مرکزی وزیر داخلہ اور کوآپریٹیو کے وزیر جناب امت شاہ نے آج نئی دہلی میں نئے فوجداری قوانین کے ایک سال کی کامیابی سے تکمیل کے موقع پر منعقدہ پروگرام " نظام انصاف  میں اعتماد کا سنہرا سال" سے بطور مہمان خصوصی خطاب کیا۔ اس موقع پر دہلی کے لیفٹیننٹ گورنر جناب  وی کے سکسینہ، وزیراعلیٰ  محترمہ ریکھا گپتا ، مرکزی داخلہ سکریٹری اور انٹیلی جنس بیورو کی ڈائریکٹراور اہم شخصیات بھی موجود تھے۔

جناب امت شاہ نے کہا کہ آج نئے فوجداری قوانین پر ایک نمائش کا بھی افتتاح کیا گیا۔ انہوں نے ذکر کیا کہ جب یہ نمائش پہلے چنڈی گڑھ میں منعقد ہوئی تھی تب  وزیر اعظم جناب نریندر مودی نے مرکزی داخلہ سکریٹری جناب گووند موہن کو ملک بھر کی ہر ریاست میں اس نمائش کا اہتمام کرنے کی ہدایت دی تھی۔ اس کا مقصد اس بات کو یقینی بنانا تھا کہ صحافی، سینئر پولیس افسران، بار ایسوسی ایشن کے اراکین، تمام عدالتی افسران اور خاص طور پر اسکول اور کالج کے طلباء اسے دیکھ سکیں اور نئے فوجداری قوانین کے بارے میں جان سکیں۔ جناب شاہ نے مرکزی داخلہ سکریٹری اور ان کی پوری ٹیم کو اس اہم نمائش کے انعقاد کے لیے مبارکباد دی۔

مرکزی وزیر داخلہ جناب امت شاہ نے کہا کہ وزیر اعظم جناب نریندر مودی کی قیادت میں متعارف کرائے گئے تین نئے فوجداری قوانین affordable, accessible اور approachableہونے کے ساتھ ہی ساتھ عدالتی عمل کو آسان، زیادہ مستقل اور شفاف بھی بنائیں گے۔ انہوں نے کہا کہ وزیراعظم نریندر مودی کی قیادت میں سماجی، اقتصادی اور سیاسی انصاف پر مبنی حکمرانی کا سنہرا دور شروع ہونے والا ہے۔ انہوں نے مزید کہا کہ وزیر اعظم جناب نریندر مودی کی قیادت میں، آنے والے دنوں میں، ہمارا فوجداری انصاف کا نظام ایک نئے دور میں داخل ہو گا، جو یقینی طور پر لوگوں میں اعتماد کا ایک مضبوط احساس پیدا کرے گا کہ انصاف کی فوری فراہمی ہو گی۔ انہوں نے کہا کہ نئے قوانین اس اعتماد کے ساتھ 'اگر میں ایف آئی آر درج کروں گا تو کیا ہوگا' کے خوف کی جگہ لے لیں گے کہ 'ایف آئی آر درج کرنے سے فوری انصاف ملے گا'۔

جناب امت شاہ نے کہا کہ نئے فوجداری قوانین آنے والے دنوں میں ہندوستانی فوجداری انصاف کے نظام کو بنیادی طور پر بدل دیں گے۔ انہوں نے کہا کہ پہلے ہمارے نظام عدل کا سب سے بڑا مسئلہ یہ تھا کہ کسی کو معلوم نہیں تھا کہ انصاف کب ملے گا۔ وزیر داخلہ نے کہا کہ تقریباً تین سالوں میں ان قوانین کے مکمل نفاذ کے بعد ایف آئی آر درج کرنے سے لے کر سپریم کورٹ تک پورے ملک میں انصاف فراہم کیا جائے گا۔ انہوں نے کہا کہ یہ قوانین شہریوں کو انصاف فراہم کرنے کے تین اہم ستونوں پولیس، استغاثہ اور عدلیہ کو کئی جگہوں پر وقت کی پابندیوں کا پابند کیا گیا ہے۔ جناب شاہ نے مزید کہا کہ نئے قوانین 90 دنوں کے اندر تحقیقات مکمل کرنے، چارج شیٹ داخل کرنے، الزامات وضع کرنے اور فیصلہ سنانے کی آخری تاریخ بتاتے ہیں۔

