা মাংজিল থাগনি হায়না ঐনা খল্লি।

মরুপশিং,

ঙসি, স্কুল ওফ অলতিমেত লিদরশিপ-সোলনা মসিগী খোঙচত্ত অচৌবা খোঙথাং অমা থাংলকপদা, অদোমগী মাইকৈদা কদাইদনো, অদোমগী পান্দম করিনো হায়বা অদোম নিংশিংগদবনি। শ্বামী বিবেকানন্দনা হায়খি-“ ঐঙোন্দা মপাঙ্গল লৈরবা নুপা অমসুং নুপী ১০০ পীয়ু অমসুং ঐনা ভারত অওনবা পুরক্কনি”। লৈবাক অসি মীনাই ওইবদগী কোকহন্দুনা ভারত অওনবা পুরকপা শ্বামী বিবেকানন্দনা পামখি। করিগুম্বা মহাক্না লুচিংবা ১০০ লৈরবদি, মহাক ভারত নিংতম্বা ফংহনবা খক নত্তনা লৈবাক অসি মালেমগী মকোক্ত লৈহনবা ঙমগনি হায়বা মহাক্না থাজখি। মসিগা অচেৎপা ফিরেপ অসিগা লোয়ননা, মসিগী লাইৱা অসিগা লোয়ননা অদোম মাঙলোমদা চঙশিনগদবনি।

ঙসিদি, ২১শুবা চহিদা বিকসিত ভারত অমা ওইনবা ভারতমচা খুদিংমক অহিং অমসুং নুংথিল থবক শুরি। অসিগুম্বা ফিবম অমদা, মীওই করোর ১৪০ লৈবা লৈবাক অমদা, ঐখোয়না হিরম খুদিংমক্ত অফবা লুচিংবা লৈবা দরকার ওই। রাজনিতিগী লুচিংবা খক নত্তনা, পুন্সিগী হিরম খুদিংমক্ত ২১শুবা চহিচাগী লুচিংবা থৌরাং তৌনবা স্কুল ওফ অলতিমেত লিদরশিপকী অচৌবা থবক অমা লৈরি। অসিগুম্বা লুচিংবশিং স্কুল ওফ অলতিমেত লিদরশিপতগী থোক্লক্তুনা লৈবাক অসিদা মখোয়গী ফিরাল পাইহনবা খক নত্তনা হিরম খুদিংমক্ত মালেমগী ইন্সতিতুসনশিংদা ফিরাল পাইহনগনি হায়না ঐনা থাজৈ। মফম অসিদা ত্রেনিং তৌখিবা নহারোলশিং রাজনিতিদা অনৌবা ফমশিং পায়রকপা য়াবগী ওইথোকপা লৈরি।

