ಕೇಂದ್ರ ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವರಾದ ಶ್ರೀ ಹರ್ ದೀಪ್ ಸಿಂಗ್ ಪುರಿ ಅವರು ಇಂದು ಲೋಕಸಭೆಯಲ್ಲಿ ಲಿಖಿತ ಉತ್ತರ ನೀಡುತ್ತಾ, ಪ್ರತಿಯೊಬ್ಬ ನಾಗರಿಕರಿಗೂ ಇಂಧನ ಭದ್ರತೆ, ಕೈಗೆಟುಕುವ ದರ ಮತ್ತು ಸುಲಭ ಲಭ್ಯತೆಯನ್ನು ಖಚಿತಪಡಿಸುವುದು ಸರ್ಕಾರದ ಮುಖ್ಯ ಗುರಿ ಎಂದು ತಿಳಿಸಿದರು. ಅಂತಾರಾಷ್ಟ್ರೀಯ ಕಚ್ಚಾ ತೈಲ ಬೆಲೆಗಳ ಏರಿಳಿತಗಳ ಹೊರತಾಗಿಯೂ, ಸರ್ಕಾರ ಮತ್ತು ಸಾರ್ವಜನಿಕ ವಲಯದ ತೈಲ ಮಾರಾಟ ಕಂಪನಿಗಳು (OMCs) ತೆಗೆದುಕೊಂಡ ವಿವಿಧ ಕ್ರಮಗಳಿಂದಾಗಿ ದೇಶೀಯ ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆಗಳು ಕಡಿಮೆಯಾಗಿವೆ ಎಂದು ಅವರು ತಿಳಿಸಿದರು.

ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆಗಳು ಮಾರುಕಟ್ಟೆಯ ಬೇಡಿಕೆಗೆ ಅನುಗುಣವಾಗಿ ನಿರ್ಧಾರವಾಗುತ್ತವೆ. ಸಾರ್ವಜನಿಕ ವಲಯದ ತೈಲ ಮಾರಾಟ ಕಂಪನಿಗಳು (OMCs) ಬೆಲೆ ನಿರ್ಧಾರಗಳ ಬಗ್ಗೆ ಸೂಕ್ತ ಕ್ರಮಗಳನ್ನು ತೆಗೆದುಕೊಳ್ಳುತ್ತವೆ. ದೇಶದಲ್ಲಿ ಪೆಟ್ರೋಲಿಯಂ ಉತ್ಪನ್ನಗಳ ಬೆಲೆಗಳು ಅಂತಾರಾಷ್ಟ್ರೀಯ ಮಾರುಕಟ್ಟೆಗೆ ನೇರವಾಗಿ ಸಂಬಂಧಿಸಿವೆ, ಏಕೆಂದರೆ ಭಾರತವು ತನ್ನ ಕಚ್ಚಾ ತೈಲ ಅಗತ್ಯತೆಯ ಶೇ. 85ಕ್ಕಿಂತ ಹೆಚ್ಚು ಪ್ರಮಾಣವನ್ನು ಆಮದು ಮಾಡಿಕೊಳ್ಳುತ್ತದೆ ಎಂದು ಸಚಿವರು ತಿಳಿಸಿದರು. 

ಕಚ್ಚಾ ತೈಲದ ಬೆಲೆಯು (ಇಂಡಿಯನ್ ಬಾಸ್ಕೆಟ್) ಮಾರ್ಚ್ 2015ರಲ್ಲಿ ಪ್ರತಿ ಬ್ಯಾರೆಲ್‌ ಗೆ $55 ಇದ್ದದ್ದು, ಮಾರ್ಚ್ 2022ರಲ್ಲಿ $113ಕ್ಕೆ ಮತ್ತು ಜೂನ್ 2022ರಲ್ಲಿ $116ಕ್ಕೆ ಏರಿಕೆಯಾಯಿತು. ಭೌಗೋಳಿಕ-ರಾಜಕೀಯ ಮತ್ತು ಮಾರುಕಟ್ಟೆಯ ಕಾರಣಗಳಿಂದಾಗಿ ಈ ಏರಿಳಿತ ಮುಂದುವರಿದಿದೆ. ಆದಾಗ್ಯೂ, ದೇಶೀಯವಾಗಿ, ನವೆಂಬರ್ 2021ರಲ್ಲಿ ಪ್ರತಿ ಲೀಟರ್‌ ಗೆ ರೂ. 110.04 ಮತ್ತು ರೂ. 98.42 ಇದ್ದ ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆಗಳು, ಇದೀಗ ಕ್ರಮವಾಗಿ ರೂ. 94.77 ಮತ್ತು ರೂ. 87.67ಕ್ಕೆ (ದೆಹಲಿ ಬೆಲೆಗಳು) ಇಳಿಕೆಯಾಗಿವೆ.