مرکزی وزیر داخلہ نے کہا کہ نئے قوانین میں ٹکنالوجی پر مبنی کئی دفعات بھی شامل ہیں جن کے نفاذ کے بعد مجرموں کے لیے شک کا فائدہ اٹھا کر سزا سے بچنے کا کوئی موقع نہیں بچے گا۔ انہوں نے کہا کہ نئے فوجداری انصاف کے نظام کے مکمل طور پر نافذ ہونے کے بعد، ہمارے ملک میں سزا کی شرح میں نمایاں بہتری آئے گی، اور مجرموں کو یقینی طور پر سزا دی جائے گی۔ جناب شاہ نے کہا کہ تینوں نئے قوانین کے مکمل نفاذ کے بعد ٹیکنالوجی کے استعمال سے ہمارا نظام انصاف دنیا کا جدید ترین نظام انصاف بن جائے گا۔

جناب امت شاہ نے کہا کہ تقریباً 89 ممالک کے نظام انصاف کا مطالعہ کرنے اور ان سے ٹیکنالوجی کے استعمال کو قانونی طور پر شامل کرنے کے بعد ان دفعات کو نئے قوانین میں شامل کیا گیا ہے۔ مودی حکومت نے یہ قوانین ہندوستانی نقطہ نظر سے بنائے ہیں۔ انہوں نے کہا کہ سابقہ ​​قوانین انگریزوں نے اپنی حکمرانی کو طول دینے کے لیے انگلینڈ  کی پارلیمنٹ میں بنائے تھے، جب کہ نئے فوجداری قوانین وزیر اعظم جناب نریندر مودی کی قیادت میں ہندوستان کے عوام کی منتخب حکومت نے ہندوستانی شہریوں کے فائدے کے لیے بنائے ہیں۔ وزیر داخلہ نے کہا کہ پرانے قوانین کا مقصد برطانوی راج کو بڑھانا اور ان کی املاک کی حفاظت کرنا ہے، جب کہ نئے قوانین کا مقصد ہندوستانی شہریوں کی جان، مال اور تمام آئینی طور پر ضمانت شدہ حقوق کا تحفظ کرنا ہے۔

 مرکزی وزیر داخلہ اور تعاون کے وزیر نے کہا کہ اب آئی پی سی کی جگہ بھارتیہ نیائے  سنہتا 2023 (بی این ایس)، سی آر پی سی کو بھارتیہ شہری تحفظ سنہتا 2023 (بی این ایس ایس) اور انڈین ایویڈینس ایکٹ کو بھارتیہ ساکشیہ ادھنیم 2023 (بی ایس اے) کے ساتھ بدلنے سے یہ ظاہر ہوتا ہے کہ ان قوانین کا مقصد سزا نہیں بلکہ انصاف فراہم کرنا ہے ۔ انہوں نے کہا کہ یہ ہندوستان کی نیائے یاترا کے لئے ایک سنہرا باب بننے  والا ہے۔ اب تبدیلی کاغذ پر نہیں ہے کیونکہ حکومت ہند اور ریاستی حکومتوں نے ان قوانین میں ٹیکنالوجی کو شامل کرنے پر کروڑوں روپے خرچ کیے ہیں۔ جناب شاہ نے کہا کہ ہم نے 7 سال یا اس سے زیادہ کی سزا کو متوجہ کرنے والے ہر جرم میں فورنسک  جانچ کو لازمی قرار دیا ہے اور اب نیشنل آٹومیٹڈ فنگر پرنٹ آئیڈینٹی فکیشن سسٹم (NAFIS) کا بھی بہت اچھے طریقے سے استعمال کیا جا رہا ہے۔ اسی طرح، POCSO کے معاملے میں، ڈی این اے میچنگ کسی بھی مجرم کو سزا سے بچنے نہیں دے گی۔

