কেন্দ্ৰীয় গৃহমন্ত্ৰী তথা সমবায় দপ্তৰৰ মন্ত্ৰী শ্ৰীযুত অমিত শ্বাহে আজি নতুন দিল্লীত নতুন অপৰাধমূলক আইনসমূহৰ এবছৰ সফল সমাপ্ত হোৱা উপলক্ষে অনুষ্ঠিত  “ন্যায় ব্যৱস্থাৰ ওপৰত আস্থাৰ এক সোণালী বছৰ” কাৰ্যসূচীত মুখ্য অতিথি হিচাপে ভাষণ দিয়ে। এই উপলক্ষে দিল্লীৰ লেফটেনেণ্ট গৱৰ্ণৰ শ্ৰী ভি.কে. ছাক্সেনা, মুখ্যমন্ত্ৰী শ্ৰীমতী ৰেখা গুপ্তা, কেন্দ্ৰীয় গৃহ সচিব আৰু চোৰাংচোৱা ব্যুৰোৰ সঞ্চালকো উপস্থিত থাকে।

শ্ৰী অমিত শ্বাহে নতুন অপৰাধ আইনৰ বিষয়ত  এখন প্ৰদৰ্শনীও উদ্বোধন কৰে। তেওঁ উল্লেখ কৰে যে যেতিয়া এই প্ৰদৰ্শনীখন পূৰ্বে চণ্ডীগড়ত অনুষ্ঠিত হৈছিল তেতিয়া প্ৰধানমন্ত্ৰী শ্ৰী নৰেন্দ্ৰ মোদীয়ে কেন্দ্ৰীয় গৃহ সচিব শ্ৰীযুত গোবিন্দ মোহনক নিৰ্দেশ দিছিল যে সমগ্ৰ দেশৰ প্ৰতিখন ৰাজ্যতে এই প্ৰদৰ্শনী আয়োজন কৰিব লাগে। ইয়াৰ লক্ষ্য আছিল সাংবাদিক, জ্যেষ্ঠ আৰক্ষী বিষয়া, বাৰ এছ’চিয়েশ্যনৰ সদস্য, সকলো ন্যায়িক বিষয়া, আৰু বিশেষকৈ স্কুল আৰু কলেজৰ ছাত্ৰ-ছাত্ৰীসকলে ইয়াক চাব পাৰে আৰু নতুন অপৰাধমূলক আইনসমূহৰ বিষয়ে জানিব পাৰে। শ্ৰী শ্বাহে কেন্দ্ৰীয় গৃহ সচিব আৰু তেওঁৰ সমগ্ৰ দলটোক এই গুৰুত্বপূৰ্ণ প্ৰদৰ্শনীৰ আয়োজন কৰাৰ বাবে অভিনন্দন জ্ঞাপন কৰে।

কেন্দ্ৰীয় গৃহমন্ত্ৰী শ্ৰী অমিত শ্বাহে কয় যে প্ৰধানমন্ত্ৰী শ্ৰী নৰেন্দ্ৰ মোদীৰ নেতৃত্বত প্ৰৱৰ্তন কৰা তিনিটা নতুন অপৰাধমূলক আইন সুলভ আৰু মানুহৰ কাষ চাপিব পৰা হ’ব, লগতে ন্যায়িক প্ৰক্ৰিয়াটোও সহজ, অধিক সামঞ্জস্যপূৰ্ণ আৰু স্বচ্ছ হ’ব। তেওঁ কয় যে প্ৰধানমন্ত্ৰী মোদীৰ নেতৃত্বত সামাজিক, অৰ্থনৈতিক, আৰু ৰাজনৈতিক ন্যায়ৰ ওপৰত ভিত্তি কৰি শাসন ব্যৱস্থাৰ সোণালী যুগ আৰম্ভ হ’বলৈ ওলাইছে। তেওঁ লগতে কয় যে প্ৰধানমন্ত্ৰী শ্ৰী নৰেন্দ্ৰ মোদীৰ নেতৃত্বত অনাগত দিনত আমাৰ অপৰাধমূলক ন্যায় ব্যৱস্থাই এক নতুন যুগত প্ৰৱেশ কৰিব, যিয়ে নিশ্চিতভাৱে ৰাইজৰ মাজত এক প্ৰবল আস্থা জগাই তুলিব যে ন্যায় শীঘ্ৰে প্ৰদান কৰা হ’ব। তেওঁ কয় যে নতুন আইনসমূহে ‘এফআইআৰ দাখিল কৰিলে কি হ’ব’ৰ দৰে ভয়ৰ ঠাইত ‘এফআইআৰ দাখিল কৰিলে তাৎক্ষণিক ন্যায় পাব ’ বুলি  মানুহৰ মাজত বিশ্বাস জন্মাব।

