ত্রিনিদাদ অমসুং তোবাগোগী প্রধান মন্ত্রী কমলা পেরসাদ-বিসেসারনা চেবাউ পীবদগী জুলাই ৩-জুলাই ৪, ২০২৫ ফাওবা সরকারগী খোঙচৎ অমদা ভারতকী প্রধান মন্ত্রী শ্রী নরেন্দ্র মোদী ত্রিনিদাদ অমসুং তোবাগোদা চৎখ্রে।

ভারতকী প্রধান মন্ত্রী অমনা চহি ২৬ অসিদা লৈবাক অসিদা চৎপা মরুওইবা খোঙচৎ অসি য়াম্না মরুওইবা, লোয়ননা ১৮৪৫ দা ত্রিনিদাদ অমসুং তোবাগোদা ভারতমচাশিং খুন্দারকপগী চহি ১৮০ শুবা থৌরমগা মপা চানরে। খোঙচৎ অসিনা সভেত্য অনিগী অচেৎপা মরীশিং, মীগা মীগা লৈনবা মরীশিং অমসুং লৈবাক অনিগী মরক্ত মতম কয়াগী মমাঙদগী লৈরক্লবা মরুপ-মপাংগী মরীগী য়ুম্ফম অমা থোল্লিবা গনতন্ত্রগী গুনশিং অমুক হন্না চেৎশীনহল্লে।

প্রধান মন্ত্রী কমলা পেরসাদ-বিসেসারনা হন্দক মহাক্কী মীখলদা মাইপাকপদা প্রধান মন্ত্রী শ্রী নরেন্দ্র মোদীনা থাগৎপা ফোঙদোকখ্রে অমসুং ভারত অমসুং ত্রিনিদাদ অমসুং তোবাগোগী মরক্ত লৈনরিবা মরীশিং ফগৎনবা মহাক্না পাংথোকখিবা থবকশিং থাগৎপা ফোঙদোকখ্রে।

ভারত অমসুং মালেমগী থাক্ত প্রধান মন্ত্রী শ্রী নরেন্দ্র মোদীগী অখন্নবা লুচিংবগী থবক অসি শকখঙবা উত্তুনা, প্রধান মন্ত্রী মোদীদা লৈবাক অসিগী খ্বাইদগী ৱাংবা মনা-ওর্দর ওফ দি রিপব্লিক ওফ ত্রিনিদাদ অমসুং তোবাগো পীদুনা ইকায়খুম্নবা উৎখ্রে।

লৈবাক অনিনা দরকার ওইবা নাকল অনিগী অমসুং মালেমগী থৌদোক-ৱাথোকশিংগী মতাংদা প্রধান মন্ত্রী অনিনা য়াম্না কুপ্না খন্নখ্রে। হকশেল, আই.সি.তি, নাৎ, শান্নবা, ললোন-ইতিক, শেন-থুমগী ফিবম ফগৎহনবা, লৌউ-শিংউ, জজতিস, আইনগী থবকশিং, লাইরিক-লাইশু অমসুং স্কিল দিবলপমেন্তগী মতাং য়াওনা হিরম কয়াদা লৈবাক অনিগী মরক্ত লৈনরিবা মরীশিং ফগৎলকপদা লুচিংবা অনিমক্না অপেনবা ফোঙদোকখ্রে।

শান্তি অমসুং সেকুরিতিদা তেরোরিজম্না পীরবা চৈথেং লুচিংবা অনিমক্না খঙজিনখি। মখোয়না অমুক হন্না তেরোরিজম য়াম্না কন্না য়ানিংদবা ফোঙদোকখি। লৈবাক লান্না তেরোরিজমগী থবক পাংথোকপা য়াওনা তেরোরিজমগী থবকশিং অমতা মরম চাদে হায়না মখোয়না লাউথোকখি।

