ঙসি ২০২৪ বেতচগী ইন্দিয়ান ফোরেন সর্বিস(আই.এফ.এস) ওফিসার ত্রেনিশিংনা ৭, লোক কলয়ান মার্গতা লৈবা মহাক্কী য়ুমদা প্রধান মন্ত্রী শ্রী নরেন্দ্র মোদীগা উনখ্রে। তোঙান তোঙানবা রাজ্যশিং অমসুং য়ু.তিশিংদগী ২০২৪ বেতচগী আই.এফ.এস ওফিসার ত্রেনি ৩৩ য়াওখি। 

লৈবাক খুদিংমক্কা মরুপ-মপাং ওইনবা, হৌজিক্কী মালেম অমসুং বিশ্ববন্ধু অমা ওইনা ভারতকী থৌদাং প্রধান মন্ত্রীনা খন্নখ্রে। লৈবাকশিংনা দরকার ওইরকপদা অহানবা মতেং পাংবা ওইনা কমদৌনা ভারতনা হোৎনখিবগে হায়বগী থৌদোকশিং পাউদমখি। গ্লোবেল সাউথকী মতেং পাংনবা ভারতনা পায়খৎখিবা কেপাসিতি বিল্দিংগী থবকশিং অমসুং অতোপ্পা থবকশিং প্রধান মন্ত্রীনা পনখি। মপান লৈবাক্কী থৌশিলগী ওইরক্লিবা ফিবম অমসুং মালেমগী থৌদোক ৱাথোকশিংদা মসিগী মরুওইবগী মতাংদা প্রধান মন্ত্রীনা খন্নখি। মালেমগী ফম্বাক্ত লৈবাক অসি বিশ্ববন্ধু অমা ওইরকপদা দিপ্লোমেতশিংনা লৌরিবা মরুওইবা থৌদাংগী মতাংদা প্রধান মন্ত্রীনা ফোঙদোকখি। ২০৪৭ দা চাউখৎলবা লৈবাক অমা ওইনবা পান্দমদা লৈবাক অসি মাঙলোমদা চঙশিল্লকপগা লোয়ননা তুংগী দিপ্লোমেতশিং ওইবগী মখোয়গী থৌদাংদা ওফিসার ত্রেনিশিংগী মরুওইবা প্রধান মন্ত্রীনা পনখি।

প্রধান মন্ত্রীনা হিরম কয়াদা ওফিসার ত্রেনিশিংগা ৱারি শানখি অমসুং সরকারগী থবক চংলবা মতুংদা, হৌজিক ফাওবদা মখোয়না থেংনখিবশিংগী মতাংদা মখোয়দা হংখি। মখোয়গী ত্রেনিংদগী মখোয়না থেংনরকপশিং অমসুং মেরিতাইম দিপ্লোমেসি, এ.আই অমসুং সেমিকন্দক্তর, অয়ুর্বেদা, নাৎ, চীঞ্জাক অমসুং ৱা ঙাংবগী মতাং য়াওনা হিরম কয়াদা মখোয়না থিজিনবদগী ফংলকপগী মতাংদা ওফিসার ত্রেনিশিংনা ফোঙদোকখি।

প্রধান মন্ত্রীনা হায়খি অদোমগী ভারত মশক খঙউ কুইজশিং অমসুং দিবেতশিংগী পাংথোক্তুনা তোঙান তোঙানবা লৈবাকশিংগী নহারোলশিংগী মরক্ত ভারতকী মরমদা খঙনিংবা পোকহন্নবা হোৎনগদবনি। কুইজশিং অদুগী ৱাহংশিং চাং নাইনা নৌথোহনগদবনি অমসুং মহাকুম্ভ, গঙ্গাইকোন্দ চোলাপুরম লাইশঙ চহি ১০০০ মপুংফারকপগী থৌরমগুম্বা অনৌবা হিরমশিং য়াওহনগদবনি।

তেক্নোলোজিনা হুমদুনা চৎলিবা মালেম অমদা ই-পাউ ফাওনবনা লৌরিবা থৌদাং প্রধান মন্ত্রীনা ফোঙদোকখ্রে। মিসনশিংগী ৱেবসাইতশিং খঙদোক্নবা থবক পায়খৎনবা অমসুং মপান লৈবাকশিংদা লৈরিবা ভারতমচাশিংগা পাউ ফাওন্নবা কমদৌনা হায়রিবা ৱেবসাইতশিং ফগৎহনগনি হায়না হোৎন্নবা মহাক্না ওফিসার ত্রেনিশিংদা তকশিনখি। 

স্পেস সেক্তরদা লনাই কাংবু শরুক য়াহনবগী মতাংদা খন্নরদুনা, প্রধান মন্ত্রীনা হায়খি হিরম অসিদা ভারতকী ষ্টার্দঅপশিং অতোপ্পা লৈবাকশিংদা থবক পায়খৎনবগী খুদোংচাবশিং খঙদোক্কদবনি। প্রধান মন্ত্রীনা হায়খি স্পেস সেক্তরগী অহাংবা মেনশিন্নবা ভারতকী শক্তি লৈরে।

***