শ্ৰী অমিত শ্বাহে কয় যে নতুন অপৰাধ আইনসমূহে অনাগত দিনত ভাৰতীয় অপৰাধ ন্যায় ব্যৱস্থাক মৌলিকভাৱে ৰূপান্তৰিত কৰিব। তেওঁ উল্লেখ কৰে যে পূৰ্বে আমাৰ ন্যায় ব্যৱস্থাৰ আটাইতকৈ ডাঙৰ সমস্যাটো আছিল যে কেতিয়া ন্যায় প্ৰদান হ’ব কোনেও নাজানে। প্ৰায় তিনি বছৰৰ ভিতৰত এই আইনসমূহ সম্পূৰ্ণ ৰূপায়ণ হোৱাৰ পিছত এফআইআৰ দাখিলৰ পৰা আৰম্ভ কৰি উচ্চতম ন্যায়ালয়লৈকে দেশত ন্যায় প্ৰদান কৰা হ’ব বুলিও গৃহমন্ত্ৰীগৰাকীয়ে কয়। তেওঁ কয় যে এই আইনসমূহে নাগৰিকক ন্যায় প্ৰদানৰ বাবে দায়বদ্ধ তিনিটা মূল স্তম্ভ—আৰক্ষী, বিচাৰ আৰু ন্যায়পালিকাৰ বিষয়ত কঠোৰ সময়সীমা আৰোপ কৰে। শ্ৰী শ্বাহে লগতে কয় যে নতুন আইনসমূহে ৯০ দিনৰ ভিতৰত তদন্ত সম্পূৰ্ণ কৰা, অভিযোগনামা দাখিল কৰা, অভিযোগ ফ্ৰেমৱৰ্ক কৰা আৰু ৰায়দান কৰাৰ সময়সীমা নিৰ্ধাৰণ কৰিছে।

কেন্দ্ৰীয় গৃহমন্ত্ৰীয়ে কয় যে নতুন আইনসমূহত প্ৰযুক্তিভিত্তিক কেইবাটাও বিধানো অন্তৰ্ভুক্ত কৰা হৈছে যিবোৰ কাৰ্যকৰী হ’লে অপৰাধীসকলে সন্দেহৰ সুবিধা লাভ কৰি শাস্তিৰ পৰা হাত সাৰিবলৈ কোনো সুযোগ নাথাকিব। তেওঁ কয় যে নতুন অপৰাধমূলক ন্যায় ব্যৱস্থা সম্পূৰ্ণৰূপে কাৰ্যকৰী হোৱাৰ পিছত আমাৰ দেশত দোষী সাব্যস্ত হোৱাৰ হাৰ যথেষ্ট উন্নত হ’ব, আৰু অপৰাধীক নিশ্চিতভাৱে শাস্তি দিয়া হ’ব। শ্ৰী শ্বাহে কয় যে তিনিওখন নতুন আইন সম্পূৰ্ণৰূপে কাৰ্যকৰী হোৱাৰ পিছত প্ৰযুক্তিৰ ব্যৱহাৰৰ লগে লগে আমাৰ ন্যায় ব্যৱস্থা বিশ্বৰ আটাইতকৈ আধুনিক ন্যায় ব্যৱস্থাত পৰিণত হ’ব।

শ্ৰী অমিত শ্বাহে কয় যে প্ৰায় ৮৯খন দেশৰ ন্যায় ব্যৱস্থা অধ্যয়ন কৰি তাৰ পৰা প্ৰযুক্তিৰ ব্যৱহাৰ আইনগতভাৱে অন্তৰ্ভুক্ত কৰাৰ পিছত এই বিধানসমূহ নতুন আইনত অন্তৰ্ভুক্ত কৰা হৈছে। মোদী চৰকাৰে ভাৰতীয় দৃষ্টিকোণৰ পৰা এই আইনসমূহ সৃষ্টি কৰিছে। তেওঁ উল্লেখ কৰে যে পূৰ্বৰ আইনসমূহ ইংৰাজে সৃষ্টি কৰিছিল।