হিদাক-লাংথকশিং, চাউখৎ-থৌরাংগী মতাং পাংনবা, লাইরিক-লাইশু, নাৎকী থৌরমশিং পাংথোকপা, কুতনিতিগী ত্রেনিংশিং অমসুং শান্নবা য়াওনা মরুওইবা হিরমশিংদা মরুওইবা য়ানচেশিং অমসুং এম.ও.য়ুশিং খুৎয়েক পীনবদা মখোয়না তরাম্না ওকখ্রে। নবেম্বর ২০২৪ দা পাংথোকখিবা অনিশুবা ইন্দিয়া-কারিকোম সম্মিৎগী ফলশিং লুচিংবশিংনা অমুক হন্না খন্নখি অমসুং মীফম অদুদা লাউথোকখিবশিং থবক ওইনা য়াংনা পায়খৎনবা ফোঙদোকখি।
 

দিজিতেলগী লমদা মতেং পাংনবা হেনগৎহন্নিংবগী অপাম্বা লৈবাক অনিনা ফোঙদোক্নখি। ভারতকী মাঙজিল থারিবা দিজিতেল পেমেন্ত প্লেতফোর্ম য়ুনিফাইদ পেমেন্তস ইন্তরফেস( য়ু পি আই) শীজিন্নবা অহানবা কেরিব্বিয়ান লৈবাক ওইবদা প্রধান মন্ত্রী মোদীনা ত্রিনিদাদ অমসুং তোবাগো থাগৎপা ফোঙদোকখি। দিজিলোক্কর, ই-সাইন অমসুং গভর্নমেন্ত ই-মার্কেতপ্লেস (জি ই এম) য়াওনা ভারতকী অনৌবা থবকশিং পায়খৎনবা মখা তানা পুন্না থবক তৌমিন্নবা হায়না লুচিংবশিংনা য়ানরে। লম রেজিস্তার তৌবগী থবকশিং ফগৎনবা অমসুং দিজিতেল ওইনা পাংথোকপদা ভারতনা মতেং পাংনবা ত্রিনিদাদ অমসুং তোবাগোনা ভারত্ত হায়জখি। দিজিতেলগী লৈঙাক অমসুং সরকারগী খুদোংচাবশিং ফংহনবা অসিনা পুন্না চাউখৎমিন্নবা, ইন্নোবেসন অমসুং লৈবাক্কী ওইনা চাংদম্নবা ঙম্লিবা অসিগী মতাংদা মখোয়না খন্নখি।

লাইরিক তাকপী-তম্বীবা দিজিতেল ওন্থোক্নবা প্রধান মন্ত্রী কমলা পেরসাদ-বিসেসারগী থবকশিং প্রধান মন্ত্রীনা থাগৎপা ফোঙদোকখি অমসুং ত্রিনিদাদ অমসুং তোবাগোদা লেপতোপ ২০০০ খুদোল ওইনা পীনবা লাউথোকখি। ভারত সরকারনা পীরিবা তোঙান তোঙানবা স্কোলারশিপশিংগী মখাদা ভারত্ত অৱাংবা থাক্কী মহৈ তম্নবগী খুদোংচাবা লৌনবা প্রধান মন্ত্রী মোদীনা ত্রিনিদাদ অমসুং তোবাগোগী মহৈরোয়শিংগী পুক্নিং চিংশিনখি।

লুচিংবশিংনা লৌউ-শিংউ অমসুং চীঞ্জাক ৱাৎহনদবা অসি অতোপ্পা মরুওইবা হিরম ওইনা খন্নখি। চীঞ্জাক শেম-শানবা অমসুং লীদুনা থম্নবা য়ু.এস দোল্লার মিল্লিয়ন ১ গী এগ্রো-মেছিন্নরিশিং ভারতনা খুদোল ওইনা পীবদা, ত্রিনিদাদ অমসুং তোবাগোগী নেসনেল এগ্রিকলচরেল মার্কেতিং এন্দ দিবলপমেন্ত কোর্পোরেসননা থাগৎপা ফোঙদোকখ্রে। প্রধান মন্ত্রী মোদীনা অহানবা তাঙ্কক্কী মেছিনশিং অচম্বা থৌরম অমদা নেসনেল এগ্রিকলচরেল মার্কেতিং এন্দ দিবলপমেন্ত কোর্পোরেসন্দা খুৎশীন্নখ্রে। মহৌশাগী লৌউ, সমুদ্রগী নাপীদগী হার পুথোকপা অমসুং মিল্লেত থানবগী মতাংদা ভারতনা মতেং পাংগনি হায়না প্রধান মন্ত্রী মোদীনা লাউথোকখি।

