എന്റെ മന്ത്രിസഭാ സഹപ്രവർത്തകരായ ശ്രീ ഗിരിരാജ് സിംഗ് ജി, പബിത്ര മാർഗരിറ്റ ജി, വിവിധ രാജ്യങ്ങളുടെ ബഹുമാന്യരായ അംബാസഡർമാരേ, മുതിർന്ന നയതന്ത്രജ്ഞരേ, കേന്ദ്ര-സംസ്ഥാന ഗവൺമെന്റുകളിലെ ഉദ്യോഗസ്ഥരേ, ഫാഷൻ, തുണിത്തരങ്ങളുടെ ലോകത്തെ വിശിഷ്ട വ്യക്തികളേ, സംരംഭകരേ, വിദ്യാർത്ഥികളേ, എന്റെ പ്രിയപ്പെട്ട നെയ്ത്തുകാരേ, കരകൗശല വിദഗ്ധരേ, മഹതികളേ, മാന്യരേ!

ഇന്ന് ഭാരത് മണ്ഡപം ഭാരത് ടെക്‌സിന്റെ രണ്ടാം പതിപ്പിന് ആതിഥേയത്വം വഹിക്കുന്നു. ഈ പരിപാടി നമ്മുടെ സമ്പന്നമായ പാരമ്പര്യങ്ങളെ ആഘോഷിക്കുക മാത്രമല്ല, വികസിത് ഭാരതത്തിന്റെ (വികസിത ഇന്ത്യ) അപാരമായ സാധ്യതകൾ പ്രദർശിപ്പിക്കുകയും ചെയ്യുന്നു. നമ്മൾ നട്ട വിത്ത് ഇപ്പോൾ അതിവേഗം വളർന്ന് ഒരു ആൽമരമായി മാറുന്നത് രാഷ്ട്രത്തിന് വളരെയധികം സന്തോഷകരമായ കാര്യമാണ്. ഭാരത് ടെക്സ് ഒരു പ്രമുഖ ആഗോള തുണിത്തര പരിപാടിയായി പരിണമിച്ചുകൊണ്ടിരിക്കുകയാണ്. ഈ സമയം, മൂല്യ ശൃംഖലയുടെ മുഴുവൻ സ്പെക്ട്രത്തെയും പ്രതിനിധീകരിക്കുന്നു, അതിൽ 12 അനുബന്ധ ഗ്രൂപ്പുകൾ ഒരുമിച്ച് പങ്കെടുക്കുന്നു. കൂടാതെ, ആക്‌സസറികൾ, വസ്ത്രങ്ങൾ, യന്ത്രങ്ങൾ, രാസവസ്തുക്കൾ, ചായങ്ങൾ എന്നിവയും പ്രദർശിപ്പിച്ചിരിക്കുന്നു. ലോകമെമ്പാടുമുള്ള നയആസൂത്രകർ, സിഇഒമാർ, വ്യവസായ നേതാക്കൾ എന്നിവർക്കിടയിൽ ഇടപഴകൽ, സഹകരണം, പങ്കാളിത്തം എന്നിവയ്ക്കുള്ള ശക്തമായ വേദിയായി ഭാരത് ടെക്സ് വളർന്നുവരികയാണ്. ഈ പരിപാടി വിജയകരമാക്കുന്നതിൽ എല്ലാ പങ്കാളികളുടെയും സമർപ്പിത ശ്രമങ്ങൾ ശരിക്കും പ്രശംസനീയമാണ്, ഇതിൽ ഉൾപ്പെട്ട എല്ലാവർക്കും എന്റെ ഹൃദയംഗമമായ അഭിനന്ദനങ്ങൾ.

സുഹൃത്തുക്കളെ,

ഇന്ന്, ഭാരത് ടെക്സിൽ 120-ലധികം രാജ്യങ്ങളിൽ നിന്നുള്ള പങ്കാളിത്തമുണ്ട് - ഗിരിരാജ് ജി പറഞ്ഞതുപോലെ, 126 രാജ്യങ്ങൾ - അതായത് ഇവിടെയുള്ള ഓരോ സംരംഭകനും ഈ 120+ രാജ്യങ്ങളുമായി പരിചയം നേടുന്നു. പ്രാദേശിക തലത്തിൽ നിന്ന് അന്താരാഷ്ട്ര തലത്തിലേക്ക് തങ്ങളുടെ ബിസിനസുകൾ വികസിപ്പിക്കാനുള്ള അവസരം അവർക്കുണ്ട്. പുതിയ വിപണികൾ തേടുന്നവർ വ്യത്യസ്ത രാജ്യങ്ങളുടെ സാംസ്കാരിക മുൻഗണനകളെക്കുറിച്ച് വിലപ്പെട്ട ഉൾക്കാഴ്ചകൾ നേടുന്നു.

