ভারত মাতা কি জয়!

ভারত মাতা কি জয়!

ভারত মাতা কি জয়!

রাজ্যপাল শ্রী অজয় ভাল্লা জি, রাজ্য সরকারগী অতোপ্পা ওফিসারশিং অমসুং থৌরম অসিদা শরুক য়ারিবা মনিপুরগী ঐগী ইনাওশিং অমসুং ইচলশিং, খুরুমজরি।

মনিপুর অসি থৌনা ফবগী লমদম অমনি অমসুং চীঙশিং অসি মহৌশাগী মমল য়াম্লবা খুদোল অমনি অমসুং চীঙশিং অসি অদোম থবক কন্না শুবগী খুদমসু ওইরি। ঐনা মনিপুরগী থৌনা ইকায়খুম্নবা উৎচরি। নোং য়াম্না কন্না চুরবসু অদোম মশিং য়াম্না মফম অসিদা তিল্লি। মসিগীদমক ঐনা অদোমগী মফমদা তৌবীমল খঙবা উৎচরি। নোং কন্না চুবদগী ঐগী হেলিকোপ্তর পাইরকপা ঙমদ্রে, মরম অদুনা ঐ লম্বীদা লাকপনি। ঙসি লম্বীদা ঐনা ফজরবা মফম কয়া উরে, ঙসি ঐ হেলিকোপ্তরদা লাক্তবা  অসি য়াম্না ফৈ হায়না ঐনা খল্লি। ঐনা লম্বীদা লাকপদা, নহারোলশিং অমসুং অহলশিংনা মখোয়গী মখুত্ত মচু অহুমগী ফিরালশিং পায়দুনা ওকখিবা অদু ঐগী পুন্সিদা কৈদৌঙৈদা কাউবা ঙম্লোই। ঐনা মনিপুরগী মীয়ামদা কোক নোঞ্জরি অমসুং ইকায়খুম্নবা উৎচরি।

মরুপশিং,

লমদম অসিগী নাৎ অমসুং চৎনবী মখল কয়া অসি ভারতকী মপাঙ্গল অমনি। মনিপুর মসিগী মমিং অসিমক্না মনি অমনি। মনি অসিনা তুংদা অৱাং-নোংপোক শীনবা থুংনা মঙাল পীগনি। মনিপুর য়াংনা চাউখৎপগী লম্বীদা লাক্নবা ভারত সরকারনা লেপ্তনা হোৎনরি। হিরম অসিগীদমক ঙসি ঐ অদোমগী নাক্ত লাকপনি। ঙাইহাক্কী মমাঙদা, ফম্বাক অসিদঘী লুপা করোর লিশিং ৭ হেনবগী প্রোজেকশিং উরেপ-উয়ুং তমখ্রে। হায়রিবা প্রোজেকশিং অসিনা মনিপুরগী মীয়াম, চীঙদা লৈরিবা ত্রাইবেল মীয়ামগী পুন্সি হেন্না নুংঙাইহনগনি। প্রোজেকশিং অসিনা হকশেল অমসুং লাইরিক-লাইশুগী অনৌবা খুদোংচাবশিং পীগনি। প্রোজেকশিং অসিগীদমক ঐনা চুরাচান্দপুরগী মীয়ামদা হরাওবা ফোঙদোকচরি।

মরুপশিং,

মনিপুর ঙমখৈদা লৈবা রাজ্য অমনি। রাজ্য অসিদা লম্বী-থোংগী অচৌবা খুদোংচাদবা অমা মায়োক্নরি। অফবা লম্বীশিং লৈতবদগী অদোম্না মায়োক্নরিবা খুদোংচাদবশিং ঐ খঙলে। মরম অদুনা, ঐনা ২০১৪ দগী মনিপুরগী লম্বী-থোং ফগৎনবা থবকশিং পায়খৎতুনা লাক্লি। মসিগীদমক ভারত সরকারনা থাক অনিদা থবক পায়খৎলি। অহানবদা, ঐখোয়না মনিপুরদা রেল অমসুং লম্বীগী বজেতশিং কয়ারক হেনগৎলে অমসুং অনিশুবদা, খুঙ্গংশিংদা লম্বীশিং শেমগৎনবা থবকশিং পায়খৎলে।