হকশেলগী লমদা, ভারতকী ফার্মাকোপোইসিয়া মশক খঙবগীদমক প্রধান মন্ত্রী মোদীনা ত্রিনিদাদ অমসুং তোবাগোগী সরকার থাগৎপা ফোঙদোকখি অমসুং মসিনা হিদাক-লাংথক্কী লমদা হেন্না মতেং পাংনবা ঙমগনি অমসুং ভারতকী মমল হোংবা অমসুং অফবা জেনেরিক হিদাকশিং ত্রিনিদাদ অমসুং তোবাগোগী মীয়াম্না ফংবা হেনগৎলগনি অমসুং ভারত্ত লায়য়েংবগী খুদোংচাবশিং হেনগৎলগনি। লাক্লিবা থা খর অসিদা ত্রিনিদাদ অমসুং তোবাগোদা লনাই মীওই ৮০০ দা খুৎশেমগী খোঙ-খুৎ হাপ্নবগী কেম্পে অমা পাংথোক্লগনি হায়নসু প্রধান মন্ত্রী মোদীনা লাউথোকখি। হিদাক-লাংথকশিং অমসুং খুৎলায়শিংগী মথক্ত অনা-লায়য়েংগী লমদা মতেং পাংনগদৌরিবা অসিগীদমক প্রধান মন্ত্রী কমলানা প্রধান মন্ত্রী মোদী থাগৎপা ফোঙদোকখি। ভারত সরকারগী মাইকৈদগী হেমোদাইলাইসিস য়ুনিত ২০ অমসুং সি এম্বুলেন্স অনি মতেং পাংলকপগীদমক প্রধান মন্ত্রী কমলানা ত্রিনিদাদ অমসুং তোবাগোগী মাইকৈদগী তৌবীমল খঙবা উৎখি।

কুইক ইম্পেক্ত প্রোজেকশিংদা এম.ও.য়ু অমা খুৎয়েক পীনবদা তরাম্না ওকপগা লোয়ননা চাউখৎ-থৌরাংগী লমদা মতেং পাংনবগী মরুওইবা অদু ত্রিনিদাদ অমসুং তোবাগোনা ফোঙদোকখি অমসুং মসিনা ভারতকী মতেংগা লোয়ননা ত্রিনিদাদ অমসুং তোবাগোদা মীয়ামগী চাউখৎ-থৌরাংগী প্রোজেকশিং মতম চানা অমসুং ফজনা পায়খৎপা ঙমহনগনি।

কোবিদ-১৯ লাইচৎ মনুংদা মমল য়াম্লবা থৱায়শিং কনবদা ভারতনা লৌখিবা থৌদাংশিং প্রধান মন্ত্রী পেরসাদ-বিসেসারনা থাগৎপা ফোঙদোকখি। ত্রিনিদাদ অমসুং তোবাগোদা ভারতনা য়াংনা মতেং পাংলকখিবা অমসুং কোবদি ভেক্সিনশিং অমসুং মেদিকেলগী খুৎলায়শিং পীরকপদা মহাক্না থাগৎপা ফোঙদোকখি। মোবাইল হেল্থকিয়ার রোবোতশিং, তেলিমেদিসিন কিতশিং অমসুং খুৎ হাম্নবা স্তেসনশিং পীখিবা য়ু.এস দোল্লর মিল্লিয়ন ১ গী হাল্ত কোবিদ-১৯ প্রোজেক্কী মখাদা ভারতনা মতেং পাংলকপদা মহাক্না থাগৎপা ফোঙদোকখি।