মরুপশিং,

লৈবাক অমা চাউখৎপদা, মহৌশাগী লনশিংনা অচৌবা থৌদাং অমা লৌরি, অদুবু অফবা মীওইশিংনা হেন্না চাউবা থৌদাং অমা লৌরি। মহারাষ্ট্রা অমসুং গুজরাত তোখায় তানবা খোঙজং চঙশিনবা মতম অদুদা, ঐখোয় অঙাং ওইরি, অদুবু মতম অদুদা তোখায় তারগা গুজরাত করি তৌগনি হায়না খন্নখি। রাজ্য অসিগী মহৌশাগী লন লৈজদে, খনি লৈতে, কয়লা লৈতে, করি অমতা লৈতে, করি তৌগনি? ঈশিং ফংদে, রাজ্য অসি লৈকংলানি অমসুং অতোপ্পা মাইকৈ অমদা পাকিস্তান লৈরি, মখোয়না করি তৌগনি? গুজরাত্ত খ্বাইদগী মরাং কাইনা ফংবদি থুমনি, মখোয়না করি তৌগনি? অদুবু লুচিংবগী তৌবা ঙম্বা য়েংউ, ঙসি গুজরাত্ত খুদিংমক লৈরে। খুদিংমক লৈহন্নবা শক্তি মীচম মীয়ামদা লৈরে, রাজ্য অসিদা করি অমতা লৈতে হায়দুনা মখোয় ফমদুনা অমসুং লাউ-খোঙদুনা লৈথোক্তে। গুজরাত্ত দাইমন্দ মাইন অমতা লৈতে, অদুবু মালেমগী দাইমন্দ মাইন ১০ গী মনুংদা ৯ দি গুজরাতমচা খরগা শম্নরি। ঐনা হায়নিংলিবদি, মহৌশাগী লনশিং খক নত্তনা, খ্বাইদগী মরুওইবদি হুমেন রিছোর্সনি, মীওইবগী থবক তৌবা ঙম্বা অদুনি, থবক শুনিংবা মীওইনিং অমসুং মসি অদোমগী লোলদা লুচিংবগী থবক হায়না খঙনৈ। ২১শুবা চহিদা, ঐখোয়না অনৌবা থবক পাংথোক্নবা অমসুং স্কিলশিং শীজিন্ননবা লনশিং দরকার ওই। হিরম খুদিংমক্ত স্কিলশিং কয়া য়াম্না মরুওইবগে হায়বা ঙসি ঐখোয়না উরে। মরম অদুনা, লুচিংবা শেমগৎপগী হিরমদসু অনৌবা স্কিলশিং দরকার ওইরে। ঐখোয়না লুচিংবা শেমগৎপগী থবক অসি য়াম্না সাইন্তিফিক ওইবা মওং অমদা য়াম্না য়াংনা পায়খৎকদবনি। মাইকৈ অসিদা অদোমগী ইন্সিতিতুৎ, স্কুল ওফ অলতিমেত লিদরশিপ অসি য়াম্না মরুওইবা থৌদাং অমা লৌরি। মাইকৈ অসিদা অদোম্না থবক পায়খৎপা হৌবদা ঐ য়াম্না হরাওই। ঙসিগী থৌরম অসি অদোমগী অহানবা ওইবা য়াই, অদুবু নেসনেল ইজুকেসন পোলিসি পায়খৎনবা, ষ্টেৎ ইজুকেসন সেক্রতরিশিং, ষ্টেৎ প্রোজেক দিরেক্তরশিং অমসুং অতোপ্পা ওফিসিএলশিংগী ৱার্কশোপশিং পাংথোকখ্রে হায়বা ঐ খঙলে। গুজরাতগী চীফ মিনিষ্টরগী ওফিসকী ষ্টাফশিংগী মরক্ত লুচিংবা শেমগৎনবা চিন্তন সিবির অমা পাংথোকখ্রে। মসি হৌবতা ঙাইরিবনি। স্কুল ওফ অলতিমেত লিদরশিপনা মালেমদা খ্বাইদগী ফবা লুচিংবা পুথোকপা ইন্সতিতুৎ অমা ওইরকপা ঐখোয়দা উহনগদবনি। মসিগীদমক, ঐখোয় কন্না হোৎনগদবনি।

মরুপশিং, 

ঙসিদি ভারত মালেমগী শক্তিগী মফম অমা ওইরক্লে। হিরম খুদিংমক্ত খোঙজেল য়াংখৎনবা, ঐখোয়না মালেম থাক্কী লুচিংবা, মালেমগী লুচিংবা দরকার ওইরে। স্কুল ওফ অলতিমেত লিদরশিপগুম্বা ইন্সতিতুৎশিংনা মাইকৈ অসিদা অহোংবা পুরকপা ঙমগনি। অসিগুম্বা মালেমগী ইন্সতিতুৎশিং অসি ঐখোয়গী অপাম্বা খক নত্তে, ঐখোয়গী দরকার ওইবনি। হিরম খুদিংমক্ত মালেম্না মায়োক্নরিবা খুদোংচাদবশিংগী পাম্বৈশিং পুথোকপা ঙম্বা থৌনা লৈবা লুচিংবা ভারতনা দরকার ওইরি। লুচিংবশিং অদুনা, খুদোংচাদবশিং কোকহনবগা লোয়ননা, মালেমগী ফম্বাক্ত লৈবাক অসিগী দরকার ওইবশিং মরুওইনা পুখৎকদবনি। মালেমগী ওইনা থবক পায়খৎলিবশিংনা মখোয়গী ৱাখল্লোন অদু লমদম অসিগীসু খনবা হায়বসি য়াম্না মরুওই। ভারতকী ৱাখল্লোন অমগা লোয়ননা মাঙলোমদা চঙশিনবা, মালেমগী ৱাখল্লোন খঙবা লনাই মীওইশিং ঐখোয়না থৌরাং তৌগদবনি। অরুবা ৱারেপ লৌনবা, খুদোংথিবা মায়োক্নবা ঙম্নবা অমসুং তুংগী খন্নবা ঐখোয় মতম পুম্নমক্ত থৌরাং তৌগদবনি। করিগুম্বা ঐখোয়না মালেমগী কৈথেলশিং, মালেমগী ইন্সতিতুসনশিংগা লাম্বা তৌনগে হায়রবদি, ঐখোয়না মালেমগী ললোন-ইতিক্কী থবকশিং খঙবা অসিগুম্বা লুচিংবশিং দরকার ওই। মসি স্কুল ওফ অলতিমেত লিদরশিপগী থবক্নি, অদোমগী থবক পাক-চাউরি অমসুং অদোমদা থম্লিবা থাজবা য়াম্না ৱাংলি।