মরুপশিং,

হৌখিবা চহিশিংদা রাজ্য অসিগী নেসনেল হায়ৱেশিংগীদমক লুপা করোর ৩৭০০ চাদিং তৌখ্রে। মমাঙদা খুঙ্গংশিংদা চৎপদা অদোম কয়া য়াম্না ৱাবগে হায়বা অদোম খঙলমগনি। হৌজিক খুঙ্গং চা কয়াগী লম্বীশিং লৈরে। চীঙগী মীয়াম অমসুং ত্রাইবেলগী খুঙ্গংশিং হৌজিক মসিদগী কান্নবা ফংলে।

মরুপশিং,

ঐখোয়গী সরকার মনুংদা মনিপুরদা রেল শেমগৎপগী থবক পাকথোক-চাউথোক্লে। জিরিবাম-ইম্ফাল রেলৱে লাইন্না অথুবা মতমদা রাজ্যগী কোনুং ইম্ফালগা লৈবাক অসিগী রেলৱে নেতৱার্ককা শম্নরগনি। মসিগীদমক সরকারনা লুপা করোর ২২,০০০ চাদিং তৌরে। লুপা করোর ৪০০ চঙনা পায়খৎলিবা অনৌবা ইম্ফাল এয়রপোর্ত অসিনা মথক্ত চৎথোক-চৎশিন তৌবা অনৌবা থাকশিংদা পুখৎলে। এয়রপোর্ত অসিদগী রাজ্য অসিগী অতোপ্পা মফমশিংদা হেলিকোপ্তর পাইবা হৌরে। চৎথোক-চৎশিনগী খুদোংচাবা হেনগৎলকপা অসিনা রাজ্য অসিগী নহারোলশিংদা অনৌবা থবক ফংনবগী খুদোংচাবশিং পীরে।

মরুপশিং,

ঙসি ভারত য়াম্না য়াংনা চাউখৎলি। ঐখোয় অথুবা মতমদা মালেমদা অহুমসুবা খ্বাইদগী চাউবা ইকোনোমি ওইরগনি। চাউখৎপগী কান্নবশিং লৈবাক অসিগী মফম খুদিংমক্ত য়ৌহনবা হায়বসি ঐগী থৌদাংনি। মতম অমদা চাউখৎ-থৌরাংগী থবকশিং দিল্লিদগী লাউথোক্লমখি অমসুং রাজ্য অসি য়ৌরকপদা চহি কয়া চঙখি। ঙসিদি ঐখোয়গী চুরাচান্দপুর, ঐখোয়গী মনিপুরসু লৈবাক অসিগী অতৈ মফমশিংগা লোয়ননা চাউখৎলে। হৌজিক লৈবাক শীনবা থুংনা লায়রবশিংগী পাক্কাগী য়ুমশিং শানবা ঐখোয়না স্কিম পায়খৎলে। মনিপুরগী ইমুং লিশিং কয়া স্কিম অসিগী কান্নবা ফংলে। রাজ্য অসিদা য়ুম ৬০,০০০ রোম শাখ্রে। মমাঙদা রাজ্য অসিদা ইলেক্ত্রিসিতি ফংদবগী অৱাবা মায়োক্নরমখি। ঐখোয়গী সরকারনা মৈগী অৱাবা কোকহন্নবা ৱাশকখি। মসিগী ফল ওইনা, মনিপুরদা ইমুং লাখ ১ হেন্না লেম্না মৈ ফংহল্লে।

মরুপশিং,

ঐখোয়গী ইমাশিং অমসুং ইচলশিং ঈশিং ফংদবগী অৱাবা মায়োক্নখি। মসিগীদমক, ইমুং খুদিংদা তোতি ঈশিং ফংহন্নবা স্কিম অমা ঐখোয়না পায়খৎলে। হৌখিবা চহি খর অসিদা, লৈবাক অসিগী মীওই করোর ১৫ হেন্না তোতি ঈশিং ফংখ্রে। মনিপুরদা হৌখিবা চহি ৭-৮ অসিদা ইমুং লিশিং ২৫-৩০ খক্ত তোতি ঈশিং ফংখি। অদুবু ঙসিদি রাজ্য অসিগী ইমুং লাখ ৩.৫ হেন্না তোতি ঈশিং ফংলে। অথুবা মতমদা মনিপুরগী ইমুং খুদিংমক তোতি ঈশিং ফংলগনি হায়না ঐনা থাজৈ।

