কেন্দ্ৰীয় গৃহমন্ত্ৰী আৰু সমবায় মন্ত্ৰী শ্ৰী অমিত শ্বাহে আজি গুৱাহাটীত অসমৰ প্ৰাক্তন মুখ্যমন্ত্ৰী গোলাপ বৰবৰাৰ জন্ম শতবাৰ্ষিকী উদযাপন কাৰ্য্যসূচী সম্বোধন কৰে। এই কাৰ্য্যসূচীত অসমৰ মুখ্যমন্ত্ৰী ডঃ হিমন্ত বিশ্ব শৰ্মা, কেন্দ্ৰীয় বন্দৰ, জাহাজ আৰু জলপথ দপ্তৰৰ মন্ত্ৰী শ্ৰী সৰ্বানন্দ সোণোৱাল আৰু বৈদেশিক পৰিক্ৰমা দপ্তৰৰ ৰাজ্যিক মন্ত্ৰী শ্ৰী পবিত্ৰ মাৰ্ঘেৰিটাকে প্ৰমুখ্য কৰি ভালেমান বিশিষ্ট ব্যক্তিয়ে অংশগ্ৰহণ কৰে।

অসমৰ প্ৰাক্তন মুখ্যমন্ত্ৰীজনক স্মৰণেৰে কেন্দ্ৰীয় গৃহমন্ত্ৰী শ্ৰী অমিত শ্বাহে কয় যে গোলাপ বৰবৰাই সমাজবাদী মতাদৰ্শ, স্বাধীনতা আন্দোলন, স্বাধীনতাৰ পিছত গণতন্ত্ৰ ৰক্ষাৰ আন্দোলনৰ সকলো উদাৰ দিশ অসমত বাস্তৱলৈ ৰূপান্তৰিত কৰিছিল। ভাৰতৰত্ন, সুধাকণ্ঠ ডঃ ভূপেন হাজৰিকাৰ গীতৰ কলি – ‘মানুহে মানুহৰ বাবে’ আওৰাই শ্ৰী শ্বাহে কয় যে গোলাপ বৰবৰাই ওৰেটো জীৱন এই দৰ্শনক মূৰ্ত কৰি ৰাখিছিল। তেওঁ কয় যে বৰবৰাই নিপীড়িত আৰু বঞ্চিতসকলৰ কণ্ঠ হৈ থাকিল, সংবিধানৰ পবিত্ৰতাক ৰক্ষা কৰিছিল, স্বৈৰাচাৰিতা আৰু দুৰ্নীতিৰ বিৰুদ্ধে মাত মাতিছিল। তেওঁ কেৱল অসমৰ অনন্য পৰিচয়েই নহয়, বৰঞ্চ অসমত বসবাস কৰা ভাৰতৰ আত্মাকো জাগ্ৰত কৰি তুলিছিল।

কেন্দ্ৰীয় গৃহমন্ত্ৰী তথা সমবায় মন্ত্ৰীজনে কয় যে ১৯৭৮-ত গোলাপ বৰবৰা ডাঙৰীয়া অসমৰ মুখ্যমন্ত্ৰী হোৱা কাৰ্য্য অসমৰ ৰাজনৈতিক ইতিহাসৰ এক বৃহৎ পৰিৱৰ্তনৰ আৰম্ভণি আছিল। স্বাধীনতাৰ পিছত ১৯৭৮-লৈকে তেতিয়াৰ শাসকীয় দলৰ বাহিৰে আন কোনো দলৰ এজনো মুখ্যমন্ত্ৰীয়ে অসমত কাৰ্য্যভাৰ গ্ৰহণ কৰা নাছিল। তেওঁ কয় যে মাত্ৰ ১৭ মাহৰ ভিতৰতে মুখ্যমন্ত্ৰী হিচাপে গোলাপ বৰবৰাই এক নিদৰ্শন দাঙি ধৰিছিল। শ্ৰী শ্বাহে কয় যে ১৯৭৪-ৰ ঐতিহাসিক ৰেল ধৰ্মঘটত গোলাপ বৰবৰাই শ্ৰমিকসকলক নেতৃত্ব প্ৰদান কৰিছিল। তেওঁ জৰুৰীকালীন সময়ছোৱাত তদানীন্তন প্ৰধানমন্ত্ৰীক তীব্ৰ বিৰোধিতা কৰিছিল আৰু জয়প্ৰকাশ নাৰায়ণৰ নেতৃত্বত আৰম্ভ হোৱা আন্দোলনত গোলাপ বৰবৰা অসমৰ কণ্ঠ হৈ পৰিছিল। মাত্ৰ এটা ভোটৰ ব্যৱধানত তেওঁ অসমৰ পৰা ৰাজ্যসভালৈ নিৰ্বাচিত হৈছিল — উক্ত নিৰ্ণায়ক ভোট প্ৰদানেৰে ভূপেন হাজৰিকাই বৰবৰাক উচ্চ সদনলৈ পঠোৱাৰ ক্ষেত্ৰত এটি গুৰুত্বপূৰ্ণ ভূমিকা পালন কৰিছিল।