നേരത്തെ, എനിക്ക് ചില പ്രദർശന സ്റ്റാളുകൾ സന്ദർശിക്കാൻ അവസരം ലഭിച്ചു. എനിക്ക് എല്ലാം കാണാൻ കഴിഞ്ഞില്ലെങ്കിലും - ഞാൻ അങ്ങനെ ചെയ്യാൻ ശ്രമിച്ചിരുന്നെങ്കിൽ, എനിക്ക് രണ്ട് ദിവസമെടുക്കുമായിരുന്നു, നിങ്ങൾ അനുവദിക്കില്ലെന്ന് എനിക്ക് ഉറപ്പുണ്ട് - പല പ്രതിനിധികളുമായും സംവദിക്കാനും അവരുടെ കാഴ്ചപ്പാടുകൾ മനസ്സിലാക്കാനും എനിക്ക് കഴിഞ്ഞു. കഴിഞ്ഞ വർഷം ഭാരത് ടെക്സിൽ പങ്കെടുത്തതിന് ശേഷം വലിയ തോതിൽ പുതിയ വാങ്ങുന്നവരെ ലഭിച്ചതായും ഇത് അവരുടെ ബിസിനസുകൾ ഗണ്യമായി വികസിപ്പിച്ചതായും നിരവധി പങ്കാളികൾ പങ്കുവെച്ചു. ഒരു പ്രത്യേക രസകരമായ അഭിപ്രായം, അല്ലെങ്കിൽ ഒരു 'മധുരമായ പരാതി' എന്റെ ശ്രദ്ധയിൽപ്പെട്ടു. തങ്ങളുടെ ഉൽപ്പന്നങ്ങൾക്കുള്ള ആവശ്യം വളരെയധികം വർദ്ധിച്ചതിനാൽ അത് നിറവേറ്റാൻ തങ്ങൾ ബുദ്ധിമുട്ടുന്നുണ്ടെന്ന് ചില പങ്കാളികൾ പറഞ്ഞു. കൂടാതെ, ഒരു ഫാക്ടറി സ്ഥാപിക്കുന്നതിന് സാധാരണയായി 70–75 കോടി രൂപ നിക്ഷേപം ആവശ്യമാണെന്നും അത്തരം ഓരോ സൗകര്യവും ഏകദേശം 2,000 പേർക്ക് തൊഴിൽ നൽകുന്നുണ്ടെന്നും ചില സംരംഭകർ എന്നെ അറിയിച്ചു. ബാങ്കിംഗ് മേഖലയിലുള്ളവർക്ക് ഞാൻ ഊന്നിപ്പറയാൻ ആഗ്രഹിക്കുന്നു - ദയവായി അവരുടെ ആവശ്യങ്ങൾ ശ്രദ്ധിക്കുകയും മുൻഗണനകൾ മനസ്സിലാക്കുകയും അതിനനുസരിച്ച് നിങ്ങളുടെ പിന്തുണ നൽകുകയും ചെയ്യുക.

സുഹൃത്തുക്കളേ,

ഈ പരിപാടി തുണി മേഖലയിലെ നിക്ഷേപം, കയറ്റുമതി, മൊത്തത്തിലുള്ള വളർച്ച എന്നിവയ്ക്ക് ഗണ്യമായ ഉത്തേജനം നൽകുന്നു.

സുഹൃത്തുക്കളേ,

ഭാരത് ടെക്സിൽ, ഞങ്ങളുടെ വസ്ത്രങ്ങൾ ഭാരതത്തിന്റെ സാംസ്കാരിക വൈവിധ്യത്തെ മനോഹരമായി പ്രതിഫലിപ്പിക്കുന്നു. കിഴക്ക് നിന്ന് പടിഞ്ഞാറ് വരെയും, വടക്ക് നിന്ന് തെക്ക് വരെയും, വൈവിധ്യമാർന്ന പരമ്പരാഗത വസ്ത്രങ്ങളുടെ ഒരു വലിയ ശേഖരം ഞങ്ങൾ നിങ്ങൾക്ക് വാഗ്ദാനം ചെയ്യുന്നു. ലഖ്‌നൗവി ചിക്കൻകാരി, രാജസ്ഥാനിലെയും ഗുജറാത്തിലെയും ബന്ധാനി, ഗുജറാത്തിലെ പടോള, എന്റെ കാശിയിലെ ബനാറസി സിൽക്ക്, തെക്ക് നിന്നുള്ള കാഞ്ചീപുരം സിൽക്ക്, ജമ്മു കശ്മീരിൽ നിന്നുള്ള പശ്മിന - നമ്മുടെ സമ്പന്നമായ പൈതൃകം പ്രദർശിപ്പിക്കുന്നതിനുള്ള ഇത്തരം പരിപാടികൾക്ക് ഇത് തികഞ്ഞ അവസരമാണ്. നമ്മുടെ വൈവിധ്യവും അതുല്യമായ കരകൗശല വൈദഗ്ധ്യവും വസ്ത്ര വ്യവസായത്തിന്റെ വികാസത്തിന് ഒരു പ്രേരകശക്തിയായി വർത്തിക്കണം.

സുഹൃത്തുക്കളേ,

കഴിഞ്ഞ വർഷം, തുണി വ്യവസായത്തിലെ അഞ്ച് 'എഫ്' ഘടകങ്ങളെക്കുറിച്ച് ഞാൻ സംസാരിച്ചു - ഫാം, ഫൈബർ, ഫാബ്രിക്, ഫാഷൻ, ഫോറിൻ. ഈ ദർശനം ഇപ്പോൾ ഭാരതത്തിനായുള്ള ഒരു ദൗത്യമായി പരിണമിച്ചു കൊണ്ടിരിക്കുകയാണ്, കർഷകർക്കും, നെയ്ത്തുകാർക്കും, ഡിസൈനർമാർക്കും, വ്യാപാരികൾക്കും ഒരുപോലെ വളർച്ചയുടെ പുതിയ വഴികൾ തുറക്കുന്നു. കഴിഞ്ഞ വർഷം ഇന്ത്യയുടെ തുണിത്തരങ്ങളുടെയും വസ്ത്രങ്ങളുടെയും കയറ്റുമതി 7 ശതമാനം വർദ്ധിച്ചു. ഇനി, വെറും 7 ശതമാനത്തിന് നിങ്ങൾ കൈയ്യടിക്കാൻ പോകുകയാണോ? അടുത്ത തവണ 17 ശതമാനം വർദ്ധനവ് കൈവരിക്കുന്ന സമയത്തിനു വേണ്ടി  നമുക്ക് ഈ കൈയ്യടി മാറ്റിവെക്കാം! ഇന്ന്, ലോകത്തിലെ തുണിത്തരങ്ങളുടെയും വസ്ത്രങ്ങളുടെയും കയറ്റുമതിയിൽ ഞങ്ങൾ ആറാമത്തെ വലിയ രാജ്യമാണ്, ഞങ്ങളുടെ തുണിത്തരങ്ങളുടെ കയറ്റുമതി 3 ലക്ഷം കോടി രൂപയിലെത്തി. 2030 ആകുമ്പോഴേക്കും ഇത് 9 ലക്ഷം കോടി രൂപയായി ഉയർത്തുക എന്നതാണ് ഇപ്പോൾ നമ്മുടെ ലക്ഷ്യം. എന്നിരുന്നാലും, 2030 നെ കുറിച്ച് ഞാൻ പരാമർശിക്കുമ്പോൾ, ഇന്ന് ഞാൻ ഇവിടെ കണ്ട ആവേശം കണക്കിലെടുക്കുമ്പോൾ, നിങ്ങൾ എന്റെ പ്രവചനങ്ങളെ മറികടന്ന് ഈ ലക്ഷ്യം എത്രയും വേഗം കൈവരിക്കുമെന്ന് ഞാൻ വിചാരിക്കുന്നു!

