جمہوریہ فجی کے وزیر اعظم عزت مآب جناب سیتیوینی لیگامامڈا ربوکا نے آج (25 اگست، 2025) راشٹرپتی بھون میں صدر جمہوریہ ہند محترمہ دروپدی مرمو سے ملاقات کی۔

راشٹرپتی بھون میں وزیر اعظم ربوکا اور ان کے وفد کا خیرمقدم کرتے ہوئے صدر جمہوریہ نے اگست 2024 میں فجی کے سرکاری دورے کے دوران ان کے ساتھ اپنی ملاقات اور مقامی آدیواسی بزرگوں کی طرف سے ان کے خوبصورت روایتی استقبال کو یاد کیا۔ انھوں نے متحرک بھارتی نژاد کمیونٹی کے ممبروں کے ساتھ اپنی گفت و شنید کو بھی یاد کیا اور دونوں ممالک کے درمیان سمجھ اور دوستی کو گہرا کرنے میں ان کے اہم کردار کی ستائش کی۔

بھارت اور فجی کے درمیان دیرینہ تعلقات پر روشنی ڈالتے ہوئے صدر جمہوریہ نے کہا کہ گرمتیا برادری کا تعاون نہ صرف ہمارے مضبوط رشتوں کو برقرار رکھنے بلکہ فجی کی کثیر ثقافتی شناخت، متنوع معاشرے اور معیشت کی تشکیل میں بھی اہم رہا ہے۔

انھوں نے مزید کہا کہ ہماری جدید اور کثیر جہتی شراکت داری کے ایک حصے کے طور پر ، بھارت کو فجی کی سماجی و اقتصادی ترقی میں شراکت داری کا اعزاز حاصل ہے جس میں فجی کی ترجیحات جیسے صحت ، صلاحیت سازی اور تربیت اور آب و ہوا کی لچک پر خصوصی توجہ دی گئی ہے۔

صدر جمہوریہ نے کہا کہ بھارت بحرالکاہل کے جزیرہ ممالک (پی آئی سی) کے ساتھ اپنے تعلقات اور ترقیاتی شراکت داری کو مضبوط بنانے کے لیے پرعزم ہے، جن میں فیجی ایک خصوصی شراکت دار ہے۔ انھوں نے اس بات پر خوشی کا اظہار کیا کہ آج فجی میں ایک سپر اسپیشلٹی ہاسپٹل کے قیام سے متعلق ایک مفاہمت نامے پر دستخط کیے گئے ہیں جو صحت کی دیکھ بھال میں تعاون کو بڑھانے کے لیے ہمارے مشترکہ وژن میں ایک سنگ میل کی حیثیت رکھتا ہے۔

صدر جمہوریہ نے کہا کہ صلاحیت سازی ہمیشہ بھارت اور فجی کے تعلقات کا ایک اہم ستون رہی ہے جس میں بھارتی اداروں میں فجی کے عہدیداروں کے لیے آئی ٹی ای سی تربیتی پروگرام بھی شامل ہیں۔ انھوں نے کہا کہ ڈیجیٹل ٹکنالوجی نے بھارت میں مالی شمولیت میں ایک انقلاب برپا کیا ہے اور ہمیں یو پی آئی ادائیگی کے نظام ، 'جن دھن' اور آدھار جیسے اقدامات میں اپنے تجربات کو فیجی کے ساتھ بانٹنے میں خوشی ہوگی۔

صدر نے اس بات پر مسرت کا اظہار کیا کہ فجی کی حکومت نے بھارت کے ساتھ تعلقات کو مضبوط بنانے کو ترجیح دی ہے جس کا ثبوت حالیہ دنوں میں ہماری مصروفیات میں مضبوط رفتار ہے۔ دونوں رہنماؤں نے اس اعتماد کا اظہار کیا کہ اس دورے سے تعاون کی نئی راہیں کھلیں گی جس سے دونوں ممالک کے عوام مستفید ہوں گے۔

***

(ش ح – ع ا)

U. No. 5291