শ্ৰী অমিত শ্বাহে কয় যে প্ৰধান বিৰোধী দলৰ শাসন কালত নিজৰ নেতাসকলৰ স্মৰণতহে আঁচনি আৰম্ভ কৰা হৈছিল, স্মৃতিসৌধ নিৰ্মাণ কৰা হৈছিল আৰু শতবাৰ্ষিকী উদযাপন কৰা হৈছিল। বৈচিত্ৰ্যপূৰ্ণ সংস্কৃতিৰ সহ-অৱস্থান আৰু ভালেমান ব্যক্তিয়ে দেশখনক আগুৱাই আৰু নতুন শিখৰলৈ নিয়াৰ ক্ষেত্ৰত যথেষ্ট অৰিহণা যোগোৱা বিশাল ৰাষ্ট্ৰখনৰ এনে বহু লোকে উচিত সন্মান বা কোনো মঞ্চ লাভ নকৰিলে। আমাৰ ৰাজহুৱা জীৱন সংকীৰ্ণ মনোভাৱৰ হৈ পৰিছিল বুলিও তেওঁ কয়। তেওঁ আৰু কয় যে পূৰ্বে কেৱল নিজৰ প্ৰতি সন্মান প্ৰদৰ্শন কৰা হৈছিল, আনৰ প্ৰতি নহয়। পূৰ্বে ক্ষমতাত অধিষ্ঠিত হোৱাসকলে কেৱল নিজৰ দল আৰু মতাদৰ্শকহে সন্মান জনাইছিল।

কেন্দ্ৰীয় গৃহমন্ত্ৰীগৰাকীয়ে কয় যে বিৰোধীৰ শাসন কালত চৰ্দাৰ বল্লভভাই পেটেলৰ অৱদানক সম্পূৰ্ণৰূপে উপেক্ষা কৰা হৈছিল। প্ৰধানমন্ত্ৰী শ্ৰী নৰেন্দ্ৰ মোদীয়ে ঐক্যৰ মূৰ্তি স্থাপনৰ পিছতহে তেওঁলোকে পেটেলৰ অৱদানৰ কথা মনত পেলাইছে। শ্ৰী শ্বাহে আৰু কয় যে মোদীজীয়ে কৰ্তব্য পথত নেতাজী সুভাষ চন্দ্ৰ বসুৰ প্ৰতিমূৰ্তি স্থাপন নকৰালৈকে জনসাধাৰণে ‘নেতাজী’ বুলি শ্ৰদ্ধা কৰা সেই মহান নেতাজনৰ বাবে দিল্লীৰ ক্ষমতাৰ কৰিড’ৰত কোনো মৰ্য্যাদাপূৰ্ণ স্থান নাছিল। একেদৰেই বিৰোধী দল ক্ষমতাত নথকাৰ সময়তহে গোপীনাথ বৰদলৈক ভাৰতৰত্ন প্ৰদান কৰা হৈছিল — বৰদলৈ নিজেই সেই দলৰ নেতা হোৱাৰ পাছতো তেওঁ উপেক্ষিত হ’বলগীয়া হৈছিল।

