লাক্লিবা ওক্তোবর ২৭-৩১ ফাওবা মুম্বাইদা পাংথোক্কদৌরিবা ‘ইন্দিয়া মেরিতাইম ৱিক’ তা প্রধান মন্ত্রী শ্রী নরেন্দ্র মোদী শরুক য়াগনি অমসুং থৌরম অদুদা মহাক্না গ্লোবেল মেরিতাইম সি.ই.ও ফোরমদা ৱা ঙাংগনি হায়না পোর্তস, সিপ্পিং অমসুং ৱাতরৱেজগী য়ুনিয়ন মিনিষ্টর শ্রী সর্বনন্দা সোনোৱালনা ফোঙদোকখ্রে।

গুৱাহাতিদা পাংথোকখিবা ৱাতর ভোয়েজ নোর্থইষ্ট ২০২৫ দা ৱা ঙাংবদা, সর্বনন্দা সোনোৱালনা হায়খি থৌরম অসিদা লৈবাক ১০০ হেনবা অমসুং মরী লৈনবা ১০০,০০ হেন্না শরুক য়াগনি হায়না থাজবগা লোয়ননা মালেমদা ভারতকী মেরিতাইম শক্তি উৎনবা পুৱারি ওইরবা খুদোংচাবা অমনি। সেক্তর অসি মমাঙদা অমুক্ত ওইখিদ্রিবা মওংদা অওনবা পুরক্লিঙৈ চৈরক অসিদা থৌরম অসিদা প্রধান মন্ত্রী শরুক য়াগদবা অসিনা মালেমগী মেরিতাইমগী লুচিংবগী থবক্ত ভারতকী ফিবম হেন্না চেৎশিনহল্লগনি।

সর্বনন্দা সোনোৱালনা হায়খি ইন্দিয়া মেরিতাইম ৱিক অসি অনৌবা ৱাখলশিংগী ইতিনফম অমা ওইবতা নত্তনা, থাজবগী ইতিনফম অমনি। ঐখোয়গী মেরিতাইমগী পান্দম অসি প্রধান মন্ত্রীনা লমজিংবগা লোয়ননা, হৌজিক মালেম্না ভারত অসি থাজবা মরুপ অমা ওইনা অমসুং মেরিতাইমগী শক্তি হেনগৎলক্লিবা অমা ওইনা উরে। গ্লোবেল মেরিতাইম সি.ই.ও ফোরমদা মহাক শরুক য়াবা অসিনা ভারত্ত শেন থাদনবা মালেমগী উদ্যোগকী লুচিংবশিং ইথিল পীরগনি।

সর্বনন্দা সোনোৱালনা হায়খি ব্রাহ্মপুত্রা তুরেলদা শীজিন্ননবা লুপা করোর ২৫০ চঙনা লক্সরি জহাজ অনি শারগনি। হৌজিক কোলকাতাগী হাওরাদা লৈবা হুগলি কোচিন সিপয়ার্দতা শারিবা জহাজশিং অসি ২০২৭ দা শঙ্গাগনি, মসিনা ক্রুইজ ভারত মিসনগী মখাদা অসামগী তুরেলগী তুরিজম অনৌবা মশক অমা তাক্লগনি।

মেরিতাইমগী অওনবশিং অমসুং অহোংবশিং

সর্বনন্দা সোনোৱালনা হায়খি প্রধান মন্ত্রী মোদীগী লমজিং মখাদগী ২০১৪ দগী ভারতকী মেরিতাইমগী থবকশিংদা অহোংবা লাক্লে। মেরিতামি ইন্দিয়া ভিজন ২০৩০ অমসুং মেরিতাইম অমৃত কাল ভিজন ২০৪৭ না হিথাংফমশিং, জহাজ হোনবা অমসুং কংফালগী ঈশিং লম্বীশিংদা অওনবা পুরক্লে। হিথাংফমশিং থবক তৌবা ঙম্বা শরুক অনি হেনগৎলে, কার্গো পুথোক-পুশিন তৌবা মিল্লিয়ন মেত্রিক তন ১,৬০০ য়ৌরে অমসুং হিথাংফমশিংদা থুংলবা অমসুং থাদোকখিবগী মতম পুং ২২ দা হন্থরে। ২০১৪ দা ঈশিং লম্বী ৫ থবক তৌরম্বদগী হৌজিক ৩০ য়ৌরে। কংফালগী ঈশিং লম্বীশিংদা কার্গোশিং চৎপা ২০১৩-১৪ দা মিল্লিয়ন তন ১৮ ওইরম্বদগী হৌখিবা চহিদা মিল্লিয়ন তন ১৪৫ য়ৌরে। মখোয় অসি শুপ্নগী মশিং খক নত্তে, মখোয়গী অওনবশিংগী মাইপাকপশিংনি।

