ആദരണീയനായ ഭരണാധികാരി,

ഭൂട്ടാൻ പ്രധാനമന്ത്രി, എന്റെ സഹോദരൻ ദഷോ ഷെറിങ് ടോബ്‌ഗേ ജി, സോൾ ബോർഡ് ചെയർമാൻ സുധീർ മേഹ്താ, വൈസ് ചെയർമാൻ ഹൻസ്മുഖ് അധിയ, വ്യാവസായിക ലോകത്തെ അതികായന്മാർ, അവരവരുടെ ജീവിതങ്ങളിൽ, അതത് മേഖലകളിൽ നേതൃത്വം നൽകുന്നതിൽ വിജയിച്ചവർ, ഇവിടെ ഞാൻ നിരവധി മഹാന്മാരെ കാണുന്നു, ഭാവി കാത്തിരിക്കുന്ന എന്റെ യുവ സഹപ്രവർത്തകരെയും ഞാൻ ഇവിടെ കാണുന്നു.

സുഹൃത്തുക്കളെ,

ഹൃദയത്തോട് വളരെ അടുത്തുനിൽക്കുന്ന ചില സംഭവങ്ങളുണ്ട്, ഇന്നത്തെ പരിപാടി അത്തരത്തിലുള്ള ഒന്നാണ്. രാഷ്ട്രനിർമ്മാണത്തിന്, മികച്ച പൗരന്മാരുടെ വികസനം അത്യാവശ്യമാണ്. രാഷ്ട്രനിർമ്മാണം വ്യക്തിഗത വികസനത്തിൽ നിന്ന് ആരംഭിക്കുന്നു, ലോകം ജനങ്ങളിൽ നിന്ന്, ലോകം  ജനങ്ങളിൽ നിന്ന്, ഒരാൾക്ക് ഏതെങ്കിലും ഉയരം കൈവരിക്കാനോ മഹത്വം നേടാനോ താൽപ്പര്യമുണ്ടെങ്കിൽ, തുടക്കം ജനങ്ങളിൽ നിന്ന് മാത്രമാണ്. എല്ലാ മേഖലകളിലും മികച്ച നേതാക്കളുടെ വികസനം അത്യന്താപേക്ഷിതമാണ്, അത് കാലഘട്ടത്തിന്റെ ആവശ്യകതയാണ്. അതിനാൽ, ദി സ്കൂൾ ഓഫ് അൾട്ടിമേറ്റ് ലീഡർഷിപ്പിന്റെ സ്ഥാപനം വികസിത ഇന്ത്യയുടെ വികസന യാത്രയിലെ വളരെ പ്രധാനപ്പെട്ടതും വളരെ വലുതുമായ ഒരു ചുവടുവയ്പ്പാണ്. ഈ സ്ഥാപനത്തിന്റെ പേരിൽ 'ആത്മാവ്' ഉണ്ടെന്ന് മാത്രമല്ല, അത് ഇന്ത്യയുടെ സാമൂഹിക ജീവിതത്തിന്റെ ആത്മാവായി മാറാൻ പോകുന്നു, നമുക്ക് അത് നന്നായി അറിയാം, നമ്മൾ അത് വീണ്ടും വീണ്ടും കേൾക്കുന്നു - ആത്മാ, ആ അർത്ഥത്തിൽ ഈ സോളിനെ നോക്കുകയാണെങ്കിൽ, അത് നമ്മെ ആത്മാവിനെ അനുഭവിപ്പിക്കുന്നു. ഈ ദൗത്യവുമായി ബന്ധപ്പെട്ട എല്ലാ സഹപ്രവർത്തകരെയും; ഈ സ്ഥാപനവുമായി ബന്ധപ്പെട്ട എല്ലാ മഹാന്മാരെയും ഞാൻ ഹൃദയപൂർവ്വം അഭിനന്ദിക്കുന്നു. ഗിഫ്റ്റ് സിറ്റിക്ക് സമീപം ദി സ്കൂൾ ഓഫ് അൾട്ടിമേറ്റ് ലീഡർഷിപ്പിന്റെ ഒരു വലിയ കാമ്പസ് വളരെ വേഗം തയ്യാറാകും. ഇപ്പോൾ ഞാൻ നിങ്ങളുടെ ഇടയിൽ വന്നപ്പോൾ, ചെയർമാൻ ശ്രീ എനിക്ക് അതിന്റെ പൂർണ്ണ മാതൃക കാണിച്ചുതന്നു, പദ്ധതി കാണിച്ചുതന്നു, വാസ്തുവിദ്യയുടെ വീക്ഷണകോണിൽ നിന്നും നേക്കുമ്പോൾ തന്നെ ഇത് നേതൃ സ്ഥാനത്തേക്ക് ഉയർന്ന് വരുമെന്ന് ഞാൻ കരുതുന്നു.

