ಬ್ರಿಕ್ಸ್ ರಾಷ್ಟ್ರಗಳ ನಾಯಕರಾದ ನಾವು, "ಹೆಚ್ಚು ಸಮಗ್ರ ಹಾಗೂ ಸುಸ್ಥಿರ ಆಡಳಿತಕ್ಕಾಗಿ ಗ್ಲೋಬಲ್ ಸೌತ್ ಸಹಕಾರವನ್ನು ಬಲಪಡಿಸುವುದು" ಎಂಬ ಧ್ಯೇಯವಾಕ್ಯದ ಅಡಿಯಲ್ಲಿ, ಜುಲೈ 6 ರಿಂದ 7, 2025 ರವರೆಗೆ ಬ್ರೆಜಿಲ್‌ನ ರಿಯೊ ಡಿ ಜನೈರೊದಲ್ಲಿ ನಡೆದ 17ನೇ ಬ್ರಿಕ್ಸ್ ಶೃಂಗಸಭೆಯಲ್ಲಿ ಸಭೆ ಸೇರಿದ್ದೇವೆ.

ಪರಸ್ಪರ ಗೌರವ ಮತ್ತು ತಿಳುವಳಿಕೆ, ಸಾರ್ವಭೌಮ ಸಮಾನತೆ, ಒಗ್ಗಟ್ಟು, ಪ್ರಜಾಪ್ರಭುತ್ವ, ಮುಕ್ತತೆ, ಎಲ್ಲರನ್ನೂ ಒಳಗೊಳ್ಳುವಿಕೆ, ಸಹಯೋಗ ಮತ್ತು ಒಮ್ಮತ ಎಂಬ ಬ್ರಿಕ್ಸ್‌ ನ ಮೂಲಭೂತ ತತ್ವಗಳಿಗೆ ನಮ್ಮ ಬದ್ಧತೆಯನ್ನು ನಾವು ಪುನರುಚ್ಚರಿಸುತ್ತೇವೆ. 17 ವರ್ಷಗಳ ಶೃಂಗಸಭೆಗಳ ಯಶಸ್ಸಿನ ಆಧಾರದ ಮೇಲೆ ಮುನ್ನಡೆಯುತ್ತಾ, ವಿಸ್ತರಿತ ಬ್ರಿಕ್ಸ್ ಚೌಕಟ್ಟಿನಲ್ಲಿ 'ರಾಜಕೀಯ ಮತ್ತು ಭದ್ರತೆ', 'ಆರ್ಥಿಕ ಮತ್ತು ಹಣಕಾಸು', ಹಾಗೂ 'ಸಾಂಸ್ಕೃತಿಕ ಮತ್ತು ಜನ-ಜನರ ನಡುವಿನ ಸಹಕಾರ' ಎಂಬ ತ್ರಿವಿಧ ಸ್ತಂಭಗಳ ಅಡಿಯಲ್ಲಿ ಸಹಕಾರವನ್ನು ಬಲಪಡಿಸಲು ನಾವು ಮತ್ತಷ್ಟು ಬದ್ಧರಾಗಿದ್ದೇವೆ. ಇದರೊಂದಿಗೆ, ಶಾಂತಿ, ಹೆಚ್ಚು ಪ್ರಾತಿನಿಧಿಕ ಹಾಗೂ ನ್ಯಾಯಸಮ್ಮತ ಅಂತಾರಾಷ್ಟ್ರೀಯ ವ್ಯವಸ್ಥೆ, ಪುನಶ್ಚೇತನಗೊಂಡ ಮತ್ತು ಸುಧಾರಿತ ಬಹುಪಕ್ಷೀಯತೆ, ಸುಸ್ಥಿರ ಅಭಿವೃದ್ಧಿ ಮತ್ತು ಸಮಗ್ರ ಬೆಳವಣಿಗೆಯನ್ನು ಉತ್ತೇಜಿಸುವ ಮೂಲಕ ನಮ್ಮ ಜನರ ಒಳಿತಿಗಾಗಿ ನಮ್ಮ ವ್ಯೂಹಾತ್ಮಕ ಪಾಲುದಾರಿಕೆಯನ್ನು ವೃದ್ಧಿಸಲೂ ನಾವು ಬದ್ಧರಾಗಿದ್ದೇವೆ.

ಬ್ರಿಕ್ಸ್‌ ನ ನೂತನ ಸದಸ್ಯ ರಾಷ್ಟ್ರವಾಗಿ ಇಂಡೋನೇಷ್ಯಾ ಗಣರಾಜ್ಯವನ್ನು ನಾವು ಸ್ವಾಗತಿಸುತ್ತೇವೆ. ಇದರೊಂದಿಗೆ, ಬೆಲಾರಸ್ ಗಣರಾಜ್ಯ, ಬೊಲಿವಿಯಾದ ಬಹುರಾಷ್ಟ್ರೀಯ ರಾಜ್ಯ, ಕಝಕಿಸ್ತಾನ್ ಗಣರಾಜ್ಯ, ಕ್ಯೂಬಾ ಗಣರಾಜ್ಯ, ನೈಜೀರಿಯಾದ ಫೆಡರಲ್ ಗಣರಾಜ್ಯ, ಮಲೇಷ್ಯಾ, ಥೈಲ್ಯಾಂಡ್ ಸಾಮ್ರಾಜ್ಯ, ವಿಯೆಟ್ನಾಂ ಸಮಾಜವಾದಿ ಗಣರಾಜ್ಯ, ಉಗಾಂಡಾ ಗಣರಾಜ್ಯ, ಮತ್ತು ಉಜ್ಬೇಕಿಸ್ತಾನ್ ಗಣರಾಜ್ಯಗಳನ್ನು ಬ್ರಿಕ್ಸ್‌ ನ ಪಾಲುದಾರ ರಾಷ್ಟ್ರಗಳಾಗಿ ಹೃತ್ಪೂರ್ವಕವಾಗಿ ಸ್ವಾಗತಿಸುತ್ತೇವೆ.

'ಹವಾಮಾನ ಹಣಕಾಸು ಕುರಿತ ಬ್ರಿಕ್ಸ್ ನಾಯಕರ ಚೌಕಟ್ಟು ಘೋಷಣೆ' ಮತ್ತು 'ಕೃತಕ ಬುದ್ಧಿಮತ್ತೆಯ (AI) ಜಾಗತಿಕ ಆಡಳಿತ ಕುರಿತ ಬ್ರಿಕ್ಸ್ ನಾಯಕರ ಹೇಳಿಕೆ'ಯ ಅಂಗೀಕಾರದ ಮಹತ್ವವನ್ನು ನಾವು ಒತ್ತಿ ಹೇಳುತ್ತೇವೆ. ಇದರೊಂದಿಗೆ, 'ಸಾಮಾಜಿಕವಾಗಿ ನಿರ್ಧರಿಸಲ್ಪಟ್ಟ ರೋಗಗಳ ನಿರ್ಮೂಲನೆಗಾಗಿ ಬ್ರಿಕ್ಸ್ ಪಾಲುದಾರಿಕೆ'ಯ ಪ್ರಾರಂಭವನ್ನೂ ನಾವು ಅನುಮೋದಿಸುತ್ತೇವೆ. ಈ ಉಪಕ್ರಮಗಳು, ಸಮಕಾಲೀನ ಜಾಗತಿಕ ಸಮಸ್ಯೆಗಳಿಗೆ ಸಮಗ್ರ  ಮತ್ತು ಸುಸ್ಥಿರ ಪರಿಹಾರಗಳನ್ನು ರೂಪಿಸುವ ನಮ್ಮ ಜಂಟಿ ಪ್ರಯತ್ನಗಳನ್ನು ಪ್ರತಿಬಿಂಬಿಸುತ್ತವೆ.

ಬಹುಪಕ್ಷೀಯತೆಯ ಬಲವರ್ಧನೆ ಹಾಗೂ ಜಾಗತಿಕ ಆಡಳಿತದ ಸುಧಾರಣೆ

ಜಾಗತಿಕ ಆಡಳಿತವನ್ನು ಸುಧಾರಿಸಿ, ಉತ್ತಮಪಡಿಸುವ ನಮ್ಮ ಬದ್ಧತೆಯನ್ನು ನಾವು ಪುನಃ ದೃಢೀಕರಿಸುತ್ತೇವೆ. ವಿಸ್ತೃತ ಸಮಾಲೋಚನೆ, ಜಂಟಿ ಕೊಡುಗೆ ಹಾಗೂ ಹಂಚಿಕೆಯ ಪ್ರಯೋಜನಗಳ ಸ್ಪೂರ್ತಿಯನ್ನು ಆಧರಿಸಿ; ಹೆಚ್ಚು ನ್ಯಾಯಪರ, ಸಮಾನ, ಚುರುಕಾದ, ಪರಿಣಾಮಕಾರಿ, ದಕ್ಷ, ಸ್ಪಂದನಾಶೀಲ, ಪ್ರಾತಿನಿಧಿಕ, ನ್ಯಾಯಸಮ್ಮತ, ಪ್ರಜಾಸತ್ತಾತ್ಮಕ ಹಾಗೂ ಜವಾಬ್ದಾರಿಯುತವಾದ ಅಂತಾರಾಷ್ಟ್ರೀಯ ಬಹುಪಕ್ಷೀಯ ವ್ಯವಸ್ಥೆಯನ್ನು ರೂಪಿಸುವುದು ನಮ್ಮ ಗುರಿಯಾಗಿದೆ. ಈ ಹಿನ್ನೆಲೆಯಲ್ಲಿ, 'ಭವಿಷ್ಯದ ಶೃಂಗಸಭೆ'ಯಲ್ಲಿ 'ಜಾಗತಿಕ ಡಿಜಿಟಲ್ ಒಪ್ಪಂದ' ಮತ್ತು 'ಭವಿಷ್ಯದ ಪೀಳಿಗೆಯ ಘೋಷಣೆ' ಎಂಬ ಎರಡು ಅನುಬಂಧಗಳೊಂದಿಗೆ 'ಭವಿಷ್ಯದ ಒಪ್ಪಂದ'ವನ್ನು ಅಂಗೀಕರಿಸಿರುವುದನ್ನು ನಾವು ಸ್ವಾಗತಾರ್ಹವೆಂದು ಪರಿಗಣಿಸುತ್ತೇವೆ. ಸಮಕಾಲೀನ ವಾಸ್ತವಗಳಿಗೆ ಅನುಗುಣವಾಗಿ ಪ್ರಸ್ತುತ ಅಂತಾರಾಷ್ಟ್ರೀಯ ಸಂಬಂಧಗಳ ಸ್ವರೂಪವನ್ನು ಮಾರ್ಪಡಿಸುವ ಅಗತ್ಯವನ್ನು ನಾವು ಬಲವಾಗಿ ಪ್ರತಿಪಾದಿಸುತ್ತೇವೆ. ವಿಶ್ವಸಂಸ್ಥೆಯ ಚಾರ್ಟರ್‌ ನಲ್ಲಿ ಪ್ರತಿಪಾದಿಸಲಾದ ಉದ್ದೇಶಗಳು ಮತ್ತು ತತ್ವಗಳೇ ಅಂತಾರಾಷ್ಟ್ರೀಯ ಕಾನೂನಿನ  ಅನಿವಾರ್ಯ ಆಧಾರಸ್ತಂಭ.  ಇವುಗಳನ್ನು ಅವುಗಳ ಸಮಗ್ರತೆ ಹಾಗೂ ಅಂತರ್-ಸಂಪರ್ಕದಲ್ಲಿ ಎತ್ತಿಹಿಡಿಯುವ ಮೂಲಕ ಬಹುಪಕ್ಷೀಯತೆಯನ್ನು ರಕ್ಷಿಸಲು ನಾವು ಬದ್ಧರಾಗಿದ್ದೇವೆ. ಸಾರ್ವಭೌಮ ರಾಷ್ಟ್ರಗಳು ಶಾಂತಿ-ಭದ್ರತೆಯನ್ನು ಕಾಪಾಡಲು, ಸುಸ್ಥಿರ ಅಭಿವೃದ್ಧಿಯನ್ನು ಸಾಧಿಸಲು, ಮತ್ತು ಪ್ರಜಾಪ್ರಭುತ್ವ, ಮಾನವ ಹಕ್ಕುಗಳು ಹಾಗೂ ಮೂಲಭೂತ ಸ್ವಾತಂತ್ರ್ಯಗಳನ್ನು ರಕ್ಷಿಸಲು ಸಹಕರಿಸುವ ಕೇಂದ್ರ ಶಕ್ತಿಯಾಗಿ ವಿಶ್ವಸಂಸ್ಥೆಯ ಪಾತ್ರವನ್ನು ನಾವು ಗೌರವಿಸುತ್ತೇವೆ. ಜಾಗತಿಕ ನಿರ್ಧಾರ ಕೈಗೊಳ್ಳುವ ಪ್ರಕ್ರಿಯೆಗಳಲ್ಲಿ ಮತ್ತು ಸಂರಚನೆಗಳಲ್ಲಿ, ಉದಯೋನ್ಮುಖ ಮತ್ತು ಅಭಿವೃದ್ಧಿಶೀಲ ರಾಷ್ಟ್ರಗಳು (EMDCs), ಅದರಲ್ಲೂ ವಿಶೇಷವಾಗಿ ಆಫ್ರಿಕಾ, ಲ್ಯಾಟಿನ್ ಅಮೇರಿಕಾ ಮತ್ತು ಕೆರಿಬಿಯನ್ ‌ನ ಕನಿಷ್ಠ ಅಭಿವೃದ್ಧಿ ಹೊಂದಿದ ರಾಷ್ಟ್ರಗಳ (LDCs) ಪಾತ್ರವನ್ನು ಗಣನೀಯವಾಗಿ ಹೆಚ್ಚಿಸಬೇಕು ಹಾಗೂ ಅವರಿಗೆ ಅರ್ಥಪೂರ್ಣ ಪ್ರಾತಿನಿಧ್ಯವನ್ನು ನೀಡಬೇಕು. ಈ ಸಂಸ್ಥೆಗಳನ್ನು ಸಮಕಾಲೀನ ವಾಸ್ತವಗಳಿಗೆ ಹೆಚ್ಚು ಸ್ಪಂದಿಸುವಂತೆ ಮಾಡುವುದು ನಮ್ಮ ಆಶಯವಾಗಿದೆ. ಇದಲ್ಲದೆ, ವಿಶ್ವಸಂಸ್ಥೆಯ ಸಚಿವಾಲಯ ಸೇರಿದಂತೆ ಅಂತಾರಾಷ್ಟ್ರೀಯ ಸಂಘಟನೆಗಳಲ್ಲಿ ಭೌಗೋಳಿಕ ಪ್ರಾತಿನಿಧ್ಯದಲ್ಲಿನ ಅಸಮಾನತೆಯನ್ನು ಸಕಾಲಿಕವಾಗಿ ನಿವಾರಿಸಬೇಕು ಮತ್ತು ಎಲ್ಲಾ ಸ್ತರದ ನಾಯಕತ್ವದಲ್ಲಿ, ವಿಶೇಷವಾಗಿ ಉದಯೋನ್ಮುಖ ರಾಷ್ಟ್ರಗಳ ಮಹಿಳೆಯರ ಸಂಖ್ಯೆ ಮತ್ತು ಪ್ರಭಾವವನ್ನು ಹೆಚ್ಚಿಸಬೇಕೆಂದು ನಾವು ಬಲವಾಗಿ ಆಗ್ರಹಿಸುತ್ತೇವೆ. ವಿಶ್ವಸಂಸ್ಥೆಯ ಉನ್ನತ ಹುದ್ದೆಗಳಿಗೆ ಮುಖ್ಯಸ್ಥರ ಆಯ್ಕೆ ಮತ್ತು ನೇಮಕಾತಿಯು ಸಂಪೂರ್ಣ ಪಾರದರ್ಶಕವಾಗಿರಬೇಕು ಮತ್ತು ಎಲ್ಲರನ್ನೂ ಒಳಗೊಳ್ಳುವ ತತ್ವವನ್ನು ಆಧರಿಸಿರಬೇಕು. ಈ ಪ್ರಕ್ರಿಯೆಯು ವಿಶ್ವಸಂಸ್ಥೆಯ ಚಾರ್ಟರ್ ‌ನ 101ನೇ ವಿಧಿಯ ನಿಬಂಧನೆಗಳನ್ನು ಚಾಚೂತಪ್ಪದೆ ಪಾಲಿಸಬೇಕು. ನೇಮಕಾತಿಯಲ್ಲಿ, ವಿಸ್ತೃತ ಭೌಗೋಳಿಕ ಪ್ರಾತಿನಿಧ್ಯ ಹಾಗೂ ಮಹಿಳೆಯರ ಭಾಗವಹಿಸುವಿಕೆಗೆ ವಿಶೇಷ ಆದ್ಯತೆ ನೀಡಲೇಬೇಕು. ಅಂತಿಮವಾಗಿ, ವಿಶ್ವಸಂಸ್ಥೆಯ ಯಾವುದೇ ಹಿರಿಯ ಹುದ್ದೆಯು ಯಾವುದೇ ಒಂದು ರಾಷ್ಟ್ರ ಅಥವಾ ರಾಷ್ಟ್ರಗಳ ಗುಂಪಿನ ಏಕಸ್ವಾಮ್ಯವಾಗಬಾರದು ಎಂಬ ನಿಯಮವನ್ನು ಕಟ್ಟುನಿಟ್ಟಾಗಿ ಪಾಲಿಸಬೇಕು ಎಂಬುದನ್ನು ನಾವು ಸ್ಪಷ್ಟಪಡಿಸುತ್ತೇವೆ.

2023ರ ಜೋಹಾನ್ಸ್‌ ಬರ್ಗ್-II ನಾಯಕರ ಘೋಷಣೆಯನ್ನು ಮಾನ್ಯ ಮಾಡುತ್ತಾ, ನಾವು ವಿಶ್ವಸಂಸ್ಥೆಯ, ಅದರಲ್ಲೂ ವಿಶೇಷವಾಗಿ ಭದ್ರತಾ ಮಂಡಳಿಯ, ಸಮಗ್ರ ಸುಧಾರಣೆಗೆ ನಮ್ಮ ಬೆಂಬಲವನ್ನು ಪುನರುಚ್ಚರಿಸುತ್ತೇವೆ. ಈ ಸುಧಾರಣೆಯು ವಿಶ್ವಸಂಸ್ಥೆಯನ್ನು ಹೆಚ್ಚು ಪ್ರಜಾಸತ್ತಾತ್ಮಕ, ಪ್ರಾತಿನಿಧಿಕ, ಪರಿಣಾಮಕಾರಿ ಮತ್ತು ದಕ್ಷವನ್ನಾಗಿ ಮಾಡುವ ದೃಷ್ಟಿಯನ್ನು ಹೊಂದಿದೆ. ಮಂಡಳಿಯ ಸದಸ್ಯತ್ವದಲ್ಲಿ ಅಭಿವೃದ್ಧಿಶೀಲ ರಾಷ್ಟ್ರಗಳ ಪ್ರಾತಿನಿಧ್ಯವನ್ನು ಹೆಚ್ಚಿಸುವ ಮೂಲಕ, ಅದು ಪ್ರಚಲಿತ ಜಾಗತಿಕ ಸವಾಲುಗಳಿಗೆ ಸಮರ್ಪಕವಾಗಿ ಸ್ಪಂದಿಸಲು ಮತ್ತು ಅಂತಾರಾಷ್ಟ್ರೀಯ ವ್ಯವಹಾರಗಳಲ್ಲಿ ಮಹತ್ತರ ಪಾತ್ರ ವಹಿಸುವ ಬ್ರಿಕ್ಸ್ ರಾಷ್ಟ್ರಗಳು ಸೇರಿದಂತೆ ಆಫ್ರಿಕಾ, ಏಷ್ಯಾ ಮತ್ತು ಲ್ಯಾಟಿನ್ ಅಮೇರಿಕಾದ ಉದಯೋನ್ಮುಖ ಹಾಗೂ ಅಭಿವೃದ್ಧಿಶೀಲ ರಾಷ್ಟ್ರಗಳ ನ್ಯಾಯಸಮ್ಮತ ಆಕಾಂಕ್ಷೆಗಳಿಗೆ ಬೆಂಬಲ ನೀಡಲು ಸಾಧ್ಯವಾಗುತ್ತದೆ. ಎಜುಲ್ವಿನಿ ಒಮ್ಮತ (Ezulwini Consensus) ಮತ್ತು ಸಿರ್ಟೆ ಘೋಷಣೆ (Sirte Declaration) ಯಲ್ಲಿ ಪ್ರತಿಬಿಂಬಿತವಾಗಿರುವಂತೆ, ಆಫ್ರಿಕನ್ ರಾಷ್ಟ್ರಗಳ ನ್ಯಾಯಸಮ್ಮತ ಆಕಾಂಕ್ಷೆಗಳನ್ನು ನಾವು ಗೌರವಿಸುತ್ತೇವೆ. ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯ ಸುಧಾರಣೆಯು ಗ್ಲೋಬಲ್ ಸೌತ್‌ ನ ಧ್ವನಿಯನ್ನು ಇನ್ನಷ್ಟು ಪ್ರಬಲಗೊಳಿಸಲು ಕಾರಣವಾಗಬೇಕು ಎಂದು ನಾವು ಒತ್ತಿ ಹೇಳುತ್ತೇವೆ. 2022ರ ಬೀಜಿಂಗ್ ಮತ್ತು 2023ರ ಜೋಹಾನ್ಸ್‌ ಬರ್ಗ್-II ನಾಯಕರ ಘೋಷಣೆಗಳನ್ನು ಸ್ಮರಿಸುತ್ತಾ, ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯ ಖಾಯಂ ಸದಸ್ಯರಾಗಿರುವ ಚೀನಾ ಮತ್ತು ರಷ್ಯಾ, ವಿಶ್ವಸಂಸ್ಥೆ ಹಾಗೂ ಅದರ ಭದ್ರತಾ ಮಂಡಳಿಯಲ್ಲಿ ಮಹತ್ತರ ಪಾತ್ರ ವಹಿಸುವ ಬ್ರೆಜಿಲ್ ಮತ್ತು ಭಾರತದ ಆಕಾಂಕ್ಷೆಗಳಿಗೆ ತಮ್ಮ ಬೆಂಬಲವನ್ನು ಪುನರುಚ್ಚರಿಸುತ್ತವೆ.

ವಿಶ್ವಸಂಸ್ಥೆಯ 80ನೇ ವಾರ್ಷಿಕೋತ್ಸವದ ಹಿನ್ನೆಲೆಯಲ್ಲಿ, ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯ ನಿರ್ಣಯಗಳು 75/1, 77/335 ಮತ್ತು ಇತರ ಸಂಬಂಧಿತ ನಿರ್ಣಯಗಳನ್ನು ನಾವು ಸ್ಮರಿಸುತ್ತೇವೆ. ವಿಶ್ವಸಂಸ್ಥೆಯು ತನ್ನ ಆದೇಶವನ್ನು ನಿರ್ವಹಿಸಲು ಅಗತ್ಯವಿರುವ ಎಲ್ಲಾ ಬೆಂಬಲವನ್ನು ಒದಗಿಸಲು ನಮ್ಮ ಬದ್ಧತೆಯನ್ನು ನಾವು ಪುನರುಚ್ಚರಿಸುತ್ತೇವೆ. ವಿಶ್ವಸಂಸ್ಥೆಯ ಪ್ರಮುಖ ಅಂಗಗಳ ಸುಧಾರಣೆಗಳಿಗಾಗಿ ಬಲವಾದ ಕರೆಯನ್ನು ನಾವು ಒತ್ತಿ ಹೇಳುತ್ತೇವೆ, ಇದರಿಂದ ಸ್ಪಷ್ಟ ಪ್ರಗತಿಯನ್ನು ಸಾಧಿಸಬಹುದು. ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯ ಸುಧಾರಣೆಯ ಕುರಿತ ಚರ್ಚೆಗಳಿಗೆ ಹೊಸ ಚೈತನ್ಯ ತುಂಬಲು ಮತ್ತು ಸಾಮಾನ್ಯ ಸಭೆಯನ್ನು ಪುನರುಜ್ಜೀವನಗೊಳಿಸಲು ಹಾಗೂ ಆರ್ಥಿಕ ಮತ್ತು ಸಾಮಾಜಿಕ ಮಂಡಳಿಯನ್ನು ಬಲಪಡಿಸುವ ಕೆಲಸವನ್ನು ಮುಂದುವರಿಸಲು ನಾವು ಮರು-ಬದ್ಧರಾಗಿದ್ದೇವೆ. ಶಾಂತಿ ನಿರ್ಮಾಣ ವ್ಯವಸ್ಥೆಯ 2025ರ ಪರಿಶೀಲನೆ (2025 Review of the Peacebuilding architecture)ಯ ಯಶಸ್ವಿ ತೀರ್ಮಾನಕ್ಕಾಗಿ ನಾವು ಎದುರು ನೋಡುತ್ತಿದ್ದೇವೆ.

ಬಹುಧ್ರುವೀಯ ವಿಶ್ವದ ಇಂದಿನ ವಾಸ್ತವಗಳನ್ನು ಗಮನದಲ್ಲಿಟ್ಟುಕೊಂಡು, ಅಭಿವೃದ್ಧಿಶೀಲ ದೇಶಗಳು ಹೆಚ್ಚು ನ್ಯಾಯಯುತ ಮತ್ತು ಸಮಾನ ಜಾಗತಿಕ ಆಡಳಿತವನ್ನು ಉತ್ತೇಜಿಸಲು ಹಾಗೂ ರಾಷ್ಟ್ರಗಳ ನಡುವೆ ಪರಸ್ಪರ ಲಾಭದಾಯಕ ಸಂಬಂಧಗಳನ್ನು ಬೆಳೆಸಲು ತಮ್ಮ ಪ್ರಯತ್ನಗಳನ್ನು ಬಲಪಡಿಸುವುದು ಅತ್ಯಂತ ನಿರ್ಣಾಯಕವಾಗಿದೆ ಎಂಬುದನ್ನು ನಾವು ಒಪ್ಪುತ್ತೇವೆ. ಬಹುಧ್ರುವೀಯತೆಯು ಉದಯೋನ್ಮುಖ ಮಾರುಕಟ್ಟೆಗಳು ಮತ್ತು ಅಭಿವೃದ್ಧಿಶೀಲ ದೇಶಗಳಿಗೆ (EMDCs) ತಮ್ಮ ರಚನಾತ್ಮಕ ಸಾಮರ್ಥ್ಯವನ್ನು ವೃದ್ಧಿಸಿಕೊಳ್ಳಲು ಮತ್ತು ಸಾರ್ವತ್ರಿಕವಾಗಿ ಪ್ರಯೋಜನಕಾರಿ, ಸಮಗ್ರ ಹಾಗೂ ಸಮಾನ ಆರ್ಥಿಕ ಜಾಗತೀಕರಣ ಹಾಗೂ ಸಹಕಾರವನ್ನು ಅನುಭವಿಸಲು ಹೊಸ ಅವಕಾಶಗಳನ್ನು ಒದಗಿಸುತ್ತದೆ ಎಂದು ನಾವು ಗುರುತಿಸುತ್ತೇವೆ. ಭೌಗೋಳಿಕ-ರಾಜಕೀಯ ಉದ್ವಿಗ್ನತೆಗಳ ಹೆಚ್ಚಳ, ತೀವ್ರ ಆರ್ಥಿಕ ಕುಸಿತಗಳು, ಕ್ಷಿಪ್ರ ತಾಂತ್ರಿಕ ಬದಲಾವಣೆಗಳು, ಸಂರಕ್ಷಣಾವಾದಿ ಕ್ರಮಗಳು ಮತ್ತು ವಲಸೆ ಸವಾಲುಗಳು ಸೇರಿದಂತೆ ಗಂಭೀರ ಅಂತಾರಾಷ್ಟ್ರೀಯ ಸವಾಲುಗಳ ಎದುರಿನಲ್ಲಿ, 'ಗ್ಲೋಬಲ್ ಸೌತ್' ಸಕಾರಾತ್ಮಕ ಬದಲಾವಣೆಯ ಪ್ರಮುಖ ಚಾಲಕ ಶಕ್ತಿಯಾಗಿರುವುದರ ಮಹತ್ವವನ್ನು ನಾವು ಎತ್ತಿಹಿಡಿಯುತ್ತೇವೆ. ಬ್ರಿಕ್ಸ್‌ ದೇಶಗಳು 'ಗ್ಲೋಬಲ್ ಸೌತ್'ನ ಕಾಳಜಿಗಳು ಮತ್ತು ಆದ್ಯತೆಗಳನ್ನು ಪರಿಣಾಮಕಾರಿಯಾಗಿ ಧ್ವನಿಸುವಲ್ಲಿ, ಹಾಗೆಯೇ ಅಂತಾರಾಷ್ಟ್ರೀಯ ಕಾನೂನಿನ ಆಧಾರದ ಮೇಲೆ ಹೆಚ್ಚು ನ್ಯಾಯಯುತ, ಸುಸ್ಥಿರ, ಸಮಗ್ರ, ಪ್ರಾತಿನಿಧಿಕ ಮತ್ತು ಸ್ಥಿರ ಅಂತಾರಾಷ್ಟ್ರೀಯ ವ್ಯವಸ್ಥೆಯನ್ನು ಉತ್ತೇಜಿಸುವಲ್ಲಿ ಪ್ರಮುಖ ಪಾತ್ರ ವಹಿಸುವುದನ್ನು ಮುಂದುವರಿಸುತ್ತವೆ ಎಂದು ನಾವು ನಂಬುತ್ತೇವೆ.

2025ನೇ ಇಸವಿಯು, ಮಾನವಕುಲಕ್ಕೆ, ವಿಶೇಷವಾಗಿ ಯುರೋಪ್, ಏಷ್ಯಾ, ಆಫ್ರಿಕಾ, ಪೆಸಿಫಿಕ್ ಮತ್ತು ವಿಶ್ವದ ಇತರ ಭಾಗಗಳಲ್ಲಿ ಅಪಾರ ದುಃಖವನ್ನು ತಂದೊಡ್ಡಿದ ಎರಡನೇ ಮಹಾಯುದ್ಧದ ಅಂತ್ಯದ 80ನೇ ವಾರ್ಷಿಕೋತ್ಸವವನ್ನು ಸೂಚಿಸುತ್ತದೆ ಎಂಬುದನ್ನು ನಾವು ಸ್ಮರಿಸುತ್ತೇವೆ. ಈ ಐತಿಹಾಸಿಕ ಘಟನೆಯ ಕುರಿತಾದ ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯ (UNGA) 79/272 ನಿರ್ಣಯಕ್ಕೆ ನಾವು ನಮ್ಮ ಸಂಪೂರ್ಣ ಬೆಂಬಲವನ್ನು ವ್ಯಕ್ತಪಡಿಸುತ್ತೇವೆ. ಈ ಮಹಾಯುದ್ಧದ ಅಂತ್ಯವೇ, ಮುಂದಿನ ಪೀಳಿಗೆಯನ್ನು ಯುದ್ಧದ ಪಿಡುಗಿನಿಂದ ರಕ್ಷಿಸುವ ಉದ್ದೇಶದೊಂದಿಗೆ ವಿಶ್ವಸಂಸ್ಥೆಯ ಸ್ಥಾಪನೆಗೆ ಪೂರಕವಾದ ಪರಿಸ್ಥಿತಿಗಳನ್ನು ನಿರ್ಮಿಸಿತು.

ಬ್ರೆಟನ್ ವುಡ್ಸ್ ಸಂಸ್ಥೆಗಳ (BWI) 80ನೇ ವಾರ್ಷಿಕೋತ್ಸವದ ಸಂದರ್ಭದಲ್ಲಿ, ಅವುಗಳನ್ನು ಸುಧಾರಿಸುವ ತುರ್ತು ಅಗತ್ಯವನ್ನು ನಾವು ಪುನರುಚ್ಚರಿಸುತ್ತೇವೆ. ಅವುಗಳನ್ನು ಹೆಚ್ಚು ಚುರುಕಾದ, ಪರಿಣಾಮಕಾರಿ, ವಿಶ್ವಾಸಾರ್ಹ, ಎಲ್ಲರನ್ನೂ ಒಳಗೊಳ್ಳುವ, ಉದ್ದೇಶಕ್ಕೆ ತಕ್ಕಂತಿರುವ, ನಿಷ್ಪಕ್ಷಪಾತ, ಜವಾಬ್ದಾರಿಯುತ ಮತ್ತು ಪ್ರಾತಿನಿಧಿಕವನ್ನಾಗಿ ಮಾಡುವ ಮೂಲಕ ಅವುಗಳ ನ್ಯಾಯಸಮ್ಮತತೆಯನ್ನು ಹೆಚ್ಚಿಸಬೇಕಾಗಿದೆ. ಪ್ರಥಮವಾಗಿ, ಈ ಸಂಸ್ಥೆಗಳು ತಮ್ಮ ಸ್ಥಾಪನೆಯಾದಾಗಿನಿಂದ ಜಾಗತಿಕ ಆರ್ಥಿಕತೆಯಲ್ಲಿ ಆಗಿರುವ ಪರಿವರ್ತನೆಯನ್ನು ಪ್ರತಿಬಿಂಬಿಸಲು ತಮ್ಮ ಆಡಳಿತ ರಚನೆಯನ್ನು ಸುಧಾರಿಸಿಕೊಳ್ಳಬೇಕು. ಬ್ರೆಟನ್ ವುಡ್ಸ್ ಸಂಸ್ಥೆಗಳಲ್ಲಿ ಉದಯೋನ್ಮುಖ ಮತ್ತು ಅಭಿವೃದ್ಧಿಶೀಲ ರಾಷ್ಟ್ರಗಳ (EMDEs) ಧ್ವನಿ ಮತ್ತು ಪ್ರಾತಿನಿಧ್ಯವು, ಜಾಗತಿಕ ಆರ್ಥಿಕತೆಯಲ್ಲಿ ಅವುಗಳ ಹೆಚ್ಚುತ್ತಿರುವ ಪ್ರಾಬಲ್ಯವನ್ನು ಪ್ರತಿಬಿಂಬಿಸಲೇಬೇಕು. ಇದಲ್ಲದೆ, IMF ಮತ್ತು ವಿಶ್ವ ಬ್ಯಾಂಕ್ ಸಮೂಹದ (WBG) ನಾಯಕತ್ವದಲ್ಲಿ ಪ್ರಾದೇಶಿಕ ವೈವಿಧ್ಯತೆ ಮತ್ತು ಉದಯೋನ್ಮುಖ ರಾಷ್ಟ್ರಗಳ ಪ್ರಾತಿನಿಧ್ಯವನ್ನು ಹೆಚ್ಚಿಸಲು ಹಾಗೂ ನಿರ್ವಹಣಾ ಮಟ್ಟದಲ್ಲಿ ಮಹಿಳೆಯರ ಪಾತ್ರ ಮತ್ತು ಪಾಲನ್ನು ಹೆಚ್ಚಿಸಲು, ಅರ್ಹತೆ-ಆಧಾರಿತ ಮತ್ತು ಎಲ್ಲರನ್ನೂ ಒಳಗೊಳ್ಳುವ ಆಯ್ಕೆ ಪ್ರಕ್ರಿಯೆ ಸೇರಿದಂತೆ ಸುಧಾರಿತ ನಿರ್ವಹಣಾ ಕಾರ್ಯವಿಧಾನಗಳಿಗೆ ನಾವು ಕರೆ ನೀಡುತ್ತೇವೆ.

ಪ್ರಸ್ತುತ ಅನಿಶ್ಚಿತತೆ ಮತ್ತು ಅಸ್ಥಿರತೆಯ ಸನ್ನಿವೇಶದಲ್ಲಿ, ಅಂತಾರಾಷ್ಟ್ರೀಯ ಹಣಕಾಸು ನಿಧಿ (IMF) ತನ್ನ ಸದಸ್ಯ ರಾಷ್ಟ್ರಗಳಿಗೆ, ವಿಶೇಷವಾಗಿ ಅತ್ಯಂತ ದುರ್ಬಲ ರಾಷ್ಟ್ರಗಳಿಗೆ, ಪರಿಣಾಮಕಾರಿಯಾಗಿ ಬೆಂಬಲ ನೀಡಲು ಸಾಕಷ್ಟು ಸಂಪನ್ಮೂಲಗಳನ್ನು ಹೊಂದಿರಬೇಕು ಮತ್ತು ಚುರುಕಾಗಿರಬೇಕು. ಅದು ಜಾಗತಿಕ ಹಣಕಾಸು ಸುರಕ್ಷತಾ ಜಾಲದ (GFSN) ಕೇಂದ್ರದಲ್ಲಿರಬೇಕು. ಕೋಟಾ ಮರುಹಂಚಿಕೆಯ ಅನುಪಸ್ಥಿತಿಯ ಹೊರತಾಗಿಯೂ, 16ನೇ 'ಕೋಟಾಗಳ ಸಾಮಾನ್ಯ ವಿಮರ್ಶೆ' (GRQ) ಅಡಿಯಲ್ಲಿ ಪ್ರಸ್ತಾಪಿಸಲಾದ ಕೋಟಾ ಹೆಚ್ಚಳಕ್ಕೆ ನಾವು ನಮ್ಮ ಒಪ್ಪಿಗೆಯನ್ನು ನೀಡಿದ್ದೇವೆ ಮತ್ತು ಇನ್ನೂ ಒಪ್ಪಿಗೆ ನೀಡದ IMF ಸದಸ್ಯ ರಾಷ್ಟ್ರಗಳು ತಕ್ಷಣವೇ ತಮ್ಮ ಒಪ್ಪಿಗೆಯನ್ನು ನೀಡಿ, 16ನೇ GRQ ಅಡಿಯ ಕೋಟಾ ಹೆಚ್ಚಳವನ್ನು ವಿಳಂಬವಿಲ್ಲದೆ ಜಾರಿಗೆ ತರಬೇಕೆಂದು ನಾವು ಆಗ್ರಹಿಸುತ್ತೇವೆ. IMFನ ಆಡಳಿತ ಮಂಡಳಿಯು ನಿಗದಿಪಡಿಸಿದ ಆದೇಶವನ್ನು ಪೂರೈಸುವಂತೆ ನಾವು IMFನ ಕಾರ್ಯಕಾರಿ ಮಂಡಳಿಯನ್ನು ಒತ್ತಾಯಿಸುತ್ತೇವೆ. ಅದೇನೆಂದರೆ, 17ನೇ GRQ ಅಡಿಯಲ್ಲಿ, ಹೊಸ ಕೋಟಾ ಸೂತ್ರವನ್ನು ಒಳಗೊಂಡಂತೆ, ಕೋಟಾ ಪಾಲು ಮರುಹಂಚಿಕೆಯ ವಿಧಾನಗಳನ್ನು ಆದಷ್ಟು ಬೇಗನೆ ಅಭಿವೃದ್ಧಿಪಡಿಸಬೇಕು. ತುರ್ತು ಕೋಟಾ ಮತ್ತು ಆಡಳಿತ ಸುಧಾರಣೆಗಳ ಕುರಿತು ಭವಿಷ್ಯದ ಚರ್ಚೆಗಳಿಗೆ ಮಾರ್ಗದರ್ಶನ ನೀಡುವ ಮತ್ತು ಅಭಿಪ್ರಾಯಗಳ ಒಮ್ಮತವನ್ನು ಮೂಡಿಸಲು ಸಹಾಯ ಮಾಡುವ ಸಾಮಾನ್ಯ ತತ್ವಗಳನ್ನು ಅಭಿವೃದ್ಧಿಪಡಿಸುವಲ್ಲಿ IMFನ ಕಾರ್ಯಕಾರಿ ಮಂಡಳಿ ಮತ್ತು ಅಂತಾರಾಷ್ಟ್ರೀಯ ಹಣಕಾಸು ಹಾಗೂ ಆರ್ಥಿಕ ಸಮಿತಿಯ (IMFC) ನಿಯೋಗಿಗಳ ಪ್ರಯತ್ನಗಳನ್ನು ನಾವು ಬೆಂಬಲಿಸುತ್ತೇವೆ. IMFನಲ್ಲಿನ ಮುಂದಿನ ಕೋಟಾ ಮರುಹಂಚಿಕೆಯು ಅಭಿವೃದ್ಧಿಶೀಲ ರಾಷ್ಟ್ರಗಳ ಹಿತಾಸಕ್ತಿಗೆ ಧಕ್ಕೆಯಾಗಬಾರದು ಎಂದು ನಾವು ಪುನರುಚ್ಚರಿಸುತ್ತೇವೆ. ಬದಲಿಗೆ, ಇದು ಜಾಗತಿಕ ಆರ್ಥಿಕತೆಯಲ್ಲಿ ದೇಶಗಳ ಸಾಪೇಕ್ಷ ಸ್ಥಾನಗಳನ್ನು ಪ್ರತಿಬಿಂಬಿಸಬೇಕು ಮತ್ತು ಉದಯೋನ್ಮುಖ ಹಾಗೂ ಅಭಿವೃದ್ಧಿಶೀಲ ರಾಷ್ಟ್ರಗಳ (EMDEs) ಪಾಲನ್ನು ಹೆಚ್ಚಿಸಬೇಕು. 'IMF ಕೋಟಾ ಮತ್ತು ಆಡಳಿತ ಸುಧಾರಣೆಗಾಗಿ ಬ್ರಿಕ್ಸ್‌ನ ರಿಯೊ ಡಿ ಜನೈರೊ ದೃಷ್ಟಿಕೋನ'ಕ್ಕೆ ಅನುಗುಣವಾಗಿ, 17ನೇ GRQನಲ್ಲಿ ಅರ್ಥಪೂರ್ಣ ಕೋಟಾ ಪಾಲು ಮರುಹಂಚಿಕೆ ಮತ್ತು ಆಡಳಿತ ಸುಧಾರಣೆಗಳು ಸೇರಿರುವುದನ್ನು ಖಾತರಿಪಡಿಸಲು, ನಾವು ಇತರ IMF ಸದಸ್ಯರೊಂದಿಗೆ ರಚನಾತ್ಮಕವಾಗಿ ತೊಡಗಿಸಿಕೊಳ್ಳಲು ಸಿದ್ಧರಿದ್ದೇವೆ.

ಬ್ರೆಜಿಲ್ ‌ನ ಸಹ-ಅಧ್ಯಕ್ಷತೆಯಲ್ಲಿ ನಡೆಯುತ್ತಿರುವ 2025ರ 'ವಿಶ್ವಬ್ಯಾಂಕ್ ಷೇರುದಾರಿಕೆ ವಿಮರ್ಶೆ'ಯು, ಬಹುಪಕ್ಷೀಯತೆಯನ್ನು ಬಲಪಡಿಸಲು ಮತ್ತು ವಿಶ್ವ ಬ್ಯಾಂಕ್ ಸಮೂಹವನ್ನು ಉತ್ತಮ, ದೊಡ್ಡದಾದ ಹಾಗೂ ಹೆಚ್ಚು ಪರಿಣಾಮಕಾರಿ ಅಭಿವೃದ್ಧಿ ಹಣಕಾಸು ಸಂಸ್ಥೆಯನ್ನಾಗಿ ಮಾಡಿ, ಅದರ ನ್ಯಾಯಸಮ್ಮತತೆಯನ್ನು ಹೆಚ್ಚಿಸಲು ಒಂದು ನಿರ್ಣಾಯಕ ಸಾಧನವಾಗಿದೆ ಎಂಬುದನ್ನು ನಾವು ಪುನಃ ದೃಢೀಕರಿಸುತ್ತೇವೆ. 'ಲಿಮಾ ತತ್ವ'ಗಳಿಗೆ ಅನುಗುಣವಾಗಿ, ಅಭಿವೃದ್ಧಿಶೀಲ ರಾಷ್ಟ್ರಗಳ ಐತಿಹಾಸಿಕ ಅಲ್ಪ-ಪ್ರಾತಿನಿಧ್ಯವನ್ನು ಸರಿಪಡಿಸುವಂತಹ ಷೇರುದಾರಿಕೆ ಮರುಹಂಚಿಕೆಯ ಆಧಾರದ ಮೇಲೆ, ಅವುಗಳ ಧ್ವನಿ ಮತ್ತು ಪ್ರಾತಿನಿಧ್ಯವನ್ನು ಹೆಚ್ಚಿಸಬೇಕೆಂದು ನಾವು ಪ್ರತಿಪಾದಿಸುವುದನ್ನು ಮುಂದುವರೆಸುತ್ತೇವೆ. ಹವಾಮಾನ ಬದಲಾವಣೆ ಮತ್ತು ಡಿಜಿಟಲೀಕರಣದ ಸವಾಲಿನ ಸಂದರ್ಭದಲ್ಲಿ, ಉದ್ಯೋಗ ಸೃಷ್ಟಿಯ ಮೂಲಕ ಬಡತನ ಮತ್ತು ಅಸಮಾನತೆಯನ್ನು ನಿವಾರಿಸುವುದು ವಿಶ್ವ ಬ್ಯಾಂಕ್ ಸಮೂಹದ ಧ್ಯೇಯೋದ್ದೇಶದ ಕೇಂದ್ರಬಿಂದುವಾಗಿ ಉಳಿಯುವಂತೆ ನಾವು ಖಚಿತಪಡಿಸಿಕೊಳ್ಳಲು ಶ್ರಮಿಸುತ್ತೇವೆ.

ಬಹುಪಕ್ಷೀಯ ವ್ಯಾಪಾರ ವ್ಯವಸ್ಥೆಯು ಬಹಳ ಹಿಂದಿನಿಂದಲೂ ಅನಿಶ್ಚಿತತೆಯ ಸ್ಥಿತಿಯಲ್ಲಿದೆ. ಸುಂಕಗಳನ್ನು ಮತ್ತು ಸುಂಕ-ರಹಿತ ಕ್ರಮಗಳನ್ನು ಏಕಪಕ್ಷೀಯವಾಗಿ ಹೆಚ್ಚಿಸುವುದು ಅಥವಾ ಪರಿಸರ ಉದ್ದೇಶಗಳ ನೆಪದಲ್ಲಿ ನಡೆಯುವ ಸಂರಕ್ಷಣಾವಾದದಂತಹ ವ್ಯಾಪಾರ-ನಿರ್ಬಂಧಿತ ಕ್ರಮಗಳ ಹೆಚ್ಚಳವು ಜಾಗತಿಕ ವ್ಯಾಪಾರವನ್ನು ಮತ್ತಷ್ಟು ಕಡಿಮೆಗೊಳಿಸುತ್ತದೆ, ಜಾಗತಿಕ ಪೂರೈಕೆ ಸರಪಳಿಗಳನ್ನು ಅಸ್ತವ್ಯಸ್ತಗೊಳಿಸುತ್ತದೆ ಮತ್ತು ಅಂತಾರಾಷ್ಟ್ರೀಯ ಆರ್ಥಿಕ ಹಾಗೂ ವ್ಯಾಪಾರ ಚಟುವಟಿಕೆಗಳಲ್ಲಿ ಅನಿಶ್ಚಿತತೆಯನ್ನು ಮೂಡಿಸುತ್ತದೆ. ಇದು ಅಸ್ತಿತ್ವದಲ್ಲಿರುವ ಆರ್ಥಿಕ ಅಸಮಾನತೆಗಳನ್ನು ಉಲ್ಬಣಗೊಳಿಸಿ ಜಾಗತಿಕ ಆರ್ಥಿಕ ಅಭಿವೃದ್ಧಿಯ ನಿರೀಕ್ಷೆಗಳ ಮೇಲೆ ಪರಿಣಾಮ ಬೀರಬಹುದು. ವ್ಯಾಪಾರವನ್ನು ವಿರೂಪಗೊಳಿಸುವ ಮತ್ತು WTO ನಿಯಮಗಳಿಗೆ ವಿರುದ್ಧವಾಗಿರುವ ಏಕಪಕ್ಷೀಯ ಸುಂಕ ಮತ್ತು ಸುಂಕ-ರಹಿತ ಕ್ರಮಗಳ ಹೆಚ್ಚಳದ ಬಗ್ಗೆ ನಾವು ಗಂಭೀರ ಕಳವಳ ವ್ಯಕ್ತಪಡಿಸುತ್ತೇವೆ.

ಈ ಹಿನ್ನೆಲೆಯಲ್ಲಿ, ನಿಯಮ-ಆಧಾರಿತ, ಮುಕ್ತ, ಪಾರದರ್ಶಕ, ನ್ಯಾಯಯುತ, ಎಲ್ಲರನ್ನೂ ಒಳಗೊಳ್ಳುವ, ಸಮಾನ, ತಾರತಮ್ಯರಹಿತ, ಒಮ್ಮತ-ಆಧಾರಿತ ಬಹುಪಕ್ಷೀಯ ವ್ಯಾಪಾರ ವ್ಯವಸ್ಥೆಗೆ ನಮ್ಮ ಬೆಂಬಲವನ್ನು ಪುನರುಚ್ಚರಿಸುತ್ತೇವೆ. ಇದರ ಕೇಂದ್ರದಲ್ಲಿ ವಿಶ್ವ ವ್ಯಾಪಾರ ಸಂಸ್ಥೆ (WTO) ಇರಬೇಕು ಮತ್ತು ಅದರ ಅಭಿವೃದ್ಧಿಶೀಲ ಸದಸ್ಯರಿಗೆ 'ವಿಶೇಷ ಮತ್ತು ಭೇದಾತ್ಮಕ ಪರಿಗಣನೆ' (S&DT) ಇರಬೇಕು. ವಿಶ್ವ ವ್ಯಾಪಾರ ಸಂಘಟನೆಯು ತನ್ನ 30ನೇ ವಾರ್ಷಿಕೋತ್ಸವದ ಸಂದರ್ಭದಲ್ಲಿ, ಹೊಸ ವ್ಯಾಪಾರ ನಿಯಮಗಳ ಕುರಿತ ಮಾತುಕತೆ ಸೇರಿದಂತೆ, ಅಂತಾರಾಷ್ಟ್ರೀಯ ವ್ಯಾಪಾರ ಚರ್ಚೆಗಳ ಬಹು ಆಯಾಮಗಳನ್ನು ಮುನ್ನಡೆಸಲು ಅಗತ್ಯವಾದ ಆದೇಶ, ಪರಿಣತಿ, ಸಾರ್ವತ್ರಿಕ ವ್ಯಾಪ್ತಿ ಮತ್ತು ಸಾಮರ್ಥ್ಯವನ್ನು ಹೊಂದಿರುವ ಏಕೈಕ ಬಹುಪಕ್ಷೀಯ ಸಂಸ್ಥೆಯಾಗಿದೆ ಎಂದು ನಾವು ಒತ್ತಿ ಹೇಳುತ್ತೇವೆ. 12ನೇ WTO ಮಂತ್ರಿಮಟ್ಟದ ಸಮ್ಮೇಳನದಲ್ಲಿ ಮಾಡಿದ ಮತ್ತು 13ನೇ ಸಮ್ಮೇಳನದಲ್ಲಿ ಪುನರುಚ್ಚರಿಸಿದ, ಸಂಸ್ಥೆಯ ಪ್ರಸ್ತುತತೆಯನ್ನು ಖಚಿತಪಡಿಸಿಕೊಳ್ಳಲು ಮತ್ತು ಬಹುಪಕ್ಷೀಯ ವ್ಯಾಪಾರ ವ್ಯವಸ್ಥೆಯ ವಿಶ್ವಾಸಾರ್ಹತೆಯನ್ನು ಪುನಃಸ್ಥಾಪಿಸಲು ಅಗತ್ಯವಾದ ಸುಧಾರಣೆಯತ್ತ ಕೆಲಸ ಮಾಡುವ ಬದ್ಧತೆಯನ್ನು ನಾವು ಸ್ಮರಿಸುತ್ತೇವೆ. ಸುಲಭವಾಗಿ ಲಭ್ಯವಾಗುವ, ಪರಿಣಾಮಕಾರಿ, ಸಂಪೂರ್ಣವಾಗಿ ಕಾರ್ಯನಿರ್ವಹಿಸುವ, ಎರಡು-ಹಂತದ, ಬದ್ಧತೆಯುಳ್ಳ WTO ವ್ಯಾಜ್ಯ ಇತ್ಯರ್ಥ ವ್ಯವಸ್ಥೆಯ ತುರ್ತು ಪುನಃಸ್ಥಾಪನೆಗೆ ನಾವು ಬದ್ಧರಾಗಿದ್ದೇವೆ. WTOಗೆ ಸೇರ್ಪಡೆಗೊಳ್ಳುವ ಇಥಿಯೋಪಿಯಾ ಮತ್ತು ಇರಾನ್‌ ನ ಪ್ರಯತ್ನವನ್ನು ನಾವು ಬಲವಾಗಿ ಬೆಂಬಲಿಸುತ್ತೇವೆ. ವ್ಯಾಪಾರ ಸಚಿವರುಗಳು ಅಂಗೀಕರಿಸಿದ 'WTO ಸುಧಾರಣೆ ಮತ್ತು ಬಹುಪಕ್ಷೀಯ ವ್ಯಾಪಾರ ವ್ಯವಸ್ಥೆಯ ಬಲವರ್ಧನೆ ಕುರಿತ ಬ್ರಿಕ್ಸ್ ಘೋಷಣೆ'ಯನ್ನು ನಾವು ಸ್ವಾಗತಿಸುತ್ತೇವೆ.

ಅಂತಾರಾಷ್ಟ್ರೀಯ ಕಾನೂನಿಗೆ ವಿರುದ್ಧವಾದ ಏಕಪಕ್ಷೀಯ ದಬ್ಬಾಳಿಕೆಯ ಕ್ರಮಗಳ ಹೇರಿಕೆಯನ್ನು ನಾವು ಖಂಡಿಸುತ್ತೇವೆ. ಏಕಪಕ್ಷೀಯ ಆರ್ಥಿಕ ನಿರ್ಬಂಧಗಳು ಹಾಗೂ ದ್ವಿತೀಯ ಹಂತದ ನಿರ್ಬಂಧಗಳ ರೂಪದಲ್ಲಿರುವ ಇಂತಹ ಕ್ರಮಗಳು, ಗುರಿಯಾಗಿಸಲ್ಪಟ್ಟ ರಾಜ್ಯಗಳ ಸಾಮಾನ್ಯ ಜನಸಂಖ್ಯೆಯ ಅಭಿವೃದ್ಧಿ, ಆರೋಗ್ಯ ಮತ್ತು ಆಹಾರ ಭದ್ರತೆಯ ಹಕ್ಕುಗಳು ಸೇರಿದಂತೆ ಮಾನವ ಹಕ್ಕುಗಳ ಮೇಲೆ ದೂರಗಾಮಿ ನಕಾರಾತ್ಮಕ ಪರಿಣಾಮಗಳನ್ನು ಬೀರುತ್ತವೆ ಎಂದು ನಾವು ಪುನರುಚ್ಚರಿಸುತ್ತೇವೆ. ಇವು ಬಡವರು ಮತ್ತು ದುರ್ಬಲ ಸ್ಥಿತಿಯಲ್ಲಿರುವ ಜನರ ಮೇಲೆ ಅಸಮಾನವಾಗಿ ಪರಿಣಾಮ ಬೀರುತ್ತವೆ, ಡಿಜಿಟಲ್ ಕಂದಕವನ್ನು ಮತ್ತಷ್ಟು ಆಳವಾಗಿಸುತ್ತವೆ ಮತ್ತು ಪರಿಸರ ಸವಾಲುಗಳನ್ನು ಉಲ್ಬಣಗೊಳಿಸುತ್ತವೆ. ಅಂತಾರಾಷ್ಟ್ರೀಯ ಕಾನೂನನ್ನು ಮತ್ತು ವಿಶ್ವಸಂಸ್ಥೆಯ ಚಾರ್ಟ್‌ರ್‌ ನ ತತ್ವಗಳು ಹಾಗೂ ಉದ್ದೇಶಗಳನ್ನು ದುರ್ಬಲಗೊಳಿಸುವ ಇಂತಹ ಕಾನೂನುಬಾಹಿರ ಕ್ರಮಗಳ ನಿರ್ಮೂಲನೆಗೆ ನಾವು ಕರೆ ನೀಡುತ್ತೇವೆ. ಅಂತಾರಾಷ್ಟ್ರೀಯ ಕಾನೂನಿಗೆ ವಿರುದ್ಧವಾದ ಮತ್ತು ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯಿಂದ ಅಧಿಕೃತಗೊಳ್ಳದ ನಿರ್ಬಂಧಗಳನ್ನು ಬ್ರಿಕ್ಸ್ ಸದಸ್ಯ ರಾಷ್ಟ್ರಗಳು ಹೇರುವುದಿಲ್ಲ ಅಥವಾ ಬೆಂಬಲಿಸುವುದಿಲ್ಲ ಎಂಬುದನ್ನು ನಾವು ಪುನಃ ದೃಢೀಕರಿಸುತ್ತೇವೆ.

ಜಾಗತಿಕ ಆರೋಗ್ಯ ಸವಾಲುಗಳ ಪರಸ್ಪರ ಸಂಬಂಧ ಹೊಂದಿರುವ ಸ್ವರೂಪ ಮತ್ತು ಅವುಗಳ ಗಡಿಯಾಚೆಗಿನ ಪರಿಣಾಮಗಳನ್ನು ಗುರುತಿಸಿ, ಅಂತಾರಾಷ್ಟ್ರೀಯ ಸಹಕಾರ ಮತ್ತು ಒಗ್ಗಟ್ಟನ್ನು ಹೆಚ್ಚಿಸುವ ಮೂಲಕ ಜಾಗತಿಕ ಆರೋಗ್ಯ ಆಡಳಿತವನ್ನು ಬಲಪಡಿಸುವ ನಮ್ಮ ಬದ್ಧತೆಯನ್ನು ನಾವು ಪುನರುಚ್ಚರಿಸುತ್ತೇವೆ. ವಿಶ್ವಸಂಸ್ಥೆಯ ವ್ಯವಸ್ಥೆಯಲ್ಲಿ, ವಿಶೇಷವಾಗಿ ಬಿಕ್ಕಟ್ಟುಗಳು ಮತ್ತು ತುರ್ತು ಪರಿಸ್ಥಿತಿಗಳಲ್ಲಿ, ಅಂತಾರಾಷ್ಟ್ರೀಯ ಆರೋಗ್ಯ ಕಾರ್ಯದ ನಿರ್ದೇಶನ ಮತ್ತು ಸಮನ್ವಯ ಪ್ರಾಧಿಕಾರವಾಗಿ ವಿಶ್ವ ಆರೋಗ್ಯ ಸಂಸ್ಥೆಯ (WHO) ಪಾತ್ರವನ್ನು ನಾವು ಒತ್ತಿ ಹೇಳುತ್ತೇವೆ. ಅದರ ಆದೇಶ, ಸಾಮರ್ಥ್ಯಗಳು ಮತ್ತು ಹಣಕಾಸು ಕಾರ್ಯವಿಧಾನಗಳನ್ನು ಬಲಪಡಿಸುವ ಅಗತ್ಯವನ್ನು ನಾವು ಪ್ರತಿಪಾದಿಸುತ್ತೇವೆ. ಪ್ರಸ್ತುತ ಮತ್ತು ಭವಿಷ್ಯದ ಸಾರ್ವಜನಿಕ ಆರೋಗ್ಯ ಸವಾಲುಗಳನ್ನು ಪರಿಣಾಮಕಾರಿಯಾಗಿ ಎದುರಿಸಲು, ಅಸಮಾನತೆಗಳನ್ನು ತಗ್ಗಿಸಲು, ಮತ್ತು ಔಷಧಿಗಳು ಹಾಗೂ ಲಸಿಕೆಗಳು ಸೇರಿದಂತೆ ಆರೋಗ್ಯ ಸೇವೆಗಳಿಗೆ ಎಲ್ಲರಿಗೂ, ವಿಶೇಷವಾಗಿ ಅಭಿವೃದ್ಧಿಶೀಲ ದೇಶಗಳಲ್ಲಿ, ಸಮಾನ ಪ್ರವೇಶವನ್ನು ಖಚಿತಪಡಿಸಿಕೊಳ್ಳಲು ದೃಢವಾದ ಮತ್ತು ಸಮರ್ಪಕವಾಗಿ ಹಣಕಾಸು ಹೊಂದಿರುವ WHO ಅತ್ಯಗತ್ಯವಾಗಿದೆ. ಜಾಗತಿಕ ಆರೋಗ್ಯ ವ್ಯವಸ್ಥೆಯನ್ನು ಬಲಪಡಿಸಲು, ಸಮಾನತೆ, ಒಳಗೊಳ್ಳುವಿಕೆ, ಪಾರದರ್ಶಕತೆ ಮತ್ತು ಸ್ಪಂದನಶೀಲತೆಯನ್ನು ಉತ್ತೇಜಿಸಲು, ಹಾಗೂ ಆರೋಗ್ಯ-ಸಂಬಂಧಿತ ಸುಸ್ಥಿರ ಅಭಿವೃದ್ಧಿ ಗುರಿಗಳನ್ನು ಸಾಧಿಸುವಲ್ಲಿ ಯಾವುದೇ ದೇಶವು ಹಿಂದೆ ಬೀಳದಂತೆ ನೋಡಿಕೊಳ್ಳಲು ನಾವು ಸಕ್ರಿಯವಾಗಿ ಬೆಂಬಲ ನೀಡಲು ಬದ್ಧರಾಗಿದ್ದೇವೆ. 78ನೇ ವಿಶ್ವ ಆರೋಗ್ಯ ಅಸೆಂಬ್ಲಿಯಿಂದ WHO ಸಾಂಕ್ರಾಮಿಕ ಒಪ್ಪಂದದ ಅಂಗೀಕಾರವನ್ನು ನಾವು ಸ್ವಾಗತಿಸುತ್ತೇವೆ. ಈ ಒಪ್ಪಂದವು ಭವಿಷ್ಯದ ಸಾಂಕ್ರಾಮಿಕ ರೋಗಗಳ ವಿರುದ್ಧ ಹೆಚ್ಚು ಸುರಕ್ಷಿತ ಮತ್ತು ಸಮಾನ ಜಗತ್ತಿಗೆ ಅಡಿಪಾಯವನ್ನು ಗಟ್ಟಿಗೊಳಿಸುತ್ತದೆ. 'ರೋಗಾಣು ಪ್ರವೇಶ ಮತ್ತು ಪ್ರಯೋಜನ-ಹಂಚಿಕೆ' ಕುರಿತ ಒಪ್ಪಂದದ ಅನುಬಂಧಕ್ಕಾಗಿ ಸದಸ್ಯ ರಾಷ್ಟ್ರಗಳ ನೇತೃತ್ವದಲ್ಲಿ ಮತ್ತು ಅವರಿಂದಲೇ ನಡೆಸಲ್ಪಡುವ ಮಾತುಕತೆಗಳು ಸಕಾಲಿಕವಾಗಿ ಮುಕ್ತಾಯಗೊಳ್ಳುವುದನ್ನು ಖಚಿತಪಡಿಸಿಕೊಳ್ಳಲು ಈ ವೇಗವನ್ನು ಮುಂದುವರೆಸಲು ನಾವು ಸಿದ್ಧರಿದ್ದೇವೆ.