സുഹൃത്തുക്കളേ,

ഒരു ദശാബ്ദക്കാലത്തെ അക്ഷീണ പരിശ്രമത്തിന്റെയും സ്ഥിരമായ നയങ്ങളുടെയും ഫലമാണ് ഈ വിജയം. കഴിഞ്ഞ പത്ത് വർഷത്തിനിടെ നമ്മുടെ തുണി മേഖലയിലെ വിദേശ നിക്ഷേപം ഇരട്ടിയായി എന്നത് ഈ നിരന്തരമായ ശ്രമങ്ങളുടെ ഫലമാണ്. ഇന്ന്, നിരവധി വിദേശ കമ്പനികൾ ഇന്ത്യയിൽ നിക്ഷേപിക്കാൻ താൽപ്പര്യപ്പെടുന്നുണ്ടെന്ന് ചില സുഹൃത്തുക്കൾ എന്നോട് പങ്കുവെച്ചു,  അവരോട് ഞാൻ പറഞ്ഞു - നിങ്ങളാണ് ഞങ്ങളുടെ ഏറ്റവും വലിയ അംബാസഡർമാർ! ഭാരതത്തിന്റെ അവസരങ്ങളെക്കുറിച്ച് പറയുമ്പോൾ, ആളുകൾ അത് തൽക്ഷണം വിശ്വസിക്കുന്നു. ​ഗവൺമെന്റ് എന്തെങ്കിലും പറഞ്ഞാൽ, അവർ അത് സൂക്ഷ്മമായി പരിശോധിക്കുകയും വസ്തുതകൾ പരിശോധിക്കുകയും അതിനെക്കുറിച്ച് ആലോചിച്ച് തീരുമാനമെടുക്കുകയും ചെയ്യും. എന്നാൽ അതേ വ്യവസായത്തിൽ നിന്നുള്ള ഒരു സഹ ബിസിനസുകാരൻ സംസാരിക്കുമ്പോൾ, മറ്റുള്ളവർ അവരുടെ വാക്ക് വിശ്വസിക്കുകയും ഒരു മടിയും കൂടാതെ അവസരം മുതലെടുക്കുകയും ചെയ്യുന്നു.

സുഹൃത്തുക്കളേ,

നമ്മുടെ രാജ്യത്തെ ഏറ്റവും പ്രധാനപ്പെട്ട മേഖലകളിൽ ഒന്നാണ് വസ്ത്ര വ്യവസായം എന്ന് നിങ്ങൾക്കെല്ലാവർക്കും അറിയാം, അത് വിപുലമായ തൊഴിലവസരങ്ങൾ നൽകുന്നു. ഇന്ത്യയുടെ ഉൽപ്പാദന മേഖലയുടെ 11% സംഭാവന ചെയ്യുന്നത് ഈ വ്യവസായമാണ്. ഈ വർഷത്തെ ബജറ്റിൽ 'മിഷൻ മാനുഫാക്ചറിംഗ്' എന്നതിന് ഞങ്ങൾ ശക്തമായ ഊന്നൽ നൽകിയിട്ടുണ്ടെന്ന് നിങ്ങൾ ശ്രദ്ധിച്ചിട്ടുണ്ടാകും, നിങ്ങൾ ഈ ദൗത്യത്തിന്റെ അവിഭാജ്യ ഘടകമാണ്. അതുകൊണ്ട്, ഈ മേഖലയിലേക്ക് നിക്ഷേപം ഒഴുകിയെത്തുകയും വളർച്ച ത്വരിതപ്പെടുകയും ചെയ്യുമ്പോൾ, കോടിക്കണക്കിന് ടെക്സ്റ്റൈൽ തൊഴിലാളികൾ അതിന്റെ നേട്ടങ്ങൾ കൊയ്യുന്നു.