ಕೇಂದ್ರ ಸರ್ಕಾರವು ನವೆಂಬರ್ 2021 ಮತ್ತು ಮೇ 2022ರಲ್ಲಿ ಎರಡು ಹಂತಗಳಲ್ಲಿ ಪೆಟ್ರೋಲ್ ಮೇಲೆ ಪ್ರತಿ ಲೀಟರ್‌ ಗೆ ರೂ. 13 ಮತ್ತು ಡೀಸೆಲ್ ಮೇಲೆ ರೂ. 16 ರಂತೆ ಅಬಕಾರಿ ಸುಂಕವನ್ನು ಕಡಿತಗೊಳಿಸಿದ್ದು, ಅದರ ಸಂಪೂರ್ಣ ಪ್ರಯೋಜನವನ್ನು ಗ್ರಾಹಕರಿಗೆ ವರ್ಗಾಯಿಸಿದೆ ಎಂದು ಅವರು ತಿಳಿಸಿದರು. ಕೆಲವು ರಾಜ್ಯ ಸರ್ಕಾರಗಳು ಕೂಡ ವ್ಯಾಟ್ (VAT) ದರವನ್ನು ಕಡಿಮೆ ಮಾಡಿ ಮತ್ತಷ್ಟು ಪರಿಹಾರ ನೀಡಿದ್ದವು. ಮಾರ್ಚ್ 2024ರಲ್ಲಿ, ತೈಲ ಮಾರಾಟ ಕಂಪನಿಗಳು (OMCs) ಪೆಟ್ರೋಲ್ ಮತ್ತು ಡೀಸೆಲ್ ಚಿಲ್ಲರೆ ಬೆಲೆಗಳನ್ನು ತಲಾ ರೂ. 2 ರಷ್ಟು ಇಳಿಕೆ ಮಾಡಿದ್ದವು. ನಂತರ ಏಪ್ರಿಲ್ 2025ರಲ್ಲಿ, ಪೆಟ್ರೋಲ್ ಮತ್ತು ಡೀಸೆಲ್ ಮೇಲಿನ ಅಬಕಾರಿ ಸುಂಕವನ್ನು ತಲಾ ರೂ. 2 ರಷ್ಟು ಹೆಚ್ಚಿಸಲಾಯಿತಾದರೂ, ಅದರ ಹೊರೆಯನ್ನು ಗ್ರಾಹಕರ ಮೇಲೆ ಹೇರಲಾಗಿಲ್ಲ.

ಸಾರ್ವಜನಿಕ ವಲಯದ ತೈಲ ಮಾರಾಟ ಕಂಪನಿಗಳು (PSU OMCs) ರಾಜ್ಯದೊಳಗಿನ ಸಾರಿಗೆ ವೆಚ್ಚಗಳನ್ನು ಸುವ್ಯವಸ್ಥಿತಗೊಳಿಸಿವೆ ಎಂದು ಶ್ರೀ ಪುರಿ ಅವರು ಮಾಹಿತಿ ನೀಡಿದರು.. ಇದರಿಂದ ದುರ್ಗಮ ಪ್ರದೇಶಗಳಲ್ಲಿ ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆಗಳು ಕಡಿಮೆಯಾಗಿ, ಗ್ರಾಹಕರಿಗೆ ಅನುಕೂಲವಾಗಿದೆ. ಅಲ್ಲದೆ, ರಾಜ್ಯದೊಳಗಿನ ಗರಿಷ್ಠ ಮತ್ತು ಕನಿಷ್ಠ ಚಿಲ್ಲರೆ ಬೆಲೆಗಳ ನಡುವಿನ ವ್ಯತ್ಯಾಸವೂ ಕಡಿಮೆಯಾಗಿದೆ.

ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿನ ಅಧಿಕ ಬೆಲೆಗಳಿಂದ ನಾಗರಿಕರನ್ನು ರಕ್ಷಿಸಲು ಸರ್ಕಾರವು ಹಲವಾರು ಕ್ರಮಗಳನ್ನು ಕೈಗೊಂಡಿದೆ. ಇದರಲ್ಲಿ, ಕಚ್ಚಾ ತೈಲ ಆಮದು ಮೂಲಗಳನ್ನು ವೈವಿಧ್ಯಗೊಳಿಸುವುದು, ದೇಶೀಯ ಮಾರುಕಟ್ಟೆಯಲ್ಲಿ ಪೆಟ್ರೋಲ್ ಮತ್ತು ಡೀಸೆಲ್ ಲಭ್ಯತೆಯನ್ನು ಖಚಿತಪಡಿಸಲು 'ಸಾರ್ವತ್ರಿಕ ಸೇವಾ ಹೊಣೆಗಾರಿಕೆ'ಯ ನಿಯಮಗಳನ್ನು ಜಾರಿಗೊಳಿಸುವುದು, ಹಾಗೂ ದೇಶೀಯ ಕಚ್ಚಾ ತೈಲದ ಅನ್ವೇಷಣೆ ಮತ್ತು ಉತ್ಪಾದನೆಯನ್ನು ಹೆಚ್ಚಿಸುವುದು ಸೇರಿವೆ. ಹೆಚ್ಚುವರಿಯಾಗಿ, ಸರ್ಕಾರವು ಎಥೆನಾಲ್ ಮಿಶ್ರಣವನ್ನು ಉತ್ತೇಜಿಸುತ್ತಿದೆ ಮತ್ತು ಭಾರತದ ಒಟ್ಟಾರೆ ಇಂಧನ ಬಳಕೆಯಲ್ಲಿ ನವೀಕರಿಸಬಹುದಾದ ಇಂಧನದ ಪಾಲನ್ನು ಹೆಚ್ಚಿಸುತ್ತಿದೆ.

ಪರ್ಯಾಯ ಇಂಧನ ಮೂಲಗಳನ್ನು ಉತ್ತೇಜಿಸುವ ಸರ್ಕಾರದ ಕಾರ್ಯತಂತ್ರದ ಕುರಿತ ಪ್ರಶ್ನೆಗೆ ಉತ್ತರಿಸಿದ ಶ್ರೀ ಪುರಿ ಅವರು, ಸರ್ಕಾರವು ಸಿ ಎನ್‌ ಜಿ (CNG), ಎಲ್‌ ಎನ್‌ ಜಿ (LNG), ಹೈಡ್ರೋಜನ್, ಎಥೆನಾಲ್ ಸೇರಿದಂತೆ ಜೈವಿಕ ಇಂಧನಗಳು, ಮತ್ತು ಎಲೆಕ್ಟ್ರಿಕ್ ವಾಹನಗಳ ಅಳವಡಿಕೆಯನ್ನು ಸಕ್ರಿಯವಾಗಿ ಪ್ರೋತ್ಸಾಹಿಸುತ್ತಿದೆ ಎಂದು ತಿಳಿಸಿದರು.

2018ರ ಜೈವಿಕ ಇಂಧನಗಳ ರಾಷ್ಟ್ರೀಯ ನೀತಿಯು 2030ರ ವೇಳೆಗೆ ಪೆಟ್ರೋಲ್‌ನಲ್ಲಿ ಶೇ 20ರಷ್ಟು ಎಥೆನಾಲ್ ಮಿಶ್ರಣ ಮತ್ತು ಡೀಸೆಲ್‌ನಲ್ಲಿ ಶೇ 5ರಷ್ಟು ಬಯೋಡೀಸೆಲ್ ಮಿಶ್ರಣದ ಗುರಿಯನ್ನು ನಿಗದಿಪಡಿಸಿತ್ತು. ಈ ಗುರಿಯನ್ನು ನಂತರ 2025-26 ಕ್ಕೆ ಮುಂದೂಡಲಾಯಿತು. ಪ್ರಸ್ತುತ ಎಥೆನಾಲ್ ಪೂರೈಕೆ ವರ್ಷ 2024-25ರಲ್ಲಿ, ಸಾರ್ವಜನಿಕ ವಲಯದ ತೈಲ ಮಾರಾಟ ಕಂಪನಿಗಳು (OMCs) ಜುಲೈ 31, 2025ರ ವೇಳೆಗೆ ಸರಾಸರಿ ಶೇ 19.05ರಷ್ಟು ಮಿಶ್ರಣವನ್ನು ಸಾಧಿಸಿವೆ. ಇದರಲ್ಲಿ ಜುಲೈ 2025ರಲ್ಲಿ ಮಾತ್ರ ಶೇ 19.93ರಷ್ಟು ಮಿಶ್ರಣವನ್ನು ಸಾಧಿಸಲಾಗಿದೆ.

