ঙসি বিহারগী পাতনাদা .এম কিষান সম্মান নিধিগী ২০শুবা ইন্সতোলমেন্ত থাদোকপা থৌরমদা লৌমীশিংদা এগ্রিকলচর অমসুং ফার্মরস ৱেলফিয়ারগী য়ুনিয়ন মিনিষ্টর শ্রী সিবরাজ সিংহ চৌহান ৱা ঙাংখ্রে। শেংলবা সাৱান থাদা শীনবা থৌরম অসিদা বিহারগী দিপুতি চীফ মিনিষ্টর শ্রী বিজয়জ সিনহা, কোওপরেতিপ মিনিষ্টর শ্রী প্রেম কুমার অমসুং অতোপ্পা শক্নাইরবা ওফিসিএলশিং শরুক য়াখি।

মহাক্কী ৱারোলদা শ্রী চৌহান্না লৌমীশিং ইকায়খুম্নবা উৎখি অমসুং মখোয়গী থবক শুবা নোম্বা কনবা অমসুং কৎথোকপশিংগীদমক মহাক্না থাগৎপা ফোঙদোকখি। মহাক্না হায়খি লৌউ-শিংউ অসি ভারতকী শেন্মিৎলোনগী য়াংলেন শরুনি অমসুং লৌমীশিংনা মসিগী থৱায়নি। লৌমীশিংগী য়াইফনবা থবক তৌবা অসি ঐখোয়গী থৌদাংনি।

বিহারগী ইনাকখুল্লবা চৎনবীশিং অমসুং লৌউ-শিংউগী চৎনবীশিং পল্লদুনা, শ্রী চৌহান্না হায়খি লমদম অসি ভগবান বুদ্ধগী মঙালনা শেংদোক্লবনি অমসুং ইমা গঙ্গাগী থৌজাল ফংলবনি। থবক শুবা নোম্বা কনবা বিহারগী মীয়াম মালেমদা থাগৎনরি।

মহাক্না হায়খি রাজ্য অসিগী লৌশিং লৈবা অমসুং থবক শুবা কনবা অসি লাম্বা লৈতে। মহাত্মা গান্ধীগী চম্পারান সত্যগ্রহ হৌখিবা লমদম অসিনা ভারতকী নিংতম ইহৌদা অনৌবা মাইকৈ অমা তাকখি। লৌমশিং শেন্দোং ফংনবা প্রধান মন্ত্রী শ্রী নরেন্দ্র মোদীগী অচেৎপা ৱাশক লৈরি। পি.এম কিষান স্কিমগী মখাদা হৌজিক ফাওবদা লৌমীশিংগী একাউন্তশিংদা লুপা করোর ৩,৭৭,০০০ হেন্না য়ৌহনখ্রে। লৈবাক শীনবা থুংবগী লৌমীশিংগী একাউন্তশিংদা লুপা করোর ২০,০০০ হেন্না হাপচিনখ্রে।

শ্রী চৌহান্না হায়খি হেক্তর অমদা পোৎথোক হেন্না পুথোক্নবা প্রধান মন্ত্রী ধন ধন্যা য়োজনাগুম্বা থবকশিং পায়খৎলে। বিহারদা মখানা শিংথাবা য়ানা পুথোক্লে অমসুং লৌবুকশিংগা লৌউ-শিংউগী সাইন্সগা শম্ননবা লেপ্তনা থবক পায়খৎলি। লৌমীশিংদা মতম চানা অমসুং মরাংকাইনা হার অমসুং তিলহাৎ হিদাকশিং ফংহগনি। মহৈ-মরোং মাঙখ্রবা লৌমীশিংদা মতেং পীনবা তোঙান তোঙানবা স্কিমশিংগী মখাদা থবক পায়খৎলি। হৌজিক মহৈ-মরোংশিং এম.এস.পিদা লৈবদগী লৌমীশিংনা লৌ উবদা চংখিবা শেনফমদগী শেন্দোং চাদা ৫০ ফংলে। লৌমীশিংগী য়াইফনবা সরকারনা পায়খৎলিবা থবকশিংগী মমি মসিদা তারে।

শ্রী চৌহান্না হায়খি প্রধান মন্ত্রী শ্রী নরেন্দ্র মোদীগী লমজিং মখাদা লৌমীশিংগী য়াইফনবা থবক পায়খৎপা অসি ঐখোয়গী মরুওইবা থবকনি।  দি.বি.তিগী মতেংদগী সরকারনা লৌমীশিংগী একাউন্তশিংদা হকথেংননা শেন য়ৌহনবা ঙম্লে। মমাঙদা লৌমীশিংনা সরকারনা পীখিবা লুপা ১ গী শেনফমদগী পৈশা খর খক ফংখি, অদুবু হৌজিক মখোয়না ফংফম থোকপা শেনফমশিং চপ চানা ফংলে।

লৌমীশিংগী ফিবম ফগৎহন্নবা অমসুং ভারতকী লৌউ-শিংউগী থবকশিং মপাঙ্গল কনখৎহন্নবা ৱাশক অমগা লোয়ননা থৌরম অসি লোইশিনখি।

***