ಕೃತಕ ಬುದ್ಧಿಮತ್ತೆ (AI) ಹೆಚ್ಚು ಸಮೃದ್ಧ ಭವಿಷ್ಯದತ್ತ ಅಭಿವೃದ್ಧಿಯನ್ನು ಉತ್ತೇಜಿಸಲು ಒಂದು ಮಹತ್ವದ ಅವಕಾಶ ಎಂದು ನಾವು ಗುರುತಿಸುತ್ತೇವೆ. ಈ ಗುರಿಯನ್ನು ಸಾಧಿಸಲು, AI ನ ಜಾಗತಿಕ ಆಡಳಿತವು ಸಂಭಾವ್ಯ ಅಪಾಯಗಳನ್ನು ತಗ್ಗಿಸಬೇಕು ಮತ್ತು ಗ್ಲೋಬಲ್ ಸೌತ್ ಸೇರಿದಂತೆ ಎಲ್ಲಾ ದೇಶಗಳ ಅಗತ್ಯಗಳನ್ನು ಪೂರೈಸಬೇಕು ಎಂದು ನಾವು ಒತ್ತಿ ಹೇಳುತ್ತೇವೆ. ಸಾರ್ವಭೌಮ ಕಾನೂನುಗಳಿಗೆ ಅನುಗುಣವಾಗಿ, ಅಪಾಯಗಳನ್ನು ನಿಭಾಯಿಸುವ, ವಿಶ್ವಾಸವನ್ನು ಮೂಡಿಸುವ, ಮತ್ತು ವ್ಯಾಪಕ ಹಾಗೂ ಅಂತರ್ಗತ ಅಂತಾರಾಷ್ಟ್ರೀಯ ಸಹಯೋಗ ಹಾಗೂ ಪ್ರವೇಶವನ್ನು ಖಾತ್ರಿಪಡಿಸುವಂತಹ AI ಆಡಳಿತವನ್ನು ಸ್ಥಾಪಿಸಲು ಸಾಮೂಹಿಕ ಜಾಗತಿಕ ಪ್ರಯತ್ನದ ಅಗತ್ಯವಿದೆ. ಇದರ ಕೇಂದ್ರದಲ್ಲಿ ವಿಶ್ವಸಂಸ್ಥೆ ಇರಬೇಕು, ಮತ್ತು ಅಭಿವೃದ್ಧಿಶೀಲ ದೇಶಗಳಿಗೆ ಸಾಮರ್ಥ್ಯ ವರ್ಧನೆಯನ್ನು ಇದು ಒಳಗೊಂಡಿರಬೇಕು. ಹೆಚ್ಚು ಸಮತೋಲಿತ ವಿಧಾನದ ಕಡೆಗೆ ರಚನಾತ್ಮಕ ಚರ್ಚೆಯನ್ನು ಬೆಂಬಲಿಸಲು, ನಾವು ಕೃತಕ ಬುದ್ಧಿಮತ್ತೆಯ ಜಾಗತಿಕ ಆಡಳಿತದ ಕುರಿತು ಬ್ರಿಕ್ಸ್‌ ನಾಯಕರ ಹೇಳಿಕೆಗೆ ಸಮ್ಮತಿಸಿದ್ದೇವೆ. ಇದು ರಾಷ್ಟ್ರೀಯ ನಿಯಂತ್ರಕ ಚೌಕಟ್ಟುಗಳು, ವಿಶ್ವಸಂಸ್ಥೆಯ ಚಾರ್ಟರ್ ಮತ್ತು ರಾಜ್ಯಗಳ ಸಾರ್ವಭೌಮತ್ವವನ್ನು ಗೌರವಿಸುವ ಮೂಲಕ ಸುಸ್ಥಿರ ಅಭಿವೃದ್ಧಿ ಹಾಗೂ ಸಮಗ್ರ ಬೆಳವಣಿಗೆಗಾಗಿ AI ತಂತ್ರಜ್ಞಾನಗಳ ಜವಾಬ್ದಾರಿಯುತ ಅಭಿವೃದ್ಧಿ, ನಿಯೋಜನೆ ಮತ್ತು ಬಳಕೆಯನ್ನು ಉತ್ತೇಜಿಸುವ ಗುರಿಯನ್ನು ಹೊಂದಿದೆ.

ಶಾಂತಿ, ಭದ್ರತೆ ಮತ್ತು ಅಂತಾರಾಷ್ಟ್ರೀಯ ಸ್ಥಿರತೆಯ ಉತ್ತೇಜನ

ವಿಶ್ವದ ಹಲವು ಭಾಗಗಳಲ್ಲಿ ನಡೆಯುತ್ತಿರುವ ಸಂಘರ್ಷಗಳು ಮತ್ತು ಅಂತಾರಾಷ್ಟ್ರೀಯ ವ್ಯವಸ್ಥೆಯಲ್ಲಿನ ಪ್ರಸ್ತುತ ಧ್ರುವೀಕರಣ ಹಾಗೂ ವಿಘಟನೆಯ ಸ್ಥಿತಿಯ ಬಗ್ಗೆ ನಾವು ಕಳವಳ ವ್ಯಕ್ತಪಡಿಸುತ್ತೇವೆ. ಜಾಗತಿಕ ಸೇನಾ ವೆಚ್ಚದಲ್ಲಿ ಗಣನೀಯವಾಗಿ ಹೆಚ್ಚಳವಾಗಿರುವ ಪ್ರಸ್ತುತ ಪ್ರವೃತ್ತಿಯ ಬಗ್ಗೆ ನಾವು ತೀವ್ರ ಆತಂಕ ವ್ಯಕ್ತಪಡಿಸುತ್ತೇವೆ, ಏಕೆಂದರೆ ಇದು ಅಭಿವೃದ್ಧಿಶೀಲ ರಾಷ್ಟ್ರಗಳಿಗೆ, ಅಭಿವೃದ್ಧಿಗಾಗಿ ಸಾಕಷ್ಟು ಹಣಕಾಸು ಒದಗಿಸುವಿಕೆಗೆ ಮಾರಕವಾಗಿದೆ. ಸುಸ್ಥಿರ ಅಭಿವೃದ್ಧಿ, ಹಸಿವು ಮತ್ತು ಬಡತನದ ನಿರ್ಮೂಲನೆ ಹಾಗೂ ಹವಾಮಾನ ಬದಲಾವಣೆಗೆ ಜಾಗತಿಕ ಪ್ರತಿಕ್ರಿಯೆಗೆ ಕೊಡುಗೆ ನೀಡುವುದನ್ನು ಒಳಗೊಂಡಂತೆ, ನಿರ್ಣಾಯಕ ಜಾಗತಿಕ ವಿಷಯಗಳ ಕುರಿತಾದ ವೈವಿಧ್ಯಮಯ ರಾಷ್ಟ್ರೀಯ ದೃಷ್ಟಿಕೋನಗಳು ಮತ್ತು ನಿಲುವುಗಳನ್ನು ಗೌರವಿಸುವ ಬಹುಪಕ್ಷೀಯ ದೃಷ್ಟಿಕೋನವನ್ನು ನಾವು ಪ್ರತಿಪಾದಿಸುತ್ತೇವೆ. ಇದೇ ವೇಳೆ, ಭದ್ರತೆಯನ್ನು ಹವಾಮಾನ ಬದಲಾವಣೆಯ ಕಾರ್ಯಸೂಚಿಯೊಂದಿಗೆ ಜೋಡಿಸುವ ಪ್ರಯತ್ನಗಳ ಬಗ್ಗೆ ನಾವು ತೀವ್ರ ಕಳವಳ ವ್ಯಕ್ತಪಡಿಸುತ್ತೇವೆ.

ಪ್ರಸ್ತುತ ಜಾಗತಿಕ ಸನ್ನಿವೇಶದಲ್ಲಿನ ಧ್ರುವೀಕರಣ ಮತ್ತು ಅಪನಂಬಿಕೆಯನ್ನು ನಾವು ಗಮನಿಸುತ್ತೇವೆ ಮತ್ತು ಅಂತಾರಾಷ್ಟ್ರೀಯ ಶಾಂತಿ ಹಾಗೂ ಭದ್ರತೆಯನ್ನು ಬಲಪಡಿಸಲು ಜಾಗತಿಕ ಕ್ರಮಕ್ಕೆ ಪ್ರೋತ್ಸಾಹ ನೀಡುತ್ತೇವೆ. ಸಂಘರ್ಷದ ಸಾಧ್ಯತೆಗಳನ್ನು ಕಡಿಮೆ ಮಾಡಲು, ಈ ಸವಾಲುಗಳಿಗೆ ಮತ್ತು ಸಂಬಂಧಿತ ಭದ್ರತಾ ಬೆದರಿಕೆಗಳಿಗೆ ರಾಜಕೀಯ-ರಾಜತಾಂತ್ರಿಕ ಕ್ರಮಗಳ ಮೂಲಕ ಪ್ರತಿಕ್ರಿಯಿಸಲು ನಾವು ಅಂತಾರಾಷ್ಟ್ರೀಯ ಸಮುದಾಯಕ್ಕೆ ಕರೆ ನೀಡುತ್ತೇವೆ. ಸಂಘರ್ಷಗಳ ಮೂಲ ಕಾರಣಗಳನ್ನು ಪರಿಹರಿಸುವುದು ಸೇರಿದಂತೆ, ಅವುಗಳನ್ನು ತಡೆಗಟ್ಟುವ ಪ್ರಯತ್ನಗಳಲ್ಲಿ ತೊಡಗಿಸಿಕೊಳ್ಳುವ ಅಗತ್ಯವನ್ನು ನಾವು ಒತ್ತಿ ಹೇಳುತ್ತೇವೆ. ಎಲ್ಲಾ ದೇಶಗಳ ನಡುವಿನ ಭದ್ರತೆಯು ಅವಿಭಾಜ್ಯವಾದುದು ಎಂದು ನಾವು ಪ್ರತಿಪಾದಿಸುತ್ತೇವೆ ಮತ್ತು ಸಂವಾದ, ಸಮಾಲೋಚನೆ ಹಾಗೂ ರಾಜತಾಂತ್ರಿಕತೆಯ ಮೂಲಕ ಅಂತಾರಾಷ್ಟ್ರೀಯ ವಿವಾದಗಳ ಶಾಂತಿಯುತ ಪರಿಹಾರಕ್ಕೆ ನಮ್ಮ ಬದ್ಧತೆಯನ್ನು ಪುನರುಚ್ಚರಿಸುತ್ತೇವೆ. ಸಂಘರ್ಷ ತಡೆಗಟ್ಟುವಿಕೆ ಮತ್ತು ಪರಿಹಾರದಲ್ಲಿ ಪ್ರಾದೇಶಿಕ ಸಂಸ್ಥೆಗಳ ಸಕ್ರಿಯ ಪಾತ್ರವನ್ನು ನಾವು ಪ್ರೋತ್ಸಾಹಿಸುತ್ತೇವೆ ಹಾಗೂ ಬಿಕ್ಕಟ್ಟುಗಳ ಶಾಂತಿಯುತ ಇತ್ಯರ್ಥಕ್ಕೆ ಪೂರಕವಾದ ಎಲ್ಲಾ ಪ್ರಯತ್ನಗಳನ್ನು ಬೆಂಬಲಿಸುತ್ತೇವೆ. ವಿಶ್ವಸಂಸ್ಥೆಯ ಸನ್ನದಿನ ಉದ್ದೇಶಗಳು ಮತ್ತು ತತ್ವಗಳಿಗೆ ಅನುಗುಣವಾಗಿ, ಬಿಕ್ಕಟ್ಟುಗಳನ್ನು ತಪ್ಪಿಸಲು ಮತ್ತು ಅವುಗಳ ಉಲ್ಬಣವನ್ನು ತಡೆಯಲು ಮಧ್ಯಸ್ಥಿಕೆ ಮತ್ತು ತಡೆಗಟ್ಟುವ ರಾಜತಾಂತ್ರಿಕತೆಯು ಅತ್ಯಗತ್ಯ ಸಾಧನಗಳಾಗಿವೆ ಎಂಬುದರ ಮಹತ್ವವನ್ನು ನಾವು ಒತ್ತಿ ಹೇಳುತ್ತೇವೆ. ಈ ನಿಟ್ಟಿನಲ್ಲಿ, ಸಶಸ್ತ್ರ ಸಂಘರ್ಷಗಳ ತಡೆಗಟ್ಟುವಿಕೆ, ವಿಶ್ವಸಂಸ್ಥೆಯ ಶಾಂತಿಪಾಲನಾ ಕಾರ್ಯಾಚರಣೆಗಳು, ಆಫ್ರಿಕನ್ ಒಕ್ಕೂಟದ ಶಾಂತಿ ಬೆಂಬಲ ಕಾರ್ಯಾಚರಣೆಗಳು, ಹಾಗೂ ಮಧ್ಯಸ್ಥಿಕೆ ಮತ್ತು ಶಾಂತಿ ಪ್ರಕ್ರಿಯೆಗಳ ಮೇಲೆ ಸಹಕಾರಕ್ಕಾಗಿನ ಮಾರ್ಗಗಳನ್ನು ಅನ್ವೇಷಿಸಲು ನಾವು ಒಪ್ಪುತ್ತೇವೆ.

ವಿಶ್ವದಾದ್ಯಂತ ಮಾನವೀಯ ಬಿಕ್ಕಟ್ಟುಗಳನ್ನು ನಿಭಾಯಿಸಲು ಬಹುಪಕ್ಷೀಯ ಸಹಕಾರವನ್ನು ಬಲಪಡಿಸುವ ನಮ್ಮ ದೃಢ ಬದ್ಧತೆಯನ್ನು ನಾವು ಪುನರುಚ್ಚರಿಸುತ್ತೇವೆ. ಈಗಾಗಲೇ ಸಾಕಷ್ಟಿಲ್ಲದೆ, ವಿಘಟಿತಗೊಂಡು ಮತ್ತು ಅನೇಕ ವೇಳೆ ರಾಜಕೀಯ ಪ್ರೇರಿತವಾಗಿದ್ದ ಅಂತಾರಾಷ್ಟ್ರೀಯ ಪ್ರತಿಕ್ರಿಯೆಗಳು ಮತ್ತಷ್ಟು ಕ್ಷೀಣಿಸುತ್ತಿರುವುದರ ಬಗ್ಗೆ ನಾವು ಕಳವಳ ವ್ಯಕ್ತಪಡಿಸುತ್ತೇವೆ. ಅಂತಾರಾಷ್ಟ್ರೀಯ ಮಾನವೀಯ ಕಾನೂನಿನ ಎಲ್ಲಾ ಉಲ್ಲಂಘನೆಗಳನ್ನು, ವಿಶೇಷವಾಗಿ ನಾಗರಿಕ ಮೂಲಸೌಕರ್ಯಗಳು ಸೇರಿದಂತೆ ಸಾಮಾನ್ಯ ನಾಗರಿಕರು ಮತ್ತು ನಾಗರಿಕ ವಸ್ತುಗಳ ಮೇಲೆ ಉದ್ದೇಶಪೂರ್ವಕವಾಗಿ ನಡೆಸುವ ದಾಳಿಗಳು, ಮಾನವೀಯ ನೆರವಿನ ಪ್ರವೇಶವನ್ನು ನಿರಾಕರಿಸುವುದು ಅಥವಾ ತಡೆಯೊಡ್ಡುವುದು, ಮತ್ತು ಮಾನವೀಯ ನೆರವಿನ ಸಿಬ್ಬಂದಿಯನ್ನೇ ಗುರಿಯಾಗಿಸುವುದನ್ನು ನಾವು ಬಲವಾಗಿ ಖಂಡಿಸುತ್ತೇವೆ. ಅಂತಾರಾಷ್ಟ್ರೀಯ ಮಾನವೀಯ ಕಾನೂನಿನ ಎಲ್ಲಾ ಉಲ್ಲಂಘನೆಗಳಿಗೂ ಜವಾಬ್ದಾರಿಯನ್ನು ನಿಗದಿಪಡಿಸುವ ಅಗತ್ಯವನ್ನು ನಾವು ಒತ್ತಿ ಹೇಳುತ್ತೇವೆ. ಇಂತಹ ಉಲ್ಲಂಘನೆಗಳು ತಕ್ಷಣದ ಸಂಕಟವನ್ನು ತೀವ್ರಗೊಳಿಸುವುದಲ್ಲದೆ, ಸಂಘರ್ಷದ ನಂತರದ ಪುನರ್ನಿರ್ಮಾಣಕ್ಕೆ ಅಗತ್ಯವಾದ ಭೌತಿಕ ಮತ್ತು ಸಾಮಾಜಿಕ ಅಡಿಪಾಯಗಳನ್ನು ನಾಶಪಡಿಸುವ ಮೂಲಕ ಶಾಶ್ವತ ಶಾಂತಿಯ ಸಾಧ್ಯತೆಗಳನ್ನೂ ದುರ್ಬಲಗೊಳಿಸುತ್ತವೆ. ಅಂತಾರಾಷ್ಟ್ರೀಯ ಮಾನವೀಯ ಕಾನೂನಿಗೆ ಗೌರವ, ಅದರ ಪಾಲನೆ ಮತ್ತು ಪರಿಣಾಮಕಾರಿ ಅನುಷ್ಠಾನವನ್ನು ಉತ್ತೇಜಿಸಲು ಬ್ರಿಕ್ಸ್ ಸದಸ್ಯರು ಕೈಗೊಂಡಿರುವ ಅಂತಾರಾಷ್ಟ್ರೀಯ ಪ್ರಯತ್ನಗಳನ್ನು ನಾವು ಮಾನ್ಯ ಮಾಡುತ್ತೇವೆ.

ಮಹಿಳೆಯರು, ಶಾಂತಿ ಮತ್ತು ಭದ್ರತೆ (WPS) ಕಾರ್ಯಸೂಚಿಯ ಸಂಪೂರ್ಣ ಅನುಷ್ಠಾನ ಮತ್ತು ಪ್ರಗತಿಗೆ ನಾವು ನಮ್ಮ ಬದ್ಧತೆಯನ್ನು ಪುನರುಚ್ಚರಿಸುತ್ತೇವೆ, ವಿಶೇಷವಾಗಿ ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯ ನಿರ್ಣಯ 1325 (2000) ರ 25ನೇ ವಾರ್ಷಿಕೋತ್ಸವದ ಹಿನ್ನೆಲೆಯಲ್ಲಿ ಇದು ಮಹತ್ವ ಪಡೆದಿದೆ. ಸಂಘರ್ಷ ತಡೆಗಟ್ಟುವಿಕೆ ಮತ್ತು ಇತ್ಯರ್ಥ, ಮಾನವೀಯ ನೆರವು, ಮಧ್ಯಸ್ಥಿಕೆ, ಶಾಂತಿ ಕಾರ್ಯಾಚರಣೆಗಳು, ಶಾಂತಿ ನಿರ್ಮಾಣ, ಮತ್ತು ಸಂಘರ್ಷದ ನಂತರದ ಪುನರ್ನಿರ್ಮಾಣ ಹಾಗೂ ಅಭಿವೃದ್ಧಿ ಸೇರಿದಂತೆ ಶಾಂತಿ ಮತ್ತು ಭದ್ರತಾ ಪ್ರಕ್ರಿಯೆಗಳ ಎಲ್ಲಾ ಹಂತಗಳಲ್ಲಿ ಮಹಿಳೆಯರ ಸಂಪೂರ್ಣ, ಸಮಾನ, ಸುರಕ್ಷಿತ ಮತ್ತು ಅರ್ಥಪೂರ್ಣ ಭಾಗವಹಿಸುವಿಕೆಯನ್ನು ಖಚಿತಪಡಿಸಿಕೊಳ್ಳುವ ಮಹತ್ವವನ್ನು ನಾವು ಮತ್ತಷ್ಟು ಪುನರುಚ್ಚರಿಸುತ್ತೇವೆ.

ಜೂನ್ 13, 2025 ರಿಂದ ಇಸ್ಲಾಮಿಕ್ ರಿಪಬ್ಲಿಕ್ ಆಫ್ ಇರಾನ್ ವಿರುದ್ಧ ನಡೆದ ಮಿಲಿಟರಿ ದಾಳಿಗಳನ್ನು ನಾವು ಖಂಡಿಸುತ್ತೇವೆ. ಇವು ಅಂತಾರಾಷ್ಟ್ರೀಯ ಕಾನೂನು ಮತ್ತು ವಿಶ್ವಸಂಸ್ಥೆಯ ಚಾರ್ಟರ್‌ ನ ಉಲ್ಲಂಘನೆಯಾಗಿವೆ. ಮಧ್ಯಪ್ರಾಚ್ಯದಲ್ಲಿನ ಭದ್ರತಾ ಪರಿಸ್ಥಿತಿಯ ನಂತರದ ಉಲ್ಬಣದ ಬಗ್ಗೆ ನಾವು ತೀವ್ರ ಕಳವಳ ವ್ಯಕ್ತಪಡಿಸುತ್ತೇವೆ. ಅಂತಾರಾಷ್ಟ್ರೀಯ ಕಾನೂನು ಮತ್ತು IAEA ದ ಸಂಬಂಧಿತ ನಿರ್ಣಯಗಳ ಉಲ್ಲಂಘನೆಯಾಗುವಂತೆ, ನಾಗರಿಕ ಮೂಲಸೌಕರ್ಯ ಮತ್ತು ಅಂತಾರಾಷ್ಟ್ರೀಯ ಅಣುಶಕ್ತಿ ಏಜೆನ್ಸಿ (IAEA) ಯ ಸಂಪೂರ್ಣ ಸುರಕ್ಷತೆಯ ಅಡಿಯಲ್ಲಿರುವ ಶಾಂತಿಯುತ ಪರಮಾಣು ಸೌಲಭ್ಯಗಳ ಮೇಲಿನ ಉದ್ದೇಶಪೂರ್ವಕ ದಾಳಿಗಳ ಬಗ್ಗೆಯೂ ನಾವು ಗಂಭೀರ ಕಳವಳ ವ್ಯಕ್ತಪಡಿಸುತ್ತೇವೆ. ಜನರು ಮತ್ತು ಪರಿಸರವನ್ನು ಹಾನಿಯಿಂದ ರಕ್ಷಿಸಲು, ಸಶಸ್ತ್ರ ಸಂಘರ್ಷಗಳ ಸಂದರ್ಭದಲ್ಲಿಯೂ ಪರಮಾಣು ಸುರಕ್ಷತೆ, ಭದ್ರತೆ ಮತ್ತು ನಿಯಂತ್ರಣಗಳನ್ನು ಯಾವಾಗಲೂ ಎತ್ತಿಹಿಡಿಯಬೇಕು. ಈ ಹಿನ್ನೆಲೆಯಲ್ಲಿ, ಪ್ರಾದೇಶಿಕ ಸವಾಲುಗಳನ್ನು ಎದುರಿಸುವ ಗುರಿಯನ್ನು ಹೊಂದಿರುವ ರಾಜತಾಂತ್ರಿಕ ಉಪಕ್ರಮಗಳಿಗೆ ನಮ್ಮ ಬೆಂಬಲವನ್ನು ನಾವು ಪುನರುಚ್ಚರಿಸುತ್ತೇವೆ. ಈ ವಿಷಯವನ್ನು ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯು ಗಂಭೀರವಾಗಿ ಪರಿಗಣಿಸಬೇಕೆಂದು ನಾವು ಕರೆ ನೀಡುತ್ತೇವೆ.

ಉಕ್ರೇನ್‌ ನಲ್ಲಿನ ಸಂಘರ್ಷಕ್ಕೆ ಸಂಬಂಧಿಸಿದಂತೆ, ವಿಶ್ವಸಂಸ್ಥೆಯ ಭದ್ರತಾ ಮಂಡಳಿ ಮತ್ತು ವಿಶ್ವಸಂಸ್ಥೆಯ ಸಾಮಾನ್ಯ ಸಭೆ ಸೇರಿದಂತೆ ಸೂಕ್ತ ವೇದಿಕೆಗಳಲ್ಲಿ ವ್ಯಕ್ತಪಡಿಸಿದ ನಮ್ಮ ರಾಷ್ಟ್ರೀಯ ನಿಲುವುಗಳನ್ನು ನಾವು ಪುನರುಚ್ಚರಿಸುತ್ತೇವೆ. ಸಂವಾದ ಮತ್ತು ರಾಜತಾಂತ್ರಿಕತೆಯ ಮೂಲಕ ಸಂಘರ್ಷದ ಶಾಂತಿಯುತ ಇತ್ಯರ್ಥವನ್ನು ಗುರಿಯಾಗಿಟ್ಟುಕೊಂಡು, ಆಫ್ರಿಕನ್ ಶಾಂತಿ ಉಪಕ್ರಮ ಮತ್ತು ಶಾಂತಿಗಾಗಿ ಸ್ನೇಹಿತರ ಗುಂಪಿನ ರಚನೆ ಸೇರಿದಂತೆ, ಮಧ್ಯಸ್ಥಿಕೆ ಮತ್ತು ಸದ್ಭಾವನಾ ಪ್ರಯತ್ನಗಳ ಸಂಬಂಧಿತ ಪ್ರಸ್ತಾವನೆಗಳನ್ನು ನಾವು ಮೆಚ್ಚುಗೆಯೊಂದಿಗೆ ಗಮನಿಸುತ್ತೇವೆ. ಪ್ರಸ್ತುತ ಪ್ರಯತ್ನಗಳು ಸುಸ್ಥಿರ ಶಾಂತಿ ಇತ್ಯರ್ಥಕ್ಕೆ ಕಾರಣವಾಗುತ್ತವೆ ಎಂದು ನಾವು ನಿರೀಕ್ಷಿಸುತ್ತೇವೆ.

ಮಧ್ಯಪ್ರಾಚ್ಯ ಮತ್ತು ಉತ್ತರ ಆಫ್ರಿಕಾ (MENA) ಪ್ರದೇಶದಲ್ಲಿ ನಿರಂತರ ಸಂಘರ್ಷಗಳು ಮತ್ತು ಅಸ್ಥಿರತೆಯ ಬಗ್ಗೆ ನಾವು ತೀವ್ರ ಕಳವಳ ವ್ಯಕ್ತಪಡಿಸುತ್ತೇವೆ. ಈ ನಿಟ್ಟಿನಲ್ಲಿ, ಮಾರ್ಚ್ 28, 2025 ರಂದು ನಡೆದ ಬ್ರಿಕ್ಸ್‌ ಉಪ ವಿದೇಶಾಂಗ ಸಚಿವರು ಮತ್ತು ವಿಶೇಷ ಪ್ರತಿನಿಧಿಗಳ ಸಭೆಯಲ್ಲಿ ಅಂಗೀಕರಿಸಿದ ಜಂಟಿ ಹೇಳಿಕೆಯನ್ನು ನಾವು ಅನುಮೋದಿಸುತ್ತೇವೆ.

ಆಕ್ರಮಿತ ಪ್ಯಾಲೆಸ್ಟೀನಿಯನ್ ಭೂಪ್ರದೇಶದಲ್ಲಿನ ಪರಿಸ್ಥಿತಿಯ ಬಗ್ಗೆ, ವಿಶೇಷವಾಗಿ ಗಾಝಾದ ಮೇಲೆ ಇಸ್ರೇಲ್‌ ನ ನಿರಂತರ ದಾಳಿಗಳು ಪುನರಾರಂಭಗೊಂಡಿರುವುದು ಮತ್ತು ಆ ಭೂಪ್ರದೇಶಕ್ಕೆ ಮಾನವೀಯ ನೆರವಿನ ಪ್ರವೇಶಕ್ಕೆ ಅಡ್ಡಿಯಾಗುತ್ತಿರುವುದರ ಬಗ್ಗೆ ನಮ್ಮ ಗಂಭೀರ ಕಳವಳವನ್ನು ನಾವು ಪುನರುಚ್ಚರಿಸುತ್ತೇವೆ. ಅಂತಾರಾಷ್ಟ್ರೀಯ ಕಾನೂನಿಗೆ, ನಿರ್ದಿಷ್ಟವಾಗಿ ಅಂತಾರಾಷ್ಟ್ರೀಯ ಮಾನವೀಯ ಕಾನೂನು ಮತ್ತು ಅಂತಾರಾಷ್ಟ್ರೀಯ ಮಾನವ ಹಕ್ಕುಗಳ ಕಾನೂನಿಗೆ, ಬದ್ಧವಾಗಿರಬೇಕೆಂದು ನಾವು ಕರೆ ನೀಡುತ್ತೇವೆ. ಹಸಿವನ್ನು ಯುದ್ಧದ ಅಸ್ತ್ರವಾಗಿ ಬಳಸುವುದನ್ನು ಒಳಗೊಂಡಂತೆ, ಅಂತಾರಾಷ್ಟ್ರೀಯ ಮಾನವೀಯ ಕಾನೂನಿನ (IHL) ಎಲ್ಲಾ ಉಲ್ಲಂಘನೆಗಳನ್ನು ಮತ್ತು ಮಾನವೀಯ ನೆರವನ್ನು ರಾಜಕೀಯಗೊಳಿಸುವ ಅಥವಾ ಮಿಲಿಟರೀಕರಣಗೊಳಿಸುವ ಪ್ರಯತ್ನಗಳನ್ನೂ ನಾವು ಖಂಡಿಸುತ್ತೇವೆ. ತಕ್ಷಣದ, ಶಾಶ್ವತ ಮತ್ತು ಬೇಷರತ್ ಕದನ ವಿರಾಮವನ್ನು ಸಾಧಿಸಲು, ಗಾಝಾ ಪಟ್ಟಿ ಮತ್ತು ಇತರ ಎಲ್ಲಾ ಆಕ್ರಮಿತ ಪ್ಯಾಲೆಸ್ಟೀನಿಯನ್ ಭೂಪ್ರದೇಶಗಳಿಂದ ಇಸ್ರೇಲಿ ಪಡೆಗಳ ಸಂಪೂರ್ಣ ವಾಪಸಾತಿಗೆ, ಅಂತಾರಾಷ್ಟ್ರೀಯ ಕಾನೂನನ್ನು ಉಲ್ಲಂಘಿಸಿ ಬಂಧನದಲ್ಲಿರಿಸಲಾದ ಎಲ್ಲಾ ಒತ್ತೆಯಾಳುಗಳು ಮತ್ತು ಕೈದಿಗಳ ಬಿಡುಗಡೆಗೆ, ಹಾಗೂ ನಿರಂತರ ಮತ್ತು ಅಡೆತಡೆಯಿಲ್ಲದ ಮಾನವೀಯ ನೆರವಿನ ಪ್ರವೇಶ ಮತ್ತು ವಿತರಣೆಗಾಗಿ, ಸಂಬಂಧಪಟ್ಟ ಪಕ್ಷಗಳು ಸದ್ಭಾವನೆಯಿಂದ ಮುಂದಿನ ಮಾತುಕತೆಗಳಲ್ಲಿ ತೊಡಗಿಸಿಕೊಳ್ಳಬೇಕೆಂದು ನಾವು ಆಗ್ರಹಿಸುತ್ತೇವೆ. ನಾವು UNRWAಗೆ ನಮ್ಮ ಸ್ಥಿರ ಬೆಂಬಲವನ್ನು ಪುನರುಚ್ಚರಿಸುತ್ತೇವೆ ಮತ್ತು ಅದರ ಐದು ಕಾರ್ಯಾಚರಣಾ ಕ್ಷೇತ್ರಗಳಲ್ಲಿ ಪ್ಯಾಲೆಸ್ಟೀನಿಯನ್ ನಿರಾಶ್ರಿತರಿಗೆ ಮೂಲಭೂತ ಸೇವೆಗಳನ್ನು ಒದಗಿಸಲು ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯು (UNGA) ಅದಕ್ಕೆ ನೀಡಿರುವ ಆದೇಶವನ್ನು ಸಂಪೂರ್ಣವಾಗಿ ಗೌರವಿಸುವ ಅಗತ್ಯವನ್ನು ಒತ್ತಿ ಹೇಳುತ್ತೇವೆ. ಸಂಬಂಧಪಟ್ಟ ಎಲ್ಲಾ ಪಕ್ಷಗಳು ಅಂತಾರಾಷ್ಟ್ರೀಯ ಕಾನೂನಿನಡಿಯಲ್ಲಿ ತಮ್ಮ ಜವಾಬ್ದಾರಿಗಳನ್ನು ಗೌರವಿಸಬೇಕೆಂದು, ಅತ್ಯಂತ ಸಂಯಮದಿಂದ ವರ್ತಿಸಬೇಕೆಂದು ಮತ್ತು ಉಲ್ಬಣಕಾರಿ ಕ್ರಮಗಳು ಹಾಗೂ ಪ್ರಚೋದನಕಾರಿ ಹೇಳಿಕೆಗಳನ್ನು ತಪ್ಪಿಸಬೇಕೆಂದು ನಾವು ಕರೆ ನೀಡುತ್ತೇವೆ. ಈ ನಿಟ್ಟಿನಲ್ಲಿ, ದಕ್ಷಿಣ ಆಫ್ರಿಕಾವು ಇಸ್ರೇಲ್ ವಿರುದ್ಧ ಹೂಡಿರುವ ಕಾನೂನು ಪ್ರಕ್ರಿಯೆಯಲ್ಲಿ ಅಂತಾರಾಷ್ಟ್ರೀಯ ನ್ಯಾಯಾಲಯದ (ICJ) ಮಧ್ಯಂತರ ಕ್ರಮಗಳನ್ನು ನಾವು ಗಮನಿಸುತ್ತೇವೆ. ಈ ಕ್ರಮಗಳು, ಇತರ ವಿಷಯಗಳ ಜೊತೆಗೆ, ಗಾಝಾದಲ್ಲಿ ಮಾನವೀಯ ನೆರವು ಒದಗಿಸುವುದನ್ನು ಖಚಿತಪಡಿಸಿಕೊಳ್ಳುವ ಇಸ್ರೇಲ್‌ ನ ಕಾನೂನುಬದ್ಧ ಜವಾಬ್ದಾರಿಯನ್ನು ಪುನರುಚ್ಚರಿಸಿವೆ.

ಗಾಝಾ ಪಟ್ಟಿಯು ಆಕ್ರಮಿತ ಪ್ಯಾಲೆಸ್ಟೀನಿಯನ್ ಭೂಪ್ರದೇಶದ ಒಂದು ಅವಿಭಾಜ್ಯ ಅಂಗವಾಗಿದೆ ಎಂಬುದನ್ನು ನಾವು ಸ್ಮರಿಸುತ್ತೇವೆ. ಈ ನಿಟ್ಟಿನಲ್ಲಿ, ಪಶ್ಚಿಮ ದಂಡೆ ಮತ್ತು ಗಾಝಾ ಪಟ್ಟಿಯನ್ನು ಪ್ಯಾಲೆಸ್ಟೀನಿಯನ್ ಪ್ರಾಧಿಕಾರದ ಅಡಿಯಲ್ಲಿ ಒಂದುಗೂಡಿಸುವ ಮಹತ್ವವನ್ನು ನಾವು ಒತ್ತಿ ಹೇಳುತ್ತೇವೆ ಮತ್ತು ತಮ್ಮ ಸ್ವತಂತ್ರ ಪ್ಯಾಲೆಸ್ಟೀನ್ ರಾಷ್ಟ್ರವನ್ನು ಹೊಂದುವ ಹಕ್ಕು ಸೇರಿದಂತೆ, ಪ್ಯಾಲೆಸ್ಟೀನಿಯನ್ ಜನರ ಸ್ವ-ನಿರ್ಣಯದ ಹಕ್ಕನ್ನು ನಾವು ಪುನರುಚ್ಚರಿಸುತ್ತೇವೆ.

ಸ್ವಾತಂತ್ರ್ಯ ಮತ್ತು ರಾಷ್ಟ್ರತ್ವಕ್ಕಾಗಿ ಪ್ಯಾಲೆಸ್ಟೀನಿಯನ್ನರ ನ್ಯಾಯಸಮ್ಮತ ಆಕಾಂಕ್ಷೆಗಳನ್ನು ಪೂರೈಸಲು ಅಗತ್ಯವಾದ ಸುಧಾರಣೆಗಳನ್ನು ಕೈಗೊಳ್ಳುವಲ್ಲಿ ಪ್ಯಾಲೆಸ್ಟೀನಿಯನ್ ಪ್ರಾಧಿಕಾರಕ್ಕೆ ಮತ್ತು ಆ ಭೂಪ್ರದೇಶದ ನಾಗರಿಕ ಮೂಲಸೌಕರ್ಯಗಳ ಶೀಘ್ರ ಪುನರ್ನಿರ್ಮಾಣಕ್ಕೆ ಬೆಂಬಲ ನೀಡಬೇಕೆಂದು ನಾವು ಅಂತಾರಾಷ್ಟ್ರೀಯ ಸಮುದಾಯಕ್ಕೆ ಕರೆ ನೀಡುತ್ತೇವೆ. ಮಾರ್ಚ್ 4, 2025 ರ 'ಪ್ಯಾಲೆಸ್ಟೀನ್ ಕುರಿತ ತುರ್ತು ಅರಬ್ ಶೃಂಗಸಭೆ'ಯಲ್ಲಿ ಒಪ್ಪಿಕೊಂಡಂತೆ, ಈ ಪುನರ್ನಿರ್ಮಾಣದಲ್ಲಿ ಪ್ಯಾಲೆಸ್ಟೀನಿಯನ್ನರೇ ಕೇಂದ್ರ ಪಾತ್ರ  ವಹಿಸಬೇಕು. ಈ ನಿಟ್ಟಿನಲ್ಲಿ, ಕೈರೋದಲ್ಲಿ ನಡೆಯಲಿರುವ ಮುಂಬರುವ ಪ್ರತಿಜ್ಞಾ ಸಮ್ಮೇಳನವನ್ನು ಕರೆಯುವ ಉಪಕ್ರಮವನ್ನು ನಾವು ಶ್ಲಾಘನೆಯೊಂದಿಗೆ ಗಮನಿಸುತ್ತೇವೆ. ಗಾಝಾವನ್ನು ಸ್ಥಿರಗೊಳಿಸುವ ಮತ್ತು ಪುನರ್ನಿರ್ಮಿಸುವ ಪ್ರಯತ್ನಗಳು, ಈ ದೀರ್ಘಕಾಲದ ಸಂಘರ್ಷಕ್ಕೆ ನ್ಯಾಯಯುತ ಮತ್ತು ಶಾಶ್ವತ ರಾಜಕೀಯ ಪರಿಹಾರದೊಂದಿಗೆ ಜೊತೆಜೊತೆಯಾಗಿ ಸಾಗಬೇಕು ಎಂದು ನಾವು ಒತ್ತಿ ಹೇಳುತ್ತೇವೆ. ಆಕ್ರಮಿತ ಪ್ಯಾಲೆಸ್ಟೀನಿಯನ್ ಭೂಪ್ರದೇಶದಿಂದ ಯಾವುದೇ ಪ್ಯಾಲೆಸ್ಟೀನಿಯನ್ ಜನಸಂಖ್ಯೆಯ, ಯಾವುದೇ ನೆಪದಲ್ಲಿ, ತಾತ್ಕಾಲಿಕ ಅಥವಾ ಶಾಶ್ವತ ಬಲವಂತದ ಸ್ಥಳಾಂತರವನ್ನು ಹಾಗೂ ಗಾಝಾ ಪಟ್ಟಿಯ ಭೂಪ್ರದೇಶದಲ್ಲಿ ಯಾವುದೇ ಭೌಗೋಳಿಕ ಅಥವಾ ಜನಸಂಖ್ಯಾ ಬದಲಾವಣೆಗಳನ್ನು ನಾವು ದೃಢವಾಗಿ ವಿರೋಧಿಸುತ್ತೇವೆ. ಅಕ್ರಮ ಆಕ್ರಮಣದ ಅಂತ್ಯವನ್ನು ಮತ್ತು ನ್ಯಾಯಯುತ ಹಾಗೂ ಶಾಶ್ವತ ಶಾಂತಿಗೆ ಅಡ್ಡಿಯಾಗುವ ಎಲ್ಲಾ ಪದ್ಧತಿಗಳನ್ನು ತಕ್ಷಣವೇ ನಿಲ್ಲಿಸಬೇಕೆಂದು ಅಂತಾರಾಷ್ಟ್ರೀಯ ಕಾನೂನು ಮತ್ತು ಅಂತಾರಾಷ್ಟ್ರೀಯ ನ್ಯಾಯಾಂಗ ಸಂಸ್ಥೆಗಳು ಆಗ್ರಹಿಸುತ್ತವೆ ಎಂದು ನಾವು ಪುನರುಚ್ಚರಿಸುತ್ತೇವೆ.

ಇಸ್ರೇಲ್-ಪ್ಯಾಲೆಸ್ಟೀನ್ ಸಂಘರ್ಷಕ್ಕೆ ನ್ಯಾಯಯುತ ಮತ್ತು ಶಾಶ್ವತ ಪರಿಹಾರವನ್ನು ಶಾಂತಿಯುತ ಮಾರ್ಗಗಳಿಂದ ಮಾತ್ರವೇ ಸಾಧಿಸಬಹುದು ಎಂಬುದನ್ನು ನಾವು ಪುನರುಚ್ಚರಿಸುತ್ತೇವೆ. ಈ ಪರಿಹಾರವು, ಸ್ವ-ನಿರ್ಣಯ ಹಾಗೂ ಸ್ವದೇಶಕ್ಕೆ ಮರಳುವ ಹಕ್ಕುಗಳನ್ನು ಒಳಗೊಂಡಂತೆ, ಪ್ಯಾಲೆಸ್ಟೀನಿಯನ್ ಜನರ ನ್ಯಾಯಸಮ್ಮತ ಹಕ್ಕುಗಳ ಈಡೇರಿಕೆಯನ್ನು ಅವಲಂಬಿಸಿದೆ. ಎರಡು-ರಾಷ್ಟ್ರ ಪರಿಹಾರಕ್ಕೆ ನಮ್ಮ ಅಚಲ ಬದ್ಧತೆಯ ಹಿನ್ನೆಲೆಯಲ್ಲಿ, ವಿಶ್ವಸಂಸ್ಥೆಯಲ್ಲಿ ಪ್ಯಾಲೆಸ್ಟೀನ್ ರಾಷ್ಟ್ರದ ಸಂಪೂರ್ಣ ಸದಸ್ಯತ್ವಕ್ಕೆ ನಮ್ಮ ಬೆಂಬಲವನ್ನು ನಾವು ಪುನಃ ದೃಢೀಕರಿಸುತ್ತೇವೆ. ಈ ಪರಿಹಾರವು ಅಂತಾರಾಷ್ಟ್ರೀಯ ಕಾನೂನು, ವಿಶ್ವಸಂಸ್ಥೆಯ ಭದ್ರತಾ ಮಂಡಳಿ ಮತ್ತು ಸಾಮಾನ್ಯ ಸಭೆಯ ಸಂಬಂಧಿತ ನಿರ್ಣಯಗಳು, ಹಾಗೂ 'ಅರಬ್ ಶಾಂತಿ ಉಪಕ್ರಮ'ಕ್ಕೆ ಅನುಗುಣವಾಗಿರಬೇಕು. ಇದರಲ್ಲಿ ಸಾರ್ವಭೌಮ, ಸ್ವತಂತ್ರ ಮತ್ತು ಕಾರ್ಯಸಾಧ್ಯವಾದ ಪ್ಯಾಲೆಸ್ಟೀನ್ ರಾಷ್ಟ್ರದ ಸ್ಥಾಪನೆಯು ಸೇರಿದ್ದು, ಈ ರಾಷ್ಟ್ರವು ಅಂತಾರಾಷ್ಟ್ರೀಯವಾಗಿ ಮಾನ್ಯತೆ ಪಡೆದ 1967ರ ಗಡಿಗಳೊಳಗೆ ಇರಬೇಕು. ಇದರಲ್ಲಿ ಗಾಝಾ ಪಟ್ಟಿ ಮತ್ತು ಪಶ್ಚಿಮ ದಂಡೆ ಸೇರಿರಬೇಕು, ಮತ್ತು ಪೂರ್ವ ಜೆರುಸಲೇಂ ಅದರ ರಾಜಧಾನಿಯಾಗಿರಬೇಕು. ಆ ಮೂಲಕ ಶಾಂತಿ ಮತ್ತು ಭದ್ರತೆಯೊಂದಿಗೆ, ಎರಡು ರಾಷ್ಟ್ರಗಳು ಅಕ್ಕಪಕ್ಕದಲ್ಲಿ ಸಹಬಾಳ್ವೆ ನಡೆಸುವ ದೃಷ್ಟಿಕೋನವನ್ನು ಸಾಧಿಸಬಹುದು. ಎಲ್ಲಾ ಸಂಬಂಧಿತ ಅಂತಾರಾಷ್ಟ್ರೀಯ ಸಂಸ್ಥೆಗಳಲ್ಲಿ, ಬಹುಪಕ್ಷೀಯ ಹಣಕಾಸು ಸಂಸ್ಥೆಗಳು ಸೇರಿದಂತೆ, ಪ್ಯಾಲೆಸ್ಟೀನ್‌ ಗೆ ಸಮರ್ಪಕ ಪ್ರಾತಿನಿಧ್ಯದ ಅಗತ್ಯವಿದೆ ಮತ್ತು ಅವುಗಳ ಸಂಪನ್ಮೂಲಗಳಿಗೆ ಪ್ರವೇಶವನ್ನು ನೀಡಬೇಕು ಎಂಬುದನ್ನು ನಾವು ಪ್ರತಿಪಾದಿಸುತ್ತೇವೆ. ತುರ್ತು ಕದನ ವಿರಾಮಕ್ಕಾಗಿ, ಮಾನವೀಯ ನೆರವಿನ ವಿತರಣೆಯನ್ನು ಚುರುಕುಗೊಳಿಸಲು ಮತ್ತು ಈ ವಲಯದಲ್ಲಿ ಶಾಶ್ವತ ಹಾಗೂ ಸುಸ್ಥಿರ ಶಾಂತಿಯನ್ನು ಸಾಧಿಸಲು ಬ್ರಿಕ್ಸ್ ಸದಸ್ಯರು ನಡೆಸುತ್ತಿರುವ ನಿರಂತರ ಪ್ರಯತ್ನಗಳನ್ನು ನಾವು ಸ್ವಾಗತಿಸುತ್ತೇವೆ.

ಲೆಬನಾನ್‌ ನಲ್ಲಿನ ಕದನ ವಿರಾಮವನ್ನು ನಾವು ಸ್ವಾಗತಿಸುತ್ತೇವೆ ಮತ್ತು ಎಲ್ಲಾ ಪಕ್ಷಗಳು ಅದರ ನಿಯಮಗಳನ್ನು ಕಟ್ಟುನಿಟ್ಟಾಗಿ ಪಾಲಿಸಬೇಕೆಂದು ಹಾಗೂ ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯ 1701ನೇ ನಿರ್ಣಯವನ್ನು ಸಂಪೂರ್ಣವಾಗಿ ಜಾರಿಗೆ ತರಬೇಕೆಂದು ಕರೆ ನೀಡುತ್ತೇವೆ. ಕದನ ವಿರಾಮದ ನಿರಂತರ ಉಲ್ಲಂಘನೆಗಳನ್ನು ಹಾಗೂ ಲೆಬನಾನ್ ‌ನ ಸಾರ್ವಭೌಮತ್ವ ಮತ್ತು ಪ್ರಾದೇಶಿಕ ಅಖಂಡತೆಯ ಉಲ್ಲಂಘನೆಗಳನ್ನು ನಾವು ಖಂಡಿಸುತ್ತೇವೆ. ಲೆಬನಾನ್ ಸರ್ಕಾರದೊಂದಿಗೆ ಒಪ್ಪಿಕೊಂಡ ನಿಯಮಗಳನ್ನು ಗೌರವಿಸಬೇಕೆಂದು ಮತ್ತು ದಕ್ಷಿಣ ಲೆಬನಾನ್‌ನಲ್ಲಿ ತಾವು ಇನ್ನೂ ಉಳಿದುಕೊಂಡಿರುವ ಐದು ಸ್ಥಳಗಳನ್ನು ಒಳಗೊಂಡಂತೆ, ಲೆಬನಾನ್ ‌ನ ಎಲ್ಲಾ ಭೂಪ್ರದೇಶದಿಂದ ತನ್ನ ಆಕ್ರಮಣಕಾರಿ ಪಡೆಗಳನ್ನು ಹಿಂತೆಗೆದುಕೊಳ್ಳಬೇಕೆಂದು ನಾವು ಇಸ್ರೇಲ್‌ಗೆ ಕರೆ ನೀಡುತ್ತೇವೆ.

ಸಿರಿಯಾದ ಸಾರ್ವಭೌಮತ್ವ, ಸ್ವಾತಂತ್ರ್ಯ, ಏಕತೆ ಮತ್ತು ಪ್ರಾದೇಶಿಕ ಅಖಂಡತೆಗೆ ನಮ್ಮ ಬದ್ಧತೆಯನ್ನು ನಾವು ಪುನರುಚ್ಚರಿಸುತ್ತೇವೆ. ಭದ್ರತಾ ಮಂಡಳಿಯ 2254 (2015)ನೇ ನಿರ್ಣಯದ ತತ್ವಗಳನ್ನು ಆಧರಿಸಿದ, ಸಿರಿಯನ್ನರ ನೇತೃತ್ವದ, ಸಿರಿಯನ್ನರಿಗೇ ಸೇರಿದ, ಹಾಗೂ ವಿಶ್ವಸಂಸ್ಥೆಯ ಸಹಕಾರದೊಂದಿಗೆ ನಡೆಯುವ ಶಾಂತಿಯುತ ಮತ್ತು ಎಲ್ಲರನ್ನೂ ಒಳಗೊಳ್ಳುವ ರಾಜಕೀಯ ಪ್ರಕ್ರಿಯೆಗೆ ನಾವು ಕರೆ ನೀಡುತ್ತೇವೆ. ಈ ಪ್ರಕ್ರಿಯೆಯು, ತಾರತಮ್ಯವಿಲ್ಲದೆ, ನಾಗರಿಕ ಜನಸಂಖ್ಯೆಯ ಭದ್ರತೆ ಮತ್ತು ಯೋಗಕ್ಷೇಮವನ್ನು ಖಚಿತಪಡಿಸುವ ರೀತಿಯಲ್ಲಿರಬೇಕು. ಸಿರಿಯಾದ ವಿವಿಧ ಪ್ರಾಂತ್ಯಗಳಲ್ಲಿ, ದೇಶದ ಸಮುದಾಯಗಳ ನಡುವೆ ನಡೆಸಲಾಗುತ್ತಿರುವ ಹಿಂಸಾಚಾರವನ್ನು ನಾವು ಖಂಡಿಸುತ್ತೇವೆ. ಇತ್ತೀಚೆಗೆ 'ಮಾರ್ ಇಲಿಯಾಸ್ ಚರ್ಚ್' ಮತ್ತು 'ರಿಫ್ ದಿಮಾಶ್ಕ್' ಮೇಲೆ ನಡೆದ ಬಾಂಬ್ ದಾಳಿಗಳು ಸೇರಿದಂತೆ, ಸಿರಿಯಾದಲ್ಲಿ ISIL (ದಾಯಿಶ್) ಮತ್ತು ಅಲ್-ಖೈದಾ ಸಂಯೋಜಿತ ಸಂಘಟನೆಗಳಿಂದ ಭಯೋತ್ಪಾದಕ ಚಟುವಟಿಕೆಗಳು ಮುಂದುವರೆದಿರುವುದನ್ನೂ ನಾವು ಖಂಡಿಸುತ್ತೇವೆ ಮತ್ತು ಈ ಭಯೋತ್ಪಾದಕ ದಾಳಿಗಳಲ್ಲಿ ಬಲಿಯಾದವರ ಕುಟುಂಬಗಳಿಗೆ ನಮ್ಮ ಪ್ರಾಮಾಣಿಕ ಸಂತಾಪ ಮತ್ತು ಸಹಾನುಭೂತಿಯನ್ನು ವ್ಯಕ್ತಪಡಿಸುತ್ತೇವೆ. ಸಿರಿಯಾದ ಭೂಪ್ರದೇಶದಲ್ಲಿ ವಿದೇಶಿ ಭಯೋತ್ಪಾದಕ ಹೋರಾಟಗಾರರ ಉಪಸ್ಥಿತಿಯಿಂದ ಉಂಟಾಗಿರುವ ಬೆದರಿಕೆಯನ್ನೂ, ಹಾಗೂ ಸಿರಿಯಾದಿಂದ ಪ್ರಾದೇಶಿಕ ದೇಶಗಳಿಗೆ ಭಯೋತ್ಪಾದಕರು ಹರಡುವ ಅಪಾಯವನ್ನೂ ನಾವು ಖಂಡಿಸುತ್ತೇವೆ. ಸಿರಿಯಾವು ಎಲ್ಲಾ ರೀತಿಯ ಭಯೋತ್ಪಾದನೆ ಮತ್ತು ಉಗ್ರವಾದವನ್ನು ದೃಢವಾಗಿ ವಿರೋಧಿಸಬೇಕು ಮತ್ತು ಭಯೋತ್ಪಾದನೆಯ ಕುರಿತು ಅಂತಾರಾಷ್ಟ್ರೀಯ ಸಮುದಾಯದ ಕಳವಳಗಳಿಗೆ ಸ್ಪಂದಿಸಲು ಮೂರ್ತ ಕ್ರಮಗಳನ್ನು ಕೈಗೊಳ್ಳಬೇಕು. ಸಿರಿಯಾದ ಮೇಲಿನ ಏಕಪಕ್ಷೀಯ ನಿರ್ಬಂಧಗಳನ್ನು ತೆಗೆದುಹಾಕಿರುವುದನ್ನು ನಾವು ಸ್ವಾಗತಿಸುತ್ತೇವೆ ಮತ್ತು ಇದು ಅಭಿವೃದ್ಧಿ ಹಾಗೂ ಸ್ಥಿರತೆಯನ್ನು ಪೋಷಿಸುವ ರೀತಿಯಲ್ಲಿ ಸಿರಿಯಾದ ಆರ್ಥಿಕತೆಯನ್ನು ಪುನಶ್ಚೇತನಗೊಳಿಸಲು ಮತ್ತು ಪುನರ್ನಿರ್ಮಾಣದ ಹಂತವನ್ನು ಪ್ರಾರಂಭಿಸಲು ಬೆಂಬಲ ನೀಡುತ್ತದೆ ಎಂದು ನಾವು ಆಶಿಸುತ್ತೇವೆ. ಅಂತಾರಾಷ್ಟ್ರೀಯ ಕಾನೂನು ಮತ್ತು 1974ರ 'ಸೇನಾ ವಾಪಸಾತಿ ಒಪ್ಪಂದ'ದ ಸ್ಪಷ್ಟ ಉಲ್ಲಂಘನೆಯಾಗಿರುವ, ಸಿರಿಯಾದ ಭಾಗಗಳ ಮೇಲಿನ ಆಕ್ರಮಣವನ್ನು ಬಲವಾಗಿ ಖಂಡಿಸುತ್ತಲೇ, ಸಿರಿಯಾದ ಭೂಪ್ರದೇಶದಿಂದ ತನ್ನ ಪಡೆಗಳನ್ನು ವಿಳಂಬವಿಲ್ಲದೆ ಹಿಂತೆಗೆದುಕೊಳ್ಳಬೇಕೆಂದು ನಾವು ಇಸ್ರೇಲ್‌ ಗೆ ಆಗ್ರಹಿಸುತ್ತೇವೆ.

'ಆಫ್ರಿಕಾದ ಸಮಸ್ಯೆಗಳಿಗೆ ಆಫ್ರಿಕಾದ ಪರಿಹಾರಗಳು' ಎಂಬ ತತ್ವವು ಆಫ್ರಿಕಾ ಖಂಡದಲ್ಲಿನ ಸಂಘರ್ಷ ಪರಿಹಾರಕ್ಕೆ ಆಧಾರವಾಗಿ ಮುಂದುವರೆಯಬೇಕು ಎಂದು ನಾವು ಪುನರುಚ್ಚರಿಸುತ್ತೇವೆ. ಸಂಘರ್ಷ ತಡೆಗಟ್ಟುವಿಕೆ, ನಿರ್ವಹಣೆ ಮತ್ತು ಪರಿಹಾರದಲ್ಲಿ ಆಫ್ರಿಕನ್ ಒಕ್ಕೂಟವು ವಹಿಸುತ್ತಿರುವ ನಿರ್ಣಾಯಕ ಪಾತ್ರವನ್ನು ನಾವು ಗುರುತಿಸುತ್ತೇವೆ. ಆಫ್ರಿಕನ್ ಒಕ್ಕೂಟ ಮತ್ತು ಆಫ್ರಿಕಾದ ಉಪ-ಪ್ರಾದೇಶಿಕ ಸಂಸ್ಥೆಗಳು ಕೈಗೊಂಡಿರುವ ಪ್ರಯತ್ನಗಳು ಸೇರಿದಂತೆ, ಆಫ್ರಿಕಾ ಖಂಡದಲ್ಲಿನ ಶಾಂತಿ ಪ್ರಯತ್ನಗಳಿಗೆ ನಮ್ಮ ಬೆಂಬಲವನ್ನು ಪುನರುಚ್ಚರಿಸುತ್ತೇವೆ. ಈ ನಿಟ್ಟಿನಲ್ಲಿ, ಆಫ್ರಿಕಾ ಖಂಡದಲ್ಲಿ ಆಫ್ರಿಕನ್ ಒಕ್ಕೂಟದ ಶಾಂತಿ ಬೆಂಬಲ ಕಾರ್ಯಾಚರಣೆಗಳು, ಮಧ್ಯಸ್ಥಿಕೆ ಪ್ರಯತ್ನಗಳು, ಶಾಂತಿ ಪ್ರಕ್ರಿಯೆಗಳು ಮತ್ತು ವ್ಯಾಪಕವಾದ ಶಾಂತಿ-ನಿರ್ಮಾಣ ಉಪಕ್ರಮಗಳನ್ನು ಬೆಂಬಲಿಸಲು ಹೊಸ ಮಾರ್ಗಗಳನ್ನು ಪರಿಗಣಿಸಲು ನಾವು ಬದ್ಧರಾಗಿದ್ದೇವೆ.