സുഹൃത്തുക്കളെ,

ഇന്ന്, ദി സ്കൂൾ ഓഫ് അൾട്ടിമേറ്റ് ലീഡർഷിപ്പ് - സോൾ അതിന്റെ യാത്രയിലെ ആദ്യത്തെ വലിയ ചുവടുവെപ്പ് നടത്തുമ്പോൾ, നിങ്ങളുടെ ദിശ എന്താണെന്നും നിങ്ങളുടെ ലക്ഷ്യം എന്താണെന്നും നിങ്ങൾ ഓർമ്മിക്കേണ്ടതുണ്ട്. സ്വാമി വിവേകാനന്ദൻ പറഞ്ഞിരുന്നു - "എനിക്ക് നൂറു ഊർജ്ജസ്വലരായ യുവാക്കളെയും യുവതികളെയും തരൂ, ഞാൻ ഇന്ത്യയെ രൂപാന്തരപ്പെടുത്താം." അടിമത്തത്തിൽ നിന്ന് ഇന്ത്യയെ രൂപാന്തരപ്പെടുത്താൻ സ്വാമി വിവേകാനന്ദൻ ആഗ്രഹിച്ചു. 100 നേതാക്കളുണ്ടെങ്കിൽ, ഇന്ത്യയെ സ്വതന്ത്രമാക്കാൻ മാത്രമല്ല, ലോകത്തിലെ ഒന്നാം നമ്പർ രാജ്യമാക്കാനും അദ്ദേഹത്തിന് കഴിയുമെന്ന് അദ്ദേഹം വിശ്വസിച്ചു. ഈ ഇച്ഛാശക്തിയോടെ, ഈ മന്ത്രത്തോടെ, നാമെല്ലാവരും, പ്രത്യേകിച്ച് നിങ്ങൾ മുന്നോട്ട് പോകണം. ഇന്ന് ഓരോ ഇന്ത്യക്കാരനും 21-ാം നൂറ്റാണ്ടിലെ ഒരു വികസിത ഇന്ത്യയ്ക്കായി രാവും പകലും പ്രവർത്തിക്കുന്നു. അത്തരമൊരു സാഹചര്യത്തിൽ, 140 കോടി ജനങ്ങളുള്ള ഒരു രാജ്യത്ത്, എല്ലാ മേഖലകളിലും, എല്ലാ തലങ്ങളിലും, ജീവിതത്തിന്റെ എല്ലാ മേഖലകളിലും നമുക്ക് മികച്ച നേതൃത്വം ആവശ്യമാണ്. രാഷ്ട്രീയ നേതൃത്വം മാത്രമല്ല, ജീവിതത്തിന്റെ എല്ലാ മേഖലകളിലും 21-ാം നൂറ്റാണ്ടിലെ നേതാക്കളെ തയ്യാറാക്കാൻ സ്കൂൾ ഓഫ് അൾട്ടിമേറ്റ് ലീഡർഷിപ്പിന് വലിയ സാധ്യതയുണ്ട്. രാജ്യത്ത് മാത്രമല്ല, ലോകത്തിലെ എല്ലാ സ്ഥാപനങ്ങളിലും, എല്ലാ മേഖലകളിലും തങ്ങളുടെ പതാക ഉയർത്താൻ സാധിക്കുന്ന നേതാക്കൾ സ്കൂൾ ഓഫ് അൾട്ടിമേറ്റ് ലീഡർഷിപ്പിൽ നിന്ന് ഉയർന്നുവരുമെന്ന് എനിക്ക് ഉറപ്പുണ്ട്. ഇവിടെ നിന്ന് പരിശീലനം നേടിയ ശേഷം പുറത്തുവരുന്ന ഒരു യുവാവിന് രാഷ്ട്രീയത്തിൽ ഒരു പുതിയ സ്ഥാനം നേടാൻ സാധ്യതയുണ്ട്.