സുഹൃത്തുക്കളേ,

ഇന്ത്യയുടെ തുണിത്തര മേഖലയിലെ വെല്ലുവിളികളെ നേരിടുകയും പുതിയ അവസരങ്ങൾ തുറക്കുകയും ചെയ്യുക എന്നതാണ് ഞങ്ങളുടെ പ്രതിബദ്ധത. ഇത് നേടിയെടുക്കുന്നതിനായി, ഞങ്ങൾ ദീർഘവീക്ഷണമുള്ളതും ദീർഘകാലവുമായ തന്ത്രങ്ങൾ നടപ്പിലാക്കുന്നു. നമ്മുടെ പരിശ്രമങ്ങളുടെ ഒരു പ്രതിഫലനം ഈ വർഷത്തെ ബജറ്റിൽ കാണാൻ കഴിയും. വ്യവസായത്തിന്റെ പ്രധാന ആവശ്യകതകൾ മനസ്സിൽ വെച്ചുകൊണ്ട്, രാജ്യത്തിനുള്ളിൽ വിശ്വസനീയമായ പരുത്തി വിതരണം ഉറപ്പാക്കാനും, ഇന്ത്യൻ പരുത്തിയെ ആഗോളതലത്തിൽ മത്സരാധിഷ്ഠിതമാക്കാനും, ഞങ്ങളുടെ മുഴുവൻ മൂല്യ ശൃംഖലയും ശക്തിപ്പെടുത്താനും ഞങ്ങൾ പ്രവർത്തിക്കുന്നു. ഇതിനായി, ഞങ്ങൾ 'പരുത്തി ഉൽപ്പാദനക്ഷമതയ്ക്കുള്ള ദൗത്യം' പ്രഖ്യാപിച്ചു. കൂടാതെ, സാങ്കേതിക തുണിത്തരങ്ങൾ പോലുള്ള ഉയർന്നുവരുന്ന മേഖലകളിലും ഞങ്ങൾ ശ്രദ്ധ കേന്ദ്രീകരിക്കുന്നു. ഗുജറാത്ത് മുഖ്യമന്ത്രിയായിരിക്കെ തുണി വ്യവസായത്തിൽ നിന്നുള്ള ആളുകളുമായി ഞാൻ ഇടപഴകിയിരുന്നത് എനിക്ക് ഓർമ്മയുണ്ട്. അന്ന് ഞാൻ സാങ്കേതിക തുണിത്തരങ്ങളെക്കുറിച്ച് സംസാരിക്കുമ്പോൾ, അവർ എന്താണ് ഉദ്ദേശിക്കുന്നതെന്ന് എന്നോട് ചോദിക്കുമായിരുന്നു. ഇന്ന്, ഈ മേഖലയിൽ ഭാരതം സ്വയം സ്ഥാനം പിടിക്കുന്നത് കാണുന്നതിൽ എനിക്ക് സന്തോഷമുണ്ട്. തദ്ദേശീയ കാർബൺ ഫൈബറും അതിന്റെ ഡെറിവേറ്റീവ് ഉൽപ്പന്നങ്ങളും ഞങ്ങൾ സജീവമായി പ്രോത്സാഹിപ്പിക്കുന്നു, ഉയർന്ന നിലവാരമുള്ള കാർബൺ ഫൈബർ ഉൽപ്പാദിപ്പിക്കുന്നതിൽ ഭാരതം ഗണ്യമായ പുരോഗതി കൈവരിക്കുന്നു. ഈ ശ്രമങ്ങൾക്ക് പുറമേ, തുണി വ്യവസായത്തെ പിന്തുണയ്ക്കുന്നതിനുള്ള നിർണായക നയ തീരുമാനങ്ങൾ ഞങ്ങൾ നടപ്പിലാക്കുന്നു. ഉദാഹരണത്തിന്, ഈ വർഷത്തെ ബജറ്റിൽ, എംഎസ്എംഇകൾക്കുള്ള വർഗ്ഗീകരണ മാനദണ്ഡങ്ങൾ പരിഷ്കരിക്കുകയും വികസിപ്പിക്കുകയും ചെയ്തിട്ടുണ്ട്. കൂടാതെ, ക്രെഡിറ്റ് ലഭ്യത വർദ്ധിപ്പിച്ചിട്ടുണ്ട്. നമ്മുടെ ടെക്സ്റ്റൈൽ മേഖലയുടെ 80% സംഭാവന ചെയ്യുന്നത് എം.എസ്.എം.ഇ.കളാണെന്നതിനാൽ, ഈ പരിഷ്കാരങ്ങൾ വളരെയധികം നേട്ടങ്ങൾ കൊണ്ടുവരും. 