ಶಾಶ್ವತ ಶಾಂತಿ ಮತ್ತು ಸುಸ್ಥಿರ ಅಭಿವೃದ್ಧಿಯ ತಮ್ಮ ಅನ್ವೇಷಣೆಯಲ್ಲಿ ಆಫ್ರಿಕನ್ ದೇಶಗಳು ಮತ್ತು ಸಂಸ್ಥೆಗಳು ಮಾಡಿರುವ ಪ್ರಯತ್ನಗಳು ಮತ್ತು ಸಾಧನೆಗಳನ್ನು ನಾವು ಶ್ಲಾಘಿಸುತ್ತೇವೆ. ಆದಾಗ್ಯೂ, ಆಫ್ರಿಕಾದ ಕೆಲವು ವಲಯಗಳಲ್ಲಿ ಹೊಸ ಮತ್ತು ದೀರ್ಘಕಾಲದ ಸಶಸ್ತ್ರ ಸಂಘರ್ಷಗಳಿಂದ ಉಂಟಾಗಿರುವ ತೀವ್ರ ಮಾನವೀಯ ಬಿಕ್ಕಟ್ಟುಗಳ ಬಗ್ಗೆ, ವಿಶೇಷವಾಗಿ ಸುಡಾನ್, ಗ್ರೇಟ್ ಲೇಕ್ಸ್ ವಲಯ ಮತ್ತು ಹಾರ್ನ್ ಆಫ್ ಆಫ್ರಿಕಾದಲ್ಲಿನ ಸಂಘರ್ಷಗಳ ವಿನಾಶಕಾರಿ ಪರಿಣಾಮಗಳ ಬಗ್ಗೆ ನಾವು ಗಂಭೀರ ಕಳವಳ ವ್ಯಕ್ತಪಡಿಸುತ್ತೇವೆ. ಈ ಬಿಕ್ಕಟ್ಟುಗಳಿಗೆ ರಾಜಕೀಯ ಪರಿಹಾರಗಳನ್ನು ಕಂಡುಕೊಳ್ಳುವ ಗುರಿ ಹೊಂದಿರುವ ಪ್ರಯತ್ನಗಳಿಗೆ ನಮ್ಮ ಬೆಂಬಲವನ್ನು ನಾವು ಪುನರುಚ್ಚರಿಸುತ್ತೇವೆ, ಹಗೆತನವನ್ನು ಕೊನೆಗಾಣಿಸುವಂತೆ ಮತ್ತೊಮ್ಮೆ ಕರೆ ನೀಡುತ್ತೇವೆ ಮತ್ತು ಸಂಘರ್ಷಗಳ ಶಾಂತಿಯುತ ಪರಿಹಾರದ ಅಗತ್ಯವನ್ನು ಒತ್ತಿ ಹೇಳುತ್ತೇವೆ.

ಸುಡಾನ್ ‌ನಲ್ಲಿನ ಪರಿಸ್ಥಿತಿಯು ಮಾನವೀಯ ಬಿಕ್ಕಟ್ಟಿಗೆ ಕಾರಣವಾಗಿರುವುದರ ಬಗ್ಗೆ ಮತ್ತು ಉಗ್ರವಾದ ಹಾಗೂ ಭಯೋತ್ಪಾದನೆಯ ಪ್ರಸರಣದ ಹೆಚ್ಚುತ್ತಿರುವ ಅಪಾಯದ ಬಗ್ಗೆ ನಾವು ತೀವ್ರ ಕಳವಳಗೊಂಡಿದ್ದೇವೆ. ಈ ನಿಟ್ಟಿನಲ್ಲಿ ನಮ್ಮ ನಿಲುವುಗಳನ್ನು ಪುನರುಚ್ಚರಿಸುತ್ತಾ, ತಕ್ಷಣದ, ಶಾಶ್ವತ ಮತ್ತು ಬೇಷರತ್ ಕದನ ವಿರಾಮಕ್ಕೆ ಹಾಗೂ ಸಂಘರ್ಷದ ಶಾಂತಿಯುತ ಪರಿಹಾರಕ್ಕೆ ನಾವು ಕರೆ ನೀಡುತ್ತೇವೆ. ಸುಡಾನ್‌ನ ಜನಸಂಖ್ಯೆಗೆ ನಿರಂತರ, ತುರ್ತು ಮತ್ತು ಅಡೆತಡೆಯಿಲ್ಲದ ಮಾನವೀಯ ನೆರವಿನ ಪ್ರವೇಶದ ಅಗತ್ಯವನ್ನು ಹಾಗೂ ಸುಡಾನ್ ಮತ್ತು ಅದರ ನೆರೆಯ ದೇಶಗಳಿಗೆ ಮಾನವೀಯ ನೆರವನ್ನು ಹೆಚ್ಚಿಸುವ ಅಗತ್ಯವನ್ನೂ ನಾವು ಒತ್ತಿ ಹೇಳುತ್ತೇವೆ.

ಹೈಟಿಯಲ್ಲಿ ಭದ್ರತೆ, ಮಾನವೀಯ ಮತ್ತು ಆರ್ಥಿಕ ಪರಿಸ್ಥಿತಿಗಳು ನಿರಂತರವಾಗಿ ಹದಗೆಡುತ್ತಿರುವ ಬಗ್ಗೆ ನಾವು ತೀವ್ರ ಕಳವಳ ವ್ಯಕ್ತಪಡಿಸುತ್ತೇವೆ. ಭದ್ರತೆ ಮತ್ತು ಅಭಿವೃದ್ಧಿ ಒಂದಕ್ಕೊಂದು ಪೂರಕವಾಗಿ ಸಾಗುತ್ತವೆ ಎಂಬುದನ್ನು ನಾವು ಪುನರುಚ್ಚರಿಸುತ್ತೇವೆ. ಪ್ರಸ್ತುತ ಬಿಕ್ಕಟ್ಟಿಗೆ ಹೈಟಿ ನೇತೃತ್ವದ ಪರಿಹಾರದ ಅಗತ್ಯವಿದೆ. ಇದು ಸ್ಥಳೀಯ ರಾಜಕೀಯ ಶಕ್ತಿಗಳು, ಸಂಸ್ಥೆಗಳು ಮತ್ತು ಸಮಾಜದ ನಡುವೆ ರಾಷ್ಟ್ರೀಯ ಸಂವಾದ ಮತ್ತು ಒಮ್ಮತ ನಿರ್ಮಾಣವನ್ನು ಒಳಗೊಂಡಿದೆ. ಹೈಟಿಯು ಗ್ಯಾಂಗ್‌ಗಳನ್ನು ನಿಶ್ಯಸ್ತ್ರಗೊಳಿಸಲು, ಭದ್ರತಾ ಪರಿಸ್ಥಿತಿಯನ್ನು ಹೆಚ್ಚಿಸಲು ಮತ್ತು ದೇಶದಲ್ಲಿ ದೀರ್ಘಕಾಲೀನ ಸಾಮಾಜಿಕ ಹಾಗೂ ಆರ್ಥಿಕ ಅಭಿವೃದ್ಧಿಗೆ ಅಡಿಪಾಯ ಹಾಕಲು ನಡೆಸುತ್ತಿರುವ ಪ್ರಯತ್ನಗಳಿಗೆ ಅಂತಾರಾಷ್ಟ್ರೀಯ ಸಮುದಾಯವು ಬೆಂಬಲ ನೀಡಬೇಕೆಂದು ನಾವು ಕರೆ ನೀಡುತ್ತೇವೆ. ವಿಶ್ವಸಂಸ್ಥೆಯ ಪಾತ್ರವನ್ನು ನಾವು ಬೆಂಬಲಿಸುತ್ತೇವೆ ಮತ್ತು ಹೈಟಿಯ ಬಹುಮುಖಿ ಬಿಕ್ಕಟ್ಟುಗಳನ್ನು ಪರಿಣಾಮಕಾರಿಯಾಗಿ ನಿಭಾಯಿಸಲು ಅಂತಾರಾಷ್ಟ್ರೀಯ ಸಹಕಾರದ ಅಗತ್ಯವನ್ನು ನಾವು ಎತ್ತಿ ತೋರಿಸುತ್ತೇವೆ.

ಯಾವುದೇ ಭಯೋತ್ಪಾದಕ ಕೃತ್ಯಗಳನ್ನು, ಅವುಗಳ ಪ್ರೇರಣೆ ಏನೇ ಇರಲಿ, ಯಾವಾಗ, ಎಲ್ಲಿ, ಮತ್ತು ಯಾರಿಂದಲೇ ಆಗಲಿ, ಅವುಗಳನ್ನು ನಾವು ಅಪರಾಧ ಮತ್ತು ಸಮರ್ಥಿಸಲಾಗದವು ಎಂದು ಬಲವಾಗಿ ಖಂಡಿಸುತ್ತೇವೆ. 2025ರ ಏಪ್ರಿಲ್ 22ರಂದು ಜಮ್ಮು ಮತ್ತು ಕಾಶ್ಮೀರದಲ್ಲಿ ನಡೆದ ಭಯೋತ್ಪಾದಕ ದಾಳಿಯನ್ನು ನಾವು ತೀವ್ರವಾಗಿ ಖಂಡಿಸುತ್ತೇವೆ. ಈ ದಾಳಿಯಲ್ಲಿ 26 ಜನರು ಸಾವನ್ನಪ್ಪಿದ್ದು, ಅನೇಕರು ಗಾಯಗೊಂಡಿದ್ದಾರೆ. ಗಡಿಯಾಚೆಗಿನ ಭಯೋತ್ಪಾದಕರ ಚಲನವಲನ, ಭಯೋತ್ಪಾದನೆಗೆ ಹಣಕಾಸು ಒದಗಿಸುವಿಕೆ ಮತ್ತು ಸುರಕ್ಷಿತ ಆಶ್ರಯತಾಣಗಳನ್ನು ನೀಡುವುದನ್ನು ಒಳಗೊಂಡಂತೆ, ಭಯೋತ್ಪಾದನೆಯ ಎಲ್ಲಾ ರೂಪಗಳು ಮತ್ತು ಅಭಿವ್ಯಕ್ತಿಗಳನ್ನು ಎದುರಿಸುವ ನಮ್ಮ ಬದ್ಧತೆಯನ್ನು ನಾವು ಪುನರುಚ್ಚರಿಸುತ್ತೇವೆ. ಭಯೋತ್ಪಾದನೆಯನ್ನು ಯಾವುದೇ ಧರ್ಮ, ರಾಷ್ಟ್ರೀಯತೆ, ನಾಗರಿಕತೆ ಅಥವಾ ಜನಾಂಗೀಯ ಗುಂಪಿನೊಂದಿಗೆ ಸಂಬಂಧಿಸಬಾರದು. ಭಯೋತ್ಪಾದಕ ಚಟುವಟಿಕೆಗಳಲ್ಲಿ ಭಾಗಿಯಾಗಿರುವ ಮತ್ತು ಅವರಿಗೆ ಬೆಂಬಲ ನೀಡುವ ಎಲ್ಲರನ್ನೂ ಸಂಬಂಧಿತ ರಾಷ್ಟ್ರೀಯ ಮತ್ತು ಅಂತಾರಾಷ್ಟ್ರೀಯ ಕಾನೂನಿನ ಅಡಿಯಲ್ಲಿ ಹೊಣೆಗಾರರನ್ನಾಗಿಸಬೇಕು ಮತ್ತು ನ್ಯಾಯಕ್ಕೆ ತರಬೇಕು. ಭಯೋತ್ಪಾದನೆಯ ವಿಷಯದಲ್ಲಿ ಶೂನ್ಯ ಸಹಿಷ್ಣುತೆಯನ್ನು ಖಚಿತಪಡಿಸಿಕೊಳ್ಳಬೇಕೆಂದು ಮತ್ತು ಭಯೋತ್ಪಾದನೆಯನ್ನು ಎದುರಿಸುವಲ್ಲಿ ಇಬ್ಬಗೆಯ ನೀತಿಯನ್ನು ತಿರಸ್ಕರಿಸಬೇಕೆಂದು ನಾವು ಆಗ್ರಹಿಸುತ್ತೇವೆ. ಭಯೋತ್ಪಾದನೆಯನ್ನು ಎದುರಿಸುವಲ್ಲಿ ರಾಷ್ಟ್ರಗಳ ಪ್ರಾಥಮಿಕ ಜವಾಬ್ದಾರಿಯನ್ನು ನಾವು ಒತ್ತಿ ಹೇಳುತ್ತೇವೆ. ಭಯೋತ್ಪಾದಕ ಬೆದರಿಕೆಗಳನ್ನು ತಡೆಗಟ್ಟಲು ಮತ್ತು ಪ್ರತಿರೋಧಿಸಲು ಕೈಗೊಳ್ಳುವ ಜಾಗತಿಕ ಪ್ರಯತ್ನಗಳು ಅಂತಾರಾಷ್ಟ್ರೀಯ ಕಾನೂನಿನ ಅಡಿಯಲ್ಲಿ ತಮ್ಮ ಜವಾಬ್ದಾರಿಗಳನ್ನು ಸಂಪೂರ್ಣವಾಗಿ ಪೂರೈಸಬೇಕು. ಇವುಗಳಲ್ಲಿ ವಿಶ್ವಸಂಸ್ಥೆಯ ಚಾರ್ಟರ್, ವಿಶೇಷವಾಗಿ ಅದರ ಉದ್ದೇಶಗಳು ಮತ್ತು ತತ್ವಗಳು, ಹಾಗೂ ಅನ್ವಯವಾಗುವಂತೆ ಅಂತಾರಾಷ್ಟ್ರೀಯ ಮಾನವ ಹಕ್ಕುಗಳ ಕಾನೂನು, ಅಂತಾರಾಷ್ಟ್ರೀಯ ನಿರಾಶ್ರಿತರ ಕಾನೂನು ಮತ್ತು ಅಂತಾರಾಷ್ಟ್ರೀಯ ಮಾನವೀಯ ಕಾನೂನು ಸೇರಿದಂತೆ ಸಂಬಂಧಿತ ಅಂತಾರಾಷ್ಟ್ರೀಯ ಒಪ್ಪಂದಗಳು ಮತ್ತು ಶಿಷ್ಟಾಚಾರಗಳು ಸೇರಿವೆ. ಬ್ರಿಕ್ಸ್‌ ಭಯೋತ್ಪಾದನಾ ನಿಗ್ರಹ ಕಾರ್ಯಕಾರಿ ಗುಂಪು (CTWG) ಮತ್ತು ಬ್ರಿಕ್ಸ್‌ ಭಯೋತ್ಪಾದನಾ ನಿಗ್ರಹ ಕಾರ್ಯತಂತ್ರ, ಬ್ರಿಕ್ಸ್‌ ಭಯೋತ್ಪಾದನಾ ನಿಗ್ರಹ ಕ್ರಿಯಾ ಯೋಜನೆ, ಹಾಗೂ CTWG ಸ್ಥಾನಪತ್ರದ ಆಧಾರದ ಮೇಲೆ ಅದರ ಐದು ಉಪಗುಂಪುಗಳ ಚಟುವಟಿಕೆಗಳನ್ನು ನಾವು ಸ್ವಾಗತಿಸುತ್ತೇವೆ. ಭಯೋತ್ಪಾದನಾ ನಿಗ್ರಹ ಸಹಕಾರವನ್ನು ಮತ್ತಷ್ಟು ಆಳಗೊಳಿಸಲು ನಾವು ಎದುರು ನೋಡುತ್ತಿದ್ದೇವೆ. ವಿಶ್ವಸಂಸ್ಥೆಯ ಚೌಕಟ್ಟಿನಲ್ಲಿ ಅಂತಾರಾಷ್ಟ್ರೀಯ ಭಯೋತ್ಪಾದನೆ ಕುರಿತ ಸಮಗ್ರ ಸಮಾವೇಶ (Comprehensive Convention on International Terrorism)ವನ್ನು  ಶೀಘ್ರವಾಗಿ ಅಂತಿಮಗೊಳಿಸಿ ಅಳವಡಿಸಿಕೊಳ್ಳಲು ನಾವು ಕರೆ ನೀಡುತ್ತೇವೆ. ವಿಶ್ವಸಂಸ್ಥೆಯು ಗುರುತಿಸಿರುವ ಎಲ್ಲ ಭಯೋತ್ಪಾದಕರು ಮತ್ತು ಭಯೋತ್ಪಾದಕ ಘಟಕಗಳ ವಿರುದ್ಧ ಒಗ್ಗೂಡಿದ ಕ್ರಮಗಳನ್ನು ಕೈಗೊಳ್ಳುವಂತೆ ನಾವು ಆಗ್ರಹಿಸುತ್ತೇವೆ.

2025ರ ಮೇ 31, ಜೂನ್ 1 ಮತ್ತು 5 ರಂದು ರಷ್ಯಾದ ಒಕ್ಕೂಟದ ಬ್ರಿಯಾನ್ಸ್ಕ್, ಕುರ್ಸ್ಕ್ ಮತ್ತು ವೊರೊನೆಜ್ ಪ್ರದೇಶಗಳಲ್ಲಿ ಸೇತುವೆಗಳು ಮತ್ತು ರೈಲ್ವೆ ಮೂಲಸೌಕರ್ಯಗಳ ಮೇಲೆ ನಡೆದ ದಾಳಿಗಳನ್ನು ನಾವು ತೀವ್ರವಾಗಿ ಖಂಡಿಸುತ್ತೇವೆ. ಈ ದಾಳಿಗಳು ನಾಗರಿಕರನ್ನು ಉದ್ದೇಶಪೂರ್ವಕವಾಗಿ ಗುರಿಯಾಗಿಸಿಕೊಂಡಿದ್ದು, ಮಕ್ಕಳು ಸೇರಿದಂತೆ ಹಲವು ನಾಗರಿಕ ಸಾವುನೋವುಗಳಿಗೆ ಕಾರಣವಾಗಿವೆ.

ನಾವು ಅಕ್ರಮ ಹಣಕಾಸು ಹರಿವುಗಳನ್ನು ತಡೆಗಟ್ಟಲು ಮತ್ತು ಎದುರಿಸಲು ನಮ್ಮ ಬದ್ಧತೆಯನ್ನು ಪುನರುಚ್ಚರಿಸುತ್ತೇವೆ. ಇವುಗಳಲ್ಲಿ ಹಣ ವರ್ಗಾವಣೆ, ಭಯೋತ್ಪಾದನೆಗೆ ಹಣಕಾಸು ಒದಗಿಸುವಿಕೆ, ಉಗ್ರವಾದ ಮತ್ತು ಪ್ರಸರಣ, ಹಾಗೆಯೇ ಮಾದಕವಸ್ತು ಕಳ್ಳಸಾಗಣೆ, ಸೈಬರ್ ಅಪರಾಧಗಳು, ಪರಿಸರದ ಮೇಲೆ ಪರಿಣಾಮ ಬೀರುವ ಅಪರಾಧಗಳು, ಅಕ್ರಮ ಶಸ್ತ್ರಾಸ್ತ್ರಗಳ ಸಾಗಣೆ, ಮಾನವ ಕಳ್ಳಸಾಗಣೆ, ಭ್ರಷ್ಟಾಚಾರ ಮತ್ತು ಹೊಸ ತಂತ್ರಜ್ಞಾನಗಳ (ಕ್ರಿಪ್ಟೋಕರೆನ್ಸಿಗಳು ಸೇರಿದಂತೆ) ಕಾನೂನುಬಾಹಿರ, ನಿರ್ದಿಷ್ಟವಾಗಿ ಭಯೋತ್ಪಾದಕ ಉದ್ದೇಶಗಳಿಗಾಗಿ ಬಳಸುವುದು ಮುಂತಾದ ಇತರ ಅಂತಾರಾಷ್ಟ್ರೀಯ ಸಂಘಟಿತ ಅಪರಾಧಗಳು ಸೇರಿವೆ. ಈ ನಿಟ್ಟಿನಲ್ಲಿ, ಸಂಬಂಧಿತ ಅಂತಾರಾಷ್ಟ್ರೀಯ ಬಾಧ್ಯತೆಗಳ ಅನುಷ್ಠಾನಕ್ಕೆ ಬೆಂಬಲ ನೀಡಲು, ವಿಶೇಷವಾಗಿ ಅಭಿವೃದ್ಧಿಶೀಲ ದೇಶಗಳಿಗೆ, ಸಾಮರ್ಥ್ಯ ವೃದ್ಧಿ ಮತ್ತು ತಾಂತ್ರಿಕ ನೆರವನ್ನು ಹೆಚ್ಚಿಸುವುದರ ಮಹತ್ವವನ್ನು ನಾವು ಒತ್ತಿ ಹೇಳುತ್ತೇವೆ. ತಡೆಗಟ್ಟುವಿಕೆ ಮತ್ತು ಹಣಕಾಸು ತನಿಖೆಗಳ ಉದ್ದೇಶ ಸೇರಿದಂತೆ, ಅಂತಾರಾಷ್ಟ್ರೀಯ ಅಪರಾಧ-ವಿರೋಧಿ ಸಹಕಾರದ ತಾಂತ್ರಿಕ ಮತ್ತು ರಾಜಕೀಯವಲ್ಲದ ಸ್ವರೂಪದ ತತ್ವಗಳಿಗೆ ನಮ್ಮ ಬದ್ಧತೆಯನ್ನು ನಾವು ಪುನರುಚ್ಚರಿಸುತ್ತೇವೆ. ಸಂಬಂಧಿತ ಅಸ್ತಿತ್ವದಲ್ಲಿರುವ ಬ್ರಿಕ್ಸ್‌ ಕಾರ್ಯಕಾರಿ ಗುಂಪುಗಳು, ಬ್ರಿಕ್ಸ್‌ ದೇಶಗಳ ಸಮರ್ಥ ಅಧಿಕಾರಿಗಳ ಸಭೆಗಳು ಮತ್ತು ಬ್ರಿಕ್ಸ್‌ ನಲ್ಲಿ ಅಂಗೀಕರಿಸಿದ ದಾಖಲೆಗಳ ಆಧಾರದ ಮೇಲೆ ಇತರ ಸಹಕಾರ ರೂಪಗಳ ಮೂಲಕ, ಹಾಗೆಯೇ ಬ್ರಿಕ್ಸ್‌ ದೇಶಗಳು ಪಕ್ಷಗಳಾಗಿರುವ ಸಂಬಂಧಿತ ಅಂತಾರಾಷ್ಟ್ರೀಯ ಕಾನೂನು ಉಪಕರಣಗಳ ಮೂಲಕ ಇಂತಹ ಸಹಕಾರವನ್ನು ಮತ್ತಷ್ಟು ಬಲಪಡಿಸುವ ಅಗತ್ಯವನ್ನು ನಾವು ಗಮನಿಸುತ್ತೇವೆ. ಯುವ ಪೀಳಿಗೆಯ ಸುರಕ್ಷಿತ ಅಭಿವೃದ್ಧಿಗೆ ಪರಿಸ್ಥಿತಿಗಳನ್ನು ಸೃಷ್ಟಿಸುವುದು, ಕಾನೂನುಬಾಹಿರ ಚಟುವಟಿಕೆಗಳಲ್ಲಿ ಅವರ ಭಾಗವಹಿಸುವಿಕೆಯ ಅಪಾಯವನ್ನು ಕಡಿಮೆ ಮಾಡುವುದು ಮತ್ತು ಯುವಕರ ಭಾಗವಹಿಸುವಿಕೆಯೊಂದಿಗೆ ಸಂಬಂಧಿತ ಅಂತಾರಾಷ್ಟ್ರೀಯ ಯೋಜನೆಗಳ ಅಭಿವೃದ್ಧಿಯನ್ನು ಸ್ವಾಗತಿಸುವುದು ಮುಖ್ಯ ಎಂದು ನಾವು ಒತ್ತಿ ಹೇಳುತ್ತೇವೆ.

ಭ್ರಷ್ಟಾಚಾರವನ್ನು ತಡೆಗಟ್ಟಲು ಮತ್ತು ಅದರ ವಿರುದ್ಧ ಹೋರಾಡಲು ಬ್ರಿಕ್ಸ್‌ ಸಹಕಾರವನ್ನು ಉತ್ತೇಜಿಸಲು ನಾವು ದೃಢ ಸಂಕಲ್ಪ ಮಾಡಿದ್ದೇವೆ. ಈ ನಿಟ್ಟಿನಲ್ಲಿ, ನಿರ್ದಿಷ್ಟವಾಗಿ ವಿಶ್ವಸಂಸ್ಥೆಯ ಭ್ರಷ್ಟಾಚಾರ-ವಿರೋಧಿ ಸಮಾವೇಶಕ್ಕೆ (United Nations Convention against Corruption) ಅನುಗುಣವಾಗಿ, ಅಂತಾರಾಷ್ಟ್ರೀಯ ಭ್ರಷ್ಟಾಚಾರ-ವಿರೋಧಿ ಕಾರ್ಯಸೂಚಿಯ ಪ್ರಮುಖ ವಿಷಯಗಳ ಕುರಿತು ನಮ್ಮ ಸಮನ್ವಯವನ್ನು ಬಲಪಡಿಸುತ್ತೇವೆ. ಬ್ರಿಕ್ಸ್‌ ಭ್ರಷ್ಟಾಚಾರ-ವಿರೋಧಿ ಬದ್ಧತೆಗಳನ್ನು ಪೂರೈಸಲು ಮತ್ತು ಭ್ರಷ್ಟಾಚಾರ-ವಿರೋಧಿ ಸಹಕಾರವನ್ನು ಹೆಚ್ಚಿಸಲು, ಹಾಗೆಯೇ ಆಸ್ತಿಗಳು ಮತ್ತು ಭ್ರಷ್ಟಾಚಾರದ ಆದಾಯಗಳ ಮರುಪಡೆಯುವಿಕೆ ಮತ್ತು ಹಿಂದಿರುಗಿಸುವಿಕೆಗೆ ನಾವು ಮಹತ್ವ ನೀಡುತ್ತೇವೆ. ಭ್ರಷ್ಟಾಚಾರ-ವಿರೋಧಿ ವಿಷಯಗಳ ಕುರಿತು ಸಹಯೋಗವನ್ನು ಉತ್ತೇಜಿಸಲು BRICS ಭ್ರಷ್ಟಾಚಾರ-ವಿರೋಧಿ ಕಾರ್ಯಕಾರಿ ಗುಂಪಿನ (BRICS Anti-Corruption Working Group) ಕೆಲಸವನ್ನು ನಾವು ಸ್ವಾಗತಿಸುತ್ತೇವೆ. ನಿರ್ದಿಷ್ಟವಾಗಿ, ವೃತ್ತಿಪರರ ನಡುವೆ ಭ್ರಷ್ಟಾಚಾರ-ವಿರೋಧಿ ಜ್ಞಾನ ಮತ್ತು ಪರಿಣತಿಯನ್ನು ಹಂಚಿಕೊಳ್ಳುವುದು, ಭ್ರಷ್ಟಾಚಾರ-ವಿರೋಧಿ ಸಹಕಾರ ಮತ್ತು ಆಸ್ತಿಗಳು ಹಾಗೂ ಭ್ರಷ್ಟಾಚಾರದ ಆದಾಯಗಳ ಮರುಪಡೆಯುವಿಕೆ ಮತ್ತು ಹಿಂದಿರುಗಿಸುವಿಕೆಯ ಕುರಿತು ಬ್ರಿಕ್ಸ್‌ ಸಾಮಾನ್ಯ ದೃಷ್ಟಿ ಮತ್ತು ಜಂಟಿ ಕ್ರಮಗಳ ನಿರೂಪಣೆ, ಸುರಕ್ಷಿತ ಆಶ್ರಯ ನಿರಾಕರಣೆಯ ಪ್ರಚಾರ ಮತ್ತು ಸದಸ್ಯ ರಾಷ್ಟ್ರಗಳಲ್ಲಿ ಸಾಮರ್ಥ್ಯ ವೃದ್ಧಿಯನ್ನು ಬಲಪಡಿಸುವುದು ಇದರ ಭಾಗವಾಗಿದೆ.

ಪರಮಾಣು ಅಪಾಯ ಮತ್ತು ಸಂಘರ್ಷದಿಂದ ಹೆಚ್ಚುತ್ತಿರುವ ಅಪಾಯಗಳ ಬಗ್ಗೆ ನಾವು ಆತಂಕ ವ್ಯಕ್ತಪಡಿಸುತ್ತೇವೆ. ಜಾಗತಿಕ ಸ್ಥಿರತೆ ಮತ್ತು ಅಂತಾರಾಷ್ಟ್ರೀಯ ಶಾಂತಿ ಹಾಗೂ ಭದ್ರತೆಯನ್ನು ಸಾಧಿಸಲು ನಿಶ್ಯಸ್ತ್ರೀಕರಣ, ಶಸ್ತ್ರಾಸ್ತ್ರ ನಿಯಂತ್ರಣ ಮತ್ತು ಪರಮಾಣು ಪ್ರಸರಣ-ರಹಿತ ವ್ಯವಸ್ಥೆಯನ್ನು ಪುನರುಜ್ಜೀವನಗೊಳಿಸುವ ಮತ್ತು ಅದರ ಸಮಗ್ರತೆ ಹಾಗೂ ಪರಿಣಾಮಕಾರಿತ್ವವನ್ನು ಕಾಪಾಡಿಕೊಳ್ಳುವ ಅಗತ್ಯವನ್ನು ನಾವು ಪುನರುಚ್ಚರಿಸುತ್ತೇವೆ. ಪರಮಾಣು ಶಸ್ತ್ರಾಸ್ತ್ರ-ರಹಿತ ವಲಯಗಳು (Nuclear-Weapon-Free Zones) ಪರಮಾಣು ಪ್ರಸರಣ-ರಹಿತ ಆಡಳಿತವನ್ನು (Nuclear Non-Proliferation Regime) ಬಲಪಡಿಸುವಲ್ಲಿ ಮಹತ್ವದ ಕೊಡುಗೆಯನ್ನು ನೀಡುತ್ತವೆ ಎಂದು ನಾವು ಒತ್ತಿಹೇಳುತ್ತೇವೆ. ಅಸ್ತಿತ್ವದಲ್ಲಿರುವ ಎಲ್ಲಾ ಪರಮಾಣು ಶಸ್ತ್ರಾಸ್ತ್ರ-ರಹಿತ ವಲಯಗಳು ಮತ್ತು ಪರಮಾಣು ಶಸ್ತ್ರಾಸ್ತ್ರಗಳ ಬಳಕೆ ಅಥವಾ ಬಳಕೆಯ ಬೆದರಿಕೆಯ ವಿರುದ್ಧ ಅವುಗಳ ಸಂಬಂಧಿತ ಭರವಸೆಗಳಿಗೆ ನಾವು ನಮ್ಮ ಬೆಂಬಲ ಮತ್ತು ಗೌರವವನ್ನು ಪುನರುಚ್ಚರಿಸುತ್ತೇವೆ. ಮಧ್ಯಪ್ರಾಚ್ಯದಲ್ಲಿ ಪರಮಾಣು ಶಸ್ತ್ರಾಸ್ತ್ರ ಮತ್ತು ಇತರ ಸಾಮೂಹಿಕ ವಿನಾಶಕಾರಿ ಶಸ್ತ್ರಾಸ್ತ್ರಗಳಿಂದ ಮುಕ್ತ ವಲಯವನ್ನು ಸ್ಥಾಪಿಸುವ ನಿರ್ಣಯಗಳ ಅನುಷ್ಠಾನವನ್ನು ತ್ವರಿತಗೊಳಿಸುವ ಗುರಿಯನ್ನು ಹೊಂದಿರುವ ಪ್ರಯತ್ನಗಳ ಮಹತ್ವವನ್ನು ನಾವು ಅಂಗೀಕರಿಸುತ್ತೇವೆ. ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯ ನಿರ್ಧಾರ 73/546 ರ ಅಡಿಯಲ್ಲಿ ಕರೆಯಲಾದ ಸಮ್ಮೇಳನವೂ ಇದರಲ್ಲಿ ಸೇರಿದೆ. ಆಹ್ವಾನಿತ ಎಲ್ಲಾ ಪಕ್ಷಗಳು ಈ ಸಮ್ಮೇಳನದಲ್ಲಿ ಉತ್ತಮ ನಂಬಿಕೆಯಿಂದ ಭಾಗವಹಿಸಲು ಮತ್ತು ಈ ಪ್ರಯತ್ನದಲ್ಲಿ ರಚನಾತ್ಮಕವಾಗಿ ತೊಡಗಿಸಿಕೊಳ್ಳಲು ನಾವು ಕರೆ ನೀಡುತ್ತೇವೆ. ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯ ನಿರ್ಣಯ 79/241, "ಎಲ್ಲಾ ಆಯಾಮಗಳಲ್ಲಿ ಅಣ್ವಸ್ತ್ರ-ಮುಕ್ತ ವಲಯಗಳ ಸಮಗ್ರ ಅಧ್ಯಯನ" ದ ಅಂಗೀಕಾರವನ್ನು ನಾವು ಸ್ವಾಗತಿಸುತ್ತೇವೆ.

ಬಾಹ್ಯಾಕಾಶ ವ್ಯವಸ್ಥೆಗಳು ಮತ್ತು ಬಾಹ್ಯಾಕಾಶ ವಿಜ್ಞಾನ ಹಾಗೂ ತಂತ್ರಜ್ಞಾನಗಳ ಸಾಧನೆಗಳನ್ನು ಶಾಂತಿಯುತ ಉದ್ದೇಶಗಳಿಗಾಗಿ ಬಳಸುವುದನ್ನು ಖಚಿತಪಡಿಸಿಕೊಳ್ಳುವ ಅಗತ್ಯವನ್ನು ನಾವು ಗುರುತಿಸುತ್ತೇವೆ. ಬಾಹ್ಯಾಕಾಶ ಚಟುವಟಿಕೆಗಳ ದೀರ್ಘಕಾಲೀನ ಸುಸ್ಥಿರತೆಯನ್ನು ಖಚಿತಪಡಿಸಿಕೊಳ್ಳಲು, ಬಾಹ್ಯಾಕಾಶದಲ್ಲಿ ಶಸ್ತ್ರಾಸ್ತ್ರ ಸ್ಪರ್ಧೆಯನ್ನು (PAROS) ತಡೆಗಟ್ಟಲು ಮತ್ತು ಅದನ್ನು ಶಸ್ತ್ರಾಸ್ತ್ರಗಳ ಬಳಕೆಗೆ ಉಪಯೋಗಿಸುವುದನ್ನು ನಿಲ್ಲಿಸಲು, ಹಾಗೆಯೇ ಬಾಹ್ಯಾಕಾಶ ವಸ್ತುಗಳ ವಿರುದ್ಧ ಬೆದರಿಕೆ ಅಥವಾ ಬಲದ ಬಳಕೆಯನ್ನು ತಡೆಗಟ್ಟಲು ನಾವು ನಮ್ಮ ಬೆಂಬಲವನ್ನು ಪುನರುಚ್ಚರಿಸುತ್ತೇವೆ. ಜಾಗತಿಕ ಭದ್ರತೆಯನ್ನು ಖಚಿತಪಡಿಸಿಕೊಳ್ಳಲು ಸಂಬಂಧಿತ ಕಾನೂನು ಬಹುಪಕ್ಷೀಯ ಸಾಧನವನ್ನು ಅಳವಡಿಸಿಕೊಳ್ಳಲು ಮಾತುಕತೆಗಳ ಮೂಲಕ ಇದನ್ನು ಸಾಧಿಸಬೇಕು. ಬಾಹ್ಯಾಕಾಶದಲ್ಲಿ ಶಸ್ತ್ರಾಸ್ತ್ರಗಳನ್ನು ಇರಿಸುವುದನ್ನು, ಬಾಹ್ಯಾಕಾಶ ವಸ್ತುಗಳ ವಿರುದ್ಧ ಬೆದರಿಕೆ ಅಥವಾ ಬಲದ ಬಳಕೆಯನ್ನು ತಡೆಗಟ್ಟುವ ಕರಡು ಒಪ್ಪಂದದ (PPWT) ನವೀಕರಿಸಿದ ಪ್ರತಿಯನ್ನು 2014 ರಲ್ಲಿ ನಿಶ್ಯಸ್ತ್ರೀಕರಣ ಸಮ್ಮೇಳನಕ್ಕೆ ಸಲ್ಲಿಸಿರುವುದನ್ನು ಈ ಗುರಿಯೆಡೆಗಿನ ಪ್ರಮುಖ ಹೆಜ್ಜೆಯೆಂದು ನಾವು ಗುರುತಿಸುತ್ತೇವೆ. ಪಾರದರ್ಶಕತೆ ಮತ್ತು ವಿಶ್ವಾಸ-ವರ್ಧಕ ಕ್ರಮಗಳು (TCBMs), ಮತ್ತು ಸಾರ್ವತ್ರಿಕವಾಗಿ ಒಪ್ಪಿಗೆಯಾದ ಮಾನದಂಡಗಳು, ನಿಯಮಗಳು ಮತ್ತು ತತ್ವಗಳಂತಹ ಪ್ರಾಯೋಗಿಕ ಮತ್ತು ಕಡ್ಡಾಯವಲ್ಲದ ಬದ್ಧತೆಗಳು ಸಹ PAROS ಗೆ ಕೊಡುಗೆ ನೀಡಬಹುದು ಎಂದು ನಾವು ಒತ್ತಿಹೇಳುತ್ತೇವೆ. ಕೆಲವು ಬ್ರಿಕ್ಸ್‌ ಸದಸ್ಯರು ಸಾಮಾನ್ಯ ಸಭೆಯಲ್ಲಿ, PAROS ಉದ್ದೇಶವನ್ನು ಪೂರೈಸುವ ಸುಸಂಬದ್ಧ, ಅಂತರ್ಗತ ಮತ್ತು ಪರಿಣಾಮಕಾರಿ ಚರ್ಚೆಗಳನ್ನು ಸಕ್ರಿಯಗೊಳಿಸಲು ಒಂದು ಏಕೈಕ ಮುಕ್ತ-ಅಂತ್ಯದ ಕಾರ್ಯಕಾರಿ ಗುಂಪನ್ನು (Open-Ended Working Group) ರಚಿಸುವ ಉಪಕ್ರಮವನ್ನು ಕೈಗೊಂಡಿರುವುದನ್ನು ನಾವು ಗಮನಿಸುತ್ತೇವೆ. PAROS ಕುರಿತ ಕಾನೂನುಬದ್ಧವಾಗಿ ಕಡ್ಡಾಯವಾದ ಸಾಧನದಲ್ಲಿನ ಗಣನೀಯ ಅಂಶಗಳು ಸೇರಿದಂತೆ ಅಸ್ತಿತ್ವದಲ್ಲಿರುವ ಸಾಧನೆಗಳ ಆಧಾರದ ಮೇಲೆ ಈ ಪ್ರಕ್ರಿಯೆಯಲ್ಲಿ ರಚನಾತ್ಮಕವಾಗಿ ತೊಡಗಿಸಿಕೊಳ್ಳಲು ನಾವು ಬದ್ಧರಾಗಿದ್ದೇವೆ.

ದೇಶಗಳ ನಡುವೆ ಮತ್ತು ಒಳಗೆ ಹೆಚ್ಚುತ್ತಿರುವ ಡಿಜಿಟಲ್ ಅಂತರವನ್ನು ಕಡಿಮೆ ಮಾಡುವಲ್ಲಿ ಮಾಹಿತಿ ಮತ್ತು ಸಂವಹನ ತಂತ್ರಜ್ಞಾನಗಳ (ICTs) ಸಾಮರ್ಥ್ಯವನ್ನು ನಾವು ಒತ್ತಿ ಹೇಳುತ್ತೇವೆ. ಆದರೂ, ಡಿಜಿಟಲ್ ಲೋಕದಿಂದ ಉಂಟಾಗುವ ಸವಾಲುಗಳು ಮತ್ತು ಬೆದರಿಕೆಗಳನ್ನು ನಾವು ಗುರುತಿಸುತ್ತೇವೆ. ಮುಕ್ತ, ಸುರಕ್ಷಿತ, ಸ್ಥಿರ, ಸುಲಭವಾಗಿ ಪ್ರವೇಶಿಸಬಹುದಾದ, ಶಾಂತಿಯುತ ಮತ್ತು ಪರಸ್ಪರ ಕಾರ್ಯನಿರ್ವಹಿಸಬಲ್ಲ ICT ಪರಿಸರವನ್ನು ಉತ್ತೇಜಿಸಲು ನಾವು ನಮ್ಮ ಬದ್ಧತೆಯನ್ನು ಪುನರುಚ್ಚರಿಸುತ್ತೇವೆ. ICT ಗಳ ಬಳಕೆಯಲ್ಲಿ ಭದ್ರತೆ ಮತ್ತು ಈ ಕ್ಷೇತ್ರದಲ್ಲಿ ಸಾರ್ವತ್ರಿಕ ಕಾನೂನು ಚೌಕಟ್ಟನ್ನು ಅಭಿವೃದ್ಧಿಪಡಿಸುವ ಚರ್ಚೆಗಳ ಕುರಿತು ಸಾಮಾನ್ಯ ತಿಳುವಳಿಕೆಗಳನ್ನು ರೂಪಿಸಲು ರಚನಾತ್ಮಕ ಸಂವಾದವನ್ನು ಉತ್ತೇಜಿಸುವಲ್ಲಿ ವಿಶ್ವಸಂಸ್ಥೆಯು ಪ್ರಮುಖ ಪಾತ್ರ ವಹಿಸುತ್ತದೆ ಎಂಬುದನ್ನು ನಾವು ಒತ್ತಿ ಹೇಳುತ್ತೇವೆ. ಅಲ್ಲದೆ, ICT ಗಳ ಬಳಕೆಯಲ್ಲಿ ರಾಷ್ಟ್ರಗಳ ಜವಾಬ್ದಾರಿಯುತ ವರ್ತನೆಗಾಗಿ ಸಾರ್ವತ್ರಿಕವಾಗಿ ಒಪ್ಪಿಗೆ ಪಡೆದ ಮಾನದಂಡಗಳು, ನಿಯಮಗಳು ಮತ್ತು ತತ್ವಗಳ ಮತ್ತಷ್ಟು ಅಭಿವೃದ್ಧಿ ಮತ್ತು ಅನುಷ್ಠಾನಕ್ಕೂ ನಾವು ಒತ್ತು ನೀಡುತ್ತೇವೆ. ICT ಉತ್ಪನ್ನಗಳು ಮತ್ತು ವ್ಯವಸ್ಥೆಗಳ ಅಭಿವೃದ್ಧಿ ಹಾಗೂ ಭದ್ರತೆಗೆ ಸಂಬಂಧಿಸಿದಂತೆ ಸಮಗ್ರ, ಸಮತೋಲಿತ, ವಸ್ತುನಿಷ್ಠ ವಿಧಾನಕ್ಕೆ ನಾವು ಕರೆ ನೀಡುತ್ತೇವೆ. ಜೊತೆಗೆ, ಪೂರೈಕೆ ಸರಪಳಿ ಭದ್ರತೆಗಾಗಿ ಜಾಗತಿಕವಾಗಿ ಪರಸ್ಪರ ಕಾರ್ಯನಿರ್ವಹಿಸಬಲ್ಲ ಸಾಮಾನ್ಯ ನಿಯಮಗಳು ಮತ್ತು ಮಾನದಂಡಗಳ ಅಭಿವೃದ್ಧಿ ಹಾಗೂ ಅನುಷ್ಠಾನಕ್ಕೂ ನಾವು ಕರೆ ನೀಡುತ್ತೇವೆ. ಮಾಹಿತಿ ಮತ್ತು ಸಂವಹನ ತಂತ್ರಜ್ಞಾನಗಳ (ICTs) ಬಳಕೆಯಲ್ಲಿನ ಭದ್ರತೆ ಕುರಿತು ವಿಶ್ವಸಂಸ್ಥೆಯ ಮುಕ್ತ-ಕಾರ್ಯಕಾರಿ ಗುಂಪು ನಡೆಸುತ್ತಿರುವ ಕಾರ್ಯವನ್ನು ನಾವು ಶ್ಲಾಘಿಸುತ್ತೇವೆ. ಇದು ಈ ವಿಷಯದ ಕುರಿತ ಏಕೈಕ ಜಾಗತಿಕ ಮತ್ತು ಅಂತರ್ಗತ ಕಾರ್ಯವಿಧಾನವಾಗಿದೆ. ಈ ಜುಲೈನಲ್ಲಿ ಅದರ ಕೆಲಸವನ್ನು ಯಶಸ್ವಿಯಾಗಿ ಅಂತಿಮಗೊಳಿಸುವ ನಮ್ಮ ಸಾಮಾನ್ಯ ಉದ್ದೇಶವನ್ನು ನಾವು ಒತ್ತಿ ಹೇಳುತ್ತೇವೆ. ವಿಶ್ವಸಂಸ್ಥೆಯ ಆಶ್ರಯದಲ್ಲಿ, ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯ ಮೊದಲ ಸಮಿತಿಗೆ ವರದಿ ಮಾಡುವ, ಈ ವಿಷಯದ ಕುರಿತು ಏಕ-ಮಾರ್ಗ, ರಾಜ್ಯ-ನೇತೃತ್ವದ, ಶಾಶ್ವತ ಕಾರ್ಯವಿಧಾನವನ್ನು ಒಮ್ಮತದಿಂದ ಸ್ಥಾಪಿಸಲು ನಮ್ಮ ಬದ್ಧತೆಯನ್ನು ನಾವು ಪುನರುಚ್ಚರಿಸುತ್ತೇವೆ. ಭವಿಷ್ಯದ ಕಾರ್ಯವಿಧಾನದ ಸ್ಥಾಪನೆ ಮತ್ತು ಕಾರ್ಯವಿಧಾನದ ನಿರ್ಧಾರ-ಕೈಗೊಳ್ಳುವ ಪ್ರಕ್ರಿಯೆಗಳೆರಡಕ್ಕೂ ಒಮ್ಮತದ ತತ್ವದ ಮಹತ್ವವನ್ನು ನಾವು ಗುರುತಿಸುತ್ತೇವೆ. ICT ಗಳ ಬಳಕೆಯಲ್ಲಿ ಭದ್ರತೆ ಕುರಿತ ಬ್ರಿಕ್ಸ್‌ ಕಾರ್ಯಕಾರಿ ಗುಂಪು ನೀತಿ ವಿನಿಮಯ, ಕಂಪ್ಯೂಟರ್ ತುರ್ತು ಪ್ರತಿಕ್ರಿಯೆ ತಂಡಗಳ (CERTs) ನಡುವಿನ ಸಹಕಾರ, ಕಾನೂನು ಜಾರಿ ಸಹಕಾರ ಮತ್ತು ಜಂಟಿ ಸಂಶೋಧನೆ ಹಾಗೂ ಅಭಿವೃದ್ಧಿಯಂತಹ ಕ್ಷೇತ್ರಗಳಲ್ಲಿ ಸಾಧಿಸಿದ ಪ್ರಗತಿಯನ್ನು ನಾವು ಗುರುತಿಸುತ್ತೇವೆ. ಈ ನಿಟ್ಟಿನಲ್ಲಿ, ಕಾನೂನು ಜಾರಿ ಸಹಕಾರ ಮತ್ತು CERT ಗಳ ನಡುವೆ ಬಹುಪಕ್ಷೀಯ ಸಹಕಾರ ಕುರಿತ ಬ್ರಿಕ್ಸ್‌ ತಿಳುವಳಿಕೆ ಒಪ್ಪಂದಗಳ ಮಾತುಕತೆಗಳನ್ನು ನಾವು ಸ್ವಾಗತಿಸುತ್ತೇವೆ. ICT ಗಳ ಬಳಕೆಯಲ್ಲಿ ಭದ್ರತೆಯನ್ನು ಖಚಿತಪಡಿಸಿಕೊಳ್ಳುವ ಕುರಿತ ಪ್ರಾಯೋಗಿಕ ಸಹಕಾರದ ಮಾರ್ಗಸೂಚಿ ಮತ್ತು ಅದರ ಪ್ರಗತಿ ವರದಿಗೆ ಅನುಗುಣವಾಗಿ, ಶೈಕ್ಷಣಿಕ ಸಹಕಾರವನ್ನು ಬಲಪಡಿಸುವುದು ಮತ್ತು ವಿನಿಮಯ ಕಾರ್ಯಕ್ರಮಗಳ ಅವಕಾಶಗಳ ಕುರಿತು ಮಾಹಿತಿ ಹಂಚಿಕೊಳ್ಳುವ ಮಹತ್ವವನ್ನು ನಾವು ಒತ್ತಿ ಹೇಳುತ್ತೇವೆ.

ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯಿಂದ ಸೈಬರ್ ಅಪರಾಧಗಳ ವಿರುದ್ಧ ವಿಶ್ವಸಂಸ್ಥೆ ಸಮಾವೇಶ (United Nations Convention against Cybercrime) ಅಂಗೀಕಾರವನ್ನು ನಾವು ಶ್ಲಾಘಿಸುತ್ತೇವೆ. ಇದು ಒಂದು ಮಹತ್ವದ ಬಹುಪಕ್ಷೀಯ ಸಾಧನೆಯಾಗಿದ್ದು, ಸೈಬರ್ ಅಪರಾಧಗಳನ್ನು ತಡೆಗಟ್ಟಲು ಮತ್ತು ಎದುರಿಸಲು, ಹಾಗೂ ICT ವ್ಯವಸ್ಥೆಗಳ ಬಳಕೆಯ ಮೂಲಕ ಸಂಭವಿಸಬಹುದಾದ ಯಾವುದೇ ಗಂಭೀರ ಅಪರಾಧಗಳ ಎಲೆಕ್ಟ್ರಾನಿಕ್ ರೂಪದ ಸಾಕ್ಷ್ಯಗಳನ್ನು ಸಕಾಲಿಕವಾಗಿ ಮತ್ತು ಕಾನೂನುಬದ್ಧವಾಗಿ ಸಂಗ್ರಹಿಸಲು ಹಾಗೂ ಹಂಚಿಕೊಳ್ಳಲು ಪರಿಣಾಮಕಾರಿ ಸಾಧನ ಮತ್ತು ಅಗತ್ಯ ಕಾನೂನು ಚೌಕಟ್ಟನ್ನು ಒದಗಿಸುತ್ತದೆ. ಈ ಸಮಾವೇಶವನ್ನು ಮೊದಲು ಪ್ರಸ್ತಾಪಿಸಿದಾಗಿನಿಂದಲೂ, ಅದರ ಅಂಗೀಕಾರಕ್ಕೆ ಬ್ರಿಕ್ಸ್‌ ದೇಶಗಳು ನೀಡಿದ ಪ್ರಮುಖ ಕೊಡುಗೆಯನ್ನು ನಾವು ಎತ್ತಿಹಿಡಿಯುತ್ತೇವೆ. ಎಲ್ಲಾ ರಾಷ್ಟ್ರಗಳು 2025ರಲ್ಲಿ ಹನೋಯ್ ‌ನಲ್ಲಿ ಇದನ್ನು ಆದಷ್ಟು ಬೇಗ ಸಹಿ ಮಾಡುವಂತೆ ಮತ್ತು ದೇಶೀಯ ಕಾನೂನುಗಳು, ಪ್ರಕ್ರಿಯೆಗಳು ಮತ್ತು ಕಾರ್ಯವಿಧಾನಗಳ ಅನುಸಾರವಾಗಿ ಸಾಧ್ಯವಾದಷ್ಟು ಶೀಘ್ರವಾಗಿ ಅನುಮೋದಿಸುವಂತೆ ನಾವು ಕರೆ ನೀಡುತ್ತೇವೆ. ಇದು ಅದರ ಶೀಘ್ರ ಜಾರಿಗೆ ಬರಲು ಸಹಕಾರಿಯಾಗುತ್ತದೆ. ಅಲ್ಲದೆ, ಸಾಮಾನ್ಯ ಸಭೆಯ ನಿರ್ಣಯಗಳು 74/247 ಮತ್ತು 75/282 ರ ಪ್ರಕಾರ, ಹೆಚ್ಚುವರಿ ಕ್ರಿಮಿನಲ್ ಅಪರಾಧಗಳನ್ನು ಸೂಕ್ತವಾಗಿ ನಿಭಾಯಿಸುವಂತಹ ಸಮಾವೇಶಕ್ಕೆ ಪೂರಕವಾದ ಕರಡು ಪ್ರೋಟೋಕಾಲ್ ಅನ್ನು ಮಾತುಕತೆ ನಡೆಸುವ ದೃಷ್ಟಿಯಿಂದ ತಾತ್ಕಾಲಿಕ ಸಮಿತಿಯಲ್ಲಿ ತಮ್ಮ ತೊಡಗಿಸಿಕೊಳ್ಳುವಿಕೆಯನ್ನು ಮುಂದುವರಿಸುವಂತೆ ನಾವು ಕರೆ ನೀಡುತ್ತೇವೆ.

ಅಂತಾರಾಷ್ಟ್ರೀಯ ಆರ್ಥಿಕ, ವ್ಯಾಪಾರ ಮತ್ತು ಹಣಕಾಸು ಸಹಕಾರವನ್ನು ಗಾಢವಾಗಿಸುವುದು

"ಬ್ರಿಕ್ಸ್‌ ಆರ್ಥಿಕ ಸಹಭಾಗಿತ್ವ 2025ರ ಕಾರ್ಯತಂತ್ರ"ದ ಫಲಿತಾಂಶಗಳನ್ನು ನಾವು ಸ್ವಾಗತಿಸುತ್ತೇವೆ. ಈ ಕಾರ್ಯತಂತ್ರವು BRICS ಸದಸ್ಯ ರಾಷ್ಟ್ರಗಳ ನಡುವೆ ವಲಯವಾರು ಅಭಿವೃದ್ಧಿಗಳು, ಕಾರ್ಯತಂತ್ರಗಳು, ಕಾರ್ಯಕ್ರಮಗಳು ಮತ್ತು ಮಾರ್ಗಸೂಚಿಗಳಿಗೆ ಸಹಕಾರ ಹಾಗೂ ಸಹಯೋಗಕ್ಕಾಗಿ ಮಾರ್ಗದರ್ಶನ ನೀಡಿತು ಮತ್ತು ಒಂದು ಚೌಕಟ್ಟನ್ನು ಒದಗಿಸಿತು. ಬ್ರಿಕ್ಸ್‌ ಆರ್ಥಿಕ ಸಹಭಾಗಿತ್ವ 2030 ರ ಕಾರ್ಯತಂತ್ರದ ಅನುಷ್ಠಾನಕ್ಕಾಗಿ ನಾವು ಎದುರು ನೋಡುತ್ತಿದ್ದೇವೆ. ಇದು ಬಹುಪಕ್ಷೀಯ ವ್ಯಾಪಾರ ವ್ಯವಸ್ಥೆ, ಡಿಜಿಟಲ್ ಆರ್ಥಿಕತೆ, ಅಂತಾರಾಷ್ಟ್ರೀಯ ವ್ಯಾಪಾರ, ಹಣಕಾಸು ಸಹಕಾರ ಮತ್ತು ವ್ಯಾಪಾರ ಹಾಗೂ ಸುಸ್ಥಿರ ಅಭಿವೃದ್ಧಿಗೆ ಸಂಬಂಧಿಸಿದ ವಿಷಯಗಳಲ್ಲಿ BRICS ಸಹಕಾರಕ್ಕಾಗಿ ಆದೇಶಗಳು ಮತ್ತು ಮಾರ್ಗದರ್ಶಿ ತತ್ವಗಳನ್ನು ಕ್ರೋಢೀಕರಿಸುವ ಗುರಿಯನ್ನು ಹೊಂದಿದೆ.

BRICS ವ್ಯಾಪಾರ ಮತ್ತು ಸುಸ್ಥಿರ ಅಭಿವೃದ್ಧಿ ಚೌಕಟ್ಟಿನ (BRICS Trade and Sustainable Development Framework) ಅಂಗೀಕಾರವನ್ನು ನಾವು ಶ್ಲಾಘಿಸುತ್ತೇವೆ. ಸಮಗ್ರ ಬೆಳವಣಿಗೆ ಮತ್ತು ಸುಸ್ಥಿರ ಅಭಿವೃದ್ಧಿಯನ್ನು ಉತ್ತೇಜಿಸುವ ದೃಷ್ಟಿಯಿಂದ ವ್ಯಾಪಾರದಲ್ಲಿ ಸಹಕಾರವನ್ನು ಬಲಪಡಿಸಲು ನಾವು ನಮ್ಮ ಬದ್ಧತೆಯನ್ನು ಪುನರುಚ್ಚರಿಸುತ್ತೇವೆ. ವ್ಯಾಪಾರ ಮತ್ತು ಸುಸ್ಥಿರ ಅಭಿವೃದ್ಧಿ ನೀತಿಗಳು ಪರಸ್ಪರ ಪೂರಕವಾಗಿರುವುದನ್ನು ಮತ್ತು WTO ನಿಯಮಗಳೊಂದಿಗೆ ಹೊಂದಿಕೆಯಾಗುವುದನ್ನು ಖಚಿತಪಡಿಸಿಕೊಳ್ಳುವ ಮಹತ್ವವನ್ನು ನಾವು ಪುನರುಚ್ಚರಿಸುತ್ತೇವೆ.

PPP ಗಳು (ಸಾರ್ವಜನಿಕ-ಖಾಸಗಿ ಸಹಭಾಗಿತ್ವ) ಮತ್ತು ಮೂಲಸೌಕರ್ಯದ ಕುರಿತ ಬ್ರಿಕ್ಸ್‌ ಕಾರ್ಯಪಡೆಯ ಚರ್ಚೆಗಳನ್ನು ನಾವು ಸ್ವಾಗತಿಸುತ್ತೇವೆ. ಈ ಚರ್ಚೆಗಳು ವಿನಿಮಯ ದರ ಅಪಾಯವನ್ನು ತಗ್ಗಿಸುವ ಮತ್ತು ಹವಾಮಾನ-ಸ್ಥಿತಿಸ್ಥಾಪಕ ಮೂಲಸೌಕರ್ಯ ಯೋಜನೆಗಳನ್ನು ಸಿದ್ಧಪಡಿಸುವ ಕುರಿತು ಇವೆ. ಇವು ಯೋಜನಾ ಸಿದ್ಧತೆಯನ್ನು ಸುಧಾರಿಸಲು ಮತ್ತು ಖಾಸಗಿ ಹೂಡಿಕೆಯನ್ನು ಹೆಚ್ಚಿಸುವ ಗುರಿಯನ್ನು ಹೊಂದಿವೆ. ಇದಲ್ಲದೆ, ಸಹಯೋಗವನ್ನು ಉತ್ತೇಜಿಸುವ ಮತ್ತು ಮಾಹಿತಿ ಹಂಚಿಕೆಯನ್ನು ಹೆಚ್ಚಿಸುವ ಮೂಲಸೌಕರ್ಯ ಯೋಜನೆಗಳಿಗಾಗಿ ಮಾಹಿತಿ ಕೇಂದ್ರದ ಕುರಿತು ನಡೆಯುತ್ತಿರುವ ಚರ್ಚೆಗಳನ್ನು ನಾವು ಸ್ವಾಗತಿಸುತ್ತೇವೆ, ಮತ್ತು ಈ ಉಪಕ್ರಮವನ್ನು ಮತ್ತಷ್ಟು ಅನ್ವೇಷಿಸಲು ಕಾರ್ಯಪಡೆಗೆ ನಾವು ಪ್ರೋತ್ಸಾಹ ನೀಡುತ್ತೇವೆ.