মরুপশিং,

মমাংঙৈগী চীঙশিং অমসুং ত্রাইবেলশিংগী লমদমদা, অফবা স্কুলশিং, কোলেজশিং , অফবা হোস্পিতালশিং অসি মঙলান অমা ওইরমখি। কনাগুম্বা অনা মশা ঙমদ্রবদি, অনাবা অদু হোস্পিতাল ফাওবা পুবদা মতম য়াম্না থেংখি। ঙসিদি, ভারত সরকারগী থবকশিংনা মরম ওইদুনা ফিবম অদু হোংলে। চুরাচান্দপুরা অনৌবা মেদিকেল কোলেজ অমা লৈরে, মফম অসিদা নৌবা দোক্তরশিং ত্রেনিং পীরে অমসুং হকশেলগী খুদোংচাবশিংসু ফগৎলক্লি। খন্দুনা য়েংউ, নিংতম্বা ফংলবা চহি কয়াগী মতুংদা, মনিপুরগী চীঙগী জিলা অমদতা মেদিকেল কোলেজ অমতা লৈরমদে, ঐখোয়গী সরকারনা কোলেজ অসি লৈহল্লে।

পি.এম দিভাইন স্কিমগী মখাদা ঐখোয়গী সরকারনা চীঙগী জিলা মঙাদা অনৌবা হকশেলগী খুদোংচাবশিং শেমগৎলে। অয়ুস্মান ভারত স্কিমগী মখাদা, ভারত সরকারনা লায়রবশিংদা লুপা লাখ ৫ ফাওবগী লেম্না লায়য়েংবগী খুদোংচাবা পীরে। স্কিম অসিগী মখাদা মনিপুরগী অনাবা লাখ ২.৫ রোম লেম্না লায়য়েংবগী খুদোংচাবা ফংলে। লেম্না লায়য়েংবা অসি খক নত্তে, ঐগী লায়রবা ইনাওশিং অমসুং ইচলশিংগী লায়য়েংবদা চঙগদবা লুপা করোর ৩৫০ গী শেনফম কনবা ঙম্লে। শেনফম অসি ভারত সরকারনা পুথোকপনি। মসিনা মরম ওইদুনা লায়রবশিং পুক্নিং-ৱাখল ৱাবা কোকহনবা হায়বসি ঐখোয়গী পান্দমনি।

মরুপশিং,

মনিপুর অসি থাজবগী লমদম অমনি। লাইবক থিবদি, অঙকপা লমদম অসি মীহাৎ-মীপুন্না থল্লে। ঙাইহাক্কী মমাঙদা, ঐনা কেম্পশিংদা লৈরিবা মীওইশিংগা উনখ্রে। মখোয়গা ৱারি শান্নরবা মতুংদা, ঐনা হায়রি মদুদি অনৌবা থাজবগী মঙাল অমনা মনিপুরগী থোঙজিলদা থিল্লরে।

মরুপশিং,

মফম অমা চাউখৎনবগীদমক শান্তি লৈহনবা হায়বসি য়াম্না মরুওই। হৌখিবা চহি ১১ অসিদা, অৱাং-নোংপোক লমদমদা চহি কয়া লৈরম্বা য়ানদবশিং অমসুং মুক্নবশিং লোইশিনখ্রে। মীয়াম্না শান্তিগী লম্বীদা চৎলে, চাউখৎ-থৌরাংগী থবকশিং মরুওইনা লৌরে। হন্দক চীঙ অমসুং তম্পাক্কী তোঙান তোঙানবা কাংবুগা ৱারি শানবা হৌখিবা অসিদা ঐ অপেনবা ফাওই। ৱারি শানবা, ইকায়খুম্নবা অমসুং অমনা অমবু মশক খঙদুনা শান্তি পুরক্নবা পায়খৎলিবা থবকশিং অসি ভারত সরকারনা পায়খৎলিবা থবকশিংগী শরুক অমনি। তুংলমচত্ত মখোয়গী অঙাংশিংগী য়াইফনবা শান্তিগী লম্বীদা লাক্নবা অমসুং মখোয়গী মঙলানশিং মঙফাওনবা ঙম্নবা লুপ খুদিংমক্ত ঐনা হায়জরি। ভারত সরকারনা অদোমগীদমক, মনিপুরগীদমক লৈরি হায়না ঙসি ঐনা অদোমগী মফমদা ৱাশক্লি।