സുഹൃത്തുക്കളേ,

വൈദഗ്ധ്യമുള്ള തൊഴിൽ ശക്തി ലഭ്യമായാൽ മാത്രമേ ഏതൊരു മേഖലയും അഭിവൃദ്ധി പ്രാപിക്കൂ. തുണി വ്യവസായത്തിൽ, വൈദഗ്ദ്ധ്യം നിർണായക പങ്ക് വഹിക്കുന്നു. അതുകൊണ്ടാണ് ഈ മേഖലയ്ക്കായി പ്രത്യേകമായി ശക്തമായ ഒരു പ്രതിഭാ സംഘത്തെ വികസിപ്പിക്കുന്നതിനായി ഞങ്ങൾ പ്രവർത്തിക്കുന്നത്. 'നാഷണൽ സെന്റർസ് ഓഫ് എക്സലൻസ് ഫോർ സ്കില്ലിംഗ്' ഈ സംരംഭത്തിൽ നിർണായക പങ്ക് വഹിക്കുന്നു, അതേസമയം, മൂല്യ ശൃംഖലയിലുടനീളം ആവശ്യമായ കഴിവുകൾ തൊഴിലാളികളെ സജ്ജരാക്കാൻ  'സമർഥ് യോജന'  സഹായിക്കുന്നു. ഇന്ന് രാവിലെ, 'സമർഥ്' വഴി പരിശീലനം നേടിയ നിരവധി സ്ത്രീകളുമായി സംസാരിക്കാൻ എനിക്ക് അവസരം ലഭിച്ചു. കഴിഞ്ഞ അഞ്ച്, ഏഴ്, അല്ലെങ്കിൽ പത്ത് വർഷക്കാലത്തെ അവരുടെ പുരോഗതിയെക്കുറിച്ച് കേട്ടപ്പോൾ എനിക്ക് അതിയായ അഭിമാനം തോന്നി. അതേസമയം, സാങ്കേതികവിദ്യയുടെ ഈ യുഗത്തിൽ, പരമ്പരാഗത കൈത്തറി, കരകൗശല വൈദഗ്ധ്യങ്ങൾക്ക് അർഹമായ പ്രാധാന്യം തുടർന്നും ലഭിക്കേണ്ടതുണ്ടെന്ന് ഞങ്ങൾ തിരിച്ചറിയുന്നു. കൈത്തറി കരകൗശല വിദഗ്ധരുടെ കരകൗശല വൈദഗ്ദ്ധ്യം ആഗോള വിപണികളിൽ എത്തിക്കുക, അവരുടെ കഴിവുകൾ വർദ്ധിപ്പിക്കുക, അവർക്ക് പുതിയ അവസരങ്ങൾ സൃഷ്ടിക്കുക എന്നിവയാണ് ഞങ്ങളുടെ ലക്ഷ്യം. ഈ ദിശയിൽ ഞങ്ങൾ സജീവമായി പ്രവർത്തിക്കുന്നു. കഴിഞ്ഞ ദശകത്തിൽ, കൈത്തറി പ്രോത്സാഹിപ്പിക്കുന്നതിനായി 2,400-ലധികം പ്രധാന മാർക്കറ്റിംഗ് പരിപാടികൾ സംഘടിപ്പിച്ചിട്ടുണ്ട്—2,400-ലധികം! കൂടാതെ, കൈത്തറി ഉൽപ്പന്നങ്ങളുടെ ഓൺലൈൻ വിപണനം സുഗമമാക്കുന്നതിനായി 'ഇന്ത്യ-കൈകൊണ്ട് നിർമ്മിച്ചത്' ('India-Handmade') എന്ന പേരിൽ ഒരു ഇ-കൊമേഴ്‌സ് പ്ലാറ്റ്‌ഫോം ആരംഭിച്ചിട്ടുണ്ട്. ആയിരക്കണക്കിന് കൈത്തറി ബ്രാൻഡുകൾ ഇതിനകം തന്നെ ഈ പ്ലാറ്റ്‌ഫോമിൽ രജിസ്റ്റർ ചെയ്തിട്ടുണ്ട്, കൂടാതെ കൈത്തറി ഉൽപ്പന്നങ്ങളുടെ ജിഐ ടാഗിംഗിൽ നിന്ന് അവർക്ക് വളരെയധികം പ്രയോജനം ലഭിക്കുകയും ചെയ്യുന്നു.

സുഹൃത്തുക്കളേ,

യുവമനസ്സുകളിൽ നിന്ന് ടെക്സ്റ്റൈൽ മേഖലയ്ക്ക് നൂതനവും സുസ്ഥിരവുമായ പരിഹാരങ്ങൾ പ്രോത്സാഹിപ്പിക്കുന്നതിനായി കഴിഞ്ഞ വർഷത്തെ ഭാരത് ടെക്സ് പരിപാടിയിൽ 'ടെക്സ്റ്റൈൽസ് സ്റ്റാർട്ടപ്പ് ഗ്രാൻഡ് ചലഞ്ച്' ആരംഭിച്ചു. രാജ്യമെമ്പാടുമുള്ള യുവാക്കൾ വളരെ ആവേശത്തോടെ ഈ ചലഞ്ചിൽ പങ്കെടുത്തു. ഈ മത്സരത്തിലെ വിജയികളെയും ഇന്ന് ഇവിടെ ക്ഷണിച്ചിട്ടുണ്ട്, അവർ നമുക്കിടയിൽ സന്നിഹിതരാണ്. കൂടാതെ, ഈ യുവ നവീന ആശയമുള്ള യുവാക്കളെ പിന്തുണയ്ക്കാനും പരിപോഷിപ്പിക്കാനും താൽപ്പര്യമുള്ള സ്റ്റാർട്ടപ്പുകളെയും ക്ഷണിച്ചിട്ടുണ്ട്. ഈ സംരംഭത്തെ ഐഐടി മദ്രാസ്, അടൽ ഇന്നൊവേഷൻ മിഷൻ, നിരവധി പ്രമുഖ സ്വകാര്യ ടെക്സ്റ്റൈൽ സ്ഥാപനങ്ങൾ എന്നിവ പിന്തുണയ്ക്കുന്നു. ഇത്തരം പിച്ച് ഫെസ്റ്റുകൾ രാജ്യത്തെ സ്റ്റാർട്ടപ്പ് സംസ്കാരത്തെ ഗണ്യമായി ഉത്തേജിപ്പിക്കും.