സുഹൃത്തുക്കളെ,

ഒരു രാജ്യം പുരോഗമിക്കുമ്പോൾ, പ്രകൃതിവിഭവങ്ങൾ പങ്കു വഹിക്കുന്നു, പക്ഷേ മനുഷ്യവിഭവശേഷി അതിലും വലിയ പങ്ക് വഹിക്കുന്നു. മഹാരാഷ്ട്രയെയും ഗുജറാത്തിനെയും വേർതിരിക്കുന്നതിനുള്ള പ്രസ്ഥാനം നടന്നപ്പോൾ, ഞങ്ങൾ അന്ന് കുട്ടികളായിരുന്നു, പക്ഷേ അക്കാലത്ത് വിഭജിക്കുന്നതിലൂടെ ഗുജറാത്ത് എന്ത് ചെയ്യുമെന്ന് ഒരു ചർച്ച ഉണ്ടായിരുന്നു? പ്രകൃതിവിഭവങ്ങളില്ല, ഖനികളില്ല, കൽക്കരിയില്ല, ഒന്നുമില്ല, അത് എന്തുചെയ്യും? വെള്ളമില്ല, ഇത് ഒരു മരുഭൂമിയാണ്, മറുവശത്ത് പാകിസ്ഥാനുണ്ട്, അവർ എന്തുചെയ്യും? ഈ ഗുജറാത്തികൾക്ക് ഉപ്പുണ്ട്, അവർക്ക് മറ്റെന്താണ് ഉള്ളത്? എന്നാൽ നേതൃത്വത്തിന്റെ ശക്തി നോക്കൂ, ഇന്ന് ഗുജറാത്ത് എല്ലാമാണ്. അവിടത്തെ സാധാരണക്കാർക്ക് ഈ ശക്തി ഉണ്ടായിരുന്നു, അവർ ഇരുന്നു, ഇതില്ല, അതില്ല, ഇതില്ല, അതില്ല, ഓ, എന്തെങ്കിലുമുണ്ടോ എന്ന് പറഞ്ഞ് കരഞ്ഞില്ല. ഗുജറാത്തിൽ ഒരു വജ്രഖനി പോലും ഇല്ല, എന്നാൽ ലോകത്തിലെ 10 വജ്രങ്ങളിൽ 9 എണ്ണവും ചില ഗുജറാത്തികൾ സ്പർശിക്കുന്നവയാണ്. ഞാൻ പറയാൻ ഉദ്ദേശിക്കുന്നത് വിഭവങ്ങൾ മാത്രമല്ല, ഏറ്റവും വലിയ ശക്തി മനുഷ്യവിഭവശേഷിയിലും, മനുഷ്യശേഷിയിലും, മനുഷ്യശക്തിയിലും, നിങ്ങളുടെ ഭാഷയിൽ നേതൃത്വം എന്ന് വിളിക്കപ്പെടുന്നതിലും ആണ് എന്നാണ്.

ഇരുപത്തിയൊന്നാം നൂറ്റാണ്ടിൽ, നൂതനാശയത്തിന് നേതൃത്വം നൽകാനും കഴിവുകൾ വഴിതിരിച്ചുവിടാനും കഴിയുന്ന വിഭവങ്ങൾ നമുക്ക് ആവശ്യമാണ്. ഇന്ന് എല്ലാ മേഖലകളിലും കഴിവുകൾ എത്രത്തോളം പ്രധാനമാണെന്ന് നാം കാണുന്നു. അതിനാൽ, നേതൃത്വ വികസന മേഖലയ്ക്കും പുതിയ കഴിവുകൾ ആവശ്യമാണ്. നേതൃത്വ വികസനത്തിന്റെ ഈ പ്രവർത്തനം വളരെ ശാസ്ത്രീയമായ രീതിയിൽ നാം വളരെ വേഗത്തിൽ മുന്നോട്ട് കൊണ്ടുപോകേണ്ടതുണ്ട്. നിങ്ങളുടെ സ്ഥാപനമായ സോൾ ഈ ദിശയിൽ വളരെ പ്രധാനപ്പെട്ട പങ്ക് വഹിക്കുന്നു. നിങ്ങളും ഇതിൽ പ്രവർത്തിക്കാൻ തുടങ്ങിയതിൽ എനിക്ക് സന്തോഷമുണ്ട്. ഔപചാരികമായി ഇത് ഇന്ന് നിങ്ങളുടെ ആദ്യ പരിപാടിയാണെന്ന് തോന്നാമെങ്കിലും, ദേശീയ വിദ്യാഭ്യാസ നയം ഫലപ്രദമായി നടപ്പിലാക്കുന്നതിനായി, സംസ്ഥാന വിദ്യാഭ്യാസ സെക്രട്ടറിമാർ, സംസ്ഥാന പ്രോജക്ട് ഡയറക്ടർമാർ, മറ്റ് ഉദ്യോഗസ്ഥർ എന്നിവർക്കായി ശില്പശാലകൾ നടത്തിയിട്ടുണ്ടെന്ന് എന്നോട് പറഞ്ഞിരുന്നു. ഗുജറാത്ത് മുഖ്യമന്ത്രിയുടെ ഓഫീസിലെ ജീവനക്കാർക്കിടയിൽ നേതൃത്വ വികസനത്തിനായി ഒരു ചിന്തൻ ശിബിരം സംഘടിപ്പിച്ചിട്ടുണ്ട്. ഇത് ഒരു തുടക്കം മാത്രമാണെന്ന് എനിക്ക് പറയാൻ കഴിയും. ലോകത്തിലെ ഏറ്റവും മികച്ച നേതൃത്വ വികസന സ്ഥാപനമായി സോൾ മാറുന്നത് നമ്മൾ കാണണം. ഇതിനായി നമ്മൾ കഠിനാധ്വാനം ചെയ്യണം.