ಹೊಸ ಅಭಿವೃದ್ಧಿ ಬ್ಯಾಂಕ್ (NDB) ತನ್ನ ಎರಡನೇ ಸುವರ್ಣ ದಶಕದ ಉನ್ನತ-ಗುಣಮಟ್ಟದ ಅಭಿವೃದ್ಧಿಗೆ ಸಜ್ಜಾಗುತ್ತಿರುವಾಗ, ಗ್ಲೋಬಲ್ ಸೌತ್ ‌ನಲ್ಲಿ ಅಭಿವೃದ್ಧಿ ಮತ್ತು ಆಧುನೀಕರಣದ ಬಲಿಷ್ಠ ಹಾಗೂ ಕಾರ್ಯತಂತ್ರದ ಏಜೆಂಟ್ ಆಗಿ ಅದರ ಹೆಚ್ಚುತ್ತಿರುವ ಪಾತ್ರವನ್ನು ನಾವು ಗುರುತಿಸುತ್ತೇವೆ ಮತ್ತು ಬೆಂಬಲಿಸುತ್ತೇವೆ. ಸಂಪನ್ಮೂಲಗಳನ್ನು ಕ್ರೋಢೀಕರಿಸುವ, ನಾವೀನ್ಯತೆಯನ್ನು ಉತ್ತೇಜಿಸುವ, ಸ್ಥಳೀಯ ಕರೆನ್ಸಿ ಹಣಕಾಸನ್ನು ವಿಸ್ತರಿಸುವ, ನಿಧಿಯ ಮೂಲಗಳನ್ನು ವೈವಿಧ್ಯಗೊಳಿಸುವ, ಮತ್ತು ಸುಸ್ಥಿರ ಅಭಿವೃದ್ಧಿಯನ್ನು ಮುನ್ನಡೆಸುವ, ಅಸಮಾನತೆಯನ್ನು ಕಡಿಮೆ ಮಾಡುವ, ಮೂಲಸೌಕರ್ಯ ಹೂಡಿಕೆಗಳು ಮತ್ತು ಆರ್ಥಿಕ ಏಕೀಕರಣವನ್ನು ಉತ್ತೇಜಿಸುವಂತಹ ಪರಿಣಾಮಕಾರಿ ಯೋಜನೆಗಳನ್ನು ಬೆಂಬಲಿಸುವ ಬ್ಯಾಂಕಿನ ಸಾಮರ್ಥ್ಯದ ನಿರಂತರ ವಿಸ್ತರಣೆಯನ್ನು ನಾವು ಸ್ವಾಗತಿಸುತ್ತೇವೆ. ಬ್ಯಾಂಕಿನ ಸಾಂಸ್ಥಿಕ ಸ್ಥಿತಿಸ್ಥಾಪಕತ್ವ ಮತ್ತು ಕಾರ್ಯಾಚರಣೆಯ ಪರಿಣಾಮಕಾರಿತ್ವವನ್ನು ಹೆಚ್ಚಿಸುವ ಅದರ ಸದಸ್ಯತ್ವದ ನಿರಂತರ ವಿಸ್ತರಣೆ ಮತ್ತು ಅದರ ಆಡಳಿತ ಚೌಕಟ್ಟನ್ನು ಬಲಪಡಿಸುವುದನ್ನು ನಾವು ಒಪ್ಪಿಕೊಳ್ಳುತ್ತೇವೆ ಮತ್ತು ಪ್ರೋತ್ಸಾಹಿಸುತ್ತೇವೆ. ಇದು ನ್ಯಾಯಯುತ ಮತ್ತು ತಾರತಮ್ಯರಹಿತ ರೀತಿಯಲ್ಲಿ ತನ್ನ ಉದ್ದೇಶ ಮತ್ತು ಕಾರ್ಯಗಳನ್ನು ನಿರ್ವಹಿಸುವುದನ್ನು ಮುಂದುವರಿಸಲು ಸಹಾಯ ಮಾಡುತ್ತದೆ. NDB ಸದಸ್ಯತ್ವದ ಮತ್ತಷ್ಟು ವಿಸ್ತರಣೆ ಮತ್ತು NDB ಸಾಮಾನ್ಯ ಕಾರ್ಯತಂತ್ರ ಹಾಗೂ ಸಂಬಂಧಿತ ನೀತಿಗಳಿಗೆ ಅನುಗುಣವಾಗಿ ಆಸಕ್ತ ಬ್ರಿಕ್ಸ್‌ ದೇಶಗಳ ಅರ್ಜಿಗಳ ತ್ವರಿತ ಪರಿಗಣನೆಯನ್ನು ನಾವು ಬಲವಾಗಿ ಬೆಂಬಲಿಸುತ್ತೇವೆ. ಅಧ್ಯಕ್ಷೆ ಡಿಲ್ಮಾ ರೂಸೆಫ್ ಅವರ ನಾಯಕತ್ವಕ್ಕೆ ನಾವು ಸಂಪೂರ್ಣ ಬೆಂಬಲ ನೀಡುತ್ತೇವೆ, ಅವರ ಮರುನೇಮಕವು ಎಲ್ಲಾ ಸದಸ್ಯರಿಂದ ಬಲವಾದ ಬೆಂಬಲವನ್ನು ಗಳಿಸಿದೆ. ಜಾಗತಿಕ ಅಭಿವೃದ್ಧಿ ಮತ್ತು ಸ್ಥಿರತೆಗಾಗಿ ಒಂದು ಸಂಸ್ಥೆಯಾಗಿ ಬ್ಯಾಂಕಿನ ದೃಢ ಪ್ರಗತಿಯನ್ನು ನಾವು ಸ್ವಾಗತಿಸುತ್ತೇವೆ. ಈ ಪಥವು ಗ್ಲೋಬಲ್ ಸೌತ್‌ ನಲ್ಲಿ ಸಮಗ್ರ ಮತ್ತು ಸುಸ್ಥಿರ ಅಭಿವೃದ್ಧಿಯನ್ನು ಉತ್ತೇಜಿಸುವ ಹಣಕಾಸು ಕಾರ್ಯವಿಧಾನಗಳನ್ನು ಬಲಪಡಿಸುವ ನಮ್ಮ ಹಂಚಿಕೆಯ ಬದ್ಧತೆಯನ್ನು ಪ್ರತಿಬಿಂಬಿಸುತ್ತದೆ.

ಬ್ರಿಕ್ಸ್‌ ಥಿಂಕ್ ಟ್ಯಾಂಕ್ ನೆಟ್‌ವರ್ಕ್ ಫಾರ್ ಫೈನಾನ್ಸ್ (BTTNF) ವತಿಯಿಂದ ಶಿಕ್ಷಣತಜ್ಞರು, ನೀತಿ ನಿರೂಪಕರು ಮತ್ತು ಪ್ರಮುಖ ಸಂಶೋಧಕರ ನಡುವೆ ಸಹಯೋಗವನ್ನು ಉತ್ತೇಜಿಸುವ ಅಮೂಲ್ಯ ಕೊಡುಗೆಯನ್ನು ನಾವು ಸ್ವಾಗತಿಸುತ್ತೇವೆ. ಅಲ್ಲದೆ, ಈ ಗುಂಪಿನಲ್ಲಿ ನಿರ್ಧರಿಸಲಾದ ಕಾರ್ಯಕ್ರಮ ಮತ್ತು ಆದ್ಯತೆಗಳನ್ನು ನಾವು ಪ್ರಶಂಸಿಸುತ್ತೇವೆ.

2025ರ ಮೊದಲಾರ್ಧದಲ್ಲಿ "ಹೊಸ ಹೂಡಿಕೆ ವೇದಿಕೆ (New Investment Platform - NIP)" ಕುರಿತು ನಡೆದ ರಚನಾತ್ಮಕ ಚರ್ಚೆಗಳನ್ನು ನಾವು ಸ್ವಾಗತಿಸುತ್ತೇವೆ. ಬ್ರೆಜಿಲಿಯನ್ ಅಧ್ಯಕ್ಷತೆಯ ಅಡಿಯಲ್ಲಿ ಸಾಧಿಸಿದ ಪ್ರಗತಿಯನ್ನು ನಾವು ಗುರುತಿಸುತ್ತೇವೆ. 2025 ರ ದ್ವಿತೀಯಾರ್ಧದಲ್ಲಿ ಹಣಕಾಸು ಸಚಿವಾಲಯಗಳು ಮತ್ತು ಕೇಂದ್ರೀಯ ಬ್ಯಾಂಕುಗಳನ್ನು ಒಳಗೊಂಡಂತೆ ತಾಂತ್ರಿಕ ಮಟ್ಟದ ಪ್ರಯತ್ನಗಳು ಮುಂದುವರಿಯುವುದನ್ನು ನಾವು ಎದುರು ನೋಡುತ್ತಿದ್ದೇವೆ. ಇದು ವೇದಿಕೆಯ ಬಗ್ಗೆ ಮತ್ತಷ್ಟು ಚರ್ಚಿಸಲು ಮತ್ತು ಒಮ್ಮತವನ್ನು ಮೂಡಿಸಲು ಸಹಾಯ ಮಾಡುತ್ತದೆ. ಈ ನಿರಂತರ ಸಮಾಲೋಚನೆಗಳು ಹೆಚ್ಚು ಸ್ಥಿರ ಮತ್ತು ಅರ್ಥಪೂರ್ಣ ಪ್ರಗತಿಗೆ ದಾರಿ ಮಾಡಿಕೊಡುತ್ತವೆ ಎಂದು ನಾವು ಆಶಿಸುತ್ತೇವೆ.

ಬ್ರಿಕ್ಸ್‌ ರಾಷ್ಟ್ರಗಳ ಆರ್ಥಿಕ ಸ್ಥಿತಿಸ್ಥಾಪಕತ್ವವನ್ನು ಬಲಪಡಿಸಲು ಮತ್ತು ಮೂಲಸೌಕರ್ಯ ಹಾಗೂ ಸುಸ್ಥಿರ ಅಭಿವೃದ್ಧಿಗಾಗಿ ಖಾಸಗಿ ಹೂಡಿಕೆಯನ್ನು ಕ್ರೋಢೀಕರಿಸುವ ನಮ್ಮ ಒತ್ತುವಿಕೆಗೆ ಪ್ರತಿಕ್ರಿಯೆಯಾಗಿ, ಬ್ರಿಕ್ಸ್‌ ಬಹುಪಕ್ಷೀಯ ಖಾತರಿಗಳ (BRICS Multilateral Guarantees - BMG) ಉಪಕ್ರಮವನ್ನು ಸ್ಥಾಪಿಸುವ ಕುರಿತು ನಾವು ಚರ್ಚೆಗಳನ್ನು ಪ್ರಾರಂಭಿಸಿದ್ದೇವೆ. BMG ಯು ಬ್ರಿಕ್ಸ್‌ ಮತ್ತು ಗ್ಲೋಬಲ್ ಸೌತ್‌ ನಲ್ಲಿ ಕಾರ್ಯತಂತ್ರದ ಹೂಡಿಕೆಗಳಿಗೆ ಅಪಾಯವನ್ನು ಕಡಿಮೆ ಮಾಡಲು ಮತ್ತು ಸಾಲದ ಅರ್ಹತೆಯನ್ನು ಸುಧಾರಿಸಲು ಸೂಕ್ತವಾದ ಖಾತರಿ ಸಾಧನಗಳನ್ನು (tailored guarantee instruments) ಒದಗಿಸುವ ಗುರಿಯನ್ನು ಹೊಂದಿದೆ. ಅಂತಾರಾಷ್ಟ್ರೀಯ ಅನುಭವಗಳಿಂದ ಪಾಠಗಳನ್ನು ಕಲಿತು, NDB ಯೊಳಗೆ BMG ಯನ್ನು ಪ್ರಾಯೋಗಿಕ ಉಪಕ್ರಮವಾಗಿ, ಹೆಚ್ಚುವರಿ ಬಂಡವಾಳ ಕೊಡುಗೆಗಳಿಲ್ಲದೆ, ಅದರ ಸದಸ್ಯರಿಂದ ಪ್ರಾರಂಭಿಸಲು ನಾವು ಮಾರ್ಗಸೂಚಿಗಳ ಬಗ್ಗೆ ಒಪ್ಪಿಕೊಂಡಿದ್ದೇವೆ. 2025 ರ ಉದ್ದಕ್ಕೂ ಈ ಪ್ರಾಯೋಗಿಕ ಉಪಕ್ರಮವನ್ನು ಅಭಿವೃದ್ಧಿಪಡಿಸಲು ನಾವು ಎದುರು ನೋಡುತ್ತಿದ್ದೇವೆ, 2026 ರ BRICS ಶೃಂಗಸಭೆಯಲ್ಲಿ ಪ್ರಗತಿಯ ಬಗ್ಗೆ ವರದಿ ಮಾಡುವ ದೃಷ್ಟಿಯಿಂದ ಈ ಕ್ರಮ ಕೈಗೊಳ್ಳಲಾಗಿದೆ.

ಬ್ರಿಕ್ಸ್‌ ಇಂಟರ್‌ ಬ್ಯಾಂಕ್ ಸಹಕಾರ ಕಾರ್ಯವಿಧಾನವು (BRICS Interbank Cooperation Mechanism - ICM) ಯೋಜನೆಗಳು ಮತ್ತು ಕಾರ್ಯಕ್ರಮಗಳಿಗಾಗಿ ನವೀನ ಹಣಕಾಸು ಅಭ್ಯಾಸಗಳು ಮತ್ತು ವಿಧಾನಗಳನ್ನು ಸುಗಮಗೊಳಿಸುವ ಮತ್ತು ವಿಸ್ತರಿಸುವತ್ತ ಗಮನಹರಿಸುತ್ತಿರುವುದನ್ನು ನಾವು ಸ್ವಾಗತಿಸುತ್ತೇವೆ. ಸ್ಥಳೀಯ ಕರೆನ್ಸಿಗಳಲ್ಲಿ ಹಣಕಾಸು ಒದಗಿಸುವ ಸ್ವೀಕಾರಾರ್ಹ ಕಾರ್ಯವಿಧಾನಗಳನ್ನು ಕಂಡುಹಿಡಿಯುವುದು ಇದರಲ್ಲಿ ಸೇರಿದೆ. ICM ಮತ್ತು NDB ನಡುವಿನ ನಿರಂತರ ಸಂವಾದವನ್ನು ನಾವು ಸ್ವಾಗತಿಸುತ್ತೇವೆ.

ಬ್ರಿಕ್ಸ್ ಗಡಿಯಾಚೆಗಿನ ಪಾವತಿ ಉಪಕ್ರಮದ (BRICS Cross-Border Payments Initiative) ಕುರಿತಾದ ಸಂವಾದವನ್ನು ಮುಂದುವರಿಸುವ ಜವಾಬ್ದಾರಿಯನ್ನು, ನಮ್ಮ ಹಣಕಾಸು ಸಚಿವರಿಗೆ ಮತ್ತು ಕೇಂದ್ರೀಯ ಬ್ಯಾಂಕ್ ಗವರ್ನರ್‌ ಗಳಿಗೆ ನಾವು ಸೂಕ್ತಾನುಸಾರ ವಹಿಸುತ್ತೇವೆ. ಬ್ರಿಕ್ಸ್ ಪಾವತಿ ವ್ಯವಸ್ಥೆಗಳ ನಡುವೆ ಹೆಚ್ಚಿನ ಪರಸ್ಪರ ಕಾರ್ಯಸಾಧ್ಯತೆಯನ್ನು ಸಾಧಿಸುವ ನಿಟ್ಟಿನಲ್ಲಿ ಚರ್ಚೆಗಳನ್ನು ಮುಂದುವರಿಸಲು ಹಾಗೂ ಅದಕ್ಕೆ ಪೂರಕವಾದ ಸಂಭಾವ್ಯ ಮಾರ್ಗಗಳನ್ನು ಗುರುತಿಸುವಲ್ಲಿ 'ಬ್ರಿಕ್ಸ್ ಪಾವತಿ ಕಾರ್ಯಪಡೆ'ಯು (BPTF) ಸಾಧಿಸಿರುವ ಪ್ರಗತಿಯನ್ನು ನಾವು ಶ್ಲಾಘಿಸುತ್ತೇವೆ. ಈ ಹಿನ್ನೆಲೆಯಲ್ಲಿ, "ತಾಂತ್ರಿಕ ವರದಿ: ಬ್ರಿಕ್ಸ್ ಗಡಿಯಾಚೆಗಿನ ಪಾವತಿ ವ್ಯವಸ್ಥೆ"ಯನ್ನು ನಾವು ಆದರದಿಂದ ಸ್ವಾಗತಿಸುತ್ತೇವೆ. ಈ ವರದಿಯು ಸದಸ್ಯ ರಾಷ್ಟ್ರಗಳ ಒಲವನ್ನು ಸ್ಪಷ್ಟವಾಗಿ ಪ್ರತಿಬಿಂಬಿಸುತ್ತದೆ. ಅಷ್ಟೇ ಅಲ್ಲದೆ, ಬ್ರಿಕ್ಸ್ ರಾಷ್ಟ್ರಗಳು ಮತ್ತು ಇತರ ದೇಶಗಳ ನಡುವೆ ವೇಗವಾದ, ಕಡಿಮೆ ವೆಚ್ಚದ, ಸುಲಭಲಭ್ಯ, ದಕ್ಷ, ಪಾರದರ್ಶಕ ಹಾಗೂ ಸುರಕ್ಷಿತವಾದ ಗಡಿಯಾಚೆಗಿನ ಪಾವತಿಗಳನ್ನು ಸಾಧ್ಯವಾಗಿಸುವ ನಮ್ಮ ಪ್ರಯತ್ನಗಳಲ್ಲಿ ಇದು ನಿರ್ಣಾಯಕ ಪಾತ್ರ ವಹಿಸಲಿದೆ ಮತ್ತು ಬೃಹತ್ ಪ್ರಮಾಣದ ವ್ಯಾಪಾರ ಹಾಗೂ ಹೂಡಿಕೆಯ ಹರಿವನ್ನು ಉತ್ತೇಜಿಸಲಿದೆ.

ಬ್ರಿಕ್ಸ್ ಸದಸ್ಯ ರಾಷ್ಟ್ರಗಳ (ಮರು)ವಿಮಾ ಸಾಮರ್ಥ್ಯವನ್ನು ಹೆಚ್ಚಿಸುವ ಕುರಿತಾದ ಚರ್ಚೆಗಳನ್ನೂ ನಾವು ಸ್ವಾಗತಿಸುತ್ತೇವೆ. ನಮ್ಮ ಹಣಕಾಸು ಸಚಿವರು ಅನುಮೋದಿಸಿದ ಕಾರ್ಯಪಡೆಯ ಮೂಲಕ ನಡೆಯುವ ಈ ಚರ್ಚೆಗಳಲ್ಲಿ, ನಿಯಂತ್ರಕರು, ಬ್ರಿಕ್ಸ್ ದೇಶಗಳ ಮರುವಿಮಾ ಕಂಪನಿಗಳು ಮತ್ತು ಬ್ರಿಕ್ಸ್ ವ್ಯಾಪಾರ ಮಂಡಳಿಯಂತಹ ಸಂಬಂಧಿತ ಪಾಲುದಾರರು ಸ್ವಯಂಪ್ರೇರಿತರಾಗಿ ಭಾಗವಹಿಸುವುದನ್ನು ನಾವು ಪ್ರೋತ್ಸಾಹಿಸುತ್ತೇವೆ. ಇದಲ್ಲದೆ, ಸಂಬಂಧಿತ ಪಾಲುದಾರರ ನಡುವೆ ಪಾವತಿ ಮತ್ತು ಠೇವಣಿ (depositary) ಮೂಲಸೌಕರ್ಯದ ಬಗ್ಗೆ ತಾಂತ್ರಿಕ ಸಂವಾದವನ್ನು ಮುಂದುವರಿಸಲು ಸೂಕ್ತ ಸ್ವರೂಪಗಳನ್ನು ಅನ್ವೇಷಿಸುವ ಚರ್ಚೆಗಳನ್ನೂ ನಾವು ಉತ್ತೇಜಿಸುತ್ತೇವೆ.

ಮಾಹಿತಿ ಭದ್ರತೆ ಮತ್ತು ಹಣಕಾಸು ತಂತ್ರಜ್ಞಾನ (Fintech) ಕ್ಷೇತ್ರಗಳಲ್ಲಿನ ನಮ್ಮ ಸಾಮಾನ್ಯ ಆದ್ಯತೆಗಳಿಗಾಗಿ 'ಬ್ರಿಕ್ಸ್ ಕ್ಷಿಪ್ರ ಮಾಹಿತಿ ಭದ್ರತಾ ಚಾನೆಲ್' (BRISC) ಅಡಿಯಲ್ಲಿ ನಡೆಯುತ್ತಿರುವ ನಿರಂತರ ಸಹಯೋಗವನ್ನು ನಾವು ಅಂಗೀಕರಿಸುತ್ತೇವೆ. ಹಾಗೆಯೇ, ಹಣಕಾಸು ನಾವೀನ್ಯತೆಯಲ್ಲಿ ಸಹಕಾರವನ್ನು ಬಲಪಡಿಸುವಲ್ಲಿ ಮತ್ತು ಉದಯೋನ್ಮುಖ ತಂತ್ರಜ್ಞಾನಗಳ ಜವಾಬ್ದಾರಿಯುತ ಬಳಕೆಯನ್ನು ಪ್ರೋತ್ಸಾಹಿಸುವಲ್ಲಿ 'ಬ್ರಿಕ್ಸ್ ಫಿನ್‌ಟೆಕ್ ಇನ್ನೋವೇಶನ್ ಹಬ್' ವಹಿಸುತ್ತಿರುವ ಪಾತ್ರವನ್ನು ನಾವು ಗುರುತಿಸುತ್ತೇವೆ.

ತುರ್ತು ಮೀಸಲು ವ್ಯವಸ್ಥೆಯ (Contingent Reserve Arrangement - CRA) ಕುರಿತಾದ ಪ್ರಗತಿಯನ್ನು ನಾವು ಸ್ವಾಗತಿಸುತ್ತೇವೆ. ವಿಶೇಷವಾಗಿ, ಪರಿಷ್ಕೃತ ಒಪ್ಪಂದ ಮತ್ತು ನಿಯಮಾವಳಿಗಳ ಪ್ರಸ್ತಾವನೆಯ ಮೇಲೆ ತಾಂತ್ರಿಕ ತಂಡವು ಒಮ್ಮತಕ್ಕೆ ಬಂದಿರುವುದನ್ನು ನಾವು ಶ್ಲಾಘಿಸುತ್ತೇವೆ. ಅರ್ಹ ಪಾವತಿ ಕರೆನ್ಸಿಗಳ ಸೇರ್ಪಡೆ ಮತ್ತು ಸುಧಾರಿತ ಅಪಾಯ ನಿರ್ವಹಣೆಯ ಮೂಲಕ CRA ಯ ನಮ್ಯತೆ ಹಾಗೂ ಪರಿಣಾಮಕಾರಿತ್ವವನ್ನು ಹೆಚ್ಚಿಸುವ ಪ್ರಯತ್ನಗಳನ್ನು ನಾವು ಬೆಂಬಲಿಸುತ್ತೇವೆ. ಇದಲ್ಲದೆ, CRA ಗೆ ಸೇರಲು ಆಸಕ್ತಿ ವ್ಯಕ್ತಪಡಿಸಿರುವ ಹೊಸ ಬ್ರಿಕ್ಸ್ ಸದಸ್ಯರ ಭಾಗವಹಿಸುವಿಕೆಗೂ ನಾವು ಮನ್ನಣೆ ನೀಡುತ್ತೇವೆ. ಅವರನ್ನು ಸ್ವಯಂಪ್ರೇರಿತ ಆಧಾರದ ಮೇಲೆ ಮತ್ತು ಆಯಾ ದೇಶಗಳ ನಿರ್ದಿಷ್ಟ ಪರಿಸ್ಥಿತಿಗಳಿಗೆ ಅನುಗುಣವಾಗಿ ಈ ವ್ಯವಸ್ಥೆಯಲ್ಲಿ ಸೇರ್ಪಡೆಗೊಳಿಸಲು ನಾವು ಬದ್ಧರಾಗಿದ್ದೇವೆ.

ನಮ್ಮ ರಾಷ್ಟ್ರೀಯ ಸುಸ್ಥಿರ ಅಭಿವೃದ್ಧಿ ಕಾರ್ಯತಂತ್ರಗಳಿಗೆ ಅನುಗುಣವಾಗಿ, ದಕ್ಷತೆ, ಪಾರದರ್ಶಕತೆ, ಆಧುನೀಕರಣ, ಒಳಗೊಳ್ಳುವಿಕೆ ಮತ್ತು ಸುಸ್ಥಿರತೆಯ ತತ್ವಗಳಿಂದ ಮಾರ್ಗದರ್ಶಿಸಲ್ಪಟ್ಟು, ಪೂರೈಕೆ ಸರಪಳಿಯ ಸದೃಢತೆಯನ್ನು ಖಚಿತಪಡಿಸಿಕೊಳ್ಳಲು ನಾವು ಬದ್ಧರಾಗಿದ್ದೇವೆ. ಈ ನಿಟ್ಟಿನಲ್ಲಿ ಅಭಿವೃದ್ಧಿಶೀಲ ರಾಷ್ಟ್ರಗಳ ಅಗತ್ಯಗಳಿಗೆ ವಿಶೇಷ ಗಮನ ನೀಡಲಾಗುವುದು. ಖಾಸಗಿ ವಲಯದ ಸಕ್ರಿಯ ಪಾಲ್ಗೊಳ್ಳುವಿಕೆಯನ್ನು ಮತ್ತಷ್ಟು ಉತ್ತೇಜಿಸುವುದು, ಅತಿ ಸಣ್ಣ , ಸಣ್ಣ ಮತ್ತು ಮಧ್ಯಮ ಉದ್ಯಮಗಳ (MSMEs) ಅಭಿವೃದ್ಧಿ ಮತ್ತು ಪ್ರೋತ್ಸಾಹವನ್ನು ಬೆಂಬಲಿಸುವುದು, ಹಾಗೂ ಹೆಚ್ಚು ಸದೃಢ ಮತ್ತು ಕ್ರಿಯಾತ್ಮಕವಾದ ಜಾಗತಿಕ ವ್ಯಾಪಾರ ಪರಿಸರ ವ್ಯವಸ್ಥೆಯನ್ನು ಪೋಷಿಸುವ ಮಹತ್ವವನ್ನು ನಾವು ಪುನರುಚ್ಚರಿಸುತ್ತೇವೆ. ವ್ಯವಹಾರ ಕಾರ್ಯಾಚರಣೆಗಳನ್ನು ಸರಳಗೊಳಿಸುವ ಗುರಿ ಹೊಂದಿರುವ ಡಿಜಿಟಲ್ ಸೇವೆಗಳು ಮತ್ತು ವೇದಿಕೆಗಳ ಮೂಲಕ MSME ಗಳನ್ನು ಬೆಂಬಲಿಸುವ ಉತ್ತಮ ಪದ್ಧತಿಗಳನ್ನು ಪರಸ್ಪರ ವಿನಿಮಯ ಮಾಡಿಕೊಳ್ಳಲು ನಾವು ಉದ್ದೇಶಿಸಿದ್ದೇವೆ. ಜ್ಞಾನ ವಿನಿಮಯ ಮತ್ತು 'ದಕ್ಷಿಣ-ದಕ್ಷಿಣ' ಸಹಕಾರಕ್ಕಾಗಿ ಒಂದು ವೇದಿಕೆಯಾಗಿ 'ಸುಸ್ಥಿರ ಸರ್ಕಾರಿ ಖರೀದಿ' ಕುರಿತ ಬ್ರಿಕ್ಸ್ ವಿಚಾರ ಸಂಕಿರಣವನ್ನು ಪ್ರಾರಂಭಿಸಲು ಬ್ರೆಜಿಲ್ ಅಧ್ಯಕ್ಷತೆಯು ಕೈಗೊಂಡ ಉಪಕ್ರಮವನ್ನು ನಾವು ಸ್ವಾಗತಿಸುತ್ತೇವೆ. ಆರ್ಥಿಕ ಮತ್ತು ವ್ಯಾಪಾರ ಸಹಕಾರವನ್ನು ಸುಗಮಗೊಳಿಸುವುದರಲ್ಲಿ, ಸುಸ್ಥಿರ ಅಭಿವೃದ್ಧಿಯನ್ನು ಉತ್ತೇಜಿಸುವುದರಲ್ಲಿ, ಕೈಗಾರಿಕಾ ನೀತಿಯನ್ನು ಬೆಂಬಲಿಸುವುದರಲ್ಲಿ ಮತ್ತು ಎಲ್ಲರನ್ನೂ ಒಳಗೊಂಡ ಬೆಳವಣಿಗೆಯನ್ನು ಉತ್ತೇಜಿಸುವುದರಲ್ಲಿ ಸರ್ಕಾರಿ ಖರೀದಿಯ ಕಾರ್ಯತಂತ್ರದ ಪಾತ್ರವನ್ನು ನಾವು ಅಂಗೀಕರಿಸುತ್ತೇವೆ. ಖರೀದಿಯನ್ನು ಒಂದು ಅಭಿವೃದ್ಧಿ ಸಾಧನವಾಗಿ ಬಳಸುವುದಕ್ಕೆ ಸಂಬಂಧಿಸಿದಂತೆ, ತಮ್ಮ ರಾಷ್ಟ್ರೀಯ ಅನುಭವಗಳು, ನೀತಿ ನಾವೀನ್ಯತೆಗಳು ಮತ್ತು ಸವಾಲುಗಳನ್ನು ಹಂಚಿಕೊಳ್ಳುವಲ್ಲಿ ಬ್ರಿಕ್ಸ್ ಮತ್ತು ಪಾಲುದಾರ ರಾಷ್ಟ್ರಗಳ ತೊಡಗಿಸಿಕೊಳ್ಳುವಿಕೆಯನ್ನು ನಾವು ಶ್ಲಾಘನೆಯೊಂದಿಗೆ ಗಮನಿಸುತ್ತೇವೆ. ಭವಿಷ್ಯದ ಅಧ್ಯಕ್ಷತೆಗಳ ಅಡಿಯಲ್ಲೂ ಈ ನಿಯಮಿತ ಸಂವಾದವು ಮುಂದುವರಿಯುವುದನ್ನು ನಾವು ಪ್ರೋತ್ಸಾಹಿಸುತ್ತೇವೆ.

ಕಚ್ಚಾ ವಜ್ರಗಳವ್ಯಾಪಾರವನ್ನು ನಿಯಂತ್ರಿಸುವ ಏಕೈಕ ಜಾಗತಿಕ ಅಂತರ್-ಸರ್ಕಾರಿ ಪ್ರಮಾಣೀಕರಣ ಯೋಜನೆಯಾದ ಕಿಂಬರ್ಲಿ ಪ್ರಕ್ರಿಯೆಗೆ (KP) ನಮ್ಮ ಬೆಂಬಲವನ್ನು ನಾವು ಪುನರುಚ್ಚರಿಸುತ್ತೇವೆ ಮತ್ತು ಸಂಘರ್ಷದ ವಜ್ರಗಳು ಮಾರುಕಟ್ಟೆ ಪ್ರವೇಶಿಸುವುದನ್ನು ತಡೆಯುವ ನಮ್ಮ ಬದ್ಧತೆಯನ್ನು ಒತ್ತಿ ಹೇಳುತ್ತೇವೆ. 2025 ರಲ್ಲಿ ಕಿಂಬರ್ಲಿ ಪ್ರಕ್ರಿಯೆಯ ಪಾಲಕ ಅಧ್ಯಕ್ಷರಾಗಿ ಯುಎಇಯ ಪ್ರಯತ್ನಗಳನ್ನು ನಾವು ಸ್ವಾಗತಿಸುತ್ತೇವೆ ಮತ್ತು ಜಾಗತಿಕ ವಜ್ರ ಉದ್ಯಮದ ಸುಸ್ಥಿರ ಅಭಿವೃದ್ಧಿಯನ್ನು ಉತ್ತೇಜಿಸಲು ನಡೆಯುತ್ತಿರುವ ಪ್ರಯತ್ನಗಳನ್ನು ಶ್ಲಾಘಿಸುತ್ತೇವೆ. ಬ್ರಿಕ್ಸ್‌ ನೊಳಗೆ ಮತ್ತು ಜಾಗತಿಕ ಮಾರುಕಟ್ಟೆಯಲ್ಲಿ ವಜ್ರ ಮತ್ತು ಅಮೂಲ್ಯ ಲೋಹಗಳ ವ್ಯಾಪಾರವನ್ನು ಉತ್ತೇಜಿಸಲು ಕಾರ್ಯಸಾಧ್ಯವಾದ ಕಾರ್ಯವಿಧಾನಗಳನ್ನು ನಾವು ಪರಿಶೀಲಿಸುವುದನ್ನು ಮುಂದುವರಿಸುತ್ತೇವೆ.

ಕ್ಷಿಪ್ರವಾಗಿ ಬದಲಾಗುತ್ತಿರುವ ಕೈಗಾರಿಕಾ ಕ್ಷೇತ್ರದಲ್ಲಿ ಆಸಕ್ತಿಗಳು, ಸವಾಲುಗಳು ಮತ್ತು ಅವಕಾಶಗಳನ್ನು ಗುರುತಿಸಲು ಹಾಗೂ ಕೈಗಾರಿಕಾ ಸಾಮರ್ಥ್ಯವನ್ನು ವರ್ಧಿಸಲು 'ನವ ಕೈಗಾರಿಕಾ ಕ್ರಾಂತಿಯ ಸಹಭಾಗಿತ್ವ'ವು (PartNIR) ಒಂದು ಮಾರ್ಗದರ್ಶಿ ವೇದಿಕೆಯಾಗಿ ಕಾರ್ಯನಿರ್ವಹಿಸುತ್ತದೆ ಎಂಬುದನ್ನು ನಾವು ಅಂಗೀಕರಿಸುತ್ತೇವೆ. ಜೊತೆಗೆ, ನಿರಂತರ ಸಹಯೋಗಕ್ಕಾಗಿ ಒಂದು ರಚನಾತ್ಮಕ ಚೌಕಟ್ಟಿನ ಮೂಲಕ ಇದು ಬ್ರಿಕ್ಸ್ ಕೈಗಾರಿಕಾ ಸಹಕಾರದ ನಿರಂತರತೆಯನ್ನು ಬೆಂಬಲಿಸುತ್ತದೆ. ಈ ನಿಟ್ಟಿನಲ್ಲಿ, 'ಬುದ್ಧಿವಂತ ಉತ್ಪಾದನೆ ಮತ್ತು ರೊಬೊಟಿಕ್ಸ್ ಕಾರ್ಯಪಡೆ', 'ಕೈಗಾರಿಕೆಯ ಡಿಜಿಟಲ್ ಪರಿವರ್ತನಾ ಕಾರ್ಯಪಡೆ' ಮತ್ತು 'ಸಣ್ಣ ಮತ್ತು ಮಧ್ಯಮ ಉದ್ಯಮಗಳ ಕಾರ್ಯಪಡೆ'ಗಳ ಕಾರ್ಯವ್ಯಾಪ್ತಿಯ ನಿಯಮಗಳಿಗೆ ದೊರೆತ ಅನುಮೋದನೆಯನ್ನು ನಾವು ಶ್ಲಾಘಿಸುತ್ತೇವೆ. ಬ್ರಿಕ್ಸ್ ರಾಷ್ಟ್ರಗಳ ನಡುವೆ ಸಣ್ಣ ಮತ್ತು ಮಧ್ಯಮ ಉದ್ಯಮಗಳ (SME) ವಲಯದಲ್ಲಿ ರಚನಾತ್ಮಕ ಸಹಕಾರವನ್ನು ಮುಂದುವರಿಸುವ ನಿಟ್ಟಿನಲ್ಲಿ ಒಂದು ಮಹತ್ವದ ಮೈಲಿಗಲ್ಲಾಗಿರುವ, ಮೊದಲ 'ಬ್ರಿಕ್ಸ್ SME ಕಾರ್ಯಪಡೆಯ ಕ್ರಿಯಾ ಯೋಜನೆಗೆ (2025–2030)' ದೊರೆತ ಅನುಮೋದನೆಯನ್ನು ಸಹ ನಾವು ಶ್ಲಾಘಿಸುತ್ತೇವೆ. ಬ್ರಿಕ್ಸ್ ರಾಷ್ಟ್ರಗಳಲ್ಲಿ 'ಕೈಗಾರಿಕೆ 4.0' ಕೌಶಲ್ಯಗಳ ಅಭಿವೃದ್ಧಿಯನ್ನು ಜಂಟಿಯಾಗಿ ಬೆಂಬಲಿಸಲು ಮತ್ತು ನವ ಕೈಗಾರಿಕಾ ಕ್ರಾಂತಿಯಲ್ಲಿ ಸಹಭಾಗಿತ್ವ ಹಾಗೂ ಹೆಚ್ಚಿದ ಉತ್ಪಾದಕತೆಯನ್ನು ಉತ್ತೇಜಿಸಲು, ವಿಶ್ವಸಂಸ್ಥೆಯ ಕೈಗಾರಿಕಾ ಅಭಿವೃದ್ಧಿ ಸಂಸ್ಥೆಯ (UNIDO) ಸಹಯೋಗದೊಂದಿಗೆ 'ಬ್ರಿಕ್ಸ್ ಕೈಗಾರಿಕಾ ಸಾಮರ್ಥ್ಯಗಳ ಕೇಂದ್ರ' (BCIC) ಪ್ರಾರಂಭವಾಗಿರುವುದನ್ನು ನಾವು ಸ್ವಾಗತಿಸುತ್ತೇವೆ.  BCIC ಯ (ಬ್ರಿಕ್ಸ್ ಕೈಗಾರಿಕಾ ಸಾಮರ್ಥ್ಯಗಳ ಕೇಂದ್ರ) ಚಟುವಟಿಕೆಗಳಲ್ಲಿ ಭಾಗವಹಿಸಲು ನಾವು ಸದಸ್ಯರನ್ನು ಪ್ರೋತ್ಸಾಹಿಸುತ್ತೇವೆ. ಮುಂದಿನ ಬ್ರಿಕ್ಸ್ ಸಹಭಾಗಿತ್ವಕ್ಕಾಗಿ ಅದರ ಎಲೆಕ್ಟ್ರಾನಿಕ್ ವೇದಿಕೆಯಲ್ಲಿ ಕಂಪನಿಗಳ ನೋಂದಣಿ ಮಾಡುವುದೂ ಇದರಲ್ಲಿ ಸೇರಿದೆ. 'ಚೀನಾ ಬ್ರಿಕ್ಸ್ ಕೈಗಾರಿಕಾ ಸಾಮರ್ಥ್ಯಗಳ ಕೇಂದ್ರ' (CCBIC) ಸ್ಥಾಪನೆಯನ್ನು ಸಹ ನಾವು ಸ್ವಾಗತಿಸುತ್ತೇವೆ. ಕಳೆದ 5 ವರ್ಷಗಳಲ್ಲಿ 'PartNIR ಕುರಿತ ಬ್ರಿಕ್ಸ್ ವೇದಿಕೆ', 'ಬ್ರಿಕ್ಸ್ ಕೈಗಾರಿಕಾ ನಾವೀನ್ಯತೆ ಸ್ಪರ್ಧೆ', 'ನವ ಕೈಗಾರಿಕಾ ಕ್ರಾಂತಿಯ ಕುರಿತ ಬ್ರಿಕ್ಸ್ ಪ್ರದರ್ಶನ' ಮತ್ತು 'BPIC ತರಬೇತಿ ಕಾರ್ಯಕ್ರಮಗಳು' ಸೇರಿದಂತೆ ವಿವಿಧ ಕಾರ್ಯಕ್ರಮಗಳನ್ನು ಆಯೋಜಿಸುವಲ್ಲಿ 'ಬ್ರಿಕ್ಸ್ PartNIR ಇನ್ನೋವೇಶನ್ ಸೆಂಟರ್' (BPIC) ಮಾಡಿದ ಪ್ರಯತ್ನಗಳನ್ನು ನಾವು ಶ್ಲಾಘಿಸುತ್ತೇವೆ ಮತ್ತು BPIC ತರಬೇತಿ ಕಾರ್ಯಕ್ರಮಗಳಿಗಾಗಿ ವಿದ್ಯಾರ್ಥಿವೇತನ ಸ್ಥಾಪನೆಯನ್ನು ಸ್ವಾಗತಿಸುತ್ತೇವೆ. ಬ್ರೆಜಿಲ್ ಅಧ್ಯಕ್ಷತೆಯ ಅಡಿಯಲ್ಲಿ, 9ನೇ ಬ್ರಿಕ್ಸ್ ಕೈಗಾರಿಕಾ ಸಚಿವರ ಸಭೆಯ ಸಂದರ್ಭದಲ್ಲಿ, ಚೀನಾದ ಸಹ-ಆತಿಥ್ಯದಲ್ಲಿ ಮತ್ತು 'ಚೀನಾ-ಬ್ರಿಕ್ಸ್ ಕೃತಕ ಬುದ್ಧಿಮತ್ತೆ ಅಭಿವೃದ್ಧಿ ಮತ್ತು ಸಹಕಾರ ಕೇಂದ್ರ'ದ ಆಯೋಜನೆಯಲ್ಲಿ 'ಬ್ರಿಕ್ಸ್ ಕೃತಕ ಬುದ್ಧಿಮತ್ತೆ ಉನ್ನತ ಮಟ್ಟದ ವೇದಿಕೆ'ಯು ಬ್ರೆಸಿಲಿಯಾದಲ್ಲಿ ನಡೆಯಿತು ಎಂಬುದನ್ನು ನಾವು ಅಂಗೀಕರಿಸುತ್ತೇವೆ. 'ಬ್ರಿಕ್ಸ್ ನಾವೀನ್ಯತೆ ಕ್ರಿಯಾ ಯೋಜನೆ 2021-2024'ರ ಅನುಷ್ಠಾನದಲ್ಲಿ ಸಾಧಿಸಿದ ಪ್ರಗತಿಯನ್ನು ನಾವು ಗುರುತಿಸುತ್ತೇವೆ. ಭಾರತದ ನೇತೃತ್ವದಲ್ಲಿ, ಜನವರಿ 2025 ರಲ್ಲಿ 'ಬ್ರಿಕ್ಸ್ ಸ್ಟಾರ್ಟ್‌ ಅಪ್ ವೇದಿಕೆ'ಯ ಪ್ರಾರಂಭವೂ ಇದರಲ್ಲಿ ಸೇರಿದೆ. ಬ್ರಿಕ್ಸ್ ದೇಶಗಳ ಸ್ಟಾರ್ಟ್‌ಅಪ್ ಪರಿಸರ ವ್ಯವಸ್ಥೆಗಳ ನಡುವೆ ಸಹಯೋಗ ಮತ್ತು ಆಳವಾದ ಪಾಲ್ಗೊಳ್ಳುವಿಕೆಯನ್ನು ಉತ್ತೇಜಿಸಲು ಸ್ಥಾಪಿಸಲಾದ 'ಬ್ರಿಕ್ಸ್ ಸ್ಟಾರ್ಟ್ ‌ಅಪ್ ಜ್ಞಾನ ಕೇಂದ್ರ'ದ ಪ್ರಾರಂಭವನ್ನೂ ನಾವು ಶ್ಲಾಘಿಸುತ್ತೇವೆ.

ಸಶಕ್ತ, ಎಲ್ಲರನ್ನೂ ಒಳಗೊಂಡ ಮತ್ತು ಸುರಕ್ಷಿತ ಡಿಜಿಟಲ್ ಆರ್ಥಿಕತೆಯನ್ನು ನಿರ್ಮಿಸುವುದು, ಹಾಗೂ ಡಿಜಿಟಲ್ ಪರಿವರ್ತನೆ ಮತ್ತು ಸಾಮಾಜಿಕ-ಆರ್ಥಿಕ ಬೆಳವಣಿಗೆಗೆ ಡಿಜಿಟಲ್ ಸಂಪರ್ಕವು ಅತ್ಯಗತ್ಯವೆಂಬುದರ ಮಹತ್ವವನ್ನು ಗುರುತಿಸಿ, ಬ್ರಿಕ್ಸ್ ರಾಷ್ಟ್ರಗಳ ನಡುವಿನ ಸಹಕಾರವನ್ನು ಬಲಪಡಿಸುವ ಅಗತ್ಯವನ್ನು ನಾವು ಒತ್ತಿ ಹೇಳುತ್ತೇವೆ. ಸದೃಢ, ಸುರಕ್ಷಿತ, ಎಲ್ಲರನ್ನೂ ಒಳಗೊಂಡ ಮತ್ತು ಪರಸ್ಪರ ಕಾರ್ಯಸಾಧ್ಯವಾದ ಡಿಜಿಟಲ್ ಸಾರ್ವಜನಿಕ ಮೂಲಸೌಕರ್ಯವು, ಬೃಹತ್ ಪ್ರಮಾಣದಲ್ಲಿ ಸೇವೆಗಳನ್ನು ತಲುಪಿಸುವ ಮತ್ತು ಎಲ್ಲರಿಗೂ ಸಾಮಾಜಿಕ-ಆರ್ಥಿಕ ಅವಕಾಶಗಳನ್ನು ಹೆಚ್ಚಿಸುವ ಸಾಮರ್ಥ್ಯವನ್ನು ಹೊಂದಿದೆ ಎಂಬುದನ್ನು ನಾವು ಅಂಗೀಕರಿಸುತ್ತೇವೆ.

ಇಂಟೆರ್ ನೆಟ್ ವಿಘಟನೆಯನ್ನು ತಪ್ಪಿಸುತ್ತಾ ಹಾಗೂ ಭದ್ರತೆ ಸೇರಿದಂತೆ ಇಂಟೆರ್ ನೆಟ್ ಬಳಕೆಯ ಯಾವುದೇ ಅಂಶಗಳಿಗೆ ಸಂಬಂಧಿಸಿದ ರಾಷ್ಟ್ರೀಯ ಶಾಸಕಾಂಗ ಚೌಕಟ್ಟುಗಳನ್ನು ಗೌರವಿಸುತ್ತಾ, ಇಂಟರ್ನೆಟ್‌ನ ರಾಷ್ಟ್ರೀಯ ವಿಭಾಗಗಳ ಸಮಗ್ರತೆ, ಕಾರ್ಯನಿರ್ವಹಣೆಯ ಸ್ಥಿರತೆ ಮತ್ತು ಸುರಕ್ಷತೆಯನ್ನು ಖಚಿತಪಡಿಸಿಕೊಳ್ಳಲು, ಡಿಜಿಟಲ್ ಮೂಲಸೌಕರ್ಯ ಕ್ಷೇತ್ರದಲ್ಲಿ ಜಂಟಿ ಕ್ರಮದ ಸಾಧ್ಯತೆಯನ್ನು ಅನ್ವೇಷಿಸಲು ನಾವು ಬ್ರಿಕ್ಸ್ ಸದಸ್ಯರನ್ನು ಪ್ರೋತ್ಸಾಹಿಸುತ್ತೇವೆ.

'ಡಿಜಿಟಲ್ ಪರಿವರ್ತನೆ ಮತ್ತು ಅರ್ಥಪೂರ್ಣ ಸಂಪರ್ಕ' ಕುರಿತ ವೆಬಿನಾರ್ ಅನ್ನು ಆಯೋಜಿಸಿದ್ದಕ್ಕಾಗಿ ಬ್ರೆಜಿಲ್ ಅಧ್ಯಕ್ಷತೆಯ ಪ್ರಯತ್ನಗಳನ್ನು ನಾವು ಶ್ಲಾಘಿಸುತ್ತೇವೆ. ಪ್ರತಿ ದೇಶದ ವಿಭಿನ್ನ ಅಗತ್ಯಗಳಿಗೆ ಅನುಗುಣವಾಗಿ ಕೃಷಿ, ಉತ್ಪಾದನೆ, ಸಾರಿಗೆ, ಆರೋಗ್ಯ, ಶಿಕ್ಷಣ ಮತ್ತು ಹಣಕಾಸು ಮುಂತಾದ ವಿವಿಧ ವಲಯಗಳಲ್ಲಿ ಎಲ್ಲರನ್ನೂ ಒಳಗೊಂಡ, ಸುಲಭಲಭ್ಯ ಮತ್ತು ವಿಸ್ತರಿಸಬಹುದಾದ ಡಿಜಿಟಲ್ ಸೇವೆಗಳನ್ನು ಖಚಿತಪಡಿಸಿಕೊಳ್ಳಲು, ಮಾಹಿತಿ ಮತ್ತು ಸಂವಹನ ತಂತ್ರಜ್ಞಾನಗಳ (ICTs) ಅಳವಡಿಕೆಯನ್ನು ಸುಗಮಗೊಳಿಸಲು ನಿರಂತರ ಜ್ಞಾನ ಹಂಚಿಕೆ ಮತ್ತು ನೀತಿ ವಿನಿಮಯವನ್ನು ನಾವು ಪ್ರೋತ್ಸಾಹಿಸುತ್ತೇವೆ. 'ಬ್ರಿಕ್ಸ್‌ನಲ್ಲಿ ಡಿಜಿಟಲ್ ಪರಿವರ್ತನೆ' ಕುರಿತು ಸಾಮರ್ಥ್ಯ ವೃದ್ಧಿ ಕಾರ್ಯಾಗಾರಗಳನ್ನು ಪೂರಕ ಕಾರ್ಯಕ್ರಮವಾಗಿ ಆಯೋಜಿಸಿದ್ದಕ್ಕಾಗಿ ಭಾರತದ ಪ್ರಯತ್ನಗಳನ್ನು ನಾವು ಶ್ಲಾಘಿಸುತ್ತೇವೆ ಮತ್ತು ಇಂತಹ ಪೂರಕ ಕಾರ್ಯಕ್ರಮಗಳನ್ನು ಉತ್ತೇಜಿಸುವುದನ್ನು ಮುಂದುವರಿಸಲು ಬ್ರಿಕ್ಸ್ ಸದಸ್ಯರನ್ನು ಪ್ರೋತ್ಸಾಹಿಸುತ್ತೇವೆ.

2025ರಲ್ಲಿ ಚೀನಾ ಮತ್ತು ಬ್ರೆಜಿಲ್‌ ನ ಆತಿಥ್ಯದಲ್ಲಿ 'ಬ್ರಿಕ್ಸ್ ಫೋರಂ ಆನ್ ಫ್ಯೂಚರ್ ನೆಟ್‌ವರ್ಕ್ ಇನೋವೇಶನ್‌ ಕುರಿತು ನಡೆದಿದ್ದನ್ನು ನಾವು ಅಂಗೀಕರಿಸುತ್ತೇವೆ. ಬ್ರಿಕ್ಸ್ ಇನ್‌ಸ್ಟಿಟ್ಯೂಟ್ ಆಫ್ ಫ್ಯೂಚರ್ ನೆಟ್‌ವರ್ಕ್ (BIFN)ಗಳ ಕೌನ್ಸಿಲ್‌ನಿಂದ AI, ಮುಂದಿನ ಪೀಳಿಗೆಯ ಸಂವಹನಗಳು, ಇಂಡಸ್ಟ್ರಿ 4.0 ನಲ್ಲಿ ಇಂಟರ್ನೆಟ್ ಅಪ್ಲಿಕೇಶನ್ ಮತ್ತು EMF ಎಕ್ಸ್‌ಪೋಸರ್ ಕುರಿತ ಅಧ್ಯಯನ ಗುಂಪುಗಳ ಉಲ್ಲೇಖ ನಿಯಮಗಳನ್ನು ಅಳವಡಿಸಿಕೊಳ್ಳುವುದನ್ನು ಹಾಗೂ ಅವರ ಅಧ್ಯಕ್ಷರು ಮತ್ತು ಉಪಾಧ್ಯಕ್ಷರ ನಾಮನಿರ್ದೇಶನವನ್ನು ನಾವು ಸ್ವಾಗತಿಸುತ್ತೇವೆ. ಈ BIFN ಅಧ್ಯಯನ ಗುಂಪುಗಳಿಂದ ಪರಿಣಾಮಕಾರಿ ಫಲಿತಾಂಶಗಳನ್ನು ನಾವು ನಿರೀಕ್ಷಿಸುತ್ತೇವೆ.'ಮಕ್ಕಳ ಆನ್‌ಲೈನ್ ರಕ್ಷಣೆ'ಯ ವಿಷಯದಲ್ಲಿ ಸಾಧಿಸಿದ ಪ್ರಗತಿಯನ್ನು ಸಹ ನಾವು ಅಂಗೀಕರಿಸುತ್ತೇವೆ. ಸದಸ್ಯ ರಾಷ್ಟ್ರಗಳ ನಡುವೆ ಜ್ಞಾನ ಮತ್ತು ಉತ್ತಮ ಪದ್ಧತಿಗಳ ವಿನಿಮಯದ ಮೂಲಕ ಈ ಕ್ಷೇತ್ರದಲ್ಲಿ ಸಹಕಾರವನ್ನು ಹೆಚ್ಚಿಸಲು ಹೊಸ ಕಾರ್ಯವಿಧಾನಗಳನ್ನು ಅಭಿವೃದ್ಧಿಪಡಿಸಿರುವುದೂ ಇದರಲ್ಲಿ ಸೇರಿದೆ. 'ಡಿಜಿಟಲ್ ಬ್ರಿಕ್ಸ್ ವೇದಿಕೆ'ಯ ಸಂದರ್ಭದಲ್ಲಿ, 'ಡಿಜಿಟಲ್ ಸಾರ್ವಜನಿಕ ಸರಕುಗಳು ಮತ್ತು ಡಿಜಿಟಲ್ ಸಾರ್ವಜನಿಕ ಮೂಲಸೌಕರ್ಯ' ಕುರಿತು ಚರ್ಚಾಗೋಷ್ಠಿಯನ್ನು ಆಯೋಜಿಸಿದ್ದಕ್ಕಾಗಿ ಬ್ರೆಜಿಲ್ ಅಧ್ಯಕ್ಷತೆಯ ಪ್ರಯತ್ನಗಳನ್ನು ನಾವು ಶ್ಲಾಘಿಸುತ್ತೇವೆ ಮತ್ತು ನಿರಂತರ ಜ್ಞಾನ ಹಂಚಿಕೆ ಹಾಗೂ ನೀತಿ ವಿನಿಮಯವನ್ನು ಪ್ರೋತ್ಸಾಹಿಸುತ್ತೇವೆ. 'ಡಿಜಿಟಲ್ ಸಾರ್ವಜನಿಕ ಮೂಲಸೌಕರ್ಯದ ಕುರಿತು ಫೋಕಸ್ ಗ್ರೂಪ್‌ನ ಸಭೆ ನಡೆದಿರುವುದನ್ನು ಸಹ ನಾವು ಗಮನಿಸುತ್ತೇವೆ ಮತ್ತು ಅದರ ಕಾರ್ಯವ್ಯಾಪ್ತಿಯ ನಿಯಮಗಳ ಅಂಗೀಕಾರವನ್ನು ಸ್ವಾಗತಿಸುತ್ತೇವೆ.

ಸ್ಪೆಕ್ಟ್ರಮ್ ಮತ್ತು ಸಂಬಂಧಿತ ಉಪಗ್ರಹ ಕಕ್ಷೆಗಳ ತರ್ಕಬದ್ಧ, ದಕ್ಷ, ಸಮಾನ, ನ್ಯಾಯಯುತ, ಪರಿಣಾಮಕಾರಿ ಮತ್ತು ಮಿತವ್ಯಯಕಾರಿ ಬಳಕೆಯನ್ನು ಸಾಧಿಸಲು ಜಂಟಿ ಪ್ರಯತ್ನಗಳನ್ನು ಮಾಡುವ ನಮ್ಮ ಬದ್ಧತೆಯನ್ನು ನಾವು ಪುನರುಚ್ಚರಿಸುತ್ತೇವೆ. ಇದಲ್ಲದೆ, ಬಾಹ್ಯಾಕಾಶದ ಸುಸ್ಥಿರತೆಯ ಬಗ್ಗೆ ಸಹಕಾರವನ್ನು ಹೆಚ್ಚಿಸಲು ಬ್ರಿಕ್ಸ್ ಸದಸ್ಯರ ನಡುವೆ ಮತ್ತಷ್ಟು ಸಹಯೋಗವನ್ನು ನಾವು ಪ್ರೋತ್ಸಾಹಿಸುತ್ತೇವೆ. 'ಸುಸ್ಥಿರ ಬಾಹ್ಯಾಕಾಶ ಸಂಪರ್ಕ ಸಂಪನ್ಮೂಲಗಳ' ಕುರಿತ ಭವಿಷ್ಯದ ಬ್ರಿಕ್ಸ್ ಕಾರ್ಯಗಳ ಬಗ್ಗೆ ಪ್ರಸ್ತಾವನೆಗಳೊಂದಿಗೆ, ಪರಿಗಣನೆ ಮತ್ತು ಮುಂದಿನ ಕ್ರಮಗಳಿಗಾಗಿ, ಬ್ರೆಜಿಲ್ ಅಧ್ಯಕ್ಷತೆಯು ಒಂದು ವರದಿಯನ್ನು ಸಿದ್ಧಪಡಿಸಲಿದೆ ಎಂಬುದನ್ನು ನಾವು ಸಂತೃಪ್ತಿಯೊಂದಿಗೆ ಗಮನಿಸುತ್ತೇವೆ. ಬಾಹ್ಯಾಕಾಶ ದೂರಸಂಪರ್ಕ ವ್ಯವಸ್ಥೆಗಳ ತಾಂತ್ರಿಕ ವ್ಯಾಪ್ತಿಯು ಯಾವುದೇ ಸಂದರ್ಭದಲ್ಲೂ ರಾಷ್ಟ್ರದ ಸಾರ್ವಭೌಮತ್ವವನ್ನು ಉಲ್ಲಂಘಿಸಬಾರದು, ಮತ್ತು ಒಂದು ರಾಷ್ಟ್ರದ ಭೂಪ್ರದೇಶದೊಳಗೆ ಉಪಗ್ರಹ ಸೇವೆಗಳನ್ನು ಒದಗಿಸುವುದು ಆ ರಾಷ್ಟ್ರದಿಂದ ಅಧಿಕೃತಗೊಂಡರೆ ಮಾತ್ರವೇ ಸಾಧ್ಯವಾಗಬೇಕು ಎಂದು ನಾವು ಪ್ರತಿಪಾದಿಸುತ್ತೇವೆ. 'ಸುಸ್ಥಿರ ಬಾಹ್ಯಾಕಾಶ ಸಂಪರ್ಕ ಸಂಪನ್ಮೂಲಗಳ' ಕುರಿತ ಬ್ರಿಕ್ಸ್ ಶ್ವೇತಪತ್ರದ  ಸಿದ್ಧತೆಯನ್ನು ನಾವು ಸ್ವಾಗತಿಸುತ್ತೇವೆ.

ಬಾಹ್ಯಾಕಾಶದ ಶಾಂತಿಯುತ ಅನ್ವೇಷಣೆ ಮತ್ತು ಬಳಕೆಗಾಗಿ ಅಂತಾರಾಷ್ಟ್ರೀಯ ಸಹಕಾರದ ಮಹತ್ವವನ್ನು ನಾವು ಗುರುತಿಸುತ್ತೇವೆ ಮತ್ತು ಬ್ರಿಕ್ಸ್ ದೇಶಗಳ ನಡುವಿನ ಬಾಹ್ಯಾಕಾಶ ಸಾಮರ್ಥ್ಯಗಳಲ್ಲಿ ಅಸ್ತಿತ್ವದಲ್ಲಿರುವ ಅಸಮಾನತೆಗಳನ್ನು ಕಡಿಮೆ ಮಾಡುವ ನಮ್ಮ ಬದ್ಧತೆಯನ್ನು ಪುನರುಚ್ಚರಿಸುತ್ತೇವೆ. ಬಾಹ್ಯಾಕಾಶ ಚಟುವಟಿಕೆಗಳಲ್ಲಿ ದತ್ತಾಂಶ, ಪರಿಣತಿ ಮತ್ತು ಉತ್ತಮ ಪದ್ಧತಿಗಳ ವಿನಿಮಯವನ್ನು ಬಲಪಡಿಸುವುದು, ನಮ್ಮ ಬಾಹ್ಯಾಕಾಶ ಸಂಸ್ಥೆಗಳ ನಡುವಿನ ನಿರಂತರ ಸಹಕಾರವನ್ನು ಮುಂದುವರಿಸಲು ಮತ್ತು ಸುಸ್ಥಿರ ಪ್ರಗತಿಯನ್ನು ಪೋಷಿಸಲು ಒಂದು ಪ್ರಮುಖ ಅಂಶವಾಗಿದೆ ಎಂಬುದನ್ನು ನಾವು ಗುರುತಿಸುತ್ತೇವೆ. ಮಾಹಿತಿ ವಿನಿಮಯವನ್ನು ಸುಗಮಗೊಳಿಸಲು ಮತ್ತು ಸಾಮರ್ಥ್ಯ ವೃದ್ಧಿ ಉಪಕ್ರಮಗಳನ್ನು ಉತ್ತೇಜಿಸಲು ಒಂದು ಕಾರ್ಯವಿಧಾನವಾಗಿ, ಸಹಯೋಗಿ ಸುದ್ದಿಪತ್ರದ ಪ್ರಸ್ತಾವನೆಯನ್ನು ನಾವು ಸ್ವಾಗತಿಸುತ್ತೇವೆ. 'ಬ್ರಿಕ್ಸ್ ಬಾಹ್ಯಾಕಾಶ ಮಂಡಳಿ'ಯನ್ನು ಸ್ಥಾಪಿಸಲು ನಾವು ತಾತ್ವಿಕವಾಗಿ ಒಪ್ಪುತ್ತೇವೆ ಮತ್ತು ಗುಂಪಿನೊಳಗೆ ಬಾಹ್ಯಾಕಾಶ ಚಟುವಟಿಕೆಗಳ ಕ್ಷೇತ್ರದಲ್ಲಿ ಹೆಚ್ಚಿನ ಸಹಕಾರವನ್ನು ಸುಗಮಗೊಳಿಸಲು ಅದರ ಕಾರ್ಯವ್ಯಾಪ್ತಿಯ ನಿಯಮಗಳ ಮೇಲೆ ಕೆಲಸ ಮಾಡುವುದನ್ನು ಮುಂದುವರಿಸಲು ಸಮ್ಮತಿಸುತ್ತೇವೆ. UNFCCC COP30 ಅನ್ನು ಬೆಂಬಲಿಸಲು ಜಂಟಿ ವೀಕ್ಷಣಾ ಅಭ್ಯಾಸದ ಕುರಿತು ಚರ್ಚೆಗಳನ್ನು ಮುಂದುವರಿಸಲು ನಮ್ಮ ಬಾಹ್ಯಾಕಾಶ ಸಂಸ್ಥೆಗಳು ಒಪ್ಪಿಕೊಂಡಿವೆ ಎಂಬುದನ್ನು ನಾವು ಗಮನಿಸುತ್ತೇವೆ.