মরুপশিং,

মনিপুর মহৌশাগী লম্বীদা লাক্নবা ভারত সরকারনা পায়খৎপা য়াবা থবক খুদিংমক পায়খৎলি। য়ুম লৈত্রবা ইমুংশিংগী অনৌবা য়ুম লিশিং ৭ শানবা ঐখোয়গী সরকারনা মতেং পাংলে। হন্দক লুপা করোর লিশিং ৩ রোমগী অখন্নবা পেকেজ অমা অয়াবা পীখ্রে। ময়ুম লৈত্রবশিংগী মতেং পাংনবা লুপা করোর ৫০০ গী অখন্নবা প্রোবিজন অমা লৈরে।

মরুপশিং,

মনিপুরগী ত্রাইবেল নহারোলশিংগী মঙলানশিং অমসুং অৱাবশিং ঐ ফজনা খঙলে। অদোমগী খুদোংচাদবশিং কোকহন্নবা তোঙান তোঙানবা থবকশিং পায়খৎলে। লোকেল বোদিশিংগী লৈঙাক মপাঙ্গল কনখৎহন্নবা সরকারনা হোৎনরি অমসুং মখোয়গী চাউখৎ-থৌরাংগীদমক ফন্দশিং মতিক চানা থৌরাং তৌরে।

মরুপশিং,

ঙসিদি, ত্রাইবেল ফুরুপ খুদিংমক চাউখৎহনবা হায়বসি ঐখোয়গী মরুওইবনি। অহানবা ওইনা, ত্রাইবেলশিংগী মফমশিং চাউখৎনবা ধর্তি অবা জনজাতি গ্রাম উতকার্স অভিয়ান পায়খৎলে। মসিগী মখাদা, মনিপুরগী ত্রাইবেলশিংগী খুঙ্গং ৫০০ হেনবদা থবকশিং পায়খৎলে। ত্রাইবেলশিংগী লমদমদা এক্লব্য মোদেল রেসিদেন্সিএল স্কুলশিং লিংখৎলে। রাজ্য অসিগী চীঙগী জিলাশিংদা স্কুলশিং, কোলেজশিং মতমগা চুনবা মওংদা শেমগৎলে।

মরুপশিং,

নুপীশিংদা শক্তি পীবগী চৎনবী অমা মনিপুরদা লৈরি। ঐখোয়গী সরকারসু নুপীশিংদা শক্তি পীনবা থবক পায়খৎলে। সরকারনা নুপীশিংগী হোষ্টেলশিং শেমগৎলে অমসুং মসিনা মনিপুরগী ইচানুপীশিং মতেং পাংবা ঙম্লে।

মরুপশিং,

মনিপুর শান্তি, চাউখৎপা অমসুং নুংঙাই-য়াইফবগী খুদম অমা ওইনবা ঐখোয়না থবক পায়খৎলি। মনিপুর চাউখৎনবা, লাঞ্জেন্নরিবা মীওইশিং চুনবা মফমদা লৈনবা, শান্তি পুরক্নবা ভারত সরকারনা মখা তানা মনিপুর সরকারগী মতেং পাংগনি হায়না ঐনা থাজবা পীরি। চাউখৎ-থৌরাংগী প্রোজেকশিং অমসুং অদোম্না উৎখিবা নুংশিবা অমসুং ইকায়খুম্নবা অদুগীদমক ঐনা অমুক হন্না অদোমগী মফমদা হরাওবা ফোঙদোকচরি। ঐনা মনিপুরগী মীয়ামদা থম্মোয় শেংনা তৌবীমল খঙবা উৎচরি। ঐগা লোয়ননা হায়মিন্নসি-

ভারত মাতা কি জয়!

ভারত মাতা কি জয়!

ভারত মাতা কি জয়!

থাগৎচরি।

***

(Release ID: 2166291) Visitor Counter : 2