শ্ৰী অমিত শ্বাহে কয় যে গোলাপ বৰবৰা ডাঙৰীয়াৰ দলৰ মতাদৰ্শৰ লগত কোনো সম্পৰ্ক নাছিল। তেওঁ দলীয় ৰাজনীতি আৰু ন্যস্ত-স্বাৰ্থৰ উৰ্ধত থাকি জনজীৱনত মহৎ কাৰ্য্য সাধন কৰিছিল। তেওঁ আগবঢ়াই থৈ যোৱা বৰঙণিৰাজিক সদায় ৰাজ্যৰ লগতে দেশৰ যুৱক-যুৱতীসকলক জনাব লাগে। ইয়াৰ বাবেই অসম চৰকাৰৰ এই উদাৰ পদক্ষেপ গ্ৰহণ কাৰ্য্যৰ তেওঁ শলাগ লয়।

কেন্দ্ৰীয় গৃহমন্ত্ৰী তথা সমবায় মন্ত্ৰীজনে কয় যে দেশপ্ৰেম, সমাজবাদ আৰু দৰিদ্ৰ নাৰায়ণৰ প্ৰতি সংবেদনশীলতাৰ দৰে গুণৰাজি আকস্মিকভাৱে গোলাপ বৰবৰাৰ ব্যক্তিত্বলৈ অহা নাছিল। শ্ৰী শ্বাহে কয় যে অসমৰ প্ৰথম ঔদ্যোগিক ধৰ্মঘটৰ নেতৃত্ব প্ৰদান কৰা কোমল বৰবৰাৰ তৃতীয় প্ৰজন্ম গোলাপ বৰবৰাই সমাজবাদী নীতি অনুসৰণেৰে অসম তথা দেশৰ শ্ৰমিক, দৰিদ্ৰ আৰু পিছপৰা ৰাইজৰ প্ৰগতিৰ বাবে ওৰেটো জীৱন উৎসৰ্গা কৰিছিল। ১৯৫০-ৰ পৰা ১৯৬০-লৈ গোলাপ বৰবৰাই অসমৰ সমাজবাদী আন্দোলনৰ মূল নেতা হিচাপে আত্মপ্ৰকাশ কৰিছিল। গোলাপ বৰবৰাই স্পষ্টকৈ কৈছিল যে উত্তৰ-পূব ভাৰত দেশৰ বাহিৰৰ নহয়, বৰঞ্চ ৰাষ্ট্ৰৰ হৃদয়ৰ এক অবিচ্ছেদ্য অংগ। জৰুৰীকালীন অৱস্থাত তেওঁ প্ৰথমে কাৰাগাৰত বন্দী হৈছিল আৰু একেবাৰে শেষত মুক্তি লাভ কৰিছিল। তেওঁ মুঠতে ১৯ মাহ কাৰাগাৰত কটাবলগীয়া হৈছিল। স্বাধীনতাৰ পিছত তেওঁ ৯ বাৰ কাৰাৰুদ্ধ হৈছিল।