সর্বনন্দা সোনোৱালনা হায়খি মৈখু চেন্দবা থাউশিং, রিন্যুএবল ইনর্জি শীজিন্নবা হেনগৎহন্দুনা অমসুং মহৌশাগী অকোয়বগী ফিবম শোকহন্দবা জহাজশিং শীজিন্নদুনা হরিত সাগর পোলিসি অমসুং হরিত নৌকা ইনিসিয়েতিপনা লমজিংদুনা মৈখু থাংদবা অওনবা অমা পুরক্লে। ইন্দো-বাংলাদেস প্রোতোগোল রুতকী খুৎথাংদা নেসনেল ৱাতৱেজ ১,২ অমসুং ১৬ দা কিমি ৩০০ হেন্না কার্গো পুবদা অচঙবা শেনফমগী চাদা ৩৫ হন্দোক্নবা জলবাহক স্কিম দিশেম্বর ২০২৪ দা হৌদোকখ্রে। জলবাহক স্কিম অমসুং অকক্নবা মতমদা জহাজ হোন্দুনা, ঐখোয়না কার্গো পুবতা নত্তনা, ঐখোয় থাজবগা লোয়ননা চৎলে। ঐখোয়না উদ্যোগশিংদা অশোই-অঙাম থোক্তবা, মমল হোংবা অমসুং তুংকোইনা চৎনবা য়াবা খুদোংচাবা পীরে।

চাউখৎপগী ময়াইদা অৱাং-নোংপোক

সর্বনন্দা সোনোৱালনা হায়খি মদুদি মেরিতাইমগী লম্বীদা অৱাং-নোংপোক্কী থৌদাং লৈরি। লমদম অসিদা কংফালগী ঈশিং লম্বীশিং শেমগৎনবা লুপা করোর ১,০০০ হেন্না থাদখ্রে অমসুং হৌজিক লুপা করোর ৩০০ রোমগী প্রোজেকশিং লোইশিল্লকলে।

প্রধান মন্ত্রী মোদীগী লমজিং মখাদা ঐখোয়না অৱাং-নোংপোককঈ মেরিতাইমগী খুদোংচাবশিং লৌরে। লমদম অসিগী অহানবা ওইনা পান্দুনা শেমগৎলিবা লুপা করোর ২৩৯ গী জহাজ শেমজিন্নবা সেন্তর ২০২৬দা থবক হৌরগনি। সেপ্তেম্বর ২০২৫ দা লুপা কারোর ১৮০ চঙনা শেমগৎপা লম্বীনা এন.ঐচ-২৭ অমসুং পান্দু হিথাংফম শম্নরগনি। ক্রুইজ তুরিজম চাউখৎনবা লুপা করোর ২৯৯ থাদদুনা গুইজান, নিয়ামাতি, বিশ্বানাথ ঘাত অমসুং সিলঘাত্ত অনৌবা জেতিশিং শেমগৎলি। মেরিতাইমগী শীনফমদা লৈরিবা মীওই ৫,০০০ ত্রেনিং পীনবা দিব্রুগরদা লুপা কারোরা ১৮৮ চঙনা রিজনেল সেন্তর ওফ এক্সলেন্স অমা শেমগৎলি। ব্রাহ্মপু্ত্রা অসি তুরেল অমা খক নত্তে, মসি ঐখোয়গী থৱায়নি। অনৌবা ক্রুইজ তর্মিনেলশিং, জহাজ শেম্ফমশিং অমসুং স্কিল সেন্তরশিং লিংখৎতুনা ঐখোয়না অচৌবা তুরেল অসিগী কান্নবা লৌরি।