جناب امت شاہ نے کہا کہ پچھلے ایک سال میں تقریباً 14 لاکھ 80 ہزار پولیس اہلکاروں، جیلوں میں تعینات 42 ہزار ملازمین، 19 ہزار سے زیادہ عدالتی افسران اور 11 ہزار سے زیادہ سرکاری وکیلوں کو تربیت دی گئی ہے۔ انہوں نے کہا کہ ہم نے پچھلے ایک سال میں مسلسل جائزہ میٹنگیں کی ہیں اور 23 ریاستوں اور مرکز کے زیر انتظام علاقوں نے 100 فیصد صلاحیت سازی مکمل کر لی ہے۔ 11 ریاستوں اور مرکز کے زیر انتظام علاقوں میں ای-ساکشیہ اور ای- سمن کا نوٹیفکیشن جاری کیا گیا ہے، نیائے  شروتی کو 6 ریاستوں اور مرکز کے زیر انتظام علاقوں میں مطلع کیا گیا ہے اور 12 ریاستوں اور مرکز کے زیر انتظام علاقوں میں سزا کے طور پر کمیونٹی سروس کو مطلع کیا گیا ہے۔ انہوں نے کہا کہ تمام ریاستوں اور مرکز کے زیر انتظام علاقوں میں دہلی حکومت نے ان قوانین کو تیزی سے نافذ کرنے میں بہترین کارکردگی کا مظاہرہ کیا ہے۔

مرکزی وزیر داخلہ نے کہا کہ نئے قوانین کے نفاذ میں گہری مشاورت کے ذریعے چھوٹی چھوٹی خامیوں کو پُر کیا گیا ہے اور ملٹی اسٹیک ہولڈر اپروچ کے ساتھ بہت سا کام کیا گیا ہے۔ جناب شاہ نے کہا کہ انہوں نے خود ان قوانین پر 160 میٹنگیں کیں۔ انہوں نے کہا کہ 2019 میں ہم نے تمام گورنرز، لیفٹیننٹ گورنرز، وزرائے اعلیٰ، منتظمین، چیف جسٹس، بار کونسل اور لاء یونیورسٹیوں سے تجاویز طلب کی تھیں اور بی پی آر اینڈ ڈی نے بھی تمام آئی پی ایس افسران سے تجاویز طلب کی تھیں۔ انہوں نے کہا کہ اس کے بعد ایک کمیٹی تشکیل دی گئی اور ہر حصے کو پڑھ کر اور تمام تجاویز پر غور کر کے ان قوانین کو نافذ کیا گیا۔

جناب امت شاہ نے کہا کہ بچوں اور خواتین کے خلاف جرائم پر ان قوانین میں ایک الگ باب کا اضافہ کیا گیا ہے۔ پہلی بار دہشت گردی کی تشریح کی گئی ہے اور منظم جرائم کو بھی سمجھایا گیا  اور اس کے لیے سخت سزا کا بندوبست کیا گیا ہے۔ انہوں نے کہا کہ نئے قوانین میں ڈائریکٹر آف پراسیکیوشن کا بھی انتظام کیا گیا ہے جس سے سزا کی شرح میں بہت اضافہ ہو گا۔

مرکزی وزیر داخلہ اور کوآپریٹیو  کے وزیر نے کہا کہ پولیس اور وزارت داخلہ اکیلے یہ سب نہیں کر سکتے۔ نئے قوانین کے کامیاب اور موثر نفاذ کے لیے عوام میں اپنے حقوق کے بارے میں آگاہی بہت ضروری ہے۔ جناب شاہ نے کہا کہ جب بھی ان قوانین کا تجزیہ کیا جائے گا، انہیں آزادی کے بعد کی سب سے بڑی اصلاحات کے طور پر دیکھا جائے گا، کیونکہ انصاف کے نظام کو – جو لوگوں کے حقوق کا تحفظ کرتا ہے – شفاف، شہری پر مبنی اور وقت کا پابند بنانے سے بڑی کوئی اصلاح نہیں ہو سکتی۔

****

ش ح۔ ف خ ۔ ت ع

UNO:2359