শ্ৰী অমিত শ্বাহে কয় যে গোলাপ বৰবৰা ডাঙৰীয়াই মুখ্যমন্ত্ৰী হিচাপে চমু কাৰ্য্যকালতে এনে কেতবোৰ সিদ্ধান্ত গ্ৰহণ কৰিছিল, যাক অসমৰ ৰাইজে আজীৱন স্মৰণ কৰিব। তেওঁ অসমত দশম শ্ৰেণী পৰ্য্যন্ত শিক্ষা ব্যৱস্থাক বিনামূলীয়া কৰি এবছৰতে ২০০-ৰো অধিক শিক্ষানুষ্ঠান প্ৰতিষ্ঠা কৰিছিল। শ্ৰী শ্বাহে কয় যে ১০ বিঘা পৰ্য্যন্ত মাটি থকা সকলো কৃষকৰ ভূমি-কৰ গোলাপ বৰবৰা ডাঙৰীয়াই স্থায়ীভাৱে ৰেহাই দিছিল। তেওঁ ক্ষুদ্ৰ চাহ বাগিচা নীতি প্ৰৱৰ্তনেৰে কৃষক ৰাইজৰ বাবে চাহ বাগিচাৰ খেতিও মুকলি কৰিছিল। পোন-প্ৰথমবাৰৰ বাবে তেওঁ অসমত বেংকিং সেৱা নিযুক্তি ব’ৰ্ড আৰু ৰেলৱে নিযুক্তি ব’ৰ্ড স্থাপন কৰিছিল। ইয়াৰ ফলশ্ৰুতিত ৰাজ্যখনত দক্ষতা-ভিত্তিক কৰ্মসংস্থাপনৰ সুযোগ প্ৰৱৰ্তিত হৈছিল।

কেন্দ্ৰীয় গৃহ আৰু সমবায় মন্ত্ৰীগৰাকীয়ে কয় যে তেওঁ এই দেশত এজনো অনুপ্ৰৱেশকাৰী থাকিব নালাগে বুলি বিশ্বাস কৰিছিল। তেওঁ কয় যে গোলাপ বৰবৰাই প্ৰথমে ভোটাৰ তালিকা নিৰীক্ষণেৰে অসমত অনুপ্ৰৱেশৰ বিৰুদ্ধে সজাগতাৰ সৃষ্টি কৰিছিল। বৰবৰাই মুখ্যমন্ত্ৰিত্বৰ সময়ছোৱাত পৰ্য্যাপ্ত সমল আৰু কম্পিউটাৰাইজেচনৰ সুবিধা অবিহনেই ভোটাৰ তালিকা পুংখানুপুংখভাৱে নিৰীক্ষণেৰে ৩৬,৭৮০ জন অবৈধ অনুপ্ৰৱেশকাৰীক তালিকাৰ পৰা আঁতৰাবলৈ সক্ষম হৈছিল। তেওঁ কয় যে কোনোৱে অসম আন্দোলনৰ শিপা বিচাৰি উলিয়াবলৈ প্ৰয়াস কৰিলে এই ভোটাৰ তালিকা শুদ্ধিকৰণত ইয়াৰ উমান পাব।

শ্ৰী অমিত শ্বাহে কয় যে আজি নিৰ্বাচন আয়োগে বিশেষ বিস্তৃত পুনৰীক্ষণ (SIR)-ৰ জৰিয়তে নিৰ্বাচনী তালিকা শুদ্ধিকৰণৰ কাম অব্যাহত ৰাখিছে। কিন্তু অনুপ্ৰৱেশকাৰীক সুৰক্ষা প্ৰদানৰ বাবেহে একাংশ ৰাজনৈতিক দলে সমদল উলিয়াইছে। তেওঁ কয় যে এখন দেশৰ ভোটাৰ তালিকাখনেই গণতন্ত্ৰৰ হৃদপিণ্ড, আৰু বিদেশী নাগৰিকে ইয়াত কোনো স্থান লাভ কৰিব নালাগে। কিন্তু পৰিতাপৰ কথা এয়ে যে বিৰোধীৰ নৈতিক স্খলন ইমানেই বৃদ্ধি পাইছে যে তেওঁলোকে ভোট-বেংকৰ ৰাজনীতি আৰু যিকোনো মূল্যৰ বিনিময়ত ক্ষমতা দখলৰ স্বাৰ্থত ভোটাৰ তালিকাৰ পৰা অনুপ্ৰৱেশকাৰীক আঁতৰোৱা কাৰ্য্যৰ বিৰোধিতা কৰিছে। আজি যদি গোলাপ বৰবৰা ডাঙৰীয়া জীয়াই থাকিলহেঁতেন তেন্তে তেওঁ নিশ্চয় ইয়াৰ বিৰোধিতা কৰিলেহেঁতেন।