സുഹൃത്തുക്കളെ,

ഇന്ന് ഇന്ത്യ ഒരു ആഗോള ശക്തികേന്ദ്രമായി ഉയർന്നുവരുന്നു. എല്ലാ മേഖലകളിലും ഈ ആക്കവും വേഗതയും വർദ്ധിക്കുന്നുവെന്ന് ഉറപ്പാക്കാൻ, നമുക്ക് ലോകോത്തര നേതാക്കളും അന്താരാഷ്ട്ര നേതൃത്വവും ആവശ്യമാണ്. സോൾ പോലുള്ള നേതൃത്വ സ്ഥാപനങ്ങൾക്ക് ഇതിൽ മാർഗ്ഗം തെളിയിക്കാൻ കഴിയും. അത്തരം അന്താരാഷ്ട്ര സ്ഥാപനങ്ങൾ നമ്മുടെ തെരഞ്ഞെടുപ്പ് മാത്രമല്ല, നമ്മുടെ ആവശ്യകതയുമാണ്. ആഗോള സങ്കീർണ്ണതകൾക്കും ആഗോള ആവശ്യങ്ങൾക്കും പരിഹാരം കണ്ടെത്താൻ കഴിയുന്ന എല്ലാ മേഖലകളിലും ഊർജ്ജസ്വലരായ നേതാക്കളെ ഇന്ന് ഇന്ത്യയ്ക്ക് ആവശ്യമാണ്. പ്രശ്നങ്ങൾ പരിഹരിക്കുമ്പോൾ തന്നെ, രാജ്യത്തിന്റെ താൽപ്പര്യം ആഗോള വേദിയിൽ മുൻ‌ഗണനയിൽ നിലനിർത്തുന്നവർ. ആഗോള സമീപനമാണെങ്കിലും അവരുടെ ചിന്തയുടെ ഒരു പ്രധാന ഭാഗവും പ്രാദേശികമാണ്. അന്താരാഷ്ട്ര മാനസികാവസ്ഥ മനസ്സിലാക്കി ഇന്ത്യൻ മനസ്സോടെ മുന്നോട്ട് പോകുന്ന അത്തരം വ്യക്തികളെ നാം തയ്യാറാക്കണം. തന്ത്രപരമായ തീരുമാനമെടുക്കൽ, പ്രതിസന്ധി മാനേജ്മെന്റ്, ഭാവിസംബന്ധിയായ ചിന്ത എന്നിവയ്ക്ക് എപ്പോഴും തയ്യാറുള്ളവർ. അന്താരാഷ്ട്ര വിപണികളിലും ആഗോള സ്ഥാപനങ്ങളിലും മത്സരിക്കണമെങ്കിൽ, അന്താരാഷ്ട്ര ബിസിനസ്സ് ചലനാത്മകതയെക്കുറിച്ച് മനസ്സിലാക്കുന്ന അത്തരം നേതാക്കളെ നമുക്ക് ആവശ്യമാണ്. ഇതാണ് സോളിന്റെ പ്രവൃത്തി, നിങ്ങളുടെ വ്യാപ്തി വലുതാണ്, സാധ്യത വലുതാണ്, നിങ്ങളിൽ നിന്നുള്ള പ്രതീക്ഷകളും അത്രയും ഉയർന്നതാണ്.

സുഹൃത്തുക്കളെ,

ഒരു കാര്യം എപ്പോഴും നിങ്ങൾക്കെല്ലാവർക്കും ഉപയോഗപ്രദമാകും, വരും കാലങ്ങളിൽ, നേതൃത്വം വെറും അധികാരത്തിൽ മാത്രം ഒതുങ്ങില്ല. നൂതനാശയമുള്ളവരും, സ്വാധീനിക്കാൻ കഴിവുള്ളവരും മാത്രമേ നേതൃസ്ഥാനങ്ങളിൽ ഉണ്ടാകൂ. രാജ്യത്തെ വ്യക്തികൾ ഈ ആവശ്യത്തിനനുസരിച്ച് ഉയർന്നുവരേണ്ടതുണ്ട്. ഈ വ്യക്തികളിൽ വിമർശനാത്മക ചിന്ത, അപകടസാധ്യത ഏറ്റെടുക്കൽ, പരിഹാര മനഃസ്ഥിതി എന്നിവ വികസിപ്പിക്കുന്ന ഒരു സ്ഥാപനമായിരിക്കും സോൾ. വരും കാലങ്ങളിൽ, അടിസ്ഥാനപരമായി പരിവർത്തനങ്ങൾക്കിടയിൽ പ്രവർത്തിക്കാൻ തയ്യാറാകുന്ന അത്തരം നേതാക്കൾ ഈ സ്ഥാപനത്തിൽ നിന്ന് ഉയർന്നുവരും.