പുതിയ ടെക്നോ-ടെക്സ്റ്റൈൽ സ്റ്റാർട്ടപ്പുകൾ സ്ഥാപിക്കാനും പുതിയതും വിപ്ലവകരവുമായ ആശയങ്ങൾ വികസിപ്പിക്കാനും ഞാൻ നമ്മുടെ യുവ സംരംഭകരോട് അഭ്യർത്ഥിക്കുന്നു. നമ്മുടെ ടെക്സ്റ്റൈൽ വ്യവസായത്തിന് ഒരു നിർദ്ദേശം കൂടി എനിക്കുണ്ട് - ഈ മേഖലയ്ക്കായി നൂതന ഉപകരണങ്ങൾ വികസിപ്പിക്കുന്നതിന് ഐഐടികൾ പോലുള്ള സ്ഥാപനങ്ങളുമായി സഹകരിക്കുക. ആധുനിക ശൈലികൾക്കൊപ്പം പരമ്പരാഗത വസ്ത്രങ്ങൾ യുവതലമുറ കൂടുതലായി സ്വീകരിക്കുന്ന ഒരു പ്രവണത സോഷ്യൽ മീഡിയയിൽ വളർന്നുവരുന്നതായി നാം കാണുന്നു. തൽഫലമായി, പാരമ്പര്യത്തിന്റെയും നവീകരണത്തിന്റെയും സംയോജനം എക്കാലത്തേക്കാളും പ്രാധാന്യമർഹിക്കുന്നു. നമ്മുടെ പരമ്പരാഗത വസ്ത്രങ്ങളിൽ നിന്ന് പ്രചോദനം ഉൾക്കൊണ്ട്, ഇന്ത്യൻ യുവാക്കളെ മാത്രമല്ല, ലോകമെമ്പാടുമുള്ള പ്രേക്ഷകരെയും ആകർഷിക്കുന്ന ഉൽപ്പന്നങ്ങൾ നാം അവതരിപ്പിക്കണം. മറ്റൊരു നിർണായക വശം സാങ്കേതികവിദ്യയുടെ വർദ്ധിച്ചുവരുന്ന സ്വാധീനമാണ്. പുതിയ ഫാഷൻ ട്രെൻഡുകൾ തിരിച്ചറിയുന്നതിലും നൂതനമായ ശൈലികൾ സൃഷ്ടിക്കുന്നതിലും കൃത്രിമബുദ്ധി (AI) വളരുന്ന പങ്ക് വഹിക്കുന്നു. അടുത്തിടെ NIFT സ്റ്റാളിൽ നടത്തിയ സന്ദർശനത്തിൽ, 2026-ലെ ഫാഷൻ ട്രെൻഡുകൾ പ്രവചിക്കാൻ AI ഇപ്പോൾ ഉപയോഗിക്കുന്നുണ്ടെന്ന് എനിക്ക് വിവരം ലഭിച്ചു. മുമ്പ്, ലോകം ഫാഷൻ ട്രെൻഡുകൾ നമ്മിലേക്ക് നിർദ്ദേശിച്ചിരുന്നു - കറുപ്പ് ധരിക്കാൻ ഞങ്ങളോട് പറഞ്ഞിരുന്നു, ഞങ്ങൾ അത് അനുസരിച്ചു. എന്നാൽ ഇപ്പോൾ, ലോകത്തിനായുള്ള പ്രവണതകൾ നമ്മൾ നിശ്ചയിക്കും. അതുകൊണ്ടാണ് ഒരു വശത്ത് പരമ്പരാഗത ഖാദിയെ പ്രോത്സാഹിപ്പിക്കുമ്പോൾ, മറുവശത്ത്, ഭാവിയിലെ ഫാഷൻ ട്രെൻഡുകൾ വിശകലനം ചെയ്യുന്നതിന് AI ഉപയോഗപ്പെടുത്തുന്നത്.

2003-ൽ മുഖ്യമന്ത്രിയായ എന്റെ ആദ്യകാലങ്ങളിലെ ഒരു സംഭവം ഞാൻ ഓർക്കുന്നു. ഗാന്ധിജയന്തി ദിനത്തിൽ, മഹാത്മാഗാന്ധിയുടെ ജന്മസ്ഥലമായ പോർബന്തറിൽ ഞാൻ ഒരു ഖാദി ഫാഷൻ ഷോ സംഘടിപ്പിച്ചു. ഈ ദർശനത്തിന് ജീവൻ പകരാൻ എൻഐഎഫ്ടിയിലെയും എൻഐഡിയിലെയും വിദ്യാർത്ഥികൾ സഹകരിച്ചു. "വൈഷ്ണവ് ജൻ തോ തേനേ രേ കഹിയേ" എന്ന ഭജന്റെ പശ്ചാത്തല സംഗീതത്തിലായിരുന്നു ഷോ. ആ സമയത്ത്, വിനോബ ഭാവെയുടെ അടുത്ത അനുയായികളിൽ ചിലരെ ഞാൻ അതിൽ പങ്കെടുക്കാൻ ക്ഷണിച്ചിരുന്നു. ഫാഷൻ ഷോകളിൽ പലപ്പോഴും പഴയ തലമുറയ്ക്ക് പരിചിതമല്ലാത്ത ഭാഷയും ഭാവങ്ങളും ഉപയോഗിക്കുന്നതിനാൽ, അവർക്ക് തുടക്കത്തിൽ ഈ ആശയത്തെക്കുറിച്ച് സംശയമുണ്ടായിരുന്നു. എന്നിരുന്നാലും, ഞാൻ അവരെ വ്യക്തിപരമായി വരാൻ പ്രേരിപ്പിച്ചു. പരിപാടി കണ്ടതിനുശേഷം അവർ എന്നോട് പറഞ്ഞു, "നമുക്ക് ഖാദി ജനപ്രിയമാക്കണമെങ്കിൽ, ഇതാണ് മുന്നോട്ടുള്ള വഴി." ഇന്ന് ഖാദി ശ്രദ്ധേയമായ പുരോഗതി കൈവരിക്കുകയും ആഗോളതലത്തിൽ ശ്രദ്ധ പിടിച്ചുപറ്റുകയും ചെയ്യുന്നു. നാം അതിനെ പുതിയ ഊർജ്ജസ്വലതയോടെ പ്രോത്സാഹിപ്പിക്കുന്നത് തുടരണം. സ്വാതന്ത്ര്യസമരകാലത്ത് ഖാദി "രാഷ്ട്രത്തിനുവേണ്ടി ഖാദി" എന്നതിന്റെ പ്രതീകമായിരുന്നു. ഇനി അത് "ഫാഷനു വേണ്ടിയുള്ള ഖാദി" ആയി പരിണമിക്കണം.

