প্রধান মন্ত্রী শ্রী নরেন্দ্র মোদীনা লুচিংবা কেন্দ্রগী মন্ত্রীমন্দলনা ঙসি 2025-26তগী হৌরগা চহি তরুক্কী ওইনা জিলা 100 কভর তৌনবা 'প্রধান মন্ত্রী ধন-ধান্য কৃশি য়োজনা'গী অয়াবা পীখ্রে। প্রধান মন্ত্রী ধন-ধান্য কৃশি য়োজনা অসি নিতি আয়োগকী এস্পিরেস্নেল দিস্ত্রিক্ত প্রোগ্রামদগী ইথিল লৌরি অমসুং মসি লৌউ-শিংউ অমসুং মসিগা মরী লৈনবা সেক্তরশিংদা অখন্ননা মীৎয়েং থম্লিবা মখল অসিগী অহানবা অমনি।

স্কিম অসিনা লৌউ-শিংউগী পোত্থোক হেনগৎহনবা, ক্রোপ দাইভর্সিফিকেসন অমসুং তুং কোইনা চৎনবা য়াবা লৌউ-শিংউগী পথাপশিং শীজিন্নবা হেনগৎহনবা, পঞ্চায়ত অমসুং ব্লোক থাক্তা লৌরোক মতুংদা থম্ফম হেনগৎহনবা, ইরিগেসনগী খুদোংচাবশিং ফগৎহনবা অমসুং অশাংবা মতমগী অমসুং অতেনবা মতমগী ক্রেদিৎ ফংহনবদা মতেং পাংনবা পান্দম থম্লি। 2025-26 কীদমক বজেৎ লাউথোকখিবগী মতুং ইন্না “প্রধান মন্ত্রী ধন-ধান্য কৃশি য়োজনা”গী মখাদা জিলা 100 চাউখৎহন্নবা থবক পায়খৎকনি। স্কিম অসি দিপার্তমেন্ত 11, অতোপ্পা স্তেত স্কিমশিং অমসুং প্রাইবেৎ সেক্তরগা লোয়ননা লোকেল পার্তনরশিপকী খুত্থাংদা হৌজিক লৈরিবা স্কিম 36 পুনশিন্নদুনা পায়খৎকনি।

পোত্থোক পুথোকপা হন্থবা, মহৈ-মরোং থাবগী চাং হন্থবা অমসুং ক্রেদিৎ দিসবর্সমেন্তগী চাং হন্থবগী মরুওইবা ইন্দিকেতর অহুমদা য়ুম্ফম ওইদুনা জিলা 100 মশক খঙদোক্কনি। রাজ্য/UT অমমমদা লৈরিবা দিস্ত্রিক্তশিংগী মশিং অসি নেৎ ক্রোপ এরিয়া অমসুং ওপরেস্নেল হোল্দিংগী শরুক্কী মতুং ইন্না ওইগনি। অদুম ওইনমক, রাজ্য খুদিংমক্তগী য়ামদ্রবদা জিলা অমা খনগনি।

স্কিম অসিগী ইফেক্তিব ওইবা প্লানিং, ইমপ্লিমেন্ত অমসুং মোনিতরিংগীদমক জিলা, রাজ্য অমসুং জাতিগী থাক্তা কম্মিতীশিং শেমগনি। দিস্ত্রিক্ত ধান ধান্য সমিতীনা দিস্ত্রিক্ত এগ্রিকলচর অমসুং মরী লৈনবা থবক থৌরমশিংগী প্লান লেপথোক্কনি, মসিগী মেম্বরশিংসু প্রোগ্রেসিভ ফার্মরশিং ওইগনি। দিস্ত্রিক্ত প্লানশিং অসি ক্রোপ দাইভর্সিফিকেসন, ঈশিং অমসুং লৈহাওগী হকশেল ঙাক-শেনবা, লৌউ-শিংউ অমসুং মসিগা মরী লৈনবা সেক্তরশিংদা মশা-মরোমদোম লেপচবা ঙম্নবা অমসুং নেচরেল অমসুং ওর্গানিক ফার্মিং পাকথোক-চাওথোকহন্নবা জাতিগী থাক্কী পান্দমশিং অসিগা মান্ননা শেমগনি। ধন-ধান্য জিলা খুদিংমক্তা স্কিম অসিগী প্রোগ্রেস অসি থা খুদিংগী দেশবোর্দ অমগী খুত্থাংদা মরুওইবা পর্ফোমেন্স ইন্দিকেতর 117দা মোনিতর তৌগনি। নিতিনা দিস্ত্রিক্ত প্লানশিংসু রিভিয়ু তৌগনি অমসুং লমজিংগনি। মসিগী মথক্তা জিলা খুদিংমক্তা খনগৎলবা সেন্ত্রেল নোদেল ওফিসরশিংনা স্কিম অসি চাং নাইনা য়েংশিনগনি।

হায়রিবা জিলা 100 অসিদা পান্দম থম্লিবা ফলশিং অসি ফগৎলকপগা লোয়ননা লৈবাক অসিগী মরুওইবা পর্ফোমেন্স ইন্দিকেতরশিংগী চাংচৎ অসিসু হেনগৎলক্লগনি। স্কিম অসিনা পোত্থোক পুথোকপা হেনগৎহনগনি, লৌউ-শিংউ অমসুং মসিগা মরী লৈনবা সেক্তরদা ভেল্যু এদিসন, লোকেল লাইবলিহুদ শেমগৎকনি অমসুং মসিনা দোমেস্তিক প্রদক্সন হেনগৎহল্লগনি অমসুং আত্মনির্ভর ভারত ফংহল্লগনি। হায়রিবা জিলা 100 অসিগী ইন্দিকেতরশিং অসি ফগৎলকপগা লোয়ননা, নেস্নেল ইন্দিকেতরশিংসু অপৱার্দ ত্রেজেক্তরী অমা উৎলকপা উবা ফংলগনি।

***