ਭਾਰਤ ਨੂੰ ਇੱਕ ਸ਼ਾਨਦਾਰ ਪ੍ਰਾਪਤੀ ਤਹਿਤ 19-21 ਅਗਸਤ 2025 ਨੂੰ ਥਾਈਲੈਂਡ ਦੇ ਫੁਕੇਤ ਵਿੱਚ ਆਯੋਜਿਤ 23ਵੀਂ ਏਆਈਬੀਡੀ ਜਨਰਲ ਕਾਨਫਰੰਸ ਦੌਰਾਨ ਸਭ ਤੋਂ ਵੱਧ ਵੋਟਾਂ ਨਾਲ ਏਸ਼ੀਆ-ਪੈਸੀਫਿਕ ਇੰਸਟੀਟਿਊਟ ਫਾਰ ਬ੍ਰੌਡਕਾਸਟਿੰਗ ਡਿਵੈਲਪਮੈਂਟ (ਏਆਈਬੀਡੀ) ਦੇ ਕਾਰਜਕਾਰੀ ਬੋਰਡ ਦਾ ਚੇਅਰਮੈਨ ਚੁਣਿਆ ਗਿਆ ਹੈ।

ਇਹ ਇੱਕ ਮਹੱਤਵਪੂਰਨ ਮੀਲ ਪੱਥਰ ਹੈ, ਕਿਉਂਕਿ ਭਾਰਤ ਨੇ ਆਖਰੀ ਵਾਰ 2016 ਵਿੱਚ ਏਆਈਬੀਡੀ ਕਾਰਜਕਾਰੀ ਕੌਂਸਲ ਚੇਅਰਮੈਨ ਦਾ ਅਹੁਦਾ ਸੰਭਾਲਿਆ ਸੀ। ਇਸ ਪ੍ਰਗਤੀ ਨਾਲ, ਏਆਈਬੀਡੀ ਦੇ ਅੰਦਰ ਭਾਰਤ ਦੀ ਲੀਡਰਸ਼ਿਪ ਭੂਮਿਕਾ ਹੋਰ ਮਜ਼ਬੂਤ ​​ਹੋ ਗਈ ਹੈ, ਭਾਵੇਂ ਕਿ ਏਆਈਬੀਡੀ ਜਨਰਲ ਕਾਨਫਰੰਸ ਦੇ ਚੇਅਰਮੈਨ ਵਜੋਂ ਇਸ ਦਾ ਮੌਜੂਦਾ ਕਾਰਜਕਾਲ ਅਗਸਤ 2025 ਤੱਕ ਜਾਰੀ ਹੈ।

ਇਸ ਮੌਕੇ 'ਤੇ, ਪ੍ਰਸਾਰ ਭਾਰਤੀ ਦੇ ਸੀਈਓ ਅਤੇ ਏਆਈਬੀਡੀ ਜੀਸੀ ਦੇ ਪ੍ਰਧਾਨ ਸ਼੍ਰੀ ਗੌਰਵ ਦਿਵੇਦੀ ਨੇ ਸਾਰੇ ਮੈਂਬਰ ਦੇਸ਼ਾਂ ਅਤੇ ਸੰਗਠਨਾਂ ਦਾ ਉਨ੍ਹਾਂ ਦੇ ਨਿਰੰਤਰ ਵਿਸ਼ਵਾਸ ਅਤੇ ਸਮਰਥਨ ਲਈ ਧੰਨਵਾਦ ਕੀਤਾ। ਭਾਰਤ ਸਰਕਾਰ ਦੇ ਸੂਚਨਾ ਅਤੇ ਪ੍ਰਸਾਰਣ ਮੰਤਰਾਲੇ ਵੱਲੋਂ ਬੋਲਦੇ ਹੋਏ, ਉਨ੍ਹਾਂ ਨੇ ਕਿਹਾ:

