புது டெல்லி, ஜூலை 27: ஸ்ரீஹரிகோட்டாவிலிருந்து ஜூலை 30 ஆம் தேதி ஏவப்படும் "நாசா-இஸ்ரோ செயற்கைத் துளை ரேடார்" (நிசார்) இஸ்ரோவின் சர்வதேச ஒத்துழைப்பு வாய்ப்புகளை மேம்படுத்தும் என்று மத்திய அமைச்சர் டாக்டர் ஜிதேந்திர சிங் இன்று இங்கு தெரிவித்தார்.

ஊடகங்களுக்கு விளக்கமளித்த அறிவியல் மற்றும் தொழில்நுட்பத் துறை அமைச்சர், மிகவும் எதிர்பார்க்கப்பட்ட நாசா-இஸ்ரோ செயற்கை துளை ரேடார் (NISAR) செயற்கைக்கோள் பணிகள் முடிவடைந்து இருப்பதால் அது ஜூலை 30, 2025 அன்று மாலை 5:40 மணிக்கு ஸ்ரீஹரிகோட்டாவின் சதீஷ் தவான் விண்வெளி மையத்திலிருந்து ஏவப்படும் என்று தெரிவித்தார். இந்திய விண்வெளி ஆராய்ச்சி மையம் (ISRO) மற்றும் அமெரிக்காவின் தேசிய வானூர்தி மற்றும் விண்வெளி நிர்வாகம் – நாசா (NASA) ஆகியவற்றுக்கு இடையேயான முதல் கூட்டு நடவடிக்கையான இது இந்திய-அமெரிக்க விண்வெளி ஒத்துழைப்பின் பயணத்தில் ஒரு தீர்க்கமான தருணத்தைக் குறிக்கிறது. இந்த ஒத்துழைப்பின் மூலம் பூமியை கண்காணிக்க இரு தரப்பு ஒத்துழைப்புடனான பணியாக இது அமைய இருக்கிறது. மேலும் இஸ்ரோவின் ஒட்டுமொத்த சர்வதேச ஒத்துழைப்புகளிலும் இது ஒரு முக்கிய தருணம் என்றும் அவர் கூறினார். இந்த ரேடார் இந்தியாவின் GSLV-F16 ராக்கெட் வாயிலாக ஏவப்படும்.

இந்த பணியை உன்னிப்பாகக் கண்காணித்து வரும் டாக்டர் ஜிதேந்திர சிங், இந்த ஏவுதல் உத்திசார் அறிவியல் கூட்டாண்மைகளின் முதிர்ச்சியையும், மேம்பட்ட பூமி கண்காணிப்பு அமைப்புகளில் நம்பகமான உலகளாவிய வல்லமையாக இந்தியா உருவெடுப்பதையும் பிரதிபலிக்கிறது என்றார். இந்த வரலாற்று நிகழ்வைக் காண ஸ்ரீஹரிகோட்டாவில் நேரில் இருக்க வேண்டும் என்று விரும்பிய போதிலும், நடந்து வரும் நாடாளுமன்றக் கூட்டத்தொடர் காரணமாக அது நிகழாமல் போக வாய்ப்பு இருப்பதையும் ஒப்புக்கொண்டார்.

"இது வெறும் செயற்கைக்கோளை ஏவும் பணியல்ல, அறிவியலுக்கும் உலக நலனுக்கும் உறுதியளித்த இரண்டு ஜனநாயக நாடுகள் இணைந்து என்ன சாதிக்க முடியும் என்பதை நிரூபிக்கும் தருணம். NISAR இந்தியாவிற்கும் அமெரிக்காவிற்கும் சேவை செய்வது மட்டுமல்லாமல், உலகெங்கிலும் உள்ள நாடுகளுக்கு, குறிப்பாக பேரிடர் மேலாண்மை, விவசாயம் மற்றும் காலநிலை கண்காணிப்பு போன்ற துறைகளில் முக்கியமான தரவுகளை வழங்கும்," என்று டாக்டர் ஜிதேந்திர சிங் கூறினார்.

"இந்தியா 'உலகின் தோழனாக' - மனிதகுலத்தின் கூட்டு நன்மைக்கு பங்களிக்கும் ஒரு உலகளாவிய கூட்டாளியாக மாற வேண்டும் என்ற பிரதமர் நரேந்திர மோடியின் தொலைநோக்குப் பார்வைக்கு இந்த பணி பொருந்துகிறது," என்று டாக்டர் ஜிதேந்திர சிங் மேலும் குறிப்பிட்டார்.

