কেন্দ্ৰীয় গৃহ তথা সমবায় মন্ত্ৰী শ্ৰী অমিত শ্বাহৰ সভাপতিত্বত আজি ঝাৰখণ্ডৰ ৰাঁচীত পূৱ মাণ্ডলিক পৰিষদৰ ২৭সংখ্যক বৈঠক অনুষ্ঠিত হয়। সভাত ঝাৰখণ্ডৰ মুখ্যমন্ত্ৰী শ্ৰী হেমন্ত চোৰেন, ওড়িশাৰ মুখ্যমন্ত্ৰী শ্ৰী মোহন চৰণ মাঝি, বিহাৰৰ উপ-মুখ্যমন্ত্ৰী শ্ৰী সম্ৰাট চৌধুৰী আৰু পশ্চিম বংগৰ বিত্তমন্ত্ৰী শ্ৰীমতী চন্দ্ৰিমা ভট্টাচাৰ্যকে ধৰি ৰাজ্যসমূহৰ মুখ্য সচিব আৰু সচিব অন্যান্য উচ্চপদস্থ বিষয়া আৰু কেন্দ্ৰীয় চৰকাৰৰ উচ্চপদস্থ বিষয়া উপস্থিত থাকে। পূব মাণ্ডলিক পৰিষদত বিহাৰ, ঝাৰখণ্ড, ওড়িশা আৰু পশ্চিমবংগ ৰাজ্যক সামৰি লোৱা হৈছে। ভাৰত চৰকাৰৰ গৃহ পৰিক্ৰমা মন্ত্ৰালয়ৰ অধীনস্থ আন্তঃৰাজ্যিক পৰিষদ সচিবালয়ৰ উদ্যোগত ঝাৰখণ্ড চৰকাৰৰ সহযোগত এই বৈঠক অনুষ্ঠিত হয়।

ভাষণত কেন্দ্ৰীয় গৃহ তথা সমবায় মন্ত্ৰী শ্ৰী অমিত শ্বাহে কয় যে অপাৰেচন সিন্দূৰত আমাৰ সেনা বাহিনীয়ে সমগ্ৰ বিশ্বক নিজৰ শৌৰ্য্য, নিখুঁততা আৰু বীৰত্ব অনুভৱ কৰাইছে আৰু তেওঁলোকৰ সাহস আৰু বীৰত্বৰ বাবে পূব মাণ্ডলিক পৰিষদে সৰ্বসন্মতিক্ৰমে বাহিনীসমূহৰ বীৰত্বৰ বাবে ধন্যবাদৰ প্ৰস্তাৱ গৃহীত কৰে। তেওঁ কয় যে প্ৰধানমন্ত্ৰী শ্ৰী নৰেন্দ্ৰ মোদীয়ে প্ৰবল ইচ্ছাশক্তি প্ৰদৰ্শন কৰি ভাৰতৰ সন্ত্ৰাসবাদৰ বিৰুদ্ধে যুঁজ দিয়াৰ দৃঢ় অভিপ্ৰায় সমগ্ৰ বিশ্বৰ আগত দাঙি ধৰিছে।

কেন্দ্ৰীয় গৃহ তথা সমবায় মন্ত্ৰী মন্ত্ৰীয়ে কয় যে ঝাৰখণ্ডৰ ভূমিয়ে দেশৰ স্বাধীনতা সংগ্ৰামত যথেষ্ট অৰিহণা যোগাইছে আৰু ভগৱান বীৰছা মুণ্ডাকে ধৰি বহু মহান স্বাধীনতা সংগ্ৰামীয়ে এই ভূমিৰ পৰাই দেশৰ স্বাধীনতা আন্দোলনৰ নেতৃত্ব দিছে। তেওঁ কয় যে সমগ্ৰ পূব ভাৰত ভক্তি, জ্ঞান, সংগীত, বৈজ্ঞানিক গৱেষণা আৰু বিপ্লৱৰ ভূমি হৈ আহিছে। তেওঁ কয় যে শিক্ষাৰ মৌলিক আদৰ্শ প্ৰতিষ্ঠা কৰাত বিহাৰ আৰু পূব ভাৰতে যথেষ্ট অৰিহণা যোগাইছে। শ্ৰী শ্বাহে কয় যে স্বামী বিবেকানন্দ, বীৰছা মুণ্ডাজী, নেতাজী সুভাষ চন্দ্ৰ বসু, ড° ৰাজেন্দ্ৰ প্ৰসাদ, বাবু জগজীৱন ৰামকে ধৰি বহু মহান ব্যক্তিয়ে এই ভূমিৰ পৰা বহু ক্ষেত্ৰত দেশক নেতৃত্ব দিছে। তেওঁ কয় যে এক প্ৰকাৰে এই ভূমিত সাংস্কৃতিক চেতনা, ভক্তি চেতনা আৰু বিপ্লৱৰ সংগম ঘটিছে।