സുഹൃത്തുക്കളെ,

ട്രെൻഡുകൾ പിന്തുടരുന്നവരെയല്ല, ട്രെൻഡുകൾ സ്ഥാപിക്കുന്ന നേതാക്കളെയാണ് നാം സൃഷ്ടിക്കേണ്ടത്. വരും കാലങ്ങളിൽ, നയതന്ത്രം മുതൽ സാങ്കേതിക നൂതനാശയം വരെയുള്ള മേഖലകളിൽ പുതിയ നേതൃത്വത്തെ നാം പ്രോത്സാഹിപ്പിക്കുമ്പോൾ, ഈ മേഖലകളിലെല്ലാം ഇന്ത്യയുടെ സ്വാധീനവും ശക്തിയും പലമടങ്ങ് വർദ്ധിക്കും. അതായത്, ഒരു തരത്തിൽ, ഇന്ത്യയുടെ മുഴുവൻ കാഴ്ചപ്പാടും, മുഴുവൻ ഭാവിയും ശക്തമായ ഒരു നേതൃ തലമുറയെ ആശ്രയിച്ചിരിക്കും. അതുകൊണ്ടാണ് ആഗോള ചിന്തയും പ്രാദേശിക വിദ്യാഭ്യാസവും ഉപയോഗിച്ച് നാം മുന്നോട്ട് പോകേണ്ടത്. നമ്മുടെ ഭരണനിർവ്വഹണത്തെയും, നമ്മുടെ നയരൂപീകരണത്തെയും ലോകോത്തരമാക്കണം. നമ്മുടെ നയരൂപീകരണക്കാർ, ഉദ്യോഗസ്ഥർ, സംരംഭകർ എന്നിവർക്ക് ആഗോളതലത്തിലെ മികച്ച രീതികളുമായി ബന്ധിപ്പിച്ചുകൊണ്ട് അവരുടെ നയങ്ങൾ രൂപപ്പെടുത്താൻ കഴിയുമ്പോൾ മാത്രമേ ഇത് സാധ്യമാകൂ. സോൾ പോലുള്ള സ്ഥാപനങ്ങൾക്ക് ഇതിൽ വളരെ വലിയ പങ്കു വഹിക്കാൻ കഴിയും.

സുഹൃത്തുക്കളെ,

ഇന്ത്യയെ വികസിപ്പിക്കണമെങ്കിൽ, എല്ലാ മേഖലകളിലും നാം വേഗത്തിൽ മുന്നേറേണ്ടതുണ്ടെന്ന് ഞാൻ നേരത്തെ പറഞ്ഞിട്ടുണ്ട്. നമ്മുടെ വേദങ്ങളിൽ ഇങ്ങനെ പറയുന്നു-

यत् यत् आचरति श्रेष्ठः, तत् तत् एव इतरः जनः।। 

അതായത്, സാധാരണക്കാർ ഒരു മഹാനായ മനുഷ്യന്റെ പെരുമാറ്റരീതി പിന്തുടരുന്നു. അതിനാൽ, ഇന്ത്യയുടെ ദേശീയ കാഴ്ചപ്പാടിനെ എല്ലാ വശങ്ങളിലും പ്രതിഫലിപ്പിക്കുകയും അതിനനുസരിച്ച് പെരുമാറുകയും ചെയ്യുന്ന അത്തരം നേതൃത്വം ആവശ്യമാണ്. ഭാവിയിലെ നേതൃത്വത്തിൽ, വികസിത ഇന്ത്യ കെട്ടിപ്പടുക്കുന്നതിന് ആവശ്യമായ കരുത്തും, ആത്മാവും ഉത്പാദിപ്പിക്കേണ്ടതുണ്ട്, അതായിരിക്കണം സോളിൻ്റെ ലക്ഷ്യം. അതിനുശേഷം, ആവശ്യമായ മാറ്റങ്ങളും പരിഷ്കാരങ്ങളും സ്വയമേ വന്നുകൊണ്ടേയിരിക്കും.

