नवी दिल्‍ली, 25 ऑगस्‍ट 2025

फिजी प्रजासत्ताकाचे पंतप्रधान सितिवेनी  लिगाममादा राबुका यांनी आज (25 ऑगस्ट 2025) राष्ट्रपती भवनात राष्ट्रपती द्रौपदी मुर्मू यांची भेट घेतली.

राष्ट्रपती भवनात पंतप्रधान राबुका आणि त्यांच्या शिष्टमंडळाचे स्वागत करताना, राष्ट्रपतींनी ऑगस्ट 2024 मध्ये फिजीच्या राजकीय भेटीदरम्यान राबुका यांच्याशी झालेल्या भेटीची तसेच आदिवासी समुदायातील ज्येष्ठांनी केलेल्या सुंदर पारंपरिक स्वागताची आठवण केली. राष्ट्रपतींनी भारतीय वंशाच्या चैतन्यशील समुदायातील सदस्यांशी झालेल्या संवादाचीही आठवण केली तसेच भारत आणि फिजी यांच्यातील परस्पर सामंजस्य  आणि मैत्री वृद्धिंगत करण्यात या समुदायाने बजावलेल्या महत्त्वपूर्ण भूमिकेची प्रशंसा केली.

भारत आणि फिजी यांच्यातील दीर्घकालीन आणि सशक्त लोकसंपर्काने बांधलेल्या नातेसंबंधाचा उल्लेख करताना राष्ट्रपती म्हणाल्या की गिरमिटिया समुदायाचे योगदान हे केवळ आपले मजबूत बंध टिकवून ठेवण्यातच नाही तर फिजीची बहुसांस्कृतिक ओळख, वैविध्यपूर्ण समाज आणि अर्थव्यवस्था घडवण्यातही अत्यंत महत्त्वपूर्ण आहे.

भारत आणि फिजी यांच्यातील आधुनिक आणि बहुआयामी भागीदारीचा एक भाग म्हणून, भारताला फिजीच्या सामाजिक आर्थिक विकासामध्ये आणि विशेष करून आरोग्य, क्षमता विकास आणि प्रशिक्षण तसेच हवामान लवचिकता  यासारख्या प्राधान्य क्षेत्रांमध्ये भागीदार होण्याचा सन्मान लाभला आहे, असे राष्ट्रपती म्हणाल्या. 

प्रशांत महासागरातील द्वीप देशांसोबत (पीआयसी) आपले संबंध आणि विकास भागीदारी मजबूत करण्यासाठी भारत वचनबद्ध आहे, आणि या देशांमध्ये फिजी एक विशेष भागीदार आहे. आज फिजीमध्ये सुपर-स्पेशालिटी रुग्णालय स्थापन करण्याबाबतचा सामंजस्य करार झाल्याचे ऐकून राष्ट्रपतींना आनंद झाला. हा करार आरोग्यसेवा क्षेत्रात सहकार्य वाढवण्याच्या आपल्या सामायिक दृष्टिकोनातील एक महत्त्वपूर्ण टप्पा आहे.

क्षमता विकास हा नेहमीच भारत-फिजी संबंधांचा एक महत्त्वाचा आधारस्तंभ राहिला आहे, असे त्या म्हणाल्या. यात भारतीय संस्थांमध्ये फिजी अधिकाऱ्यांना दिल्या जाणाऱ्या आयटीईसी प्रशिक्षण कार्यक्रमांचाही समावेश आहे. डिजिटल तंत्रज्ञानामुळे भारतात आर्थिक समावेशनात क्रांती घडून आली आहे आणि युपीआय पेमेंट सिस्टीम, 'जन धन' आणि आधार यासारख्या उपक्रमांबाबतचे अनुभव फिजीसोबत सामायिक करण्यात आम्हाला आनंद होईल, असे त्यांनी नमूद केले.

फिजी सरकारने भारतासोबत संबंध मजबूत करण्याला प्राधान्य दिले आहे, याबद्दल राष्ट्रपतींनी आनंद व्यक्त केला. संबंधांमधील ही दृढता अलिकडच्या काळात परस्पर संवादाच्या मजबूत गतीतून दिसून येते, असे त्या म्हणाल्या. या भेटीमुळे सहकार्याचे नवे मार्ग खुले होतील  आणि त्याचा फायदा दोन्ही देशांच्या लोकांना होईल, असा विश्वास दोन्ही नेत्यांनी व्यक्त केला.

* * *

निलिमा चितळे/श्रद्धा मुखेडकर/दर्शना राणे

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai