U Myntri Kam Pohiing jong ka Sorkar Pdeng uba dei ruh u Myntri ka Tnad iatreilang u Amit Shah u la leh ia ka bhoomi pujan na ka bynta ban shna ia ka temple bad ka jaka jong ka Punaura Dham, ka jaka ba la kha ia ka Mata Sita ha distrik Sitamarhi jong ka jylla Bihar mynta ka sngi. U Amit Shah u la kaweh lama ruh ia ka rel Amrit Bharat na Sitamarhi sha Delhi lyngba ka video conferencing. Ha kane ka sngi la ia don lang bun ki kynrem ki lyndan kynthup ia u Myntri Rangbah ka jylla Bihar u Nitish Kumar.

Ha ka jingai jingkren jong u, u Myntri kam pohiing jong ka sorkar pdeng uba dei ruh u Myntri ka Tnad iatreilang u Amit Shah u la ong ba mynta ka sngi, ka jingbuh mawnongrim na ka bynta ban shna ia ka Punaura Dham temple complex, ka jaka ba la kha ia ka Mata Janaki, ka long ka sngi kaba donbok shibun ym tang ia ka Sitamarhi, Mithila bad Bihar hynrei wat ia ka ri baroh kawei bad ia ka pyrthei baroh kawei. U la ong ba u Myntri Rangbah ka Bihar u Nitish Kumar u la leh ia ka kam ban shna ia ka temple Punaura Dham bad ia ka jaka jong ka baroh kawei ha ka jaka ba la kha ia ka Sita Mata da ki klur tyngka. Kane ka long ka kam kaba pynkmen ym tang ïa ki riewngeit jong ka Mithila bad Bihar hynrei wat ïa ka ri baroh kawei.

U Amit Shah u la bynrap ruh ba ïa ka Temple kaba itynnnad jong ka Shaktisswarupa Jagatjanani Mata Janaki yn tei ha Punaura Dham ha ka jaka kaba heh palat 68 akar ha ka jinglut kaba kot kumba T. 890 klur. U la ong ba na kane, T. 137 klur yn pynlut ha kaba pynthymmai ia ka temple kaba la don lypa jong ka Mata Sita bad T. 728 klur yn pynlut ha ka ‘Parikrama Path’ bad kiwei kiwei ki jingtei. U la ong ruh ba ïa ki jinghikai ba iadei bad ka jingim na ka jingim jong ka Mata Sita bad ki khana jong ka Ramayana yn ïathuh ha ka Parikrama Path, ka Dhyan Kendra Vatika, ka jingshna thymmai ïa ki tyllong um ba kyntang, ki Dharamshala, ki Canteen, ki jaka sumar bad ka digital gallery. U la ong ba lyngba ka jingshemphang ha ka 3D, ki samla jong ngi kin lah ban ïohi baroh ki jingjia kiba ai mynsiem na ka jingim jong ka Mata Janaki ryngkat bad u Shri Ram Chandra Ji. U Amit Shah u la ong ba kane ka projek kan kynthup ruh ia ki kam pynroi ha Valmiki Nagar jong ka Ramayana Circuit kaba T. 52 klur, ka jingkyntiew ia ka Pulhar ha Madhubani kaba T. 31 klur, ka Panth Pakar ha Sitamarhi kaba T. 24 klur, ka Ahilya spot kaba T. 23 klur, Ram Reka Ghat kaba T. T. 13 klur bad Sita Kund ha Munger Gaya kaba T. 7 klur.

U Myntri Kam Pohiing jong ka sorkar pdeng u la ong ba mynta ka sngi la sdang ruh ban iaid ka rel Sitamarhi-Delhi Amrit Bharat. U la bynrap ruh ba mynshwa la pynlut T.1132 klur man la u snem na ka bynta ban kyntiew ïa ki lynti rel ha Bihar, hynrei u Myntri Rangbahduh u Narendra Modi ji u la pynlut T.10,066 klur na ka bynta ki lynti rel ha Bihar tang ha u snem 2025-26.

U Amit Shah u la ong ba ia ka khanatang shaphang ka jingim jong ka Mata Sita yn aiti sha ka bor jong ki kynthei jong ka ri da kaba pynim biang ia baroh ki jaka naduh ka jingiakynduh ba nyngkong jong ka Mata Sita bad u Shri Ram haduh ka jaka ba la kha ia u Luv-Kush, ka jaka sah ba khatduh jong ka Mata Sita bad u Panth Pakar. U la ong ba ka Mata Sita ka don ka jaka kaba kyrpang ha ka kolshor jong ka Ri India. Ka Mata Janaki ka la leh ia ki bynta kum ka tnga kaba paka, ka khun kynthei kaba paka, ka kmie kaba paka bad ka Raj Mata (mahadei) kaba paka ha ka jingim jong ka. U Amit Shah u la ong ba ka Mithila ka bat ia ka jaka pdeng ha ka kolshor jong ngi kumba ka paw shai na ki jingthoh ba kyntang jong ngi kum ka Valmiki Ramayana, Mahabharata, ha ki jingthoh ba kyntang jong ki Buddhist bad ha ka thoh ka tar jong ka niam Jain. Ka Mithila ka la long ka jaka shong kaba khraw jong ka jingstad, jong ka jingstad ha ka niam, ka jingstad ba iadei bad ki khlur, ka jingrwai, ka thoh ka tar, ka grammar, ka ktien bad ka jingstad tantra. U la ong ba kane ka temple kaba heh kaba la tei ha ka jaka ba la kha ia ka Mata Janaki ka pynpaw ia ka jingseisoh bad ka jingroi jong ka thain Mithila bad ka Bihar. U la ong ba mynta ka sngi, la sdang ia ka kam ban pynlong ia ka Mithila kum ka jaka pule bad ka kolshor naduh katei ka jaka.

U Myntri Kam Pohiing ka sorkar pdeng u la ong ba ha ka por jong ka sorkar u Modi la burom ia ka Mithila ha kiba bun ki liang. U la ong ba u Myntri Rangbahduh barim u Atal Bihari Vajpayee ji u la pynrung ia ka ktien Maithili ha ka Khyrnit kaba phra bad u Myntri Rangbahduh ka ri u Modi ji u la rah ia ka jingsaindur jong ka Mithila sha ka pyrthei. U Shah u la ong ba ka kolshor jong ngi ka long ban burom ia ka ‘Maatri Shakti’ (ka bor jong ki kynthei) bad ngi ju mane ia ka ‘Maatri Shakti’ ha kane ka ri. U la ong ba u Myntri Rangbahduh ka ri u Narendra Modi ji u la tei ia ka Ram temple kaba heh ha Ayodhya, u la tei ia ka Kashi Vishwanath Corridor bad ia ka Mahakal Corridor ha Ujjain. Kumjuh ruh ia ka temple jong u Shri Somnath la shna biang da ka ksiar bad u Myntri Rangbahduh ka ri u Modi ji u la pynthymmai ia kiba bun ki jaka niam.

U Amit Shah u la ong ba u Myntri Rangbahduh ka ri u Narendra Modi Ji u shimkhia ia ka jingshngain jong ka India. Kham mynshwa ki ju don ki jingbthei bom ha ka ri bad ki lehnoh ki ju phet rieh sha Pakistan hadien ba ki la pyndep ia ki jingbthei bom. U Myntri Kam pohiing u la ong ba hadien ba ka sorkar u Modi Ji ka la wan ha ka bor, ngi la leh ia ka Surgical strike hadien ka jingther ha Uri, ka jingther ki liengsuin hadien ka jingthombor ha Pulwama bad hadien ka jingthombor ha Pahalgam, lyngba ka Operation Sindoor, ngi la pynduh jait ia ki lehnoh hapoh Pakistan. U la ong ba ki liang pyrshah ki pyrshah ia ka Operation Sindoor ha Parliament tangba ki dei ban tip ba kane ka dei ka sorkar jong u Narendra Modi Ji ka bym ai iano iano ruh ka hok ban pynkhein ia ka jingshngain jong ka ri.

U Myntri Kam pohiing ka sorkar pdeng uba dei ruh u Myntri ka Tnad iatreilang u la ong ba shwa ka elekshon ha Bihar, ka khubor kaba la mih ha baroh ki kotkhubor ka long la dei ban leh ne em ia ka Special Intensive Revision (SIR). U la kylli ia ki paidbah hato ym dei ban weng noh ia ki nongrung beain na ka thup ki nongthep vote, bad hato dei ban pynsangeh noh ia ka Election Commission ban pynlong ia ka ‘SIR’. U Shah u la ong ba ka liang pyrshah ka kwah ban iada ia kito kiba wan rung sha India na Bangladesh bad kiba la knieh noh ia ki kam ki jam jong ki samla jong ngi. U la ong ba ka liang pyrshah ka kwah ia ki vote jong ki nongrung beain hynrei ki briew jong ka Bihar kin nym pdiang. U Shah u la ong ba ka liangpyrshah ka dei ban sangeh noh ia ki kam politik vote-bank. U la ong ba ka jingpynkylla ia ka thup kyrteng jong ki nongthep vote kam dei kaba jia ha ka sien kaba nyngkong, ka la jia ha ka por jong u Jawaharlal Nehru bad la leh ha u snem 2003 ruh, hynrei kam ju don kano kano ka jingiakhih. U la ai jingmut ba ka liang pyrshah ka paw ba ka dang batai lypa sha ki paidbah ïa ki daw jong ka jingkhmih lynti jong ka jingshah rem ha ka elekshon ban wan ha Bihar, haba kheiñ ïa ka jingshah rem man ka por ha ka elekshon.

U Myntri Kam Pohiing u la ong ba ka riti synshar jong ngi kam ai hok ban thep vote ia kito ki bym shym la kha ha India. U la ong ba ki briew kiba rung beain kim dei ban shim bynta ha ka elekshon jong kane ka ri bad ka liang pyrshah ka pyrshah ia ka SIR namar ba kum kine ki nongrung beain ki dei ki vote bank jong ki.

U Amit Shah u la ong ba ka liang pyrshah kam shym la leh ei ei na ka bynta ka roi ka par jong ka thain Mithila lait noh tang ka jingpyni bor kaba ai jingiada ia ki mafia, ka jingrahbor bad ka jingsiew bai lutksan. U la ong u Myntri Rangbahduh ka ri u Modi Ji u la ai 83 hajar jlur tyngka na ka bynta ka roi ka par jong ka Bihar ha ki 6 sien wan jngoh jong u. U la ong ba ia ka surok National Highway 527 jong ka Sitamarhi la shna pura da ka dewbilat bad la shna khlain haduh katta katta ba ynda la dep hadien 2 snem wat ka liengsuin ruh kan sa lah ban hiar ha ka. Ia ka bynta jong ka lynti rel Sitamarhi-Sursand-Jaynagar-Nirmali la shna ha ka jinglut kaba T.2400 klur, ia ka surok Sitamarhi-Jaynagar-Naraiya la pynheh ar shah da ka jingmang pisa kaba T.474 klur. Ka jingtrei ka dang iaid shakhmat na ka bynta ka surok na Bahargaon sha Sitamarhi-Sursand kaba shongdor T.201 klur bad ia ka bynta jong ka Khagaria-Purnia la shna ha ka surok National Highway 31 ha ka jingmang pisa kaba T.1600 klur. U Shah u la ong ba ka jingpynkylla Double Gauge ha Jaynagar, Darbhanga, Narkatiaganj bad Bhikhana la leh ha ka jinglut kaba T.1193 klur. Lah ban kdew hangne ba ïa lynti rel Samastipur-Darbhanga la pynheh ar shah ha ka jinglut kaba T.624 klur bad 10 tylli ki steshon rel jong ka Bihar la pynlong kum ki steshon Amrit. U la ong ba dang shna ia ka lynti rel ba thymmai na Sitamarhi sha Shivhar ha ka jinglut kaba T. 567 klur, ia ka lynti rel Muzaffarpur sha Sitamarhi la shna ha ka jinglut kaba T.71 klur, ia ka lynti rel Muzaffarpur-Sugoli la pynheh ar shah ha ka jinglut kaba T.1465 klur. U Myntri Kam pohiing u la ong ruh ba u Modi ji u trei ruh na ka bynta ka bha ka miat jong ki nongrep ha Makhana da kaba thaw ia ka Makhana Board. U la ong ba la sdang ia ka jaka tylliat shinin ha Riga sugar mill ha Sitamarhi, ka jingiarap pisa na ka bynta ka Western Kosi Nagar kaba la mynjur da ka sorkar India. Kumjuh ruh la shna 8 tylli ki medical college ba thymmai bad mynta ka sngi la pyndep ia ka kam kaba heh tam ha ka dur jong ka jingbuh maw nongrim ia ka Mata Janaki temple.

***