ಅಂತಾರಾಷ್ಟ್ರೀಯ ಆರ್ಥಿಕ ಸಹಕಾರಕ್ಕಾಗಿ ಇರುವ ಪ್ರಧಾನ ಜಾಗತಿಕ ವೇದಿಕೆಯಾಗಿ G20ಯ ಪ್ರಮುಖ ಪಾತ್ರವನ್ನು ನಾವು ಒತ್ತಿ ಹೇಳುತ್ತೇವೆ. ಇದು, ಜಾಗತಿಕ ಸವಾಲುಗಳಿಗೆ ಜಂಟಿಯಾಗಿ ಹಂಚಿಕೆಯ ಪರಿಹಾರಗಳನ್ನು ಹುಡುಕಲು ಮತ್ತು ಬಹುಧ್ರುವೀಯ ಜಗತ್ತನ್ನು ಪೋಷಿಸಲು, ಅಭಿವೃದ್ಧಿ ಹೊಂದಿದ ಮತ್ತು ಉದಯೋನ್ಮುಖ ಆರ್ಥಿಕತೆಗಳೆರಡಕ್ಕೂ ಸಮಾನ ಹಾಗೂ ಪರಸ್ಪರ ಲಾಭದಾಯಕ ನೆಲೆಯಲ್ಲಿ ಸಂವಾದಕ್ಕೆ ವೇದಿಕೆಯನ್ನು ಒದಗಿಸುತ್ತದೆ. ಒಮ್ಮತವನ್ನು ಆಧರಿಸಿ ಮತ್ತು ಫಲಿತಾಂಶ-ಕೇಂದ್ರಿತ ನಿರ್ಣಯಗಳ ಮೇಲೆ ಗಮನಹರಿಸಿ, G20ಯು ನಿರಂತರವಾಗಿ ಮತ್ತು ಫಲಪ್ರದವಾಗಿ ಕಾರ್ಯನಿರ್ವಹಿಸುವುದರ ಮಹತ್ವವನ್ನು ನಾವು ಗುರುತಿಸುತ್ತೇವೆ. ದಕ್ಷಿಣ ಆಫ್ರಿಕಾದ ಅಧ್ಯಕ್ಷತೆಗೆ ನಮ್ಮ ಬಲವಾದ ಬೆಂಬಲವನ್ನು ನಾವು ಪುನರುಚ್ಚರಿಸುತ್ತೇವೆ ಮತ್ತು ಅವರ ಅಧ್ಯಕ್ಷತೆಯಲ್ಲಿ ನವೆಂಬರ್ 2025 ರಲ್ಲಿ ಜೋಹಾನ್ಸ್ ಬರ್ಗ್‌ನಲ್ಲಿ ನಡೆಯಲಿರುವ G20 ನಾಯಕರ ಶೃಂಗಸಭೆಯ ಯಶಸ್ವಿ ಆಯೋಜನೆಯನ್ನು ನಾವು ಎದುರುನೋಡುತ್ತಿದ್ದೇವೆ. 2022-2025ರ ಅವಧಿಯಲ್ಲಿ ಹಾಗೂ ಅದರಾಚೆಗೆ ಬ್ರಿಕ್ಸ್ ಸದಸ್ಯ ರಾಷ್ಟ್ರಗಳಾದ ಇಂಡೋನೇಷ್ಯಾ, ಭಾರತ, ಬ್ರೆಜಿಲ್ ಮತ್ತು ದಕ್ಷಿಣ ಆಫ್ರಿಕಾದ ಸತತ G20 ಅಧ್ಯಕ್ಷತೆಗಳ ಮೂಲಕ, ಜಾಗತಿಕ ಆರ್ಥಿಕತೆಯಲ್ಲಿ ಉದಯೋನ್ಮುಖ ಮಾರುಕಟ್ಟೆ ಮತ್ತು ಅಭಿವೃದ್ಧಿಶೀಲ ಆರ್ಥಿಕತೆಗಳ (EMDEs) ಹೆಚ್ಚುತ್ತಿರುವ ಪ್ರಾಮುಖ್ಯತೆಯನ್ನು ಸಮರ್ಪಕವಾಗಿ ಪ್ರತಿಬಿಂಬಿಸುವಂತೆ ಮತ್ತು ಅವುಗಳ ಆದ್ಯತೆಗಳನ್ನು G20 ಕಾರ್ಯಸೂಚಿಯಲ್ಲಿ ಮತ್ತಷ್ಟು ಸಂಯೋಜಿಸುವಂತೆ, ಜಾಗತಿಕ ಆರ್ಥಿಕ ಆಡಳಿತ ವ್ಯವಸ್ಥೆಯಲ್ಲಿ ಸಮಗ್ರತೆಯನ್ನು ಹೆಚ್ಚಿಸಲು ಮತ್ತು 'ಗ್ಲೋಬಲ್ ಸೌತ್'ನ ಧ್ವನಿಯನ್ನು ವರ್ಧಿಸಲು ನಮ್ಮ ನಿಲುವುಗಳನ್ನು ಸಮನ್ವಯಗೊಳಿಸುವ ನಮ್ಮ ಸಿದ್ಧತೆಯನ್ನು ಪುನರ್‌ ದೃಢೀಕರಿಸುತ್ತೇವೆ. 2023 ರಲ್ಲಿ ಭಾರತದ G20 ಅಧ್ಯಕ್ಷತೆಯ ಅವಧಿಯಲ್ಲಿ ಆಫ್ರಿಕನ್ ಒಕ್ಕೂಟದ ಸೇರ್ಪಡೆಯ ಮೂಲಕ ಮತ್ತು ಬ್ರೆಜಿಲ್ ಹಾಗೂ ದಕ್ಷಿಣ ಆಫ್ರಿಕಾದ ಅಧ್ಯಕ್ಷತೆಗಳ ಅವಧಿಯಲ್ಲಿ ನವ ಅಭಿವೃದ್ಧಿ ಬ್ಯಾಂಕ್‌ಗೆ (NDB) ನೀಡಿದ ಆಹ್ವಾನದ ಮೂಲಕ, G20ಯಲ್ಲಿ EMDEs ಗಳ ಧ್ವನಿಯನ್ನು ಬಲಪಡಿಸಿರುವುದನ್ನು ನಾವು ಅಭಿನಂದಿಸುತ್ತೇವೆ. ಇವುಗಳ ನಡುವಿನ ನಿಕಟ ಸಂವಾದ ಮತ್ತು ಹೊಂದಾಣಿಕೆಯು ಈ ಬಲವರ್ಧನೆಗೆ ಕಾರಣವಾಗಿದೆ.

ಕೆಲವು ದೇಶಗಳಲ್ಲಿನ ಅಧಿಕ ಸಾಲದ ಮಟ್ಟಗಳು ಅಭಿವೃದ್ಧಿ ಸವಾಲುಗಳನ್ನು ಎದುರಿಸಲು ಬೇಕಾದ ಹಣಕಾಸಿನ ಅವಕಾಶವನ್ನು ಕುಗ್ಗಿಸುತ್ತವೆ ಎಂಬುದನ್ನು ನಾವು ಗಮನಿಸಿದ್ದೇವೆ. ಬಾಹ್ಯ ಆಘಾತಗಳ, ವಿಶೇಷವಾಗಿ ಕೆಲವು ಮುಂದುವರಿದ ಆರ್ಥಿಕತೆಗಳಲ್ಲಿನ ಹಣಕಾಸು ಮತ್ತು ವಿತ್ತೀಯ ನೀತಿಗಳ ಏರಿಳಿತಗಳು ಹಾಗೂ ಅಂತಾರಾಷ್ಟ್ರೀಯ ಹಣಕಾಸು ವ್ಯವಸ್ಥೆಯಲ್ಲಿನ ಅಂತರ್ಗತ ಸಮಸ್ಯೆಗಳಿಂದ ಉಂಟಾಗುವ ಪರಿಣಾಮಗಳು ಈ ಸವಾಲುಗಳನ್ನು ಇನ್ನಷ್ಟು ಹೆಚ್ಚಿಸಿವೆ. ಹೆಚ್ಚಿನ ಬಡ್ಡಿದರಗಳು ಮತ್ತು ಬಿಗಿಯಾದ ಹಣಕಾಸು ಪರಿಸ್ಥಿತಿಗಳು ಹಲವು ದೇಶಗಳಲ್ಲಿ ಸಾಲದ ದುರ್ಬಲತೆಗಳನ್ನು ಇನ್ನಷ್ಟು ಹದಗೆಡಿಸಿವೆ. ಆರ್ಥಿಕ ಚೇತರಿಕೆ ಮತ್ತು ಸುಸ್ಥಿರ ಅಭಿವೃದ್ಧಿಯನ್ನು ಬೆಂಬಲಿಸಲು ಅಂತಾರಾಷ್ಟ್ರೀಯ ಸಾಲವನ್ನು ಸೂಕ್ತವಾಗಿ ಮತ್ತು ಸಮಗ್ರವಾಗಿ ನಿರ್ವಹಿಸುವುದು ಅವಶ್ಯಕ ಎಂದು ನಾವು ನಂಬುತ್ತೇವೆ. ಇದು ಪ್ರತಿ ರಾಷ್ಟ್ರದ ಕಾನೂನುಗಳು ಮತ್ತು ಆಂತರಿಕ ಕಾರ್ಯವಿಧಾನಗಳನ್ನು ಗಣನೆಗೆ ತೆಗೆದುಕೊಂಡು, ಸುಸ್ಥಿರ ಬಾಹ್ಯ ಸಾಲ ಮತ್ತು ವಿತ್ತೀಯ ವಿವೇಚನೆಯೊಂದಿಗೆ ಇರಬೇಕು. ಕಡಿಮೆ ಮತ್ತು ಮಧ್ಯಮ-ಆದಾಯದ ದೇಶಗಳ ಸಾಲದ ದುರ್ಬಲತೆಗಳನ್ನು ಪರಿಣಾಮಕಾರಿ, ಸಮಗ್ರ ಮತ್ತು ವ್ಯವಸ್ಥಿತ ರೀತಿಯಲ್ಲಿ ಪರಿಹರಿಸುವ ಅಗತ್ಯವನ್ನು ನಾವು ಗುರುತಿಸಿದ್ದೇವೆ. ಸಾಲದ ದುರ್ಬಲತೆಗಳನ್ನು ಸಾಮೂಹಿಕವಾಗಿ ಪರಿಹರಿಸುವ ಸಾಧನಗಳಲ್ಲಿ, G20 ಸಾಮಾನ್ಯ ಸಾಲ ಚಿಕಿತ್ಸಾ ಚೌಕಟ್ಟನ್ನು (G20 Common Framework for Debt Treatment) ಊಹಿಸಬಹುದಾದ, ಕ್ರಮಬದ್ಧವಾದ, ಸಮಯೋಚಿತ ಮತ್ತು ಸಂಘಟಿತ ರೀತಿಯಲ್ಲಿ ಜಾರಿಗೊಳಿಸುವುದು ಒಂದು ಪ್ರಮುಖ ಮಾರ್ಗವಾಗಿದೆ. ಅಧಿಕೃತ ದ್ವಿಪಕ್ಷೀಯ ಸಾಲದಾತರು, ಖಾಸಗಿ ಸಾಲದಾತರು ಮತ್ತು ಬಹುಪಕ್ಷೀಯ ಅಭಿವೃದ್ಧಿ ಬ್ಯಾಂಕುಗಳ (MDBs) ಸಹಭಾಗಿತ್ವದಲ್ಲಿ, ಜಂಟಿ ಕ್ರಮ ಮತ್ತು ನ್ಯಾಯಯುತ ಹೊರೆ-ಹಂಚಿಕೆಯ ತತ್ವದೊಂದಿಗೆ ಇದನ್ನು ಅನುಷ್ಠಾನಗೊಳಿಸಬೇಕು. ಉದಯೋನ್ಮುಖ ಮಾರುಕಟ್ಟೆಗಳು ಮತ್ತು ಅಭಿವೃದ್ಧಿಶೀಲ ಆರ್ಥಿಕತೆಗಳು (EMDEs) ಸಾಲದ ಸಮಸ್ಯೆಗಳನ್ನು ಅಭಿವೃದ್ಧಿಯ ದೃಷ್ಟಿಕೋನದಿಂದ ನ್ಯಾಯಯುತವಾಗಿ ಮತ್ತು ರಚನಾತ್ಮಕವಾಗಿ ಎದುರಿಸಲು ಸಹಾಯ ಮಾಡಲು, ಸಾಲಗಾರರು ಮತ್ತು ಅಧಿಕೃತ ದ್ವಿಪಕ್ಷೀಯ, ಬಹುಪಕ್ಷೀಯ ಮತ್ತು ಖಾಸಗಿ ಸಾಲದಾತರ ನಡುವಿನ ಸಮನ್ವಯವನ್ನು ಹೆಚ್ಚಿಸುವಲ್ಲಿ ನಾವು ನಿರಂತರವಾಗಿ ತೊಡಗಿಸಿಕೊಂಡಿದ್ದೇವೆ.

ಆಧುನಿಕ ಜೀವನದಲ್ಲಿ, ಇನೋವೇಶನ್‌-ಚಾಲಿತ ಅಭಿವೃದ್ಧಿಗೆ ವೇಗವರ್ಧಕವಾಗಿ ಮತ್ತು ಮಾಹಿತಿಪೂರ್ಣ ಹಾಗೂ ಎಲ್ಲರನ್ನೂ ಒಳಗೊಂಡ ಸಾರ್ವಜನಿಕ ನೀತಿಗಳ ರಚನೆಗೆ ದತ್ತಾಂಶದ ಕೇಂದ್ರ ಪಾತ್ರವನ್ನು ಗುರುತಿಸಿ, ದತ್ತಾಂಶ ಆಡಳಿತದ ಕುರಿತು ಸಾಮಾನ್ಯ ಮತ್ತು ತತ್ವ-ಆಧಾರಿತ ಪರಸ್ಪರ ಕಾರ್ಯಸಾಧ್ಯವಾದ ಚೌಕಟ್ಟಿನ ಅಗತ್ಯವನ್ನು ನಾವು ಪುನರುಚ್ಚರಿಸುತ್ತೇವೆ. ಈ ಚೌಕಟ್ಟು, ರಾಷ್ಟ್ರೀಯ ದತ್ತಾಂಶ ಸಾರ್ವಭೌಮತ್ವಕ್ಕೆ ಗೌರವ, ದಕ್ಷ, ಅನುಕೂಲಕರ, ಸುರಕ್ಷಿತ ಮತ್ತು ಪರಸ್ಪರ ಒಪ್ಪಿತ ಗಡಿಯಾಚೆಗಿನ ದತ್ತಾಂಶ ಹರಿವು ಹಾಗೂ ದತ್ತಾಂಶದ ನೈತಿಕ ಬಳಕೆಯನ್ನು ಒಳಗೊಂಡಿರಬೇಕು. ಇದು ದತ್ತಾಂಶದ ಸಂಗ್ರಹ, ದಾಖಲಾತಿ, ಸಂಗ್ರಹಣೆ, ಸಂಘಟನೆ, ಸಂಸ್ಕರಣೆ ಮತ್ತು ವರ್ಗಾವಣೆಯ ತತ್ವಗಳನ್ನು ನಿರ್ವಹಿಸಬೇಕು; ವೈಯಕ್ತಿಕ ಗೌಪ್ಯತೆಯೂ ಸೇರಿದಂತೆ ವೈಯಕ್ತಿಕ ಮಾಹಿತಿಯ ಹಕ್ಕುಗಳು ಮತ್ತು ಹಿತಾಸಕ್ತಿಗಳನ್ನು ರಕ್ಷಿಸಬೇಕು; ರಾಷ್ಟ್ರೀಯ ದತ್ತಾಂಶ ನೀತಿ ನಿಯಮಗಳ ಪರಸ್ಪರ ಕಾರ್ಯಸಾಧ್ಯತೆಯನ್ನು ಉತ್ತೇಜಿಸಬೇಕು; ಮತ್ತು ದತ್ತಾಂಶದ ಆರ್ಥಿಕ ಹಾಗೂ ಆರ್ಥಿಕೇತರ ಪ್ರಯೋಜನಗಳನ್ನು ಅಭಿವೃದ್ಧಿಶೀಲ ರಾಷ್ಟ್ರಗಳು ಮತ್ತು ಅವುಗಳ ನಾಗರಿಕರ ನಡುವೆ ಹಂಚಬೇಕು. ಈ ನಿಟ್ಟಿನಲ್ಲಿ, ತಂತ್ರಜ್ಞಾನಕ್ಕೆ ಸುರಕ್ಷಿತ ಪ್ರವೇಶ, ವೈಯಕ್ತಿಕ ಮತ್ತು ರಾಷ್ಟ್ರೀಯ ಹಿತಾಸಕ್ತಿಗಳ ರಕ್ಷಣೆ, ಕೈಗಾರಿಕೆ ಮತ್ತು ಸೇವೆಗಳ ಡಿಜಿಟಲೀಕರಣ, ಹಾಗೂ ಬ್ರಿಕ್ಸ್-ಒಳಗಿನ ವ್ಯಾಪಾರದ ವಿಸ್ತರಣೆಯನ್ನು ಉತ್ತೇಜಿಸುವ ಮೂಲಕ ಬ್ರಿಕ್ಸ್‌ ನಾದ್ಯಂತ ದತ್ತಾಂಶ ಆರ್ಥಿಕತೆಯನ್ನು ಬಳಸಿಕೊಳ್ಳಲು ಒಂದು ಮಾರ್ಗಸೂಚಿಯಾಗಿ, 'ಬ್ರಿಕ್ಸ್ ದತ್ತಾಂಶ ಆರ್ಥಿಕತೆ ಆಡಳಿತ ತಿಳುವಳಿಕೆ'ಯನ್ನು ಅಂತಿಮಗೊಳಿಸಿರುವುದನ್ನು ನಾವು ಸ್ವಾಗತಿಸುತ್ತೇವೆ.

ಇ-ಕಾಮರ್ಸ್ ಜಾಗತಿಕ ಆರ್ಥಿಕ ಬೆಳವಣಿಗೆಯ ಪ್ರಮುಖ ಚಾಲಕಶಕ್ತಿಯಾಗಿದೆ ಎಂದು ನಾವು ಒತ್ತಿ ಹೇಳುತ್ತೇವೆ. ಇದು ಸರಕು ಮತ್ತು ಸೇವೆಗಳಲ್ಲಿ ಅಂತಾರಾಷ್ಟ್ರೀಯ ವ್ಯಾಪಾರವನ್ನು ಪೋಷಿಸುವುದಲ್ಲದೆ, ವಿದೇಶಿ ಹೂಡಿಕೆಯ ಹರಿವನ್ನು ಖಾತ್ರಿಪಡಿಸುತ್ತದೆ ಮತ್ತು ನಾವೀನ್ಯತೆಯನ್ನು ಸುಗಮಗೊಳಿಸುತ್ತದೆ. ಈ ಹಿನ್ನೆಲೆಯಲ್ಲಿ, ಇ-ಕಾಮರ್ಸ್‌ನಲ್ಲಿ ನಂಬಿಕೆಯನ್ನು ಮತ್ತಷ್ಟು ಹೆಚ್ಚಿಸಲು ಮತ್ತು ಇದರಲ್ಲಿ ಭಾಗವಹಿಸುವವರ ಹಕ್ಕುಗಳ ಸಂಪೂರ್ಣ ರಕ್ಷಣೆಯನ್ನು ಖಚಿತಪಡಿಸಲು ನಾವು ದೃಢಸಂಕಲ್ಪ ಮಾಡಿದ್ದೇವೆ. ಈ ಗುರಿ ಸಾಧನೆಗಾಗಿ, ಗ್ರಾಹಕರ ಹಕ್ಕುಗಳ ರಕ್ಷಣೆಗೆ ಡಿಜಿಟಲ್ ತಂತ್ರಜ್ಞಾನಗಳ ಬಳಕೆ, ಆನ್‌ ಲೈನ್ ವಿವಾದ ಪರಿಹಾರ ಸಾಧನಗಳ ಅನ್ವೇಷಣೆ, ಜಾಗತಿಕ ಮಾರುಕಟ್ಟೆಗಳನ್ನು ಪ್ರವೇಶಿಸಲು ವ್ಯವಹಾರಗಳಿಗೆ ಅನುಕೂಲಕರ ವಾತಾವರಣ ನಿರ್ಮಾಣ, ಹಾಗೂ ಗಡಿಯಾಚೆಗಿನ ಇ-ಕಾಮರ್ಸ್ ಮೂಲಕ ಕಡಿಮೆ ಮೌಲ್ಯದ ಉತ್ಪನ್ನಗಳ ವ್ಯಾಪಾರದ ಕುರಿತು ಅಭಿಪ್ರಾಯ ವಿನಿಮಯದಂತಹ ಕ್ಷೇತ್ರಗಳಲ್ಲಿ ಸಹಕಾರವನ್ನು ತೀವ್ರಗೊಳಿಸಲಾಗುವುದು.

ಬ್ರಿಕ್ಸ್‌ ರಾಷ್ಟ್ರಗಳ ವಿಶೇಷ ಆರ್ಥಿಕ ವಲಯಗಳ (Special Economic Zones - SEZs) ಪರಿಣಾಮಕಾರಿತ್ವವನ್ನು ನಾವು ನಿರಂತರವಾಗಿ ಗುರುತಿಸುತ್ತೇವೆ. ಇವು ವ್ಯಾಪಾರ ಮತ್ತು ಕೈಗಾರಿಕಾ ಸಹಕಾರಕ್ಕೆ, ಹಾಗೂ ಉತ್ಪಾದನೆಗೆ ಉತ್ತಮವಾಗಿ ಸ್ಥಾಪಿತವಾದ ಕಾರ್ಯವಿಧಾನಗಳಾಗಿವೆ. ಇವು ಕೇವಲ ಹೈಟೆಕ್ ಆರ್ಥಿಕ ವಲಯಗಳು, ಐಟಿ ಮತ್ತು ಐಟಿ-ಸಕ್ರಿಯ ಸೇವೆಗಳು, ಪ್ರವಾಸೋದ್ಯಮ, ಬಂದರು ಮತ್ತು ಸಾರಿಗೆ ಮೂಲಸೌಕರ್ಯ, ತಂತ್ರಜ್ಞಾನಗಳ ಅಭಿವೃದ್ಧಿ ಮತ್ತು ವಾಣಿಜ್ಯೀಕರಣಕ್ಕೆ ಮಾತ್ರ ಸೀಮಿತವಾಗಿಲ್ಲ. ಇವು ಹೊಸ ರೀತಿಯ ಮೌಲ್ಯವರ್ಧಿತ ಉತ್ಪನ್ನಗಳ ಉತ್ಪಾದನೆಗೂ ಪ್ರಮುಖವಾಗಿವೆ. ವಿಶೇಷ ಆರ್ಥಿಕ ವಲಯಗಳು ಆರ್ಥಿಕ ಅಭಿವೃದ್ಧಿಯ ಆದ್ಯತಾ ಕ್ಷೇತ್ರಗಳಲ್ಲಿ ಹೆಚ್ಚುವರಿ ಹೂಡಿಕೆಯನ್ನು ಪ್ರೋತ್ಸಾಹಿಸಲು ಅಪಾರ ಅವಕಾಶಗಳನ್ನು ಒದಗಿಸುತ್ತವೆ ಎಂಬುದನ್ನು ನಾವು ಒಪ್ಪಿಕೊಳ್ಳುತ್ತೇವೆ. SEZ ಗಳು ಆರ್ಥಿಕ ಬೆಳವಣಿಗೆಯನ್ನು ಉತ್ತೇಜಿಸಲು ಮತ್ತು ಹೊಸ ಉದ್ಯೋಗಾವಕಾಶಗಳನ್ನು ಸೃಷ್ಟಿಸಲು, ವಿಶೇಷವಾಗಿ ಹೈಟೆಕ್ ಮತ್ತು ಮೂಲಸೌಕರ್ಯ ಕ್ಷೇತ್ರಗಳಲ್ಲಿ, ಆದರೆ ಅವುಗಳಿಗೆ ಮಾತ್ರ ಸೀಮಿತವಾಗಿಲ್ಲದೆ, ಒಂದು ಸಾಧನವಾಗಿ ತಮ್ಮ ಸಾಮರ್ಥ್ಯವನ್ನು ನಾವು ಗುರುತಿಸುತ್ತೇವೆ.

ಬ್ರಿಕ್ಸ್ ದೇಶಗಳು ವಿಶ್ವ ಆಹಾರ ಉತ್ಪಾದನೆಯಲ್ಲಿ ಪ್ರಮುಖ ಪಾತ್ರಧಾರಿಗಳಾಗಿವೆ ಎಂಬುದನ್ನು ನಾವು ಗುರುತಿಸುತ್ತೇವೆ. ಹಾಗಾಗಿಯೇ, ಕೃಷಿ ಉತ್ಪಾದಕತೆ ಮತ್ತು ಸುಸ್ಥಿರತೆಯನ್ನು ಹೆಚ್ಚಿಸುವಲ್ಲಿ ಹಾಗೂ ಜಾಗತಿಕ ಆಹಾರ ಭದ್ರತೆ ಮತ್ತು ಪೌಷ್ಟಿಕತೆಯನ್ನು ಖಾತ್ರಿಪಡಿಸುವಲ್ಲಿ ಅವು ನಿರ್ಣಾಯಕ ಪಾತ್ರವನ್ನು ಹೊಂದಿವೆ. ಸಣ್ಣ ಹಿಡುವಳಿದಾರರು, ಪಶುಪಾಲಕರು, ಕುಶಲಕರ್ಮಿ ಮತ್ತು ಸಣ್ಣ ಪ್ರಮಾಣದ ಮೀನುಗಾರರು, ಜಲಚರ ಸಾಕಾಣಿಕೆದಾರರು, ಮೂಲನಿವಾಸಿಗಳು ಮತ್ತು ಸ್ಥಳೀಯ ಸಮುದಾಯಗಳು, ಮಹಿಳೆಯರು ಹಾಗೂ ಯುವಜನರನ್ನು ಒಳಗೊಂಡಂತೆ ಕುಟುಂಬ ರೈತರು, ಕೃಷಿ ಮತ್ತು ಆಹಾರ ವ್ಯವಸ್ಥೆಗಳ ಅತ್ಯಾವಶ್ಯಕ ಪಾಲುದಾರರಾಗಿದ್ದಾರೆ ಎಂಬುದನ್ನೂ ನಾವು ಗುರುತಿಸುತ್ತೇವೆ. ಜಾಗತಿಕ ಸುಸ್ಥಿರ ಖಾದ್ಯ ತೈಲ ವಲಯದಲ್ಲಿ ಸುಸ್ಥಿರತೆ, ಒಳಗೊಳ್ಳುವಿಕೆ ಮತ್ತು ಸಮಾನ ಮಾರುಕಟ್ಟೆ ಪ್ರವೇಶವನ್ನು ಉತ್ತೇಜಿಸಲು ನಡೆಯುತ್ತಿರುವ ಪ್ರಯತ್ನಗಳನ್ನು ನಾವು ಸ್ವಾಗತಿಸುತ್ತೇವೆ. ಸಣ್ಣ ಹಿಡುವಳಿದಾರರನ್ನು ಬೆಂಬಲಿಸಲು, ನ್ಯಾಯಯುತ ಬೆಲೆಯನ್ನು ಖಚಿತಪಡಿಸಲು, ಮತ್ತು ಸದೃಢ ಹಾಗೂ ಸುಸ್ಥಿರ ಕೃಷಿ ಮೌಲ್ಯ ಸರಪಳಿಗಳನ್ನು ಪೋಷಿಸಲು ಬ್ರಿಕ್ಸ್ ದೇಶಗಳು ಮತ್ತು ಪಾಲುದಾರರ ನಡುವೆ ನಿರಂತರ ಸಹಯೋಗಕ್ಕಾಗಿ ನಾವು ಕರೆ ನೀಡುತ್ತೇವೆ. ಸಣ್ಣ ಪ್ರಮಾಣದ ಕೃಷಿಯಲ್ಲಿ, ಮಾಹಿತಿ ಮತ್ತು ಡಿಜಿಟಲ್ ನಾವೀನ್ಯತೆಗಳೂ ಸೇರಿದಂತೆ, ಯಾಂತ್ರೀಕರಣ ಮತ್ತು ತಾಂತ್ರಿಕ ನಾವೀನ್ಯತೆಯು, ಶ್ರಮದಾಯಕ ಕೆಲಸವನ್ನು ಕಡಿಮೆ ಮಾಡಲು, ಉತ್ಪಾದಕತೆ ಮತ್ತು ಆದಾಯವನ್ನು ಹೆಚ್ಚಿಸಲು, ಸದೃಢತೆಯನ್ನು ಹೆಚ್ಚಿಸಲು, ಹಾಗೂ ಸುಸ್ಥಿರ ಪರಿವರ್ತನೆಯನ್ನು ವೇಗಗೊಳಿಸಲು ಕಾರ್ಯತಂತ್ರದ ಅವಕಾಶಗಳಾಗಿವೆ ಎಂಬುದನ್ನು ನಾವು ಗುರುತಿಸುತ್ತೇವೆ.

ಆಹಾರ ಭದ್ರತೆ ಮತ್ತು ಪೌಷ್ಟಿಕತೆಯನ್ನು ಖಚಿತಪಡಿಸುವುದರ ಹಾಗೂ ರಸಗೊಬ್ಬರಗಳ ಕೊರತೆಯೂ ಸೇರಿದಂತೆ, ತೀವ್ರ ಆಹಾರ ಬೆಲೆ ಏರಿಳಿತ ಮತ್ತು ಹಠಾತ್ ಪೂರೈಕೆ ಬಿಕ್ಕಟ್ಟುಗಳ ಪರಿಣಾಮಗಳನ್ನು ತಗ್ಗಿಸುವುದರ ಮಹತ್ವವನ್ನು ನಾವು ಒತ್ತಿ ಹೇಳುತ್ತೇವೆ. ಈ ನಿಟ್ಟಿನಲ್ಲಿ, ಬ್ರಿಕ್ಸ್‌ ನೊಳಗೆ ಧಾನ್ಯ ವ್ಯಾಪಾರ ವೇದಿಕೆಯನ್ನು (ಬ್ರಿಕ್ಸ್ ಧಾನ್ಯ ವಿನಿಮಯ ಕೇಂದ್ರ) ಸ್ಥಾಪಿಸುವ ಉಪಕ್ರಮದ ನಿರಂತರ ವಿಸ್ತರಣೆ, ಅದರ ನಂತರದ ಅಭಿವೃದ್ಧಿ, ಹಾಗೂ ಇದನ್ನು ಇತರ ಕೃಷಿ ಉತ್ಪನ್ನಗಳು ಮತ್ತು ಸರಕುಗಳಿಗೆ ವಿಸ್ತರಿಸುವುದರ ಮಹತ್ವವನ್ನು ನಾವು ಅಂಗೀಕರಿಸುತ್ತೇವೆ. ಬ್ರಿಕ್ಸ್ ಮತ್ತು ಇತರ ಅಭಿವೃದ್ಧಿಶೀಲ ರಾಷ್ಟ್ರಗಳಲ್ಲಿ ಆಹಾರ ಲಭ್ಯತೆ, ಸುಲಭಲಭ್ಯತೆ, ಬಳಕೆ, ಸ್ಥಿರತೆ ಮತ್ತು ಕೈಗೆಟುಕುವಿಕೆಯನ್ನು, ಹಾಗೂ ಸಂಬಂಧಿತ ಕೃಷಿ ಮತ್ತು ಆಹಾರ ಉತ್ಪಾದನಾ ಒಳಹರಿವುಗಳನ್ನು (inputs) ಹೆಚ್ಚಿಸುವಂತಹ ರಾಷ್ಟ್ರೀಯ ನೀತಿಗಳು ಮತ್ತು ಅಂತಾರಾಷ್ಟ್ರೀಯ ಸಮನ್ವಯದ ಕುರಿತ ಹೆಚ್ಚಿನ ಚರ್ಚೆಗಳನ್ನು ನಾವು ಬೆಂಬಲಿಸುತ್ತೇವೆ. ರಾಷ್ಟ್ರೀಯ ಆಹಾರ ಮೀಸಲು ವ್ಯವಸ್ಥೆಗಳಂತಹ, ಪೂರೈಕೆ ಅಡೆತಡೆಗಳಿಗೆ ಪ್ರತಿಕ್ರಿಯಿಸಲು ರಾಷ್ಟ್ರೀಯ ಸಾಮರ್ಥ್ಯಗಳನ್ನು ಬಲಪಡಿಸುವಂತಹ ಕ್ರಮಗಳೂ ಇದರಲ್ಲಿ ಸೇರಿವೆ. ಬ್ರಿಕ್ಸ್ ಸದಸ್ಯ ರಾಷ್ಟ್ರದ ಮೇಲೆ ಪರಿಣಾಮ ಬೀರುವ ಪೂರೈಕೆ ಕೊರತೆ ಅಥವಾ ತೀವ್ರ ಆಹಾರ ಬೆಲೆ ಏರಿಕೆಯಂತಹ ಅಸಾಧಾರಣ ಸಂದರ್ಭಗಳಲ್ಲಿ, ಸಹಕಾರ ಉಪಕ್ರಮಗಳು, ರಾಷ್ಟ್ರೀಯ ಆದ್ಯತೆಗಳಿಂದ ಮಾರ್ಗದರ್ಶಿಸಲ್ಪಟ್ಟು ಮತ್ತು ವಿಶ್ವ ವ್ಯಾಪಾರ ಸಂಸ್ಥೆಯ ನಿಯಮಗಳಿಗೆ ಅನುಗುಣವಾಗಿ, ತುರ್ತು ಪ್ರತಿಕ್ರಿಯೆ ಮತ್ತು ನೈಸರ್ಗಿಕ ವಿಪತ್ತು ನಿರ್ವಹಣೆಯನ್ನು ಸುಗಮಗೊಳಿಸಬಹುದು ಎಂಬುದನ್ನು ನಾವು ಗುರುತಿಸುತ್ತೇವೆ. ಈ ಯಾವುದೇ ಕ್ರಮಗಳು ಅನ್ಯಾಯದ ವ್ಯಾಪಾರ ಪದ್ಧತಿಗಳಿಗೆ ಅಥವಾ ಅಂತಾರಾಷ್ಟ್ರೀಯ ವ್ಯಾಪಾರ ನಿಯಮಗಳ ಉಲ್ಲಂಘನೆಗೆ ಕಾರಣವಾಗಬಾರದು, ಏಕೆಂದರೆ ಅಂತಾರಾಷ್ಟ್ರೀಯ ಐಕಮತ್ಯದ ಮೂಲಕವೂ ಸೇರಿದಂತೆ, ಆಹಾರ ಭದ್ರತೆ ಮತ್ತು ಪೌಷ್ಟಿಕತೆಯನ್ನು ಬೆಂಬಲಿಸುವುದೇ ಅವುಗಳ ಏಕೈಕ ಉದ್ದೇಶವಾಗಿದೆ. ಆಹಾರ ನಷ್ಟ ಮತ್ತು ವ್ಯರ್ಥವನ್ನು ಕಡಿಮೆ ಮಾಡುವುದರ, ಹಾಗೂ ಪ್ರಾಣಿ ಮತ್ತು ಸಸ್ಯ ಆರೋಗ್ಯವನ್ನು ಖಾತ್ರಿಪಡಿಸುವುದರ ಮಹತ್ವವನ್ನು ನಾವು ಗುರುತಿಸುತ್ತೇವೆ. ಪ್ರಾಣಿ ಮತ್ತು ಸಸ್ಯ ಉತ್ಪನ್ನಗಳಿಗೆ ಏಕೀಕೃತ ಎಲೆಕ್ಟ್ರಾನಿಕ್ ಪ್ರಮಾಣೀಕರಣ ವ್ಯವಸ್ಥೆಯನ್ನು ಒಂದು ಪ್ರಮುಖ ಸಾಧನವಾಗಿ ಬಳಸಿ, ಆಹಾರ ಮತ್ತು ಪಶು ಆಹಾರದ ಚಲನವಲನದಲ್ಲಿ ಪಾರದರ್ಶಕತೆಯನ್ನು ಹೆಚ್ಚಿಸುವುದರ ಜೊತೆಗೆ, ಅಪಾಯಕಾರಿ ರೋಗಗಳು ಮತ್ತು ಕೀಟಗಳ ಜಂಟಿ ತಡೆಗಟ್ಟುವಿಕೆ ಮತ್ತು ನಿಯಂತ್ರಣದ ಮೂಲಕ ಇದನ್ನು ಸಾಧಿಸಬಹುದಾಗಿದೆ.

ಹಸಿವನ್ನು ಕೊನೆಗಾಣಿಸಲು, ಎಲ್ಲಾ ಬಗೆಯ ಅಪೌಷ್ಟಿಕತೆಯನ್ನು ತೊಡೆದುಹಾಕಲು ಮತ್ತು ಬಡತನವನ್ನು ನಿರ್ಮೂಲನೆ ಮಾಡಲು ಕೃಷಿ, ಮೀನುಗಾರಿಕೆ ಮತ್ತು ಜಲಚರ ಸಾಕಾಣಿಕೆಯಲ್ಲಿ ಹೆಚ್ಚಿನ ಸಹಕಾರಕ್ಕಾಗಿ ನಾವು ಕರೆ ನೀಡುತ್ತೇವೆ. ತಂತ್ರಜ್ಞಾನಗಳು ಮತ್ತು ನಾವೀನ್ಯತೆಗಳನ್ನು ಅಳವಡಿಸುವ ಮೂಲಕ ಸುಸ್ಥಿರ ಕೃಷಿ ಮತ್ತು ಗ್ರಾಮೀಣಾಭಿವೃದ್ಧಿಯನ್ನು ಉತ್ತೇಜಿಸುವುದು ಹಾಗೂ ಆಹಾರ ಭದ್ರತೆಯನ್ನು ಖಚಿತಪಡಿಸುವುದು ನಮ್ಮ ಉದ್ದೇಶವಾಗಿದೆ. ಇದಲ್ಲದೆ, ಸಣ್ಣ ಪ್ರಮಾಣದ ಮತ್ತು ಕುಟುಂಬ ರೈತರಿಗೆ ಹಾಗೂ ಮೀನುಗಾರಿಕೆ ಮತ್ತು ಜಲಚರ ಸಾಕಾಣಿಕೆ ಕಾರ್ಮಿಕರಿಗೆ ಕೈಗೆಟುಕುವ ಮತ್ತು ಅವರ ನಿರ್ದಿಷ್ಟ ಅಗತ್ಯಗಳಿಗೆ ತಕ್ಕಂತೆ ತಯಾರಾದ ಯಂತ್ರೋಪಕರಣಗಳು ಮತ್ತು ಸಲಕರಣೆಗಳ ಸ್ಥಳೀಯ ಉತ್ಪಾದನೆಯಲ್ಲಿ ಹೂಡಿಕೆಗಳನ್ನು ಪ್ರೋತ್ಸಾಹಿಸಲು ನಾವು ಕರೆ ನೀಡುತ್ತೇವೆ. 'ಆಹಾರ ಭದ್ರತೆ ಮತ್ತು ಪೌಷ್ಟಿಕತೆಯ ಕುರಿತ ಡೆಕ್ಕನ್ ಉನ್ನತ ಮಟ್ಟದ ತತ್ವಗಳ' ಆಧಾರದ ಮೇಲೆ, ಅಂತಾರಾಷ್ಟ್ರೀಯ ಸಹಕಾರವನ್ನು ಉತ್ತೇಜಿಸುವ ಒಂದು ಪ್ರಮುಖ ಉಪಕ್ರಮವಾಗಿ 'ಹಸಿವು ಮತ್ತು ಬಡತನದ ವಿರುದ್ಧದ ಜಾಗತಿಕ ಮೈತ್ರಿ'ಯನ್ನು ನಾವು ಗುರುತಿಸುತ್ತೇವೆ. ಬ್ರಿಕ್ಸ್‌ ರಾಷ್ಟ್ರಗಳ ಆಂತರಿಕ ಕೃಷಿ ಉತ್ಪನ್ನಗಳ ವ್ಯಾಪಾರ, ಕೃಷಿ ಮತ್ತು ಆಹಾರ ಉತ್ಪಾದನಾ ಸಾಮಗ್ರಿಗಳು, ಹಾಗೂ ಮೌಲ್ಯ ಸರಪಳಿಗಳು ಮತ್ತು ಸುಸ್ಥಿರ ಕೃಷಿ ಪದ್ಧತಿಗಳನ್ನು ಸುಧಾರಿಸುವ ಕುರಿತು ನಾವು ಮುಂದಿನ ಚರ್ಚೆಗಳನ್ನು ನಿರೀಕ್ಷಿಸುತ್ತೇವೆ. ನ್ಯಾಯಯುತ ಕೃಷಿ ವ್ಯಾಪಾರ ವ್ಯವಸ್ಥೆಯನ್ನು ಅಭಿವೃದ್ಧಿಪಡಿಸುವ ಮತ್ತು ಸ್ಥಿತಿಸ್ಥಾಪಕ ಹಾಗೂ ಸುಸ್ಥಿರ ಕೃಷಿಯನ್ನು ಜಾರಿಗೊಳಿಸುವ ಅಗತ್ಯವನ್ನು ನಾವು ಪುನರುಚ್ಚರಿಸುತ್ತೇವೆ. ಆಹಾರ ಮತ್ತು ಕೃಷಿ ಉತ್ಪಾದನೆಗೆ ಅಗತ್ಯವಾದ ಸಾಮಗ್ರಿಗಳ ನಿರಂತರ ಹರಿವನ್ನು ಖಚಿತಪಡಿಸಿಕೊಳ್ಳುವ ದೃಷ್ಟಿಯಿಂದ, ಕೃಷಿ ಮತ್ತು ರಸಗೊಬ್ಬರಗಳಲ್ಲಿನ ನಿಯಮ-ಆಧಾರಿತ ವ್ಯಾಪಾರಕ್ಕೆ ಅಡ್ಡಿಪಡಿಸುವುದನ್ನು ಕನಿಷ್ಠಗೊಳಿಸಲು ನಾವು ಬದ್ಧರಾಗಿದ್ದೇವೆ. ಇವು WTO ನಿಯಮಗಳಿಗೆ ಅಸಂಗತವಾಗಿರುವ ಅನಗತ್ಯ ನಿರ್ಬಂಧಿತ ಆರ್ಥಿಕ ಕ್ರಮಗಳಿಂದ ವಿನಾಯಿತಿ ಹೊಂದಿರಬೇಕು. ಅಂತಾರಾಷ್ಟ್ರೀಯ ಸಾಗಣೆಗೆ ಸಂಬಂಧಿಸಿದಂತೆ ಕೃಷಿ ಉತ್ಪನ್ನಗಳ ಉತ್ಪಾದಕರು ಮತ್ತು ರಫ್ತುದಾರರು ಹಾಗೂ ವ್ಯಾಪಾರ ಸೇವೆಗಳ ಮೇಲೆ ಪರಿಣಾಮ ಬೀರುವ ಕ್ರಮಗಳು ಇದರಲ್ಲಿ ಸೇರಿವೆ. UNCCD ಚೌಕಟ್ಟಿಗೆ ಅನುಗುಣವಾಗಿ ಭೂಮಿ ಪುನಃಸ್ಥಾಪನೆಗಾಗಿ ಬ್ರಿಕ್ಸ್‌ ಪಾಲುದಾರಿಕೆ (BRICS Partnership for Land Restoration) ಪ್ರಾರಂಭಿಸಿರುವುದನ್ನು ನಾವು ಸ್ವಾಗತಿಸುತ್ತೇವೆ. ಹಸಿವು ಮತ್ತು ಬಡತನದ ವಿರುದ್ಧದ ಜಾಗತಿಕ ಮೈತ್ರಿಯನ್ನು  ಜಾರಿಗೊಳಿಸಲು ನೀಡಿದ ಕೊಡುಗೆಗಳ ಕುರಿತಾದ ಮೊದಲ ಬ್ರಿಕ್ಸ್‌ AWG ವರದಿಯನ್ನು (BRICS AWG Report) ಸಹ ನಾವು ಸ್ವಾಗತಿಸುತ್ತೇವೆ.

ಮಾರುಕಟ್ಟೆಗಳ ಸುಸ್ಥಿರ ಅಭಿವೃದ್ಧಿಗೆ ಕೊಡುಗೆ ನೀಡುವ, ಸ್ಪರ್ಧಾ-ವಿರೋಧಿ ಗಡಿಯಾಚೆಗಿನ ಪದ್ಧತಿಗಳನ್ನು ಪರಿಣಾಮಕಾರಿಯಾಗಿ ಎದುರಿಸುವ ಮತ್ತು ಆರೋಗ್ಯಕರ ಮಾರುಕಟ್ಟೆ ವಾತಾವರಣವನ್ನು ಉತ್ತೇಜಿಸುವ ದೃಷ್ಟಿಯಿಂದ, ಬ್ರಿಕ್ಸ್ ದೇಶಗಳ ನಡುವೆ ಸ್ಪರ್ಧಾ ಕಾನೂನು ಮತ್ತು ನೀತಿಯ ಕ್ಷೇತ್ರದಲ್ಲಿ ಸಹಕಾರವನ್ನು ಮತ್ತಷ್ಟು ಮುಂದುವರಿಸಲು ಮತ್ತು ಅಭಿವೃದ್ಧಿಪಡಿಸಲು ನಮ್ಮ ಬದ್ಧತೆಯನ್ನು ನಾವು ಪುನರುಚ್ಚರಿಸುತ್ತೇವೆ. ಬ್ರಿಕ್ಸ್ ಸ್ಪರ್ಧಾ ಪ್ರಾಧಿಕಾರಗಳ ನಡುವೆ ಜ್ಞಾನ ಸೃಷ್ಟಿ ಮತ್ತು ಜ್ಞಾನ ಹಂಚಿಕೆಯಲ್ಲಿ 'ಬ್ರಿಕ್ಸ್ ಅಂತಾರಾಷ್ಟ್ರೀಯ ಸ್ಪರ್ಧಾ ಕಾನೂನು ಮತ್ತು ನೀತಿ ಕೇಂದ್ರ'ದ ಚಟುವಟಿಕೆಗಳ ಪಾತ್ರವನ್ನು ನಾವು ಅಂಗೀಕರಿಸುತ್ತೇವೆ. ಹಾಗೆಯೇ, ಬ್ರಿಕ್ಸ್ ಆರ್ಥಿಕತೆಗಳ ಸ್ಪರ್ಧಾ ಕಾನೂನಿನ ಅಭಿವೃದ್ಧಿಗಾಗಿ ಅತ್ಯಂತ ಅನುಕೂಲಕರ ಪರಿಸ್ಥಿತಿಗಳನ್ನು ಖಚಿತಪಡಿಸುವುದರ ಮತ್ತು ಸಾಮಾಜಿಕವಾಗಿ ಪ್ರಮುಖವಾದ ಮಾರುಕಟ್ಟೆಗಳಲ್ಲಿ ಏಕಸ್ವಾಮ್ಯದ ಅಡೆತಡೆಗಳನ್ನು ನಿವಾರಿಸಲು ಶ್ರಮಿಸುವುದರ ಮಹತ್ವವನ್ನು ನಾವು ಗುರುತಿಸುತ್ತೇವೆ. 2025 ರಲ್ಲಿ ದಕ್ಷಿಣ ಆಫ್ರಿಕಾದಲ್ಲಿ 9ನೇ ಬ್ರಿಕ್ಸ್ ಅಂತಾರಾಷ್ಟ್ರೀಯ ಸ್ಪರ್ಧಾ ಸಮ್ಮೇಳನದ ಆಯೋಜನೆಯನ್ನು ನಾವು ಸ್ವಾಗತಿಸುತ್ತೇವೆ.

ಬ್ರಿಕ್ಸ್ ರಾಷ್ಟ್ರೀಯ ಪ್ರಮಾಣೀಕರಣ ಸಂಸ್ಥೆಗಳ ಮುಖ್ಯಸ್ಥರ ಸಭೆಯ 'ಬ್ರೆಸಿಲಿಯಾ ಘೋಷಣೆ'ಯ ಅಂಗೀಕಾರವನ್ನು ನಾವು ಸ್ವಾಗತಿಸುತ್ತೇವೆ. ಇದು, ಆರ್ಥಿಕ ಸಂಬಂಧಗಳು ಮತ್ತು ವ್ಯಾಪಾರವನ್ನು ಸುಗಮಗೊಳಿಸುವುದು, ಗ್ರಾಹಕರ ಸುರಕ್ಷತೆಯನ್ನು ಹೆಚ್ಚಿಸುವುದು, ಹಾಗೂ ಸುಸ್ಥಿರ ಅಭಿವೃದ್ಧಿಯನ್ನು ಉತ್ತೇಜಿಸುವುದೂ ಸೇರಿದಂತೆ, ಈ ಕ್ಷೇತ್ರದಲ್ಲಿನ ಸಹಕಾರದ ಗಮನಾರ್ಹ ಪ್ರಯೋಜನಗಳನ್ನು ಅಂಗೀಕರಿಸುತ್ತದೆ. ವ್ಯಾಪಾರಕ್ಕೆ ಇರುವ ಅಡೆತಡೆಗಳನ್ನು ನಿವಾರಿಸಲು ಮತ್ತು ಸರಕು ಹಾಗೂ ಸೇವೆಗಳ ಗಡಿಯಾಚೆಗಿನ ಚಲನವಲನವನ್ನು ಸುಗಮಗೊಳಿಸಲು ಸಹಾಯ ಮಾಡುವ ಪರಿಣಾಮಕಾರಿ ಸಾಧನಗಳಾಗಿ ಪ್ರಮಾಣೀಕರಣ ಮತ್ತು ಮಾಪನಶಾಸ್ತ್ರವನ್ನು (metrology) ಪೋಷಿಸುವ ದಿಕ್ಕಿನಲ್ಲಿ ಮುಂದಿನ ಮೈಲಿಗಲ್ಲಾಗಿ, 'ಪ್ರಮಾಣೀಕರಣ ಕ್ಷೇತ್ರದಲ್ಲಿನ ಸಹಕಾರ ಕುರಿತ ತಿಳುವಳಿಕಾ ಒಪ್ಪಂದ'ದ ಸಂಧಾನಗಳ ಸಮಯೋಚಿತ ಮುಕ್ತಾಯವನ್ನು ನಾವು ಪ್ರೋತ್ಸಾಹಿಸುತ್ತೇವೆ.

ಬ್ರಿಕ್ಸ್ ದೇಶಗಳ ಸರ್ವೋಚ್ಚ ಲೆಕ್ಕಪರಿಶೋಧನಾ ಸಂಸ್ಥೆಗಳ (SAIs) ನಡುವಿನ ಉತ್ತಮ ಪದ್ಧತಿಗಳ ನಿರಂತರ ವಿನಿಮಯವನ್ನು ನಾವು ಶ್ಲಾಘಿಸುತ್ತೇವೆ. ಉತ್ತಮ ಆಡಳಿತವನ್ನು ಉತ್ತೇಜಿಸುವಲ್ಲಿ ಮತ್ತು ಸಾರ್ವಜನಿಕ ನೀತಿಗಳ ಪರಿಣಾಮಕಾರಿತ್ವದಲ್ಲಿ SAIಗಳ ಪಾತ್ರವನ್ನು ಗಣನೆಗೆ ತೆಗೆದುಕೊಂಡು, ಈ ತಂತ್ರಜ್ಞಾನಗಳಿಂದ ಉಂಟಾಗುವ ಅಪಾಯಗಳನ್ನು ಕಡಿಮೆ ಮಾಡುವ ಜೊತೆಗೆ, ಕೃತಕ ಬುದ್ಧಿಮತ್ತೆ (AI) ಸೇರಿದಂತೆ ಡಿಜಿಟಲ್ ತಂತ್ರಜ್ಞಾನಗಳು ಒದಗಿಸುವ ಅವಕಾಶಗಳ ಸಂಪೂರ್ಣ ಪ್ರಯೋಜನವನ್ನು SAIಗಳು ತಮ್ಮ ಕೆಲಸದಲ್ಲಿ ಪಡೆದುಕೊಳ್ಳುವುದರ ಮಹತ್ವವನ್ನು ನಾವು ಗುರುತಿಸುತ್ತೇವೆ.

ಪರಿಣಾಮಕಾರಿ ನಿರ್ಧಾರ-ತೆಗೆದುಕೊಳ್ಳುವಿಕೆಗಾಗಿ ಅಧಿಕೃತ ಅಂಕಿಅಂಶಗಳ ಮಹತ್ವವನ್ನು ಗುರುತಿಸಿ, ಬ್ರಿಕ್ಸ್‌ನೊಳಗೆ ಸಂಖ್ಯಾಶಾಸ್ತ್ರೀಯ ಸಹಕಾರವನ್ನು ಹೆಚ್ಚಿಸಲು ನಾವು ನಮ್ಮ ಬೆಂಬಲವನ್ನು ವ್ಯಕ್ತಪಡಿಸುತ್ತೇವೆ. 'ಬ್ರಿಕ್ಸ್ ಜಂಟಿ ಸಂಖ್ಯಾಶಾಸ್ತ್ರೀಯ ಪ್ರಕಟಣೆ' ಮತ್ತು 'ಬ್ರಿಕ್ಸ್ ಜಂಟಿ ಸಂಖ್ಯಾಶಾಸ್ತ್ರೀಯ ಪ್ರಕಟಣೆಯ ಸ್ನ್ಯಾಪ್‌ಶಾಟ್'ನ ವಾರ್ಷಿಕ ಬಿಡುಗಡೆ ಹಾಗೂ ಬ್ರಿಕ್ಸ್ ದೇಶಗಳಲ್ಲಿ ಅಧಿಕೃತ ಅಂಕಿಅಂಶಗಳ ಕ್ಷೇತ್ರಗಳಲ್ಲಿ ಉತ್ತಮ ಪದ್ಧತಿಗಳ ವಿನಿಮಯವೂ ಇದರಲ್ಲಿ ಸೇರಿದೆ.

21ನೇ ಶತಮಾನಕ್ಕೆ ಸೂಕ್ತವಾದ, ನ್ಯಾಯಯುತ, ಹೆಚ್ಚು ಒಳಗೊಳ್ಳುವ, ಸ್ಥಿರ ಮತ್ತು ದಕ್ಷ ಅಂತಾರಾಷ್ಟ್ರೀಯ ತೆರಿಗೆ ವ್ಯವಸ್ಥೆಯನ್ನು ಉತ್ತೇಜಿಸಲು ಸಹಕರಿಸುವುದನ್ನು ನಾವು ಮುಂದುವರಿಸುತ್ತೇವೆ. ತೆರಿಗೆ ಪಾರದರ್ಶಕತೆಗೆ ಮತ್ತು ಪರಿಣಾಮಕಾರಿ ಹಾಗೂ ನ್ಯಾಯಯುತ ತೆರಿಗೆಯ ಕುರಿತ ಜಾಗತಿಕ ಸಂವಾದವನ್ನು ಪೋಷಿಸಲು ನಮ್ಮ ಬದ್ಧತೆಯನ್ನು ನಾವು ಪುನರುಚ್ಚರಿಸುತ್ತೇವೆ. ಪ್ರಗತಿಪರತೆಯನ್ನು ಹೆಚ್ಚಿಸುವುದು ಮತ್ತು ಅಸಮಾನತೆಯನ್ನು ಕಡಿಮೆ ಮಾಡುವ ಪ್ರಯತ್ನಗಳಿಗೆ ಕೊಡುಗೆ ನೀಡುವುದು ಇದರ ಭಾಗವಾಗಿದೆ. ತೆರಿಗೆ ಪ್ರಾಧಿಕಾರಗಳ ನಡುವೆ ಜಾಗತಿಕ ಸಮನ್ವಯವನ್ನು ಹೆಚ್ಚಿಸುವುದು, ದೇಶೀಯ ಆದಾಯ ಸಂಗ್ರಹವನ್ನು ಸುಧಾರಿಸುವುದು, ತೆರಿಗೆ ಹಕ್ಕುಗಳ ನ್ಯಾಯಯುತ ಹಂಚಿಕೆಯನ್ನು ಒದಗಿಸುವುದು, ಹಾಗೂ ತೆರಿಗೆ ವಂಚನೆ ಮತ್ತು ತೆರಿಗೆ-ಸಂಬಂಧಿತ ಅಕ್ರಮ ಹಣಕಾಸು ಹರಿವನ್ನು ಎದುರಿಸುವುದು ನಮ್ಮ ಗುರಿಯಾಗಿದೆ. ಈ ನಿಟ್ಟಿನಲ್ಲಿ, 'ಅಂತಾರಾಷ್ಟ್ರೀಯ ತೆರಿಗೆ ಸಹಕಾರ ಕುರಿತ ವಿಶ್ವಸಂಸ್ಥೆಯ ಚೌಕಟ್ಟು ಸಮಾವೇಶ'ವನ್ನು ಬೆಂಬಲಿಸುವ ಬ್ರಿಕ್ಸ್ ಜಂಟಿ ಹೇಳಿಕೆಯನ್ನು ನಾವು ಸ್ವಾಗತಿಸುತ್ತೇವೆ ಮತ್ತು ವಿಶ್ವಸಂಸ್ಥೆಯ ಸಮಾವೇಶ ಹಾಗೂ ಅದರ ಶಿಷ್ಟಾಚಾರಗಳ (protocols) ಸಂಧಾನಗಳಲ್ಲಿ ರಚನಾತ್ಮಕವಾಗಿ ತೊಡಗಿಸಿಕೊಳ್ಳುವುದನ್ನು ಮುಂದುವರಿಸುತ್ತೇವೆ. ಕಸ್ಟಮ್ಸ್ ಸಹಕಾರದಲ್ಲಿನ ಪ್ರಗತಿಯನ್ನು ನಾವು ಸ್ವಾಗತಿಸುತ್ತೇವೆ. ವಿಶೇಷವಾಗಿ, ದ್ವಿಪಕ್ಷೀಯವಾಗಿ ಒಪ್ಪಿದ ವಿನಾಯಿತಿಗಳು, ಮಾರ್ಪಾಡುಗಳು ಅಥವಾ ಹೊಂದಾಣಿಕೆಗಳಿಗೆ ಒಳಪಟ್ಟು, 'ಅಧಿಕೃತ ಆರ್ಥಿಕ ನಿರ್ವಾಹಕ' (Authorized Economic Operator) ಕಾರ್ಯಕ್ರಮಗಳ ಪರಸ್ಪರ ಮಾನ್ಯತೆಗಾಗಿ ಇರುವ ಜಂಟಿ ಕ್ರಿಯಾ ಯೋಜನೆಯನ್ನು ಅನುಷ್ಠಾನಗೊಳಿಸುವ ಉಪಕ್ರಮಗಳನ್ನು ನಾವು ಸ್ವಾಗತಿಸುತ್ತೇವೆ. ಕಸ್ಟಮ್ಸ್ ಸಹಕಾರದಲ್ಲಿನ ಒಂದು ಪ್ರಮುಖ ಬೆಳವಣಿಗೆಯೆಂದರೆ, 'ಬ್ರಿಕ್ಸ್ ಕಸ್ಟಮ್ಸ್ ಉತ್ಕೃಷ್ಟತಾ ಕೇಂದ್ರ'ಗಳ ಸ್ಥಾಪನೆ ಮತ್ತು 'ಸ್ಮಾರ್ಟ್ ಕಸ್ಟಮ್ಸ್' ಅಭಿವೃದ್ಧಿ. ಇದನ್ನು ನಾವು ಉತ್ತೇಜಿಸುವುದನ್ನು ಮುಂದುವರಿಸುತ್ತೇವೆ.

