الیکٹرانکس اور اطلاعاتی ٹکنا لوجی کے مرکزی وزیر جناب اشونی ویشنو نے آج سوہنا میں ٹی ڈی کے کارپوریشن کے ایڈوانسڈ ٹیکنالوجیز لیتھیم-آئن (ایل آئی-آئی او این) بیٹری مینوفیکچرنگ پلانٹ کا افتتاح کیا۔

وزیرموصوف نے بھارت کے الیکٹرانکس سفر میں ایک اور سنگِ میل قرار دیتے ہوئے کہاکہ’’یہ ہمارے لیے ایک نہایت اہم موقع ہے کیونکہ ہم وزیراعظم جناب نریندر مودی کے آتم نربھر بھارت کے وژن کو پورا کر رہے ہیں۔ چاہے وہ کیمرہ ماڈیولز ہوں، پی سی بی اسمبلی، سیمی کنڈکٹرز یا بیٹریاں-آنے والے برسوں میں ہر پرزہ ہمارے ملک میں تیار کیا جائے گا۔ بھارت میں اس قسم کی جدید ٹیکنالوجی کا آنا ہمارے الیکٹرانکس میں خود انحصاری کے لیے ایک بڑا سنگِ میل ہے۔‘‘

انہوں نے کہا کہ سب سے پہلے بھارت میں تیار کیے گئے چِپ وزیراعظم کو سیمی کن انڈیا 2025  کے دوران پیش کیے گئے تھے۔ اس فیکٹری کے آغاز کے ساتھ، موبائل فونز، ویریبلز، ہیریبلز جیسے گھڑیاں، ایئر بڈز، ایئرپوڈز اور لیپ ٹاپس میں استعمال ہونے والی لیتھیم-آئن بیٹریاں ملکی سطح پر تیار کی جائیں گی۔ یہ جدید ترین پلانٹ ہر سال تقریباً 20 کروڑ  (200 ملین) بیٹری پیکس تیار کرے گا، جو بھارت کی سالانہ ضرورت کے 50 کروڑ پیکس کا تقریباً 40 فیصد احاطہ کرے گا۔ وسیع توسیعی امکانات کے ساتھ، یہ فیکٹری ملک کے الیکٹرانکس مینوفیکچرنگ کے نظام کو مضبوط بنانے کے لیے تیار ہے۔

جناب ویشنو نے زور دے کرکہا کہ یہ فیکٹری حکومت ہند کے الیکٹرانکس مینوفیکچرنگ کلسٹر (ای ایم سی) اسکیم کے تحت تیار کی گئی ہے۔ روزگار کے امکانات کی نشاندہی کرتے ہوئے، جناب ویشنو نے کہا کہ یہ پلانٹ تقریباً 5,000  افراد کو براہِ راست ملازمت فراہم کرے گا، اور اے ٹی باول پلانٹ میں پہلے ہی ہونہارافراد کومہارت کی تربیت دی جا چکی ہے۔ وزیرموصوف نے ہریانہ حکومت کا بھی شکریہ ادا کیا کہ اس نے ریاست میں الیکٹرانکس مینوفیکچرنگ سہولیات کے قیام میں تعاون فراہم کیا۔

سوہنا پلانٹ کا افتتاح بھارت کے الیکٹرانکس مینوفیکچرنگ کے مکمل ماحولیاتی نظام کی تعمیر کی جانب ایک اور قدم ہے۔ ہر سنگِ میل—چاہے وہ سیمی کنڈکٹرز، بیٹریاں، پی سی بی اسمبلیز یا کیمرہ ماڈیولز ہوں—بھارت کو الیکٹرانکس کی عالمی پیداوار کے مرکز کے طور پر مستحکم کر رہا ہے، درآمدات پر انحصار کم کر رہا ہے اور عالمی ویلیو چین میں اپنے قابل اعتماد شراکت دار کے طور پر اپنی پوزیشن مضبوط کر رہا ہے۔

ٹی ڈی کے کارپوریشن کے بارے میں

ٹی ڈی کے، ایک نمایاں الیکٹرانک پرزوں کی کمپنی ہے جو دنیا کے 30 سے زائد ممالک اور خطوں میں 250 سے زیادہ مینوفیکچرنگ، تحقیق و ترقی (آر اینڈ ڈی) اور سیلز سائٹس چلا رہی ہے۔

******

ش ح ۔ ع ح ۔ م ا

Urdu No-5662