মরুপশিং,

তুংদা, অদোমনা য়াম্না কান্নগদবা অমদি, শক্তি খক পায়নবা লুচিংবা ওইগদবা নত্তে। অনৌবা অমসুং কান্নবা থবক পাংথোকপা ঙম্বা মীওইশিং লুচিংবগী থৌদাংশিং লৌগদবনি। দরকারগী মতুংইন্না লৈবাক অসিগী লনাই মীওইশিং থোক্লকপা য়াই। হায়রিবা লনাই মীওইশিং অসিগী অরুবা ৱাখল খনবা, খুদোংথিবা মায়োক্নবা ঙম্বা অমসুং পাম্বৈ পুথোকপা ঙম্বা ৱাখল চেন্নবা স্কুল ওফ অলতিমেত লিদরশিপনা মহৈলোয়শঙ অমা ওইগদবনি। তুংদা, অসিগুম্বা মহৈলোয়শঙদগী থোক্লকপা লুচিংবশিং খুদোংচাদবা ফিবমশিং মরক্ত থবক তৌনবা থৌরাং তৌগনি। 

মরুপশিং,

চৎনবীশিং শেমগৎনবা থবক তৌনবা ঐখোয়না অসিগুম্বা লুচিংবশিং শেমগৎকদবনি। তুংদা, ঐখোয়না কুতনিতিদগী তেক ইন্নোবেসন ফাওবগী অনৌবা লুচিংবশিং য়োকখৎকনি, মতম অদুদা হিরম খুদিংমক্ত ভারতকী ইথিল অমসুং চন্নফম শরুক কয়া হেনগৎলক্কনি। লম্বী অমদা, ভারতকী অপুনবা মঙলান, অপুনবা তুংলমচৎ অফবা লুচিংবগী মীরোল অমগী মখা পোনগনি। মরম অদুনা ঐখোয়না মালেমগী ৱাখল্লোন অমগা লোয়ননা অমসুং লমদম অসিগী লৈহাওদগী শেমগৎতুনা মাঙলোমদা চঙশিনগদবনি। মসি ঐখোয়গী থৌশিল শেম্বশিং, ফম্নাইবশিং, ওন্ত্রেপ্রেন্যুরশিংনা মখোয়গী থৌশিলশিং অদু মালেমগী খ্বাইদগী ফবা থবকশিংগা শম্নরবা মতমদা ঙমগনি। মসিদা স্কুল ওফ অলতিমেত লিদরশিপগুম্বা মহৈলোয়শঙগী অচৌবা থৌদাং অমা লৈগনি।

মরুপশিং,

করিগুম্বা ঐখোয়না বিকসিত ভারত অমা শেম্বা পাম্লবদি, হিরম খুদিংমক্ত ঐখোয় য়াংনা মাঙলোমদা চঙশিনগদবনি হায়না ঐনা মমাঙদসু হায়খ্রে। মসি ঐখোয়গী অরিবা লাইরিক্ত হায়রি-

यत् यत् आचरति श्रेष्ठः, तत् तत् एव इतरः जनः।।

মসিনা হায়রি, মীচম মীয়াম্না অচৌবা মীওই অমগী খোঙ্গুল ইনগদবনি। মরম অদুনা, হিরম খুদিংমক্ত ভারত মীয়ামগী পান্দমগী মমি তাবা অসিগুম্ব লুচিংবা দরকার ওই। বিকসিত ভারত অমা শেমগৎনবা ষ্টিল অমসুং স্পিরিত অনিমক য়াওবা লুচিংবা দরকার ওই। মদু পুথোকপগী পান্দম স্কুল ওফ অলতিমেত লিদরশিপগী ওইগদবনি। মদুগী তুংদা, মখোয় মশাগী ওইবা তঙাইফদবা অহোংবশিং অমসুং অওনবশিং লাক্কনি।

মরুপশিং,

ঐখোয়না মীয়ামগী থৌশিল মসুং খুন্নাইগী হিরমশিংদসু মসিগী ষ্টিল অমসুং স্পিরিত অসি শেমগদবনি। দিপ-তেক, স্পেস, বাইওতেক, রিন্যুএবল ইনর্জগুম্বা হিরমশিংদা লুচিংবশিং পুথোক্নবা ঐখোয় থৌরাং তৌগদবনি। ঐখোয়না শান্নবা, লৌউ-শিংউ, মেনুফেকচরিং অমসুং মীয়ামগী থবক তৌবগী হিরমশিংদসু লুচিংবশিং পুথোক্কদবনি। মরম অদুনা, মালেম থাক্কী অনৌবা ইন্সতিতুসনশিং শেমগৎনবা ভারতনা অসিগুম্বা লুচিংবশিং দরকার ওইগনি। ঐখোয়গী পুৱারি অসি অসিগুম্বা ইন্সতিতুসনশিংগী ফজরবা ৱারিশিংনা পীক থল্লি।