സുഹൃത്തുക്കളെ,

പൊതുനയത്തിലും സാമൂഹിക മേഖലകളിലും നാം ഈ കരുത്തും ചൈതന്യവും സൃഷ്ടിക്കേണ്ടതുണ്ട്. ഡീപ്-ടെക്, ബഹിരാകാശം, ജൈവ സാങ്കേതികവിദ്യാ, പുനരുപയോഗ ഊർജ്ജം തുടങ്ങിയ നിരവധി ഉയർന്നുവരുന്ന മേഖലകൾക്ക് നാം നേതൃത്വത്തെ തയ്യാറാക്കേണ്ടതുണ്ട്. കായികം, കൃഷി, ഉൽപ്പാദനം, സാമൂഹിക സേവനം തുടങ്ങിയ പരമ്പരാഗത മേഖലകൾക്കും നാം നേതൃത്വം സൃഷ്ടിക്കേണ്ടതുണ്ട്. എല്ലാ മേഖലകളിലും നാം ആ​ഗ്രഹിക്കുക മാത്രമല്ല, മികവ് കൈവരിക്കുകയും വേണം. അതിനാൽ, ആഗോളതലത്തിൽ മികവ് പുലർത്തുന്ന പുതിയ സ്ഥാപനങ്ങൾ വികസിപ്പിക്കുന്ന അത്തരം നേതാക്കളെ ഇന്ത്യയ്ക്ക് ആവശ്യമാണ്. നമ്മുടെ ചരിത്രം അത്തരം സ്ഥാപനങ്ങളുടെ മഹത്തായ കഥകളാൽ നിറഞ്ഞിരിക്കുന്നു. ആ ആത്മാവിനെ പുനരുജ്ജീവിപ്പിക്കേണ്ടതുണ്ട്, ഇതും ബുദ്ധിമുട്ടുള്ള കാര്യമല്ല. ലോകത്തിലെ നിരവധി രാജ്യങ്ങൾ ഇത് ചെയ്തതിന്റെ ഉദാഹരണങ്ങളുണ്ട്. ഈ ഹാളിൽ അത്തരം ലക്ഷക്കണക്കിന് സുഹൃത്തുക്കൾ ഉണ്ടെന്നും, പുറത്ത് നമ്മളെ ശ്രദ്ധിക്കുകയും വീക്ഷിക്കുകയും ചെയ്യുന്നവരെല്ലാം കഴിവുള്ളവരാണെന്നും ഞാൻ മനസ്സിലാക്കുന്നു. ഈ സ്ഥാപനം നിങ്ങളുടെ സ്വപ്നങ്ങളുടെയും നിങ്ങളുടെ ദർശനങ്ങളുടെയും ഒരു പരീക്ഷണശാലയായിരിക്കണം. അങ്ങനെ 25-50 വർഷങ്ങൾക്ക് ശേഷമുള്ള തലമുറ നിങ്ങളെ അഭിമാനത്തോടെ ഓർക്കണം. ഇന്ന് നിങ്ങൾ സ്ഥാപിക്കുന്ന അടിത്തറയിൽ അവർക്ക് അഭിമാനിക്കാം.

സുഹൃത്തുക്കളെ,

ഒരു സ്ഥാപനം എന്ന നിലയിൽ, കോടിക്കണക്കിന് ഇന്ത്യക്കാരുടെ ദൃഢനിശ്ചയവും സ്വപ്നങ്ങളും നിങ്ങൾക്ക് വളരെ വ്യക്തമായിരിക്കണം. ഞങ്ങൾക്ക് വെല്ലുവിളിയും അതേസമയം അവസരവുമായ മേഖലകളും ഘടകങ്ങളും നിങ്ങൾക്ക് വ്യക്തമായിരിക്കണം. നമ്മൾ ഒരു പൊതു ലക്ഷ്യത്തോടെ മുന്നോട്ട് പോകുകയും ഒരുമിച്ച് പ്രവർത്തിക്കുകയും ചെയ്യുമ്പോൾ, ഫലങ്ങൾ അത്ഭുതകരമാണ്. ഒരു പൊതു ലക്ഷ്യത്താൽ രൂപപ്പെടുന്ന ബന്ധം രക്തത്തേക്കാൾ ശക്തമാണ്. അത് മനസ്സുകളെ ഒന്നിപ്പിക്കുന്നു, അത് അഭിനിവേശത്തെ ഉത്തേജിപ്പിക്കുന്നു, അത് കാലത്തിന്റെ പരീക്ഷണത്തെ അതിജീവിക്കുന്നു. പൊതു ലക്ഷ്യം വലുതാകുമ്പോൾ, നിങ്ങളുടെ ലക്ഷ്യം വലുതാകുമ്പോൾ, നേതൃത്വവും വികസിക്കുന്നു, ടീം സ്പിരിറ്റും വികസിക്കുന്നു, ആളുകൾ അവരുടെ ലക്ഷ്യങ്ങൾക്കായി സ്വയം സമർപ്പിക്കുന്നു. ഒരു പൊതു ലക്ഷ്യം, ഒരു പങ്കിട്ട ഉദ്ദേശ്യം, ഓരോ വ്യക്തിയുടെയും ഏറ്റവും മികച്ച ശേഷി പുറത്തുവരുന്നു. ഇതുമാത്രമല്ല, അവർ വലിയ ദൃഢനിശ്ചയത്തോടെ തന്റെ കഴിവുകളും വർദ്ധിപ്പിക്കുന്നു. ഈ പ്രക്രിയയിൽ ഒരു നേതാവ് വളർന്ന് വരുന്നു. തനിക്കില്ലാത്ത കഴിവ് നേടിയെടുക്കാൻ അവർ ശ്രമിക്കുന്നു, അങ്ങനെ അയാൾക്ക് കൂടുതൽ ഉയരങ്ങളിലെത്താൻ കഴിയും.