സുഹൃത്തുക്കളെ,

കുറച്ചു ദിവസങ്ങൾക്ക് മുമ്പ്, അനൗൺസർ പറഞ്ഞതുപോലെ, ഞാൻ ഒരു വിദേശ സന്ദർശനം കഴിഞ്ഞ് തിരിച്ചെത്തി. ഞാൻ പാരീസിലായിരുന്നു, ലോകത്തിന്റെ ഫാഷൻ തലസ്ഥാനമായി പരക്കെ കണക്കാക്കപ്പെടുന്ന നഗരം. ഈ സന്ദർശന വേളയിൽ, വിവിധ പ്രധാന വിഷയങ്ങളിൽ നമ്മുടെ രണ്ട് രാജ്യങ്ങൾക്കിടയിൽ സുപ്രധാന പങ്കാളിത്തങ്ങൾ സ്ഥാപിക്കപ്പെട്ടു. ഞങ്ങളുടെ ചർച്ചകളുടെ കേന്ദ്ര വിഷയങ്ങളിലൊന്ന് പരിസ്ഥിതിയും കാലാവസ്ഥാ വ്യതിയാനവുമായിരുന്നു. ഇന്ന് ലോകം സുസ്ഥിരമായ ഒരു ജീവിതശൈലിയുടെ പ്രാധാന്യം കൂടുതൽ കൂടുതൽ തിരിച്ചറിഞ്ഞുവരികയാണ്, ഫാഷൻ വ്യവസായവും ഇതിൽ നിന്ന് വ്യത്യസ്തമല്ല. 'ഫാഷൻ ഫോർ എൻവയോൺമെന്റ്', 'ഫാഷൻ ഫോർ എംപവർമെന്റ്' എന്നീ ദർശനങ്ങൾ ആഗോള ഫാഷൻ സമൂഹം സ്വീകരിക്കുന്നു. ഈ കാര്യത്തിൽ ഇന്ത്യയാണ് മുന്നിൽ.

ഇന്ത്യയുടെ തുണിത്തരങ്ങളുടെ പൈതൃകത്തിന്റെ അവിഭാജ്യ ഘടകമാണ് സുസ്ഥിരത. നമ്മുടെ  ഖാദി, ഗോത്ര തുണിത്തരങ്ങൾ, പ്രകൃതിദത്ത ചായങ്ങളുടെ ഉപയോഗം എന്നിവ സുസ്ഥിരമായ ഒരു ജീവിതരീതിയോടുള്ള ഞങ്ങളുടെ ദീർഘകാല പ്രതിബദ്ധതയുടെ ഉദാഹരണങ്ങളാണ്. ഇപ്പോൾ, അത്യാധുനിക സാങ്കേതികവിദ്യകളുടെ പിന്തുണയോടെ, ഭാരതത്തിന്റെ പരമ്പരാഗത സുസ്ഥിര സാങ്കേതിക വിദ്യകൾ വികസിച്ചുകൊണ്ടിരിക്കുന്നു, ഇത് കരകൗശല വിദഗ്ധർക്കും, നെയ്ത്തുകാർക്കും, തുണി വ്യവസായവുമായി ബന്ധപ്പെട്ട കോടിക്കണക്കിന് സ്ത്രീകൾക്കും നേരിട്ട് പ്രയോജനം ചെയ്യുന്നു.

സുഹൃത്തുക്കളെ,

വിഭവ കാര്യക്ഷമത പരമാവധിയാക്കുന്നതിനും മാലിന്യം കുറയ്ക്കുന്നതിനുമുള്ള തത്വങ്ങൾ തുണി വ്യവസായം സ്വീകരിക്കണമെന്ന് ഞാൻ ഉറച്ചു വിശ്വസിക്കുന്നു. ഇന്ന് ലോകമെമ്പാടും കോടിക്കണക്കിന് വസ്ത്രങ്ങൾ പ്രതിമാസം കാലഹരണപ്പെടുന്നു, അതിൽ ഒരു പ്രധാന ഭാഗം 'ഫാസ്റ്റ് ഫാഷൻ മാലിന്യം' എന്ന വിഭാഗത്തിൽ പെടുന്നു. മാറിക്കൊണ്ടിരിക്കുന്ന ഫാഷൻ ട്രെൻഡുകൾ കാരണം ഉപേക്ഷിക്കപ്പെടുന്ന വസ്ത്രങ്ങളെയാണ് ഇത് സൂചിപ്പിക്കുന്നത്. പരിസ്ഥിതിക്കും ആവാസവ്യവസ്ഥയ്ക്കും കടുത്ത ഭീഷണി ഉയർത്തുന്ന ഈ വസ്ത്രങ്ങൾ ലോകത്തിന്റെ വിവിധ ഭാഗങ്ങളിൽ വലിച്ചെറിയപ്പെടുന്നു. 2030 ആകുമ്പോഴേക്കും ഫാഷൻ മാലിന്യം 148 ദശലക്ഷം ടണ്ണിലെത്തുമെന്ന് കണക്കുകൾ സൂചിപ്പിക്കുന്നു. നിലവിൽ, തുണിത്തരങ്ങളുടെ നാലിലൊന്നിൽ താഴെ മാത്രമേ പുനരുപയോഗം ചെയ്യുന്നുള്ളൂ. എന്നിരുന്നാലും, നമ്മുടെ തുണി വ്യവസായത്തിന് ഈ വെല്ലുവിളിയെ ഒരു അവസരമാക്കി മാറ്റാൻ കഴിയും. തുണിത്തരങ്ങളുടെ പുനരുപയോഗത്തിനും അപ്‌സൈക്ലിങ്ങിനും ഇന്ത്യയ്ക്ക് ദീർഘവും വൈവിധ്യപൂർണ്ണവുമായ ഒരു പാരമ്പര്യമുണ്ട്. പഴയതോ ഉപയോഗിക്കാത്തതോ ആയ തുണിത്തരങ്ങൾ ഞങ്ങൾ എങ്ങനെ പുനരുപയോഗിക്കുന്നുവെന്ന് നിങ്ങളിൽ പലർക്കും പരിചിതമായിരിക്കും. ഉദാഹരണത്തിന്, ഭാരതത്തിൽ, ഉപേക്ഷിക്കപ്പെട്ട തുണിത്തരങ്ങൾ കൊണ്ടാണ് പരവതാനികൾ നിർമ്മിക്കുന്നത്, വീട്ടമ്മമാരോടൊപ്പം നെയ്ത്തുകാരും തുണി അവശിഷ്ടങ്ങൾ ഉപയോഗിച്ച് പായകൾ, പരവതാനികൾ, കവറുകൾ എന്നിവ നിർമ്മിക്കുന്നു. മഹാരാഷ്ട്രയിൽ, പഴയതും കീറിയതുമായ വസ്ത്രങ്ങൾ ഉപയോഗിച്ച് ഗോദാദികൾ നിർമ്മിക്കുന്ന പരമ്പരാഗത കല ഈ ചാതുര്യം പ്രകടമാക്കുന്നു. ഈ പഴക്കമുള്ള രീതികൾ നമുക്ക് നവീകരിക്കാനും ഉയർത്താനും കഴിയും, അവയെ ആഗോള വിപണിയിലേക്ക് കൊണ്ടുവരാം.