শ্ৰী অমিত শ্বাহে কয় যে প্ৰধানমন্ত্ৰী শ্ৰী নৰেন্দ্ৰ মোদীয়ে সমবায় যুক্তৰাষ্ট্ৰবাদৰ ভিত্তিত টীম ভাৰতৰ দৃষ্টিভংগী দেশৰ আগত দাঙি ধৰিছে। তেওঁ কয় যে টীম ভাৰতৰ দৃষ্টিভংগীৰ অধীনত আমি সকলোৱে মিলি ২০৪৭ চনৰ ভিতৰত ৰাজ্যৰ উন্নয়নৰ জৰিয়তে ভাৰতৰ উন্নয়নৰ লক্ষ্যত উপনীত হোৱা উচিত আৰু ভাৰতক সম্পূৰ্ণ উন্নত ৰাষ্ট্ৰ হিচাপে গঢ়ি তোলাৰ বাবে আগবাঢ়িব লাগে। তেওঁ কয় যে ২০১৪ চনৰ পৰা ২০২৫ চনলৈকে এই সভাসমূহৰ আয়োজনৰ গতি বৃদ্ধি পাইছে আৰু অধিক উৎপাদনশীল হৈছে।

কেন্দ্ৰীয় গৃহ তথা সমবায় মন্ত্ৰী শ্ৰী অমিত শ্বাহে কয় যে মাণ্ডলিক পৰিষদসমূহক সমবায় যুক্তৰাষ্ট্ৰবাদৰ এক শক্তিশালী ভেটি হিচাপে গঢ়ি তোলাৰ উদ্দেশ্যেৰে কল্পনা কৰা হৈছিল। তেওঁ কয় যে মণ্ডল পৰিষদসমূহ এতিয়া পৰামৰ্শদাতাৰ পৰা এক কাৰ্য্যকৰী মঞ্চত পৰিণত হৈছে আৰু ইয়াৰ জৰিয়তে আমি কেন্দ্ৰ আৰু ৰাজ্যসমূহৰ মাজত আৰু ৰাজ্যসমূহৰ মাজত সমস্যাসমূহ বহু পৰিমাণে সমাধান কৰাত সফল হৈছো। তেওঁ কয় যে মণ্ডল পৰিষদসমূহ এতিয়া আলোচনা মঞ্চৰ পৰিৱৰ্তে সহযোগিতাৰ ইঞ্জিনলৈ পৰিণত হৈছে। শ্ৰী শ্বাহে কয় যে ২০০৪ চনৰ পৰা ২০১৪ চনৰ ভিতৰত মুঠ ২৫খন মাণ্ডলিক পৰিষদৰ সভা অনুষ্ঠিত হৈছিল, আনহাতে ২০১৪ চনৰ পৰা ২০২৫ চনৰ ভিতৰত এই সংখ্যা ৬৩খন হৈছেগৈ, যিটো দুগুণতকৈও অধিক। তেওঁ কয় যে আমি বছৰি গড়ে ২ৰ পৰা ৩খন বৈঠকৰ পৰা বছৰি গড়ে ৬খন সভা অনুষ্ঠিত কৰিবলৈ আগবাঢ়িছো। শ্ৰী শ্বাহে কয় যে এই বৈঠকসমূহত মুঠ ১৫৮০ টা বিষয়ৰ ওপৰত আলোচনা কৰা হৈছিল যাৰ ভিতৰত ১২৮৭ টা অৰ্থাৎ ৮৩ শতাংশ বিষয় সমাধান হৈছে, যিটো আমাৰ সকলোৰে বাবে অতি সন্তুষ্টিৰ বিষয়। তেওঁ কয়, মোদী চৰকাৰৰ মণ্ডল পৰিষদৰ বৈঠকত ৮৩শতাংশ বিষয়ৰ সমাধানে এই বৈঠকসমূহৰ তাৎপৰ্যকে প্ৰতিপন্ন কৰিছে।

আজিৰ বৈঠকত মাছানজোৰ বান্ধ, তৈয়াবপুৰ বান্ধ আৰু ইন্দ্ৰপুৰী জলাশয়ৰ সৈতে জড়িত দীৰ্ঘদিনীয়া জটিল বিষয়সমূহৰ ওপৰত বিতংভাৱে আলোচনা কৰা হয়। ইয়াৰ সমান্তৰালকৈ বিহাৰ আৰু ঝাৰখণ্ড ৰাজ্যৰ মাজত বিহাৰ আৰু ঝাৰখণ্ড ৰাজ্যৰ মাজত বহু ৰাজহুৱা খণ্ডৰ উদ্যোগ (পিএছইউ)ৰ সম্পত্তি আৰু দায়বদ্ধতাৰ বিভাজন সম্পৰ্কীয় বিষয়সমূহো বিতংভাৱে আলোচনা কৰা হয় আৰু ইয়াৰ সমাধানৰ দিশত পাৰস্পৰিক সন্মতিৰে নিৰ্ণায়ক পদক্ষেপ গ্ৰহণ কৰা হয়।