NISAR பணி இரு பெரும் விண்வெளி ஆராய்ச்சி நிறுவனங்களின் தொழில்நுட்ப நிபுணத்துவத்தையும் ஒருங்கிணைக்கிறது. நாசா, L-பேண்ட் செயற்கை துளை ரேடார் (SAR), உயர்-விகித தொலைத்தொடர்பு துணை அமைப்பு, GPS பெறுநர்கள் மற்றும் பயன்படுத்தக்கூடிய 12-மீட்டர் விரிக்கக்கூடிய ஆண்டெனா ஆகியவற்றை வழங்கியுள்ளது. இஸ்ரோ, அதன் பங்கிற்கு, S-பேண்ட் SAR தாங்குசுமை, இரண்டு தாங்குசுமைகளுக்கும் இடமளிக்கும் விண்கலம், GSLV-F16 ஏவுதள வாகனம் மற்றும் அனைத்து தொடர்புடைய ஏவுதள சேவைகளையும் வழங்கியுள்ளது. இந்த செயற்கைக்கோள் 2,392 கிலோ எடை கொண்டது மற்றும் சூரிய-ஒத்திசைவான சுற்றுப்பாதையில் நிலைநிறுத்தப்படும், இது ஒவ்வொரு 12 நாட்களுக்கும் முழு பூமியின் நிலம் மற்றும் பனி மேற்பரப்புகளின் தொடர்ச்சியான படங்களை வழங்குகிறது.

பயன்பாட்டுக் கண்ணோட்டத்தில், NISAR இன் திறன்கள் பாரம்பரிய பூமி கண்காணிப்புக்கு அப்பாற்பட்டவை என்பதை டாக்டர் ஜிதேந்திர சிங் எடுத்துரைத்தார். "இது சுற்றுச்சூழல் அமைப்பு இடையூறுகளைத் தொடர்ந்து கண்காணிக்க அனுமதிக்கும் மற்றும் பூகம்பங்கள், சுனாமிகள், எரிமலை வெடிப்புகள் மற்றும் நிலச்சரிவுகள் போன்ற இயற்கை ஆபத்துகளை மதிப்பிட உதவும். இது பூமியின் மேலோடு மற்றும் மேற்பரப்பு இயக்கத்தில் ஏற்படும் நுட்பமான மாற்றங்களைக் கூட கண்காணிக்கும். முக்கியமாக, கடல் பனி வகைப்பாடு, கப்பல் கண்டறிதல், கரையோர கண்காணிப்பு, புயல் கண்காணிப்பு, பயிர் நில வரைபடம் மற்றும் மண்ணின் ஈரப்பதத்தில் ஏற்படும் மாற்றங்கள் ஆகியவற்றிற்கும் செயற்கைக்கோளின் தரவு பயன்படுத்தப்படும் - இவை அனைத்தும் அரசாங்கங்கள், ஆராய்ச்சியாளர்கள் மற்றும் பேரிடர் மேலாண்மை நிறுவனங்களுக்கு இன்றியமையாதவை," என்று அவர் கூறினார்.

NISAR ஆல் உருவாக்கப்படும் அனைத்து தரவுகளும் கண்காணிப்பின் முதல் இரண்டு நாட்களுக்குள் சுதந்திரமாக அணுகக்கூடியதாக மாற்றப்படும், அவசரநிலைகள் ஏற்பட்டால் கிட்டத்தட்ட நிகழ்நேரத்தில் தகவல்கள் உடனடியாக பகிரப்படும். மேலும் தரவுகளின் இந்த பரவலாக்கல் இது போன்ற திறன்களை அணுக முடியாத வளரும் நாடுகளுக்கு உதவும் வகையில் உலகளாவிய அறிவியல் ஆராய்ச்சி மற்றும் பேரிடர் தருணங்களில் விரைந்து முடிவெடுப்பதை ஆதரிக்கும் என்று எதிர்பார்க்கப்படுகிறது.

ஜூலை 30 ஆம் தேதிக்கான கவுண்டவுன் தொடங்கும் வேளையில், பிரதமர் மோடியின் வழிகாட்டுதலின் கீழ் இந்தியாவின் விண்வெளித் திட்டம் பாரம்பரிய பயன்பாடு சார்ந்த முறைகளிலிருந்து உலகளாவிய பொது மக்களுக்கு பயன்படும் பங்களிப்பாளராக நாட்டை நிலைநிறுத்தும் பணிகளுக்கு சீராக மாறி வருவதாக டாக்டர் ஜிதேந்திர சிங் மீண்டும் வலியுறுத்தினார். "NISAR என்பது வெறும் செயற்கைக்கோள் அல்ல; இது உலகத்துடனான இந்தியாவின் அறிவியல் ஒத்துழைப்பு" என்று அவர் கூறினார்.

***

(Release ID: 2149078)

AD/SM/RJ