মরুপশিং,

মহৈলোয়শঙ অমদা ওইনা, ভারতমচা করোর কয়াগী ৱাশকশিং অমসুং মঙলানশিং অদোমদা ময়েক শেংগনি। হিরমশিং অমসুং ফেক্তরশিং অনিমক ঐখোয়গী খুদোংচাদবা অমসুং খুদোংচাবা অমা ওইরিবা অসি অদোমদা নাখৈ শেংগদবনি। ঐখোয়না  অপুনবা পান্দম অমগা লোয়ননা মাঙলোমদা চঙশিনবদা, ফলশিং অঙকপা ফংগনি। মান্নবা পান্দম অমগীদমক পুনবা অসিনা ঈ মরীদগী পুনবদগী হেন্না কল্লি। মসিনা ৱাখলশিং পুনশিল্লি, পামজবা হেনগৎহল্লি অমসুং মতম কুইনা চৎলি। মান্নবা পান্দম অদু চাওরবা, অদোমগী পান্দম অদু চাউরবদি, লুচিংবসু থোক্লকই। পুন্না থবক তৌমিন্নবা ৱাখল্লোন লাকই, মখোয়গী পান্দমশিংগীদমক মীয়াম মখোয় মশামক কৎথোকই। মান্নবা পান্দম অমা লৈবা মতমদা, লনাই মীওই খুদিংমক মতিং ফুদোরকই। মসি খক নত্তনা, মহাক্কী তৌবা ঙম্বসু হেনগৎলকই। মসি লুচিংবা অমা থোক্লক্নবা থবকনি। মহাক্কী লৈতবা থৌনা চেন্নবা মহাক্না হোৎনরকই, মসিনা মহাক অৱাংবা থাক য়ৌরকই।

মরুপশিং,

মান্নবা পান্দম অমা লৈবা মতমদা, মমাঙদা অমুক্ত ওইখিদ্রিবা অপুনবগী থৌনা অমনা ঐখোয় লমজিংই। মান্নবা পান্দম অমগীদমক খোঙলোয়শিংগুম্না মীয়াম পুন্না চৎমিন্নবা মতমদা, নুংশিনবা হেনগৎলকই। মসিগী পুন্না থবক তৌমিন্নবা অসিনা লুচিংবা পোক্লকই। ঐখোয়গী নিংতম ইহৌদগী হেন্না ফবা অপুনবা পান্দম অমগীদমক থবক তৌমিন্নবগী খুদম লৈবগে? ঐখোয়গী নিংতম ইহৌনা রাজনিতিগী লুচিংবশিং পুথোকপা খক নত্তনা, অতোপ্পা হিরম কয়াদসু লুচিংবশিং পুথোকখি। ঙসি ঐখোয়না নিংতম ইহৌগী অদুগা চপ মান্নবা থৌনা অমুক হিঙ্গৎহনগদবনি। মদুদগী ইথিল লৌরগা, ঐখোয় মাঙলোমদা চঙশিনগদবনি।

মরুপশিং,

সংস্কৃত্ত হায়নবা য়াম্না ফজরবা অমা লৈরে:

अमन्त्रं अक्षरं नास्ति, नास्ति मूलं अनौषधम्। अयोग्यः पुरुषो नास्ति, योजकाः तत्र दुर्लभः।।

মসিনা হায়রি, লাইৱা শেম্বা য়ারোইদবা ৱাহৈ অমতা লৈতে। হিদাক অমা শেম্বা য়ারোইদবা পাম্বী অমতা লৈতে। মতিক চাদবা মীওই অমতা লৈতে। মখোয় মফম অমসুং মতম চানা শীজিন্নবা ঙম্বা অমসুং মখোয়গী মাইকৈ তাকপা অরাংফম অমা মীওই খুদিংমক্না দরকার ওই। স্কুল ওফ অলতিমেত লিদরশিপগী থৌদাং অদু অরাংফমগী থৌদাং অদু ওইগদবনি। অদোম্না ৱাহৈশিং লাইৱা ওন্থোক্লে, পাম্বীশিং হিদাক ওন্থোক্লে। মফম অসিদা লুচিংবা কয়াশু শরুক য়ারি। অদোম্না লুচিংবশিং স্কিলশিং তম্লে অমসুং ফগৎহল্লে। মফম অমদা ঐনা পাখি- করিগুম্বা অদোম্না নশামক শেমগৎলবদি, অদোম্না নশাগী মাইপাকপা ফংগনি। করিগুম্বা অদোম্না কাংবু অমা শেমগৎলবদি, অদোমগী লুপ অদু চাউখৎপা ফংগনি। করিগুম্বা অদোম্না লুচিংবশিং শেমগৎলবদি, অদোমগী লুপ অদু চাউখৎকনি। ঐখোয়না করি থবক পাংথোক্কনি হায়বা অদু ৱাহৈ পরেং অহুম অসিনা ঐখোয়দা মতম চুপ্পা নিংশিংহল্লে।