কোলিএসন ফোর দিজাস্তর রিসিলিয়েন্ত ইনফ্রাষ্ট্রকচর ( সি দি আর আই) অমসুং গ্লোবেল বাইও ফ্যুএল এল্লাইন্স শরুক য়ানবা ত্রিনিদাদ অমসুং তোবাগোনা ৱারেপ লৌখিবদা প্রধান মন্ত্রী মোদীনা তরাম্না ওকখ্রে। মহৌশানা থোকহনবা অমাং-অতা হন্থহন্নবা ভারতনা পুথোকপা মাঙজৌননা চেকশিনৱা পীনবা থবকশিংদা মখা তানা মতেং পাংনবা হায়না লুচিংবশিংনা য়ানখ্রে। ফোরেন অমসুং করিকোম এফেয়ার্স মিনিস্ত্রি হেদক্বাতরশিংগীদমক রুপতোপ ফোতোভোলতেক (পি ভি) সিস্তেম পীনবা ভারতনা লাউথোকপদা ত্রিনিদাদ অমসুং তোবাগো সরকারনা থাগৎপা ফোঙদোকখ্রে। ৱাখল তানা শীজিন্নবা অমসুং তুংকোইনা চৎনবা য়াবা পুন্সি মহিং অমা য়োকখৎপা প্রধান মন্ত্রী মোদীগী ‘মিসন লাইফ’ প্রধান মন্ত্রী পেরসাদ-বিসেসারনা থাগৎপা ফোঙদোকখ্রে। অইং-অশাগী মরমদা ৱাখল তাবা মালেমগী মীয়াম শেমগৎনবা মসি য়াম্না চুনৈ হায়না প্রধান মন্ত্রী কমলানা ফোঙদোকখি।

ভারতনা ত্রিনিদাদ অমসুং তোবাগোগা লৈনবা মরীদা কেপাসিতি বিল্দিং অসি মরুওইবা য়ুম্বী অমনি হায়না ফোঙদোকখি। লৈবাক অসিগী নহারোলশিং হিরম কয়াদা কেপাসিতি বিল্দিং হেনগৎনবা ভারতনা চহি খুদিংগী আইতেক স্লোত ৮৫ পীবদা ত্রিনিদাদ অমসুং তোবাগোগী মাইকৈদগী থাগৎপা ফোঙদোকখি। মখোয়গী ওফিসিএলশিং পাকশন্না ত্রেনিং পীনবা ত্রিনিদাদ অমসুং তোবাগোদা অখঙ-অহৈশিং অমসুং ত্রেন্নরশিং থানিংবগী অপাম্বা ভারতকী মাইকৈদগী ফোঙদোকখি।

ফোরেন্সিক সাইন্স অমসুং ৱায়েন কাংলোনগী লমদা ত্রিনিদাদ অমসুং তোবাগোগী ওফিসিএলশিং অমসুং পর্সোনেলশিংগী কেপাসিতি বিল্দিংগী মতেং পাংনিংবা অমসুং ভারতকী ত্রেন্নরশিং অমসুং অখঙ-অহৈশিং ত্রিনিদাদ অমসুং তোবাগোদা থানিংবগী অপাম্বা প্রধান মন্ত্রী মোদীনা ফোঙদোকখি।

লৈবাক অনিগী ললোন-ইতিক মতেং পাংলিবা লুপশিংগী মরক্ত হকথেংননা থবক তৌমিন্নদুনা লৈবাক অনি ললোন-ইতিক অমসুং শেন থাদবা হেনগৎহনবগী দরকার ওইবা অদু লুচিংবা অনিনা ফোঙদোকখি।

লৈবাক অনিমক ক্রিকেত য়াম্না পামজদুনা লৈবাক অনিগী মরক্ত শান্নবগী অচেৎপা মরীশিং লৈনবদা লুচিংবা অনিনা থাগৎপা ফোঙদোকখি। ত্রেনিং হেনগৎহন্নবা, তেলেন্ত একচেঞ্জ, ইনফ্রাষ্ট্রকচর শেমগৎপা অমসুং অপুনবা কেপাসিতি বিল্দিংগীদমক শান্নবগী মতেং পাংন্নবা এম.ও.য়ু অমা খুৎয়েক পীনবদা মখোয়না তরাম্না ওকখি। ত্রিনিদাদ অমসুং তোবাগোগী নুপী ক্রিকেত শান্নরোয়শিং ভারত্ত ত্রেনিং পীনবগী খুদোংচাবা প্রধান মন্ত্রী মোদীনা পীখি।

