ঙসি জুলাই ১৭,২০২৫ দা ন্যু দিল্লিদা হাওসিং অমসুং অর্বান এফেয়ার্স মিনিষ্ট্রিনা শীন্দুনা পাংথোকপা থৌরম অমদা ভারতকী রাষ্ট্রপতি শ্রীমতি দ্রৌপতি মুর্মুনা শ্বছ্চ সরভেক্ষন এৱার্দশিং য়েন্থোকখ্রে।

থৌরম অদুদা মীয়ামদা ৱা ঙাংবদা, রাষ্ট্রপতি শ্রীমতি দ্রৌপতি মুর্মুনা হায়খি মদুদি লু-নান্নবা ঐখোয়গী সহরশিংনা পায়খৎলিবা থবকশিং য়েংশিন্নবা অমসুং পুক্নিং থৌগৎনবা শ্বছ্চ সরভেক্ষন অসি মাইপাক্লবা চাংয়েং অমা ওইরে। তোঙান তোঙানবা মরী লৈনবশিং, রাজ্য সরকারশিং, অর্বান বোদিশিং অমসুং মীয়াম করোর ১৪ রোম্না শরুক য়াদুনা ২০২৪ দা মালেমদা খ্বাইদগী চাউবা লু-নানবগী সর্ভে হাওসিং অমসুং অর্বান এফেয়ার্স মিনিষ্ট্রিনা পাংথোকখ্রে।

রাষ্ট্রপতিনা হায়খি ঐখোয়গী চৎনবী অমসুং অধ্যাতিক্কী ৱাখল্লোন্না থায়না মমাংঙৈদগী হৌনা লু-নানবগী থবকশিং পাংথোক্তুনা লাক্লি। ঐখোয়গী য়ুমশিং, লাইশঙশিং অমসুং অকোয়বশিং লু-নান্না থম্বা অসি ঐখোয়গী পুন্সি মহিংগী তৎন থানবা য়াদ্রবা শরুক অমনি। জাতিগী মপা মহাত্মা গান্ধীনা হায়খি “ লু-নানবা অসি ঈশ্বরগী থবকশিংগী হেক মথংদা লৈ”। লাইনিং, অধ্যাতিক অমসুং মীয়ামগী পুন্সিদা লু-নানবা অসি য়াম্না মরুওই হায়না মহাক্না খনখি। রাষ্ট্রপতিনা হায়খি লু-নানবগা মরী লৈনবা থবক শুদুনা মহাক্না মীয়ামগী থবক তৌবা মহাক্কী খোঙচৎ হৌরকখি। নোতিফাইদ এরিয়া কাউন্সিলগী উপ রাষ্ট্রপতি ওইনা মহাক্না নুমিৎ খুদিংগী ৱার্দশিংদা চৎখি অমসুং লু-নানবগী পায়খৎলিবা থবকশিং য়েংশিনখি।

রাষ্ট্রপতিনা হায়খি দরকার ওইবা পোৎলমশিং খক শীজিন্নবা অমসুং থবক অদুগী নত্ত্রগা অতোপ্পা থবকশিংগিদমক পোৎলমশিং অদু অমুক হন্না শীজিন্নদুনা অমোৎপা পুথোকপা হন্থহনবা অসি মতম পুম্নমক্ত ঐখোয়গী পুন্সি মহিংগী শরুক অমা ওইদুনা লাক্লি। খুদম ওইনা, ত্রাইবেলশিংগী মমাংঙৈগী পুন্সি মহিং অসি য়াম্না চম্মী। মখোয়না দরকার ওইবা পোৎলমশিং খজিক্ত শীজিন্নৈ অমসুং নোংজু-নুংশা অমসুং মহৌশাগী অকোয়বা ফিবমগা নুংশিন্না হিংমিন্নৈ অমসুং অতোপ্পা ফুরুপকী মীওইশিংগা হিংমিন্নৈ। মখোয়না মহৌশাদা ফংবা পোৎলমশিং মাংহন্দে। অসিগুম্বা লমচৎ-শাজৎশিং অমসুং চৎনবীশিং ইন্দুনা অমোৎপা লোইশিনবগী অনৌবা থবকশিং ফগৎহনগদবনি।

রাষ্ট্রপতিনা হায়খি অমোৎ-অকায় লোইশিন্নবা থবকশিংদা খ্বাইদগী অহানবা অমসুং মরুওইবা অসি থবক অসি অমোৎপশিং হৌরকফমদা খন্দোকপা অসিনি। মরী লৈনবশিং অমসুং য়ুমথোং খুদিংমক্না মসিগী থবক অসিদা পুক্নিং য়াম্না চঙগদবনি। অমোৎ অমতা লৈতবা লৈকায়শিং অসি অফবা খুদমশিংনি। পুন্সিগী গুন অমা ওইনা মহৈরোয়শিং লু-নান্না হিংনবা পান্দম অমগা লোয়ননা স্কুলগী থাক্ত য়েংশিনবগী থবক পায়খৎলকপা অসি থাগৎনিঙাইনি। মসিনা কান্নবা কয়া পীগনি।

রাষ্ট্রপতিনা হায়খি প্লাস্তিক অমসুং ইলেক্ত্রোনিক অমোৎ-অকায়শিং লোইশিনবা অমসুং পোল্লুসন মাঙজৌননা ঙাকথোকপা অসি অচৌবা শিংনবা অমনি। থবকশিং ফজনা পায়খৎতুনা, ঐখৌয়না লৈবাক অসিদা প্লাস্তিক্না মৈখু থোকহনবা শিংথাবা য়ানা হন্থহনবা ঙমগনি। ২০২২ দা কেন্দ্র সরকারনা অমুক্তং শীজিন্নবা প্লাস্তিক্কী পোৎলম খর শীজিন্নবা থিংখ্রে। চৎন-কাংলোনশিং মপুংফানা ঙাকপা হায়বসি পোৎথোক পুথোক্লিবশিং, ব্রান্দ মপুশিং অমসুং মপান লৈবাকশিংদগী পুশিল্লক্লিবশিং য়াওনা মরী লৈনবা খুদিংমক্কী থৌদাংনি।

রাষ্ট্রপতিনা হায়খি লু-নানবগা মরী লৈনবা থবকশিং অসি শেন-থুম, চৎনবীশিং অমসুং লম্মিৎ-তুমিৎকা মরী লৈনৈ। মপুংফানা কৎথোকপগা লোয়ননা মীওই খুদিংমক্না শ্বাছ্চ ভারত মিসন শরুক য়াগদবনি। অফবা ৱাখল খনবা অমসুং অচেৎপা ৱাশকশিংনা ২০৪৭ দা চাউখৎলবা ভারত অমা ওইদুনা মালেমদা খ্বাইদগী লু-নানবা লৈবাকশিংগী মনুংদা অমা ওইগনি।

***