സുഹൃത്തുക്കളെ,

ഒരു പൊതു ലക്ഷ്യം ഉള്ളപ്പോൾ, അഭൂതപൂർവമായ ഒരു ടീം സ്പിരിറ്റ് നമ്മെ നയിക്കുന്നു. ഒരു പൊതു ലക്ഷ്യത്തിന്റെ സഹയാത്രികരായി എല്ലാ ആളുകളും ഒരുമിച്ച് നടക്കുമ്പോൾ, ഒരു ബന്ധം വികസിക്കുന്നു. ഈ ടീം ബിൽഡിംഗ് പ്രക്രിയ നേതൃത്വത്തിനും ജന്മം നൽകുന്നു. നമ്മുടെ സ്വാതന്ത്ര്യ സമരത്തേക്കാൾ മികച്ച ഒരു ലക്ഷ്യത്തിന് മറ്റെന്താണ് ഉദാഹരണം? നമ്മുടെ സ്വാതന്ത്ര്യ സമരം രാഷ്ട്രീയത്തിൽ മാത്രമല്ല, മറ്റ് മേഖലകളിലും നേതാക്കളെ സൃഷ്ടിച്ചു. ഇന്ന് നാം സ്വാതന്ത്ര്യ പ്രസ്ഥാനത്തിന്റെ അതേ ചൈതന്യത്തെ പുനരുജ്ജീവിപ്പിക്കേണ്ടതുണ്ട്. അതിൽ നിന്ന് പ്രചോദനം ഉൾക്കൊണ്ട് നാം മുന്നോട്ട് പോകണം.

സുഹൃത്തുക്കളെ,

സംസ്കൃതത്തിൽ വളരെ മനോഹരമായ ഒരു ചൊല്ലുണ്ട്:

अमन्त्रं अक्षरं नास्ति, नास्ति मूलं अनौषधम्। अयोग्यः पुरुषो नास्ति, योजकाः तत्र दुर्लभः।।

അതായത്, മന്ത്രം ഉണ്ടാക്കാൻ കഴിയാത്ത ഒരു വാക്കുമില്ല. ഔഷധം ഉണ്ടാക്കാൻ കഴിയാത്ത ഒരു സസ്യവുമില്ല. കഴിവില്ലാത്ത ഒരു വ്യക്തിയുമില്ല. എന്നാൽ എല്ലാവർക്കും അവയെ ശരിയായ സ്ഥലത്ത് ഉപയോഗിക്കാനും ശരിയായ ദിശ നൽകാനും കഴിയുന്ന ഒരു ആസൂത്രകനെ ആവശ്യമാണ്. സോളിൻ്റെ പങ്കും ഒരു ആസൂത്രകന്റെതാണ്. വാക്കുകളെ മന്ത്രങ്ങളായും, ഔഷധസസ്യങ്ങളെ ഔഷധങ്ങളായും മാറ്റണം. ഇവിടെ നിരവധി നേതാക്കളും ഇരിക്കുന്നു. നേതൃത്വത്തിന്റെ ഈ കഴിവുകൾ നിങ്ങൾ പഠിക്കുകയും മെച്ചപ്പെടുത്തുകയും ചെയ്തിട്ടുണ്ട്. ഞാൻ എവിടെയോ വായിച്ചിട്ടുണ്ട്- നിങ്ങൾ സ്വയം വികസിപ്പിച്ചാൽ, നിങ്ങൾക്ക് വ്യക്തിപരമായ വിജയം അനുഭവിക്കാൻ കഴിയും. നിങ്ങൾ ഒരു ടീമിനെ വികസിപ്പിച്ചാൽ, നിങ്ങളുടെ സ്ഥാപനത്തിന് വളർച്ച അനുഭവിക്കാൻ കഴിയും. നിങ്ങൾ നേതാക്കളെ വികസിപ്പിച്ചാൽ, നിങ്ങളുടെ സ്ഥാപനത്തിന് സ്ഫോടനാത്മകമായ വളർച്ച കൈവരിക്കാൻ കഴിയും. നമ്മൾ എന്താണ് ചെയ്യേണ്ടതെന്ന് ഓർമ്മിക്കാൻ ഈ മൂന്ന് വാക്യങ്ങൾ എപ്പോഴും നമ്മെ സഹായിക്കും, നമ്മൾ സംഭാവന ചെയ്യണം.

സുഹൃത്തുക്കളേ,

ഇന്ന്, രാജ്യത്ത് ഒരു പുതിയ സാമൂഹിക വ്യവസ്ഥ രൂപപ്പെടുകയാണ്, കഴിഞ്ഞ ദശകത്തിൽ ജനിച്ച, 21-ാം നൂറ്റാണ്ടിൽ ജനിച്ച യുവതലമുറയാണ് ഇത് രൂപപ്പെടുത്തുന്നത്. യഥാർത്ഥത്തിൽ വികസിതമായ ഒരു ഇന്ത്യയുടെ, അമൃത തലമുറയുടെ ആദ്യ തലമുറയായിരിക്കും ഇത്. ഈ അമൃത തലമുറയുടെ നേതൃത്വത്തെ തയ്യാറാക്കുന്നതിൽ ഈ പുതിയ സ്ഥാപനം വളരെ പ്രധാനപ്പെട്ട പങ്ക് വഹിക്കുമെന്ന് എനിക്ക് ഉറപ്പുണ്ട്. ഒരിക്കൽ കൂടി, ഞാൻ നിങ്ങൾക്ക് എല്ലാ ആശംസകളും നേരുന്നു.