ಬೌದ್ಧಿಕ ಆಸ್ತಿ (IP) ಕಚೇರಿಗಳಿಂದ ಐಪಿ ಬ್ರಿಕ್ಸ್ (IP BRICS) ಅಡಿಯಲ್ಲಿ ನಡೆದ ಫಲಪ್ರದ ಸಹಕಾರವನ್ನು ನಾವು ಎತ್ತಿ ಹಿಡಿಯುತ್ತೇವೆ. ಬೌದ್ಧಿಕ ಆಸ್ತಿಯು ಆರ್ಥಿಕ ಮತ್ತು ಸಾಮಾಜಿಕ ಅಭಿವೃದ್ಧಿಗೆ ಬಲವಾದ ಕೊಡುಗೆ ನೀಡುವ ಗುರಿಯೊಂದಿಗೆ, IP ಅರಿವನ್ನು ಉತ್ತೇಜಿಸುವುದು ಮತ್ತು ಪರೀಕ್ಷಕರ ತರಬೇತಿಯಂತಹ 8 ಸಹಕಾರ ಕ್ಷೇತ್ರಗಳಲ್ಲಿ ಹೆಚ್ಚು ಪ್ರಾಯೋಗಿಕ ಫಲಿತಾಂಶಗಳನ್ನು ಸಾಧಿಸಲು ನಾವು ಬೆಂಬಲಿಸುತ್ತೇವೆ. ಬೌದ್ಧಿಕ ಆಸ್ತಿ, ಜೆನೆಟಿಕ್ ಸಂಪನ್ಮೂಲಗಳು ಮತ್ತು ಸಂಬಂಧಿತ ಸಾಂಪ್ರದಾಯಿಕ ಜ್ಞಾನದ ಕುರಿತಾದ WIPO ಒಪ್ಪಂದ (WIPO Treaty on Intellectual Property, Genetic Resources and Associated Traditional Knowledge) ಮತ್ತು ರಿಯಾದ್ ಡಿಸೈನ್‌ ಕಾನೂನು ಒಪ್ಪಂದದ (Riyadh Design Law Treaty) ಅಂಗೀಕಾರವನ್ನು ನಾವು ಸ್ವಾಗತಿಸುತ್ತೇವೆ. ಬ್ರಿಕ್ಸ್‌ ದೇಶಗಳು ಇವುಗಳ ಬಗ್ಗೆ ಗಣನೀಯ ಆಸಕ್ತಿ ಹೊಂದಿವೆ ಮತ್ತು ಬ್ರಿಕ್ಸ್‌ ದೇಶಗಳ ನಡುವೆ ಸಹಯೋಗವನ್ನು ಹೆಚ್ಚಿಸಲು ಬದ್ಧವಾಗಿವೆ. ಡಿಜಿಟಲ್ ಪರಿಸರದಲ್ಲಿ ಬಳಸುವ ಬೌದ್ಧಿಕ ಆಸ್ತಿ ಹಕ್ಕುಗಳಿಗೆ ಗೌರವವನ್ನು ಉತ್ತೇಜಿಸುವಲ್ಲಿ ಸಹಕಾರದ ಮಹತ್ವವನ್ನು ನಾವು ಗುರುತಿಸುತ್ತೇವೆ. ಕೃತಕ ಬುದ್ಧಿಮತ್ತೆ ತರಬೇತಿ ಉದ್ದೇಶಗಳಿಗಾಗಿಯೂ ಇದು ಅನ್ವಯಿಸುತ್ತದೆ. ಅಭಿವೃದ್ಧಿಶೀಲ ರಾಷ್ಟ್ರಗಳ ಅಗತ್ಯತೆಗಳು ಮತ್ತು ಆದ್ಯತೆಗಳನ್ನು ಗೌರವಿಸುತ್ತಾ, ಹಕ್ಕು ಹೊಂದಿರುವವರಿಗೆ ನ್ಯಾಯಯುತ ಸಂಭಾವನೆ ನೀಡುವಿಕೆಯೂ ಇದರಲ್ಲಿ ಸೇರಿದೆ. ಕೃತಕ ಬುದ್ಧಿಮತ್ತೆಯ ಅನ್ವಯವು ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ, ದತ್ತಾಂಶ ಸಂಗ್ರಹಗಳು ಮತ್ತು AI ಮಾದರಿಗಳಲ್ಲಿ ಸಾಕಷ್ಟು ಪ್ರತಿನಿಧಿಸದ ಜ್ಞಾನ, ಪರಂಪರೆ ಮತ್ತು ಸಾಂಸ್ಕೃತಿಕ ಮೌಲ್ಯಗಳ ದುರುಪಯೋಗ ಮತ್ತು ತಪ್ಪು ನಿರೂಪಣೆಗೆ ಸಂಬಂಧಿಸಿದ ಅಪಾಯಗಳನ್ನು ನಾವು ಗುರುತಿಸುತ್ತೇವೆ.

ಬ್ರಿಕ್ಸ್‌ ನೊಳಗೆ ವಿಜ್ಞಾನ, ತಂತ್ರಜ್ಞಾನ ಮತ್ತು ನಾವೀನ್ಯತೆ (STI) ಸಹಕಾರದ ಹತ್ತು ವರ್ಷಗಳ ಮೈಲಿಗಲ್ಲನ್ನು ನಾವು ಸಂಭ್ರಮದಿಂದ ಆಚರಿಸುತ್ತೇವೆ. 2015ರಲ್ಲಿ ಬ್ರೆಜಿಲ್, ರಷ್ಯಾ, ಭಾರತ, ಚೀನಾ ಮತ್ತು ದಕ್ಷಿಣ ಆಫ್ರಿಕಾದ STI ಸಚಿವರು 'ವಿಜ್ಞಾನ, ತಂತ್ರಜ್ಞಾನ ಮತ್ತು ನಾವೀನ್ಯತೆ ಸಹಕಾರ ಕುರಿತ ತಿಳುವಳಿಕಾ ಒಪ್ಪಂದ'ಕ್ಕೆ ಸಹಿ ಹಾಕಿದಾಗಿನಿಂದ ಈ ಕ್ಷೇತ್ರದಲ್ಲಿ ಸಾಧಿಸಲಾದ ಮಹತ್ವದ ಸಾಧನೆಗಳನ್ನು ನಾವು ಅಂಗೀಕರಿಸುತ್ತೇವೆ. ಅದರ ಸೇರ್ಪಡೆ ಶಿಷ್ಟಾಚಾರದ (Accession Protocol) ಮೂಲಕ ಹೊಸ ಸದಸ್ಯರನ್ನು ಈ ತಿಳುವಳಿಕಾ ಒಪ್ಪಂದಕ್ಕೆ ಸೇರ್ಪಡೆಗೊಳಿಸುವ ನಡೆಯುತ್ತಿರುವ ಪ್ರಕ್ರಿಯೆಯನ್ನು ನಾವು ಸ್ವಾಗತಿಸುತ್ತೇವೆ. STI ಕ್ಷೇತ್ರದಲ್ಲಿ ಬ್ರಿಕ್ಸ್ ಸಹಕಾರದ ಅಂತಿಮ ಉದ್ದೇಶವು, ಬ್ರಿಕ್ಸ್ ದೇಶಗಳ ಅಭಿವೃದ್ಧಿಗಾಗಿ ಹೊಸ ಉತ್ಪಾದಕ ಶಕ್ತಿಗಳನ್ನು ರೂಪಿಸುವುದು ಮತ್ತು ಅದರ ಮೂರು ಆಯಾಮಗಳಲ್ಲಿ ಸುಸ್ಥಿರ ಅಭಿವೃದ್ಧಿಯನ್ನು ಮುಂದುವರಿಸುವುದಾಗಿದೆ ಎಂದು ನಾವು ಪುನರುಚ್ಚರಿಸುತ್ತೇವೆ. ಸಹಯೋಗದಲ್ಲಿ ಬೇರೂರಿರುವ ಪಾಲುದಾರಿಕೆಯ ಮೂಲಕ, ಬ್ರಿಕ್ಸ್ ರಾಷ್ಟ್ರಗಳ ನಡುವೆ ಸ್ನೇಹ, ಪರಸ್ಪರ ತಿಳುವಳಿಕೆ ಮತ್ತು ಶಾಂತಿಯುತ ಸಂಬಂಧಗಳನ್ನು ಬಲಪಡಿಸಲು ಕೊಡುಗೆ ನೀಡುವುದು ಇದರ ಗುರಿಯಾಗಿದೆ.

ಬ್ರಿಕ್ಸ್ ವಿಜ್ಞಾನ, ತಂತ್ರಜ್ಞಾನ ಮತ್ತು ನಾವೀನ್ಯತೆ (STI) ಕಾರ್ಯಪಡೆಗಳ ಕೆಲಸವನ್ನು ನಾವು ಶ್ಲಾಘಿಸುತ್ತೇವೆ. ಉದಯೋನ್ಮುಖ ತಂತ್ರಜ್ಞಾನಗಳ ಕ್ಷಿಪ್ರ ಪ್ರಗತಿ ಮತ್ತು ರಾಷ್ಟ್ರೀಯ ಪುನರ್-ಕೈಗಾರಿಕೀಕರಣ ಪ್ರಕ್ರಿಯೆಗಳ ನವೀನ ಸಂದರ್ಭದಲ್ಲಿ, 2025 ರಲ್ಲಿ ಕೃತಕ ಬುದ್ಧಿಮತ್ತೆ, ಕ್ವಾಂಟಮ್ ತಂತ್ರಜ್ಞಾನಗಳು ಮತ್ತು ಕೈಗಾರಿಕೆಯಲ್ಲಿನ ನಾವೀನ್ಯತೆಗಳನ್ನು ಆದ್ಯತೆಗಳಾಗಿ ಪರಿಗಣಿಸುವ ಬ್ರೆಜಿಲ್‌ನ ಪ್ರಸ್ತಾವನೆಯನ್ನು ನಾವು ಶ್ಲಾಘಿಸುತ್ತೇವೆ. 'ಬ್ರಿಕ್ಸ್ ನಾವೀನ್ಯತೆ ಕ್ರಿಯಾ ಯೋಜನೆ 2025–2030'ನ್ನು, ಹಾಗೂ ಏಳನೇ 'ಸಂಶೋಧನಾ ಯೋಜನೆಗಳಿಗಾಗಿ ಜಂಟಿ ಕರೆ' ಮತ್ತು ಮೊದಲ 'ನಾವೀನ್ಯತೆ ಯೋಜನೆಗಳಿಗಾಗಿ ಜಂಟಿ ಕರೆ'ಯ ಪ್ರಾರಂಭವನ್ನು ನಾವು ಸ್ವಾಗತಿಸುತ್ತೇವೆ. ಬ್ರಿಕ್ಸ್ ದೇಶಗಳ ನಡುವೆ ಸಾಗರದಾಳದ ಕೇಬಲ್‌ಗಳ (submarine cables) ಮೂಲಕ ಅತಿ ವೇಗದ ಸಂವಹನ ಜಾಲವನ್ನು ಸ್ಥಾಪಿಸಲು, 2025 ರಲ್ಲಿ "ತಾಂತ್ರಿಕ ಮತ್ತು ಆರ್ಥಿಕ ಕಾರ್ಯಸಾಧ್ಯತಾ ಅಧ್ಯಯನ" ಕೈಗೊಳ್ಳುವ ಬಗ್ಗೆ ಚರ್ಚಿಸುವ ಬ್ರೆಜಿಲ್‌ನ ಪ್ರಸ್ತಾವನೆಯನ್ನು ನಾವು ಸ್ವಾಗತಿಸುತ್ತೇವೆ. ಈ ವರ್ಷ ತನ್ನ 10ನೇ ಆವೃತ್ತಿಯನ್ನು ತಲುಪಿರುವ 'ಯುವ ವಿಜ್ಞಾನಿಗಳ ವೇದಿಕೆ' ಮತ್ತು 'ಯುವ ನಾವೀನ್ಯಕಾರರ ಪ್ರಶಸ್ತಿ'ಯಂತಹ ಉಪಕ್ರಮಗಳ ಮೂಲಕ ಯುವ ವಿಜ್ಞಾನಿಗಳು ಮತ್ತು ಸ್ಟಾರ್ಟ್‌ಅಪ್‌ಗಳ ಭಾಗವಹಿಸುವಿಕೆಯನ್ನು ಉತ್ತೇಜಿಸಲು ನಾವು ಎಲ್ಲಾ ಬ್ರಿಕ್ಸ್ ಸದಸ್ಯರನ್ನು ಪ್ರೋತ್ಸಾಹಿಸುತ್ತೇವೆ. 'ಬ್ರಿಕ್ಸ್ ಆಳ-ಸಮುದ್ರ ಸಂಪನ್ಮೂಲ ಅಂತಾರಾಷ್ಟ್ರೀಯ ಸಂಶೋಧನಾ ಕೇಂದ್ರ'ದ ಸ್ಥಾಪನೆಯನ್ನು ಪೂರ್ಣಗೊಳಿಸುವ ಕಾರ್ಯವ್ಯಾಪ್ತಿಯ ನಿಯಮಗಳ ವಿಸ್ತರಣೆಯೂ ಸೇರಿದಂತೆ, ಆಳ-ಸಮುದ್ರದ ಜಂಟಿ ಸಂಶೋಧನೆಯ ಸಹಕಾರಿ ಕಾರ್ಯಸೂಚಿಯನ್ನು ಮುಂದುವರಿಸುವುದನ್ನು ನಾವು ಸ್ವಾಗತಿಸುತ್ತೇವೆ. ಮಾನವಿಕ ಶಾಸ್ತ್ರಗಳ ಕ್ಷೇತ್ರದಲ್ಲಿ ಸಹಕಾರವನ್ನು ಅಭಿವೃದ್ಧಿಪಡಿಸುವ ಬದ್ಧತೆಯನ್ನು ನಾವು ಪುನರುಚ್ಚರಿಸುತ್ತೇವೆ ಮತ್ತು 2025 ರಲ್ಲಿ ರಷ್ಯಾದಲ್ಲಿ ಸಾಮಾಜಿಕ ವಿಜ್ಞಾನ ಹಾಗೂ ಮಾನವಿಕ ಶಾಸ್ತ್ರಗಳ ಸಂಶೋಧನೆಯ ಕುರಿತ ವೇದಿಕೆಯ ಆಯೋಜನೆಯನ್ನು ಸ್ವಾಗತಿಸುತ್ತೇವೆ.

ಬ್ರಿಕ್ಸ್ ದೇಶಗಳು ಪ್ರವಾಸೋದ್ಯಮ ಕ್ಷೇತ್ರದಲ್ಲಿ ಅಪಾರ ಸಾಮರ್ಥ್ಯವನ್ನು ಹೊಂದಿವೆ ಮತ್ತು ಪರಿಸರ-ಪ್ರವಾಸೋದ್ಯಮವೂ ಸೇರಿದಂತೆ, ಸುಸ್ಥಿರ ಹಾಗೂ ಸದೃಢ ಪ್ರವಾಸೋದ್ಯಮದ ಬೆಳವಣಿಗೆ ಮತ್ತು ಅಭಿವೃದ್ಧಿಗೆ ಉತ್ತಮ ಸಾಧ್ಯತೆಗಳನ್ನು ಒದಗಿಸುತ್ತವೆ ಎಂಬುದನ್ನು ನಾವು ಅಂಗೀಕರಿಸುತ್ತೇವೆ. 2024 ರಲ್ಲಿ ಸದಸ್ಯತ್ವದ ವಿಸ್ತರಣೆಯು, ಸಹಯೋಗಕ್ಕಾಗಿ ಹೊಸ ಅವಕಾಶಗಳನ್ನು ಒದಗಿಸುವ ಮತ್ತು ಬ್ರಿಕ್ಸ್-ಒಳಗಿನ ಪ್ರಯಾಣವನ್ನು ಉತ್ತೇಜಿಸುವ ಮೂಲಕ ಈ ಸಾಮರ್ಥ್ಯವನ್ನು ಮತ್ತಷ್ಟು ಹೆಚ್ಚಿಸಿದೆ. ಈ ಹಿನ್ನೆಲೆಯಲ್ಲಿ, ಪ್ರವಾಸೋದ್ಯಮ ಕಾರ್ಯಪಡೆಯ ಫಲಿತಾಂಶಗಳನ್ನು ನಾವು ಸ್ವಾಗತಿಸುತ್ತೇವೆ. ವಿಶೇಷವಾಗಿ, ಸದಸ್ಯ ರಾಷ್ಟ್ರಗಳ ನಡುವೆ ಸಮನ್ವಯತೆ ಮತ್ತು ಪೂರಕತೆಗಳನ್ನು ಬಲಪಡಿಸಲು ಪ್ರಾದೇಶಿಕ ಪ್ರವಾಸೋದ್ಯಮ ಕಾರ್ಯತಂತ್ರಗಳನ್ನು ಉತ್ತೇಜಿಸುವುದು; ಹಂಚಿಕೆಯ ಸವಾಲುಗಳನ್ನು ಎದುರಿಸುವ ಸಾಧನವಾಗಿ ಸುಸ್ಥಿರ, ಸದೃಢ ಮತ್ತು ಪುನರುತ್ಪಾದಕ ಪ್ರವಾಸೋದ್ಯಮವನ್ನು ಮುಂದುವರಿಸುವುದು; ಮತ್ತು ಸ್ಥಳೀಯ ಅಭಿವೃದ್ಧಿ ಹಾಗೂ ಸಾಂಸ್ಕೃತಿಕ ವಿನಿಮಯದ ರಾಯಭಾರಿಗಳಾಗಿ ಡಿಜಿಟಲ್ ನೊಮಾಡ್‌ ಗಳ (Digital Nomads) ಸಾಮರ್ಥ್ಯವನ್ನು ಬಳಸಿಕೊಳ್ಳಲು ಕಾರ್ಯತಂತ್ರದ ಮಾರ್ಗಸೂಚಿಗಳನ್ನು ರೂಪಿಸುವುದನ್ನು ನಾವು ಸ್ವಾಗತಿಸುತ್ತೇವೆ. ಬ್ರಿಕ್ಸ್ ಸಹಕಾರವನ್ನು ವಿಸ್ತರಿಸಲು, ನಾವೀನ್ಯತೆಯನ್ನು ಪೋಷಿಸಲು, ಮತ್ತು ಸುಸ್ಥಿರ ಅಭಿವೃದ್ಧಿ ಗುರಿಗಳ (SDGs) ಸಾಧನೆಗೆ ಪ್ರವಾಸೋದ್ಯಮವು ಅರ್ಥಪೂರ್ಣವಾಗಿ ಕೊಡುಗೆ ನೀಡುವುದನ್ನು ಖಚಿತಪಡಿಸಲು ನಮ್ಮ ಬದ್ಧತೆಯನ್ನು ನಾವು ಪುನರುಚ್ಚರಿಸುತ್ತೇವೆ.

ಹವಾಮಾನ ಬದಲಾವಣೆಯನ್ನು ಎದುರಿಸುವುದು ಮತ್ತು ಸುಸ್ಥಿರ, ನ್ಯಾಯಯುತ ಮತ್ತು ಸಮಗ್ರ ಅಭಿವೃದ್ಧಿಯನ್ನು ಉತ್ತೇಜಿಸುವುದು

ನಮ್ಮ ಹಂಚಿಕೆಯ ಗ್ರಹ ಮತ್ತು ಭವಿಷ್ಯಕ್ಕೆ ಬೆದರಿಕೆಯೊಡ್ಡುವ ಹವಾಮಾನ ಬದಲಾವಣೆಯಂತಹ (climate change) ಸವಾಲುಗಳನ್ನು ಎದುರಿಸಲು ಬಹುಪಕ್ಷೀಯತೆಯು (multilateralism) ಅತ್ಯಗತ್ಯ ಎಂದು ನಾವು ಒತ್ತಿಹೇಳುತ್ತೇವೆ. ಪ್ಯಾರಿಸ್ ಒಪ್ಪಂದದ (Paris Agreement) ಉದ್ದೇಶಗಳು ಮತ್ತು UNFCCC ಯ ಗುರಿಗಳನ್ನು ಸಾಧಿಸುವಲ್ಲಿ ನಾವು ಒಗ್ಗಟ್ಟಾಗಿರುತ್ತೇವೆ. UNFCCC ಮತ್ತು ಅದರ ಪ್ಯಾರಿಸ್ ಒಪ್ಪಂದಕ್ಕೆ ಸಹಿ ಹಾಕಿದ ಎಲ್ಲಾ ದೇಶಗಳು ತಮ್ಮ ಅಸ್ತಿತ್ವದಲ್ಲಿರುವ ಬದ್ಧತೆಯನ್ನು ಎತ್ತಿಹಿಡಿಯಬೇಕು ಮತ್ತು ಹವಾಮಾನ ಬದಲಾವಣೆಯನ್ನು ಎದುರಿಸಲು ತಮ್ಮ ಪ್ರಯತ್ನಗಳನ್ನು ಹೆಚ್ಚಿಸಬೇಕು ಎಂದು ನಾವು ಕರೆ ನೀಡುತ್ತೇವೆ. UNFCCC ಯ ಉದ್ದೇಶವನ್ನು ಸಾಧಿಸುವ ನಿಟ್ಟಿನಲ್ಲಿ, ಪ್ಯಾರಿಸ್ ಒಪ್ಪಂದದ ಸಂಪೂರ್ಣ ಮತ್ತು ಪರಿಣಾಮಕಾರಿ ಅನುಷ್ಠಾನವನ್ನು ಬಲಪಡಿಸುವ ಮೂಲಕ ಹವಾಮಾನ ಬದಲಾವಣೆಯನ್ನು ಎದುರಿಸಲು ನಾವು ನಮ್ಮ ಸ್ಥಿರ ಬದ್ಧತೆಯನ್ನು ಪುನರುಚ್ಚರಿಸುತ್ತೇವೆ. ಇದು ಅಭಿವೃದ್ಧಿಶೀಲ ರಾಷ್ಟ್ರಗಳಿಗೆ ಉಪಶಮನ (mitigation), ಹೊಂದಾಣಿಕೆ (adaptation) ಮತ್ತು ಅನುಷ್ಠಾನದ ವಿಧಾನಗಳ ನಿಬಂಧನೆಗಳಿಗೆ ಸಂಬಂಧಿಸಿದ ನಿಬಂಧನೆಗಳನ್ನು ಒಳಗೊಂಡಿದೆ. ವಿವಿಧ ರಾಷ್ಟ್ರೀಯ ಸಂದರ್ಭಗಳನ್ನು ಗಣನೆಗೆ ತೆಗೆದುಕೊಂಡು, ಸಮಾನತೆ ಮತ್ತು ಸಾಮಾನ್ಯ ಆದರೆ ಭಿನ್ನವಾದ ಜವಾಬ್ದಾರಿಗಳು ಹಾಗೂ ಆಯಾ ಸಾಮರ್ಥ್ಯಗಳ ತತ್ವವನ್ನು ಇದು ಪ್ರತಿಬಿಂಬಿಸುತ್ತದೆ. ಈ ನಿಟ್ಟಿನಲ್ಲಿ, ಬ್ರೆಜಿಲ್‌ ನ ಬೆಲೆಮ್ ನಗರದಲ್ಲಿ ನಡೆಯಲಿರುವ ಯುನೈಟೆಡ್ ನೇಷನ್ಸ್ ಫ್ರೇಮ್‌ವರ್ಕ್ ಕನ್ವೆನ್ಷನ್ ಆನ್ ಕ್ಲೈಮೇಟ್ ಚೇಂಜ್ (UNFCCC) COP-30 ರ ಅಧ್ಯಕ್ಷತೆಗೆ ನಾವು ನಮ್ಮ ಸಂಪೂರ್ಣ ಬೆಂಬಲವನ್ನು ವ್ಯಕ್ತಪಡಿಸುತ್ತೇವೆ. ಪ್ರತಿ ದೇಶದ ಸದಸ್ಯತ್ವ ಮತ್ತು ಬದ್ಧತೆಗಳನ್ನು ಪರಿಗಣಿಸಿ, UNFCCC ಯ ಎಲ್ಲಾ ಸ್ತಂಭಗಳ ಮೇಲೆ ಕಾರ್ಯನಿರ್ವಹಿಸುವ ಮತ್ತು ಸಹಕರಿಸುವ ಮಹತ್ವವನ್ನು ನಾವು ಎತ್ತಿ ಹಿಡಿಯುತ್ತೇವೆ. UNFCCC ಮತ್ತು ಅದರ ಪ್ಯಾರಿಸ್ ಒಪ್ಪಂದವನ್ನು ಜಾರಿಗೊಳಿಸುವಲ್ಲಿ ಪ್ರಗತಿಯನ್ನು ವೇಗಗೊಳಿಸುವ ಯಶಸ್ವಿ COP30 ಗಾಗಿ ನಮ್ಮ ಸಂಪೂರ್ಣ ಬದ್ಧತೆಯನ್ನು ನಾವು ಒತ್ತಿಹೇಳುತ್ತೇವೆ. 2028 ರಲ್ಲಿ COP 33 ಅನ್ನು ಆಯೋಜಿಸಲು ಭಾರತದ ಉಮೇದುವಾರಿಕೆಯನ್ನು ನಾವು ಸ್ವಾಗತಿಸುತ್ತೇವೆ.

ಸುಸ್ಥಿರ ಅಭಿವೃದ್ಧಿ ಮತ್ತು ಬಡತನ ನಿರ್ಮೂಲನೆಯ ಸಂದರ್ಭದಲ್ಲಿ, ಹವಾಮಾನ ಬದಲಾವಣೆಗೆ ಒಂದು ಬಲವರ್ಧಿತ ಜಾಗತಿಕ ಪ್ರತಿಕ್ರಿಯೆಗಾಗಿ ನಾವು ಕರೆ ನೀಡುತ್ತೇವೆ. ಹವಾಮಾನ ಬದಲಾವಣೆಯ ತುರ್ತುಸ್ಥಿತಿಯನ್ನು ಅರ್ಥಮಾಡಿಕೊಂಡು, ನಾವು 'ಬ್ರಿಕ್ಸ್ ಹವಾಮಾನ ನಾಯಕತ್ವ ಕಾರ್ಯಸೂಚಿ'ಯನ್ನು ಅನುಮೋದಿಸುತ್ತೇವೆ. ಇದು ನಮ್ಮ ಸಾಮೂಹಿಕ ನಾಯಕತ್ವದ ಸಂಕಲ್ಪದ ಹೇಳಿಕೆಯಾಗಿದೆ. ಪರಸ್ಪರ ಸಬಲೀಕರಣದ ಮೂಲಕ, ಬ್ರಿಕ್ಸ್‌ನ ಅಭಿವೃದ್ಧಿ ಅಗತ್ಯಗಳು ಮತ್ತು ಆದ್ಯತೆಗಳನ್ನು ಬೆಂಬಲಿಸುವ ಪರಿಹಾರಗಳನ್ನು ನಾವು ಮುನ್ನಡೆಸುತ್ತೇವೆ. ಅದೇ ಸಮಯದಲ್ಲಿ, UNFCCC ಮತ್ತು ಅದರ ಪ್ಯಾರಿಸ್ ಒಪ್ಪಂದದ ಸಂಪೂರ್ಣ ಅನುಷ್ಠಾನದತ್ತ ಕ್ರಮವನ್ನು ವೇಗಗೊಳಿಸುತ್ತೇವೆ ಮತ್ತು ಸಹಕಾರವನ್ನು ಹೆಚ್ಚಿಸುತ್ತೇವೆ. ಉತ್ತಮ ಭವಿಷ್ಯಕ್ಕಾಗಿ, ಬಹುಪಕ್ಷೀಯತೆ ಮತ್ತು 'ಗ್ಲೋಬಲ್ ಸೌತ್' ಸಹಕಾರವು ಹೆಚ್ಚು ಒಳಗೊಳ್ಳುವ ಮತ್ತು ಸುಸ್ಥಿರ ಆಡಳಿತವನ್ನು ರೂಪಿಸಬಲ್ಲದು ಎಂಬುದನ್ನು ಈ ಫಲಿತಾಂಶವು ಪ್ರದರ್ಶಿಸುತ್ತದೆ ಎಂದು ನಾವು ಒತ್ತಿ ಹೇಳುತ್ತೇವೆ.

ಅಭಿವೃದ್ಧಿಶೀಲ ರಾಷ್ಟ್ರಗಳಿಗೆ ಸುಲಭವಾಗಿ ಲಭ್ಯ, ಸಮಯಕ್ಕೆ ಸರಿಯಾದ, ಮತ್ತು ಕೈಗೆಟುಕುವ ಹವಾಮಾನ ಹಣಕಾಸು ಅತ್ಯಗತ್ಯ ಎಂದು ನಾವು ದೃಢವಾಗಿ ಹೇಳುತ್ತೇವೆ. ಹವಾಮಾನ ಕ್ರಮಗಳನ್ನು ಸುಸ್ಥಿರ ಅಭಿವೃದ್ಧಿಯೊಂದಿಗೆ ಸಂಯೋಜಿಸುವ ಮೂಲಕ ನ್ಯಾಯಯುತ ಪರಿವರ್ತನೆಯ ಮಾರ್ಗಗಳನ್ನು ಸೃಷ್ಟಿಸಲು ಇದು ನಿರ್ಣಾಯಕವಾಗಿದೆ. UNFCCC ಮತ್ತು ಅದರ ಪ್ಯಾರಿಸ್ ಒಪ್ಪಂದದ ಅಡಿಯಲ್ಲಿ ಸಂಪನ್ಮೂಲಗಳನ್ನು ಒದಗಿಸುವುದು ಮತ್ತು ಕ್ರೋಢೀಕರಿಸುವುದು ಅಭಿವೃದ್ಧಿ ಹೊಂದಿದ ದೇಶಗಳ ಜವಾಬ್ದಾರಿಯಾಗಿದೆ ಎಂಬುದನ್ನು ನಾವು ಒತ್ತಿಹೇಳುತ್ತೇವೆ. ಬಹುಪಕ್ಷೀಯತೆಗೆ ಮತ್ತು ಅಂತಾರಾಷ್ಟ್ರೀಯ ಸಹಕಾರಕ್ಕೆ ನಾವು ಬದ್ಧರಾಗಿದ್ದೇವೆ. ಹೆಚ್ಚು ನ್ಯಾಯಯುತ ಮತ್ತು ಸುಸ್ಥಿರ ಅಂತಾರಾಷ್ಟ್ರೀಯ ವಿತ್ತೀಯ ಹಾಗೂ ಹಣಕಾಸು ವ್ಯವಸ್ಥೆಗಾಗಿ ಜಾಗತಿಕ ಕ್ರೋಢೀಕರಣವನ್ನು ಮುನ್ನಡೆಸಲು ನಾವು ದೃಢಸಂಕಲ್ಪ ಮಾಡಿದ್ದೇವೆ. ಈ ನಿಟ್ಟಿನಲ್ಲಿ, ನಮ್ಮ ಆರ್ಥಿಕ ಶಕ್ತಿ ಮತ್ತು ನಾವೀನ್ಯತೆ ಸಾಮರ್ಥ್ಯವನ್ನು ಬಳಸಿಕೊಂಡು ಹವಾಮಾನ ಹಣಕಾಸು ಕುರಿತ ನಾಯಕರ ಚೌಕಟ್ಟು ಘೋಷಣೆಯನ್ನು (Leaders’ Framework Declaration on Climate Finance) ನಾವು ಅಳವಡಿಸಿಕೊಂಡಿದ್ದೇವೆ. ಮಹತ್ವಾಕಾಂಕ್ಷೆಯ ಹವಾಮಾನ ಕ್ರಮಗಳು ಹೇಗೆ ಸಮೃದ್ಧಿ ಮತ್ತು ಉತ್ತಮ ಭವಿಷ್ಯಕ್ಕೆ ನಾಂದಿ ಹಾಡಬಲ್ಲವು ಎಂಬುದನ್ನು ಇದರಿಂದ ಪ್ರದರ್ಶಿಸಲು ನಾವು ಇಚ್ಛಿಸುತ್ತೇವೆ. UNFCCC, ಅದರ ಕ್ಯೋಟೋ ಪ್ರೋಟೋಕಾಲ್ ಮತ್ತು ಪ್ಯಾರಿಸ್ ಒಪ್ಪಂದದಲ್ಲಿರುವ ಉದ್ದೇಶಗಳು, ತತ್ವಗಳು ಮತ್ತು ನಿಬಂಧನೆಗಳನ್ನು ಗೌರವಿಸಲೇಬೇಕು ಎಂದು ನಾವು ಮತ್ತೊಮ್ಮೆ ಪುನರುಚ್ಚರಿಸುತ್ತೇವೆ. ವಿಭಿನ್ನ ರಾಷ್ಟ್ರೀಯ ಸಂದರ್ಭಗಳನ್ನು ಗಣನೆಗೆ ತೆಗೆದುಕೊಂಡು, ಸಮಾನತೆ ಮತ್ತು ಸಾಮಾನ್ಯವಾದರೂ ಭಿನ್ನ ಜವಾಬ್ದಾರಿಗಳು  ಹಾಗೂ ಆಯಾ ಸಾಮರ್ಥ್ಯಗಳ ತತ್ವಗಳನ್ನು ಇದರಡಿ ಪಾಲಿಸುವುದು ಅನಿವಾರ್ಯವಾಗಿದೆ.

ಹಸಿರುಮನೆ ಅನಿಲ ಹೊರಸೂಸುವಿಕೆಯನ್ನು ನಿರ್ಣಯಿಸಲು, ಸೂಕ್ತವಾದಂತೆ, ಪರಸ್ಪರ ಮಾನ್ಯತೆ ಪಡೆದ ವಿಧಾನಗಳು ಮತ್ತು ಮಾನದಂಡಗಳ ಬಳಕೆಯನ್ನು ನಾವು ಪ್ರೋತ್ಸಾಹಿಸುತ್ತೇವೆ. ಇಂಗಾಲ ಲೆಕ್ಕಪತ್ರ-ಆಧಾರಿತ ವ್ಯವಸ್ಥೆಗಳು, ಮಾನದಂಡಗಳು ಮತ್ತು ವಿಧಾನಗಳ ವಿನ್ಯಾಸಕ್ಕೆ ಮಾರ್ಗದರ್ಶನ ನೀಡುವ ಹೆಚ್ಚು ಸಮತೋಲಿತ ಅಂತಾರಾಷ್ಟ್ರೀಯ ದೃಷ್ಟಿಕೋನದತ್ತ ಒಂದು ಪ್ರಮುಖ ಬ್ರಿಕ್ಸ್ ಕೊಡುಗೆಯಾಗಿ, 'ಉತ್ಪನ್ನ ಮತ್ತು ಸೌಲಭ್ಯ ಹೆಜ್ಜೆಗುರುತುಗಳಲ್ಲಿ ನ್ಯಾಯಯುತ, ಒಳಗೊಳ್ಳುವ ಮತ್ತು ಪಾರದರ್ಶಕ ಇಂಗಾಲ ಲೆಕ್ಕಪತ್ರದ ಬ್ರಿಕ್ಸ್ ತತ್ವ'ಗಳ ಅಂಗೀಕಾರವನ್ನು ನಾವು ಶ್ಲಾಘಿಸುತ್ತೇವೆ. ಜ್ಞಾನದ ಅಂತರಗಳನ್ನು ಗುರುತಿಸುವ ಮೌಲ್ಯವನ್ನು ನಾವು ಒತ್ತಿಹೇಳುತ್ತೇವೆ. ನಿರ್ದಿಷ್ಟ ವಲಯಗಳೊಳಗೆ ಮತ್ತು ಎಲ್ಲಾ ಹಸಿರುಮನೆ ಅನಿಲಗಳಿಗೆ ಈ ತತ್ವಗಳನ್ನು ಸಂದರ್ಭೋಚಿತಗೊಳಿಸುವುದು, ಹಾಗೂ ಇಂಗಾಲ ಲೆಕ್ಕಪತ್ರವನ್ನು ಒಳಗೊಂಡಿರುವ ನೀತಿ ಚೌಕಟ್ಟುಗಳನ್ನು ಬೆಂಬಲಿಸುವ ಅವುಗಳ ಸಾಮರ್ಥ್ಯವನ್ನು ಗುರುತಿಸುವುದರಂತಹ ಮುಂದಿನ ಕೆಲಸಗಳ ಮೂಲಕ ಈ ಜ್ಞಾನದ ಅಂತರಗಳನ್ನು ಪರಿಹರಿಸಬಹುದು. 'ಹವಾಮಾನ ಬದಲಾವಣೆ ಸಂಬಂಧಿತ ತಂತ್ರಜ್ಞಾನ ಸಹಕಾರವನ್ನು ಹೆಚ್ಚಿಸಲು ಬೌದ್ಧಿಕ ಆಸ್ತಿ ಆಯ್ಕೆಗಳ ಕುರಿತ ಬ್ರಿಕ್ಸ್ ವರದಿ'ಯ ಅಂಗೀಕಾರವನ್ನು ನಾವು ಗಮನಿಸುತ್ತೇವೆ. ಇದು, ಹವಾಮಾನ ಕ್ರಮದ ನಿರ್ಣಾಯಕ ಸಕ್ರಿಯಕಾರಕವಾಗಿ ತಂತ್ರಜ್ಞಾನದ ಅಭಿವೃದ್ಧಿ ಮತ್ತು ವರ್ಗಾವಣೆಯನ್ನು ಬೆಂಬಲಿಸುವ ಹಾಗೂ ವೇಗಗೊಳಿಸುವ ಗುರಿಯೊಂದಿಗೆ, ಬ್ರಿಕ್ಸ್ ಸದಸ್ಯ ರಾಷ್ಟ್ರಗಳಿಂದ ಭವಿಷ್ಯದ ಪರಿಗಣನೆಗೆ ಸಾಮರ್ಥ್ಯವಿರುವ ಹವಾಮಾನ ಬದಲಾವಣೆ ಸಂಬಂಧಿತ ಸಹಕಾರಿ ವ್ಯವಸ್ಥೆಗಳ ಒಂದು ಭರವಸೆಯ ರೂಪರೇಷೆಯಾಗಿದೆ.

ಸುಸ್ಥಿರ ಆರ್ಥಿಕ ಬೆಳವಣಿಗೆ ಮತ್ತು ಎಲ್ಲಾ ದೇಶಗಳಲ್ಲಿ, ವಿಶೇಷವಾಗಿ ಅಭಿವೃದ್ಧಿಶೀಲ ರಾಷ್ಟ್ರಗಳಲ್ಲಿ, ಅಭಿವೃದ್ಧಿಯನ್ನು ಉತ್ತೇಜಿಸುವ ಪೋಷಕ ಮತ್ತು ಮುಕ್ತ ಅಂತಾರಾಷ್ಟ್ರೀಯ ಆರ್ಥಿಕ ವ್ಯವಸ್ಥೆಗಾಗಿ ವ್ಯಾಪಕ ಸಹಕಾರಕ್ಕಾಗಿ ನಾವು ಬಲವಾಗಿ ಕರೆ ನೀಡುತ್ತೇವೆ. ಇದು ಹವಾಮಾನ ಬದಲಾವಣೆಯ ಸಮಸ್ಯೆಗಳನ್ನು ಉತ್ತಮವಾಗಿ ನಿಭಾಯಿಸಲು ಅವರಿಗೆ ಅನುವು ಮಾಡಿಕೊಡುತ್ತದೆ. ಹವಾಮಾನ ಬದಲಾವಣೆಯನ್ನು ಎದುರಿಸಲು ಕೈಗೊಳ್ಳುವ ಕ್ರಮಗಳು, ಏಕಪಕ್ಷೀಯ ಕ್ರಮಗಳು ಸೇರಿದಂತೆ, ಅಂತಾರಾಷ್ಟ್ರೀಯ ವ್ಯಾಪಾರದ ಮೇಲೆ ಅನಿಯಂತ್ರಿತ ಅಥವಾ ಅಸಮರ್ಥನೀಯ ತಾರತಮ್ಯ ಅಥವಾ ಮರೆಮಾಚಿದ ನಿರ್ಬಂಧವನ್ನು ರೂಪಿಸಬಾರದು ಎಂದು ನಾವು ಒತ್ತಿಹೇಳುತ್ತೇವೆ. ವ್ಯಾಪಾರ ಮತ್ತು ಪರಿಸರ ಆಯಾಮಗಳನ್ನು ಸಂಯೋಜಿಸುವ ಮಿಶ್ರ ಕಾನೂನು ಸ್ವರೂಪದ ಕ್ರಮಗಳಿಂದ ಒದಗಿಸಲಾದ ಅವಕಾಶಗಳು ಮತ್ತು ಸವಾಲುಗಳನ್ನು ಗುರುತಿಸಿ, ಪರಿಸರ ಉದ್ದೇಶಗಳ ಹಿನ್ನೆಲೆಯಲ್ಲಿ ಪರಿಚಯಿಸಲಾದ ಏಕಪಕ್ಷೀಯ ವ್ಯಾಪಾರ ಕ್ರಮಗಳ ಹೆಚ್ಚುತ್ತಿರುವ ಬಳಕೆಯ ಬಗ್ಗೆ ನಾವು ಬಲವಾದ ಕಾಳಜಿಯನ್ನು ವ್ಯಕ್ತಪಡಿಸಿದ್ದೇವೆ ಮತ್ತು ವಿರೋಧಿಸಿದ್ದೇವೆ. ವ್ಯಾಪಾರ, ಹವಾಮಾನ ಬದಲಾವಣೆ ಮತ್ತು ಸುಸ್ಥಿರ ಅಭಿವೃದ್ಧಿಗಾಗಿ ಬ್ರಿಕ್ಸ್‌ ಪ್ರಯೋಗಾಲಯದ ಸ್ಥಾಪನೆಯನ್ನು ನಾವು ಸ್ವಾಗತಿಸಿದ್ದೇವೆ. ವ್ಯಾಪಾರ ಮತ್ತು ಪರಿಸರ ನೀತಿಗೆ ಪರಸ್ಪರ ಪೂರಕ ವಿಧಾನಗಳ ಸಹಯೋಗವನ್ನು ಸುಗಮಗೊಳಿಸಲು ಇದು ಒಂದು ವೇದಿಕೆಯಾಗಿದೆ. ಬ್ರಿಕ್ಸ್‌ ಸದಸ್ಯರು ವ್ಯಾಪಾರದ ಪ್ರಯೋಜನಗಳನ್ನು ಉತ್ತಮವಾಗಿ ಬಳಸಿಕೊಳ್ಳಲು, ಏಕಪಕ್ಷೀಯ ಕ್ರಮಗಳಿಗೆ ಜಂಟಿಯಾಗಿ ಪ್ರತಿಕ್ರಿಯಿಸಲು ಮತ್ತು ಹವಾಮಾನ ಬದಲಾವಣೆಯ ವಿರುದ್ಧದ ಜಾಗತಿಕ ಪ್ರಯತ್ನಗಳಿಗೆ ಕೊಡುಗೆ ನೀಡಲು ಇದು ಸಹಕಾರಿಯಾಗಿದೆ.

'ಬ್ರಿಕ್ಸ್ ಹವಾಮಾನ ಸಂಶೋಧನಾ ವೇದಿಕೆ'ಯ ಕಾರ್ಯವ್ಯಾಪ್ತಿಯ ನಿಯಮಗಳ ಅಂಗೀಕಾರವನ್ನು ನಾವು ಸ್ವಾಗತಿಸುತ್ತೇವೆ. ಬ್ರಿಕ್ಸ್ ಸದಸ್ಯ ರಾಷ್ಟ್ರಗಳ ನಡುವೆ ವೈಜ್ಞಾನಿಕ ಮತ್ತು ತಜ್ಞರ ಅಭಿಪ್ರಾಯಗಳು, ಜ್ಞಾನ ಮತ್ತು ಉತ್ತಮ ಪದ್ಧತಿಗಳ ವಿನಿಮಯವನ್ನು ಹೆಚ್ಚಿಸಲು ಇದೊಂದು ಅರ್ಥಪೂರ್ಣ ಕೊಡುಗೆಯಾಗಿದೆ ಎಂದು ನಾವು ಗುರುತಿಸುತ್ತೇವೆ.

ಪ್ಯಾರಿಸ್ ಒಪ್ಪಂದದ 6ನೇ ವಿಧಿಯನ್ನು ನಾವು ಒಂದು ಪ್ರಮುಖ ಸಾಧನವಾಗಿ ಅಂಗೀಕರಿಸುತ್ತೇವೆ. ಇದು, ಖಾಸಗಿ ಮತ್ತು ಸಾರ್ವಜನಿಕ ಹೂಡಿಕೆಯನ್ನು ಹವಾಮಾನ ಪ್ರಯತ್ನಗಳತ್ತ ದಾರಿತೋರಿಸುವ ಮಾರ್ಗಗಳನ್ನು ಒದಗಿಸುವ ಮೂಲಕ, ಶಮನ ಕ್ರಮಗಳಲ್ಲಿ ಹೆಚ್ಚಿನ ಮಹತ್ವಾಕಾಂಕ್ಷೆಯನ್ನು ಪೋಷಿಸಲು ಮತ್ತು ಸುಸ್ಥಿರ ಅಭಿವೃದ್ಧಿ ಹಾಗೂ ಪರಿಸರ ಸಮಗ್ರತೆಯನ್ನು ಉತ್ತೇಜಿಸಲು ಸಹಕಾರಿಯಾಗಿದೆ. ಈ ಕಾರ್ಯವಿಧಾನಗಳನ್ನು ಬಲಪಡಿಸುವ ಮೂಲಕ, ನಾವು ಖಾಸಗಿ ವಲಯದ ಪಾಲ್ಗೊಳ್ಳುವಿಕೆಯನ್ನು ವೇಗಗೊಳಿಸಬಹುದು, ತಂತ್ರಜ್ಞಾನ ವರ್ಗಾವಣೆಯನ್ನು ಪ್ರೋತ್ಸಾಹಿಸಬಹುದು, ಮತ್ತು ಸಾರ್ವಜನಿಕ ಹಣಕಾಸು ಹರಿವಿಗೆ ಪೂರಕವಾಗಿರಬಹುದು. 'ಬ್ರಿಕ್ಸ್ ಇಂಗಾಲ ಮಾರುಟ್ಟೆಗಳ ಸಹಭಾಗಿತ್ವದ ತಿಳುವಳಿಕಾ ಒಪ್ಪಂದ'ದ ನಿಬಂಧನೆಗಳನ್ನು ಮತ್ತು ಇಂಗಾಲ ಮಾರುಕಟ್ಟೆಗಳ ಕ್ಷೇತ್ರದಲ್ಲಿ ಸಹಕಾರವನ್ನು ಉತ್ತೇಜಿಸುವಲ್ಲಿ ಅದರ ಮೌಲ್ಯವನ್ನು ನಾವು ಗಮನಿಸುತ್ತೇವೆ. ಸಾಮರ್ಥ್ಯ ವೃದ್ಧಿ ಮತ್ತು ಅನುಭವಗಳ ವಿನಿಮಯದ ಮೇಲೆ ನಿರ್ದಿಷ್ಟ ಗಮನಹರಿಸುವುದು ಇದರ ಭಾಗವಾಗಿದೆ. ಸದಸ್ಯರಿಗೆ ಅವರ ಹವಾಮಾನ ಕಾರ್ಯತಂತ್ರಗಳಲ್ಲಿ ಬೆಂಬಲ ನೀಡಲು, ಶಮನ ಪ್ರಯತ್ನಗಳಿಗೆ ಪೂರಕವಾಗಿರಲು ಮತ್ತು ಅಗತ್ಯ ಸಂಪನ್ಮೂಲಗಳನ್ನು ಕ್ರೋಢೀಕರಿಸಲು ಒಂದು ಸಹಕಾರಿ ದೃಷ್ಟಿಕೋನವಾಗಿ ಇದರ ಅನುಷ್ಠಾನವನ್ನು ನಾವು ಎದುರುನೋಡುತ್ತೇವೆ.

ಪರಿಸರ ಕಾಳಜಿಯ ನೆಪದಲ್ಲಿ, ಅಂತಾರಾಷ್ಟ್ರೀಯ ಕಾನೂನಿಗೆ ಅನುಗುಣವಾಗಿರದ ಏಕಪಕ್ಷೀಯ, ದಂಡನೀಯ ಮತ್ತು ತಾರತಮ್ಯದ ರಕ್ಷಣಾತ್ಮಕ ಕ್ರಮಗಳನ್ನು ನಾವು ತಿರಸ್ಕರಿಸುತ್ತೇವೆ. ಏಕಪಕ್ಷೀಯ ಮತ್ತು ತಾರತಮ್ಯದ ಇಂಗಾಲದ ಗಡಿ ಹೊಂದಾಣಿಕೆ ಕಾರ್ಯವಿಧಾನಗಳು (CBAMs), ಅರಣ್ಯನಾಶ ನಿಯಂತ್ರಣ, ಸೂಕ್ತ ಪರಿಶೀಲನೆಯ ಅವಶ್ಯಕತೆಗಳು, ತೆರಿಗೆಗಳು ಮತ್ತು ಇತರ ಕ್ರಮಗಳು ಇವುಗಳಲ್ಲಿ ಸೇರಿವೆ. ಹವಾಮಾನ ಅಥವಾ ಪರಿಸರವನ್ನು ಆಧರಿಸಿದ ಏಕಪಕ್ಷೀಯ ವ್ಯಾಪಾರ ಕ್ರಮಗಳನ್ನು ತಪ್ಪಿಸಲು ಸಂಬಂಧಿಸಿದ COP28 ರಲ್ಲಿನ ಕರೆಗೆ ನಮ್ಮ ಸಂಪೂರ್ಣ ಬೆಂಬಲವನ್ನು ಪುನರ್‌ದೃಢೀಕರಿಸುತ್ತೇವೆ. ಜಾಗತಿಕ ಪೂರೈಕೆ ಮತ್ತು ಉತ್ಪಾದನಾ ಸರಪಳಿಗಳಿಗೆ ಉದ್ದೇಶಪೂರ್ವಕವಾಗಿ ಅಡ್ಡಿಪಡಿಸುವ ಮತ್ತು ಸ್ಪರ್ಧೆಯನ್ನು ವಿರೂಪಗೊಳಿಸುವ ಏಕಪಕ್ಷೀಯ ರಕ್ಷಣಾತ್ಮಕ ಕ್ರಮಗಳನ್ನು ಸಹ ನಾವು ವಿರೋಧಿಸುತ್ತೇವೆ.

ಇಂಧನದ ಪ್ರಮುಖ ಉತ್ಪಾದಕರು ಮತ್ತು ಗ್ರಾಹಕರಿಬ್ಬರಾಗಿಯೂ ನಮ್ಮ ಹಂಚಿಕೆಯ ಜವಾಬ್ದಾರಿಯನ್ನು ಅಂಗೀಕರಿಸಿ, ಸುಸ್ಥಿರ ಅಭಿವೃದ್ಧಿ ಗುರಿ 7 (SDG7) ರಲ್ಲಿ ವಿವರಿಸಿದಂತೆ, ರಾಷ್ಟ್ರೀಯ ಸಂದರ್ಭಗಳಿಗೆ ಅನುಗುಣವಾಗಿ ನ್ಯಾಯಯುತ ಮತ್ತು ಎಲ್ಲರನ್ನೂ ಒಳಗೊಂಡ ಇಂಧನ ಪರಿವರ್ತನೆಗಳನ್ನು ಹಾಗೂ ಎಲ್ಲರಿಗೂ ಕೈಗೆಟುಕುವ, ವಿಶ್ವಾಸಾರ್ಹ, ಸುಸ್ಥಿರ ಮತ್ತು ಆಧುನಿಕ ಇಂಧನಕ್ಕೆ ಸಾರ್ವತ್ರಿಕ ಪ್ರವೇಶವನ್ನು ಖಚಿತಪಡಿಸುವ ನಮ್ಮ ಬದ್ಧತೆಯನ್ನು ನಾವು ಪುನರುಚ್ಚರಿಸುತ್ತೇವೆ. ಈ ನಿಟ್ಟಿನಲ್ಲಿ, ಆ ಗುರಿಯತ್ತ ಪ್ರಗತಿಯನ್ನು ವೇಗಗೊಳಿಸಲು ಬ್ರಿಕ್ಸ್ ದೇಶಗಳ ನಡುವೆ ಬಲವರ್ಧಿತ ಸಹಕಾರಕ್ಕಾಗಿ ನಾವು ಕರೆ ನೀಡುತ್ತೇವೆ. ಇದನ್ನು ಗಮನದಲ್ಲಿಟ್ಟುಕೊಂಡು, 'ಬ್ರಿಕ್ಸ್ ಹಿರಿಯ ಇಂಧನ ಅಧಿಕಾರಿಗಳ ಸಮಿತಿ' ಮತ್ತು 'ಬ್ರಿಕ್ಸ್ ಇಂಧನ ಸಂಶೋಧನಾ ಸಹಕಾರ ವೇದಿಕೆ'ಯ ಫಲಪ್ರದ ಕೆಲಸವನ್ನು ನಾವು ಸ್ವಾಗತಿಸುತ್ತೇವೆ. 'ಬ್ರಿಕ್ಸ್ ಇಂಧನ ಸಹಕಾರ 2025–2030'ರ ಪರಿಷ್ಕೃತ ಮಾರ್ಗಸೂಚಿಯನ್ನು ಮತ್ತು 'ಇಂಧನ ಸೇವೆಗಳಿಗೆ ಪ್ರವೇಶ' ಹಾಗೂ 'ಹೊಸ ಮತ್ತು ಸುಸ್ಥಿರ ಇಂಧನಗಳು' ಕುರಿತ ವರದಿಗಳ ಪ್ರಸ್ತುತ ಸಿದ್ಧತೆಯನ್ನು ನಾವು ಗಮನಕ್ಕೆ ತೆಗೆದುಕೊಳ್ಳುತ್ತೇವೆ. ಜೂನ್ 9 ಮತ್ತು 10 ರಂದು ಬ್ರೆಸಿಲಿಯಾದಲ್ಲಿ ನಡೆದ 7ನೇ ಬ್ರಿಕ್ಸ್ ಯುವ ಇಂಧನ ಶೃಂಗಸಭೆಯನ್ನೂ ನಾವು ಗಮನಿಸುತ್ತೇವೆ.

ಸಾಮಾಜಿಕ ಮತ್ತು ಆರ್ಥಿಕ ಅಭಿವೃದ್ಧಿ, ರಾಷ್ಟ್ರೀಯ ಭದ್ರತೆ ಮತ್ತು ಎಲ್ಲಾ ರಾಷ್ಟ್ರಗಳ ಕಲ್ಯಾಣಕ್ಕಾಗಿ ಇಂಧನ ಭದ್ರತೆಯು ಒಂದು ನಿರ್ಣಾಯಕ ಅಡಿಪಾಯವಾಗಿದೆ ಎಂಬುದನ್ನು ನಾವು ಗುರುತಿಸುತ್ತೇವೆ. ಇಂಧನ ಮಾರುಕಟ್ಟೆಯ ಸ್ಥಿರತೆಯನ್ನು ಖಾತ್ರಿಪಡಿಸುವ ಮೂಲಕ, ವೈವಿಧ್ಯಮಯ ಮೂಲಗಳಿಂದ ಅಡೆತಡೆಯಿಲ್ಲದ ಇಂಧನ ಹರಿವನ್ನು ನಿರ್ವಹಿಸುವ ಮೂಲಕ, ಮೌಲ್ಯ ಸರಪಳಿಗಳನ್ನು ಬಲಪಡಿಸುವ ಮೂಲಕ, ಹಾಗೂ ಗಡಿಯಾಚೆಗಿನ ಮೂಲಸೌಕರ್ಯವೂ ಸೇರಿದಂತೆ ನಿರ್ಣಾಯಕ ಇಂಧನ ಮೂಲಸೌಕರ್ಯದ ಸದೃಢತೆ ಮತ್ತು ರಕ್ಷಣೆಯನ್ನು ಖಚಿತಪಡಿಸುವ ಮೂಲಕ ಇಂಧನ ಭದ್ರತೆಯನ್ನು ಹೆಚ್ಚಿಸುವ ಅಗತ್ಯವನ್ನು ನಾವು ಒತ್ತಿ ಹೇಳುತ್ತೇವೆ. ವಿಶ್ವದ ಇಂಧನ ಮಿಶ್ರಣದಲ್ಲಿ, ವಿಶೇಷವಾಗಿ ಉದಯೋನ್ಮುಖ ಮಾರುಕಟ್ಟೆಗಳು ಮತ್ತು ಅಭಿವೃದ್ಧಿಶೀಲ ಆರ್ಥಿಕತೆಗಳಿಗೆ, ಪಳೆಯುಳಿಕೆ ಇಂಧನಗಳು ಇನ್ನೂ ಪ್ರಮುಖ ಪಾತ್ರವನ್ನು ವಹಿಸುತ್ತವೆ ಎಂದು ನಾವು ಅಂಗೀಕರಿಸುತ್ತೇವೆ. ರಾಷ್ಟ್ರೀಯ ಸಂದರ್ಭಗಳು, ಅಗತ್ಯಗಳು ಮತ್ತು ಆದ್ಯತೆಗಳನ್ನು ಗಣನೆಗೆ ತೆಗೆದುಕೊಂಡು, ನ್ಯಾಯಯುತ, ಕ್ರಮಬದ್ಧ, ಸಮಾನ ಮತ್ತು ಎಲ್ಲರನ್ನೂ ಒಳಗೊಂಡ ಇಂಧನ ಪರಿವರ್ತನೆಗಳನ್ನು ಉತ್ತೇಜಿಸುವ ಅಗತ್ಯವನ್ನು ನಾವು ಗುರುತಿಸುತ್ತೇವೆ. ನಮ್ಮ ಹವಾಮಾನ ಗುರಿಗಳಿಗೆ ಅನುಗುಣವಾಗಿ ಹಾಗೂ SDG7 ಅನ್ನು ಪಾಲಿಸುತ್ತಾ ಹಸಿರುಮನೆ ಅನಿಲ (GHG) ಹೊರಸೂಸುವಿಕೆಯನ್ನು ಕಡಿಮೆ ಮಾಡುವುದು ಇದರ ಭಾಗವಾಗಿದೆ. ಹವಾಮಾನ ಬದಲಾವಣೆಯನ್ನು ಎದುರಿಸುವುದು ಮತ್ತು ಇಂಧನ ಪರಿವರ್ತನೆಗಳನ್ನು ಉತ್ತೇಜಿಸುವುದರ ನಡುವಿನ ಅಂತರ್ಸಂಪರ್ಕವನ್ನು ಗುರುತಿಸಿ, UNFCCC, ಅದರ ಪ್ಯಾರಿಸ್ ಒಪ್ಪಂದ, ಮತ್ತು ರಾಷ್ಟ್ರೀಯ ಸಂದರ್ಭಗಳಿಗೆ ಅನುಗುಣವಾಗಿ ಸುಸ್ಥಿರ ರೀತಿಯಲ್ಲಿ ಆರ್ಥಿಕ ಅಭಿವೃದ್ಧಿಯನ್ನು ಪೋಷಿಸುವ ನಮ್ಮ ಹಂಚಿಕೆಯ ಬದ್ಧತೆಯನ್ನು ನಾವು ಪುನರುಚ್ಚರಿಸುತ್ತೇವೆ.

ಇಂಧನ ಪರಿವರ್ತನೆಗಳಿಗಾಗಿ ಇರುವ ಹಣಕಾಸಿನ ಕೊರತೆಯನ್ನು ನೀಗಿಸಲು, ಹಣಕಾಸು ಪ್ರವೇಶದಲ್ಲಿನ ಸಹಕಾರವನ್ನು ವೇಗಗೊಳಿಸುವ ಮತ್ತು ಹೂಡಿಕೆಯನ್ನು ಹೆಚ್ಚಿಸುವ ಅಗತ್ಯವನ್ನು ನಾವು ಒತ್ತಿ ಹೇಳುತ್ತೇವೆ. 'ಪರಿವರ್ತನಾ ಹಣಕಾಸು' (transitional financing) ಪರಿಕಲ್ಪನೆಯನ್ನು ಪರಿಗಣಿಸುತ್ತಾ, ಪ್ಯಾರಿಸ್ ಒಪ್ಪಂದ ಮತ್ತು ಅದರ ತತ್ವಗಳಿಗೆ ಅನುಗುಣವಾಗಿ ನ್ಯಾಯಯುತ ಹಾಗೂ ಎಲ್ಲರನ್ನೂ ಒಳಗೊಂಡ ಇಂಧನ ಪರಿವರ್ತನೆಗಳಿಗಾಗಿ, ಅಭಿವೃದ್ಧಿ ಹೊಂದಿದ ದೇಶಗಳಿಂದ ಅಭಿವೃದ್ಧಿಶೀಲ ರಾಷ್ಟ್ರಗಳಿಗೆ ಸಮರ್ಪಕ, ಊಹಿಸಬಹುದಾದ ಮತ್ತು ಸುಲಭಲಭ್ಯ ಕಡಿಮೆ-ವೆಚ್ಚದ ಹಾಗೂ ರಿಯಾಯಿತಿ ದರದ ಹಣಕಾಸಿನ ಹಂಚಿಕೆಗಾಗಿ ನಾವು ಕರೆ ನೀಡುತ್ತೇವೆ. ಸುಸ್ಥಿರ ಅಭಿವೃದ್ಧಿಗಾಗಿ ಮಾರುಕಟ್ಟೆಗಳು, ತಂತ್ರಜ್ಞಾನಗಳು ಮತ್ತು ಕಡಿಮೆ-ಬಡ್ಡಿಯ ಹಣಕಾಸಿಗೆ ತಾರತಮ್ಯ-ರಹಿತ ಪ್ರವೇಶವು ಅತ್ಯಗತ್ಯ ಎಂದು ನಾವು ಒತ್ತಿ ಹೇಳುತ್ತೇವೆ.