"ਅਸੀਂ ਭਾਰਤ ਦੀ ਲੀਡਰਸ਼ਿਪ ਵਿੱਚ ਦਿਖਾਏ ਗਏ ਵਿਸ਼ਵਾਸ ਦੀ ਡੂੰਘਾਈ ਨਾਲ ਕਦਰ ਕਰਦੇ ਹਾਂ। ਪਿਛਲੇ ਪੰਜ ਦਹਾਕਿਆਂ ਤੋਂ, ਅਸੀਂ ਏਆਈਬੀਡੀ ਦੇ ਅੰਦਰ ਵੱਖ-ਵੱਖ ਸਮਰੱਥਾਵਾਂ ਵਿੱਚ ਇੱਕ ਟੀਮ ਵਜੋਂ ਕੰਮ ਕੀਤਾ ਹੈ, ਅਤੇ ਅਸੀਂ ਭਵਿੱਖ ਦੇ ਏਆਈਬੀਡੀ ਪ੍ਰੋਗਰਾਮਾਂ ਅਤੇ ਪਹਿਲਕਦਮੀਆਂ ਦੇ ਆਯੋਜਨ ਵਿੱਚ ਸਮੂਹਿਕ ਤੌਰ 'ਤੇ ਅਤੇ ਦੁਵੱਲੀ ਭਾਈਵਾਲੀ ਰਾਹੀਂ ਇਸ ਸਹਿਯੋਗ ਨੂੰ ਜਾਰੀ ਰੱਖਣ ਦੀ ਉਮੀਦ ਕਰਦੇ ਹਾਂ।"

ਉਨ੍ਹਾਂ ਨੇ ਸਾਰੇ ਨਵੇਂ ਚੁਣੇ ਗਏ ਅਹੁਦੇਦਾਰਾਂ ਨੂੰ ਤਹਿ ਦਿਲੋਂ ਵਧਾਈਆਂ ਵੀ ਦਿੱਤੀਆਂ ਅਤੇ ਏਆਈਬੀਡੀ ਨੂੰ ਹੋਰ ਉਚਾਈਆਂ 'ਤੇ ਲਿਜਾਣ ਲਈ ਉਨ੍ਹਾਂ ਨਾਲ ਮਿਲ ਕੇ ਕੰਮ ਕਰਨ ਦੀ ਆਪਣੀ ਉਤਸੁਕਤਾ ਪ੍ਰਗਟ ਕੀਤੀ।

ਏਆਈਬੀਡੀ ਬਾਰੇ

ਯੂਨੈਸਕੋ ਦੀ ਸਰਪ੍ਰਸਤੀ ਹੇਠ 1977 ਵਿੱਚ ਸਥਾਪਿਤ, ਏਸ਼ੀਆ-ਪੈਸੀਫਿਕ ਇੰਸਟੀਟਿਊਟ ਫਾਰ ਬ੍ਰੌਡਕਾਸਟਿੰਗ ਡਿਵੈਲਪਮੈਂਟ (ਏਆਈਬੀਡੀ) ਇੱਕ ਵਿਲੱਖਣ ਖੇਤਰੀ ਅੰਤਰ-ਸਰਕਾਰੀ ਸੰਗਠਨ ਹੈ। ਇਸ ਵੇਲੇ 45 ਦੇਸ਼ਾਂ ਦੀਆਂ 92 ਤੋਂ ਵੱਧ ਸੰਸਥਾਵਾਂ ਇਸ ਦੀਆਂ ਮੈਂਬਰ ਹਨ, ਜਿਨ੍ਹਾਂ ਵਿੱਚ ਸ਼ਾਮਲ ਹਨ:

26 ਸਰਕਾਰੀ ਮੈਂਬਰ, ਜਿਨ੍ਹਾਂ ਦੀ ਨੁਮਾਇੰਦਗੀ 48 ਰਾਸ਼ਟਰੀ ਪ੍ਰਸਾਰਕ ਕਰ ਰਹੇ ਹਨ।

ਏਸ਼ੀਆ-ਪ੍ਰਸ਼ਾਂਤ, ਯੂਰੋਪ, ਅਫਰੀਕਾ, ਅਰਬ ਰਾਜਾਂ ਅਤੇ ਉੱਤਰੀ ਅਮਰੀਕਾ ਤੱਕ ਫੈਲੇ 28 ਦੇਸ਼ਾਂ ਅਤੇ ਖੇਤਰਾਂ ਤੋਂ 44 ਪ੍ਰਮਾਣਿਕ ਮੈਂਬਰ