അപ്‌സൈക്ലിംഗ് പ്രോത്സാഹിപ്പിക്കുന്നതിനായി 'സ്റ്റാൻഡിംഗ് കോൺഫറൻസ് ഓഫ് പബ്ലിക് എന്റർപ്രൈസസ്', ഇ-മാർക്കറ്റ്പ്ലേസുകൾ എന്നിവയുമായി ഒരു ധാരണാപത്രത്തിൽ ഒപ്പുവച്ചുകൊണ്ട് ടെക്സ്റ്റൈൽസ് മന്ത്രാലയം ഈ ദിശയിൽ നടപടികൾ സ്വീകരിച്ചിട്ടുണ്ട്. ഇന്ത്യയിലുടനീളമുള്ള നിരവധി അപ്‌സൈക്ലർമാർ ഈ സംരംഭത്തിന് കീഴിൽ രജിസ്റ്റർ ചെയ്തിട്ടുണ്ട്. കൂടാതെ, നവി മുംബൈ, ബാംഗ്ലൂർ തുടങ്ങിയ നഗരങ്ങളിൽ തുണിത്തരങ്ങളുടെ വീടുതോറുമുള്ള മാലിന്യ ശേഖരണത്തിനുള്ള പൈലറ്റ് പദ്ധതികൾ ഇതിനകം നടന്നുവരുന്നു. ഈ ശ്രമങ്ങളിൽ സജീവമായി ഏർപ്പെടാനും, ഉയർന്നുവരുന്ന ഈ അവസരങ്ങൾ പ്രയോജനപ്പെടുത്താനും, ഈ വലിയ ആഗോള വിപണിയിൽ ശക്തമായ ഒരു സ്ഥാനം സ്ഥാപിക്കാനും ഞാൻ നമ്മുടെ സ്റ്റാർട്ടപ്പുകളെ പ്രോത്സാഹിപ്പിക്കുന്നു. ഇന്ത്യയുടെ തുണിത്തരങ്ങളുടെ പുനരുപയോഗ വിപണി വരും വർഷങ്ങളിൽ 400 മില്യൺ യുഎസ് ഡോളറിലെത്തുമെന്ന് പ്രതീക്ഷിക്കുന്നു, അതേസമയം ആഗോള പുനരുപയോഗ തുണിത്തരങ്ങളുടെ വിപണി ഏകദേശം 7.5 ബില്യൺ യുഎസ് ഡോളറിലെത്തുമെന്ന് കണക്കാക്കപ്പെടുന്നു. ഇപ്പോൾ തന്ത്രപരമായ നടപടികൾ സ്വീകരിക്കുന്നതിലൂടെ, ഈ വിപണിയിൽ കൂടുതൽ പങ്ക് നേടാനുള്ള കഴിവ് ഇന്ത്യയ്ക്കുണ്ട്.

സുഹൃത്തുക്കളേ,

നൂറ്റാണ്ടുകൾക്ക് മുമ്പ്, ഭാരതം സാമ്പത്തിക അഭിവൃദ്ധിയുടെ കൊടുമുടിയിൽ നിന്നപ്പോൾ, ആ വിജയത്തിൽ തുണി വ്യവസായം നിർണായക പങ്ക് വഹിച്ചു. ഇന്ന്, ഒരു വീകസിത ഭാരതം എന്ന നമ്മുടെ ദർശനവുമായി നാം മുന്നോട്ട് പോകുമ്പോൾ, നമ്മുടെ രാജ്യത്തിന്റെ പുരോഗതിക്ക് ഒരു പ്രധാന സംഭാവന നൽകാൻ തുണി മേഖല വീണ്ടും ഒരുങ്ങിയിരിക്കുന്നു. ഭാരത് ടെക്സ് പോലുള്ള പരിപാടികൾ ആഗോള തുണിത്തരങ്ങളുടെ ശക്തികേന്ദ്രമെന്ന നിലയിൽ ഭാരതത്തിന്റെ സ്ഥാനം ശക്തിപ്പെടുത്തുന്നു. ഓരോ വർഷം കഴിയുന്തോറും ഈ പരിപാടി വിജയത്തിന്റെ പുതിയ മാനദണ്ഡങ്ങൾ സ്ഥാപിക്കുമെന്നും കൂടുതൽ ഉയരങ്ങളിലെത്തുമെന്നും എനിക്ക് ഉറപ്പുണ്ട്. ഈ പരിപാടി വൻ വിജയമാക്കിത്തീർത്ത എല്ലാവർക്കും എന്റെ ഹൃദയംഗമമായ അഭിനന്ദനങ്ങൾ.

വളരെ നന്ദി.
നമസ്കാരം.

****