ত্রিনিদাদ অমসুং তোবাগোগী পন্দিৎ কাংবু অমা ভারত্ত ত্রেনিং পীনবা প্রধান মন্ত্রী মোদীনা লাউথোকখ্রে। হায়রিবা পন্দিৎশিং অসি ভারত্ত পাংথোকপা ‘গীতা মহোৎসব’ তা শরুক য়াগনি। থবক অসিদা প্রধান মন্ত্রী কমলানা থাগৎপা ফোঙদোকখি অমসুং ভারত্ত পাংথোকপা থৌরমশিংগা মপা চাননা ত্রিনিদাদ অমসুং তোবাগোদা পুন্না গীতা মহোৎসব পাংথোক্নবা ভারতনা পুখৎলকপা ৱাফম মহাক্না শৌগৎখি। 

নাৎকী লমদা মতেং পাংনবদা, ১৯৯৭ দা লিংখৎখিবা মহাত্মা গান্ধী ইন্সতিতুৎ ফোর কলচরেল কোওপরেসনগী খুৎথাংদা কলচরেল একচেঞ্জ থৌরমশিং পাংথোকপদা লুচিংবা অনিনা থাগৎপা ফোঙদোকখি। থৌরম অসি ২০২৫-২৮ গী ওইনা মখা চৎথনবা এম.ও.য়ু অমা খুৎয়েক পীনখ্রে। নৌথোকহল্লবা এম.ও.য়ু অসিগী মখাদা, ত্রিনিদাদ অমসুং তোবাগোনা পুং (স্তিল পান) অমসুং অতোপ্পা নাৎশিংগী কলাকারশিং ভারত্ত থারক্কনি। লৈবাক শীনবা থুংনা হিন্দী অমসুং য়োগ য়োকখৎপগীদমক প্রধান মন্ত্রী মোদীনা ত্রিনিদাদ অমসুং তোবাগোগী সরকার থাগৎপা ফোঙদোকখি। ভারত্তগী য়োগ ত্রেন্নরশিং থারক্নবা অমসুং ত্রিনিদাদ অমসুং তোবাগোগী নেসনেল স্কুল করিকুল্লমদা য়োগ য়াওহন্নবা মতেং পাংগনি হয়না প্রধান মন্ত্রী মোদীনা ফোঙদোকখি।

ত্রিনিদাদ অমসুং তোবাগোদা ১৮৪৫ দা অহানবা ওইনা ভারতমচাশিং থুংলখিবগী চহি ১৮০ শুবা কুমওন থৌরম মে ৩০, ২০২৫ দা পাংথোকখিবা অদু প্রধান মন্ত্রী অনিমক্না নিংশিংখি। কলচরেল তুরিজমগী মফম অমা ওইনা নেলসন আইলেন্দগী মরুওইবা মখোয়না খঙখি অমসুং নেসনেল আর্কাইবশিংদা ভারতমচাশিং থুংলখিবা অমসুং অতোপ্পা রেকোর্দশিং দিজিতেলদা ওন্থোকপগী দরকার ওইবা অদু মখোয়না ফোঙদোকখি। ত্রিনিদাদ অমসুং তোবাগোদা লৈরিবা ৬শুবা মীরোলগী ভারতমচাশিংদা ওভরসিজ সিতিজন্সিপ ওফ ইন্দিয়া (ও সি আই) কার্দ পীনাব ভারত সরকারগী ৱারেপ অমসু প্রধান মন্ত্রী মোদীনা লাউথোকখি।

ৱেস্ত ইন্দিজ য়ুনিভর্সিতিদা হিন্দী অমসুং ইন্দিয়ান স্তদিজগী একাদেমিক চিয়ারশিং অমুক হিঙ্গৎহনবদা প্রধান মন্ত্রী অনিমক্না তরাম্না ওকখি অমসুং মসিনা ত্রিনিদাদ অমসুং তোবাগো অমসুং ভারতকী মরক্ত লাইরিক-লাইশু অমসুং নাৎকী মরীশিং হেন্না ফগৎহনগনি অমসুং থায়নগী লৌশিং অমসুং অয়ুর্বেদগী লৌশিং ফংহনবদা মতেং পাংগনি।

