ঙসি ভারতকী রাষ্ট্রপতি শ্রীমতি দ্রৌপতি মুর্মু ঝারখন্দগী ধনবাদতা লৈবা ইন্দিয়ান ইন্সতিতুৎ ওফ তেক্নোলোজি(ইন্দিয়ান স্কুল ওফ মাইন্স) ধনবাদকী ৪৫ শুবা কনভোকেসন থৌরম শরুক য়াখ্রে।

থৌরম অদুদা ৱা ঙাংবদা, রাষ্ট্রপতি শ্রীমতি দ্রৌপতি মুর্মুনা হায়খি আই.আই.তি (আই এস এম) ধনবাদকী চহি ১০০ রোমগী ফজরবা পুৱারি অমা লৈরি। মসি মাইনিং অমসুং জিওলোজিগী লমদা ত্রেনিং ফংলবা অখঙ-অহৈশিং পুথোক্নবা লিংখৎখিবনি। মতমগী মতুংইন্না মসিগী থবকশিং পাকথোক-চাউথোরকখি অমসুং মসি হৌজিক অৱাংবা থাক্কী লাইরিক তমফম অমসুং তোঙান তোঙানবা হিরমশিংদা থিজিন্নবা মরুওইবা মফম অমা ওইরে। তেক্নোলোজি চাউখৎলকপা অমসুং অনৌবা থবকশিং পায়খৎপদা ইন্সতিতুৎ অসিনা মরুওইবা থৌদাং অমা লৌরি। মীয়ামগী দরকার ওইবশিং অমসুং মীয়ামগী অনিংবশিংগা লাইরিক-লাইশু অমসুং ইন্নোবেসনগী পান্দমগা চান্নবা ফিবম অমা আই.আই.তি ধনবাদনা শেমগৎপদা হরাওবা ফোঙদোক্লি।

রাষ্ট্রপতি শ্রীমতি দ্রৌপতি মুর্মুনা হায়খি লৈবাক অসি হীরম খুদিংমক্ত চাউখৎহনবদা আই.আই.তি-আই.এস.এমনা মরুওইবা থৌদাং অমা লৌরি। অফবা ইঞ্জিনিয়ারশিং অমসুং থিজিল্লোয়শিংগী থৌরাং তৌবগী মথক্ত, ইন্সতিতুৎ অসিনা মীওইবগী অৱাবা খঙবা, ৱাখল তাবা অমসুং কান্নবা মীওই কয়াসু থোক্লি। অৱাংবা থাক্কী থিজিনবা অমসুং অনৌবা থবকশিং য়োকখৎলিবা অমসুং নহারোলশিং লমজিংলিবা আই.আই.তি-আই.এস.এমগুম্বা ইন্সতিতুৎশিংগী খুৎথাংদা ঐখোয়গী লৈবাক্কী তুংগী ফিবম শেম্লি।

রাষ্ট্রপতি শ্রীমতি দ্রৌপতি মুর্মুনা হায়খি অইং-অশাগী খল হোংলকপা অমসুং লন-থুম মরাং কাইরক্তবা, দিজিতেলগী চৈথেং অমসুং খুন্নাইগী থোং মান্নদবা য়াওনা লৈবাক অসিনা অমসুং মালেম্না অৱাবা কয়া মায়োক্নরি। অসিগুম্বা ফিবম অমদা, আই.আই.তি-আই.এস.এমগুম্বা ইন্সতিতুৎ অমগী লমজিং অসি য়াম্না মরুওই। অনৌবা অমসুং তুংকোইনা চৎনবা য়াবা পাম্বৈশিং থিদোকপদা আই.আই.তি-আই.এস.এমনা মরুওইবা থৌদাং অমা লৌগদবনি।

রাষ্ট্রপতি শ্রীমতি দ্রৌপতি মুর্মুনা হায়খি লৈবাক অসিগী মশিং য়াম্লবা লাইরিক-লাইশু হৈরবা মীওইশিং অসি ভারতকী লন্নি। তেক্নিকেল ইজুকেসন হেন্না ফংহনবা অমসুং দিজিতিকেলগী স্কিলশিং য়ৌহনবা অসিনা ভারত তেক্নোলোজিগী সুপরপৱার অমা ওইরকপা ঙমগনি। ভারতকী লাইরিক-লাইশু তম্বগী থবক অসি হেন্না প্রাক্তিকেল ওইহনবা, অনৌবদা য়ুম্ফম ওইবা অমসুং উদ্যোগকা চুনবা ওইহনবা অসিনা লৈবাক অসিগী নহারোলশিংগী হৈথোই-শিংথোইবা অচুম্বা লম্বী তাক্কনি অমসুং মখোয় মালেমগী থাক্ত মাঙলোমদা চঙশিনগনি।

রাষ্ট্রপতি শ্রীমতি দ্রৌপতি মুর্মুনা হায়খি মালেমগী থাক্ত চাংদম্নবা ঙম্নবা আর অমসুং দি অমসুং স্তার্দঅপশিং য়োকখৎনবা পেতেন্তগী চৎনবী অমা পুক্নিং থৌগৎপা য়াম্না দরকার ওই। মহৈরোয়শিংগী মরক্ত অফবা ৱাখল খন্নবা অমসুং অরুবা খুদোংচাদবশিংগী অফবা পাম্বৈশিং পুথোক্নবা, লাইরিক-লাইশু তম্বদা হিরম অমগা অমগা পুনশিনবগী থৌরাং অমা পায়খৎপা য়াম্না মরুওই।

রাষ্ট্রপতি শ্রীমতি দ্রৌপতি মুর্মুনা হায়খি মহৈরোয়শিংনা মশাগী খুদোংচাবা ফংনবা খক মখোয়গী লৌশিং শীজিন্নরোইদবনি, লৌশিং অদু মীয়ামগী য়াইফনবা গারি অমা ওইহনগদবনি। মপাঙ্গল কনবা অমসুং মীওই খুদিংমক্ত খুদোংচাবশিং ফংহনবা ভারত অমা শেমগৎনবা মহৈরোয়শিংনা মখোয়গী লৌশিং শীজিন্নগদবনি। মহৌশাগী অকোয়বা ফিবম শোকহন্দনা চাউখৎনবা মৈখু চেন্দবা ভারত অমা শেমগৎনবা মহৈরোয়শিংনা মখোয়গী লৌশিং শীজিন্নগদবনি। মখোয়না তুংদা থবক পায়খৎলকপা মতমদা, থবক অদুদা মখোয়গী নুংশিবা, হৈথোই-শিংথোইবা, চৎনবী ঙাকপা অমসুং লৌশিংগী মমি তাগদবনি। মীওইবগী অৱাবা মশক খঙবা অনৌবা থবকশিংনা মালেম অসি হেন্না ফগৎহনগনি।

***