ক্রুইজ ভারত মিসন অমসুং তুরিজম চাউখৎহনবা

২০২৯ ফাওবদা পেসেঞ্জর মশিং শরুক অনি হেনগৎহন্নবা, তুরেলগী ক্রুইজ তর্মিনেল ১০০ হেন্না, সমুদ্রগী ক্রুইজ তর্মিনেল ১০ অমসুং মেরিনা মঙা শেমগৎনবা পান্দমগা লোয়ননা ২০২৪ দা ভারত ক্রুইজ মিসন হৌদোকখিবনি। হৌজিক ফাওবদা, ব্রাহ্মপুত্রা তুরেল খক্তদা ১৪ য়াওনা নেসনেল ৱাতরৱেজশিংদা তুরেলগী ক্রুইজ ২৫ মথৌ তৌরি।

সর্বনন্দা সোনোৱালনা হায়খি হন্দক ফোর্বসনা গঙ্গা রিভর ক্রুইজ অসি মালেমগী ক্রুইজ ১০ গী মনুংদা লৈদুনা অসাম মথংগী মালেমগী রিভর ক্রুইজগী মফম অমা ওইনবা থৌরাং তৌরে।

ইন্দিয়া মেরিতাইম ৱিক- লুপা ত্রিল্লিয়ন ১ গী খুদোংচাবা অমা

সর্বনন্দা সোনোৱালনা হায়খি ইন্দিয়া মেরিতাইম ৱিক ২০২৫ না ভারত্ত লুপা ত্রিল্লিয়ন ১ রোম থাদরক্নবগী খুদোংচাবা অমা পীরগনি।

মসি ভারতকী মেরিতাইম অমুক হিঙ্গৎলক্নবা দিগেদ অমনি। ২০৪৭ ফাওবদা, একজিম কার্গো এম.এম.তি ১০,০০০ অমসুং কংফালগী ঈশিং লম্বীশিংগী খুৎথাংদা এম.এম.তি ৫০০ পুথোক-পুশিন তৌবা অসি ঐখোয়গী পান্দমনি। মালেমগী মকোক থোংবা জহাজ শাবা লৈবাক মঙাগী মনুংদা ভারত য়াওরগনি অমসুং মালেমগী ওইনা জহাজ রিসাইক্লিং তৌবগী চাদা ২০ ভারতনা পাংথোক্লি। মসি মেরিতাইম ইন্দিয়াগী ঐখোয়গী অমৃত কালগী পান্দমনি।

ইনলেন্দ ৱাতরৱেজ ওথোরিতি ওফ ইন্দিয়া অমসুং ইন্দিয়ান পোর্তস এসোসিএসন্না পুন্না শীনবা ৱাতর ভোয়েজ নোর্থইষ্টতা ক্রুইজ ওপরেতরশিং, কার্গো ভেসেল মপুশিং অমসুং ললোনবশিং য়াওনা মরী লৈনবা ২৪০ হেন্না শরুক য়াখি।

মহাক্কী ৱারোল লোইশিল্লকপদা, সর্বনন্দা সোনোৱালনা হায়খি মরী লৈনবশিংনা মুম্বাইগী থৌরম অসি থৱায় য়াওনা শরুক য়াগদবনি। ইন্দিয়া মেরিতাইম ৱিক ২০২৫ অসি থৌরম অমা খক নত্তে, মসি ইহৌ অমনি। মসিনা মালেমগী ওইনা চাংদম্নবা ঙম্বা, দিজিতেলগী শক্তি লৈরবা অমসুং মহৌশাগী অকোয়বগী ফিবম শোকহন্দবা ভারতকী মেরিতাইম অমা শেমগনি। থাজবা, ললোন-ইতিক অমসুং চৎথোক-চৎশিনগী খোঙচৎ অসিদা ঐখোয় শরুক য়ানবা ঐনা হায়জরি।

***