ರಾಷ್ಟ್ರೀಯ ಜೈವಿಕ ಇಂಧನ ನೀತಿ – 2018ರ ಅಡಿಯಲ್ಲಿ, 2030ರ ವೇಳೆಗೆ ಪೆಟ್ರೋಲ್‌ನಲ್ಲಿ 20% ಎಥೆನಾಲ್ ಮಿಶ್ರಣ ಮತ್ತು ಡೀಸೆಲ್‌ನಲ್ಲಿ 5% ಜೈವಿಕ ಡೀಸೆಲ್ ಮಿಶ್ರಣ ಮಾಡುವ ಗುರಿಯನ್ನು ನಿಗದಿಪಡಿಸಲಾಗಿತ್ತು. ನಂತರ, ಈ ಗುರಿಯನ್ನು 2025-26ನೇ ಸಾಲಿಗೆ ಮುಂಚಿತವಾಗಿ ಸಾಧಿಸಲು ನಿರ್ಧರಿಸಲಾಯಿತು. ಪ್ರಸಕ್ತ ಎಥೆನಾಲ್ ಪೂರೈಕೆ ವರ್ಷದಲ್ಲಿ (ESY 2024-25), ಸಾರ್ವಜನಿಕ ವಲಯದ ತೈಲ ಮಾರಾಟ ಕಂಪನಿಗಳು (OMCs) 31.07.2025ರ ಅಂತ್ಯಕ್ಕೆ ಸರಾಸರಿ 19.05% ಮಿಶ್ರಣವನ್ನು ಸಾಧಿಸಿವೆ. ಕೇವಲ ಜುಲೈ 2025ರ ತಿಂಗಳಲ್ಲೇ 19.93% ಮಿಶ್ರಣವನ್ನು ಸಾಧಿಸಲಾಗಿದೆ.

ಜೈವಿಕ ಇಂಧನಗಳನ್ನು ಉತ್ತೇಜಿಸಲು, ಸರ್ಕಾರವು ಎಥೆನಾಲ್ ಮಿಶ್ರಿತ ಪೆಟ್ರೋಲ್ (EBP) ಕಾರ್ಯಕ್ರಮ, ಜೈವಿಕ ಡೀಸೆಲ್ ಮಿಶ್ರಣ ಕಾರ್ಯಕ್ರಮ ಮತ್ತು ಸಿ ಎನ್‌ ಜಿ (CNG) ಜೊತೆಗೆ ಸಂಕುಚಿತ ಜೈವಿಕ ಅನಿಲ (CBG) ಮಾರಾಟಕ್ಕಾಗಿ ಇರುವ  SATAT ಯೋಜನೆಯಂತಹ ಉಪಕ್ರಮಗಳನ್ನು ಜಾರಿಗೆ ತಂದಿದೆ.

ಇದಲ್ಲದೆ, ಗ್ರಾಮೀಣ ಭಾರತವನ್ನೂ ಒಳಗೊಂಡಂತೆ ದೇಶದಾದ್ಯಂತ ಜೈವಿಕ ಇಂಧನ ಉತ್ಪಾದನೆಯನ್ನು ಹೆಚ್ಚಿಸಲು ಕ್ರಮಗಳನ್ನು ಕೈಗೊಳ್ಳಲಾಗಿದೆ. ಇವುಗಳಲ್ಲಿ ಬೆಲೆ ಪ್ರೋತ್ಸಾಹ ನೀಡುವುದು, ಎಥೆನಾಲ್ ಉತ್ಪಾದನೆಗೆ ಪರ್ಯಾಯ ಮಾರ್ಗಗಳನ್ನು ತೆರೆಯುವುದು, ಕೃಷಿ ತ್ಯಾಜ್ಯಗಳನ್ನು ಬಳಸಿ ಎರಡನೇ ತಲೆಮಾರಿನ ಎಥೆನಾಲ್ ಜೈವಿಕ ಸಂಸ್ಕರಣಾಗಾರಗಳನ್ನು ಸ್ಥಾಪಿಸಲು ಪ್ರಧಾನ ಮಂತ್ರಿ ಜೀ-ವನ್ ಯೋಜನೆಯನ್ನು ಜಾರಿಗೊಳಿಸುವುದು, ತ್ಯಾಜ್ಯ ಮತ್ತು ಜೀವರಾಶಿಯಿಂದ CBG ಮತ್ತು ಜೈವಿಕ ಗೊಬ್ಬರ ಉತ್ಪಾದನೆಗಾಗಿ ಇರುವ SATAT ಯೋಜನೆ, ಮತ್ತು ಎಥೆನಾಲ್ ಬಟ್ಟಿ ಇಳಿಸುವ ಸಾಮರ್ಥ್ಯವನ್ನು ಹೆಚ್ಚಿಸಲು ಮತ್ತು ವಿಸ್ತರಿಸಲು ಇರುವ ಬಡ್ಡಿ ಸಹಾಯಧನ ಯೋಜನೆ ಸೇರಿವೆ.

*****