ਭਾਰਤ ਏਆਈਬੀਡੀ ਦਾ ਇੱਕ ਸੰਸਥਾਪਕ ਮੈਂਬਰ ਹੈ, ਅਤੇ ਪ੍ਰਸਾਰ ਭਾਰਤੀ ਭਾਰਤ ਦਾ ਜਨਤਕ ਸੇਵਾ ਪ੍ਰਸਾਰਕ ਇਸ ਸੰਗਠਨ ਵਿੱਚ ਸੂਚਨਾ ਅਤੇ ਪ੍ਰਸਾਰਣ ਮੰਤਰਾਲੇ ਦੀ ਨੁਮਾਇੰਦਗੀ ਕਰਦਾ ਹੈ।

23ਵੀਂ ਏਆਈਬੀਡੀ ਜਨਰਲ ਕਾਨਫਰੰਸ (ਜੀਸੀ 2025) ਬਾਰੇ

ਸ਼੍ਰੀ ਗੌਰਵ ਦਿਵੇਦੀ ਦੀ ਪ੍ਰਧਾਨਗੀ ਹੇਠ ਏਆਈਬੀਡੀ ਦੀ 23ਵੀਂ ਜਨਰਲ ਕਾਨਫਰੰਸ ਅਤੇ ਸਬੰਧਿਤ ਮੀਟਿੰਗਾਂ ਥਾਈਲੈਂਡ ਦੇ ਫੁਕੇਤ ਵਿੱਚ ਸਫਲਤਾਪੂਰਵਕ ਸਮਾਪਤ ਹੋਈਆਂ। ਇਸ ਕਾਨਫਰੰਸ ਨੇ ਇਲੈਕਟ੍ਰੌਨਿਕ ਮੀਡੀਆ ਵਿੱਚ ਅੰਤਰਰਾਸ਼ਟਰੀ ਹਿਤਧਾਰਕਾਂ ਨੂੰ ਇੱਕ ਪਲੈਟਫਾਰਮ 'ਤੇ ਇਕੱਠਾ ਕੀਤਾ ਅਤੇ ਨੀਤੀ ਆਦਾਨ-ਪ੍ਰਦਾਨ ਅਤੇ ਸਰੋਤ ਸਾਂਝੇਦਾਰੀ ਨਾਲ ਏਸ਼ੀਆ-ਪ੍ਰਸ਼ਾਂਤ ਖੇਤਰ ਵਿੱਚ ਇੱਕ ਜੀਵੰਤ ਅਤੇ ਸਹਿਯੋਗੀ ਮੀਡੀਆ ਮਾਹੌਲ ਸਿਰਜਣ 'ਤੇ ਧਿਆਨ ਕੇਂਦ੍ਰਿਤ ਕੀਤਾ। ਇਸ ਸਾਲ ਦੀ ਥੀਮ "ਲੋਕਾਂ ਲਈ ਮੀਡੀਆ, ਸ਼ਾਂਤੀ ਅਤੇ ਖੁਸ਼ਹਾਲੀ" ਸੀ।

ਇਹ ਵੱਕਾਰੀ ਨਿਯੁਕਤੀ ਇੱਕ ਵਾਰ ਫਿਰ ਪ੍ਰਸਾਰਣ ਦੇ ਖੇਤਰ ਵਿੱਚ ਭਾਰਤ ਦੀ ਲੀਡਰਸ਼ਿਪ ਵਿੱਚ ਆਲਮੀ ਵਿਸ਼ਵਾਸ ਨੂੰ ਉਜਾਗਰ ਕਰਦੀ ਹੈ ਅਤੇ ਭਾਰਤ ਨੂੰ ਦੁਨੀਆ ਭਰ ਵਿੱਚ ਮੀਡੀਆ ਵਿਕਾਸ ਨੂੰ ਆਕਾਰ ਦੇਣ ਵਿੱਚ ਹੋਰ ਵੀ ਰਣਨੀਤਕ ਅਤੇ ਪ੍ਰਭਾਵਸ਼ਾਲੀ ਭੂਮਿਕਾ ਨਿਭਾਉਣ ਲਈ ਪਲੈਟਫਾਰਮ ਤਿਆਰ ਕਰਦੀ ਹੈ।

*****

ਧਰਮੇਂਦਰ ਤਿਵਾੜੀ/ ਨਵੀਨ ਸ਼੍ਰੀਜੀਤ