মরুপশিং,

হৌখিবা চহি ১০ দা, ২১শুবা চহিচাদা পোকপা মীরোলশিংনা লৈবাক অসি অনৌবা খুন্নাইগী ফিবম অমদা শেম্লে। মসি শেংবা বিকসিত  ভারত অমগী অহানবা মীরোলনি। মসিগী অমৃত জেনেরেসন অসি লুচিংবা ওইনবা থৌরাং তৌনবা অনৌবা মহৈলোয়শঙ অসিনা মরুওইবা থৌদাং অমা লৌগনি হায়না ঐনা থাজৈ। ঙসি অসি ভুতানগী নিংথৌগী মপোক নুমিৎকা মপা চানবা অসিদা য়াম্না হরাওইঅমসুং থৌরম অদু মফম অসিদা পাংথোক্লে। অসিগুম্বা মরুওইবা নুমিৎ অমদা ভুতানগী প্রধান মন্ত্রী লাক্লে অমসুং মহাক মফম অসিদা লাকপদা ভুতানগী নিংথৌনা মরুওইবা থৌদাং অমা লৌখি। ঐনা মহাক্কী মফমদসু য়াইফ পাউজেল পীজরি।

মরুপশিং,

করিগুম্বা ঐগী মতম ফংলবদি, ঐ মফম অসিদা নুমিৎ নিনি লৈগদবনি, মরমদি অদোমগুম্বা নহারোল কয়া শরুক য়াবা বিকসিত ভারতকী থৌরম অমা ঐ শরুক য়াগদবনি। মরম অদুনা ঐনা নুমিৎ চুপ্পা অমা লৈগনি, মীওই খুদিংমক উনগনি, ঐনা মখোয়দগী তম্বা য়াবা তমগনি অমসুং মখোয়গী পুন্সিদা মাইপাক্লবা অহানবা পরেংদা ফম্লিবা লুচিংবশিং উবা ফংবা অসি ঐগী লাইবক ফবনি। অদোমগা উনবা, ফম্মিন্নবা অমসুং ৱারি শানবা ফংবা অসি অচৌবা খুদোংচাবা অমনি। অদোম্না মখোয়গী থবকশিংদগী কয়া অমা তমগদবনি। মখোয় মশাগী হিরমশিংদা চাউনা মাইপাক্লবশিংনি। মখোয়না অদোমগীদমক মতম য়াম্না কাইথোক্লে, স্কুল ওফ অলতিমেত লিদরশিপ কৌবা ইন্সতিতুসন অসিগী অফবা তুংলমচৎ অমা ঐনা উরে। অসিগুম্বা মাইপাক্লবা মীওইশিংনা মরু কয়া হুনবা মতমদা, খোঙনাং পাম্বীনা অনৌবা মাইপাকপশিং ফংবা ঙম্বা অনৌবা লুচিংবা কয়া পুথোক্কনি।  মপুংফানা থাজবগা লোয়ননা, ঐনা ময়াম পুম্নমক অমুক হন্না থাগৎপা ফোঙদোকচরি। ঐগী নহারোলশিংগীদমক ঐগী মঙলান কয়া অমসুং থাজবা কয়া লৈরি অমসুং মিকুপ খুদিং ঐগী লৈবাক্কী নহারোলশিংগীদমক করিগুম্বা খর পাংথোক্কে হায়না ঐনা মতম পুম্নমক্ত খল্লি। মদুগী খুদোংচাবা অদু ঙসি ঐ অমুক হন্না ফংলে। নহারোলশিংদা ঐগী য়াইফ পাউজেল পীজরি।

অদোম থাগৎচরি।

দিসক্লেমর: মসি প্রধান মন্ত্রীগী ৱারোলদগী চাউরাক্না হন্দোকপনি। অশেংবা ৱারোল হিন্দীদা পীখি।

***