કેન્દ્રીય ગૃહ અને સહકારિતા મંત્રી શ્રી અમિત શાહે આજે આગામી ચાર વર્ષ માટે રાષ્ટ્રીય સહકારી વિકાસ નિગમ (NCDC)ને ₹ 2000 કરોડની ગ્રાન્ટ સહાય મંજૂર કરવા બદલ પ્રધાનમંત્રી શ્રી નરેન્દ્ર મોદીજીનો આભાર વ્યક્ત કર્યો હતો.

X પ્લેટફોર્મ પરની તેમની પોસ્ટ્સમાં, કેન્દ્રીય ગૃહ અને સહકારિતા મંત્રી શ્રી અમિત શાહે જણાવ્યું હતું કે "મોદીજીના 'સહકાર સે સમૃદ્ધિ' ના મંત્રને અનુસરીને, 'રાષ્ટ્રીય સહકારી વિકાસ નિગમ' ગ્રામીણ અર્થતંત્રને મજબૂત બનાવવામાં મહત્વપૂર્ણ ભૂમિકા ભજવી રહ્યું છે. આજે, કેન્દ્રીય મંત્રીમંડળે આગામી ચાર વર્ષ માટે NCDC ને વાર્ષિક ₹ 500 કરોડના દરે ₹ 2000 કરોડની ગ્રાન્ટ સહાયને મંજૂરી આપી છે. આનાથી સહકારી સંસ્થાઓને નવા પ્રોજેક્ટ શરૂ કરવામાં, પ્લાન્ટનું વિસ્તરણ કરવામાં અને લોન આપવામાં મદદ મળશે, જેનાથી સહકારી સંસ્થાઓ સાથે સંકળાયેલા કરોડો સભ્યોને ફાયદો થશે, મહિલાઓ આત્મનિર્ભર બનશે અને યુવાનોને રોજગારની તકો મળશે. દેશભરના સહકારી ક્ષેત્ર વતી, હું આ કલ્યાણકારી નિર્ણય માટે મોદીજીનો હૃદયપૂર્વક આભાર વ્યક્ત કરું છું."

શ્રી અમિત શાહે એક અન્ય પોસ્ટમાં કહ્યું કે, "ખેડૂતોનું કલ્યાણ મોદી સરકારની સર્વોચ્ચ પ્રાથમિકતા રહી છે અને આ દિશામાં બીજા એક મહત્વપૂર્ણ નિર્ણયમાં, કેન્દ્રીય મંત્રીમંડળે 'પ્રધાનમંત્રી કિસાન સંપદા યોજના' માટે કુલ ₹6,520 કરોડના ખર્ચને મંજૂરી આપી છે, જેમાં ₹1,920 કરોડની વધારાની રકમનો પણ સમાવેશ થાય છે. આ યોજના હેઠળ, 50 બહુ-ઉત્પાદન ખાદ્ય ઇરેડિયેશન એકમો અને 100 ખાદ્ય પરીક્ષણ પ્રયોગશાળાઓ સ્થાપિત કરવામાં આવશે, જે ખાદ્ય સંરક્ષણને પ્રોત્સાહન આપશે, ખાદ્ય સલામતી અને ગુણવત્તામાં સુધારો કરશે અને ખેડૂતોને તેમના ઉત્પાદન માટે વધુ સારા ભાવ મળશે."

કેન્દ્રીય ગૃહ અને સહકારિતા મંત્રીએ જણાવ્યું હતું કે "મોદી સરકાર દેશવાસીઓને હાઇ-સ્પીડ રેલ નેટવર્કની સુવિધા પૂરી પાડીને તેમની મુસાફરીને વધુ સુખદ અને સુલભ બનાવવા માટે પ્રતિબદ્ધ છે. આ દિશામાં, કેન્દ્રીય મંત્રીમંડળે પૂર્વી, મધ્ય અને પશ્ચિમી પ્રદેશોના 6 રાજ્યોના 13 જિલ્લાઓમાં 4 મલ્ટી-ટ્રેકિંગ પ્રોજેક્ટ્સને મંજૂરી આપી છે. ₹ 11,169 કરોડના ખર્ચે આ પ્રોજેક્ટ્સ રેલ્વે નેટવર્કને વધુ 574 કિમી વિસ્તૃત કરશે, જે કનેક્ટિવિટીમાં સુધારો કરશે, ઉદ્યોગ અને વેપારને વેગ આપશે અને રોજગારની નવી તકોનું સર્જન પણ કરશે."

AP/IJ/GP/JD