زراعت اور کسانوں کی بہبود کی مرکزی وزارت کے زیر اہتمام آج نئی دہلی کے پوسا میں دو روزہ ’قومی زرعی کانفرنس-ربیع ابھیان 2025‘ کا آغاز کیا گیا۔  کانفرنس کا موضوع-’ایک قوم-ایک زراعت-ایک ٹیم‘-زرعی شعبے میں مربوط کوششوں اور شراکت داری کو فروغ دینے کی سمت میں ایک اہم قدم ہے۔  مرکزی وزیر زراعت جناب شیوراج سنگھ چوہان کی پہل پر پہلی بار دو روزہ پروگرام کے طور پر ربیع کانفرنس کا انعقاد کیا جا رہا ہے۔  پہلے دن کانفرنس سے خطاب کرتے ہوئے جناب شیوراج سنگھ نے کہا کہ ملک میں اناج، پھلوں یا سبزیوں کی کوئی کمی نہیں ہوگی اور ہندوستان کو دنیا کی فوڈ باسکٹ بنایا جائے گا۔  مرکزی وزیر نے زراعت سے متعلق ملک بھر کے سینئرعہدیداروں کے ساتھ بات چیت میں رہنمائی کی۔

جناب چوہان نے کہا کہ ہمارے کسانوں اور سائنسدانوں کی محنت اور حکومت کی کسان دوست پالیسیوں کی بدولت ملک میں زراعت 3.7 فیصد کی شرح سے ترقی کر رہی ہے، جو دنیا میں سب سے زیادہ ہے۔  شیوراج سنگھ نے اس بات پر زور دیا کہ مرکز اور ریاستیں متحد ہیں اور اپنے ملک، اپنے لوگوں اور اپنے کسانوں کے لیے ہم پوری طاقت کے ساتھ مل کر کام کرتے رہیں گے کیونکہ ان کی فلاح و بہبود سب سے اہم ہے۔  انہوں نے کہا کہ ’’ہم خوش قسمت ہیں کہ ہمیں ہندوستان کے زرعی منظر نامے کو تبدیل کرنے کی ذمہ داری ملی ہے۔  ہم عام لوگ نہیں ہیں۔ ہم وہ ہیں جو ملک کی نصف آبادی کی تقدیر بناتے ہیں۔  ہمیں بڑی لگن کے ساتھ کام کرنا چاہیے۔  ہماری اصل تشویش کسان اور ان کی ترقی ہے۔‘‘

جعلی کھادوں، بیجوں اور کیڑے مار ادویات کے معاملے پر بات کرتے ہوئے، شیوراج سنگھ نے کہا کہ مجرموں کے خلاف سخت کارروائی کی جائے گی اور صرف بائیو محرکات (پودوں کی نشوونما میں اضافہ کرنے والی اشیاء) جو تمام معیارات اور اصولوں پر پورا اترتے ہیں، کو اب فروخت کی اجازت ہوگی۔’’ہم کسانوں کا استحصال نہیں ہونے دیں گے۔  زرعی توسیع کا کام انتہائی اہم ہے ؛ مرکزی حکومت کے ساتھ مل کر، تمام ریاستی زرعی محکموں، زرعی یونیورسٹیوں، کرشی وگیان کیندروں اور تمام متعلقہ تنظیموں کو ٹھوس پروگرام اور حکمت عملی تیار کرنی چاہیے اور زمینی سطح پر تیزی سے کام کرنا چاہیے۔  افسران کو اپنے کام میں قدر کا اضافہ کرنا چاہیے۔  ہمیں صرف زراعت اور کسان کی فکر ہے، جس کے لیے ہم پوری لگن کے ساتھ کام کریں گے۔  اسی جذبے کے ساتھ، ربیع کانفرنس میں کسانوں کی صورتحال کو بہتر بنانے کے لیے غور و فکر کرے گی اور کام کرے گی۔‘‘

شیوراج سنگھ نے مزید کہا کہ اب موسم کا اب اندازہ نہیں لگایا جا سکتا، اس لیے زیادہ سے زیادہ کسانوں کو فصل بیمہ کے تحت شامل کیا جانا چاہیے اور افسران کو اس بات کو یقینی بنانے کے لیے کوششیں کرنی چاہئیں۔ پردھان منتری فصل بیمہ یوجنا کو مؤثر طریقے سے نافذ کیا جانا چاہیے تاکہ کسانوں کو راحت ملے ۔  وکست کرشی سنکلپ ابھیان اکتوبر میں مرکز اور ریاستوں کی مشترکہ شرکت کے ساتھ دوبارہ شروع کیا جائے گا۔  اب زرعی تحقیق کو صرف مقالات کی اشاعت پر ہی نہیں بلکہ کسانوں کے مسائل کو حل کرنے پر توجہ دینی چاہیے۔  سیلاب سے متاثرہ علاقوں میں، پوری انتظامیہ کو راحت فراہم کرنے کے لیے تیزی سے کام کرنا چاہیے۔

اپنی افتتاحی تقریر میں زراعت کی مرکزی وزارت کے سکریٹری ڈاکٹر دییش چترویدی نے بتایا کہ کانفرنس کے حصے کے طور پر چھ متوازی بریک آؤٹ سیشن منعقد کیے جا رہے ہیں۔  آئی سی اے آر کے ڈائریکٹر جنرل ڈاکٹر ایم ایل جاٹ نے بھی اپنے خیالات کا اظہار کیا۔  افتتاحی تقریب میں راجستھان کے وزیر زراعت ڈاکٹر کروڑی لال مینا موجود تھے۔

کانفرنس میں مرکز اور ریاستوں کے سینئر حکام، انڈین کونسل آف ایگریکلچرل ریسرچ (آئی سی اے آر) کے زرعی ماہرین، کسان نمائندوں اور دیگر متعلقہ فریقوں نے شرکت کی۔  یہ پلیٹ فارم پالیسی سازوں، سائنسدانوں اور ریاستی نمائندوں کو ربیع  26-2025 سیزن کی تیاریوں، پیداوار کے اہداف اور حکمت عملیوں پر جامع طور پر غور و فکر کرنے کا موقع فراہم کر رہا ہے۔

۔۔۔۔۔۔۔۔۔۔۔

ش ح۔ک ح۔ ن م۔

U-6063