কেন্দ্ৰীয় গৃহ তথা সমবায় মন্ত্ৰীয়ে কয় যে পূবৰ ৰাজ্যসমূহে তিনিখন নতুন অপৰাধমূলক আইন আগতীয়াকৈ কাৰ্যকৰী কৰাৰ দিশত অধিক প্ৰচেষ্টা চলাব লাগে। তেওঁ কয় যে এই ৰাজ্যসমূহত নিচাযুক্ত দ্ৰব্যৰ বিষয়তো অধিক কাম কৰাৰ প্ৰয়োজন আছে, যাৰ বাবে জিলা পৰ্যায়ৰ এনচিঅ’ ডিৰ বৈঠক নিয়মীয়াকৈ অনুষ্ঠিত হ’ব লাগে। শ্ৰী শ্বাহে লগতে কয় যে পূব অঞ্চলৰ চাৰিখন ৰাজ্যই দক্ষতা প্ৰশিক্ষণৰ ক্ষেত্ৰত পৰম্পৰাগত আৰু গাঁথনিগত কাঠামোৰ বাহিৰলৈ গৈ প্ৰয়োজন অনুসৰি পাঠ্যক্ৰম প্ৰস্তুত কৰিব লাগে।

শ্ৰী অমিত শ্বাহে কয় যে সকলো ৰাজ্যৰ ঐক্য আৰু নিৰাপত্তা বাহিনীৰ বীৰত্বৰ বাবে আমি নক্সালবাদৰ বিৰুদ্ধে অভূতপূৰ্ব সফলতা লাভ কৰিছো, ২০২৬ চনৰ ৩১ মাৰ্চৰ ভিতৰত আমি দেশখনক নক্সালবাদৰ পৰা মুক্ত কৰিম।

পূৱ মণ্ডল পৰিষদৰ ২৭সংখ্যক বৈঠকত ৰাষ্ট্ৰীয় গুৰুত্বপূৰ্ণ বিষয়সমূহৰ ওপৰতো আলোচনা কৰা হয়। ইয়াৰ ভিতৰত মহিলা আৰু শিশুৰ বিৰুদ্ধে ধৰ্ষণৰ গোচৰৰ ক্ষিপ্ৰ বিচাৰ আৰু ক্ষিপ্ৰ নিষ্পত্তিৰ বাবে ফাষ্ট ট্ৰেক বিশেষ আদালত (এফটিএছচি) ৰূপায়ণ, প্ৰতিখন গাঁৱৰ নিৰ্দিষ্ট ব্যাসাৰ্ধৰ ভিতৰত ব্ৰিক এণ্ড মৰ্টাৰ বেংকিং সুবিধা, জৰুৰীকালীন সঁহাৰি সহায়ক ব্যৱস্থা (ইআৰএছএছ-১১২) ৰূপায়ণ আৰু আঞ্চলিক পৰ্যায়ত পুষ্টি, শিক্ষা, স্বাস্থ্য, শক্তি, পৰিকল্পনা আৰু সমবায় ব্যৱস্থা শক্তিশালী কৰাকে ধৰি বিভিন্ন উমৈহতীয়া স্বাৰ্থৰ বিষয় আছে।

ৰাজ্য পুনৰ গঠন আইন, ১৯৫৬ৰ ১৫ৰ পৰা ২২ ধাৰা অনুসৰি পাঁচখন মাণ্ডলিক পৰিষদ গঠন কৰা হৈছিল। কেন্দ্ৰীয় গৃহমন্ত্ৰী পাঁচখন মাণ্ডলিক পৰিষদৰ অধ্যক্ষ আৰু সদস্য ৰাজ্য/কেন্দ্ৰীয় শাসিত অঞ্চলৰ মুখ্যমন্ত্ৰী/লেফটেনেণ্ট গৱৰ্ণৰ/প্ৰশাসক ইয়াৰ সদস্য, যাৰ সদস্য ৰাজ্যৰ পৰা এখন ৰাজ্যৰ মুখ্যমন্ত্ৰীক উপাধ্যক্ষ হিচাপে প্ৰতি বছৰে সালসলনি কৰা হয়। প্ৰতিখন সদস্য ৰাজ্যসমূহৰ পৰা দুজন মন্ত্ৰীক ৰাজ্যপালে পৰিষদৰ সদস্য হিচাপে মনোনীত কৰে। প্ৰতিখন মাণ্ডলিক পৰিষদে মুখ্য সচিব পৰ্যায়তো এখন স্থায়ী সমিতি গঠন কৰিছে। ৰাজ্যসমূহে প্ৰস্তাৱ কৰা বিষয়সমূহ প্ৰথমে নিজ নিজ মাণ্ডলিক পৰিষদৰ স্থায়ী সমিতিৰ সন্মুখত আলোচনাৰ বাবে ৰখা হয়। স্থায়ী সমিতিত বিবেচনা কৰাৰ পিছত বাকী থকা বিষয়সমূহ মাণ্ডলিক পৰিষদৰ বৈঠকত বিবেচনাৰ বাবে ৰখা হয়।

*****

RK/VV/PR/PS/DB