ഇന്ന് ഭൂട്ടാൻ രാജാവിന്റെ ജന്മദിനമാണെന്നും ഈ പരിപാടി ഇവിടെ സംഭവിക്കുന്നുവെന്നതും വളരെ സന്തോഷകരമായ യാദൃശ്ചികതയാണ്. ഇത്രയും പ്രധാനപ്പെട്ട ഒരു ദിവസത്തിലാണ് ഭൂട്ടാൻ പ്രധാനമന്ത്രി ഇവിടെ വന്നിരിക്കുന്നത്, അദ്ദേഹത്തെ ഇവിടെ അയച്ചതിൽ ഭൂട്ടാൻ രാജാവ് വളരെ പ്രധാനപ്പെട്ട പങ്ക് വഹിച്ചിട്ടുണ്ട്, അതിനാൽ ഞാൻ അദ്ദേഹത്തിനും എന്റെ ഹൃദയംഗമമായ നന്ദി അറിയിക്കുന്നു.

സുഹൃത്തുക്കളേ,

എനിക്ക് സമയമുണ്ടായിരുന്നെങ്കിൽ, ഈ രണ്ട് ദിവസം ഞാൻ ഇവിടെ തങ്ങുമായിരുന്നു, കാരണം കുറച്ചു കാലം മുമ്പ് ഞാൻ വികസിത ഭാരതത്തിന്റെ ഒരു പരിപാടിയിൽ പങ്കെടുത്തിരുന്നു, അതിൽ നിങ്ങളിൽ പലരും യുവാക്കളായിരുന്നു, അതിനാൽ ഞാൻ മിക്കവാറും ദിവസം മുഴുവനും ഇവിടെ ഉണ്ടായിരുന്നു, എല്ലാവരെയും കണ്ടു, സംസാരിച്ചു, എനിക്ക് ധാരാളം കാര്യങ്ങൾ പഠിക്കാൻ കഴിഞ്ഞു, ധാരാളം കാര്യങ്ങൾ അറിയാൻ കഴിഞ്ഞു, ഇന്ന് ആദ്യ നിരയിൽ ഇരിക്കുന്ന എല്ലാ നേതാക്കളും ജീവിതത്തിൽ പുതിയ ഉയരങ്ങൾ നേടിയവരാണ് എന്ന് അറിയുന്നതിൽ ഞാൻ ഭാഗ്യവാനാണ്. അവരെയെല്ലാം കാണാനും, ഇരിക്കാനും, സംസാരിക്കാനും നിങ്ങൾക്ക് ഇതൊരു വലിയ അവസരമാണ്. എനിക്ക് ഈ ഭാഗ്യം ലഭിക്കുന്നില്ല, കാരണം ഞാൻ അവരെ കാണുമ്പോൾ, അവർ എന്തെങ്കിലും ജോലി കൊണ്ടുവരും. പക്ഷേ അവരുടെ അനുഭവങ്ങളിൽ നിന്ന് നിങ്ങൾക്ക് ധാരാളം അറിയാനും പഠിക്കാനും കഴിയും. അവർ സ്വന്തം മേഖലകളിൽ മികച്ച നേട്ടം കൈവരിച്ചവരാണ്. അവർ നിങ്ങൾക്കായി വളരെയധികം സമയം നൽകിയിട്ടുണ്ട്, ഇതാണ് സോൾ എന്ന ഈ സ്ഥാപനത്തിന് വളരെ ശോഭനമായ ഒരു ഭാവി ഞാൻ കാണുന്നുവെന്ന് എനിക്ക് തോന്നുന്നത്. അത്തരം വിജയകരമായ ആളുകൾ വിത്തുകൾ വിതയ്ക്കുമ്പോൾ, ആ ആൽമരം വിജയത്തിന്റെ പുതിയ ഉയരങ്ങൾ കൈവരിക്കുന്ന നേതാക്കളെയും സൃഷ്ടിക്കും. പൂർണ്ണ ആത്മവിശ്വാസത്തോടെ, സമയം നൽകിയ, കഴിവ് വർദ്ധിപ്പിച്ച, ശക്തി നൽകിയ എല്ലാവർക്കും ഞാൻ വീണ്ടും നന്ദി പറയുന്നു. എന്റെ യുവജനത്തെക്കുറിച്ച് എനിക്ക് ധാരാളം സ്വപ്നങ്ങളും പ്രതീക്ഷകളുമുണ്ട്, എന്റെ രാജ്യത്തെ യുവാക്കൾക്കായി ഓരോ നിമിഷവും എന്തെങ്കിലും ചെയ്തുകൊണ്ടിരിക്കണമെന്ന തോന്നൽ എന്റെ ഉള്ളിലുണ്ട്. ഞാൻ അവസരങ്ങൾക്കായി തിരയുന്നു, ഇന്ന് വീണ്ടും എനിക്ക് ആ അവസരം ലഭിച്ചു. യുവാക്കൾക്ക് എന്റെ ആശംസകൾ.

വളരെ നന്ദി.

-SK-