امور داخلہ اور امداد باہمی کے مرکزی وزیر جناب امت شاہ نے آج تلنگانہ کے نظام آباد میں قومی ہلدی بورڈ کے صدر دفتر کا افتتاح کیا۔ اس موقع پر کوئلہ اور کان کنی کے مرکزی وزیر جناب جی کشن ریڈی، مرکزی وزیر مملکت برائے داخلہ جناب بندی سنجے کمار اور کئی دیگر معززین موجود تھے۔

اپنے خطاب میں جناب امت شاہ نے کہا کہ وزیراعظم جناب نریندر مودی نے ملک بھر خاص طور پر تلنگانہ کے لاکھوں ہلدی کسانوں کی 40 سال پرانی مانگ کو قومی ہلدی بورڈ کے قیام سے پورا کیا ہے۔ انہوں نے کہا کہ وزیراعظم کی طرف سے ملک بھر خاص طور پر تلنگانہ اور نظام آباد کے ہلدی کسانوں سے کیا گیا وعدہ آج پورا ہو رہا ہے۔ انہوں نے بتایا کہ نظام آباد کو کئی دہائیوں سے ہلدی کی راجدھانی کے طور پر جانا جاتا ہے اور یہاں کے کسان صدیوں سے ہلدی کی کاشت کر رہے ہیں، لیکن یہ عالمی منڈیوں تک نہیں پہنچ سکی۔ جناب شاہ نے مزید کہا کہ قومی ہلدی بورڈ کے قیام سے اگلے 3 سے 4 سال میں نظام آباد کی ہلدی، دنیا کے کئی ممالک تک پہنچے گی۔

جناب امت شاہ نے کہا کہ ایک بار جب قومی ہلدی بورڈ باضابطہ طور پر کام شروع کر دے گا، تو ہلدی کے کسان دلالوں کے اثر سے آزاد ہو جائیں گے۔ انہوں نے کہا کہ قومی ہلدی بورڈ ہلدی کی پیکنگ، برانڈنگ، مارکیٹنگ اور برآمد کے لیے ایک مکمل چین قائم کرے گا۔ انہوں نے زور دیا کہ ہلدی اینٹی وائرل، اینٹی کینسر اور اینٹی انفلامیٹری ہے اور اس کی طبی خصوصیات کی وجہ سے یہ دنیا بھر میں ایک معجزاتی دوا کے طور پر جانی جاتی ہے۔ انہوں نے مزید کہا کہ ہلدی ایک شاندار دوا ہے، اور اس کی تھوڑی سی مقدار استعمال کرنے سے انسانی جسم سے متعدد بیماریاں بیک وقت ختم ہو سکتی ہیں۔ انہوں نے یہ بھی بتایا کہ جی آئی ٹیگ شدہ نامیاتی ہلدی کی پیداوار اور مارکیٹنگ کا آغاز بھی ہو چکا ہے۔

مرکزی وزیر داخلہ نے کہا کہ بھارت سرکار نے 2030 تک ہلدی کی برآمدات میں ایک ارب ڈالر کا ہدف مقرر کیا ہے اور اس کے لیے تمام ضروری تیاریاں مکمل کر لی گئی ہیں۔ انہوں نے کہا کہ قومی ہلدی بورڈ اس بات کو یقینی بنانے کے لیے کام کرے گا کہ ہلدی کی زیادہ سے زیادہ قیمت اس کے کسانوں تک پہنچے، بین الاقوامی منڈیوں میں ہلدی کے استعمال کو فروغ دیا جائے، اور ممکنہ منڈیوں میں ہندوستانی ہلدی کی طبی خصوصیات کو عام کیا جائے۔ یہ بورڈ اس بات کو بھی یقینی بنائے گا کہ ہندوستانی ہلدی کے معیار اور حفاظتی معیارات عالمی معیار کے مطابق ہوں، مناسب پیکنگ کا بندوبست کیا جائے، اور کسانوں کو ہلدی کی کٹائی کے طریقوں پر تربیت اور ہنرمندی کی ترقی کے مواقع فراہم کیے جائیں تاکہ برآمد سے متعلق کسی بھی رکاوٹ سے بچا جا سکے۔ جناب شاہ نے مزید کہا کہ ہلدی کے صحت سے متعلق فوائد پر تحقیق و ترقی کی جائے گی تاکہ اسے دنیا کے سامنے پیش کیا جا سکے۔

جناب امت شاہ نے کہا کہ تلنگانہ کے نظام آباد، جگتیال، نرمل اور کام ریڈی اضلاع بھارت کے سرفہرست ہلدی پیدا کرنے والے اضلاع میں شامل ہیں۔ انہوں نے بتایا کہ 2025 میں ہلدی کے کسانوں کو ہلدی کے لئے فی کوئنٹل 18,000 سے 19,000 روپے کی قیمت ملی، اور اگلے تین سال میں کسانوں کو فی کوئنٹل 6,000 سے 7,000 روپے اضافی دلانے کی کوشش کی جائے گی۔ جناب شاہ نے بتایا کہ 24-2023 میں بھارت میں 3 لاکھ ہیکٹر زمین پر ہلدی کی کاشت کی گئی، جس سے 10.74 لاکھ ٹن پیداوار حاصل ہوئی۔ انہوں نے مزید کہا کہ وزیراعظم مودی نے برآمدات میں شامل کسانوں کو فائدہ پہنچانے کے لیے نیشنل کوآپریٹو ایکسپورٹس لمیٹڈ اور نامیاتی کاشتکاری سے وابستہ کسانوں کے لیے نیشنل کوآپریٹو آرگینیکس لمیٹڈ قائم کیا ہے۔ انہوں نے زور دیا کہ وزیراعظم مودی نے اپنے دور میں وعدوں کو پورا کرنے کا کلچر فروغ دیا ہے اور 2023 میں کیا گیا وعدہ آج پورا ہوا ہے۔

************

ش ح ۔   م   ع ۔  م  ص

(U :  2264  )