ಶೂನ್ಯ ಮತ್ತು ಕಡಿಮೆ-ಹೊರಸೂಸುವಿಕೆಯ ಇಂಧನ ತಂತ್ರಜ್ಞಾನಗಳ ಅಭಿವೃದ್ಧಿ, ಇಂಧನ ಭದ್ರತೆ, ಮತ್ತು ಇಂಧನ ಪೂರೈಕೆ ಸರಪಳಿಗಳ ಸದೃಢತೆಗಾಗಿ ನಿರ್ಣಾಯಕ ಖನಿಜಗಳ ಪ್ರಮುಖ ಪಾತ್ರವನ್ನು ನಾವು ಗುರುತಿಸುತ್ತೇವೆ. ಸಂಪನ್ಮೂಲ-ಸಮೃದ್ಧ ದೇಶಗಳ ಖನಿಜ ಸಂಪನ್ಮೂಲಗಳ ಮೇಲಿನ ಸಾರ್ವಭೌಮ ಹಕ್ಕುಗಳನ್ನು ಹಾಗೂ ಸಮರ್ಥನೀಯ ಸಾರ್ವಜನಿಕ ನೀತಿ ಉದ್ದೇಶಗಳನ್ನು ಅನುಸರಿಸಲು ಅಗತ್ಯವಾದ ಕ್ರಮಗಳನ್ನು ಅಳವಡಿಸಿಕೊಳ್ಳುವ, ನಿರ್ವಹಿಸುವ ಮತ್ತು ಜಾರಿಗೊಳಿಸುವ ಅವುಗಳ ಹಕ್ಕನ್ನು ಸಂಪೂರ್ಣವಾಗಿ ಸಂರಕ್ಷಿಸುತ್ತಲೇ, ಆ ದೇಶಗಳಲ್ಲಿ ಲಾಭ ಹಂಚಿಕೆ, ಮೌಲ್ಯವರ್ಧನೆ ಮತ್ತು ಆರ್ಥಿಕ ವೈವಿಧ್ಯೀಕರಣವನ್ನು ಖಾತರಿಪಡಿಸಲು, ಅಂತಹ ಖನಿಜಗಳ ವಿಶ್ವಾಸಾರ್ಹ, ಜವಾಬ್ದಾರಿಯುತ, ವೈವಿಧ್ಯಮಯ, ಸದೃಢ, ನ್ಯಾಯಯುತ, ಸುಸ್ಥಿರ, ಮತ್ತು ನ್ಯಾಯಸಮ್ಮತ ಪೂರೈಕೆ ಸರಪಳಿಗಳನ್ನು ಉತ್ತೇಜಿಸುವ ಅಗತ್ಯವನ್ನು ನಾವು ದೃಢೀಕರಿಸುತ್ತೇವೆ.

ಸುಸ್ಥಿರ ಭವಿಷ್ಯದತ್ತ ಮತ್ತು ಎಲ್ಲರಿಗೂ ಸಮಾನ ಹಾಗೂ ನ್ಯಾಯಯುತ ಪರಿವರ್ತನೆಗಳತ್ತ ಜಾಗತಿಕ ಪ್ರಯತ್ನಕ್ಕೆ ಕೊಡುಗೆ ನೀಡಲು, ಬ್ರಿಕ್ಸ್‌ ನೊಳಗೆ ಮತ್ತು ಬ್ರಿಕ್ಸ್ ಮೂಲಕ ಸಹಕಾರವು ಮೂಲಭೂತವಾಗಿದೆ ಎಂದು ನಾವು ದೃಢೀಕರಿಸುತ್ತೇವೆ. ಜೀವವೈವಿಧ್ಯದ ಸಂರಕ್ಷಣೆ ಮತ್ತು ಸುಸ್ಥಿರ ಬಳಕೆ, ಆನುವಂಶಿಕ ಸಂಪನ್ಮೂಲಗಳ ಬಳಕೆಯಿಂದ ಉಂಟಾಗುವ ಪ್ರಯೋಜನಗಳ ನ್ಯಾಯಯುತ ಹಾಗೂ ಸಮಾನ ಹಂಚಿಕೆ, ಮತ್ತು 'ಜೀವವೈವಿಧ್ಯದ ಕುರಿತ ಸಮಾವೇಶ', ಅದರ ಶಿಷ್ಟಾಚಾರಗಳು, ಹಾಗೂ ಅದರ 'ಕುನ್ಮಿಂಗ್-ಮಾಂಟ್ರಿಯಲ್ ಜಾಗತಿಕ ಜೀವವೈವಿಧ್ಯ ಚೌಕಟ್ಟಿನ' ಪರಿಣಾಮಕಾರಿ ಅನುಷ್ಠಾನದ ಮಹತ್ವವನ್ನು ನಾವು ಒತ್ತಿ ಹೇಳುತ್ತೇವೆ. ಕುನ್ಮಿಂಗ್ ಜೀವವೈವಿಧ್ಯ ನಿಧಿಯ ಸ್ಥಾಪನೆಯನ್ನು ಮತ್ತು ಚೀನಾ ಸರ್ಕಾರದ ಕೊಡುಗೆಯನ್ನು ನಾವು ಶ್ಲಾಘಿಸುತ್ತೇವೆ. ಅಭಿವೃದ್ಧಿಶೀಲ ರಾಷ್ಟ್ರಗಳ ಜೀವವೈವಿಧ್ಯ ಸಂರಕ್ಷಣೆಗೆ ಬೆಂಬಲ ನೀಡುವುದರಲ್ಲಿ ಮತ್ತು 'ಕುನ್ಮಿಂಗ್-ಮಾಂಟ್ರಿಯಲ್ ಜಾಗತಿಕ ಜೀವವೈವಿಧ್ಯ ಚೌಕಟ್ಟಿನ' ಅನುಷ್ಠಾನಕ್ಕೆ ನೀಡಿದ ಮಹತ್ತರ ಕೊಡುಗೆಯಲ್ಲಿ ಅದರ ಮಹತ್ವದ ಪಾತ್ರವನ್ನು ನಾವು ಗುರುತಿಸುತ್ತೇವೆ. COP16 ಸಂಧಾನಗಳಲ್ಲಿ, ವಿಶೇಷವಾಗಿ ಸಂಪನ್ಮೂಲ ಕ್ರೋಢೀಕರಣವನ್ನು ಮುಂದುವರಿಸುವಲ್ಲಿ, ಬ್ರಿಕ್ಸ್ ದೇಶಗಳ ಸಕ್ರಿಯ ಪಾತ್ರವನ್ನು ನಾವು ಗುರುತಿಸುತ್ತೇವೆ. ಜೀವವೈವಿಧ್ಯದ ಸಂರಕ್ಷಣೆ, ಸುಸ್ಥಿರ ಬಳಕೆ ಮತ್ತು ಅದರ ಬಳಕೆಯಿಂದ ಉಂಟಾಗುವ ಪ್ರಯೋಜನಗಳ ನ್ಯಾಯಯುತ ಹಾಗೂ ಸಮಾನ ಹಂಚಿಕೆಗಾಗಿ, ಅಭಿವೃದ್ಧಿಶೀಲ ರಾಷ್ಟ್ರಗಳಿಗೆ ಸಮರ್ಪಕ, ಪರಿಣಾಮಕಾರಿ, ಊಹಿಸಬಹುದಾದ, ಸಮಯೋಚಿತ ಮತ್ತು ಸುಲಭಲಭ್ಯ ಹಣಕಾಸು ಸಂಪನ್ಮೂಲಗಳನ್ನು ಒದಗಿಸುವುದನ್ನು ಖಚಿತಪಡಿಸಲು, ಹಾಗೂ ಸಾಮರ್ಥ್ಯ ವೃದ್ಧಿ ಮತ್ತು ತಂತ್ರಜ್ಞಾನದ ಅಭಿವೃದ್ಧಿ-ವರ್ಗಾವಣೆಯನ್ನು ಸುಧಾರಿಸಲು ನಾವು ಅಭಿವೃದ್ಧಿ ಹೊಂದಿದ ದೇಶಗಳನ್ನು ಒತ್ತಾಯಿಸುತ್ತೇವೆ. ಉಷ್ಣವಲಯದ ಅರಣ್ಯಗಳೂ ಸೇರಿದಂತೆ ಎಲ್ಲಾ ಬಗೆಯ ಅರಣ್ಯಗಳ ನಿರ್ಣಾಯಕ ಪಾತ್ರವನ್ನು ನಾವು ಒತ್ತಿ ಹೇಳುತ್ತೇವೆ. ಜೀವವೈವಿಧ್ಯ ಸಂರಕ್ಷಣೆ, ಜಲಾನಯನ ಪ್ರದೇಶಗಳು ಮತ್ತು ಮಣ್ಣಿನ ಸಂರಕ್ಷಣೆ, ಆರ್ಥಿಕ ವಲಯಗಳಿಗೆ ಹೆಚ್ಚಿನ ಮೌಲ್ಯದ ಮರ ಮತ್ತು ಮರೇತರ ಅರಣ್ಯ ಉತ್ಪನ್ನಗಳನ್ನು ಒದಗಿಸುವುದು, ಜಲಚಕ್ರಗಳನ್ನು ನಿಯಂತ್ರಿಸುವುದು, ಮರುಭೂಮೀಕರಣವನ್ನು ಎದುರಿಸುವುದು ಹಾಗೂ ಪ್ರಮುಖ ಇಂಗಾಲ ಹೀರಿಕೆಗಳಾಗಿ (carbon sinks) ಕಾರ್ಯನಿರ್ವಹಿಸುವಲ್ಲಿ ಅವುಗಳ ಪಾತ್ರ ಮಹತ್ವದ್ದು. ಈ ಅಗತ್ಯ ಉಷ್ಣವಲಯದ ಪರಿಸರ ವ್ಯವಸ್ಥೆಗಳ ಸಂರಕ್ಷಣೆ, ಸುಸ್ಥಿರ ನಿರ್ವಹಣೆ ಮತ್ತು ಪುನಃಸ್ಥಾಪನೆಯನ್ನು ಉತ್ತೇಜಿಸುವ 'ನಮ್ಮ ಅರಣ್ಯಗಳಿಗಾಗಿ ಒಂದಾಗೋಣ' (United for Our Forests) ಉಪಕ್ರಮವನ್ನು ಸಹ ನಾವು ಗಮನಕ್ಕೆ ತೆಗೆದುಕೊಳ್ಳುತ್ತೇವೆ. ಅಪರೂಪದ ಪ್ರಭೇದಗಳನ್ನು ಸಂರಕ್ಷಿಸುವ ನಮ್ಮ ದೇಶಗಳ ಪ್ರಯತ್ನಗಳನ್ನು ಶ್ಲಾಘಿಸುತ್ತಾ ಮತ್ತು ದೊಡ್ಡ ಬೆಕ್ಕುಗಳ (big cats) ಹೆಚ್ಚಿನ ದುರ್ಬಲತೆಯನ್ನು ಗಮನಿಸುತ್ತಾ, 'ಅಂತಾರಾಷ್ಟ್ರೀಯ ದೊಡ್ಡ ಬೆಕ್ಕುಗಳ ಒಕ್ಕೂಟ'ವನ್ನು (International Big Cats Alliance) ರಚಿಸುವ ಭಾರತ ಗಣರಾಜ್ಯದ ಉಪಕ್ರಮವನ್ನು ನಾವು ಗಮನಕ್ಕೆ ತೆಗೆದುಕೊಳ್ಳುತ್ತೇವೆ. ದೊಡ್ಡ ಬೆಕ್ಕುಗಳ ಸಂರಕ್ಷಣೆಗಾಗಿ ಒಟ್ಟಾಗಿ ಕೆಲಸ ಮಾಡಲು ಬ್ರಿಕ್ಸ್ ದೇಶಗಳನ್ನು ನಾವು ಪ್ರೋತ್ಸಾಹಿಸುತ್ತೇವೆ.

ಬ್ರೆಜಿಲ್‌ ನ ಬೆಲೆಮ್‌ ನಲ್ಲಿ ನಡೆಯಲಿರುವ COP30 ಸಮ್ಮೇಳನದಲ್ಲಿ 'ಟ್ರೋಪಿಕಲ್ ಫಾರೆಸ್ಟ್ ಫಾರೆವರ್ ಫೆಸಿಲಿಟಿ' (Tropical Forest Forever Facility) ಅನ್ನು ಪ್ರಾರಂಭಿಸುವ ಯೋಜನೆಗಳನ್ನು ನಾವು ಸ್ವಾಗತಿಸುತ್ತೇವೆ. ಉಷ್ಣವಲಯದ ಅರಣ್ಯ ಸಂರಕ್ಷಣೆಗಾಗಿ ದೀರ್ಘಾವಧಿಯ, ಫಲಿತಾಂಶ-ಆಧಾರಿತ ಹಣಕಾಸು ಕ್ರೋಢೀಕರಿಸಲು ವಿನ್ಯಾಸಗೊಳಿಸಲಾದ ಇದು ಒಂದು ನವೀನ ಕಾರ್ಯವಿಧಾನವಾಗಿದೆ ಎಂದು ನಾವು ಗುರುತಿಸುತ್ತೇವೆ. ಈ ಸೌಲಭ್ಯದ ಬಂಡವಾಳೀಕರಣ ಮತ್ತು ಸಮಯೋಚಿತ ಕಾರ್ಯಾಚರಣೆಯನ್ನು ಖಚಿತಪಡಿಸಿಕೊಳ್ಳಲು, ಸಂಭಾವ್ಯ ದಾನಿ ದೇಶಗಳು ಮಹತ್ವಾಕಾಂಕ್ಷೆಯ ಕೊಡುಗೆಗಳನ್ನು ಘೋಷಿಸಲು ನಾವು ಪ್ರೋತ್ಸಾಹಿಸುತ್ತೇವೆ.

ಬ್ರಿಕ್ಸ್‌ ರಾಷ್ಟ್ರಗಳು ಸುಸ್ಥಿರ ಅರಣ್ಯ ನಿರ್ವಹಣೆ ಮತ್ತು ಆಡಳಿತದಲ್ಲಿ  ಗಣನೀಯ ಪರಿಣತಿಯನ್ನು ಹೊಂದಿವೆ ಎಂಬುದನ್ನು ನಾವು ಪುನರುಚ್ಚರಿಸುತ್ತೇವೆ. ವೈಜ್ಞಾನಿಕ ಸಂಶೋಧನೆ ಮತ್ತು ಸುಧಾರಿತ ತಂತ್ರಜ್ಞಾನವನ್ನು ಬಳಸಿಕೊಂಡು, ಅರಣ್ಯ-ಸಂಬಂಧಿತ ಸವಾಲುಗಳು ಮತ್ತು ಗುರಿಗಳನ್ನು ಯಶಸ್ವಿಯಾಗಿ ನಿಭಾಯಿಸುವಲ್ಲಿ ಉತ್ತಮ ಅನುಭವವನ್ನು ಹೊಂದಿವೆ. ಅರಣ್ಯ ಮತ್ತು ಇತರ ಅರಣ್ಯ-ಸಂಬಂಧಿತ ವಿಷಯಗಳಿಗೆ ಸಂಬಂಧಿಸಿದ ಅನುಭವಗಳನ್ನು ಹಂಚಿಕೊಳ್ಳುವಲ್ಲಿ ಮತ್ತು ಸಂಶೋಧನೆ ನಡೆಸುವಲ್ಲಿ ಬ್ರಿಕ್ಸ್‌ ಸಹಕಾರವನ್ನು ಹೆಚ್ಚಿಸಲು ನಾವು ಪ್ರೋತ್ಸಾಹಿಸುತ್ತೇವೆ.

ಪರಿಸರ ಸಹಕಾರದ ಕುರಿತ ತಿಳುವಳಿಕೆ ಒಪ್ಪಂದ (Memorandum of Understanding on Environmental Cooperation) ಮತ್ತು ಬ್ರಿಕ್ಸ್‌ ಪರಿಸರ ಕ್ಷೇತ್ರಗಳಲ್ಲಿ ಅಭಿವೃದ್ಧಿಪಡಿಸಲಾದ ಇತರ ಸಹಕಾರ ಕಾರ್ಯವಿಧಾನಗಳ ಅಡಿಯಲ್ಲಿ ಪರಿಸರ ಸಹಕಾರವನ್ನು ಮುನ್ನಡೆಸುವ ಮಹತ್ವವನ್ನು ನಾವು ಎತ್ತಿಹಿಡಿಯುತ್ತೇವೆ. ಇವುಗಳಲ್ಲಿ ಬ್ರಿಕ್ಸ್‌ ಪರಿಸರ ಸ್ನೇಹಿ ತಂತ್ರಜ್ಞಾನ ವೇದಿಕೆ (BRICS Environmentally Sound Technology Platform - BEST), "ಬ್ರಿಕ್ಸ್‌ ಕ್ಲೀನ್ ರಿವರ್ಸ್" ಮತ್ತು "ಬ್ರಿಕ್ಸ್‌ ನಗರ ಪರಿಸರ ಸುಸ್ಥಿರತೆಗಾಗಿ ಪಾಲುದಾರಿಕೆ" (BRICS Partnership for Urban Environmental Sustainability) ಸೇರಿವೆ. ಪರಿಸರ ಸಮಸ್ಯೆಗಳನ್ನು ಪರಿಹರಿಸುವಲ್ಲಿ ಸಮಾಜದ ವಿವಿಧ ವಿಭಾಗಗಳನ್ನು ತೊಡಗಿಸಿಕೊಳ್ಳುವ ಮಹತ್ವವನ್ನು ನಾವು ಮನಗಂಡಿದ್ದೇವೆ. ಆದ್ದರಿಂದ, "ಬ್ರಿಕ್ಸ್‌ ಯುವ ಪರಿಸರ ನೆಟ್‌ವರ್ಕ್" (BRICS Youth Environmental Network) ಅನ್ನು ರಚಿಸುವ ಸಾಧ್ಯತೆಯನ್ನು ಮತ್ತಷ್ಟು ಅನ್ವೇಷಿಸಲು ನಾವು ಉದ್ದೇಶಿಸಿದ್ದೇವೆ.

ಮರುಭೂಮೀಕರಣ, ಭೂ ಅವನತಿ, ಮತ್ತು ಬರಗಾಲ, ಹಾಗೂ ಮರಳು ಮತ್ತು ಧೂಳಿನ ಬಿರುಗಾಳಿಗಳು, ಜನರ ಯೋಗಕ್ಷೇಮ ಮತ್ತು ಜೀವನೋಪಾಯಕ್ಕೆ ಗಂಭೀರ ಬೆದರಿಕೆಗಳನ್ನು ಒಡ್ಡುತ್ತಿವೆ ಎಂಬುದನ್ನು ನಾವು ಗುರುತಿಸುತ್ತೇವೆ. ವಿಶೇಷವಾಗಿ, ಮೂಲನಿವಾಸಿಗಳು ಮತ್ತು ಸ್ಥಳೀಯ ಸಮುದಾಯಗಳೂ ಸೇರಿದಂತೆ, ದುರ್ಬಲ ಪರಿಸ್ಥಿತಿಯಲ್ಲಿರುವ ಜನರಿಗೆ ಇವು ಹೆಚ್ಚಿನ ಅಪಾಯವನ್ನು ತಂದೊಡ್ಡುತ್ತಿವೆ. 'ವಿಶೇಷವಾಗಿ ಆಫ್ರಿಕಾದಲ್ಲಿ, ಗಂಭೀರ ಬರಗಾಲ ಮತ್ತು/ಅಥವಾ ಮರುಭೂಮೀಕರಣವನ್ನು ಅನುಭವಿಸುತ್ತಿರುವ ದೇಶಗಳಲ್ಲಿ ಮರುಭೂಮೀಕರಣವನ್ನು ಎದುರಿಸಲು ವಿಶ್ವಸಂಸ್ಥೆಯ ಸಮಾವೇಶ' (UNCCD) ಅನ್ನು ಸಮರ್ಪಕವಾಗಿ ಅನುಷ್ಠಾನಗೊಳಿಸಲು ಹಣಕಾಸು ಸಂಪನ್ಮೂಲಗಳನ್ನು ಹೆಚ್ಚಿಸಬೇಕೆಂದು ನಾವು ಅಭಿವೃದ್ಧಿ ಹೊಂದಿದ ದೇಶಗಳನ್ನು ಒತ್ತಾಯಿಸುತ್ತೇವೆ. ಸುಸ್ಥಿರ ಅಭಿವೃದ್ಧಿ ಗುರಿ 15 ರ ಅಡಿಯಲ್ಲಿ ಪ್ರಮುಖ ಗುರಿ 15.3 ಆಗಿರುವ 'ಭೂ ಅವನತಿ ತಟಸ್ಥತೆ' (Land Degradation Neutrality - LDN) ಸಾಧಿಸುವ ನಿಟ್ಟಿನಲ್ಲಿ ಅಭಿವೃದ್ಧಿಶೀಲ ರಾಷ್ಟ್ರಗಳಿಗೆ ಬೆಂಬಲವನ್ನು ಬಲಪಡಿಸಬೇಕೆಂದೂ ನಾವು ಒತ್ತಾಯಿಸುತ್ತೇವೆ.

ಪ್ಲಾಸ್ಟಿಕ್ ಮಾಲಿನ್ಯವನ್ನು ಪರಿಹರಿಸುವ ಮೂಲಕ ಪರಿಸರ ಸದೃಢತೆಯನ್ನು ಪೋಷಿಸುವಲ್ಲಿ ಬ್ರಿಕ್ಸ್ ದೇಶಗಳು ಪ್ರಮುಖ ಪಾತ್ರವನ್ನು ವಹಿಸಬಹುದು ಎಂಬುದನ್ನು ನಾವು ಗುರುತಿಸುತ್ತೇವೆ. ಸಹಯೋಗ ಮತ್ತು ಒಮ್ಮತ-ನಿರ್ಮಾಣದ ಸ್ಪೂರ್ತಿಯಲ್ಲಿ, ಹಾಗೂ ತುರ್ತು ಮತ್ತು ಒಗ್ಗಟ್ಟಿನ ಭಾವನೆಯೊಂದಿಗೆ, ಸಮುದ್ರ ಪರಿಸರದಲ್ಲಿಯೂ ಸೇರಿದಂತೆ ಪ್ಲಾಸ್ಟಿಕ್ ಮಾಲಿನ್ಯದ ಕುರಿತ ನ್ಯಾಯಯುತ, ಪರಿಣಾಮಕಾರಿ, ಮತ್ತು ಸಮತೋಲಿತ ಅಂತಾರಾಷ್ಟ್ರೀಯ ಕಾನೂನುಬದ್ಧ ಸಾಧನಕ್ಕಾಗಿ ನಡೆಯುತ್ತಿರುವ ಸಂಧಾನದಲ್ಲಿ ನಾವು ತೊಡಗಿಸಿಕೊಳ್ಳುವುದನ್ನು ಮುಂದುವರಿಸುತ್ತೇವೆ. ವಿಶ್ವಸಂಸ್ಥೆಯ ಪರಿಸರ ಸಭೆಯ (UNEA) ನಿರ್ಣಯ 5/14 ರ ಪ್ರಕಾರ, ಅಭಿವೃದ್ಧಿಶೀಲ ರಾಷ್ಟ್ರಗಳ ಅಗತ್ಯಗಳು ಮತ್ತು ಆದ್ಯತೆಗಳನ್ನು ಪರಿಗಣನೆಗೆ ತೆಗೆದುಕೊಳ್ಳುವ ಹಾಗೂ ಸಮರ್ಪಕ ಅನುಷ್ಠಾನ ಸಾಧನಗಳ ಅಗತ್ಯವನ್ನು ಕಡೆಗಣಿಸದೆ ನಾವು ಈ ಸಂಧಾನವನ್ನು ಮುಂದುವರಿಸುತ್ತೇವೆ. ಈ ಅಂತಾರಾಷ್ಟ್ರೀಯ ಸಾಧನವು, ಪ್ರತಿ ದೇಶದ ರಾಷ್ಟ್ರೀಯ ಸಂದರ್ಭಗಳು, ಸಾಮರ್ಥ್ಯಗಳು ಮತ್ತು ಬದ್ಧತೆಗಳನ್ನು ಪರಿಗಣಿಸುತ್ತದೆ. ಸಾಮರ್ಥ್ಯ ವೃದ್ಧಿ ಹಾಗೂ ಜ್ಞಾನ ಮತ್ತು ತಂತ್ರಜ್ಞಾನದ ವರ್ಗಾವಣೆಯ ಮೂಲಕ ಉತ್ತಮ ಪ್ಲಾಸ್ಟಿಕ್ ತ್ಯಾಜ್ಯ ನಿರ್ವಹಣೆಯ ಮೇಲೆ ಗಮನ ಕೇಂದ್ರೀಕರಿಸುವ ಜೊತೆಗೆ, ಇದು ರಾಷ್ಟ್ರೀಯ ಆರ್ಥಿಕತೆಗಳ ಮೇಲೆ, ವಿಶೇಷವಾಗಿ ಅಭಿವೃದ್ಧಿಶೀಲ ರಾಷ್ಟ್ರಗಳ ಆರ್ಥಿಕತೆಗಳ ಮೇಲೆ, ನಕಾರಾತ್ಮಕ ಪರಿಣಾಮ ಬೀರದಂತೆ ಖಚಿತಪಡಿಸುತ್ತದೆ.

ಪರಿಸರ ಸಂರಕ್ಷಣೆ ಮತ್ತು ಸುಸ್ಥಿರ ಅಭಿವೃದ್ಧಿಯ ಕ್ಷೇತ್ರದಲ್ಲಿ BRICS ಚೌಕಟ್ಟಿನೊಳಗೆ ಸಹಕಾರವನ್ನು ಬಲಪಡಿಸಲು ನಾವು ನಮ್ಮ ಬದ್ಧತೆಯನ್ನು ಪುನರುಚ್ಚರಿಸುತ್ತೇವೆ. ಬಹುಪಕ್ಷೀಯತೆಯನ್ನು ಎತ್ತಿಹಿಡಿಯುವುದು ಮತ್ತು ಜಾಗತಿಕ ಪರಿಸರ ಆಡಳಿತವನ್ನು ಬಲಪಡಿಸುವುದು ನಮ್ಮ ಉದ್ದೇಶವಾಗಿದೆ. ಹವಾಮಾನ ಬದಲಾವಣೆ, ಜೀವವೈವಿಧ್ಯದ ನಷ್ಟ ಮತ್ತು ಮಾಲಿನ್ಯವನ್ನು ನಿಭಾಯಿಸಲು ಕೈಗೊಳ್ಳುವ ಎಲ್ಲಾ ಕ್ರಮಗಳು, ಏಕಪಕ್ಷೀಯ ಕ್ರಮಗಳು ಸೇರಿದಂತೆ, ಸಂಬಂಧಿತ ಬಹುಪಕ್ಷೀಯ ಪರಿಸರ ಮತ್ತು ವ್ಯಾಪಾರ-ಸಂಬಂಧಿತ ಒಪ್ಪಂದಗಳ ತತ್ವಗಳು ಮತ್ತು ನಿಬಂಧನೆಗಳಿಗೆ ಅನುಗುಣವಾಗಿ ವಿನ್ಯಾಸಗೊಳಿಸಬೇಕು, ಅಳವಡಿಸಿಕೊಳ್ಳಬೇಕು ಮತ್ತು ಜಾರಿಗೊಳಿಸಬೇಕು. ಇವು ಅಂತಾರಾಷ್ಟ್ರೀಯ ವ್ಯಾಪಾರದ ಮೇಲೆ ಅನಿಯಂತ್ರಿತ ಅಥವಾ ಅಸಮರ್ಥನೀಯ ತಾರತಮ್ಯ ಅಥವಾ ಮರೆಮಾಚಿದ ನಿರ್ಬಂಧವನ್ನು ರೂಪಿಸಬಾರದು.

ಅಭಿವೃದ್ಧಿಶೀಲ ರಾಷ್ಟ್ರಗಳಿಗೆ ಹೆಚ್ಚು ಸಮತೋಲಿತ ಮತ್ತು ಸಮಾನ ಪ್ರಾತಿನಿಧ್ಯವನ್ನು ಖಚಿತಪಡಿಸಲು, ಹಾಗೂ ಈ ದೇಶಗಳು ಎತ್ತಿಹಿಡಿಯುವ ನೈಸರ್ಗಿಕ ಬಂಡವಾಳದ ಮೌಲ್ಯಕ್ಕೆ ಅನುಗುಣವಾಗಿ, 'ಜಾಗತಿಕ ಪರಿಸರ ಸೌಲಭ್ಯ'ದ (GEF) ಆಡಳಿತವನ್ನು ಸುಧಾರಿಸುವ ತುರ್ತು ಅಗತ್ಯವನ್ನು ನಾವು ಗಮನಿಸುತ್ತೇವೆ. ಕಾರ್ಯವಿಧಾನಗಳ ಸರಳೀಕರಣ ಮತ್ತು ಸಂಪನ್ಮೂಲಗಳಿಗೆ ಪ್ರವೇಶವನ್ನು ಸುಗಮಗೊಳಿಸುವುದನ್ನು ನಾವು ಸಹ ಬೆಂಬಲಿಸುತ್ತೇವೆ. ಮೂಲನಿವಾಸಿಗಳು ಮತ್ತು ಸ್ಥಳೀಯ ಸಮುದಾಯಗಳಂತಹ, ಪರಿಸರ ವ್ಯವಸ್ಥೆಗಳ ಸಂರಕ್ಷಣೆ ಮತ್ತು ಸುಸ್ಥಿರ ಬಳಕೆಯಲ್ಲಿ ನೇರವಾಗಿ ತೊಡಗಿಸಿಕೊಂಡವರ ಭಾಗವಹಿಸುವಿಕೆಯನ್ನೂ ನಾವು ಬೆಂಬಲಿಸುತ್ತೇವೆ. ಸುಧಾರಿತ ಧ್ವನಿ ಮತ್ತು ಮತದಾನ ಕಾರ್ಯವಿಧಾನಗಳ ಮೂಲಕ ಹಾಗೂ ಅಭಿವೃದ್ಧಿಶೀಲ ರಾಷ್ಟ್ರಗಳಿಗೆ ನಿರ್ಧಾರ-ತೆಗೆದುಕೊಳ್ಳುವಿಕೆಯಲ್ಲಿ ಸಮಾನ ಪ್ರವೇಶವನ್ನು ಒದಗಿಸುವ ಮೂಲಕ ಇದನ್ನು ಸಾಧಿಸಬಹುದು.

ಮೇ 14, 2025 ರಂದು ಬ್ರೆಸಿಲಿಯಾದಲ್ಲಿ ನಡೆದ ಎರಡನೇ ಬ್ರಿಕ್ಸ್ ಸಾರಿಗೆ ಸಚಿವರ ಸಭೆಯ ಫಲಿತಾಂಶಗಳನ್ನು ನಾವು ಸ್ವಾಗತಿಸುತ್ತೇವೆ. ಎಲ್ಲಾ ಪಾಲುದಾರರ ಬೇಡಿಕೆಗಳನ್ನು ಪೂರೈಸಲು ಮತ್ತು ಬ್ರಿಕ್ಸ್ ದೇಶಗಳ ಸಾರಿಗೆ ಸಾಮರ್ಥ್ಯವನ್ನು ಹೆಚ್ಚಿಸಲು ಸಾರಿಗೆ ಸಂವಾದವನ್ನು ಮತ್ತಷ್ಟು ಉತ್ತೇಜಿಸಲು ನಾವು ಎದುರುನೋಡುತ್ತೇವೆ. ಸಾರಿಗೆ ಸಹಕಾರವನ್ನು ನಡೆಸುವಾಗ ಎಲ್ಲಾ ಸದಸ್ಯ ರಾಷ್ಟ್ರಗಳ ಸಾರ್ವಭೌಮತ್ವ ಮತ್ತು ಪ್ರಾದೇಶಿಕ ಸಮಗ್ರತೆಯನ್ನು ಗೌರವಿಸುವುದು ಅತ್ಯಗತ್ಯ. ಆರ್ಥಿಕ ಬೆಳವಣಿಗೆ, ಸಂಪರ್ಕ, ಮತ್ತು ಪರಿಸರ ಸುಸ್ಥಿರತೆಯಲ್ಲಿ ಸುಸ್ಥಿರ ಹಾಗೂ ಸದೃಢ ಸಾರಿಗೆ ಮೂಲಸೌಕರ್ಯದ ನಿರ್ಣಾಯಕ ಪಾತ್ರವನ್ನು ಗುರುತಿಸಿ, ಅದನ್ನು ಅಭಿವೃದ್ಧಿಪಡಿಸುವ ನಮ್ಮ ಬದ್ಧತೆಯನ್ನು ನಾವು ಪುನರುಚ್ಚರಿಸುತ್ತೇವೆ. ಹೆಚ್ಚು ಸಮಾನ, ವಾಸಯೋಗ್ಯ, ಆರೋಗ್ಯಕರ, ಪೂರಕ, ಮತ್ತು ಕಡಿಮೆ ದಟ್ಟಣೆಯ ನಗರ ಪರಿಸರವನ್ನು ರಚಿಸಲು, ನಗರ ಸಾರ್ವಜನಿಕ ಸಾರಿಗೆ ವ್ಯವಸ್ಥೆಗಳ ಮತ್ತಷ್ಟು ಅಭಿವೃದ್ಧಿ ಮತ್ತು ಸಕ್ರಿಯ ಚಲನಶೀಲತೆಯ ಪ್ರೋತ್ಸಾಹದ ಮಹತ್ವವನ್ನು ನಾವು ಒತ್ತಿ ಹೇಳುತ್ತೇವೆ. ನಗರ ಚಲನಶೀಲತೆಯಲ್ಲಿ ಶೂನ್ಯ ಮತ್ತು ಕಡಿಮೆ-ಹೊರಸೂಸುವಿಕೆಯ ವಾಹನಗಳ ಬಳಕೆಯನ್ನು ಪ್ರೋತ್ಸಾಹಿಸುವ ಅಗತ್ಯವನ್ನು ಸಹ ನಾವು ಗುರುತಿಸುತ್ತೇವೆ. ವಾಯುಯಾನ ಮತ್ತು ಕಡಲ ಸಾರಿಗೆಯಲ್ಲಿ ಇಂಗಾಲದ ಹೊರಸೂಸುವಿಕೆಯನ್ನು ಕಡಿಮೆ ಮಾಡುವ ನಿಟ್ಟಿನಲ್ಲಿ ಬ್ರಿಕ್ಸ್ ಸದಸ್ಯರ ನಡುವಿನ ಸಹಕಾರದ ಮಹತ್ವವನ್ನು ನಾವು ಒತ್ತಿ ಹೇಳುತ್ತೇವೆ. ಅಂತಾರಾಷ್ಟ್ರೀಯ ವಾಯುಯಾನದಿಂದ ಇಂಗಾಲದ ಹೊರಸೂಸುವಿಕೆಯನ್ನು ಕಡಿಮೆ ಮಾಡುವ ಒಂದು ಮಾರ್ಗವಾಗಿ 'ಸುಸ್ಥಿರ ವಾಯುಯಾನ ಇಂಧನಗಳು' (SAF), ಕಡಿಮೆ ಇಂಗಾಲದ ವಾಯುಯಾನ ಇಂಧನಗಳು' (LCAF), ಮತ್ತು ಇತರ 'ಸ್ವಚ್ಛ ವಾಯುಯಾನ ಇಂಧನ'ಗಳ ಮಹತ್ವವನ್ನು ನಾವು ಗುರುತಿಸುತ್ತೇವೆ. ಸ್ವಚ್ಛ ವಾಯುಯಾನ ಇಂಧನಗಳು ಮತ್ತು ಸಂಬಂಧಿತ ತಂತ್ರಜ್ಞಾನಗಳ ಅಭಿವೃದ್ಧಿ ಮತ್ತು ಅಳವಡಿಕೆಯಲ್ಲಿ, ಬ್ರಿಕ್ಸ್ ದೇಶಗಳ ರಾಷ್ಟ್ರೀಯ ವಾಸ್ತವಗಳನ್ನು ಪರಿಗಣಿಸಿ, ಅವುಗಳ ನಡುವೆ ತಾಂತ್ರಿಕ ಸಹಕಾರವನ್ನು ನಾವು ಪ್ರೋತ್ಸಾಹಿಸುತ್ತೇವೆ. ವಾಯು ಮತ್ತು ಕಡಲ ಸಂಪರ್ಕವನ್ನು ಹೆಚ್ಚಿಸಲು, ಕಡಲ ಸಾರಿಗೆಯ ಡಿಕಾರ್ಬೊನೈಸೇಶನ್ ಅನ್ನು ಉತ್ತೇಜಿಸಲು, ಹಾಗೂ ಲಾಜಿಸ್ಟಿಕ್ಸ್ ಏಕೀಕರಣ ಮತ್ತು ನಾವೀನ್ಯತೆಯಲ್ಲಿನ ಉಪಕ್ರಮಗಳನ್ನು ಬಲಪಡಿಸಲು ಸಹಕಾರದ ಮಹತ್ವವನ್ನು ನಾವು ಒತ್ತಿ ಹೇಳುತ್ತೇವೆ.

ಮಾನವ, ಸಾಮಾಜಿಕ ಮತ್ತು ಸಾಂಸ್ಕೃತಿಕ ಅಭಿವೃದ್ಧಿಯ ಉತ್ತೇಜನಕ್ಕಾಗಿ ಸಹಭಾಗಿತ್ವ

ಜನಸಂಖ್ಯಾ ವಿಷಯಗಳ ಕುರಿತು ಬ್ರಿಕ್ಸ್ ಸಹಕಾರವನ್ನು ಬಲಪಡಿಸಲು ನಾವು ಬದ್ಧರಾಗಿದ್ದೇವೆ. ಏಕೆಂದರೆ, ಜನಸಂಖ್ಯೆಯ ವಯೋರಚನೆಯಲ್ಲಿನ ಬದಲಾವಣೆಗಳ ಗತಿಯು ಸಾಮಾಜಿಕ-ಆರ್ಥಿಕ ಅಭಿವೃದ್ಧಿಗೆ ಸವಾಲುಗಳ ಜೊತೆಗೆ ಅವಕಾಶಗಳನ್ನೂ ಒಡ್ಡುತ್ತದೆ. ವಿಶೇಷವಾಗಿ, ಮಹಿಳೆಯರು ಮತ್ತು ವಿಕಲಚೇತನ ವ್ಯಕ್ತಿಗಳ ಹಕ್ಕುಗಳು ಹಾಗೂ ಪ್ರಯೋಜನಗಳು, ಯುವಜನರ ಅಭಿವೃದ್ಧಿ, ಉದ್ಯೋಗ ಮತ್ತು ಕೆಲಸದ ಭವಿಷ್ಯ, ನಗರೀಕರಣ, ವಲಸೆ, ಹಾಗೂ ವೃದ್ಧಾಪ್ಯಕ್ಕೆ ಸಂಬಂಧಿಸಿದಂತೆ ಇದು ಮಹತ್ವದ್ದಾಗಿದೆ.

ಸಮಾನತೆ ಮತ್ತು ಪರಸ್ಪರ ಗೌರವದ ತತ್ವಗಳ ಅಡಿಯಲ್ಲಿ, ಮಾನವ ಹಕ್ಕುಗಳು ಮತ್ತು ಮೂಲಭೂತ ಸ್ವಾತಂತ್ರ್ಯಗಳನ್ನು ಉತ್ತೇಜಿಸಲು ಮತ್ತು ರಕ್ಷಿಸಲು, ಹಾಗೂ ಎಲ್ಲಾ ರೀತಿಯ ತಾರತಮ್ಯದ ವಿರುದ್ಧ ಹೋರಾಡಲು ಎಲ್ಲಾ ದೇಶಗಳು ಸಹಕರಿಸುವ ಅಗತ್ಯವನ್ನು ನಾವು ಪುನರುಚ್ಚರಿಸುತ್ತೇವೆ. ಅಭಿವೃದ್ಧಿಯ ಹಕ್ಕೂ ಸೇರಿದಂತೆ ಎಲ್ಲಾ ಮಾನವ ಹಕ್ಕುಗಳನ್ನು, ನ್ಯಾಯಯುತವಾಗಿ, ಸಮಾನವಾಗಿ, ಒಂದೇ ರೀತಿಯಲ್ಲಿ ಮತ್ತು ಒಂದೇ ಪ್ರಾಮುಖ್ಯತೆಯೊಂದಿಗೆ ಪರಿಗಣಿಸುವುದನ್ನು ಮುಂದುವರಿಸಲು ನಾವು ಒಪ್ಪುತ್ತೇವೆ. ಈ ಸಂದರ್ಭದಲ್ಲಿ, ಬ್ರಿಕ್ಸ್‌ ನೊಳಗೆ ಮತ್ತು ಬಹುಪಕ್ಷೀಯ ವೇದಿಕೆಗಳಲ್ಲಿ ಸಾಮಾನ್ಯ ಹಿತಾಸಕ್ತಿಯ ವಿಷಯಗಳ ಮೇಲೆ ಸಹಕಾರವನ್ನು ಬಲಪಡಿಸಲು ನಾವು ಒಪ್ಪುತ್ತೇವೆ. ಮಾನವ ಹಕ್ಕುಗಳನ್ನು ಆಯ್ದುಕೊಳ್ಳದೆ, ರಾಜಕೀಯಗೊಳಿಸದೆ, ಇಬ್ಬಗೆಯ ನೀತಿಗಳಿಲ್ಲದೆ, ಹಾಗೂ ರಚನಾತ್ಮಕ ಸಂವಾದ ಮತ್ತು ಸಹಕಾರದ ಮೂಲಕ ಉತ್ತೇಜಿಸುವ, ರಕ್ಷಿಸುವ ಮತ್ತು ಪೂರೈಸುವ ಅಗತ್ಯವನ್ನು ನಾವು ಗಣನೆಗೆ ತೆಗೆದುಕೊಳ್ಳುತ್ತೇವೆ. ಪ್ರಜಾಪ್ರಭುತ್ವ ಮತ್ತು ಮಾನವ ಹಕ್ಕುಗಳ ಗೌರವಕ್ಕಾಗಿ ನಾವು ಕರೆ ನೀಡುತ್ತೇವೆ. ಈ ನಿಟ್ಟಿನಲ್ಲಿ, ಅವುಗಳನ್ನು ಜಾಗತಿಕ ಆಡಳಿತದ ಮಟ್ಟದಲ್ಲಿ ಹಾಗೂ ರಾಷ್ಟ್ರೀಯ ಮಟ್ಟದಲ್ಲಿ ಅನುಷ್ಠಾನಗೊಳಿಸಬೇಕು ಎಂದು ನಾವು ಒತ್ತಿ ಹೇಳುತ್ತೇವೆ. ಪರಸ್ಪರ ಲಾಭದಾಯಕ ಸಹಕಾರವನ್ನು ಆಧರಿಸಿ ಅಂತಾರಾಷ್ಟ್ರೀಯ ಸಮುದಾಯಕ್ಕಾಗಿ ಉಜ್ವಲ ಹಂಚಿಕೆಯ ಭವಿಷ್ಯವನ್ನು ನಿರ್ಮಿಸುವ ಗುರಿಯೊಂದಿಗೆ, ಎಲ್ಲರಿಗೂ ಪ್ರಜಾಪ್ರಭುತ್ವ, ಮಾನವ ಹಕ್ಕುಗಳು ಮತ್ತು ಮೂಲಭೂತ ಸ್ವಾತಂತ್ರ್ಯಗಳ ಪ್ರೋತ್ಸಾಹ ಮತ್ತು ರಕ್ಷಣೆಯನ್ನು ಖಚಿತಪಡಿಸುವ ನಮ್ಮ ಬದ್ಧತೆಯನ್ನು ನಾವು ಪುನರುಚ್ಚರಿಸುತ್ತೇವೆ.

ಜನಾಂಗೀಯತೆ, ಜನಾಂಗೀಯ ತಾರತಮ್ಯ, ವಿದೇಶಿಯರ ಬಗೆಗಿನ ದ್ವೇಷ ಮತ್ತು ಸಂಬಂಧಿತ ಅಸಹಿಷ್ಣುತೆ, ಹಾಗೂ ಧರ್ಮ, ನಂಬಿಕೆ ಅಥವಾ ವಿಶ್ವಾಸದ ಆಧಾರದ ಮೇಲಿನ ತಾರತಮ್ಯ, ಮತ್ತು ವಿಶ್ವಾದ್ಯಂತ ಅವುಗಳ ಎಲ್ಲಾ ಸಮಕಾಲೀನ ರೂಪಗಳ ವಿರುದ್ಧದ ಹೋರಾಟವನ್ನು ತೀವ್ರಗೊಳಿಸುವ ಅಗತ್ಯವನ್ನು ನಾವು ಪುನರುಚ್ಚರಿಸುತ್ತೇವೆ. ಹೆಚ್ಚುತ್ತಿರುವ ದ್ವೇಷ ಭಾಷಣ, ದುರುದ್ದೇಶಪೂರಿತ ತಪ್ಪು ಮಾಹಿತಿ ಮತ್ತು ತಪ್ಪು ಮಾಹಿತಿಯ ಆತಂಕಕಾರಿ ಪ್ರವೃತ್ತಿಗಳೂ ಇದರಲ್ಲಿ ಸೇರಿವೆ. ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯು 'ಆಫ್ರಿಕನ್ ಮೂಲದ ಜನರಿಗಾಗಿ ಎರಡನೇ ಅಂತಾರಾಷ್ಟ್ರೀಯ ದಶಕ (2025 - 2034)'ವನ್ನು ಘೋಷಿಸಿರುವುದನ್ನು ನಾವು ಸ್ವಾಗತಿಸುತ್ತೇವೆ. 2025 ನೇ ಇಸವಿಯನ್ನು "ಪರಿಹಾರಗಳ ಮೂಲಕ ಆಫ್ರಿಕನ್ನರು ಮತ್ತು ಆಫ್ರಿಕನ್ ಮೂಲದ ಜನರಿಗೆ ನ್ಯಾಯ" ವರ್ಷವೆಂದು ಗೊತ್ತುಪಡಿಸಿದ ಆಫ್ರಿಕನ್ ಒಕ್ಕೂಟದ ನಿರ್ಧಾರವನ್ನು ನಾವು ಸ್ವಾಗತಿಸುತ್ತೇವೆ. ವಸಾಹತುಶಾಹಿ ಮತ್ತು ಗುಲಾಮರ ವ್ಯಾಪಾರದ ವಿನಾಶಕಾರಿ ಪರಂಪರೆಯನ್ನು ಎದುರಿಸಲು ಆಫ್ರಿಕನ್ ಒಕ್ಕೂಟ ಮಾಡುತ್ತಿರುವ ಪ್ರಯತ್ನಗಳನ್ನು ನಾವು ಗುರುತಿಸುತ್ತೇವೆ.

ಬೀಜಿಂಗ್ ಘೋಷಣೆ ಮತ್ತು ಕ್ರಿಯಾ ವೇದಿಕೆಯ (Beijing Declaration and Platform for Action) 30ನೇ ವಾರ್ಷಿಕೋತ್ಸವದ ಸಂದರ್ಭದಲ್ಲಿ, ಎಲ್ಲಾ ಕ್ಷೇತ್ರಗಳಲ್ಲಿ ಮಹಿಳೆಯರ ಹಕ್ಕುಗಳು ಮತ್ತು ನಾಯಕತ್ವವನ್ನು ಮುನ್ನಡೆಸುವ ನಮ್ಮ ಬದ್ಧತೆಯನ್ನು ನಾವು ಪುನರುಚ್ಚರಿಸುತ್ತೇವೆ. ಮಹಿಳಾ ಸಬಲೀಕರಣ ಮತ್ತು ಸಮಾಜದ ಎಲ್ಲಾ ಕ್ಷೇತ್ರಗಳಲ್ಲಿ ಅವರ ಸಂಪೂರ್ಣ, ಸಮಾನ ಮತ್ತು ಅರ್ಥಪೂರ್ಣ ಭಾಗವಹಿಸುವಿಕೆಯನ್ನು ಖಚಿತಪಡಿಸಿಕೊಳ್ಳುವ ಮಹತ್ವವನ್ನು ನಾವು ಒತ್ತಿಹೇಳುತ್ತೇವೆ. ಇದರಲ್ಲಿ ಶಿಕ್ಷಣ ಮತ್ತು ವ್ಯಾಪಾರಕ್ಕೆ ಪ್ರವೇಶ, ಹಾಗೂ ಸಮಾನತೆ, ಅಭಿವೃದ್ಧಿ ಮತ್ತು ಶಾಂತಿಯ ಸಾಧನೆಗೆ ಮೂಲಭೂತವಾದ ನಿರ್ಧಾರ ತೆಗೆದುಕೊಳ್ಳುವ ಪ್ರಕ್ರಿಯೆಗಳಲ್ಲಿ ಅವರ ಸಕ್ರಿಯ ಭಾಗವಹಿಸುವಿಕೆ ಸೇರಿವೆ. ಸುಸ್ಥಿರ ಅಭಿವೃದ್ಧಿ, ಹವಾಮಾನ ಕ್ರಮ ಮತ್ತು ಉದ್ಯಮಶೀಲತೆಯಲ್ಲಿ, ವಿಶೇಷವಾಗಿ ಜಾಗತಿಕ ದಕ್ಷಿಣದಲ್ಲಿ, ಮಹಿಳೆಯರು ಮತ್ತು ಹೆಣ್ಣುಮಕ್ಕಳ ಪಾತ್ರವನ್ನು ನಾವು ಒತ್ತಿಹೇಳುತ್ತೇವೆ. ಬ್ರೆಜಿಲ್ ಅಧ್ಯಕ್ಷತೆಯಲ್ಲಿ ಆನ್‌ಲೈನ್ ದ್ವೇಷ ಮತ್ತು ತಪ್ಪು ಮಾಹಿತಿ ಮಹಿಳೆಯರ ಮೇಲೆ ಬೀರುವ ಪರಿಣಾಮಗಳಿಗೆ ಸಂಬಂಧಿಸಿದ ಚರ್ಚೆಗಳನ್ನು ನಾವು ಗುರುತಿಸುತ್ತೇವೆ. ಡಿಜಿಟಲ್ ಅಂತರವನ್ನು , ಲಿಂಗ ಡಿಜಿಟಲ್ ಅಂತರವನ್ನು  ಒಳಗೊಂಡಂತೆ, ಕಡಿಮೆ ಮಾಡುವಲ್ಲಿ ಮಹಿಳೆಯರ ಸುರಕ್ಷತೆ, ಧ್ವನಿ ಮತ್ತು ಸಕ್ರಿಯ ಭಾಗವಹಿಸುವಿಕೆಯನ್ನು ಖಚಿತಪಡಿಸಿಕೊಳ್ಳುವ ಅಗತ್ಯವನ್ನು ನಾವು ಒತ್ತಿಹೇಳುತ್ತೇವೆ. ಕೈಗೆಟುಕುವ ಮಕ್ಕಳ ಆರೈಕೆಗೆ ಪ್ರವೇಶವನ್ನು ವಿಸ್ತರಿಸುವುದು, STEM (ವಿಜ್ಞಾನ, ತಂತ್ರಜ್ಞಾನ, ಎಂಜಿನಿಯರಿಂಗ್, ಗಣಿತ) ಕ್ಷೇತ್ರಗಳಲ್ಲಿ ಮಹಿಳೆಯರ ನಾಯಕತ್ವವನ್ನು ಉತ್ತೇಜಿಸುವುದು ಮತ್ತು ಕೆಲಸದ ಸ್ಥಳದಲ್ಲಿ ತಾರತಮ್ಯ ಮತ್ತು ಎಲ್ಲಾ ರೀತಿಯ ಹಿಂಸೆಯ ವಿರುದ್ಧ ಮಹಿಳೆಯರಿಗೆ ಕಾನೂನು ರಕ್ಷಣೆಯನ್ನು ಬಲಪಡಿಸುವಂತಹ ನೀತಿ ಕ್ರಮಗಳ ಮೂಲಕ ಆರ್ಥಿಕತೆಯಲ್ಲಿ ಮಹಿಳೆಯರ ಸಂಪೂರ್ಣ ಮತ್ತು ಸಮಾನ ಭಾಗವಹಿಸುವಿಕೆಯನ್ನು ಮುನ್ನಡೆಸಲು ನಾವು ಬದ್ಧರಾಗಿದ್ದೇವೆ.

ಜೂನ್ 17, 2025 ರಂದು ಬ್ರೆಸಿಲಿಯಾದಲ್ಲಿ ನಡೆದ XVನೇ ಬ್ರಿಕ್ಸ್ ಆರೋಗ್ಯ ಸಚಿವರ ಸಭೆಯ ಸಂದರ್ಭದಲ್ಲಿ ಸಾಧಿಸಿದ ಪ್ರಗತಿಯನ್ನು ಮತ್ತು ಆರೋಗ್ಯ ಸಹಕಾರವನ್ನು ಬಲಪಡಿಸಲು ಮಾಡಿದ ಬದ್ಧತೆಗಳನ್ನು ನಾವು ಶ್ಲಾಘನೆಯೊಂದಿಗೆ ಗಮನಿಸುತ್ತೇವೆ. ಬ್ರಿಕ್ಸ್ ಆರೋಗ್ಯ ಸಂಸ್ಥೆಗಳ ನಡುವೆ ನಿಕಟ ಸಂಬಂಧಗಳನ್ನು ಪೋಷಿಸುವುದನ್ನು ನಾವು ಸ್ವಾಗತಿಸುತ್ತೇವೆ. 'ಬ್ರಿಕ್ಸ್ ಲಸಿಕೆ ಸಂಶೋಧನೆ ಮತ್ತು ಅಭಿವೃದ್ಧಿ ಕೇಂದ್ರ'ದ ಉಪಕ್ರಮಗಳನ್ನು ನಾವು ಬೆಂಬಲಿಸುತ್ತೇವೆ. ಇದರಲ್ಲಿ 'ಎಲೆಕ್ಟ್ರಾನಿಕ್ ಸಂಶೋಧನೆ ಮತ್ತು ಅಭಿವೃದ್ಧಿ ಸ್ಟಾಕ್', 'ಬ್ರಿಕ್ಸ್ ಕ್ಷಯರೋಗ ಸಂಶೋಧನಾ ಜಾಲ'ದ ಕಾರ್ಯಾಚರಣೆಗಳು, ಹಾಗೂ ಆರೋಗ್ಯ ವ್ಯವಸ್ಥೆಗಳಲ್ಲಿ ಕೃತಕ ಬುದ್ಧಿಮತ್ತೆಯ ನೈತಿಕ ಮತ್ತು ಪರಿಣಾಮಕಾರಿ ಬಳಕೆ ಮತ್ತು ಸದೃಢ ದತ್ತಾಂಶ ಆಡಳಿತವನ್ನು ಖಚಿತಪಡಿಸುವ ಉಪಕ್ರಮಗಳು ಸೇರಿವೆ. ಸದೃಢ, ಸಮಾನ, ಮತ್ತು ಎಲ್ಲರನ್ನೂ ಒಳಗೊಂಡ ಆರೋಗ್ಯ ವ್ಯವಸ್ಥೆಗಳನ್ನು ಉತ್ತೇಜಿಸುವಲ್ಲಿ ಈ ಕ್ರಮಗಳ ಮಹತ್ವವನ್ನು ನಾವು ಪುನರುಚ್ಚರಿಸುತ್ತೇವೆ. ಸಾರ್ವತ್ರಿಕ ಆರೋಗ್ಯ ರಕ್ಷಣೆಯನ್ನು ಸಾಧಿಸುವುದು ಮತ್ತು ಔಷಧಿಗಳು, ಲಸಿಕೆಗಳು ಹಾಗೂ ರೋಗನಿರ್ಣಯಗಳೂ ಸೇರಿದಂತೆ, ಅಗತ್ಯ ಆರೋಗ್ಯ ಸರಕುಗಳು ಮತ್ತು ಆರೋಗ್ಯ ಸೇವೆಗಳಿಗೆ ನ್ಯಾಯಯುತ ಹಾಗೂ ಸಮಯೋಚಿತ ಪ್ರವೇಶವನ್ನು ಖಚಿತಪಡಿಸುವುದು ಇದರ ಗುರಿಯಾಗಿದೆ. ಕ್ಷಯರೋಗ (TB) ಮತ್ತು ಆಂಟಿಮೈಕ್ರೋಬಿಯಲ್ ರೆಸಿಸ್ಟೆನ್ಸ್ (AMR) ಅನ್ನು ಎದುರಿಸುವುದು, ಸಾಂಕ್ರಾಮಿಕ ಮತ್ತು ಅಸಾಂಕ್ರಾಮಿಕ ರೋಗಗಳನ್ನು ತಡೆಗಟ್ಟುವಲ್ಲಿ ಸಾಮರ್ಥ್ಯಗಳನ್ನು ಬಲಪಡಿಸುವುದು, ಹಾಗೂ ಸಾಂಪ್ರದಾಯಿಕ ವೈದ್ಯ ಪದ್ಧತಿಗಳು ಮತ್ತು ಡಿಜಿಟಲ್ ಆರೋಗ್ಯ ಸೇರಿದಂತೆ ಇತರ ಆರೋಗ್ಯ ಸಮಸ್ಯೆಗಳ ಬಗ್ಗೆ ಅನುಭವ ಹಂಚಿಕೊಳ್ಳುವಲ್ಲಿನ ಬ್ರಿಕ್ಸ್ ಸಹಕಾರವು, ಸಂಬಂಧಿತ ಅಂತಾರಾಷ್ಟ್ರೀಯ ಪ್ರಯತ್ನಗಳಿಗೆ ಹೆಚ್ಚಿನ ಕೊಡುಗೆ ನೀಡುತ್ತದೆ ಎಂಬುದನ್ನು ನಾವು ಅಂಗೀಕರಿಸುತ್ತೇವೆ. ಬ್ರಿಕ್ಸ್ ದೇಶಗಳ ಉನ್ನತ ಮಟ್ಟದ ಸಾರ್ವಜನಿಕ ಆರೋಗ್ಯ ಸಂಸ್ಥೆಗಳ ನಡುವಿನ ಸಹಯೋಗಕ್ಕಾಗಿ 'ಸಾರ್ವಜನಿಕ ಆರೋಗ್ಯ ವ್ಯವಸ್ಥೆಗಳಲ್ಲಿನ ಸಂಶೋಧನೆಯ ಬ್ರಿಕ್ಸ್ ಜಾಲ'ವು ಒಂದು ಪ್ರಮುಖ ವೇದಿಕೆಯಾಗಿದೆ ಎಂದು ನಾವು ಗುರುತಿಸುತ್ತೇವೆ. 'ಬ್ರಿಕ್ಸ್ ನ್ಯೂಕ್ಲಿಯರ್ ಮೆಡಿಸಿನ್ ಕಾರ್ಯಪಡೆ'ಯ ಚೌಕಟ್ಟಿನೊಳಗೆ, ನ್ಯೂಕ್ಲಿಯರ್ ಮೆಡಿಸಿನ್ ಮತ್ತು ರೇಡಿಯೋ ಫಾರ್ಮಸಿ ಕ್ಷೇತ್ರದಲ್ಲಿ ಸಹಕಾರದ ಅಗತ್ಯವನ್ನು ನಾವು ಅಂಗೀಕರಿಸುತ್ತೇವೆ. 'ಬ್ರಿಕ್ಸ್ ವೈದ್ಯಕೀಯ ಉತ್ಪನ್ನಗಳ ನಿಯಂತ್ರಕ ಪ್ರಾಧಿಕಾರ'ಗಳ ಉಪಕ್ರಮದ ಮೂಲಕ ಸ್ವಯಂಪ್ರೇರಿತ ನಿಯಂತ್ರಕ ಒಮ್ಮುಖತೆಯನ್ನು ಮುಂದುವರಿಸುವ ಮಹತ್ವವನ್ನು ಸಹ ನಾವು ಒತ್ತಿ ಹೇಳುತ್ತೇವೆ.

'ಸಾಮಾಜಿಕವಾಗಿ-ನಿರ್ಧರಿತ ರೋಗಗಳ ನಿರ್ಮೂಲನೆಗಾಗಿ ಸಹಭಾಗಿತ್ವ'ದ ಅಭಿವೃದ್ಧಿಯತ್ತ ಕೈಗೊಂಡ ಪ್ರಯತ್ನಗಳನ್ನು ನಾವು ಶ್ಲಾಘಿಸುತ್ತೇವೆ. ಆರೋಗ್ಯ ಸಮಾನತೆಯನ್ನು ಮುಂದುವರಿಸಲು ಮತ್ತು ಜಾಗತಿಕ ಆರೋಗ್ಯ ವ್ಯವಸ್ಥೆಯನ್ನು ಬಲಪಡಿಸಲು ನಮ್ಮ ಹಂಚಿಕೆಯ ಬದ್ಧತೆಯನ್ನು ಪ್ರತಿಬಿಂಬಿಸುವ ಒಂದು ಮೈಲಿಗಲ್ಲಾಗಿ ಈ ಉಪಕ್ರಮವನ್ನು ನಾವು ಪ್ರಾರಂಭಿಸುತ್ತಿದ್ದೇವೆ. ಸಮಗ್ರ, ಬಹು-ವಲಯದ ಪ್ರತಿಕ್ರಿಯೆಗಳಿಗೆ ಆದ್ಯತೆ ನೀಡುವ ಮೂಲಕ, ಬಡತನ ಮತ್ತು ಸಾಮಾಜಿಕ ಬಹಿಷ್ಕಾರದಂತಹ ಆರೋಗ್ಯ ಅಸಮಾನತೆಗಳ ಮೂಲ ಕಾರಣಗಳನ್ನು ನಿಭಾಯಿಸುವ ಗುರಿ ಹೊಂದಿದ್ದೇವೆ. ಎಲ್ಲರಿಗೂ ಆರೋಗ್ಯಕರ ಭವಿಷ್ಯವನ್ನು ಖಚಿತಪಡಿಸಲು ಸಹಕಾರವನ್ನು ಹೆಚ್ಚಿಸುವುದು, ಸಂಪನ್ಮೂಲಗಳನ್ನು ಕ್ರೋಢೀಕರಿಸುವುದು, ಮತ್ತು ನಾವೀನ್ಯತೆಯನ್ನು ಪೋಷಿಸುವುದು ನಮ್ಮ ಉದ್ದೇಶವಾಗಿದೆ.