ইন্দিয়া- ত্রিনিদাদ অমসুং তোবাগো পর্লিয়ামেন্তরি ফ্রেন্দসিপ গ্রুপ হিঙ্গৎহনবা, ভারত্ত ত্রিনিদাদ অমসুং তোবাগোগী সংসদকী মেম্বরশিং ত্রেনিং পীবা অমসুং লৈবাক অমনা অমদা সংসদকী মীহুৎ কাংবু চাং নাইনা চৎথোক-চৎশিন তৌনবগী তঙাইফদবা অদু লুচিংবা অনিনা খন্নখি।

লুচিংবা অনিনা মালেমগী ওইরক্লিবা ফিবমশিং অমসুং শান্তি, ক্লাইমেত জজতিস অমসুং পুন্না চাউখৎমিন্নবদা থম্লিবা মখোয়গী থাজবা অদু অমুক হন্না ফোঙদোক্নখি অমসুং গ্লোভেল সাউথকী খোল্লাউ হেন্না মশক থোকহনখি। মালেমগী তোঙান তোঙানবা লুপশিংদা লৈবাক অমনা অমবু শৌগৎনবদা মখোয়না থাগৎপা ফোঙদোকখি।

মালেমগী হৌজিক ওইরিবা অচুম্বশিং হেন্না ফজনা মমি তাবা ঙম্নবা য়ু.এন.এস.সি য়াওনা য়ু.এন অমুক হন্না শেমদোকপগী দরকার ওইবা অদু মখোয়না অমুক হন্না ফোঙদোকখি। মালেমগী ওইনা মুক্নবা হেনগৎলক্লিবা অসি য়েংদুনা, ৱারি শানবা অমসুং কুতনিতিগী মাইকৈদা চঙশিন্নবা লুচিংবা অনিমক্না তকশিনখি। য়ু.এন.এস.সিদা ভারতনা লেংদ্রবা মেম্বর অমা ওইবদা ত্রিনিদাদ অমসুং তোবাগোনা শৌগৎলিবা অদু অমুক হন্না ফোঙদোকখি। ২০২৭-২৮ গী ওইনা য়ু.এন.এস.সিদা নন-পর্মনেন্ত সিত অমা ফংনবা ত্রিনিদাদ অমসুং তোবাগোনা মীরেপ অমা ওইবদা ভারতনা শৌগৎকনি হায়না ফোঙদোকখি অমসুং ভারতনা ২০২৮-২৯ গী ওইনা মীরেপ অমা ওইবদা ত্রিনিদাদ অমসুং তোবাগোনা শৌগৎকনি হায়না থাজবা পীখি।

মহাক তরাম্না ওকপগীদমক প্রধান মন্ত্রী মোদীনা ত্রিনিদাদ অমসুং তোবাগোগী সরকার অমসুং মীয়াম থাগৎপা ফোঙদোকখি। লৈবাক অনিমক্না খুদোংচাগদবা মতম অমদা ভারত্ত লাক্নবা ত্রিনিদাদ অমসুং তোবাগোগী প্রধান মন্ত্রী কমলাদা প্রধান মন্ত্রী মোদীনা চেবাউ পীখি। ভারতকী প্রধান মন্ত্রী শ্রী নরেন্দ্র মোদীগী ত্রিনিদাদ অমসুং তোবাগোগী মাইপাক্লবা সরকারগী খোঙচৎ অসিগী ফল মখোয়না য়ানখ্রে অমসুং মসিনা লৈবাক অনিগী মরীশিং অনৌবা যুগ অমদা পুখৎনবা লম্বীশিং শেম্লে। মপাঙ্গল কনবা, কালুপ খুদিংমক কোনশিনবা অমসুং মীৎয়েং শানবা ইন্দিয়া- ত্রিনিদাদ অমসুং তোবাগো মরী অমা লৈহন্নবা থাজবা অমুক হন্না পীনখ্রে।

***