কেন্দ্ৰীয় গৃহমন্ত্ৰীয়ে ১.২৬ লাখ একৰ ভূমি অনুপ্ৰৱেশকাৰীৰ বেদখলৰপৰা মুক্তকৰণৰ বাবে অসম চৰকাৰক প্ৰশংসা কৰে। তেওঁ কয় যে কেৱল কাজিৰঙা ৰাষ্ট্ৰীয় উদ্যান তথা বনাঞ্চলসমূহকেই বেদখলৰ পৰা মুক্ত কৰা হোৱা নহয়, বৰঞ্চ মহাপুৰুষ শংকৰদেৱ আৰু মহাপুৰুষ মাধৱদেৱৰ স্মৃতি-বিজড়িত হাজাৰ-হাজাৰ একৰ ভূমিও পুনৰ উদ্ধাৰ কৰা হৈছে। তেওঁ লগতে কয় যে ২০২৫-ৰ ১৫ আগষ্টত প্ৰধানমন্ত্ৰী শ্ৰী নৰেন্দ্ৰ মোদীয়ে গোলাপ বৰবৰা ডাঙৰীয়াৰ নীতিৰ আধাৰত হাই-পাৱাৰ ডেম’গ্ৰাফিক মিছনৰ কথা ঘোষণা কৰিছে। এই অভিযানৰ অধীনত সমগ্ৰ দেশতে জনগাঁথনিগত পৰিৱৰ্তন সন্দৰ্ভত অধ্যয়ন কৰা হ’ব, অনুপ্ৰৱেশকাৰীক চিনাক্ত কৰা হ’ব আৰু ইয়াৰ ভিত্তিত ৰাষ্ট্ৰখনক অবৈধ অনুপ্ৰৱেশকাৰীৰ কৱলৰপৰা মুক্তকৰণৰ দিশত কাম কৰা হ’ব। শোণিতপুৰত ৪৯,৫০০ বিঘা, দৰঙত ১৭,০৯৫ বিঘা, লখিমপুৰত ১৩,৪৩৮ বিঘা, হোজাইত ১০,৭৪৯ বিঘা আৰু গোৱালপাৰাত ৮,২৮০ বিঘা ভূমি বে-দখলমুক্তকৰণৰ কথা উল্লেখেৰে তেওঁ বেদখলৰ বিৰুদ্ধে অসম চৰকাৰে হাতত লোৱা অভিযানক প্ৰশংসা কৰে। তেওঁ দৃঢ়তাৰে কয় যে অসম আৰু সমগ্ৰ দেশক অনুপ্ৰৱেশকাৰীৰ পৰা মুক্তকৰণৰ সংকল্প নিশ্চয়কৈ বাস্তৱায়িত হ’ব আৰু গোলাপ বৰবৰা ডাঙৰীয়াৰ জন্ম শতবাৰ্ষিকী উদযাপন কাৰ্য্যসূচীয়েই হৈছে এই সংকল্পৰ কথা দোহৰাৰ এখনি উপযুক্ত মঞ্চ।

কেন্দ্ৰীয় গৃহমন্ত্ৰী শ্ৰী অমিত শ্বাহে কয় যে অসম চৰকাৰে গোলাপ বৰবৰাৰ নামেৰে এখনি গুৰুত্বপূৰ্ণ গ্ৰামোন্নয়ন প্ৰতিষ্ঠানৰ নামকৰণ কৰিছে। তেওঁ লগতে কয় যে এই বছৰজোৰা কাৰ্য্যসূচীত বৰবৰা ডাঙৰীয়াৰ জীৱন পৰিক্ৰমা, কৰ্মৰাজি, চিন্তাধাৰাক প্ৰতিটো প্ৰান্ততে প্ৰচাৰ-প্ৰসাৰৰ প্ৰচেষ্টাই নিঃসন্দেহে অসমৰ ভৱিষ্যৎ উজ্জ্বল কৰি তুলিব।

****

RK/VV/RR/PS/PR/SB

(Release ID: 2162114) Visitor Counter : 18