ಸಾರ್ವತ್ರಿಕ ಆರೋಗ್ಯ ರಕ್ಷಣೆ ಮತ್ತು ಆರೋಗ್ಯ ವ್ಯವಸ್ಥೆಯ ಸದೃಢತೆಗೆ, ಹಾಗೂ ಸಾರ್ವಜನಿಕ ಆರೋಗ್ಯ ತುರ್ತುಸ್ಥಿತಿಗಳ ತಡೆಗಟ್ಟುವಿಕೆ ಮತ್ತು ಪ್ರತಿಕ್ರಿಯೆಗೆ, ಪ್ರಾಥಮಿಕ ಆರೋಗ್ಯ ಸೇವೆಯು ಒಂದು ಪ್ರಮುಖ ಅಡಿಪಾಯವಾಗಿದೆ ಎಂಬುದರ ಮೂಲಭೂತ ಪಾತ್ರವನ್ನು ನಾವು ಗುರುತಿಸುತ್ತೇವೆ. 'ಅಸಾಂಕ್ರಾಮಿಕ ರೋಗಗಳ ತಡೆಗಟ್ಟುವಿಕೆ ಮತ್ತು ನಿಯಂತ್ರಣ' ಹಾಗೂ 'ಮಾನಸಿಕ ಆರೋಗ್ಯ ಯೋಗಕ್ಷೇಮದ ಪ್ರೋತ್ಸಾಹ' ಕುರಿತ ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯ 4ನೇ ಉನ್ನತ ಮಟ್ಟದ ಸಭೆಯ ಯಶಸ್ವಿ ಆಯೋಜನೆಯನ್ನು ನಾವು ಎದುರುನೋಡುತ್ತೇವೆ. ಈ ರೋಗಗಳ ತಡೆಗಟ್ಟುವಿಕೆ, ಪತ್ತೆ ಮತ್ತು ಚಿಕಿತ್ಸೆಯ ಪ್ರಮುಖ ಅಂಶಗಳನ್ನು ಈ ಸಭೆಯು ಚರ್ಚಿಸಬೇಕು.

ಬ್ರಿಕ್ಸ್‌ ಶಿಕ್ಷಣ ಮಂತ್ರಿಗಳ ಸಭೆಯಲ್ಲಿ ಬ್ರಿಕ್ಸ್‌ ತಾಂತ್ರಿಕ ಮತ್ತು ವೃತ್ತಿಪರ ಶಿಕ್ಷಣ ಮತ್ತು ತರಬೇತಿ (TVET) ಸಹಕಾರ ಒಕ್ಕೂಟದ ಅಳವಡಿಕೆಯನ್ನು ನಾವು ಸ್ವಾಗತಿಸುತ್ತೇವೆ. ಈ ಒಡಂಬಡಿಕೆಯು ತಾಂತ್ರಿಕ ಮತ್ತು ವೃತ್ತಿಪರ ಶಿಕ್ಷಣ ಹಾಗೂ ತರಬೇತಿಯನ್ನು ಹೆಚ್ಚಿಸುವ ನಮ್ಮ ಸಾಮೂಹಿಕ ಬದ್ಧತೆಯನ್ನು ಪುನರುಚ್ಚರಿಸುತ್ತದೆ. ಇದು ನಮ್ಮ ರಾಷ್ಟ್ರಗಳಲ್ಲಿ ಸುಸ್ಥಿರ ಅಭಿವೃದ್ಧಿಯನ್ನು ಮುನ್ನಡೆಸುವ ಮತ್ತು ಸಾಮಾಜಿಕ ಸೇರ್ಪಡೆಯನ್ನು ಉತ್ತೇಜಿಸುವಲ್ಲಿ ಒಂದು ಕಾರ್ಯತಂತ್ರದ ಆದ್ಯತೆಯಾಗಿ ಉಳಿದಿದೆ. ಬ್ರಿಕ್ಸ್‌ ನೆಟ್‌ವರ್ಕ್ ವಿಶ್ವವಿದ್ಯಾಲಯದ (BRICS Network University - BRICS-NU) ಗಣನೀಯ ಸಾಂಸ್ಥಿಕ ಬಲವರ್ಧನೆಯನ್ನು ನಾವು ಸಂತೃಪ್ತಿಯಿಂದ ಒಪ್ಪಿಕೊಳ್ಳುತ್ತೇವೆ. ಇದು ತನ್ನ 10ನೇ ವಾರ್ಷಿಕೋತ್ಸವವನ್ನು ಆಚರಿಸುತ್ತಿದ್ದು, ಪ್ರತಿ ದೇಶದಿಂದ ಭಾಗವಹಿಸುವ ಸಂಸ್ಥೆಗಳ ಸಂಖ್ಯೆಯಲ್ಲಿ ಸುಧಾರಣೆ, ಹೊಸ ಸದಸ್ಯ ರಾಷ್ಟ್ರಗಳ ಒಳಗೊಳ್ಳುವಿಕೆ ಮತ್ತು ಸಹಕಾರಕ್ಕಾಗಿ ವಿಷಯಾಧಾರಿತ ಕ್ಷೇತ್ರಗಳ ವೈವಿಧ್ಯೀಕರಣದೊಂದಿಗೆ ಗಮನಾರ್ಹ ಪ್ರಗತಿ ಸಾಧಿಸಿದೆ. ನಮ್ಮ ಶೈಕ್ಷಣಿಕ ಸಂಸ್ಥೆಗಳ ನಡುವೆ ನೇರ ಸಂವಾದವನ್ನು ಉತ್ತೇಜಿಸುವಲ್ಲಿ BRICS-NU ನ ಪ್ರಮುಖ ಕೊಡುಗೆಗಳನ್ನು ನಾವು ಗುರುತಿಸುತ್ತೇವೆ ಮತ್ತು ಮುಂದಿನ ವರ್ಷಗಳಲ್ಲಿ ಈ ವಿನಿಮಯಗಳನ್ನು ಮತ್ತಷ್ಟು ಬಲಪಡಿಸಲು ಎದುರು ನೋಡುತ್ತಿದ್ದೇವೆ. ಬ್ರಿಕ್ಸ್‌ ವಿಶ್ವವಿದ್ಯಾಲಯಗಳಿಗೆ ಸಮಗ್ರ ಗುಣಮಟ್ಟದ ಮೌಲ್ಯಮಾಪನ ವ್ಯವಸ್ಥೆಯನ್ನು ಮತ್ತಷ್ಟು ಅನ್ವೇಷಿಸಲು ಮತ್ತು ಬ್ರಿಕ್ಸ್‌ ಒಳಗೆ ಅದರ ಮಾನ್ಯತೆಗಾಗಿ ಗುಣಮಟ್ಟದ ಶಿಕ್ಷಣವನ್ನು ಖಚಿತಪಡಿಸಿಕೊಳ್ಳಲು ನಾವು ನಮ್ಮ ಬದ್ಧತೆಯನ್ನು ಪುನರುಚ್ಚರಿಸುತ್ತೇವೆ.

'ಸಂಸ್ಕೃತಿ ಕುರಿತ ಬ್ರಿಕ್ಸ್ ಕಾರ್ಯಪಡೆ'ಯೊಳಗೆ, ಸಾಂಸ್ಕೃತಿಕ ಮತ್ತು ಸೃಜನಶೀಲ ಕೈಗಾರಿಕೆಗಳು ಹಾಗೂ ಸೃಜನಶೀಲ ಆರ್ಥಿಕತೆಯ ಕುರಿತ ಒಂದು ಬ್ರಿಕ್ಸ್ ವೇದಿಕೆಯ ಸ್ಥಾಪನೆಯನ್ನು ನಾವು ಸ್ವಾಗತಿಸುತ್ತೇವೆ. ಒಟ್ಟಾರೆ ಆರ್ಥಿಕತೆಗೆ ಸಾಂಸ್ಕೃತಿಕ ಮತ್ತು ಸೃಜನಶೀಲ ವಲಯಗಳ ಬೆಳೆಯುತ್ತಿರುವ ಆರ್ಥಿಕ ಪ್ರಾಮುಖ್ಯತೆ ಮತ್ತು ಕೊಡುಗೆಯನ್ನು ಗುರುತಿಸಿ, ಬ್ರಿಕ್ಸ್ ಸದಸ್ಯ ರಾಷ್ಟ್ರಗಳ ಸಾಂಸ್ಕೃತಿಕ ಹಾಗೂ ಸೃಜನಶೀಲ ಆರ್ಥಿಕತೆಗಳನ್ನು ಬೆಂಬಲಿಸಲು ಮತ್ತು ಪೋಷಿಸಲು ಕಾರ್ಯಕ್ರಮಗಳನ್ನು ರೂಪಿಸಲು ಸದಸ್ಯರನ್ನು, ಅವರ ಸಾಂಸ್ಕೃತಿಕ ಸಂಸ್ಥೆಗಳನ್ನು ಮತ್ತು ಹಣಕಾಸು ಸಂಸ್ಥೆಗಳನ್ನು ನಾವು ಪ್ರೋತ್ಸಾಹಿಸುತ್ತೇವೆ.

ಸಾಂಸ್ಕೃತಿಕ ಆಸ್ತಿ ಮತ್ತು ಪರಂಪರೆಯನ್ನು ಅವುಗಳ ಮೂಲ ದೇಶಗಳಿಗೆ ಹಿಂದಿರುಗಿಸುವುದರ ಮಹತ್ವವನ್ನು ನಾವು ಒತ್ತಿ ಹೇಳುತ್ತೇವೆ. ಶ್ರೇಣೀಕೃತ-ವಲ್ಲದ, ಸಹಕಾರಿ ಆಧಾರದ ಮೇಲೆ ಅಂತಾರಾಷ್ಟ್ರೀಯ ಸಂಬಂಧಗಳನ್ನು ಪುನರ್ನಿರ್ಮಿಸುವಲ್ಲಿ ಅದರ ಸಾಮರ್ಥ್ಯವನ್ನು ನಾವು ಗುರುತಿಸುತ್ತೇವೆ. ಸಾಮಾಜಿಕ ಒಗ್ಗಟ್ಟು, ಸಾಂಸ್ಕೃತಿಕ ಮತ್ತು ಐತಿಹಾಸಿಕ ನ್ಯಾಯ, ಸಂಧಾನ, ಹಾಗೂ ಸಾಮೂಹಿಕ ಸ್ಮರಣೆಯನ್ನು ಉತ್ತೇಜಿಸುವ ಒಂದು ಮಾರ್ಗವಾಗಿ, ಈ ವಿಷಯದ ಮೇಲೆ ಹೆಚ್ಚು ಸದೃಢವಾದ ಅಂತಾರಾಷ್ಟ್ರೀಯ ಚೌಕಟ್ಟಿನ ಅಗತ್ಯವಿದೆ ಎಂದು ನಾವು ಗುರುತಿಸುತ್ತೇವೆ.

ಸಮಕಾಲೀನ ಸವಾಲುಗಳು ಮತ್ತು ಪರಿವರ್ತನೆಗಳ ಸಂಕೀರ್ಣತೆಯನ್ನು ಗಮನದಲ್ಲಿಟ್ಟುಕೊಂಡು, ಶಿಕ್ಷಣ, ವಿಜ್ಞಾನ, ಸಂಸ್ಕೃತಿ, ಸಂವಹನ ಮತ್ತು ಮಾಹಿತಿ ಕ್ಷೇತ್ರಗಳಲ್ಲಿ ಅಂತಾರಾಷ್ಟ್ರೀಯ ಸಹಕಾರವನ್ನು ಹೆಚ್ಚಿಸುವ ನಮ್ಮ ಬದ್ಧತೆಯನ್ನು ನಾವು ಒತ್ತಿ ಹೇಳುತ್ತೇವೆ. ಈ ನಿಟ್ಟಿನಲ್ಲಿ, ಯುನೆಸ್ಕೋ ಸಂವಿಧಾನದಲ್ಲಿ ಪ್ರತಿಪಾದಿಸಲಾದ ತತ್ವಗಳ ಪ್ರಾಮುಖ್ಯತೆಯನ್ನು ನಾವು ಗಮನಿಸುತ್ತೇವೆ. ಸಮಾನತೆ, ಸಂವಾದ, ಕಡ್ಡಾಯಗೊಳಿಸಿದ ಕಾರ್ಯಕ್ರಮ ಚಟುವಟಿಕೆಗಳು ಮತ್ತು ಒಮ್ಮತದ ಸ್ಪೂರ್ತಿಯನ್ನು ಆಧರಿಸಿದ ಅಂತಾರಾಷ್ಟ್ರೀಯ ಸಹಯೋಗದ ಮೂಲಕ ಸಹಕಾರ ಹಾಗೂ ಶಾಂತಿಯನ್ನು ಪೋಷಿಸುವ ಅದರ ಆದೇಶವನ್ನು ನಾವು ಗೌರವಿಸುತ್ತೇವೆ. ಸಾಂಸ್ಕೃತಿಕ ಪರಂಪರೆ ಮತ್ತು ಸಂಸ್ಕೃತಿಯನ್ನು ಸಂರಕ್ಷಿಸುವ ಕ್ಷೇತ್ರಗಳಲ್ಲಿ ಬ್ರಿಕ್ಸ್ ಸಹಕಾರದ ಮಹತ್ವವನ್ನು ನಾವು ಒತ್ತಿ ಹೇಳುತ್ತೇವೆ. 'ಯುನೆಸ್ಕೋದ ಸಾಂಸ್ಕೃತಿಕ ನೀತಿಗಳು ಮತ್ತು ಸುಸ್ಥಿರ ಅಭಿವೃದ್ಧಿ ಕುರಿತ ವಿಶ್ವ ಸಮ್ಮೇಳನ' ಹಾಗೂ G20 ನವದೆಹಲಿ ಮತ್ತು ರಿಯೋ ಡಿ ಜನೈರೋ ನಾಯಕರ ಘೋಷಣೆಗಳೆರಡನ್ನೂ ಸ್ಮರಿಸುತ್ತಾ, ಸಂಸ್ಕೃತಿಯ ಶಕ್ತಿಯನ್ನು ನಾವು ಗುರುತಿಸುತ್ತೇವೆ. ಸೃಜನಶೀಲತೆ, ನಾವೀನ್ಯತೆ ಮತ್ತು ಎಲ್ಲರನ್ನೂ ಒಳಗೊಂಡ ಆರ್ಥಿಕ ಬೆಳವಣಿಗೆ ಸೇರಿದಂತೆ, ಸುಸ್ಥಿರ ಅಭಿವೃದ್ಧಿಗೆ ಸಂಸ್ಕೃತಿಯು ಒಂದು ವೇಗವರ್ಧಕವಾಗಿದೆ. ಹಾಗೆಯೇ, ಎಲ್ಲಾ ಆಯಾಮಗಳಲ್ಲಿ ಮತ್ತು ಎಲ್ಲಾ ದೃಷ್ಟಿಕೋನಗಳಿಂದ ಒಗ್ಗಟ್ಟು, ಸಂವಾದ, ಸಹಯೋಗ ಮತ್ತು ಸಹಕಾರವನ್ನು ಪೋಷಿಸುವಲ್ಲಿ ಅದರ ಅಂತರ್ಗತ ಮೌಲ್ಯವನ್ನು ನಾವು ಗುರುತಿಸುತ್ತೇವೆ.

ಎಲ್ಲಾ ಬ್ರಿಕ್ಸ್ ದೇಶಗಳು ಶ್ರೀಮಂತ ಸಾಂಪ್ರದಾಯಿಕ ಕ್ರೀಡಾ ಸಂಸ್ಕೃತಿಯನ್ನು ಹೊಂದಿವೆ ಎಂದು ನಾವು ಒತ್ತಿ ಹೇಳುತ್ತೇವೆ ಮತ್ತು ಬ್ರಿಕ್ಸ್ ದೇಶಗಳಲ್ಲಿ ಹಾಗೂ ಪ್ರಪಂಚದಾದ್ಯಂತ ಸಾಂಪ್ರದಾಯಿಕ, ಸ್ಥಳೀಯ ಮತ್ತು ದೇಶೀಯ ಕ್ರೀಡೆಗಳ ಪ್ರೋತ್ಸಾಹದಲ್ಲಿ ಪರಸ್ಪರ ಬೆಂಬಲಿಸಲು ನಾವು ಒಪ್ಪುತ್ತೇವೆ. ಕ್ರೀಡೆಯ ವಿವಿಧ ಕ್ಷೇತ್ರಗಳಲ್ಲಿ ಸಹಕಾರವನ್ನು ಹೆಚ್ಚಿಸುವುದರ ಮಹತ್ವವನ್ನು ಸಹ ನಾವು ಒತ್ತಿ ಹೇಳುತ್ತೇವೆ. ರಾಷ್ಟ್ರೀಯ, ಸಾಂಪ್ರದಾಯಿಕ ಮತ್ತು ಒಲಿಂಪಿಕ್-ಯೇತರ ಕ್ರೀಡೆಗಳ ಅಭಿವೃದ್ಧಿ, ಬ್ರಿಕ್ಸ್ ದೇಶಗಳ ಭೂಪ್ರದೇಶದಲ್ಲಿ ನಡೆಯುವ ಅಂತಾರಾಷ್ಟ್ರೀಯ ಕ್ರೀಡಾಕೂಟಗಳಲ್ಲಿ ಭಾಗವಹಿಸಲು ಕ್ರೀಡಾಪಟುಗಳನ್ನು ಪ್ರೋತ್ಸಾಹಿಸುವುದು, ಹಾಗೂ ದೈಹಿಕ ಸಂಸ್ಕೃತಿ ಮತ್ತು ಕ್ರೀಡಾ ಕ್ಷೇತ್ರದಲ್ಲಿ ಸಾಮಾನ್ಯ ಕಾಳಜಿಯ ವಿಷಯಗಳ ಕುರಿತು ಅಭಿಪ್ರಾಯ ವಿನಿಮಯ ಮಾಡಿಕೊಳ್ಳುವುದು ಇದರಲ್ಲಿ ಸೇರಿದೆ. ಬ್ರಿಕ್ಸ್ ಕ್ರೀಡಾ ಸಚಿವರ ಸಭೆಯ ಸಂದರ್ಭದಲ್ಲಿ, 'ದೈಹಿಕ ಸಂಸ್ಕೃತಿ ಮತ್ತು ಕ್ರೀಡಾ ಕ್ಷೇತ್ರದಲ್ಲಿನ ಸಹಕಾರ ಕುರಿತ ತಿಳುವಳಿಕಾ ಒಪ್ಪಂದ'ದ ಅಂಗೀಕಾರವನ್ನು ನಾವು ಸ್ವಾಗತಿಸುತ್ತೇವೆ. ಅದರ ಅನುಷ್ಠಾನವನ್ನು ಬೆಂಬಲಿಸಲು 'ಬ್ರಿಕ್ಸ್ ರಾಷ್ಟ್ರಗಳ ಕ್ರೀಡಾ ಸಹಕಾರ ಚೌಕಟ್ಟು' ಒಂದರ ಅವಶ್ಯಕತೆಯನ್ನು ನಾವು ಅಂಗೀಕರಿಸುತ್ತೇವೆ.

ಸುಸ್ಥಿರ ಅಭಿವೃದ್ಧಿ ಮತ್ತು ಮಾನವ-ಕೇಂದ್ರಿತ ಕಾರ್ಮಿಕ ಮಾರುಕಟ್ಟೆಗಳ ಮೂಲಕ ಉತ್ತಮ ಗುಣಮಟ್ಟದ, ಪೂರ್ಣ ಮತ್ತು ಉತ್ಪಾದಕ ಉದ್ಯೋಗಗಳನ್ನು ಉತ್ತೇಜಿಸುವಲ್ಲಿ BRICS ರಾಷ್ಟ್ರಗಳು ಸಾಧಿಸಿದ ಪ್ರಗತಿಯನ್ನು ನಾವು ಶ್ಲಾಘಿಸುತ್ತೇವೆ. ಕೃತಕ ಬುದ್ಧಿಮತ್ತೆ (AI) ಕಾರ್ಮಿಕ ಸಂಬಂಧಗಳನ್ನು ಬದಲಾಯಿಸುತ್ತಿದೆ. ಇದು ಹೊಸ ಉದ್ಯೋಗಗಳನ್ನು ಸೃಷ್ಟಿಸುವುದರ ಜೊತೆಗೆ, ಉದ್ಯೋಗ ನಷ್ಟ ಮತ್ತು ಅಸಮಾನತೆಯಂತಹ ಸವಾಲುಗಳನ್ನೂ ತರುತ್ತಿದೆ ಎಂಬುದನ್ನು ನಾವು ಗುರುತಿಸುತ್ತೇವೆ. ಡಿಜಿಟಲ್ ಪರಿವರ್ತನೆಗಳ ಪ್ರತಿಕೂಲ ಪರಿಣಾಮಗಳಿಂದ ಮಹಿಳೆಯರು, ಯುವಕರು, ಹಿರಿಯ ಕಾರ್ಮಿಕರು, ವಿಕಲಾಂಗರು ಮತ್ತು ಇತರ ದುರ್ಬಲ ವರ್ಗದ ಜನರು ವಿಶೇಷವಾಗಿ ಅಪಾಯದಲ್ಲಿದ್ದಾರೆ. ಆದ್ದರಿಂದ, ರಾಷ್ಟ್ರೀಯ ನೀತಿಗಳು, ನಿಯಮಗಳು ಮತ್ತು ಅನ್ವಯವಾಗುವ ಅಂತಾರಾಷ್ಟ್ರೀಯ ಒಪ್ಪಂದಗಳನ್ನು ಪರಿಗಣಿಸಿ, ಎಲ್ಲರಿಗೂ AI ಯ ಪ್ರಯೋಜನಗಳನ್ನು ದೊರಕಿಸಲು ನಾವು ಬದ್ಧರಾಗಿದ್ದೇವೆ. ಜವಾಬ್ದಾರಿಯುತವಾಗಿ ತಂತ್ರಜ್ಞಾನವನ್ನು ಬಳಸಿಕೊಳ್ಳುವ ಅಂತರ್ಗತ ನೀತಿಗಳನ್ನು ರೂಪಿಸುತ್ತೇವೆ. ಹಾಗೆಯೇ, ಡಿಜಿಟಲ್ ಕೌಶಲ್ಯಗಳನ್ನು ಬೆಳೆಸಲು ಆಜೀವ ಕಲಿಕೆಯನ್ನು ಸುಧಾರಿಸಲು, ಸಾಮಾಜಿಕ ರಕ್ಷಣೆಯನ್ನು ಬಲಪಡಿಸಲು, ಕಾರ್ಮಿಕರ ಹಕ್ಕುಗಳನ್ನು ರಕ್ಷಿಸಲು ಮತ್ತು ಮಾನವನ ಕೇಂದ್ರ ಸ್ಥಾನವನ್ನು ಉಳಿಸಿಕೊಳ್ಳಲು ನಾವು ನಿರ್ಧರಿಸಿದ್ದೇವೆ. ಹವಾಮಾನ ಬದಲಾವಣೆಯ ಪರಿಣಾಮಗಳನ್ನು ಎದುರಿಸುವ ಮತ್ತು ಎಲ್ಲಾ ಕ್ಷೇತ್ರಗಳಲ್ಲಿ, ಅಸಂಘಟಿತ ಆರ್ಥಿಕತೆ ಸೇರಿದಂತೆ, ನ್ಯಾಯಯುತ ಪರಿವರ್ತನೆಯನ್ನು ಸಾಧಿಸುವ ಸಂದರ್ಭದಲ್ಲಿ, ಸಾಮಾಜಿಕ ಸಂವಾದವನ್ನು ಉತ್ತೇಜಿಸಲು ಮತ್ತು ಉತ್ತಮ ಕೆಲಸವನ್ನು ಸೃಷ್ಟಿಸಲು ಪ್ರಮುಖ ಪಾಲುದಾರರನ್ನು ಸಕ್ರಿಯವಾಗಿ ತೊಡಗಿಸಿಕೊಳ್ಳುವುದು ಅತ್ಯಂತ ಮುಖ್ಯ ಎಂದು ನಾವು ಗುರುತಿಸುತ್ತೇವೆ.

ಪರಸ್ಪರ ತಿಳುವಳಿಕೆ, ಸ್ನೇಹ ಮತ್ತು ಸಹಕಾರವನ್ನು ಹೆಚ್ಚಿಸುವಲ್ಲಿ ಬ್ರಿಕ್ಸ್‌ ಜನರ ನಡುವಿನ ವಿನಿಮಯಗಳ (people-to-people exchanges) ಪ್ರಾಮುಖ್ಯತೆಯನ್ನು ನಾವು ಪುನರುಚ್ಚರಿಸುತ್ತೇವೆ. ಜನರ ನಡುವಿನ ವಿನಿಮಯಗಳು ನಮ್ಮ ಸಮಾಜಗಳನ್ನು ಶ್ರೀಮಂತಗೊಳಿಸುವಲ್ಲಿ ಮತ್ತು ನಮ್ಮ ಆರ್ಥಿಕತೆಗಳನ್ನು ಅಭಿವೃದ್ಧಿಪಡಿಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತವೆ ಎಂಬುದನ್ನು ನಾವು ಗುರುತಿಸುತ್ತೇವೆ. 2025 ರಲ್ಲಿ ಬ್ರೆಜಿಲ್ ಅಧ್ಯಕ್ಷತೆಯಲ್ಲಿ ಸಾಧಿಸಿದ ಪ್ರಗತಿಯನ್ನು ನಾವು ಶ್ಲಾಘಿಸುತ್ತೇವೆ. ಇದರಲ್ಲಿ ಸಂಸದೀಯ ವೇದಿಕೆ, ವ್ಯಾಪಾರ ಮಂಡಳಿ, ಮಹಿಳಾ ವ್ಯಾಪಾರ ಒಕ್ಕೂಟ, ಯುವ ಮಂಡಳಿ, ಕಾರ್ಮಿಕ ಸಂಘಗಳ ವೇದಿಕೆ, ಚಿಂತಕರ ಚಾವಡಿ ಮಂಡಳಿ, ಅಕಾಡೆಮಿಕ್ ವೇದಿಕೆ, ಡೀನ್‌ ಗಳ ವೇದಿಕೆ, ನಾಗರಿಕ ಮಂಡಳಿ, ಸಣ್ಣ ಮತ್ತು ಮಧ್ಯಮ ಉದ್ಯಮಗಳ ವೇದಿಕೆ, ನಗರಗಳು ಮತ್ತು ಪುರಸಭೆಗಳ ಸಂಘ, ಸುಪ್ರೀಂ ಆಡಿಟ್ ಸಂಸ್ಥೆಗಳು, ಕಾನೂನು ವೇದಿಕೆ, BRICS ಸುಪ್ರೀಂ ಕೋರ್ಟ್ ಅಧ್ಯಕ್ಷರ ಸಭೆ ಮತ್ತು ಬ್ರಿಕ್ಸ್‌ ಅಭಿಯೋಜನೆ ಸೇವೆಗಳ ಮುಖ್ಯಸ್ಥರ ಸಭೆ ಸೇರಿವೆ.

ಸಂಸ್ಕೃತಿಗಳ ವೈವಿಧ್ಯತೆಯನ್ನು ಗೌರವಿಸಲು, ಪರಂಪರೆ, ನಾವೀನ್ಯತೆ ಮತ್ತು ಸೃಜನಶೀಲತೆಗೆ ಹೆಚ್ಚಿನ ಮೌಲ್ಯ ನೀಡಲು, ಬಲವಾದ ಅಂತಾರಾಷ್ಟ್ರೀಯ ಜನರ ನಡುವಿನ ವಿನಿಮಯ ಮತ್ತು ಸಹಕಾರವನ್ನು ಜಂಟಿಯಾಗಿ ಪ್ರತಿಪಾದಿಸಲು ನಾವು ಹೆಚ್ಚು ಪ್ರಯತ್ನಗಳನ್ನು ನಡೆಸುತ್ತೇವೆ. "ನಾಗರಿಕತೆಗಳ ನಡುವಿನ ಸಂವಾದಕ್ಕಾಗಿ ಅಂತಾರಾಷ್ಟ್ರೀಯ ದಿನ"  ಎಂಬ ಶೀರ್ಷಿಕೆಯ UNGA ನಿರ್ಣಯ A/res/78/286 ರ ಅಳವಡಿಕೆಯನ್ನು ನಾವು ಗುರುತಿಸುತ್ತೇವೆ.

ಜೂನ್ 3 ರಿಂದ 5, 2025 ರವರೆಗೆ ಬ್ರೆಸಿಲಿಯಾದಲ್ಲಿ ನಡೆದ XIನೇ ಬ್ರಿಕ್ಸ್ ಸಂಸದೀಯ ವೇದಿಕೆಯ ಯಶಸ್ವಿ ಆಯೋಜನೆಯನ್ನು ನಾವು ಶ್ಲಾಘಿಸುತ್ತೇವೆ. ಇದರಲ್ಲಿ ಮಹಿಳಾ ಸಂಸದರ ಸಭೆ ಮತ್ತು ಅಂತಾರಾಷ್ಟ್ರೀಯ ವ್ಯವಹಾರಗಳ ಸಮಿತಿ ಅಧ್ಯಕ್ಷರ ಸಭೆಯೂ ಸೇರಿತ್ತು. ಸಂಸದೀಯ ರಾಜತಾಂತ್ರಿಕತೆ ಮತ್ತು ಅಂತರ-ಸಂಸದೀಯ ಸಹಕಾರವು ನಮ್ಮ ಸಾಮೂಹಿಕ ಪ್ರಯತ್ನಗಳ ಪ್ರಮುಖ ಸ್ತಂಭಗಳಾಗಿವೆ. ಒಳಗೊಳ್ಳುವಿಕೆ, ಐಕಮತ್ಯ, ಮತ್ತು ಸುಸ್ಥಿರ ಅಭಿವೃದ್ಧಿಯನ್ನು ಉತ್ತೇಜಿಸುವ ಸಲುವಾಗಿ, ಪರಸ್ಪರ ತಿಳುವಳಿಕೆಯನ್ನು ಪೋಷಿಸಲು, ರಾಷ್ಟ್ರಗಳ ನಡುವೆ ನಂಬಿಕೆಯನ್ನು ನಿರ್ಮಿಸಲು, ಮತ್ತು ಸಂಘರ್ಷಗಳ ಶಾಂತಿಯುತ ಪರಿಹಾರವನ್ನು ಬೆಂಬಲಿಸಲು ಇವು ಒಂದು ಅನನ್ಯ ಮಾಧ್ಯಮವಾಗಿ ಕಾರ್ಯನಿರ್ವಹಿಸುತ್ತವೆ.

ರಾಷ್ಟ್ರೀಯ ಮತ್ತು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ರಚನಾತ್ಮಕ ನಿಧಿ, ವಿಶ್ವಾಸಾರ್ಹ ದತ್ತಾಂಶ, ಮತ್ತು ಉತ್ತಮ ಪದ್ಧತಿಗಳ ವಿನಿಮಯದ ಬೆಂಬಲದೊಂದಿಗೆ, ನಮ್ಮ ದೇಶಗಳಲ್ಲಿ ಯುವ ಸಾರ್ವಜನಿಕ ನೀತಿಗಳನ್ನು ಬಲಪಡಿಸುವ ಅಗತ್ಯವನ್ನು ನಾವು ಪುನರುಚ್ಚರಿಸುತ್ತೇವೆ. ವ್ಯಾಪಕ ಸಹಕಾರ ಕ್ಷೇತ್ರಗಳಲ್ಲಿ ಯುವ-ನೇತೃತ್ವದ ವೇದಿಕೆಗಳು, ಸಂವಾದಗಳು ಮತ್ತು ಕಾರ್ಯಕ್ರಮಗಳ ಹೆಚ್ಚುವರಿ ಮೌಲ್ಯವನ್ನು ನಾವು ಗುರುತಿಸುತ್ತೇವೆ. ಶಾಲೆಯಿಂದ-ಕೆಲಸಕ್ಕೆ ಪರಿವರ್ತನೆಯನ್ನು ಬೆಂಬಲಿಸುವ ಮತ್ತು ವೃತ್ತಿಪರ ತರಬೇತಿಗೆ ಪ್ರವೇಶವನ್ನು ವಿಸ್ತರಿಸುವ, ಎಲ್ಲರನ್ನೂ ಒಳಗೊಂಡ ಯುವ ಉದ್ಯೋಗ ನೀತಿಗಳನ್ನು ನಾವು ಉತ್ತೇಜಿಸುತ್ತೇವೆ. ಬ್ರಿಕ್ಸ್ ಕಾರ್ಯಸೂಚಿಯಲ್ಲಿ ಯುವಜನರನ್ನು ಜಂಟಿಯಾಗಿ ತೊಡಗಿಸಿಕೊಳ್ಳಲು, ತಮ್ಮ ಯುವಜನರ ಬಗ್ಗೆ ಜ್ಞಾನವನ್ನು ಉತ್ಪಾದಿಸಲು, ಮತ್ತು ಬ್ರಿಕ್ಸ್ ಉಪಕ್ರಮಗಳು ಯುವಜನರ ಹಿತಾಸಕ್ತಿಗಳನ್ನು ಪ್ರತಿಬಿಂಬಿಸುವುದನ್ನು ಖಚಿತಪಡಿಸಲು ನಾವು ಬ್ರಿಕ್ಸ್‌ಗೆ ಕರೆ ನೀಡುತ್ತೇವೆ. ಈ ಸಂದರ್ಭದಲ್ಲಿ, ಜೂನ್ 2025 ರಲ್ಲಿ ಬ್ರೆಸಿಲಿಯಾದಲ್ಲಿ ನಡೆದ 11ನೇ ಬ್ರಿಕ್ಸ್ ಯುವ ಶೃಂಗಸಭೆಯನ್ನು ನಾವು ಸ್ವಾಗತಿಸುತ್ತೇವೆ. ಈ ಸಭೆಯು 'ಯುವ ಸಹಕಾರ ಕುರಿತ ಹೊಸ ತಿಳುವಳಿಕಾ ಒಪ್ಪಂದ'ವನ್ನು ಅಂಗೀಕರಿಸಿದೆ.

ಕೈಗೆಟುಕುವ ದರದ ವಸತಿ ಕ್ಷೇತ್ರದಲ್ಲಿ ಬ್ರಿಕ್ಸ್ ದೇಶಗಳು ಸಾಧಿಸಿದ ಪ್ರಗತಿಯನ್ನು ನಾವು ಶ್ಲಾಘಿಸುತ್ತೇವೆ. ಅಸಮಾನತೆಯನ್ನು ಕಡಿಮೆ ಮಾಡುವ ಗಮನದೊಂದಿಗೆ, ಎಲ್ಲಾ ನಗರ ಸೇವೆಗಳನ್ನೂ ಒಳಗೊಂಡ ನ್ಯಾಯಯುತ ಮತ್ತು ಸದೃಢ ನಗರ ಪರಿವರ್ತನೆಯನ್ನು ಉತ್ತೇಜಿಸುವ ಹಾದಿಯಲ್ಲಿ, ಶಮನ ಹಾಗೂ ಹೊಂದಾಣಿಕೆ ನೀತಿಗಳಲ್ಲಿ ಮುನ್ನಡೆಯುತ್ತಿರುವುದನ್ನೂ ನಾವು ಶ್ಲಾಘಿಸುತ್ತೇವೆ. 'ಸುಸ್ಥಿರ ಅಭಿವೃದ್ಧಿಗಾಗಿ 2030ರ ಕಾರ್ಯಸೂಚಿ'ಯನ್ನು ಅನುಷ್ಠಾನಗೊಳಿಸುವಲ್ಲಿ ಮತ್ತು ಸುಸ್ಥಿರ ಅಭಿವೃದ್ಧಿ ಗುರಿಗಳ (SDGs) ಸ್ಥಳೀಕರಣವನ್ನು ಉತ್ತೇಜಿಸುವಲ್ಲಿ, ಎಲ್ಲಾ ಬ್ರಿಕ್ಸ್ ದೇಶಗಳಲ್ಲಿ ಸರ್ಕಾರದ ಮತ್ತು ಸಮಾಜದ ಎಲ್ಲಾ ಹಂತಗಳ ನಡುವೆ ಸಹಯೋಗವನ್ನು ಮತ್ತಷ್ಟು ಬಲಪಡಿಸಲು 'ಬ್ರಿಕ್ಸ್ ನಗರೀಕರಣ ವೇದಿಕೆ'ಯು ಮಾಡುತ್ತಿರುವ ಕೆಲಸವನ್ನು ನಾವು ಶ್ಲಾಘಿಸುತ್ತೇವೆ.

ನೀತಿ ಶಿಫಾರಸುಗಳ ಮೂಲಕ 2025ರ ಬ್ರಿಕ್ಸ್ ಕಾರ್ಯಸೂಚಿಗೆ 'ಬ್ರಿಕ್ಸ್ ವ್ಯಾಪಾರ ಮಂಡಳಿ' (BBC) ನೀಡಿದ ಕೊಡುಗೆಗಳಿಗಾಗಿ ನಾವು ಶ್ಲಾಘಿಸುತ್ತೇವೆ. ವಿಶೇಷವಾಗಿ, ಡಿಜಿಟಲೀಕರಣ ಮತ್ತು ನಿಯಂತ್ರಕ ಸಹಕಾರದ ಮೂಲಕ ಬ್ರಿಕ್ಸ್-ಒಳಗಿನ ವ್ಯಾಪಾರವನ್ನು ಹೆಚ್ಚಿಸುವುದು; ನವೀನ ಹಣಕಾಸು ಸಾಧನಗಳನ್ನು ವಿಸ್ತರಿಸುವುದು; ಲಾಜಿಸ್ಟಿಕ್ಸ್ ಸಂಪರ್ಕ ಮತ್ತು ಬ್ರಿಕ್ಸ್ ನಡುವಿನ ವಾಯು ಸಂಚಾರ ಮಾರ್ಗಗಳನ್ನು ಹೆಚ್ಚಿಸುವುದು; ಇಂಧನ ಪರಿವರ್ತನೆಯನ್ನು ಬೆಂಬಲಿಸುವುದು; ಆಹಾರ ಭದ್ರತೆ ಮತ್ತು ಸುಧಾರಿತ ಪೌಷ್ಟಿಕತೆಯನ್ನು ಮುಂದುವರಿಸಲು ಸ್ಮಾರ್ಟ್ ಕೃಷಿ ತಂತ್ರಜ್ಞಾನಗಳನ್ನು ಪೋಷಿಸುವುದು; ಮತ್ತು ಸುಸ್ಥಿರ ಹಾಗೂ ಡಿಜಿಟಲ್ ಆರ್ಥಿಕತೆಯಲ್ಲಿ ನ್ಯಾಯಯುತ ಭಾಗವಹಿಸುವಿಕೆಗಾಗಿ ಕೌಶಲ್ಯಗಳನ್ನು ಅಭಿವೃದ್ಧಿಪಡಿಸುವುದು ಇವುಗಳಲ್ಲಿ ಸೇರಿವೆ. ಈ ಕ್ಷೇತ್ರಗಳಲ್ಲಿ ಸರ್ಕಾರದ ಕ್ರಮವನ್ನು ಬಳಸಿಕೊಳ್ಳುವ BBCಯ ಕ್ರಿಯಾ-ಚಾಲಿತ ಉಪಕ್ರಮಗಳನ್ನು ಹಾಗೂ 'ಬ್ರಿಕ್ಸ್ ಬಿಸಿನೆಸ್ ಫೋರಂ' ಮತ್ತು 'ಬ್ರಿಕ್ಸ್ ಸೊಲ್ಯೂಷನ್ಸ್ ಅವಾರ್ಡ್‌'ಗಳ ಯಶಸ್ವಿ ಆಯೋಜನೆಯನ್ನು ನಾವು ಅಷ್ಟೇ ಶ್ಲಾಘಿಸುತ್ತೇವೆ.

ಸುಸ್ಥಿರ ಬೆಳವಣಿಗೆಯನ್ನು ಮುನ್ನಡೆಸುವಲ್ಲಿ ಮಹಿಳೆಯರ ಆರ್ಥಿಕ ಭಾಗವಹಿಸುವಿಕೆಯ ಪ್ರಮುಖ ಪಾತ್ರವನ್ನು ನಾವು ಗುರುತಿಸುತ್ತೇವೆ. ಸಾಲ, ಶಿಕ್ಷಣ ಮತ್ತು ಆರೋಗ್ಯ ಸೇವೆಗಳಿಗೆ ಪ್ರವೇಶದಲ್ಲಿನ ರಚನಾತ್ಮಕ ಅಡೆತಡೆಗಳನ್ನು ನಿಭಾಯಿಸಲು 'ಮಹಿಳಾ ವ್ಯಾಪಾರ ಒಕ್ಕೂಟ'ದ (WBA) ನೀತಿ ಶಿಫಾರಸುಗಳನ್ನು ನಾವು ಶ್ಲಾಘಿಸುತ್ತೇವೆ. ಹವಾಮಾನ-ಸ್ಮಾರ್ಟ್ ಕೃಷಿಯನ್ನು ಮುಂದುವರಿಸುವಲ್ಲಿ ಮಹಿಳೆಯರ ಕೊಡುಗೆಯನ್ನು ನಾವು ಅಂಗೀಕರಿಸುತ್ತೇವೆ ಮತ್ತು ಸುಸ್ಥಿರ ಹಾಗೂ ಡಿಜಿಟಲ್ ಆರ್ಥಿಕತೆಯಲ್ಲಿ ಯಶಸ್ವಿಯಾಗಲು ಅವರಿಗೆ ನ್ಯಾಯಯುತ ಅವಕಾಶಗಳನ್ನು ಖಾತರಿಪಡಿಸುವ ಅಗತ್ಯವನ್ನು ಗುರುತಿಸುತ್ತೇವೆ. ವ್ಯಾಪಾರ ಉತ್ತೇಜನಾ ಸಭೆಗಳು, ಸ್ಟಾರ್ಟ್‌ಅಪ್ ಸ್ಪರ್ಧೆ, ಮತ್ತು 'ಬ್ರಿಕ್ಸ್ ಮಹಿಳಾ ಅಭಿವೃದ್ಧಿ ವರದಿ'ಯಂತಹ ನಿರಂತರ ಪ್ರಯತ್ನಗಳೂ ಸೇರಿದಂತೆ, ಮಹಿಳಾ-ನೇತೃತ್ವದ ವ್ಯವಹಾರಗಳನ್ನು ಬೆಂಬಲಿಸುವ WBA ಉಪಕ್ರಮಗಳನ್ನು ನಾವು ಶ್ಲಾಘಿಸುತ್ತೇವೆ. ಔಪಚಾರಿಕಗೊಳಿಸುವಿಕೆ ಮತ್ತು ಸಾಮಾಜಿಕ ಸಂರಕ್ಷಣಾ ಕ್ರಮಗಳ ಮೂಲಕವೂ ಸೇರಿದಂತೆ, ಅಸಂಘಟಿತ ಆರ್ಥಿಕತೆಯಲ್ಲಿರುವ ಮಹಿಳೆಯರಿಗೆ ಡಿಜಿಟಲ್ ಮತ್ತು ಆರ್ಥಿಕ ಸಾಕ್ಷರತೆಯನ್ನು ವಿಸ್ತರಿಸಲು, ಹಾಗೂ ಮಹಿಳೆಯರಿಗಾಗಿ ಬೆಂಬಲ ಮತ್ತು ಬಜೆಟ್ ಅನ್ನು ಉತ್ತೇಜಿಸಿ, ಹೆಚ್ಚಿಸಲು ನಾವು ಬದ್ಧರಾಗಿದ್ದೇವೆ.

ವಿಪತ್ತು ಅಪಾಯವನ್ನು ಕಡಿಮೆ ಮಾಡುವಲ್ಲಿ ಹಣಕಾಸನ್ನು ಹೆಚ್ಚಿಸಲು, ಹಾಗೂ ಆಡಳಿತ ಮತ್ತು ಒಗ್ಗಟ್ಟನ್ನು ಬಲಪಡಿಸಿ, ಸದೃಢತೆಯನ್ನು ನಿರ್ಮಿಸಲು ನಮ್ಮ ಬದ್ಧತೆಯನ್ನು ನಾವು ಪುನರುಚ್ಚರಿಸುತ್ತೇವೆ. 2015 ರಿಂದೀಚೆಗೆ ಪ್ರಮುಖ ಘೋಷಣೆಗಳ ಮೂಲಕ ಮತ್ತು ಜಂಟಿ ಕಾರ್ಯಪಡೆಯ ರಚನೆಯ ಮೂಲಕ ಸಹಕಾರದಲ್ಲಿ ಸಾಧಿಸಲಾದ ಪ್ರಗತಿಯನ್ನು ನಾವು ಸಂಭ್ರಮಿಸುತ್ತೇವೆ. ಹವಾಮಾನ ಬದಲಾವಣೆಗೆ ಸಂಬಂಧಿಸಿದ ಅಪಾಯಗಳೂ ಸೇರಿದಂತೆ, ವಿಶೇಷವಾಗಿ 'ಗ್ಲೋಬಲ್ ಸೌತ್'ಗೆ, ವಿಪತ್ತು ಅಪಾಯಗಳ ಹೆಚ್ಚುತ್ತಿರುವ ಸಂಕೀರ್ಣತೆಯನ್ನು ನಾವು ಅಂಗೀಕರಿಸುತ್ತೇವೆ. ವಿಶ್ವಾದ್ಯಂತ ಮೂಲಸೌಕರ್ಯ ವ್ಯವಸ್ಥೆಗಳು ತೀವ್ರ ಹವಾಮಾನ ಘಟನೆಗಳು ಮತ್ತು ವಿಪತ್ತುಗಳಿಂದ ಹೆಚ್ಚಾಗಿ ತೀವ್ರವಾಗಿ ಪೀಡಿತವಾಗಿವೆ. ಇದು ಆರ್ಥಿಕ ಅಡೆತಡೆಗಳಿಗೆ ಕಾರಣವಾಗುವುದಲ್ಲದೆ, ಜನರ ಜೀವನದ ಮೇಲೆ ನಕಾರಾತ್ಮಕ ಪರಿಣಾಮ ಬೀರುತ್ತದೆ. ಆದ್ದರಿಂದ, ವಿಪತ್ತು-ಸಂಬಂಧಿತ ಹಾನಿಯನ್ನು ಕಡಿಮೆ ಮಾಡಲು ಮತ್ತು ಮೂಲಸೌಕರ್ಯ, ಮಾನವ ಜೀವಗಳು ಹಾಗೂ ಜೀವನೋಪಾಯವನ್ನು ರಕ್ಷಿಸಲು, ರಾಷ್ಟ್ರೀಯ ವಿಪತ್ತು ಅಪಾಯ ತಗ್ಗಿಸುವ ವ್ಯವಸ್ಥೆಗಳು ಮತ್ತು ಸಾಮರ್ಥ್ಯಗಳನ್ನು ಸುಧಾರಿಸಲು ನಾವು ಸಹಕರಿಸುತ್ತೇವೆ. ಹಾಗೆಯೇ, ಸಮಗ್ರ ಮೂಲಸೌಕರ್ಯ ಅಭಿವೃದ್ಧಿಗಾಗಿ ಸಾಕಷ್ಟು ನಿಧಿಯನ್ನು ಕ್ರೋಢೀಕರಿಸಲು ಮತ್ತು ಖಾಸಗಿ ಹೂಡಿಕೆಯನ್ನು ಹೆಚ್ಚಿಸಲು ನಾವು ಸಹಕರಿಸುತ್ತೇವೆ. ನಾವು 2025-2028ರ ಕಾರ್ಯಯೋಜನೆಯನ್ನು ಅನುಮೋದಿಸುತ್ತೇವೆ. ಇದು, ದುರ್ಬಲತೆಗಳನ್ನು ಕಡಿಮೆ ಮಾಡಲು ಅಸಮಾನತೆಗಳನ್ನು ನಿವಾರಿಸುವುದು, ಸದೃಢ ಮುನ್ನೆಚ್ಚರಿಕೆ ವ್ಯವಸ್ಥೆಗಳು, ನಿರೀಕ್ಷಿತ ಪ್ರತಿಕ್ರಿಯೆ ಸಾಮರ್ಥ್ಯ, ಸದೃಢ ಮೂಲಸೌಕರ್ಯ, ಮತ್ತು ವೈವಿಧ್ಯಮಯ ಜ್ಞಾನ ವ್ಯವಸ್ಥೆಗಳನ್ನು ಸಂಯೋಜಿಸುವುದರ ಮೇಲೆ ಕೇಂದ್ರೀಕೃತವಾಗಿದೆ. ಇದು ಸಮಾನತೆ ಮತ್ತು ಸದೃಢತೆಗೆ ನಮ್ಮ ಬದ್ಧತೆಯನ್ನು ಪುನರುಚ್ಚರಿಸುತ್ತದೆ. ಅಪಾಯ ಮೇಲ್ವಿಚಾರಣೆ, ವಿಪತ್ತುಗಳನ್ನು ಮುನ್ಸೂಚಿಸುವುದು, ಮತ್ತು ಅವುಗಳ ಸಂಭಾವ್ಯ ಪರಿಣಾಮಗಳಿಗಾಗಿ ವ್ಯವಸ್ಥೆಗಳ ಅಭಿವೃದ್ಧಿ ಕುರಿತ ಹೆಚ್ಚಿದ ಸಂವಾದವನ್ನು ನಾವು ಬೆಂಬಲಿಸುತ್ತೇವೆ.

ರಿಯೋ ಶೃಂಗಸಭೆಯಲ್ಲಿ, 'ಬ್ರಿಕ್ಸ್ ವ್ಯಾಪಾರ ಮಂಡಳಿ', 'ಮಹಿಳಾ ವ್ಯಾಪಾರ ಒಕ್ಕೂಟ', ಮತ್ತು ಮೊದಲ ಬಾರಿಗೆ 'ಬ್ರಿಕ್ಸ್ ನಾಗರಿಕ ಮಂಡಳಿ'ಯಿಂದ ವರದಿಗಳ ಸಲ್ಲಿಕೆಯನ್ನು ನಾವು ಸ್ವಾಗತಿಸುತ್ತೇವೆ. ಬ್ರಿಕ್ಸ್ ಸರ್ಕಾರಗಳು ಮತ್ತು ನಾಗರಿಕ ಸಮಾಜದ ನಡುವಿನ ವಿಸ್ತೃತ ಸಂವಾದದ ಮಹತ್ವವನ್ನು ನಾವು ಒತ್ತಿ ಹೇಳುತ್ತೇವೆ. ಬ್ರಿಕ್ಸ್ ಶೆರ್ಪಾಗಳು ಮತ್ತು ಬ್ರಿಕ್ಸ್ ಜನರಿಂದ-ಜನರಿಗೆ ಕಾರ್ಯವಿಧಾನಗಳ ಪ್ರತಿನಿಧಿಗಳ ನಡುವೆ ನೇರ ಪಾಲ್ಗೊಳ್ಳುವಿಕೆಯನ್ನು ಬಲಪಡಿಸುವ ಬ್ರೆಜಿಲ್ ಅಧ್ಯಕ್ಷತೆಯ ಉಪಕ್ರಮವನ್ನು ನಾವು ಸ್ವಾಗತಿಸುತ್ತೇವೆ.

ದಕ್ಷಿಣ ಆಫ್ರಿಕಾದ ಜೋಹಾನ್ಸ್‌ ಬರ್ಗ್ ನಲ್ಲಿ ನಡೆದ ಬ್ರಿಕ್ಸ್ ಶೃಂಗಸಭೆಯಲ್ಲಿ ಅಂಗೀಕರಿಸಲಾದ 'ಬ್ರಿಕ್ಸ್ ಸದಸ್ಯತ್ವ ವಿಸ್ತರಣೆಯ ಮಾರ್ಗದರ್ಶಿ ತತ್ವಗಳು, ಮಾನದಂಡಗಳು, ಅರ್ಹತೆಗಳು ಮತ್ತು ಕಾರ್ಯವಿಧಾನಗಳ'  ಅನುಸಾರ ನಡೆಯುತ್ತಿರುವ ಬ್ರಿಕ್ಸ್ ವಿಸ್ತರಣಾ ಪ್ರಕ್ರಿಯೆಯನ್ನು ಗಮನದಲ್ಲಿಟ್ಟುಕೊಂಡು, ಗುಂಪಿನ ಸ್ಪೂರ್ತಿಗೆ ಅನುಗುಣವಾಗಿ ಬ್ರಿಕ್ಸ್ ಅನ್ನು ಕ್ರೋಢೀಕರಿಸಲು ಮತ್ತು ಬಲಪಡಿಸಲು ನಮ್ಮ ಬದ್ಧತೆಯನ್ನು ನಾವು ಪುನರುಚ್ಚರಿಸುತ್ತೇವೆ. ಪರಸ್ಪರ ಗೌರವ ಮತ್ತು ತಿಳುವಳಿಕೆ, ಸಾರ್ವಭೌಮ ಸಮಾನತೆ, ಒಗ್ಗಟ್ಟು , ಪ್ರಜಾಪ್ರಭುತ್ವ, ಮುಕ್ತತೆ, ಒಳಗೊಳ್ಳುವಿಕೆ, ಸಹಯೋಗ, ನಿರಂತರತೆ, ಸಂಪೂರ್ಣ ಸಮಾಲೋಚನೆ ಮತ್ತು ಒಮ್ಮತವು ಈ ಸ್ಪೂರ್ತಿಯ ಭಾಗವಾಗಿದೆ. ರಷ್ಯಾದ ಕಜಾನ್ ನಲ್ಲಿ ನಡೆದ BRICS ಶೃಂಗಸಭೆಯಲ್ಲಿ ಅಂಗೀಕರಿಸಿದ BRICS ಪಾಲುದಾರ ದೇಶಗಳ ವರ್ಗದ ನಿಯಮಗಳ  ಪ್ರಕಾರ ಪಾಲುದಾರ ರಾಷ್ಟ್ರಗಳು ಬ್ರಿಕ್ಸ್ ಸಹಕಾರಕ್ಕೆ ಕೊಡುಗೆ ನೀಡುವುದರ ಮಹತ್ವವನ್ನು ನಾವು ಒತ್ತಿ ಹೇಳುತ್ತೇವೆ. ಬ್ರೆಜಿಲ್ ಅಧ್ಯಕ್ಷತೆಯ ಅಡಿಯಲ್ಲಿ ವಿವಿಧ ಸಚಿವರ ಮತ್ತು ತಾಂತ್ರಿಕ ಮಟ್ಟದ ಸಭೆಗಳಲ್ಲಿ ಅವರ ಭಾಗವಹಿಸುವಿಕೆಯನ್ನು ನಾವು ಸ್ವಾಗತಿಸುತ್ತೇವೆ. ಬ್ರಿಕ್ಸ್‌ ನ ಹೆಚ್ಚುತ್ತಿರುವ ಸದಸ್ಯತ್ವ ಮತ್ತು ವಿಷಯಾಧಾರಿತ ಕಾರ್ಯಸೂಚಿಗೆ ಗುಂಪಿನ ಕಾರ್ಯವಿಧಾನಗಳಲ್ಲಿ ಹೊಂದಾಣಿಕೆಗಳ ಅಗತ್ಯವಿದೆ ಎಂಬುದನ್ನು ನಾವು ಅಂಗೀಕರಿಸುತ್ತೇವೆ. ಈ ನಿಟ್ಟಿನಲ್ಲಿ, 'ಬ್ರಿಕ್ಸ್ ಕಾರ್ಯವ್ಯಾಪ್ತಿಯ ನಿಯಮ'ಗಳನ್ನು ನವೀಕರಿಸಲು ನಡೆಯುತ್ತಿರುವ ಪ್ರಯತ್ನಗಳನ್ನು ನಾವು ಅಂಗೀಕರಿಸುತ್ತೇವೆ ಮತ್ತು ಈ ಪ್ರಕ್ರಿಯೆಯನ್ನು ಮುಂದುವರಿಸಲು ಪ್ರೋತ್ಸಾಹಿಸುತ್ತೇವೆ. ಬ್ರಿಕ್ಸ್ ಪರಿಣಾಮಕಾರಿ, ದಕ್ಷ, ಸ್ಪಂದನಾಶೀಲ, ಎಲ್ಲರನ್ನೂ ಒಳಗೊಂಡ ಮತ್ತು ಒಮ್ಮತ-ಆಧಾರಿತವಾಗಿ ಉಳಿಯುವುದನ್ನು ಖಚಿತಪಡಿಸಿಕೊಳ್ಳಲು ಅಸ್ತಿತ್ವದಲ್ಲಿರುವ ಪದ್ಧತಿಗಳ ಪರಿಷ್ಕರಣೆಯನ್ನು ನಾವು ಬೆಂಬಲಿಸುತ್ತೇವೆ. ಸಾಂಸ್ಥಿಕ ಅಭಿವೃದ್ಧಿಯು ಒಂದು ನಿರಂತರ ಮತ್ತು ಕ್ರಿಯಾತ್ಮಕ ಪ್ರಕ್ರಿಯೆಯಾಗಿದ್ದು, ಅದು ಗುಂಪಿನ ಅಗತ್ಯಗಳು ಮತ್ತು ಆದ್ಯತೆಗಳನ್ನು ಪ್ರತಿಬಿಂಬಿಸಬೇಕು ಎಂದು ನಾವು ಪುನರುಚ್ಚರಿಸುತ್ತೇವೆ. ಉದಯೋನ್ಮುಖ ಮಾರುಕಟ್ಟೆ ಮತ್ತು ಅಭಿವೃದ್ಧಿಶೀಲ ದೇಶಗಳೊಂದಿಗೆ (EMDCs) ಬ್ರಿಕ್ಸ್ ಸಂವಾದ ಮತ್ತು ಪಾಲುದಾರಿಕೆಯನ್ನು ವಿಸ್ತರಿಸುವುದು, ಎಲ್ಲರ ಪ್ರಯೋಜನಕ್ಕಾಗಿ ಒಗ್ಗಟ್ಟು ಮತ್ತು ನಿಜವಾದ ಅಂತಾರಾಷ್ಟ್ರೀಯ ಸಹಕಾರವನ್ನು ಮತ್ತಷ್ಟು ಬಲಪಡಿಸಲು ಕೊಡುಗೆ ನೀಡುತ್ತದೆ ಎಂಬ ನಮ್ಮ ದೃಢ ನಂಬಿಕೆಯನ್ನು ನಾವು ಒತ್ತಿ ಹೇಳುತ್ತೇವೆ. ಸಂಬಂಧಿತ ದಾಖಲೆಗಳು ಮತ್ತು ಹಿನ್ನೆಲೆ ಮಾಹಿತಿಗೆ ಪ್ರವೇಶವನ್ನು ಸುಗಮಗೊಳಿಸಲು ಒಂದು ಸಾಮಾನ್ಯ ಬ್ರಿಕ್ಸ್ ದತ್ತಾಂಶ ಸಂಗ್ರಹವನ್ನು (Database) ಸ್ಥಾಪಿಸುವ ಅಗತ್ಯವನ್ನು ನಾವು ಗುರುತಿಸುತ್ತೇವೆ.

2025ರಲ್ಲಿ ಬ್ರೆಜಿಲ್‌ ನ ಬ್ರಿಕ್ಸ್ ಅಧ್ಯಕ್ಷತೆಯನ್ನು ನಾವು ಶ್ಲಾಘಿಸುತ್ತೇವೆ ಮತ್ತು ರಿಯೋ ಡಿ ಜನೈರೋ ನಗರದಲ್ಲಿ XVIIನೇ ಬ್ರಿಕ್ಸ್ ಶೃಂಗಸಭೆಯನ್ನು ಆಯೋಜಿಸಿದ್ದಕ್ಕಾಗಿ ಬ್ರೆಜಿಲ್ ಸರ್ಕಾರ ಮತ್ತು ಜನರಿಗೆ ನಮ್ಮ ಕೃತಜ್ಞತೆಯನ್ನು ವ್ಯಕ್ತಪಡಿಸುತ್ತೇವೆ.

2026ರಲ್ಲಿ ಭಾರತದ ಬ್ರಿಕ್ಸ್ ಅಧ್ಯಕ್ಷತೆಗೆ ಮತ್ತು ಭಾರತದಲ್ಲಿ XVIIIನೇ ಬ್ರಿಕ್ಸ್ ಶೃಂಗಸಭೆಯ ಆಯೋಜನೆಗೆ ನಮ್ಮ ಸಂಪೂರ್ಣ ಬೆಂಬಲವನ್ನು ನಾವು ನೀಡುತ್ತೇವೆ.

 

*****

 

 

 

(Release ID: 2143039)