কেন্দ্ৰীয় গৃহমন্ত্ৰীগৰাকীয়ে  কয় যে নতুন আইনসমূহ ৰূপায়ণৰ ক্ষেত্ৰত নিবিড় আলোচনাৰ জৰিয়তে সৰু সৰু সুৰুঙাসমূহ পূৰণ কৰা হৈছে আৰু বহু অংশীদাৰৰ দৃষ্টিভংগীৰে বহু কাম কৰা হৈছে। শ্ৰী শ্বাহে কয় যে তেওঁ নিজেই এই আইনসমূহকলৈ  ১৬০খন বৈঠক অনুষ্ঠিত কৰিছিল। তেওঁ কয় যে ২০১৯ চনত আমি সকলো ৰাজ্যপাল, লেফটেনেণ্ট গৱৰ্ণৰ, মুখ্যমন্ত্ৰী, প্ৰশাসক, মুখ্য ন্যায়াধীশ, বাৰ কাউন্সিল আৰু আইন বিশ্ববিদ্যালয়ৰ পৰা পৰামৰ্শ বিচাৰিছিলো আৰু বি পি আৰ এণ্ড ডিয়েও সকলো আই পি এছ বিষয়াৰ পৰা পৰামৰ্শ বিচাৰিছিল। তেওঁ কয় যে ইয়াৰ পিছত এখন সমিতি গঠন কৰি প্ৰতিটো ধাৰা পঢ়ি সকলো পৰামৰ্শ বিবেচনা কৰি এই আইনসমূহ কাৰ্যকৰী কৰা হয়।

শ্ৰী অমিত শ্বাহে কয় যে এই আইনসমূহত শিশু আৰু মহিলাৰ বিৰুদ্ধে অপৰাধ সম্পৰ্কীয় এটা সুকীয়া অধ্যায় সংযোজন কৰা হৈছে। প্ৰথমবাৰৰ বাবে সন্ত্ৰাসবাদৰ সংজ্ঞা দিয়া হৈছে আৰু সংগঠিত অপৰাধৰো সংজ্ঞা দিয়া হৈছে আৰু কঠোৰ শাস্তি প্ৰদানৰ ব্যৱস্থা কৰা হৈছে। তেওঁ কয় যে নতুন আইনসমূহত বিচাৰ সঞ্চালকৰো  ব্যৱস্থা কৰা হৈছে,  যিয়ে দোষী সাব্যস্ত হোৱাৰ হাৰ বহু পৰিমাণে বৃদ্ধি কৰিব।

কেন্দ্ৰীয় গৃহমন্ত্ৰী তথা সমবায় দপ্তৰৰ মন্ত্ৰীগৰাকীয়ে লগতে কয় যে এই সকলোবোৰ কেৱল আৰক্ষী আৰু গৃহ মন্ত্ৰালয়ে কৰিব নোৱাৰে। নতুন আইনসমূহৰ সফল আৰু ফলপ্ৰসূ ৰূপায়ণৰ বাবে সজাগতা আৰু জনসাধাৰণৰ নিজৰ অধিকাৰৰ বিষয়ে জ্ঞান অতি গুৰুত্বপূৰ্ণ। শ্ৰী শ্বাহে কয় যে যেতিয়াই এই আইনসমূহ বিশ্লেষণ কৰা হ’ব, তেতিয়াই এই আইনসমূহ স্বাধীনতাৰ পিছৰ আটাইতকৈ ডাঙৰ সংস্কাৰ হিচাপে গণ্য কৰা হ’ব।  কাৰণ ন্যায় ব্যৱস্থাক — যিয়ে জনসাধাৰণৰ অধিকাৰ সুৰক্ষিত কৰে — স্বচ্ছ, নাগৰিককেন্দ্ৰিক আৰু সময়সীমাবদ্ধ কৰি তোলা ব্যৱস্থা ইয়াতকৈ  ডাঙৰ সংস্কাৰ হ’ব নোৱাৰে।

 RK/VV/PR/PS/DM